1. Ngera te urriid a Adam me a Eva? Me ngera mlo rsel?

OMOMDASU, e ngtecha ngike el kirel melib a llach el kirel a ungil me a mekngit? Sel taem el Adam me a Eva a mlo kolii a rdechel sel kerrekar er a mo medengei a ungil me a mekngit, e te mileketeklii a uldesuir el kmo, ngdimlak loumerang er a Jehovah me a llechul. Te bai millilt el di tir el meruul a llecherir el kirel a ungil me a mekngit. (Gen. 3:22) Engdi ka di molatk aike el tekoi el tir a urriid. Te urridii a kmes el deleuill er tir lobengkel a Jehovah. Te dirrek el urridii a techellir el kiei el mo cherechar, e dirrek el mlo uchul a klengit me a kodall el kirir a rengelekir. (Rom 5:12) Me a omelilt el leriruul a mlo uchul a klou el chelebuul.

2-3. (a) Ngera ngmirruul ngike el eunuk el chad er a Ethiopia er sera lomerk er a klumech el mo er ngii a Filip? (b) Ngera el klengeltengat a bo dengai sel bo demetecholb, e ngera el ker a bo donger?

² Ka momtab er a klekakerous er a omerellel a Adam me a Eva me a omerellel ngike el chad er a Ethiopia er sel taem er a lomerk er a klumech a Filip el mo er ngii. Ngike el eunuk a kmal uleba omereng el saul el kirel a tekoi el bla leruul a Jehovah me a Jesus el kirel me ngdi mle mereched el mo metecholb. (Rel. 8:34-38) Me kid sel detibir er a rengud el mora Dios, el ua ngike el eunuk, e bo demetecholb, e kede dirrek el meketeklii a uldesued. Kede ochotii el kmo kede oba omereng el saul el kirel a tekoi el bla leruul a Jehovah me a Jesus el kired. Kede dirrek lochotii el kmo kede oumerang er a Jehovah, e ungil medengei el kmo ngii a kirel el melib a llach el kirel a ungil me a mekngit.

³ Ka di molatk aike el klengeltengat el dengai sel dosiou er a Jehovah! A ta er ngii, a mo er ngii a omeltked el mo ngmai aike el rokui el tekoi el Adam me a Eva a urriid, el uldimukl er a techall el mo kiei el mo cherechar. Me a klaumerang er kid er a Jesus Kristus, a uchul me  a Jehovah a ousubes a kngtid e meskid a klikiid el ukltked. (Mt. 20:28; Rel. 10:43) Kede dirrek el mo chedal a telungalek er a Jehovah el teloi er tirke el mla nguu a kengei er ngii el mesiungel el oba kmal klebokel el omelatk el kirel a klengar er a ngar medad el klebesei. (Jn. 10:14-16; Rom 8:20, 21) Me alta e ngkmal bleketakl aika el klungiaol el dodengei, engdi te ngar ngii a rebebil el mla mo medengelii a Jehovah el dirk omai er a rengrir me ngdiak lotireklii a blekerdelel ngike el eunuk el chad er a Ethiopia. Me ngera rulleterir me ngdiak bo lemetecholb? E mekera e sebechir el mo mesisiich er a omelsemai el lechelebangel?

4-5. Ngera lomelsemai a lechilarm er ngii a kekerei el chad el Avery me a kekerei el redil el Hannah?

⁴ Omdasu el kmo ngdiak lsebechir e metitur. A demal me a delal a Avery a Sioning er a Jehovah. A demal a kmal ungil a chisel el kmo ngkmal ungil chedam e dirrek el kmal ungil mesiou el ta er a remechuodel. Me nguaisei, engdi a Avery a ulemai er a rengul el mo metecholb. E ngera uchul? Ngdmu el kmo: “A kulemdasu el kmo ngdiak lsebechek el mo meruul a tekoi el ua demak.” Ngdirrek el dimlak lomdasu el kmo ngmo sebechel el kutmokl a ngerachel el mo moterekokl er ngii er a ngar medal taem. Ngmelekoi el kmo: “Ak mle bekikl a bo lolengit er ngak el mo meluluuch er a mederir a rechad, e mo oltobed a cheldecheduch, me a lechub e ak mo oungerachel a tekoi er a odingel.”

⁵ A Hannah el 18 a rekil a chilarm er a mekngit el uldesuel el bedulngii. Ngmlukeroul el ngelekir a rechad el mesiou er a Jehovah. Me nguaisei, engdi ngulemdasu el kmo ngdiak el sebechel kiei el lotaut a llechul a Jehovah. E ngera uchul? A Hannah a milekurulii a mekngit el uldesuel el di kirel. Me a lebebil er a taem e ngkmal mo mekngit a uldesuel me ngdi ngii el melemall a bedengel, el di rullii a klengar er ngii el mengal mo meringel. Ngdilu el kmo: “Ngdimlak a ta el kuuchais er a rechad el kirel a tekoi el kuruul, el mo lmuut er a rechad er a blik,” ngdirrek el dilu el kmo “me ak mlo omdasu el kmo a Jehovah a kmal diak lsebechel mo betik a rengul er ngak el omerellek a uchul.”

6. Ngera milerrob er a Vanessa me ngdimlak bo lemetecholb?

⁶ Omengesuseu er a resechelid. A Vanessa el 22 a rekil a kmo, “Ngmla er ngii a kmal ungil sechelik el bekord el teruich el rak el kim kaodengei.” Me nguaisei, engdi ngika el sechelil a Vanessa a kmal dimlak lolisiich er ngii el kirel a turrekong er ngii el mo metecholb. Me tiang a kmal millemall er a rengul a Vanessa, me ngdilu el kmo, “Ngkmal mle meringel er ngak el osiik er a resechelik, e mle bekikl el kmo a lsekum ak torebengii tia el deleuill er kemam e ngmo meringel er ngak el metik er a lmuut lungil sechelik.”

7. Ngera ngmle bekikl er ngii a kekerei el redil el Makayla, e ngera uchul?

⁷ Bekikl el mo remuul a cheleuid el tekoi. A Makayla a mle eim a rekil er sel taem er a lemesuld a ngklel a ochedal. Ngmlukeroul el ulemes er a demal me a delal el kmal chilarm el mekngit  lomerellel a ochedal a uchul. Me ngdilu el kmo: “Ak mle bekikl el mo metecholb e bo kruul a lmuut el betok el cheleuid, e bo lemesuld a ngklek, e dirrek el bo kuchul a lmuut el betok el klengiterreng el mora rechad er a blik.”

8. Ngera ngmle medakt er ngii a kekerei el chad el Miles?

⁸ Dakt el kirel a ultok. A demal a Miles me a bechil a demal a mesiou er a Jehovah, engdi a delal el milechelii a diak el Sioning. Me ngmelekoi el kmo: “Ak kiliei lobengkel a delak el 18 el rak, engdi ak mle medakt el ouchais er ngii el kmo ngsoak el mo metecholb. Ak miles a omerellel el mora demak er sel taem er a bo el Sioning. Me ak mle medakt e le a kulemdasu el kmo nglocha mo meruul a osisiu el tekoi el bedul ngak.”

9. Ngera sebechel mo duubech sel mosuub el kirel a bltkil a rengul me a kllourreng er a Jehovah?

⁹ A Adam me a Eva a millilt el mo diak losiou er a Jehovah e le tir el mlo diak lolisiich er a bltkil a rengrir el mo er ngii. Me nguaisei, engdi a Jehovah a milechititerir me te kiliei el mo er ngii a rengelekir e kiltmokl a llach el kirel a okurulir a rengelekir. Me a omelilt el lurruul a Adam me a Eva el mlo sorir el mo ileakl er a Jehovah a di mle mereched el obeketakl el kmo ngkmal mle klebelung el omelilt. Ngike el kot el klou el ngelekir el sechal a milekodir a dimlak a telemellel el ochellel, e ulemuchel er seikid el mei e a koadelchad me a rechorecherreng a di ngar a rengrir a rechad er a bek el telungalek. (Gen. 4:8; 6:11-13) Me nguaisei, engdi a Jehovah a mla er ngii a rolel e ngolsobel er a rokui el ngelekel a Adam me a Eva el tir a sorir el mesiou er ngii. (Jn. 6:38-40, 57, 58) Me a cherengel a taem el mosuub el kirel a kllourreng me a bltkil a rengul a Jehovah, e ngsebechel mukeroul a bltkil a rengum el mo er ngii. Seikid e ngmo soam loltngakl er a rolel a klengar el Adam me a Eva a ngileltii, e dirrek el mo soam el tibir a klengar er kau el mora Jehovah.

10. Ngera me a omelebedebekem er a bades er a Psalm 19:7 a sebechel ngosukau el mo mesiou er a Jehovah?

¹⁰ Molemolem el mesuub el kirel a Jehovah. A cherengel a taem el mosuub el kirel a Jehovah, e ngmengal mo ulterekokl a rengum el kmo ngsebechem el mo ungil mesiou er ngii. A Avery el dulsaod er ngii er a uchei a dmu el kmo: “Ngmlo ulterekokl a renguk lokiu sel kunguiu e kulebedebek er a telbiil el medung er a Psalm 19:7.” (Monguiu.) Sel taem el Avery a mo mesang a rolel e a Jehovah a oltaut er tia el telbiil, e ngmengal mukeroul a bltkil a rengul el mora Dios. A bltikerreng el mora  Dios a diak di lengesukid el mo ulterekokl a rengud el kmo ngsebeched el mesiou er ngii, e ngdirrek el ngosukid el mo oleiub er kid er aike el tekoi el louketui a Dios, e meskid a urunguled el mo soad el mesiou er ngii. A Hannah el dulsaod er ngii er a uchei a dmu el kmo: “Ngokiu a omengiuek er a Biblia me a omesubek el di ngak el tang, e ak mlo mtebengii el kmo sel kulemall er a bedengek e ak dirrek el melemall er a rengul a Jehovah.” (1 Pe. 5:7) A Hannah a mlo ‘chad er chotutel a Tekoi.’ (Jak. 1:22) Me ngera dilubech? Ngdmu el kmo: “Sera bo kutebengii el kmo a kulengesenges er a Jehovah e ngmo uchul a klungiolek, e ak milekurulii a bltkil a renguk el mo er ngii. Me chelechang e ngkmal ulterekokl a renguk el kmo a Jehovah a di mo blechoel lomekrael er ngak sel bo kuusbech er a ngelsuil.” Me a Hannah a mlo mesisiich er sel blekerdelel el di ngii el melemall er a bedengel. E mlo tibir er a rengul el mora Jehovah e mlo metecholb.

11. Ngmilekera Vanessa e metik er a rungil sechelil? E ngera kede suubii er tia el tekoi?

¹¹ Molilt er a rungil sechelim. A cherengel a taem e a Vanessa el dulsaod er ngii er a uchei a mlo mtebengii el kmo ngika el sechelil a mle uchul me ngdimlak lsebechel mo mesiou er a Jehovah. Me ngmlo diak el sechelil. Engdi a Vanessa a mirruul a lmuut el bebil er a tekoi. Ngmlo blak a rengul losiik er a rebeches el sechelil er a chelsel a ongdibel. Ngmesaod el kmo a kerebai el lullechotii a Noah me a telungalek er ngii a kmal ngilsuir. Ngdilu el kmo: “Tirkang a kiliei el iliuekl er a rechad el dimlak lebetik a rengrir er a Jehovah, engdi ngar a delongelir el telungalek e ngmle ungil a klausechelei er tir.” A uriul er a lemetecholb a Vanessa, e ngmlo mesiou el pioneer. Me chelechang e ngdmu el kmo, “Tiang a kmal mla ngosukak el metik er a rungil sechelik, el diak di lengar a chelsel a ongdibel er ngak, e ngdirrek el ngar a kuk bebil er a ongdibel.” Kau me ngdirrek el sebechem el metik er a rungil sechelim a lsekum ngmo blak a rengum el meruul er a ureor el Jehovah a mla oterekeklii er kid.​—Mt. 24:14.

12. Ngera el rolel a dakt a dimlak er a uldesuel a Adam me a Eva, e tiang ngmlo uchul a ngerang?

¹² Bo letabesul a uldesuem el kirel a dakt. A bebil rolel a dakt a ungil kired. El ua tiang, ngkired el mo oba dakt e le ngdiak lsoad el melemall er a rengul a Jehovah. (Psa. 111:10) Oleko Adam me a Eva a milekurulii tiaikid el rolel a dakt, e ngdimlak a ta el bo lomtok er a Jehovah, engdi te mlo omtok. Me a uriul er a bo leuaisei a blekerdelir, e ngulebok a mederir me te mlo melechesuar el kmo te mla ruebet er a klengit. Me ngdi mlo sebechir el  meliukes er a klengit me a kodall el mora rengelekir. Me tir el mlo sebechir el mesang me a lechub e te mlo medengei el kmo ngua ngera blekerdelir er a uriul a uchul me te mlo merur e le tir el di meau me te mlo melekedek er tir.​—Gen. 3:7, 21.

13-14. (a) A doltirakl er a bades er a 1 Petrus 3:21, e ngera uchul me ngdiak el kired el kmal mo medakt er a kodall? (b) Ngera ike el uchul me ngbetik a rengud er a Jehovah?

¹³ Alta e kede oba tabesul rolel a dakt el bedul a Jehovah, engdi ngdiak doba klou el dakt el kirel a kodall. A Jehovah a mla mekengii a techall el mo sebeched el mo kiei el mo cherechar. Me a lsekum kede ruebet er a klengit engdi kede mera el ouuchel er a rengud e obult er a kngtid, e a Jehovah a ousubes er kid. Ngokiu a klaumerang er kid el kirel a olubet el tengetengel a Ngelekel e ngousubes a kngtid. Me a ta er a kot el klou a ultutelel el rolel e kede ochotii a klaumerang er kid, a sel detibir a klengar er kid el mora Dios e bo demetecholb.​—Monguiu er a 1 Petrus 3:21.

¹⁴ Ngkmal betok a ungil luchul me ngbetik a rengud er a Jehovah. Ngikang a diak di lomeskid a ungil tekoi el doldeu a rengud er ngii er a bek el sils, e ngdirrek losisecheklid er a klemerang el kirel me a moktek er ngii. (Jn. 8:31, 32) Ngmla meskid a ongdibel er a Rekristiano el mo omekrael e olengeseu er kid. Ngolengeseu er kid me ngsebeched loutekangel a mondai er kid er chelechang, e dirrek el meskid a omelatk el mo cherrungel e mo kiei el mo cherechar er a ngar medad el taem. (Psa. 68:19; Och. 21:3, 4) Me sel bo dungil melebedebek aike el betok el tekoi el bla leruul a Jehovah el ochotii el kmo ngbetik a rengul er kid, e ngmengal mo betik a rengud er ngii. E sel bo lebetik a rengud er a Jehovah, e ngmo tabesul a osenged el kirel a dakt. Ngrolel a dakt el rullid me ngdiak lsoad el tomellii a rengul Ngika el Di Ta el Dios el mla mo betik a rengud er ngii.

15. Ngmilekera Makayla e mlo mesisiich er sel uldesuel el mle bekikl el mo remuul a cheleuid el tekoi?

¹⁵ A Makayla el dulsaod er ngii er a uchei, a mlo mesisiich er sel uldesuel el mle bekikl el mo remuul a cheleuid el tekoi er sera bo lodengei el kmo a Jehovah a ousubes a kngtid. Ngdmu el kmo, “Ak mlo medengei el kmo kede rokui el diak demecherrungel me kede dirrek el mo remuul a cheleuid. Ak dirrek el mlo ungil medengei el kmo a Jehovah a betik a rengul er kid e dirrek el mo ousubes a kngtid el olubet el tenget a uchul.” Me a bltkil a rengul el mora Jehovah a mlo uchul e ngmlo melib er a rengul el mo er ngii e dirrek el mlo metecholb.

16. Ngmilekera Miles e mongeseu el mo mesisiich er a dakt el kirel a ultok?

¹⁶ A Miles el mle bekikl el kmo a delal a locha mo omtok er ngii el kirel a uldesuel el soal mo metecholb, a mlo olengit a ngeso er a ta er a odam el oldingel a ongdibel. Ngdilu el kmo, “Ngii me ngdirrek el mlukeroul er a chelsel a telungalek el kakerous a klechelid er ngii. Ngii el odam a mlo sebechel ngosukak el mo melatk a tekoi el sebechek el mo mesaod el mora delak lochotii el kmo ak mla tibir er a renguk el mo metecholb e dirrek el subedii el kmo ngdiak el demak a orrimel er ngak el mo metecholb.” A delal a Miles a dimlak ledeu a rengul er tia el telbilel a rengul. Me a cherengel a taem e a Miles a lilemelemii tia el telbilel me ngmlo kirel tuobed er a blil a delal. Me ngdmu el kmo “A omesubek el kirel a ungil tekoi el bla leruul a Jehovah el kirek a kmal rirtechii a renguk. Me sel bo kulatk  el kirel a olubet el tengetengel a Jesus, e ak mo medengelii a delechel a bltkil a rengul a Jehovah el bedul ngak. Tiaikid luldasu a rirellak el mo soak el tibir a klengar er ngak el mora Jehovah e mlo metecholb.”

17. Ngera el techall a dobang el rokui?

¹⁷ Sera lekelii a rdechel sel kerrekar el ngar a Eden a Eva, e ngultngeklii a Demal. Me sel taem el Adam a mlo obengkel el menga er ngii, e ngulechotii el kmo ngdimlak loba omereng el saul el kirel a rokui lungil tekoi el Jehovah a mla remuul el mo er ngii. Kede rokui el ngar ngii a techelled el mo ochotii el kmo ngdiak deua uldesuel a Adam me a Eva. Kede bai oba klou el omereng el saul el kirel a rokui el tekoi el bla leruul a Jehovah el kired. Me sel bo demetecholb e kede meketeklii el mora Jehovah el kmo kede oumerang el kmo ngii a ngar ngii a llemeltel el melib a llach el kirel a ungil me a mekngit. Kede dirrek el meketeklii el kmo ngbetik a rengud er a Demad e dirrek el oumerang er ngii.

18. Ke mekerang e mo ungil mesiou er a Jehovah?

¹⁸ A omelsemai el bo dechelebangel er a uriul er a demetecholb a mo kiei el blekerdelel a klengar er kid a oltirakl a llechul a Jehovah el diak el llechud. A rebetok el miliol a kiei el uaisei a blekerdelel a klengar er tir er chelechang. Me kau a sebechem el mo uai tir a lsekum ke melemolem el menglou er a klemedengei er kau er a Tekingel a Dios el Biblia, e teloi er a rudam me a rudos er kau, e mo blak a rengum el omerk a chisel a tekoi el bla msuub el kirel ngika el betik a rengul el Demam. (Heb. 10:24, 25) E sel moruul a omelilt er kau, e morrenges a ulekrael el Jehovah a omeskau lokiu a Tekingel me a cheldebechelel. (Isa. 30:21) Seikid e a rokui el tekoi el moruul a di mo ungilbesul.​—Osi. 16:3, 20.

19. Ngera el tekoi a kirem el melemolem el melatk er ngii, e ngera uchul?

¹⁹ Me sel molemolem el melatk a klungiolel a ulekrael er a Jehovah, e a bltkil a rengum el mo er ngii me a llechul a mengal mo mesisiich. Seikid e ngmo diak a ngii di el tekoi el lolisiich a Satan el sebechel rullau me ngmo diak mosiou er a Jehovah. Ka di molatk er kau er a chelsel a ta el telael el rak er a ngar medad. Ke mo omes el beduluriul el kirel tia el telbilem el mlo metecholb el kmo ngkot lungil omelilt el mrirellii!