1. Сави одлука анѓе о Адам хем и Ева, хем саве сине о последице таро адава?

СО МИСЛИНЕА, кој ваљани те чхивел мерилија башо адава сој шукар, а сој лошно? Кеда о Адам хем и Ева хале таро плоди таро каш башо пенџарибе сој шукар хем сој лошно, јасно сикавѓе кај нане лен доверба ко Јехова хем ко лескере мерилија. Ола одлучинѓе коркори те чхивен песке мерилија башо адава сој шукар, а сој лошно (1. Мој. 3:22). Ама, размислин со нашавѓе баши адаја одлука. Нашавѓе пло амалипе е Јеховаја. Исто аѓаар, нашавѓе и прилика те живинен вечно хем пренесинѓе о грево хем о мерибе пле чхавенге (Рим. 5:12). Е Адамескири хем е Евакири одлука анѓа џи ко катастрофална последице.

2-3. а) Сар реагиринѓа о етиопско службенико кеда проповединѓа леске о Филип? б) Кола берекетија ка добина ако крстинаја амен, хем башо кола пучиба ка кера лафи?

² Споредин о начин сар постапинѓе о Адам хем и Ева адалеа сар постапинѓа о етиопско службенико со проповединѓа леске о Филип. О службенико сине добором бут благодарно со керѓе баши лесте о Јехова хем о Исус со одлучинѓа одма те крстинел пе (Дела 8:34-38). Слично сар лесте, кеда анаја одлука те да лафи кај ка служина е Јеховаске хем крстинаја амен, јасно сикаваја кај ценинаја са адава со керѓе аменге о Јехова хем о Исус. Исто аѓаар, сикаваја кај иси амен доверба ко Јехова хем прифатинаја кај ле иси ле право те чхивел мерилија башо адава сој шукар а сој лошно.

 ³ Размислин башо берекетија со иси амен адалеске со служинаја е Јеховаске. Јекх берекети тано адава со иси амен прилика те добина са адава со нашавѓе о Адам хем и Ева, а јекх бути со нашавѓе тано о вечно живото. Исто аѓаар, адалеске со верујнаја ко Исус, о Јехова простинела аменге амаре гревија хем шај те овел амен чисто совест (Мат. 20:28; Дела 10:43). Освен адава, улем дело тари е Девлескири фамилија хем иси амен бут шужи надеж баши иднина (Јован 10:14-16; Рим. 8:20, 21). Ама, иако џанена акала шуже берекетија, несаве со пенџарена е Јехова мислинена пе дали те керен адава со керѓа о етиопско службенико. Кола буќа шај чхинавена лен те крстинен пе? Хем сар шај те накхавен адала предизвикија?

4-5. Соске о Ејвер хем и Хана одложинена сине те крстинен пе?

⁴ Нане сигурна ки песте. Е Ејверескере родителија тане е Јеховаскере сведокија. Лескоро дад тано пенџардо сар мануш кова со грижинела пе е јаверенге хем сар шукар старешина. Сепак, о Ејвер одложинела сине те крстинел пе. Соске? Ов вакерела: „Мислинава сине кај никогаш нане те овав сар мо дад“. Исто аѓаар, ов мислинела сине кај ако дена ле несаве одговорностија ка нашти те керел лен. „Дарава сине кај шај те овен ман јавна молитве, говорија или те предводинав кеда сведочинаја сар група.“

⁵ И Хана, кола со иси ла 18 берш, англедер мислинела сине кај на врединела хем боринела пе сине адалеа. Ој барили родителенцар сој тане Сведокија. Ама, на сине сигурно кај шај те живинел аѓаар сар со мангела о Јехова. Соске? И Хана дикхела сине бут лошно ки песте. Понекогаш, осетинела пе сине добором лошно со намерно поврединела пе сине физички. А адава керела сине те осетинел пе панда полошно. Ој вакерела: „Никаске на вакерава сине со керѓум, чак ни мле родителенге. Мислинава сине кај о Јехова никогаш нане те прифатинел ман те овав лескоро слуга башо адава со керава сине“.

6. Со чхинавела сине е Ванеса те крстинел пе?

⁶ О влијание таро амала. И Ванеса, кола со иси ла 22 берш, вакерела: „Сине ман јекх бут паше амалин колаја со бершенцар џанаја амен сине“. Сепак, лакири амалин на интересинела пе сине башо чачипе хем на поможинела лаке сине те исполнинел пли цел те крстинел пе. Адава сине бут пхаро е Ванесаке. Ој вакерела: „Нане манге локхо те овав амалин некасаја. Дарава сине кај ако чхинавава акава амалипе, никогаш нане те аракхав манге паше амалин“.

7. Таро со дарала сине и Микејла, хем соске?

⁷ Дарана кај ка керен сериозно грешка. Е Микејла сине ла 5 берш кеда лакоро  пхрал сине исклучимо таро собрание. Сар со бајровела сине дикхела сине кобор бари дукх сине лакере родителен. Ој вакерела: „Дарава сине кај ако крстинава ман хем ако грешинава, ка овав исклучими хем адалеа панда повише ка дукхавав мле родителен“.

8. Таро со дарала сине о Мајлс?

⁸ Дар таро противибе. Е Мајлсескоро дад хем и маќеа тане Сведокија, ама лескири дај на служинела е Јеховаске. О Мајлс вакерела: „Живинѓум ме дајаја 18 берш. Дарава сине те вакерав лаке кај мангава те крстинав ман. Кеда мо дад уло е Јеховаскоро сведоко, ој реагиринѓа бут лошно. Адалеске дарава сине кај манге да ка керел проблемија“.

9. Со веројатно ка случинел пе кеда сикљовеа повише баши е Јеховаскири стрпливост хем грижа?

⁹ О Адам хем и Ева одлучинѓе те на служинен е Јеховаске соске на развинѓе силно мангипе спрема лесте. Сепак, о Јехова дозволинѓа ленге те живинен доволно време те шај те овен лен чхаве хем коркори те одлучинен сар ка воспитинен пумаре чхавен. Башо кратко време, о последице тари е Адамескири хем е Евакири одлука те овен независна таро Девел јасно сикавѓе кобор сине неразумна. Ленгоро најбаро чхаво мударѓа пле пхрале, а сар со накхела сине о време и Пхув пхердили насилна хем себична манушенцар (1. Мој. 4:8; 6:11-13). Ама, е Јехова сине ле начин сар те спасинел е Адамескере хем е Евакере потомцон кола со ка одлучинен те служинен леске (Јован 6:38-40, 57, 58). Кобор повише ка сикљове баши е Јеховаскири стрпливост хем грижа, веројатно добором повише тло мангипе спрема лесте ка бајрол. Исто аѓаар, адава ка поможинел туке те на кере и исто грешка со керѓе ла о Адам хем и Ева, хем те де лафи кај ка служине е Јеховаске цело живото.

10. Сар адава со ка размислине башо Псалм 19:7 ка поможинел туке те служине е Јеховаске?

¹⁰ Понадари да сикљов башо Јехова. Кобор повише сикљовеа башо Јехова добором посигурно ка ове ки туте кај шај те служине леске верно. О Ејвер, со спомнинѓем ле поупре, вакерела: „Адава со размислинава сине башо ветување сој пишимо ко Псалм 19:7 керѓа те овав посигурно ки манде“. (Читин.) Кеда о Ејвер дикхља сар о  Јехова исполнинела акава ветување, лескоро мангипе спрема о Девел уло посилно. О мангипе на само со керела те ова посигурна ки аменде него исто аѓаар поможинела те концентририна амен ко Јехова хем ко адава со родела амендар. И Хана, со спомнинѓем ла поупре, вакерела: „Преку о читибе хем о проучибе и Библија, халиљум кај кеда поврединава ман, поврединава е Јехова да“ (1. Пет. 5:7). И Хана почминѓа те керел адава со сикљовела сине тари Библија (Јак. 1:22). Саво сине о резултати? Ој вакерела: „Кеда дикхљум сар користинела манге адава со сиум послушно е Јеховаске, мло мангипе спрема лесте уло посилно. Акана сиум сигурно кај о Јехова секогаш ка водинел ман кеда ка ваљани манге лескири помош“. И Хана чхинавѓа те поврединел пе. Ој денѓа лафи кај ка служинел е Јеховаске хем крстинѓа пе.

11. Со керѓа и Ванеса те шај те овен ла шукар амала, хем со сикљоваја таро адава?

¹¹ Мудро бирин тле амален. И Ванеса, кола со спомнинѓем ла англедер, сар накхела сине о време халили кај лакири амалин чхинавела ла те служинел е Јеховаске. Адалеске, чхинавѓа те дружинел пе лаја. Ама, и Ванеса керѓа панда нешто. Бут трудинѓа пе те овен ла неве амала ко собрание. Ој вакерела кај бут поможинѓа лаке о пример е Ноескоро хем лескере фамилијакоро. И Ванеса вакерела: „Иако околу ленде сине бут мануша, ола дружинена пе сине машкар песте соске о јавера на мангена сине е Јехова“. Откеда крстинѓа пе, и Ванеса почминѓа е пионерско службаја. Акана ој вакерела: „Акава поможинѓа манге те аракхав шукар амала на само ко мло собрание него ко јавера да собранија“. Туте да шај те овен тут шукар амала аѓаар со ка ове зафатимо ки служба кобор со шај повише (Мат. 24:14).

12. Со на сине е Адаме хем е Ева, хем саво сине о резултати?

¹² Нека овел тут исправно дар. Шукар тано те овел амен исправно дар. На пример, ваљани те овел амен дар те на разочарина е Јехова (Пс. 111:10). Те овел сине е Адаме хем е Ева асавки дар, нане те бунинен пе сине против о Јехова. Ама ола бунинѓе пе. Откеда керѓе адава, ола уле грешникија хем пумаре чхавенге шај сине те пренесинен само грево хем мерибе. Тегани  ленгере јакхја пхравдиле, или јавере лафенцар уле целосно свесна кај тане грешникија. Адалеске со уле свесна баши пли состојба, дикхле кај тане нанѓе, лаџандиле хем учхарѓе пе (1. Мој. 3:7, 21).

13-14. а) Спрема 1. Петрово 3:21 соске на ваљани превише те дара таро мерибе? б) Соске ваљани те манга е Јехова?

¹³ Иако ваљани те овел амен исправно дар таро Јехова, на ваљани превише те дара таро мерибе, иако наслединѓем грево хем мерибе. О Јехова керѓа нешто те шај те добина вечно живото. Ако кераја грево хем искрено каинаја амен, о Јехова ка простинел аменге. Ов керела адава соске иси амен вера ки е Исусескири откупно жртва. Главно начин сар сикаваја вера ко Девел тано аѓаар со даја лафи кај ка служина леске хем крстинаја амен. (Читин 1. Петрово 3:21.)

¹⁴ Иси амен бут причине те манга е Јехова. Ов на само со дела амен са со ваљани аменге башо живото него ов вакерела аменге пли намера хем о чачипе баши песте (Јован 8:31, 32). Ов денѓа аменге о христијанско собрание преку кова со водинела амен хем поддржинела амен. Исто аѓаар, авдиве поможинела аменге те издржина кеда иси амен проблемија хем дела аменге надеж кај ки иднина ка живина вечно ко совршена условија (Пс. 68:19; Отк. 21:3, 4). Кеда размислинаја кобор бут буќа керѓа о Јехова баши аменде те шај те сикавел кај мангела амен, амаро мангипе баши лесте бајрола. А адава поможинела аменге те овел амен исправно дар спрема лесте. Дараја те на повредина амаре Девле коле со бут мангаја.

15. Сар и Микејла побединѓа и дар кај ка керел сериозно грешка?

¹⁵ И Микејла, со спомнинѓем ла англедер, побединѓа и дар со сине ла кај ка керел сериозно грешка кеда халили кобор милостиво тано о Јехова. Ој вакерела: „Халиљум кај сарине сием несовршена хем грешинаја. Ама, сиклиљум кај о Јехова мангела амен хем простинела аменге преку и откупно жртва“. О мангипе спрема о Јехова поттикнинѓа ла те дел лафи кај ка служинел е Девлеске хем те крстинел пе.

16. Сар о Мајлс побединѓа и дар таро противибе?

¹⁶ О Мајлс, кова со дарала сине кај и дај лескири ка противинел пе леске со мангела те крстинел пе, родинѓа помош таро покраинско надгледнико. О Мајлс вакерела: „Ов да барило ки фамилија коте со на сине сарине Сведокија. Ов поможинѓа манге те размислинав со шај те вакерав ме дајаке те шај те хаљол кај мо дад на теринела ман те керав адава, него кај адаја тани мли одлука“. Кеда вакерѓа о Мајлс пле дајаке, ој на реагиринѓа шукар. Адалеске со и ситуација кхере ули бут лошно, ов мора сине те џал песке кхерал соске сине одлучно те крстинел пе. Ов вакерела: „Кеда халиљум кобор шуже буќа керѓа о Јехова баши манде, адава погодинѓа ман. Кеда размислинава похор баши откупно жртва е Исусескири, хаљовава кобор бут мангела ман о Јехова. Акава поттикнинѓа  ман те дав лафи е Јеховаске кај ка служинав леске хем те крстинав ман“.

17. Сави прилика иси амен?

¹⁷ Кеда и Ева хаља таро плоди ки градина Еден, ој отфрлинѓа пле Даде. Кеда хаља о Адам да, сикавѓа кај нане благодарно башо са о шуже буќа со керѓа лен о Јехова баши лесте. Саринен иси амен прилика те сикава кај на сием сар о Адам хем и Ева. Амен сием бут благодарна башо са со керѓа аменге о Јехова. Кеда крстинаја амен сикаваја кај о Јехова иси ле право те чхивел аменге мерилија башо адава сој шукар а сој лошно. Исто аѓаар сикаваја кај мангаја амаре Даде хем кај иси амен доверба ки лесте.

18. Сар шај верно те служине е Јеховаске?

¹⁸ Откеда ка крстина амен, ваљани понадари да те кера адава со мангела о Јехова, а на адава со мангаја амен. Милионија слуге е Девлескере живинена аѓаар секова диве. Ту да шај те ове сар ленде ако понадари сикљовеа таро е Девлескоро Лафи, ако дружинеа тут е пхраленцар хем е пхењенцар хем ако вакереа е јаверенге башо тло Дад сој ко небо (Евр. 10:24, 25). Кеда анеа одлуке, шун о советија кола со дела тут о Јехова преку и Библија хем преку пли организација (Иса. 30:21). Тегани, ко са со кереа ка ове успешно (Изр. 16:3, 20).

19. Башо со ваљани понадари да те размислине, хем соске?

¹⁹ Ако понадари да размислинеа башо адава кобор бари корист иси тут таро водство со дела о Јехова, тло мангипе спрема лесте хем спрема лескере мерилија ка бајровел. Тегани ништо таро адава со нудинела туке о Сатана нане те цидел тут таро Јехова. Замислин тут пало милја берша. Тегани целосно ка ове сигурно кај тли одлука те крстине тут сине и најшукар одлука со анѓан ла ко тло живото.