1. So o Adam hem i Eva našaldže hem save posledice andža oljengi odluka?

SO TU mislineja, ko isi lje pravo te phenel soj tano šukar, a soj tano lošno? Ked o Adam hem i Eva ljelje o plod ando kaš pendžaribase o šukar hem o lošno, so mothodže odoljeja? On jasno mothodže so nane ljen poverenje upro Jehova hem so na prihvatinena oljese merilija. On kokri odlučindže te birinen soj tano šukar, a soj tano lošno (1. Moj. 3:22). Ama, razmislin samo so sa našaldže. O amaljipe e Jehovaja hem i prilika te živinen večno. A pe čhavendže prenesindže o greh hem o meribe (Rim. 5:12). Peklje odlukaja sarinendže andže bare muke.

2-3. (a) Sar reagujindža o etiopsko evnuh ked o Filip vačerdža ljese o šukar haberi? (b) Save blagoslovija šaj te očekujina ako krstinaja amen hem ando kola pučiba ka vačera?

² Dikh i razlika maškaro odova savo stav hine ljen o Adam hem i Eva hem odova sar reagujindža o etiopsko evnuh, ked o Filip vačerdža ljese o šukar haberi. O evnuh hine but zahvalno odoljese so o Jehova hem o Isus čerdže oljese hem odma krstisalo (Čer. 8:34-38). Ked daja amaro dživdipe e Devljese hem krstinaja amen, sar so čerdža o etiopsko evnuh, so mothovaja odoljeja? Amen mothovaja so hijam zahvalna odoljese so o Jehova hem o Isus čerdže amendže. Isto adžahar, mothovaja so isi amen poverenje upro Jehova hem soj tano samo ov odova kova šaj te phenel soj tano šukar, a soj tano lošno.

³ Razmislin kobor blagoslovija isi amen ked služinaja e Jehovase! Jekh blagoslov tano odova so o Jehova ka del  amendže sa so o Adam hem i Eva našaldže, so uključini hem i nada te živina večno. Odoljese so verujinaja ko Isus Hrist, o Jehova oprostini amare grehija hem adžahar šaj te ovel amen čisto savest (Mat. 20:28; Čer. 10:43). Isto adžahar, ovaja deo andi Jehovasi porodica hem ka ovel amen šuži budućnost (Jov. 10:14-16; Rim. 8:20, 21). Ama uzo sa odola blagoslovija, disave manuša kola džanena o čačipe andi Biblija, paljem tane ko duj godža da li te krstinen pe ja na. So sprečini ljen te krstinen pe? Sar šaj te pobedinen odova so sprečini ljen?

4-5. Sova borindže pe o Ejveri hem i Hana?

⁴ I nesigurnost ano peste. O roditeljija ando Ejveri tane e Jehovase svedokija. Oljeso dad tano pendžarutno sar šukar roditelj hem starešina. Ama, hine diso so sprečindža e Ejverije te krstini pe. So hine odova? Ov phenela: „Hine man dar so niked na ka ovav odoborkha šukar sar mo dad.“ Ov mislindža so ako jekh dive dobini disave zaduženja, na ka čerel ljen šukar. „Hine man dar ked razmislindžum so mora te molina man anglo avera, te ičerav govorija ja te brininav andi grupa e službače.“

⁵ I Hana isi la 18 berš hem angljeder hine la jekh ozbiljno problemi. Oj na hine sigurno koro peste. Barjačerdže la o roditeljija kola tane e Jehovase svedokija. Ama iako hine adžahar, oj sumnjindža koro peste. Mislindža so na ka uspini te živini adžahar sar so o Jehova mangela. Sose? I Hana mislindža so ništa na vredini. Podijekh puti odoborkha lošno osetindža pe, so andža la dži odova namerno te povredini kokri pes. Ama, odova čerdža olače pana pobare problemija. Oj phenela: „Sarinendar garadžum so čerdžum, čak ando mo dad hem andi mi daj. Mislindžum so o Jehova niked na ka mangel te služinav ljese, sebepi odova so čerava kokri maje.“

6. So sprečindža e Vanesa te krstini pe?

⁶ O uticaj ando amala. I Vanesa, koja isi la 22 berš, phenela: „Hine man jekh but šukar amaljin, kolaja družisaljum skoro deš berš.“ Odija amaljin na manglja i Vanesa te krstini pe. Odoljese, e Vanesače hine but pharo. Oj phenela: „Na hine maje lokho te ovav nekasa amal hem darandiljum so ako našalava la, niked na ka ovel man asavki amaljin kasa ka ovav but paše.“

7. Savi dar hine la i Makejla hem sose?

⁷ I dar andi ozbiljno greška. I Makejla hine la pandž berš ked olako phral hine isključimo. Dži barilji, oj dikhlja sar  odova so čerdža olako phral utičindža ko olake roditeljija. I Makejla phenela: „Hine man dar so palo krštenje ka čerav disavi greška hem ka ovav isključimi, hem adžahar ka anav me roditeljendže pana pobari dukh, nego so već hine ljen.

8. Savi dar hine lje o Majls?

⁸ I dar ando protivljenje. E Majlseso dad hem i maćija tane e Jehovase svedokija, ama oljesi daj nane svedoko. Ov phenela: „Živindžum me daja 18 berš. Hine man dar te vačerav olače so mangava te ovav e Jehovaso svedoko. Dikhljum kobor hine holjami ked mo dad ulo e Jehovaso svedoko hem darandiljum so hem maje ka čerel problemija.“

9. Sar ka osetine tut ked sikljoveja kobor tano o Jehova strpljivo hem pherdo mangipaja?

⁹ O Adam hem i Eva odlučindže te na služinen e Jehovase sose oljengo mangipe premalo oljeste na hine dovoljno zoralo. Iako hine adžahar, o Jehova mukhlja ljen te živinen dovoljno vreme te šaj te ovel ljen čhave hem te barjačeren ljen sar so on mangena. Sigate palo odova dičhilo so oljengi odluka te živinen bizo Jehova tani but pogrešno. Oljengo najphureder čhavo mudardža pe phralje kova nisose na hine krivo. Adžahar počmindža o nasilje hem i sebičnost maškaro manuša (1. Moj. 4:8; 6:11-13). Ama, o Jehova džandža sar te spasini e Adamese hem e Evake čhaven kola mangena te služinen oljese (Jov. 6:38-40, 57, 58). Dži sikljoveja kobor tano o Jehova strpljivo hem pherdo mangipaja, pana pobuter ka mange lje. Na ka mange te ove sar o Adam hem i Eva, nego ka mange te de to dživdipe e Jehovase.

10. Sar o razmislibe ando lafija kola tane pisime ko Psalam 19:7 šaj te pomožini tut te služine e Jehovase?

¹⁰ Hem ponodri sikljov ando Jehova. So pobuter sikljoveja ando Jehova, pana pobuter ka ove uverimo so šaj te služine oljese uspešno. O Ejveri, kastar vačerdžam angljeder, phenela: „Hijum lje posigurno koro mande ked čitindžum hem razmislindžum ando lafija kola tane pisime ko Psalam  19:7.“ (Čitinen.) Ked o Ejveri dikhlja so čače šaj te verujini e Jehovase, odova pana pobuter barjačerdža oljeso mangipe premalo oljeste. I Hana, kolatar vačerdžam angljeder, phenela: „Dži čitindžum hem proučindžum i Biblija, haljiljum so ked povredinava man, povredinava hem e Jehova“ (1. Petr. 5:7). I Hana počmindža te živini adžahar sar so sikavi la e Devljeso Lafi (Jak. 1:22). Sar odova utičindža upro late? Oj phenela: „Ked dikhljum kobor tano šukar te šuna e Jehova, zamangljum lje but. Akana hijum sigurno so uvek šaj te mukha man upro Jehova.“ I Hana pobedindža o osećaj kova andža la dži odova te povredini kokri pes. Oj dindža po dživdipe e Jehovase hem krstisalji.

11. Sar i Vanesa arakhlja pese šukar amaljen hem so sikljovaja olatar?

¹¹ Mudro birin te amaljen. Sar dželo o vreme, i Vanesa haljilji so olaki amaljin hič na pomožindža la te napredujini duhovno. Odoljese, više na družisalji olaja. Ama, i Vanesa čerdža pana diso. Dindža sa pestar te arakhi neve amaljen ki skupština. Oj phenela so but pomožindža la o primer ando Noje hem andi oljesi porodica. I Vanesa phenela: „On živindže maškaro manuša kola na manglje e Jehova. Ama, sar porodica jekh jekhese hine šukar društvo.“ I Vanesa krstisalji hem ulji pioniri. Oj phenela: „I pionirsko služba pomožindža maje te arakhav amaljen na samo ki miklji skupština, nego hem ko avera skupštine.“ Hem tu šaj te arakhe šukar amaljen ako deja sa tutar te čere o zadatko kova o Jehova dindža amen (Mat. 24:14).

12. Savi dar na hine ljen o Adam hem i Eva hem dži soste odova andža?

¹² Sikljov te ovel tut ispravno dar. Nane svako dar lošno. Na primer, amen valjani te dara te na dukhava e Jehova (Ps. 111:10). Ked bi o Adam hem i Eva ovela ljen hine asavki dar, tegani na bi buninena pe protiv o Jehova. Ama, paljem bunindže pe. Palo odova „phravdilje oljenge jačha“, ko odova način so haljilje so grešindže. Pe čhavendže šaj hine te prenosinen samo greh hem meribe. Odoljese so haljilje so čerdže, ladžandilje soj tane nange hem učhardže pe (1. Moj. 3:7, 21).

13-14. (a) Premalo 1. Petareso 3:21, sose na valjani previše te dara ando meribe? (b) Kola razlogija isi amen te manga e Jehova?

 ¹³ Iako valjani te ovel amen dar te na dukhava e Jehova, na valjani previše te dara so o Jehova ka kaznini amen meribaja ako grešinaja. O Jehova čerdža sa so valjani te šaj te dobina o večno dživdipe. Ako hem čeraja greh, ama iskreno kajinaja amen, tegani o Jehova ka oprostini amendže. Ov ka čerel odova odoljese so verujinaja ki otkupno žrtva koja dindža oljeso Čhavo. Jekh najvažno način sar mothovaja vera ki akija žrtva tano te da amaro dživdipe e Devljese hem te krstina amen. (Čitinen 1. Petareso 3:21.)

¹⁴ Isi amen but razlogija te manga e Jehova. Na samo so dela amen šukar buča svako dive, nego hem mothovi amendže savo Devel tano hem so mangela te čerel (Jov. 8:31, 32). Ov dindža amen i hrišćansko skupština te šaj prekalo late te ljegari amen hem te pomožini amen. Dela amen snaga te istrajina ked isi amen problemija hem dela amen nada so ka živina večno ko vreme so avela, ko savršena uslovija (Ps. 68:19; Puč. 21:3, 4). Amaro mangipe premalo o Jehova barjola ked razmislinaja odoljestar sar mothodža dži akana kobor mangela amen. A asavko mangipe premalo Jehova pomožini amen ispravno te dikha ki dar. Na mangaja te dukhava okolje kas but mangaja.

15. Sar i Makejla pobedindža pi dar so ka čerel ozbiljno greška?

¹⁵ I Makejla, kolatar vačerdžam angljeder, haljilji kobor but o Jehova oprostini. Odova pomožindža la te pobedini pi dar so ka čerel ozbiljno greška. Oj phenela: „Haljiljum so sare amen hijam nesavršena hem so ka čera greške. Ama, isto adžahar haljiljum so o Jehova mangela amen hem spremno tano te oprostini amendže sebepi e Isusesi žrtva.“ O mangipe premalo Jehova podstaknindža la te del po dživdipe e Jehovase hem te krstini pe.

16. Sar o Majls pobedindža pi dar ando protivljenje?

¹⁶ O Majls, kova darandilo sar ka reagujini oljesi daj ked ov ka phenel lače so mangela te krstini pe, vačerdža odoljestar e pokrajinsko nadglednikoja. O Majls phenela: „Hem ov barilo ki porodica kuri na hine sare e Jehovase svedokija. Pomožindža maje te razmislinav so bi phenava me dajače te šaj te uverinav la so na čhivela man mo dad te krstina man, nego me odova mangava.“ Oljesi daj na hine bahtalji sebepi oljesi odluka. Ama, iako valjandža te džal pese ando čher, o Majls ičerdža pe ko odova so odlučindža. O Majls phenela: „Ked haljiljum kobor šukar buča o Jehova čerdža maje, odova pogodindža man ko vilo. Ked hor razmislindžum andi Isusesi otkupno žrtva, tegani počmindžum te haljovav kobor but o Jehova mangela man. Odova podstaknindža man te dav  mo dživdipe e Jehovase hem te krstina man.“

17. So svako amendar šaj te mothovi?

¹⁷ Ked i Eva halja o plod kova hine zabranimo, tegani oj bunindža pe protiv po nebesko Dad. O Adam hine ki olaki strana hem odoljeja mothodža so hič nane zahvalno ko sa o šukaripe so o Jehova čerdža oljese. Svako amendar šaj te mothovi so nane sar o Adam hem i Eva. Amen hijam zahvalna ko sa so o Jehova čerdža amendže. Ked amen krstinaja amen, odoljeja mothovaja so verujinaja so ov isi lje pravo te phenel soj tano šukar, a soj tano lošno. Odova mothovi so mangaja amare Dade hem verujinaja oljese.

18. So ka pomožini tut hem ponodri te služine e Jehovase?

¹⁸ Palo krštenje amen hem ponodri valjani te čera odova so o Jehova mangela, a na odova so amen mangaja. Milionja e Devljese sluge beršenca čerena odova. Hem tu šaj te čere odova. Sar? Adžahar so hem ponodri hor ka sikljove ando e Devljeso Lafi, redovno ka dža ko sastankija hem spremno ka vačere averencar kobor tano šukar amaro nebesko Dad (Jevr. 10:24, 25). Ked aneja odluke, tegani šun e Jehovase savetija kola dela tut prekalo poklo Lafi hem prekalji piklji organizacija (Isa. 30:21). Tegani ka uspine ko sa so čereja (Godž. 16:3, 20).

19. Sostar valjani hem ponodri te razmislina hem sose?

¹⁹ Ked hem ponodri razmislineja kobor tano šukar o Jehova te ljegari tut, pana pobuter ka mange e Jehova hem oljese merilija. Tegani ništa so o Beng nudini tuče, na ka čhivel tut te ačhave e Jehova. Zamislin tut palo hiljada berš. Ked ka razmisline ando vreme so nakhlja, tegani ka dikhe so i odluka te krstine tut hine najšukar odluka koja andžan ko to dživdipe.