1. Itshi Adama nu Eva atotesele, nu malamba atshi desizio diawo diabatele?

UDI mutangiza egi nanyi udi naye gutuhana mikhuala idi mumonesa egi ndaga eyi yabonga, yiyi yabola? Tangua Adama nu Eva adile bundu dia mutshi wa gujiya ndaga jiabonga nu jiabola, amonesele haphelo egi atunyile utuameji wa Yehowa nu mikhuala yenji. Azudile desizio dia gutomba hakhawo itshi idi yabonga, itshi idi yabola. (Gis. 3:22) Uvi tala ima atotesele: Atotesele ufuta wawo nu Yehowa nu luendu lua gujinga ivo nu ivo. Luko, abatele gubola nu gufua gudi an’awo. (Lomo 5:12) Desizio diawo diabatele malamba avula.

2-3. (a) Muenya gu Etiopia watshitshile itshi hamulongesele Filipho? (b) Ndaga tshi jiabonga mbatuheta gula tuabatijiwa? Mihu itshi tuza muzuelela mu longo edi?

² Fuanesa khadilo dia Adama nu Eva nu dia muenya gu Etiopia yonu Filipho walongesele. Muenya gu Etiopia muene wasuangulugile muavula nu ndaga Yehowa nu Yesu amutshitshidile, hene wabatijiwe muphushi. (Makal. 8:34-38) Luholo lumoshi nji, tangua tuana gudihana gudi Nzambi nu tuana gubatijiwa, tuana gumonesa haphelo egi tuana gusuanguluga nu ndaga Yehowa nu Yesu atshitshile mukunda nu esue. Tuana gumonesa nji egi tuana gushila Yehowa mutshima nu tuana gujiya nji egi muene phamba udi naye guhaga mikhuala ha gujiya ndaga jidi jiabonga nu jidi jiabola.

³ Tangiza gubonga tuana guheta luholo tuana gukombelela Yehowa! Ha gufezegesa, Yehowa mbawutuhana monyo wa ivo nu ivo nu ima yagasue yatotesele Adama nu Eva. Yehowa wana gututotesela gubola guetu nu wana gutuhana mutshima waphelegeta handaga tuana guhaga gutshigina gudi Yesu Klisto. (Mat. 20:28; Makal. 10:43) Yehowa wana gututanga nji mukatshi dia akombeledi enji ana gumusuanguluisa, adi nu felela diabonga dia masugu adi muza. (Yone 10:14-16; Lomo 8:20, 21) Athu avula ana gulonguga giamatshidia ana  gujiya nji ndaga jiene, uvi anago gulandula gifezegeselo gia muenya gu Etiopia. Itshi yana guakanga njila? Luholo lutshi ajiya gubinga ndaga jiene ha gubatijiwa?

4-5. Malamba atshi Avery nu Hanna ataganele nawo?

⁴ Gudimona gifua ushigo watagana. Mvuaji jia Avery jidi Matemue a Yehowa. Athu ana gujiya egi sh’enji wakhala muthu wabonga, nu mukulu wabonga mu hungu. Uvi Avery wakhalelego mutshigina gubatijiwa. Mukunda natshi? Wazuelele egi: “Ngakhalele mutangiza egi mbangushigo mukhala nu khadilo diabonga gifua tata.” Wakhalele mumona luko egi gakhalelego watagana ha gutagenesa inemo yajiya gumuhanewa mu hungu masugu adi muza. Wazuelele luko egi: “Ngakhalele muvua woma ha gutshita gisambu hadi athu avula, nu ha gulongesa gutuama, nga ha gutuameza hunji dia mudimo wa gulongesa.”

⁵ Hanna udi nu ivo 18, wakhalele gudimona gifua gashigo watagana nga hazonda. Mvuaji jienji jidi Matemue a Yehowa, uvi muene wakhalele mumona gifua wakhalelego watagana ha gunemesa mikhuala ya Yehowa. Mukunda natshi? Handaga, wakhalele mutangiza egi gashigo nu ndando nga hazonda. Luholo ndaga yene yakhalele gumusagesa, matangua ako wakhalele gudinamenesa mu khabu, uvi gutshita ngenyi guakhalelego gumukuatesa nga hazonda. Wazuelele egi: “Ngawambelelego mvuaji jiami nga muthu muko ndaga ngakhalele guditshita. Ngakhalele mumona gifua Yehowa mbagashigo mutshigina nga hazonda egi ngubue mukombeledi wenji.”

6. Ndaga tshi yakhalele mukanga Vanessa njila ha gubatijiwa?

⁶ Mafuta abola. Vanessa udi nu ivo 22, umuzuela egi: “Ngakhalele nu futa mumoshi ngakhalele muzumba muavula, tuadijiyile n’enji sendese mualeha.” Uvi futa dienji muene gakhalelego gumukuatesa hagula abatijiwe. Ndaga yene yakhalele musagesa Vanessa, hene wazuelele egi: “Gukuata ufuta gushigo ndaga yaleba. Ngakhalele muvua woma egi gula ngakoka n’enji ufuta, mbangushigo muheta luko futa mbatudizumba nenji ngenyi.”

7. Makayla wakhalele muvua woma watshi, nu mukunda natshi?

⁷ Woma wa gutshita gubola. Makayla wakhalele nu ivo itano tangua phangi’enji wazolewe mu hungu. Hakhalele muene mukula, wakhalele mumona luholo mvuaji jienji jiakhalele gudisagesa mukunda nu ndaga jiakhalele mutshita phangi’enji. Makayla udi muzuela egi: “Ngakhalele muvua woma egi gula ngabatijiwa, ngajiya gutshita gubola gungima ngazolewa mu hungu, ngubatela mvuaji jiami malamba.”

8. Mukunda natshi Miles wakhalele muvua woma?

 ⁸ Woma wa usageshi. Mvuaji jia Miles jiashiyile ulo wawo. Sh’enji udi Temue wa Yehowa, uvi gin’enji ndo. Miles umuzuela egi: “Ngatshitshile ivo 18 nu mama, uvi ngakhalele muvua woma ha gumuwambela egi ngumutshigina gubatijiwa. Habuile Tata Temue wa Yehowa, ngamonele luholo mama wamusagesele, hene ngakhalele muvua woma egi wajiya nji gungusagesa.”

9. Gujiya luholo Yehowa wana gumonesa guzumba nu mutshima waleha, guajiya gugutuma ha gutshita itshi?

⁹ Adama nu Eva atumagelego Yehowa handaga akhalelego nu guzumba guakola mukunda nu muene. Uvi, Yehowa waahanele njila ya gujinga luko hagula avuale ana; waabembele nji tangua dia gutomba luholo lua gusasela ana ene. Ndaga jiabuile gungima jiamonesele haphelo egi desizio diazudile Adama nu Eva ha gulumbugila Yehowa, diakhalele diago diabola. Mun’awo wa somi washiyile mukombu’enji, gungima khadilo dia umbundudi nu ngina yabola yazalele ha mavu. (Gis. 4:8; 6:11-13) Uvi, Yehowa walondele ndaga hagula ahuluise ana a Adama nu Eva adi nu nzala ya gumukombelela. (Yone 6:38-40, 57, 58) Gulonguga luholo Yehowa wana gumonesa khadilo dia mutshima waleha nu dia guzumba, guajiya gugutuma ha gumuzumba luko muavula. Ngenyi, mbawudihana gudi Yehowa, mbawushigo mutshita ndaga gifua Adama nu Eva.

10. Mukunda n’atshi gutangigiza Ngimbo 19:7 guajiya gugukuatesa ha gukombelela Yehowa?

¹⁰ Landula gulonguga ndaga jiatadila Yehowa. Gula walandula gulonguga ndaga jiatadila Yehowa, yajiya gugukuatesa ha gulandula gumukombelela. Avery wago tuazuelela gu thunda wazuelele egi: “Gutanga nu gutangigiza laji didi mu mukanda wa Ngimbo 19:7, NWT, guana gungukuatesa ha gutuna gutangiza egi ngushigo ngatagana.” (Tanga.) Tangua Avery wamonele luholo Yehowa watagenesele laji diene, guzumba guenji mukunda nu Nzambi guakolele. Guzumba guana gututuma ha gumona egi tudi tuatagana ha gukalegela Yehowa, guana gutukuatesa nji ha gukalegela Yehowa nu gutshita ndaga jiana gumusuanguluisa. Hanna yago tuazuelela gu thunda,  wazuelele egi: “Gulonguga guami gua Biblia guangukuatesele ha gukotelesa egi gula ngudi gudisagesa, yakotelesa egi ngudi musagesa nji Yehowa.” (1 Phet. 5:7) Hanna wasendesele ‘gutshita idi muzuela mbimbi ya Nzambi.’ (Yak. 1:22) Mbuto itshi yazolele? Wazuelele egi: “Ngamonele egi gutumagela Yehowa guakhalele gungubatela gubonga, hene ngasendesele gumuzumba muavula. Henyaha ngudi diago mujiya egi tangua diagasue mbangukhala nu funu ya ukuateshi, Yehowa mbawungukuatesa.” Hanna wabingile khadilo dia gudisagesa. Wadihanele gudi Yehowa nu wabatijiwe.

11. Itshi yakuatesele Vanessa ha gukuata mafuta abonga? Longo ditshi tuajiya guzula mu ndaga yene?

¹¹ Tomba mafuta aye nu gutema guagasue. Vanessa yago tuazuelela gu thunda, wakotelesele gungima egi futa dienji wakhalele gumukanga njila ha gukombelela Yehowa. Wakokele ufuta n’enji. Uvi, Vanessa watshitshile nji ndaga jiko. Watshitshile ngolo ha gukamba mafuta ako mu hungu. Wazuelele egi gifezegeselo gia Nowa nu enya fami y’enji giamukuatesele. Wazuelele luko egi: “Nowa nu fami y’enji akhalele mujinga hamoshi nu athu akhalelego muzumba Yehowa, uvi akhalele nu ufuta wabonga mukatshi dia fami yawo.” Gungima dia gubatijiwa guenji, Vanessa wabuile muvundji wa njila. Mangino udi muzuela egi: “Ndaga yene yangukuatesele ha gukuata mafuta abonga mu hungu dietu nu mu mahungu ako.” Aye nji wajiya gukuata mafuta abonga gila udi mudihana muavula mu mudimo watuhanele Yehowa.—Mat. 24:14.

12. Woma wa luholo lutshi Adama nu Eva akhalelego nawo? Malamba tshi gutuna guvua woma wene guabatelele?

¹² Khala muvua woma wabonga. Woma uko tuana guvua wakhala wabonga. Ha gufezegesa, tudi naye ya guvua woma wa gutshita ndaga jianago gusuanguluisa Yehowa. (Ngi. 111:10) Nga Adama nu Eva akhalele nu woma wene, nga alumbugilego Yehowa. Uvi alumbigile gawo. Tangua atshitshile gubola, meso awo akangugile, hene akotelesele diago egi abuile enya gubola. Hakiene, abatele gubola nu gufua gudi an’awo. Luholo akotelesele egi atumagelego mukhuala wa Nzambi, avuile musonyi handaga akhalele thowa, hene asudigile mayiji.—Gis. 3:7, 21.

13-14. (a) Ha gutadila 1 Phetelo 3:21, mukunda natshi tushigo naye gukhala nu woma wabola mukunda nu gufua? (b) Mukunda natshi tudi naye guzumba Yehowa?

 ¹³ Tudi naye guvua woma wa gutshita ndaga jianago gusuanguluisa Yehowa, uvi tushigo naye guvua woma wabola mukunda nu gufua. Yehowa walondele ndaga hagula mbatuhete monyo wa ivo nu ivo. Gula tuatshita gubola uvi tuabalumuna diago mutshima, Yehowa mbawututotesela. Mbawututotesela gubola guetu gula tuamonesa gutshigina mu gibawu gia mun’enji. Ha gumonesa gutshigina guene tudi naye thomo gudihana gudi Nzambi nu gubatijiwa.—Tanga 1 Phetelo 3:21.

¹⁴ Gudi nu ndaga jiavula jiana gututuma ha guzumba Yehowa. Tuana gumuzumba handaga wana gutuhana ima tudi naye funu lusugu nu lusugu, nu wana gutulongesa giamatshidia gia mutadila nu felela dienji. (Yone 8:31, 32) Watuhanele hungu dia Uklisto ha gututuameza nu gutukuatesa. Wana gutukuatesa mu malamba tuana gutagana nawo, wana gutuhana felela dia gujinga muabonga mu masugu adi muza. (Ngi. 68:19; Yat. 21:3, 4) Gutangiza ndaga jiatshitshile Yehowa ha gutumonesela guzumba guana gututuma ha gumuzumba muavula. Guzumba Yehowa guana gutukuatesa ha gukhala nu woma wabonga. Tuana guvua woma ha gutshita ndaga jishigo musuanguluisa Muthu tuana guzumba muavula.

15. Luholo lutshi Makayla wakatudile woma wagutangiza egi wajiya gubua mu gubola?

¹⁵ Makayla yago tuazuelela gu thunda, wakotelesele egi Yehowa wana gutotesela athu gubola. Gungima wakhalelego luko nu woma wa gutangiza egi wajiya gubua mu gubola. Wazuelele egi: “Ngakotelesele egi mukut’etu agasue tushigo athu atagana, tuana gujimbila nji ndaga jiko. Uvi ngakotelesele egi Yehowa watuzumba, mbawututotesela mu njila ya gibawu.” Guzumba gua Makayla mukunda nu Yehowa guamutumine ha gudihana gudi muene nu wabatijiwe.

16. Luholo lutshi akuatesele Miles hagula gavuigo luko woma wa usageshi?

¹⁶ Miles yago tuazuelela gu thunda, wakhalele muvua woma egi gin’enji wajiya gumusagesa gula wabatijiwa. Uvi wakambele ukuateshi gudi mutadi muwendji. Miles wazuelele egi: “Mutadi muwendji muene nji, mvuaji wenji mumoshi wakhalelego Temue wa Yehowa. Wangukuatesele ha gutangiza luholo lua guwambela mama egi ame hakhami ngazudile desizio dia gubatijiwa, uvi ishigo tata wangutumine gu ngolo.” Mama wa Miles gasuangulugilego. Gu gisugishilo, ndaga jiabolele muavula. Miles wakhalele n’aye gukatuga gumbo dia gin’enji, uvi gasombeselego desizio dienji. Wazuelele egi: “Gulonguga ndaga jiabonga jiangutshitshidile Yehowa, guakuatele diago mutshima wami. Tangua ngatangijile gibawu gia Yesu, ngakotelesele diago egi Yehowa wana gunguzumba muavula. Ndaga yene yangutumine ha gudihana gudi Yehowa nu ha gubatijiwa.”

17. Mukut’etu agasue tudi nu luendu lua gutshita itshi?

¹⁷ Tangua Eva wadile bundu mu dihia dia Edene, watunyile diago Shenji wa mu dilu. Tangua Adama wadile bundu diamuhanele Eva, wamonesele diago haphelo egi gahanelego mersi gudi Yehowa mukunda nu ima yagasue yabonga waahanele. Mukut’etu agasue tudi nu luendu lua gumonesa egi tushigo gifua Adama nu Eva. Uvi tuana guhana mersi mukunda nu ima yagasue Yehowa watuhanele. Tangua tuana gubatijiwa tuana gumonesa gudi Yehowa egi tuana gutshigina diago egi udi nu Ufumu wa gutuhagela mikhuala yatadila ndaga jiabonga nu jiabola. Ndaga yene yana monesa egi tuana guzumba Sh’etu wa mu dilu nu tuana gumushila mutshima.

18. Itshi yajiya gugukuatesa ha gukombelela Yehowa muabonga?

¹⁸ Gungima dia gubatijiwa tudi naye gutshita ngolo ha gulandula gutshita gutshigina gua Yehowa, uvi guetu hakhetu ndo. Akombeledi a Yehowa avula ana gukalagala ndaga Yene. Wajiya gutshita gifua ene gula udi mulandula gukudisa ukoteleshi waye wa Biblia, nu guya mu gudibungisa nu aphangi aklisto, nga gulongesa nu gikhesa giagasue ndaga walongugile jiatadila Nzambi. (Heb. 10:24, 25) Gula watshigina guzula desizio, landula malongo adi guguhana Yehowa mu njila ya Biblia nu organizasio wenji. (Yesh. 30:21) Ndaga jiaye jiagasue mbajiwenda muabonga.—Ish. 16:3, 20.

19. Ndaga itshi udi naye gulandula gutangiza? Mukunda natshi?

¹⁹ Gula walandula gutangiza luholo utuameji wa Yehowa wana gugukuatesa, mbawumuzumba muavula, mbawuzumba nji mikhuala yenji. Hakiene, Satana mbagashigo gugudimba hagula ubembe gukombelela Yehowa. Tangiza gifua wajinga luko ivo gubalega 1000. Mbawumona egi watshitshile muabonga luholo wazudile desizio dia gubatijiwa!