1. Adán, Evapish paicunallataj imata ruranata agllashcamantaca ¿imataj tucurca?

¿IMA alli cashcata, ima mana alli cashcataca pitaj decidina can? Adán, Evaca allita mana allita yachaj chayachij yuramantami micurcacuna. Chaita rurashpami Jehovapipish paipaj mandashcacunapipish mana shunguta churashcata ricuchircacuna. Ashtahuanpish paicunallatajmi ima alli cashcata, ima mana alli cashcata agllashcata ricuchircacuna (Génesis 3:22). Pero chaita rurashcamantaca ¿imataj tucurca? Diospaj amigo canatami saquircacuna. Huiñai causaitapishmi pirdircacuna. Ashtahuancarin paicunapaj culpamantami paicunapaj huahua huahuacunapish juchayuj tucushpa huañuncuna (Romanos 5:12). Adán, Evapish paicunallataj imata ruranata agllashcamantami llaquicuna tiyashca.

2, 3. a) Felipe Diospaj Shimita huillajpica eunuco runaca ¿imatataj rurarca? b) ¿Bautizarishpaca ima bendicioncunatataj charinchij? c) ¿Ima tapuicunatataj yachashun?

² Pero eunuco runaca mana Adán, Eva shinachu carca. ¿Chaitaca ima shinataj yachanchij? Felipe Diospaj Shimita huillajpica eunuco runaca Diostapish Jesustapish pagui nishcatami ricuchisha nirca. Chaimantami utca bautizarirca (Hechos 8:34-38). Ñucanchijpish Diosman mingarishpa, eunuco runa shina bautizarishpaca ¿imatataj ricuchinchij? Jehová Diostapish Jesustapish tucuita cushcamanta pagui nishcatami ricuchinchij. Shinallataj Diosllapi confiashcata, ima alli cashcata o ima mana alli cashcata pailla agllana cashcatami ricuchinchij.

³ Diosta sirvishpaca ¿ima bendicioncunatataj charinchij? Adán Eva tucui pirdishcacunatami Jehová Diosca ñucanchijman  cunga. Por ejemplo, huiñai causaitami cunga. Shinallataj Jesucristopi feta churashcamantami Diosca ñucanchij juchacunata perdonan. Shuj alli concienciatapish cun (Mateo 20:28; Hechos 10:43). Ashtahuancarin Diosta sirvijcunahuanmi shuj familia shina canchij (Juan 10:14-16; Romanos 8:20, 21). Huaquincunaca Diosta rijsishpapish, chai bendicioncunata charinata yachashpapish bautizarinatami dudancuna. ¿Bautizaringapajca ima jarcaicunatataj charincuna? ¿Chai jarcaicunata mishangapajca imatataj rurana can?

4, 5. ¿Avery y Hannahpish ima problemacunatataj charirca?

⁴ Confianzata mana charina. Avery shuti jovenpaj yaya mamacunaca testigos de Jehovacunami can. Paipaj yayaca shuj alli yaya, shuj alli ancianomi can. Chashna cajpipish cai jovenca manaraj bautizarinata munarcachu. ¿Imamanta? Paica: “Ñuca yaya shina canataca mana pudishachu” nircami. Shinallataj cai jovenca gentecunapaj ñaupajpi conferenciata cunata, Diosta mañanata, predicacionpi grupota llujchinata mana pudinatami yuyarca.

⁵ 18 huatacunata charij joven Hannahca mana valishca layami sintirirca. Chaimantami testigo de Jehovacuna tiyaj familiapurapi huiñashca cashpapish Dios mandashcacunata mana pajtachi tucushcata yuyarca. Maipicarin dimastij llaquilla sintirishpami paillataj chugririj carca. Hannahca: “Ñucallataj chugririj cashcataca mana piman huillarcanichu, ni siquiera ñuca yaya mamaman. Chai ruraicunata ricushpa Jehová Dios ñucata mana chasquingachu nishpami yuyaj carcani” ninmi.

6. ¿Vanessaca imamantataj mana bautizarirca?

⁶ Mana alli amigocuna. 22 huatacunata charij joven Vanessaca: “Casi 10 huatacunatami shuj amigata charircani” nircami. Pero cai amigaca Diospaj Shimimanta yachanata mana munaj carcachu. Chaimantami Vanessataca bautizarichun mana apoyarca. Chaita ricushpaca Vanessaca llaquillami sintirij carca. Paica: “Amigocunata charinaca ñucapajca sinchimi carca. Ñuca amigahuan mana ashtahuan apanacushpaca, pai laya amigata mana chari pudishachu nircanimi” ninmi.

7. a) ¿Makaylaca imatataj mancharca? b) ¿Makaylaca imamantataj mancharca?

⁷ Jatun juchata ruranata manchana. Makayla 5 huatacunata charijpica paipaj turimi jatun juchata rurarca. Chaimantami congregacionmanta llujshichishca carca. Tiempohuanca paipaj turipaj ruraicuna yaya mamata llaquichishcatami ricurca. Makaylaca: “Bautizarishca qꞌuipa juchata rurajpi congregacionmanta ñucata llujshichinatami mancharcani. Chai pasajpi ñuca yaya mamata llaquichinatapishmi mancharcani” ninmi.

8. ¿Joven Milesca imatataj mancharca?

 ⁸ Shujtajcuna jarcanata manchana. Cunanca Miles shuti jovenmanta yachashun. Paipaj yayapish paipaj lamamapish Testigocunami can. Pero paipaj mamaca mana Testigochu can. Milesca: “Ñuca mamahuanca 18 huatacunatami causarcani. Ñuca yaya bautizarijpica ñuca mama pꞌiñarishcata mana cungarircanichu. Ñuca bautizarijpipish mama llaquichinatami mancharcani. Chaimi paimanca bautizarinata munanimi nishpa mana parlarcani” ninmi.

9. Jehová Dios cꞌuyaj cashcata, pacienciata charishcata yachashpaca ¿imatataj rurashun?

⁹ Adán, Evaca Diosta mana tucui shunguhuan cꞌuyashcamantami paita mana sirvisha nircacuna. Chaita rurajpipish Diosca ¿imata rurachuntaj saquirca? Tauca huatacunata causashpa huahuacunata charichunmi saquirca. Huahuacunata ima shina huiñachinatapish paicunallataj yuyachunmi saquirca. Pero tiempohuanca Adán, Eva Diosta mana sirvisha nishcamantaca ¿imataj tucurca? Paicunapaj culpamantami paicunapaj punta churica qꞌuipa huauquita huañuchirca. Qꞌuipa huatacunacarin gentecunaca ashtahuanmi millai tucurcacuna (Génesis 4:8; 6:11-13). Shinapish Adán Evapaj maijan huahua huahuacunaca Diosta sirvinatami munarcacuna. Paicunata juchamanta, huañuimanta quishpichingapajmi Diosca imata ruranata ña yacharca (Juan 6:38-40, 57, 58). Chashnami paica cꞌuyaj cashcata, pacienciata charishcata ricuchirca. Jehová Dios chashna cashcata ashtahuan yachashpaca paita ashtahuanmi cꞌuyashun. Chaimi Adán, Eva shina canata mana munashun. Ashtahuanpish toda la vida Diosta sirvisha nishpami paiman mingarinata munashun.

10. ¿Diosta sirvingapajca imamantataj Salmo 19:7-ta yuyarina canchij?

¹⁰ Jehová Diosmanta yachashpa catishunchij. Jehová Diosta ashtahuan rijsishpaca paita sirvi tucushcatami intindishun. Avery shuti huauquica Salmo 19:7-ta yuyarishpami ashtahuan tranquilo sintirini ninmi (Salmo 19:7-ta liyipai). Cai jovenca cai versopi tiyaj shimicuna paipaj causaipi pajtarijpica Jehová Diostaca ashtahuanmi cꞌuyarca. Ñucanchijpish  Diosta cꞌuyashpaca mana paita sirvi tucushcallata intindishunchu. Ashtahuanpish pai mana munashca cosascunatami mana rurashun. Shinallataj paita sirvingapajmi fuerzata charishun. Pani Hannahca: “Bibliata estudiashpami ñucallataj chugririshpaca Jehová Diostapish llaquichicushcata intindircani” ninmi (1 Pedro 5:7). Chaimi paica Dios mandashcacunata pajtachi callarirca (Santiago 1:22). Hannahca: “Diosta cazuna ñucapajllataj alli cashcata yachashpaca paitaca ashtahuanmi cꞌuyarcani. Imata minishtijpi pai ayudanatami tucui shunguhuan crini” ninmi. Cunanca paica ña mana paillataj chugririnchu. Chaipaj randica Diosman mingarishpami bautizarirca.

11. a) ¿Vanessaca alli amigocunata charingapajca imatataj rurarca? b) ¿Vanessamantaca imatataj yachacunchij?

¹¹ Alli amigocunata agllashunchij. Vanessaca tiempohuanca paipaj amiga Diosta sirvichun jarcacushcatami cuentata curca. Chaimantami amigas canata saquirca. Pero mana chaillata rurarcachu. Ashtahuanpish congregacionpi mushuj amigocunata charingapajmi esfuerzota rurarca. Chaita rurachunca ¿imataj paitaca ayudarca? Noepaj, paipaj familiapaj causaimanta yachanami ayudarca. Vanessaca: “Noepish paipaj familiapish Diosta mana cꞌuyaj gentecunapurapimi causarca. Chashna jahuapish paicunapura alli apanacushcamantami cushilla causarcacuna” ninmi. Bautizarishca qꞌuipaca Vanessaca precursorami tucurca. Cunanca paica: “Precursora tucushcamantami ñuca congregacionpipish, shujtaj congregacioncunapipish alli amigocunata charini” ninmi. Ñucanchijpish alli amigocunata charingapajca, Diospajta ruranapimi ashtahuan ocuparina canchij (Mateo 24:14).

12. a) ¿Adán, Evaca ima laya manchaitataj mana charircacuna? b) ¿Diosta mana manchashcamantaca imataj tucurcacuna?

¹² Diosta manchashunchij. Diosta manchashpaca paipaj shunguta mana llaquichishunchu (Salmo 111:10). Adán, Evaca chai laya manchaita mana charishcamantami Diosta mana cazurcacuna. Chaimi Bibliapica ‘paicunapaj ñahuicuna pascarirca’ nin. ¿Chaica imatataj nisha nin? Juchayujcuna tucushcatami cuentata curcacuna. Chai juchamanta paicunapaj huahua huahuacunapish huañuna  cashcatami cuentata curcacuna. Chaita yachashpami pingarishpa paicunapaj aichata taparircacuna (Génesis 3:7, 21).

13, 14. a) 1 Pedro 3:21 nishca shinaca ¿imamantataj huañunata mana manchana canchij? b) ¿Diostaca imamantataj cꞌuyana canchij?

¹³ Ñucanchijca Jehová Diospaj shunguta llaquichinatami manchana canchij. Pero huañunataca mana manchanachu canchij. ¿Imamanta? Huiñai causaita charichunmi Diosca paipaj Churita curca. Pero chaipajca ñucanchij juchacunamanta tucui shunguhuan arrepintirishpami Jesucristopi crishcata ricuchina canchij. Chaimi Diosca ñucanchij juchacunata perdonanga. ¿Ima shinataj Jesuspi crishcata ricuchishun? Diosman mingarishpami bautizarina canchij (1 Pedro 3:21-ta liyipai).

¹⁴ ¿Diostaca imamantataj cꞌuyana canchij? Paica punllantami alli cosascunata ñucanchijman cun. Shinallataj paimanta, paipaj munaimantami yachachin (Juan 8:31, 32). Ashtahuancarin huauqui panicuna ñucanchijta ayudachunmi paicunata cushca. Shinallataj ima problemacunata charijpica Diosca siempremi ayudan. Shamuj punllapicarin paica huiñai causaitami cunga (Salmo 68:19; Apocalipsis 21:3, 4). Shinashpaca Jehová Dios ñucanchijta cꞌuyashcata ricuchingapaj pai imallata rurashcata yuyarishunchij. Chaimi paitaca ashtahuan cꞌuyashun. Paita ashtahuan cꞌuyashpaca paipaj shunguta llaquichinatami manchashun. ¿Manachu chai laya manchaita charina canchij?

15. ¿Makaylaca jatun juchata rurana manchaitaca ima shinataj saquirca?

¹⁵ Makaylaca Jehová Dios juchacunata perdonaj cashcata yachashpaca ¿imatataj rurarca? Jatun juchata rurana manchaitami saquirca. Paica: “Tucuicuna juchayujcuna cashcamantami pandarijllacuna cashcata cuentata curcani. Shinallataj Jehová Dios ñucanchijta cꞌuyashcata, Jesucristomanta pai juchacunata perdonaj cashcatami intindircani” ninmi. Chaita intindishpami Makaylaca Diosta cꞌuyashcamanta paiman mingarishpa bautizarirca.

16. ¿Huauqui Milesca ama manchaita charingapajca imatataj rurarca?

¹⁶ Huauqui Milesca paipaj mama bautizarinata jarcanatami mancharca. Chaimantami superintendenteta ayudachun mañarca. Milesca: “Superintendentepaj mamaca mana Testigochu carca. Chaimi ñuca shinallataj huiñashca carca. Paica bautizarinata ñuca yaya mana obligacushcata mamaman ima shina huillanatami yachachirca” ninmi. Chashna jahuapish huauqui Milespaj mamaca pꞌiñarircami. Chaimantami bautizaringapaj paica huasimanta rina carca. Milesca: “Jehová Dios tucui allicunata cushcata yuyarishpaca cushillami sintirircani. Shinallataj Jesucristo ñucanchijmanta huañushcata yuyarishpami Jehová Dios ñucata achcata cꞌuyashcata intindircani. Chaimi paiman mingarishpa bautizarircani” ninmi.

17. ¿Imatataj ricuchisha ninchij?

¹⁷ Evaca mana micuna yuramanta micushpami Diospaj contra tucushcata ricuchirca. Adanpish chai yuramanta micushpami Jehová Dios tucuita cushcamanta mana pagui nishcata ricuchirca. Pero ñucanchijca mana paicuna shina casha ninchijchu. Ashtahuanpish tucuita cushcamantami Diostaca pagui nishcata ricuchisha ninchij. Chaipajca ¿imatataj rurana canchij? Bautizarinami canchij. Chashnami Jehová Dioslla ima alli cashcata, ima mana alli cashcata agllana derechota charishcata ricuchinchij. Chashnallataj paita cꞌuyashcata, paipi confiashcatami ricuchinchij.

18. ¿Jehová Diosta alli sirvingapajca imatataj rurana canchij?

¹⁸ Bautizarishca qꞌuipaca mana ñucanchij munaita rurashpachu catina canchij. Yaya Diospaj munaita rurashpami catina canchij. Pero maipica mana facilchu can. Chashna jahuapish achca gentecunami Diosta sirvishpa causancuna. Diosta alli sirvishpa causangapajca ¿imatataj rurana canchij? Bibliata alli yachashpami catina canchij. Huauqui panicunahuanpish imallatapish rurangapaj tandanacunami canchij. Shujtajcunamanpish ñucanchijta cꞌuyaj Yaya Diosmantami parlana canchij (Hebreos 10:24, 25). Chashnallataj Jehová Dios paipaj Shimipi, paipaj organizacionpi ima nishcata uyashpami imatapish alli agllana canchij (Isaías 30:21). Chashnami alli, cushilla causashun (Proverbios 16:3, 20).

19. a) ¿Imatataj siempre yuyarina canchij? b) ¿Imamantataj chaita yuyarina canchij?

¹⁹ Jehová Diosmanta alli causacushcatami siempre yuyarina canchij. ¿Imamanta? Chaita yuyarishpami paitaca ashtahuan cꞌuyashun. Paipaj mandashcacunatapish shungupimi huaquichishun. Chashnami millai Diablo imata cusha nijpipish Diosta sirvinataca mana saquishun. Ña mil huatacunata causacushcata yuyashunchij. Chai tiempopi ñucanchij bautizarishca punllata yuyarishpaca: “Allitami agllashcani” nishunmi.