1. Adanbash, Evapash nalita rurashcamandaca ¿ima llaquicunatata charirca?

IMA ALI CAJTA, ima nali cajta decidina derechotaca ¿pita agllana can? Alita, nalita yachaita cuj yurapi fucushcataca Adanbash, Evapash micushpaca Jehovapi na confiashcata, paipa mandashcacunata na cazungapaj munashcatami paicunaca ricuchirca. Paicunaca ima ali cajta, ima nali cajta ruranatami agllarca (Gén. 3:22). Adanbash, Evapash shina rurashcamandaca ¿ima llaquicunatata charirca? Paicunaca Jehovapa ñaupapi nalimi ricurirca. Para siempre causanatapashmi ñana chasquirca. Shinallata paipa huahuacunapash juchayucuna nacirirca. Huañuitapash huañunami carca (Rom. 5:12). Adanbash, Evapash shina rurashcamandami ashtaca llaquicuna tiai callarirca.

2, 3. a) Felipe runagu villachijpica ¿imatata Etiopía llactamanda runaguca rurarca? b) Bautizarishpaca ¿ima bendiciongunatata chasquipashun? c) ¿Ima tapuicunamandata yachajupashun?

² Jesusta catij Felipe runaguca Etiopía llactamanda shuj runagumanmi villachirca. Chai runaguca Adanshna, Evashnaca na carcachu. Etiopía llactamanda runaguca Jehovapash, Jesuspash imata paimanda rurashcata agradicimandami ñapash bautizarirca (Hech. 8:34-38). Etiopía llactamanda runagushnami, ñucanchicunaca Jehovatalla sirvishpa causasha nishpa bautizarinchi. Shina rurashpami Jehovapash, Jesuspash ñucanchimanda imata rurashcata agradicishcata ricuchipanchi. Shinallata Jehovapi confiashcata, Jehovalla ñucanchipa ima ali cajta, ima nali cajta decidina derechota charishcatapashmi ricuchipanchi.

³ Jehovata sirvijpica paica ashtaca bendiciongunatami caranga. Caita yaripashunchi Adanbash, Evapash para siempre ali causanatami ñana chasquirca. Chai ali causaitami Jehová Diosca ñucanchiman carasha nin. Shinallata Jesuspi crijpica Jehová Diosca ñucanchi juchacunata perdonanga. Shuj ali concienciata charichunbashmi ayudanga (Mat. 20:28; Hech. 10:43). Shinallata Jehovata ali sirvij familiapurapimi capanchi. Jehovapa ñaupapi ali ricurishpa,  shamuj punllacunapipash ali causaiguta chasquinatami shuyanajupanchi (Juan 10:14-16; Rom. 8:20, 21). Chai bendiciongunata chasquinata yachashpa, Jehovata rijsishpapash huaquingunaca Etiopía llactamanda runagushnaca na rurangapaj munanllu. Shinaca quiquin bautizarichunga ¿imata jarcajun? Chai jarcaicuna ama mishachunga ¿imatata rurana capangui?

4, 5. Avery joven, Hannah paniguca ¿imatata pensan carca?

⁴ Na paipillata confiarina. Avery shuti jovenba taitamamacunaca alipacha Testigocunami can. Shinallata taitaca alipacha ancianopashmi can. Shina taitata charishpapash Avery jovenga na bautizaringapaj munarcachu. Chai jovenga ninmi: “Ñuca taitashnaca na caita ushashachu yanmi carcani” nishpa. Avery jovenga pensanmi carca, congregacionbi imapash privilegiota charishpaca ali pactachitaca na ushashachu nishpa. Paica cashnami tapurin carca: “Tucuicunapa ñaupajpi Jehovata mañapai nijpi, villachina grupota llujchichun o shuj discursota cupai nijpica ¿imatashi rurasha?” nishpa.

⁵ Hannah jovenga 18 huatacunatami charin. Paica na paipillata confiari ushanllu carca. Chai paniguca Testigo familiapi viñashca cashpapash Hannah jovenga Jehová Dios mandashcashna causaita na ushashachu yashpami llaquilla sintirin carca. Shina llaqui llaqui sintirimandami paica paillata huaquinbica chugririn carca. Shina rurashpaca paillatami ashtahuan nali sintirin carca. Paica ninmi: “Shina sintirijushcataca nipiman na parlanllu carcani. Ñuca taitacunapash na yacharcachu. Shinallata pensanmi carcani, shina rurashcamandaca Jehová Diospa ñaupajpica nunca alica na ricurishachu” nishpa.

6. Vanessa jovenga ¿imashpata na bautizarirca?

⁶ Nali cumbacuna. Vanessa jovenga 22 huatacunatami charin. Paica ninmi: “Ñucaca shuj alipacha amigatami charircani. Paihuanga casi 10 huatacunatami llevarircanchi” nishpa. Chai amigaca bautizarina munaita charichunga na ayudanllu carca. Chaimi Vanessaca llaquilla sintirin carca. Vanessaca ninmi: “Paihuan ñana llevarishpaca shuj ali amigataca ñana chari ushashachu yashpami pensarin carcani. Shinallata shujcunahuan facil llevaritaca na ushanllu carcani” nishpa.

7. Makayla jovenga ¿imatata manllan carca?

⁷ Juchapi urmanata manllana. Makayla jovenga 5 huatacunata charijpimi paipa turica expulsai tucurca. Tiempohuanga paipa expulsashca turi nalicunata rurajta ricushpami Makayla jovenba taitamamacunaca ninanda llaquirin carca. Chaita ricushpami Makayla jovenga ninanda llaquirin carca. Makayla jovenga ninmi: “Juchapi urmanata, expulsai tucunata, taitamamacunata llaquilla sintichinata pensarinami bautizaringapaca na munan carcani” nishpa.

8. Miles jovenga ¿imatata ninanda manllan carca?

 ⁸ Jarcaicuna tiajpi. Cunanga Miles jovenmanda yachajupashunchi. Paipa taita, paipa la mamaca Testigocunami carca. Shinapash paipa mama propioca na Testigochu carca. Miles jovenga ninmi: “18 huatacunatami ñuca mamahuan causarcani. Bautizaringapaj munani nishpa parlaitaca na ushanllu carcani. Ñuca taita Testigo tucujpica ñuca propio mamaca ninandami culirarca. Ñuca mama, ñucata nali sintichishpa imatapash ruranga yashpami ninanda manllan carcani” nishpa.

9. Jehová Dios juyaj, na ñapash fiñarij cashcata yachajushpaca ¿imatata rurangapaj munapangui?

⁹ Adanbash, Evapash Jehovata na tucui shunguhuan juyaimandami Jehovataca na sirvingapaj munarca. Shina cajpipash Jehová Diosca paicuna huahuacunata charishpa paicunallata viñachichunmi saquirca. Adanbash, Evapash paicunapa munaita rurashpaca Jehovata na juyashcatami ricuchirca. Shina ruraimandami paicunaca sufrishpa causarca. ¿Imashinata chaitaca yachai ushapanchi? Adanba, Evapa rucu churimi, paipa huauquitallata huañuchirca. Tiempohuangarin cai alpapica llaquichinahuanlla junda, paicunapilla pensarij gentecunami mirashpa catirca (Gén. 4:8; 6:11-13). Shinapash Adanba, Evapa miraicuna maijanbash Jehová Diosta sirvingapaj munajcunamandaca ¿imatata Jehová Diosca ruragrijurca? Shuj quishpichijtami cachamugrijurca (Juan 6:38-40, 57, 58). Shina rurashpaca ¿nachu Jehová Diosca juyaj, na ñapash fiñarij cashcata ricuchin? Jehovamanda yachajushpaca Jehovataca ashtahuanmi juyashpa catipangui. Quiquinbash Adanshna, Evashna cangapaca na munapanguichu. Ashtahuangarin tucui causaipi Jehovata sirvingapami munapangui.

10. Jehovata sirvichunga ¿imashinata Salmo 19:7​ca ayudan?

¹⁰ Jehová Diosmanda yachajushpa catipai. Jehovata ali rijsishpaca paipi confiashpa, paita sirvingapami munapangui. Avery jovenga ninmi, Salmo 19:7​manda ashtahuan yachajuna, chai yachajushcacunapi pensarinami Jehovapi confiachun ayudahuarca nishpa (chai textota liipangui). Chai liishcacuna paipa causaipi pactarijpica Jehovata ashtahuan juyachunmi ayudarca. Chai juyaica Jehovapi confiachunmi ayudan. Ashtahuanbachaca pai munashcashna causachunmi  ayudan. Hannah jovenga ninmi: “Bibliata liina, estudio personalta charinami ñucallata ama chugririchun, Jehová Dios llaquilla sintirijta yachachun ayudahuashca” nishpa (1 Ped. 5:7). Chai jovenga Biblia yachachishcata cazungapami ninanda esforzarirca (Sant. 1:22). Chai jovenllata ninmi: “Jehovata cazuimanda cushilla causaita charichun ayudashcamandami Jehovata ashtahuan juyachun ayudahuashca. Imapash llaquipi cajpi Jehová Dios ayudanataca cunanga seguromi sintirini” nishpa. Shinaca Hannah jovenga paillata chugririnataca ña saquishcami. Cunanga paica Jehová Diosta mañashpami, can Jehovatalla sirvishpa causasha nishca. Shina mañashca jipami paica bautizarirca.

11. a) Vanessa paniguca ¿imashinata alipacha amigocunata chari usharca? b) Caimandaca ¿imatata yachajupanchi?

¹¹ Ali amigocunata agllapai. Vanessa jovenga cuenta japircami paipa amiga Jehovata sirvichun na ayudajushcata. Chaimi paihuanga ñana llevarirca. Shina rurashca jipaca Vanessaca congregacionbi huauquipanicunahuan ali llevaringapami esforzarirca. Paica ninmi: “Noepa punllacunapica nali gentecuna, Jehovatapash na sirvijcunapa chaupipimi paicunaca causanajurca. Shinapash Noé, paipa familiapash paicunapura ali amigocuna caimandami cushilla causan carca. Chaita yachajunami ñucataca ninanda ayudahuarca” nishpa. Vanessa bautizarishca jipaca precursorami tucurca. Paica ninmi: “precursora caimandaca ñuca congregacionbi, shuj congregaciongunapipashmi alipacha amigocunata charipani” nishpa. Quiquinbash villachingapaj llujshishpaca alipacha amigocunatami chari ushapangui (Mat. 24:14).

12. a) Adanbash, Evapash ¿imamandata Jehovapa contra tucurca? b) Paicuna Jehovapa contra tucushpaca ¿imata pasarca?

¹² Ama yapata manllanguichu. Manllaita charinaca ¿alichu? Huaquinbica alimi can. Por ejemplo, Jehová Diospa ñaupajpi nalita ama rurangapaca manllaita charinaca minishtirishcapachami can (Sal. 111:10). Shinaca Adanbash, Evapash Jehová Diospa ñaupajpi nalita ruranata manllaita charishpaca Jehovapa contraca na tucunmanllu carca. Shinapash Jehovapa contra tucuimandami paicunapa ‘ñavi pascarijpi’ juchayu tucushcata cuenta japirca. Paicunaca paicunapa huahuacunamanbash juchata, huañuitapashmi saquirca. Shinami paicunaca juchayu tucushcata ali intindirca. Chaita intindishpami paicunaca  pinganayachishpa lluchulla cashcamanda fangacunata sirashpa quilparirca (Gén. 3:7, 21).

13, 14. a) 1 Pedro 3:21​pi nishca shinaca huañunataca ¿imamandata na manllana capanchi? b) ¿Imamandata Jehovataca juyana capanchi?

¹³ Imatapash nalita rurashpa Jehová Diosta llaquichina manllaita charinaca alimi can. Ashtahuangarin huañunatami na manllana capanchi. ¿Imashpata na manllana capanchi? Jehová Diosca para siempre causachunmi Jesús ñucanchimanda huañuchun cachamurca. Juchapi urmajpipash, tucui shunguhuan arripintirijpica, Jesús huañushcamandami Jehová Diosca ñucanchi juchacunata perdonanga. Jesús huañushcapi tucui shunguhuan crishcata ricuchingapaca Jehovata mañashpa, can Jehovatalla sirvishpa causasha nipanchi. Shina mañashca jipami bautizarina capanchi (1 Pedro 3:21, liingui) *.

¹⁴ Jehová Diosca cada punllami ima minishtirishcata, shuj cosascunatapash caran. Chaimi Jehovataca ninanda juyapanchi. Jehová Diosca paimanda, paipa munaimandami cabalta ñucanchimanga yachachin (Juan 8:31, 32). Jehová Diosca huauquicunata ñucanchita yachachichun, huauquipanicuna ñucanchita ayudachunmi cushca. Shinallata cunan punllacunapi llaquicunata aguantachunmi Jehová Diosca ñucanchita ayudan. Ashtahuambash shamuj punllacunapi para siempre ali causaiguta carasha ninmi (Sal. 68:19; Apoc. 21:3, 4). Jehová Dios ñucanchita juyaimanda imata rurashcapi pensarinami paita ashtahuan juyachun ayudan. Chaimi Jehovata juyaimanda pai llaquilla sintirichunga na munanchi. Tucuicunallatami chaitaca na munana capanchi.

15. Juchapi urmana manllaita mishachunga ¿imata Makayla jovendaca ayudarca?

¹⁵ Makayla jovenga Jehová Diosca perdonajlla cashcatami intindirca. Chaimi paica juchapi urmana manllaita mishai usharca. Paica ninmi: “Tucuicuna juchayucuna cashcatami intindircani. Shinallata Jehová Dios ñucanchita juyashcata, Jesús huañushpa Jehová perdonaj cashcatami intindircani” nishpa. Chai jovenga Jehovata juyaimandami, Jehovata mañashpa can Jehovatalla sirvishpa causasha nirca. Chai jipami bautizarirca.

16. Jarcaicunata mishachunga ¿imata Miles jovendaca ayudarca?

¹⁶ Miles jovenba mamaca pai bautizarichunga na munarcachu. Chaimi cai jovenga superintendente de circuito huauquipa ayudata mañarca. Chai jovenga ninmi: “Chai huauqui joven cajpica ñucashnallatami na Testigo mamata charirca. Chaimi, chai huauquica ñuca munaimandallata bautizaringapaj munashcata ñuca mamaman imashi intindichinata yachachihuarca. Shinallata ñuca taita bautizarinami cangui nijujpillaca na baurizarigrijunichu nichunbashmi ayudahuarca” nishpa. Shinapash Miles jovenba mamaca ninandami culirarca. Tiempohuanga bautizaringapami chai jovenga mamapa huasimanda rina tucurca. Shinapash pai imata rurasha nishcatami pactachirca.  Paica ninmi: “Jehová ñucata ayudashcata ricushpaca ninandami cushijurcani. Jesús gentecunata salvangapaj huañushcapi pensarinami, Jehová ñucata ninanda juyashcata intindichun ayudahuarca. Chaimi Jehovata mañashpa can Jehovatalla sirvishpa causasha nircani. Chai jipami bautizarircani” nishpa.

17. ¿Imatata tucuicunallata rurai ushapanchi?

¹⁷ Alita, nalita yachaita cuj yurapi fucushcata Eva micushpaca Jehovatami negarca. Shinallata Adán chai yuramanda micushpaca Jehovata na agradicishcatami ricuchirca. Ñucanchicuna bautizarishpami Adanbash, Evapash nalita rurashcata, Jehová Dioslla ima ali cajta, ima nali cajta nina derechota charishcata ricuchipanchi. Shinallata Jehovata juyashcata, paipi confiashcatami ricuchipanchi.

18. Jehovata sirvishpa cushilla causangapaca ¿imatata rurana capangui?

¹⁸ Bautizarishca jipaca ñucanchi munaita ruranapa randica, cada punllami Jehovapa mandashcacunata cazungapaj esforzarina capanchi. Jehovata cazungapaj na facil cajpipash ashtaca ashtaca huauquipanicunami cazungapaj esforzarinajun. Quiquinbashmi chai huauquipanicunashna caita ushapangui. Chaipaca Bibliata ali intindingapaj esforzarina capangui. Shinallata huauquipanicunahuan tiempoguta yalingapaj, juyaj Jehovamanda imata yachajushcata paicunaman parlangapami esforzarina capangui (Heb. 10:24, 25). Jehová Diosca Bibliahuan, paipa organizacionhuanmi ñucanchitaca consejan. Chaimi quiquinba causaipi imata ruranata agllagrijushpaca Jehovapa consejocunata cazuna capangui (Is. 30:21). Shina rurashpaca cushillami causapangui (Prov. 16:3, 20).

19. ¿Imatata na cungana capanchi?

¹⁹ Jehová Diospa yachachishcacuna ñucanchicunata imashina ayudashcataca na cunganachu capanchi. Shinami ashtahuan Jehovata juyashpa, paipa mandashcacunatapash cazushun. Shinallata Diablopa trampacunapi na urmashpami Jehovata sirvishpa catishun. Paraíso alpagupi quiquin bautizarishcapi pensarishpaca: “Ñuca causaipica Jehovata sirvinami ninanda cushichihuashca” nipanguimi.