1. Eaa ta Adamu e Eva i ngere, e eaa tei tupu?

KOAI toou manako tei tau kia akanoo i te au turanga no te meitaki e te kino? Te kai anga a Adamu raua ko Eva i te ua rakau o te kite i te meitaki e te kino, kua taka meitaki: Kare raua i irinaki ana ia Iehova e tona au turanga. Kua iki raua i te akanoo i to raua uaorai turanga no te meitaki e te kino. (Gene. 3:22) Akamanako ana i ta raua i ngere. Kua ngere raua i to raua pirianga oa kia Iehova. Kua ngere katoa raua i te ora mutu kore, e kua iri ta raua ara e te mate ki runga i te tamariki. (Roma 5:12) No teia iki anga kua tupu te taitaia kia Adamu e Eva.

2-3. (a) Akapeea te eunuka Etiopia te ariu anga ki te tuatua a Philipa? (e) Eaa te au akameitakianga ka rauka me papetitoia tatou, e eaa te au uianga ta tatou ka akamanako?

² E akara i te tuke i rotopu ia Adamu e Eva e te eunuka Etiopia tei ariu ki te tuatua a Philipa. Kua akameitaki maata tikai te eunuka i ta Iehova e ta Iesu i rave nona e kua akakeu iaia kia papetito. (Anga. 8:34-38) Me akatapu tatou i to tatou oraanga ki te Atua, mei te eunuka rai tei papetitoia, kua taka meitaki te reira. Te āriki tikai ra tatou i ta Iehova e Iesu i rave no tatou. Te akaari katoa ra e te irinaki ra tatou ia Iehova e koia tei tau kia akanoo i te turanga meitaki e te kino.

³ Akamanako ana i te au akameitakianga ta tatou i āriki me tavini ia Iehova! Ko tetai akameitakianga ta Iehova i oronga mai tei ngere a Adamu e Eva, koia oki kia ora e tuatau ua atu. No to tatou akarongo ki roto ia Iesu Karaiti, akakore  a Iehova i to tatou au tarevake e kua oronga mai i te akava ngakau mā. (Mata. 20:28; Anga. 10:43) Ka riro katoa mai tatou ei ngutuare tangata marekaia ei au tavini no Iehova ma te akameitakianga a te tuatau ki mua. (Ioa. 10:14-16; Roma 8:20, 21) Noatu teia au akameitakianga, kua tapupu tetai pae tei kite ia Iehova kia aru i te akaraanga o te eunuka Etiopia. Eaa ratou i kore ei e papetitoia? E akapeea ratou e autu ei i teia au akaaoanga?

4-5. Eaa te au akaaoanga ta tetai tamaiti ko Avery e te tamaine ko Hannah i aro atu?

⁴ Kare e manako papu. Te nga metua o Avery e Au Kite no Iehova. E tangata meitaki tona papa, e te akono meitaki ei tangata pakari i roto i te putuputuanga. Noatu rai, kua tapupu a Avery kia kore aia e papetitoia. Eaa te tumu? “Kare e rauka iaku i te aru i te tu meitaki o toku papa,” i karanga ai aia. Kare rai a Avery i manako ana e ka rauka iaia i te rave i tana au apainga, penei ka orongaia mai a te tuatau ki mua. “Kua manata au, te openga e patiia mai au kia pure i te ngai tangata, kia oronga i te au akoanga, me kore te arataki i tetai pupu no te ngai tutu aere.”

⁵ Ngere tikai a Hannah, e 18 ona mataiti, i te tu papu. Kua utuutuia mai aia e tona nga metua tei tavini ia Iehova. Noatu rai, kua ekoko aia e ka rauka iaia i te aru i te au turanga o Iehova. No teaa ra? Kare a Hannah e manako meitaki ana iaia uaorai. I tetai au taime, kua manako kino aia e kua akakoro i te tamamae iaia uaorai, e kua kino roa atu tona turanga. “Kare rava au i akakite ana i taku i rave, kare katoa ki toku nga metua,” i karanga ai aia, “e kua tamanako mai au e kare rava a Iehova e inangaro iaku no taku e rave ra.”

6. Eaa tei tapupu ia Vanessa kia kore e papetitoia?

⁶ Akavare anga a te au oa. Karanga a Vanessa, e 22 ona mataiti e, “E oa meitaki tikai toku no tetai tai ngauru mataiti.” Inara, kare to Vanessa oa i turu ana iaia i tona akakoroanga kia papetitoia. Kua mii a Vanessa, e kua karanga, “e ngata iaku i te kimi i te au oa meitaki, e kua manata me akamutu au i te reira pirianga oa, kare rava e rauka akaou mai tetai oa piri.”

7. Eaa ta tetai tamaine ko Makayla i mataku, e no teaa ra?

⁷ Te mataku ko te tarevake mai. E rima o Makayla mataiti te akaateaia anga tona tungane ki vao i te putuputuanga. Iaia e maata maira, kua kite aia i te mamae i runga i tona nga metua no te tu tau kore o tona tungane. “Kua mataku au e me ka papetitoia  au,” i karanga ai a Makayla, “ka tarevake mai au, e ka akaateaia ki vao i te putuputuanga, e ka mii tikai atu toku nga metua.”

8. Eaa ta tetai tamaiti ko Miles i mataku?

⁸ Mataku no te patoi anga. E tavini ana te papa o Miles e tona mama angai ia Iehova, inara kare tona mama anau i te Kite. “Kua noo au ki ko i toku mama anau no tetai 18 mataiti,” i karanga ai a Miles, “e kua mataku au i te akakite e ka inangaro au kia papetitoia. Kua kite ana au i tona tu te riro anga mai toku papa ei Kite. Kua mataku au e ka akatupu aia i te manamanata.”

9. Eaa te ka tupu me apii koe i to Iehova tu aroa e te akakoromaki maata?

⁹ Kua iki a Adamu e Eva kia kore e tavini ia Iehova no te mea kare raua i akatupu ana i te aroa mou piri nona. Noatu ra, kua akatika a Iehova ia raua kia noo ma te anau i te tamariki e kia utuutu ia ratou i ta raua i manako. Kua riro ta Adamu e Eva iki anga irinaki kore ia Iehova ei akapapu i to raua tu neneva. Kua tamate ta raua tama mua i tona teina tiama, e kare i roa i muri mai, kua tupu te tā ua e te noinoi ki te uanga tangata. (Gene. 4:8; 6:11-13) Inara, e ravenga rai ta Iehova no te akaora i te au tamariki pouroa a Adamu e Eva tei inangaro i te tavini iaia. (Ioa. 6:38-40, 57, 58) Ia koe e apii maira i to Iehova tu akakoromaki maata e te aroa, papu ka tupu toou inangaro iaia. Ka inangaro koe i te kopae i ta Adamu e Eva i rave ma te akatapu ia koe uaorai kia Iehova.

10. Akapeea te akamanako oonu anga ia Salamo 19:7 me tauturu ia koe kia tavini ia Iehova?

¹⁰ E apii ua atu rai no runga ia Iehova. Ko te maata taau ka apii no runga ia Iehova, ko te papu atu ia koe e ka rauka ia koe i te tavini iaia ma te autu. Karanga a Avery e: “Kua rauka iaku te tu papu na roto i te tatauanga e te akamanako oonu anga i te taputou ia Salamo 19:7.” (E tatau.) Te kite anga a Avery akapeea a Iehova i te akatupu anga i teia taputou, kua tupu meitaki tona inangaro i te Atua. Kare te aroa e akatupu ua i te tu papu mari ra ka tauturu katoa ia tatou kia akamou ki runga ia Iehova e tana  e anoano maira. Karanga a Hannah e: “Na roto i taku apii Pipiria naku uaorai, kua mārama mai au e me tamamae au iaku uaorai, te tamamae katoa ra au ia Iehova.” (1 Pete. 5:7) Kua riro mai a Hannah ei ‘rave oki i te tuatua a te Atua.’ (Iako. 1:22) Eaa tei tupu? Karanga aia: “Te kite anga au i te puapinga no toku tavini anga ia Iehova, kua tupu toku inangaro piri mou iaia. Te papu nei iaku e ka arataki ua rai a Iehova iaku me anoano au i tana tauturu.” Kua autu a Hannah e kua akamutu i te tamamae iaia uaorai. Kua akatapu aia iaia uaorai kia Iehova e kua papetitoia.

11. Eaa ta Vanessa i rave no te kimi i te au oa meitaki, e eaa ta tatou ka apii mai?

¹¹ E iki meitaki i toou au oa. I te openga kua kite mai a Vanessa, e te tapupu ra tona oa iaia kia kore e tavini ia Iehova. No reira kua akamutu aia i to raua pirianga oa. Inara e maata atu ta Vanessa i rave. Kua angaanga maata aia i te kimi i te au oa ou, i roto i te putuputuanga. Karanga aia e kua riro te akaraanga o Noa e tona ngutuare ei tauturu iaia. “Kua koropiniia ratou e te aronga kare e inangaro ana ia Iehova,” i karanga ai aia, “inara kua rauka te kapiti anga meitaki ki tetai e tetai.” I muri ake i tona papetito anga, kua riro mai a Vanessa ei painia. Karanga aia i teianei, “Kua tauturu teia iaia kia kimi i te au oa meitaki i roto i tana uaorai putuputuanga e tetai atu.” Ka rauka katoa ia koe i te kimi i te au oa meitaki na te piri maata anga ki roto i te angaanga ta Iehova i oronga mai kia rave tatou.—Mata. 24:14.

12. Eaa te tu mataku ta Adamu e Eva i ngere, e eaa tei tupu?

¹² Kia rauka te manako tau no runga i te mataku. E mea meitaki tetai tu mataku. Ei akaraanga, ka anoanoia tatou kia rauka te mataku tau, kia kore tatou e akamareka kore ia Iehova. (Sala. 111:10) Naringa a Adamu e Eva i akatupu i tera tu mataku, kare rai raua e patoi ia Iehova. Inara kua pera rai raua. I muri ake i to raua patoi anga, kua puera to raua mata i te kite e e nga tangata ara raua. Kua iri ta raua ara e te mate ki runga i ta raua tamariki. Na te kite anga e te mārama anga i to  raua turanga, kua akama raua i to raua tu taaka ua e kua akakakau ia raua uaorai.—Gene. 3:7, 21.

13-14. (a) Kia tau kia 1 Petero 3:21, eaa te au tumu kia kore ei tatou e mataku i te mate? (e) No teaa ra tatou ka inangaro ei ia Iehova?

¹³ Koi anoanoia ai te mataku tau no Iehova, kare tatou e mataku i te mate. Kua akatuera a Iehova i tetai mataara kia rauka ia tatou te ora mutu kore. Me rave tatou i te ara e kua tataraara ma te ngakau tae, ka akakore a Iehova i to tatou tarevake. Ka akakore aia ia tatou no to tatou akarongo ki roto i te atinga oko o tana Tamaiti. Tetai ravenga maata kia akaari i te akarongo, na te akatapu anga i to tatou oraanga ki te Atua e kia papetitoia.—E tatau ia 1 Petero 3:21.

¹⁴ E maata te au tumu kia inangaro ia Iehova. Te oronga maira aia i te au mea meitaki ta tatou e rekareka ra i te au rā e te apii katoa maira i te tuatua mou no runga iaia e tona au akakoroanga. (Ioa. 8:31, 32) Kua oronga mai aia i te putuputuanga Kerititiano kia arataki e te akono ia tatou. Te tauturu ra aia kia rauka ia tatou i te amo i ta tatou au apainga i teianei, e te oronga maira aia i te manakonakoanga mutu kore no te tuatau ki mua. (Sala. 68:19; Apo. 21:3, 4) Me akamanako tatou i ta Iehova i rave no tona inangaro ia tatou, ka akapiri vaitata atu tatou kiaia. E me inangaro tatou ia Iehova, ka rauka te mataku tau. Kare tatou e inangaro kia mamae Tei akaperepereia e tatou.

15. Akapeea a Makayla te autu anga i tona mataku no te rave i te tarevake?

¹⁵ Kua autu a Makayla i tona mataku no te rave i te tarevake, i tona mārama anga e ka akakore a Iehova i ta tatou ara. “Kite mai au e e tu apa ua to tatou pouroa ma te rave ua i te tarevake. Kite katoa mai au e te akaperepere ra a Iehova ia tatou e ka akakore aia i ta tatou ara na roto i te atinga oko.” Kua riro tana akaperepere ia Iehova ei akakeu iaia kia akatapu e kia papetito iaia uaorai.

16. Akapeea a Miles te tauturuia anga kia autu i tona mataku no te patoi anga?

¹⁶ Ko Miles, tei mataku e ka patoi tona mama i tana iki anga kia papetitoia, kua kimi aia i te tauturu a te akaaere kotinga. “Kua maata mai rai aia i roto i te ngutuare, okotai rai metua e Kite,” i karanga ai a Miles. “Kua tauturu aia iaku kia akamanako i taku ka tuatua ei akakeu i toku mama, e naku rai te iki anga kia papetito e kare na toku papa i māro iaku kia pera.” Kare to Miles mama i mataora ana i tana iki anga. I te openga, kua anoanoia aia kia akaruke i te kainga o tona mama, inara kua rave rai aia i tana i iki. “Na te apiianga i te au mea meitaki ta Iehova i rave noku, kua pakia tikai toku ngakau,” i karanga ai aia. “I toku manako oonu anga i te atinga oko o Iesu,  kua kite mai au i to Iehova inangaro maata iaku. Kua akakeu teia iaku kia akatapu iaku uaorai kia Iehova e kia papetitoia.”

17. Eaa te tuatau te vaira no tatou?

¹⁷ Te kai anga a Eva i te ua rakau i te kainga i Edene, kua patoi aia i tona Metua. Te piri anga a Adamu kia Eva, kua akaari aia i te tu āriki kore tikai no te au mea meitaki ta Iehova i rave. Ka rauka ia tatou pouroa te tuatau no te akaari i to tatou makitakita maata no te iki anga ta Adamu e Eva i rave. Na te papetito anga, te akaari ra tatou kia Iehova e te irinaki ra tatou e e mana tona i te akanoo i te tika e te tarevake. Te akapapu ra tatou e te akaperepere ra tatou i to tatou Metua e te irinaki ra iaia.

18. Akapeea koe e autu ei i te tavini ia Iehova?

¹⁸ Te akaaoanga ta tatou ka aro atu i muri ake i te papetito anga, koia oki kia aru i to Iehova au turanga, kare i to tatou. E mirioni ua atu tangata te rave ra i teia i te au mataiti ravarai. Ka aite koe mei ia ratou me akamaata ua atu i toou mārama i te Tuatua a te Atua, te Pipiria; te piri putuputu ki toou au taeake e te au tuaine; e te rave maroiroi i taau i apii no runga i toou Metua aroa. (Ebe. 10:24, 25) Me rave koe i te au iki anga, e akarongo ki te ako ta Iehova e oronga maira na roto i tana Tuatua e tana akaaerenga. (Isa. 30:21) I reira taau e rave ra e autu ei.—Mase. 16:3, 20.

19. Eaa taau ka kite ua e no teaa ra?

¹⁹ Me kite ua koe i te puapinga maata mei te arataki anga a Iehova, ka tupu ua atu toou inangaro nona e tona au turanga. Kare rava a Satani e autu i te akavare ia koe kia kore e tavini ia Iehova. Akamanako ana ia koe uaorai e tauatini ua atu mataiti ki mua. Ka maara ia koe taau iki anga meitaki rava atu tei rave kia papetitoia!