1. Dahme Adam oh Ihp sohla ahneki, oh ia imwilahn met?

IHS me ke medewe me pahn wiahda koasoandi kan ong dahme mwahu oh dahme suwed? Ni ahnsou me Adam oh Ihp tungoale wahntuhkehn kehsehki aramas dahme mwahu oh dahme suwed, ira kasalehda ni sansal sang ni ara wiewia kan me ira sohte likih Siohwa oh sapwellime koasoandi kan. Ira pilada en wiahda pein ara koasoandi kan ong dahme mwahu oh suwed. (Sen. 3:22) Ahpw medewehla dahme ira sohla ahneki. Ira sohla ahneki nanpwungmwahu rehn Siohwa. Ira pil sohla ahneki koapworopwor en mour kohkohlahte, oh ira kadaurohng neira seri kan dihp oh mehla. (Rom 5:12) Pilipil me Adam oh Ihp wiahdao imwikihla lokolok laud.

2-3. (a) Dahme ohlen Idiopiao wia ni Pilip eh kalohk ong ih? (b) Kapai dah kan me kitail kin alehdi ni atail papidaisla, oh peidek dah kan me kitail pahn koasoiapene?

² Ia wekpeseng en Adam oh Ihp ara wiewia kan ong dahme ohlen Idiopiao wia ni Pilip eh kalohk ong ih? Ohlo uhdahn kalahnganki dahme Siohwa oh Sises ketin wiahda ong ih me kahrehda e mwadangete papidaisla. (Wiewia 8:34-38) Ni atail kin inoukihong Koht atail mour oh papidaisla, duwehte ohlo, kitail kin kasalehda ni sansal dahme kitail men wia. Kitail kasalehda me kitail kin kalahnganki dahme Siohwa oh Sises ketin wiahiong kitail. Kitail pil kasalehda me kitail likih Siohwa oh pohnese me ih me pahn ketin wiahda koasoandi ong dahme mwahu oh dahme suwed.

³ Medewehla duwen kapai kan me kitail kin alehdi ni atail kin papah Siohwa! Ehu kapai iei me Siohwa pahn ketikihong kitail  soahng koaros me Adam oh Ihp sohla ahneki, iangahki koapworopwor en mour kohkohlahte. Pwehki atail pwoson Sises Krais, Siohwa ketin mahkohng atail sapwung kan oh ketikihong kitail nsenmwakelekel. (Mad. 20:28; Wiewia 10:43) Kitail pil wiahla kisehn sapwellimen Siohwa peneinei nin duwen ladu kei me e ketin kupwurki me pahn ahneki mour kaselel ni ahnsou kohkohdo. (Sohn 10:14-16; Rom 8:20, 21) Ahpw mendahki kapai kaselel pwukat, ekei me esehla Siohwa kin pweiek en idawehn mehn kahlemeng en ohlen Idiopiao. Dahme kakete irehdi irail sang arail en papidaisla? Oh ia duwen irail kak powehdi kahpwal pwukat?

4-5. Kahpwal dah kan me mwahnakapwo Avery oh peinakapwo Hannah lelohng?

⁴ Peikasal. Ahn Avery pahpa nohno wia Sounkadehdehn Siohwa kei. Eh pahpao uhdahn adamwahu rehn meteikan nin duwen pahpa men me kin nsenoh oh wia elder koahiek men. Ahpw, Avery pweiek en papidaisla. Dahme kahrehda? E nda: “I sohte medewe me I pahn kak wia soahng mwahu kan duwehte ei pahpao.” Avery pil peikasalki me e pahn kak apwalihala pwukoa kan me pahn kohwong ih ni ahnsou kohkohdo. E nda: “I kin pwunodki ma pwukoa kan pahn kohwong ie en wia kapakap mwohn pokon, wia padahk kan, de apwalih pwihn ehu nan doadoahk en kalohk.”

⁵ Hannah, me sounpar 18, kin lokolongki eh ahneki peikasal laud. E tikida rehn eh pahpa nohno me kin papah Siohwa. Mendahki met, e kin peikasalki ma e pahn kak kapwaiada sapwellimen Siohwa koasoandi kan. Dahme kahrehda? Hannah sohte ahneki madamadau pwung ong pein ih. Ekei pak, e kin nsensuwedla laud me kahrehda e kin pein kamedekihala ih, oh met kin ihte kalaudehla kahpwalo. E nda: “I sohte ndaiong emen duwen dahme I wiao, pil kaidehn ei pahpa nohno, oh I kin medewe me Siohwa uhdahn sohte pahn kupwurki ien wiahla emen sapwellime ladu pwehki dahme I kin wiewiahiong pein ngehi.”

6. Dahme irehdi Vanessa sang eh pahn papidaisla?

⁶ Madamadau en iengomw kan. Vanessa, me sounpar 22, nda, “Mie kompoakepahi inenen mwahu men me I kin ese kereniong sounpar eisek.” Ahpw, kompoakepaho sohte utung ahn Vanessa mehn akadei en papidaisla. Met kamedekihala Vanessa, oh e nda, “I kin apwalki wiahda kompoakepahi kan, oh I pwunodki ma I sohla kompoakepahnki ih, I sohla pahn diarada emen kompoakepahi me keren.”

7. Dahme peinakapwo Makayla masak, oh dahme kahrehda?

⁷ Masak wiahda sapwung laud. Makayla sounparte limau ni ahnsou me rie pwutako piskenla. Ni eh laudla, e kilang ia uwen  eh pahpa nohno nsensuwedla pwehki dahme rieo wia. E nda: “I masak ma I papidaisla, I pahn kak wiahda sapwung ehu, piskenla, oh kahrehiong ei pahpa oh nohno en ahneki nsensuwed me pil laudsang.”

8. Dahme mwahnakapwo Miles masak?

⁸ Masak uhwong sang meteikan. Ahn Miles pahpao oh lih me e pwoudiki met kin papah Siohwa, ahpw uhdahn ahn Miles nohno kaidehn Sounkadehde men. Miles nda: “I mi rehn ei nohno erein sounpar 18, oh I masak en ndaiong ih me I men papidaisla. I kilang mwomwen eh wiewia ong ei pahpao ni ahnsou me ei pahpao wiahla Sounkadehde men. I masak me e pahn pil kahrehda kahpwal ong ie.”

9. Dahme pahn kakete wiawi ni omw sukuhlki ia uwen Siohwa eh ketin limpoak oh kanengamah?

⁹ Adam oh Ihp pilada ira en sohte papah Siohwa pwehki ira sohte kakairada limpoak laud ong ih. Mendahki met, Siohwa ketin mweidohng ira en wie momour lao ira nainekihda seri kan oh wiahda pein ara koasoandi ong ia duwen ara pahn apwalihada irail. Imwilahn ahn Adam oh Ihp pilipil en uhtohrda sang Siohwa mwuhr kasalehda ni sansal ia uwen ara pweipwei. Neira pwutak me keieu laudo kemehla rie pwutako me sohte eh sapwung, oh kedekedeo tiahk lemei oh roporop kin kamwakid tohnsampah. (Sen. 4:8; 6:11-13) Ahpw, Siohwa ketikihda ahl ehu en doarehla koaros nein Adam oh Ihp seri kan me men papah ih. (Sohn 6:38-40, 57, 58) Ni omw kalaudehla omw sukuhlki duwen ia uwen Siohwa eh kin ketin kanengamah oh limpoak, omw limpoak ong ih pahn laudla. Ke sohte pahn men wiahda pilipil me Adam oh Ihp wiahdao oh ke pahn men inoukihong Siohwa omw mour.

10. Dahme kahrehda en doudouloale Melkahka 19:7 kak seweseiuk en papah Siohwa?

¹⁰ Pousehlahte sukuhlki duwen Siohwa. Ni omw kalaudehla omw sukuhlki duwen Siohwa, met pahn kalaudehla omw kamehlele me ke kak pweida nan omw kin papah ih. Avery, me kitail koasoia mwoweo, nda: “I ale eimah sang ni ei kin wadek oh doudouloale inowo me mi nan Melkahka 19:7.” (Wadek.) Ni ahnsou me Avery kilang duwen Siohwa eh ketin kapwaiada inou wet, eh limpoak ong Koht uhdahn  laudla. Limpoak sohte kin ihte kalaudehla ahn emen eh eimah ahpw e pil kin sewese kitail en kilangwohngete Siohwa oh dahme e ketin kupwurki ong kitail. Hannah, me kitail koasoia mwoweo, nda: “Nan ei wadawad en Paipel oh onop, I esehda me ni ei kin kamedekihala pein ngehi, I pil kin kamedekihala Siohwa.” (1 Pit. 5:7) Hannah wiahla emen me kin ‘peikiong mahsen en Koht.’ (Seims 1:22) Ia imwilahn met? E nda: “Ni ei kilang kamwahu kan me kohsang ei peikiong Siohwa, e kalaudehla ei limpoak ong ih. Met I kamehlele me Siohwa pahn ahnsou koaros ketin kaweid ie ni ahnsou me I anahne sapwellime sawas.” Hannah powehdi eh kin men pein kamedekihala ih. E inoukihong Siohwa eh mour oh papidaisla.

11. Dahme Vanessa wia pwehn wiahda kompoakepah mwahu kan, oh dahme kitail kak sukuhlki sang met?

¹¹ Pilada mwahu kompoakepahmw kan. Vanessa, me kitail koasoia mwoweo, kedekedeo esehda me iengeo irehdi ih sang eh pahn papah Siohwa. Eri e sohla kompoakepahnki. Ahpw Vanessa wia laudsang met. E doadoahk laud pwehn wiahda kompoakepah kapw kan nan mwomwohdiso. E nda me mehn kahlemeng en Noha oh eh peneineio me sewese ih. E nda: “Mendahki irail mi nanpwungen aramas akan me sohte poakohng Siohwa, re kin ahneki nanpwungmwahu rehn emenemen.” Mwurin Vanessa papidaisla, e wiahla pioneer men. E nda, “Met sewese ie en wiahda kompoakepahi mwahu kan kaidehn ihte nan ei mwomwohdiso ahpw pil nan mwomwohdiso teikan.” Ke pil kak wiahda kompoakepahmw mwahu kan sang ni omw iang pidada laud nan doadoahk me Siohwa ketikihong kitail en wia.​—Mad. 24:14.

12. Soangen pepehm en masak dah me Adam oh Ihp sohte ahneki, oh dahme wiawihong ira?

¹² Ahneki madamadau toupahrek ong pepehm en masak. Ekei pepehm en masak kin mwahu kitail en ahneki. Karasepe, kitail anahne masak kansensuwedihala Siohwa. (Mel. 111:10) Ma Adam oh Ihp ahneki soangen pepehm en masak wet, ira sohte pahn uhwongada Siohwa. Ahpw ira uhwongada ih. Mwurin ara wia met, ira marainla oh wehwehkihda me ira wia aramas dipan kei. Ihte me ira kak wia iei kadaurohng neira seri kan dihp oh mehla. Pwehki ira kak kilang, de wehwehki, ara  irairo, ira namenekda oh perehla ara kilisowo.​—Sen. 3:7, 21.

13-14. (a) Nin duwen me 1 Piter 3:21 kasalehda, dahme kahrehda kitail en dehr uhdahn masak mehla? (b) Kahrepe dah kan me kitail ahneki en poakohng Siohwa?

¹³ Kitail kin anahne ahneki pepehm en masak kitail de kansensuwedihala Siohwa, ahpw kitail sohte anahne masak mehla nohn daulihala. Siohwa ketikihda ahl ehu kitail en ahneki mour soutuk. Ma kitail wiahda dihp ehu ahpw uhdahn koluhkihla, Siohwa pahn ketin mahkohng atail sapwung kan. E pahn ketin mahkohng kitail pwehki atail pwoson pweinen pweipwei sapahl en sapwellime Ohlo. Ehu ahl me keieu kesempwal kitail en kasalehda pwoson iei sang atail inoukihong Koht atail mour oh papidaisla.​—Wadek 1 Piter 3:21.

¹⁴ Mie kahrepe tohto me kitail ahneki en poakohng Siohwa. E sohte kin ihte ketikihong kitail soahng mwahu kan me kitail ahneki ehuehu rahn ahpw e pil kin ketin padahkihong kitail dahme mehlel duwen ih oh dahme e kupwurki. (Sohn 8:31, 32) E ketikihong kitail mwomwohdisohn Kristian pwehn kaweid oh sewese kitail. E kin ketin sewese kitail en powehdi atail kahpwal kan ahnsou wet, oh ketikihong kitail koapworopwor en mour kohkohlahte nan koasoandi unsek ehu ni ahnsou kohkohdo. (Mel. 68:19; Kaud. 21:3, 4) Ni atail kin doudouloale duwen soahng koaros me Siohwa ketin wiahiongehr kitail pwehn kasalehiong kitail me e ketin poakohng kitail, met kin kahrehiong kitail en poakohng ih. Oh ni atail poakohng Siohwa, kitail kin sukuhlki en ahneki pepehm en masak me pwung. Kitail kin masak kansensuwedihala Meno me kitail uhdahn poakohng.

15. Ia duwen Makayla powehdi eh kin masak wiahda sapwung laud?

¹⁵ Makayla, me kitail koasoia mwoweo, powehdi eh kin masak wiahda sapwung laud ni eh wehwehkihda ia uwen Siohwa eh kin ketin kasalehda mahk. E nda: “I esehda me kitail koaros sohte unsek oh kitail pahn wiahda sapwung kan. Ahpw I pil wehwehkihda me Siohwa ketin poakohng kitail oh pahn ketin mahkohng kitail pwehki pweinen pweipwei sapahlo.” Eh limpoak ong Siohwa kamwakid ih en inoukihong Koht eh mour oh papidaisla.

16. Dahme sewese Miles en powehdi eh masak uhwong sang meteikan?

¹⁶ Miles, me masak me eh nohno pahn uhwongada eh pilipil en papidaisla, peki kaweid sang emen sounapwalih me kin seiloak. E nda: “E pil iang tikida rehn peneinei ehu me emen rehn eh pahpa de nohno me wia Sounkadehde. E sewese ie en medewe dahme I kak nda pwehn sewese ei nohno en wehwehki me ngehi me pein pilada en papidaisla oh me ei pahpao sohte idingkihong ie en wia met.” Ahn Miles nohno sohte perenki eh pilipilo. Kedekedeo, e kohkohsang imwen eh nohno, ahpw e kolokolete eh pilipilo. E nda: “Ei sukuhlki duwen soahng mwahu kan me Siohwa ketin wiahiong ie sair ei mohngiong. Ni ei medewe laud duwen sapwellimen Sises meirong en pweinen pweipwei sapahlo, I esehda ia uwen Siohwa eh ketin  poakohng ie. Met kamwakid ie en inoukihong Siohwa ei mour oh papidaisla.”

17. Ahnsou mwahu dah me kitail ahneki?

¹⁷ Ni ahnsou me Ihp tungoale wahntuhkeo nan Ihden, e uhwongada Semeo. Ni Adam eh iangala Ihp, e kasalehda me e sohte kalahnganki soahng mwahu koaros me Siohwa ketin wiahiong ih. Kitail koaros ahneki ahnsou mwahu en kasalehda ia uwen atail sohte pwungki pilipil me Adam oh Ihp wiahdao. Ni atail papidaisla, kitail kin kasalehiong Siohwa me kitail kamehlele me ih me sapwellimanki pwuhng en koasoanehdi dahme pwung oh dahme sapwung ong kitail. Kitail kin kadehdehda me kitail poakohng oh likih Samatailo.

18. Ia duwen omw kak pweida ni omw papah Siohwa?

¹⁸ Kahpwal me kitail ahneki mwurin atail papidaisla iei en mourki sapwellimen Siohwa koasoandi kan ehuehu rahn, ahpw kaidehn pein atail. Aramas rar rar kei ahneki soangen mour wet sounpar koaros. Ke kak duwehte irail ma ke pousehlahte kalaudehla omw wehwehki Mahsen en Koht, Paipel; kaukaule werekiong riomw Kristian kan; oh ngoangki ehukihong meteikan dahme ke sukuhlki duwen Semomw limpoako. (Ipru 10:24, 25) Ni omw wiahda pilipil kan, idawehn kaweid me Siohwa ketikihong uhk sang sapwellime Mahsen oh sapwellime pwihn. (Ais. 30:21) Eri soahng koaros me ke kin wia pahn pweida.​—Lep. Pad. 16:3, 20.

19. Dahme ke anahne ahnsou koaros medemedewe, oh dahme kahrehda?

¹⁹ Ni omw kin ahnsou koaros medemedewe ia uwen omw kin paiekihda sapwellimen Siohwa kaweid kan, omw limpoak ong ih oh sapwellime koasoandi kan pahn laudla. Eri sohte mehkot me Sehdan kak wia pwehn kamwakid uhk en uhdihsang omw papah Siohwa. Medewehla pein kowe sounpar kid sang met. Ke pahn tamanda me omw pilipil en papidaisla iei pilipil me keieu mwahu me ke wiahda!