1. Addaaminna Heewani maa huˈnitino? Tini mayi guma abbitino?

KUNI danchaho kuni bushaho yee kulate qoosso noosihu aye lawannohe? Addaaminna Heewani danchanna busha badde leellishshanno haqqicho guma ittu woyite, Yihowanna biddishshasi addaxxitannokkita leellishshino. Insa uminsara danchanna busha bade kulanno biddishsha fushshiˈra doodhitino. (Kal. 3:22) Ikkollana insa hatto assansanni mageeshshire huˈnitinoro heda dandaatto. Insa Yihowa ledo noonsa jaalooma huˈnitino. Hattono hegerera heeˈrate qoossonsa hooggino; qoleno oosonsara cubbonna reyo ragisiissino. (Rom. 5:12) Addaaminna Heewani doodhitino doorshi lowo qarra abbino.

2-3. (a) Itiyophiyu manchi Filiphoosi farciˈrisi woyite maa assino? (b) Cuuammummoro mayi atoote afiˈneemmo? Konninni aanchine hiikkuri xaˈmuwa xiinxallineemmo?

² Mittu Itophiyu manchi, Filiphoosi farciˈrisi woyite Addaaminna Heewani assitinorinni baxxinore assino. Kuni manchi Yihowanna Yesuusi assitinosire lowo geeshsha naadino daafira, hakkawoyintenni cuuamino. (Soq. 8:34-38) Ninkeno heeshshonke Maganoho sayinse uyineemmonna hakko manchi gede cuuammeemmo woyite, Yihowanna Yesuusi assitinonkere naandeemmota leellinsheemmo. Hattono Yihowa addaxxineemmotanna bushanna dancha bade kulate qoosso noosihu iso ikkinota huwantoommota leellinsheemmo.

³ Hanni Yihowara soqqammeemmoha ikkiro afiˈneemmo atoote hedi. Umihunni, Addaaminna Heewani huˈnitinore baala afiˈrate hexxo noonke; kuri giddo mitte hegerera heeˈrate hexxooti. Yesuusi Kiristoosa ammanneemmoha ikkiro, Yihowa  cubbonke gatona yaannonke; hattono xuru nookki tiia aannonke. (Mat. 20:28; Soq. 10:43) Qoleno Yihowa hagiirsiissanno soqqamaano wido ikkineemmo daafira, albillitte dancha heeshsho heeˈneemmo. (Yoh. 10:14-16; Rom. 8:20, 21) Ikkollana mitootu Yihowa daafira rossinoha ikkirono, Itiyophiyu manchi lawishsha harunsite cuuamatenni badhera higganno. Insa cuuantannokki gede assinonsari maa ikkara dandaanno? Hattono insa fonqolo ikkannonsaha konne coye qeela dandiitannohu hiittoonniiti?

4-5. Aveerinna Haanna yinanni wedellootira mayi tuncu yiinonsa?

⁴ Dandoo dinoe yee waajja. Aveeri anninna ama Yihowa Farciˈraasineeti. Annisi maatesi danchu garinni towaatannohonna worba songote cimeessaati. Ikkirono Aveeri cuuamatenni badhera higino. Mayira? Isi, “Ani anniˈya gede ikka dandeemmoha dilawinoe” yiino. Hattono Aveeri albillitte uyinannisi qeecha duqqa dandaannokkiha lawinosi. Isi togo yiino: “Mannu albaanni huuccatto asseemmo gede, lallawo shiqisheemmo woy qanchu soqqansho gambooshshe massageemmo gede xaˈminannie yee waajjoommo.”

⁵ Haanna yinanniti 18 diro ikkannose beetto mito coye assate worbimma dinoe yite heddanni keeshshitino. Annisenna amase Yihowa Farciˈraasineeti. Ikkirono ise Yihowa biddishshi garinni heeˈra didandeemma yite waajjitino. Mayira? Korkaatuno Haanna umose mannu woriidita assite laˈanno. Mito woyite ise baasa dadillitanno daafira, affanni heedhe umose gawajjitanno; tini qolte coyi roore bushanno gede assa agurranna tirtannori dino. Ise togo yitino: “Assoommare mittohono, wole agurina anniˈyaranna amaˈyara nafa dikuloomma; hattono aneneeto gawajjanni noomma daafira, Yihowa soqqamaanchosi ikkammara dihasiˈranno yee hedoomma.”

6. Vaneesa cuuantannokki gede fonqolo ikkinoseri maati?

⁶ Jaallate fonqolo. Vaneesa yinanniti 22 diro ikkannose beetto togo yitino: “Mitu tonnu diri albaanni egennamoommati mitte baxeemma jaala nooe.” Ikkollana Vaneesa jaala ise cuuantanno gede dijawaachishshinose. Tini ise dadillissinose; Vaneesa togo yitino: “Mannu ledo jaalooma kalaqiˈra qarra ikkitinoe, hattono ise ledo nooe jaalooma agurummaro wole ise gedee jaala horonta diafiˈreemma yee waajjoomma.”

7. Makeela yinanni beetto maa waajjitino? Mayira?

⁷ Cubbo loonseemmo yine waajja. Makeela rodii songotenni bohaminohu ise ontu diriti heedheennaati. Ise anjesenni kayisse rodiise assooti annasenna amase dadillisino gara  laˈino. Makeela togo yitino: “Cubbo loosenna songotenni bohame annaˈyanna amaˈya dadilliseemma yee yaadoomma daafira cuuama waajjoomma.”

8. Miilzi yinanni wedellichi maa waajjino?

⁸ Darte waajja. Miilzi anninna lossu amasi Yihowa Farciˈraasineeti; iltinosi ama kayinni Yihowa Farciˈraasincho diˈˈikkitino. Isi togo yiino: “Iltinoe amaˈya ledo 18 diro heeˈroommo; konnira cuuama hasiˈroommota isera kula waajjoommo. Korkaatuno alba anniˈya Yihowa Farciˈraasincho ikki woyite mayi macciishshaminosero afoommo. Konnira aneno qarrissannoe yee waajjoommo.”

9. Yihowa cincino garanna baxillisi daafira rosakki maaho kaaˈlitannohe?

⁹ Addaaminna Heewani Yihowara noonsa baxilli lexxanno gede assidhinokki daafira, Isira soqqama hoogate doodhitino. Ikkollana Yihowa insa seeda diro heedhe ooso iltanno gedenna oosonsa hasidhino garinni lossidhanno gede fajjinonsa. Addaaminna Heewani Yihowawiinni fafe heeˈrate doodhitino doorshi abbino gumi, insa gowwuulle ikkinota leellishanno. Bayiru beettinsa beebbaataamo rodoosi shiino; hattono batinye mannu ooso galte hosse finqilanna umonsa calla baxxannore ikkitino. (Kal. 4:8; 6:11-13) Ikkollana Yihowa Addaaminna Heewani sirchi giddonni isira soqqama hasidhannori gato afidhanno faro qixxeessino. (Yoh. 6:38-40, 57, 58) Yihowa cincino garanna baxillisi daafira roore rossanni haˈratto woyite, isira noohe baxilli lexxanni haˈrara dandaanno. Addaaminna Heewani lawishsha harunsa agurte heeshshokki Yihowara sayisse aa hasiˈrattoti egennantinote.

10. Faarso 19:7te noo hedo hiincakki Yihowara soqqamate kaaˈlitahera dandiitanno yineemmohu mayiraati?

¹⁰ Yihowa daafira rosa agurtooti. Yihowa daafira rossanni haˈratto woyite, soqqanshokkinni hagiirraamo ikka dandaattota albinni roore addaxxatto. Aleenni qummi assinihu Aveeri togo yiino: “Faarso 19:7te aana Yihowa eino qaale nabbawaˈyanna hiincaˈya worba ikkeemmo gede assitinoe.” (Qummeeshsha  nabbawi.) Aveeri Yihowa einoha konne qaale wonshino gara lai woyite, Maganoho noosi baxilli lexxanni haˈrino. Baxillu worbuulle ikkineemmo gede calla ikkikkinni Yihowanna Isi fajjo aana illachinsheemmo gede kaaˈlannonke. Aleenni qummi assiniti Haanna togo yitino: “Qullaawa Maxaafa nabbawaˈyanna hojju xiinxallo assiraˈya, aneneeto gawajjeemma woyite Yihowano gawajjanni noommata wodancheemma gede assitinoe.” (1 Phe. 5:7) Haanna Maganu “Qaale guuttinannire ikke” yitanno amaale harunsitino. (Yai. 1:22) Tenne assase maaho kaaˈlitinose? Ise togo yitino: “Yihowara hajajama kaaˈlitinoe gara laˈˈaˈya isira nooe baxilli lexxanno gede assitino. Xa, Yihowa kaaˈlo hasiissannoe yanna baalantera kaaˈlannoeta dihuluullameemma.” Haanna iseneeto gawajjitanno gede xixxiibbannose hedo qeela dandiitino. Ise heeshshose Yihowara sayisse uyite cuuantino.

11. Vaneesa dancha jaalla kalaqiˈrate maa assitino? Ninke ise lawishshinni maa ronseemmo?

¹¹ Jaalla qorophite doodhi. Aleenni qummi assiniti Vaneesa, jaalase ise Yihowara soqqamatenni badhera higganno gede assitinoseta galte hosse huwattino. Konnira ise hatte beetto ledo noose jaalooma agurtino. Ikkollana ise wolereno assitino. Vaneesa songote giddo haaro jaalla afiˈrate sharrantino. Ise Nohinna maatesi lawishshi kaaˈlinoseta coyidhino. Ise togo yitino: “Insa Yihowa baxannokki manni mereero heeˈrinoha ikkirono, mimmitu ledo dancha aante noonsa.” Vaneesa cuuantu gedensaanni suwisaancho ikkitino. Xa ise togo yitino: “Tini ani noomma songo giddo calla ikkikkinni wole songo giddono jaalla kalaqiˈreemma gede kaaˈlitinoe.” Atino Yihowa uyinonke looso dandaamihe deerrinni diinaggaabbe loosse dancha jaalla kalaqiˈra dandaatto.—Mat. 24:14.

12. Addaamiranna Heewanira hiitti waajja dinonsa? Yannate gedensaanni mayi iillinonsa?

¹² Gara ikkitinokki waajja waajjitooti. Waajja kaaˈlitannonke woyiti no. Lawishshaho, Yihowa dadillinseemmokki gede waajja hasiissannonke. (Far. 111:10) Addaaminna Heewanira hattoo waajja heedhoommensaro, Yihowara difinqilanno. Insa Yihowara finqilihu gedensaanni, illensa faˈnanteenna  cubbaataamma ikkansa woˈmunni woˈma huwatino. Insa sirchinsara cubbonna reyo ragisiisa agurranna assa dandiinori dino. Insa hakka woyite Maganu seera diigginota huwattino daafira mulloota ikkansanni saaltino; konnira teedansa diphitino.—Kal. 3:7, 21.

13-14. (a) Umi Pheexiroosi 3:21te kulloonni garinni, reyo quwa saˈne waajja hasiissannonkekkihu mayiraati? (b) Yihowa banxeemmo gede assannonkeri maati?

¹³ Yihowa dadillinseemmokki gede waajja hasiissannonkeha ikkirono, reyo quwa saˈne waajja dihasiissannonke. Yihowa hegere heeshsho afiˈneemmo faro faninonke. Cubbo loonsummorono addinta maaro eˈneemmoha ikkiro Yihowa gatona yaannonke. Isi Beettisita wodote kakkalo ammanneemmoha ikkiro, gatona yaannonke. Ammananke leellisha dandiineemmoti qara doogo heeshshonke Yihowara sayise aatenna cuuamate.—1 Pheexiroosi 3:21 nabbawi.

¹⁴ Yihowa banxeemmo gede assannonkehu batinyu korkaati no. Barru baala afiˈneemmoha dancha coye aannonkehu isooti; qoleno Yihowa isinna hedosi daafira kulanno halaale rosiisannonke. (Yoh. 8:31, 32) Isi Kiristaanu songo widoonni massagannonke, hattono irkisannonke. Xaa yannara isi duhanke duqqanno; hattono albillitte guuta alamera hegerera heeˈrate hexxo uyinonke. (Far. 68:19; Aju. 21:3, 4) Yihowa ninkera noosi baxille leellishate assinonkere hiincanke, iso banxeemmo gede kakkayissannonke. Qoleno iso banxeemmoha ikkiro, iso dadillinseemmokki gede waajjineemmo.

15. Makeela cubbo looseemma yite waajjate hedose qeeltinohu hiittoonniiti?

¹⁵ Aleenni qummi assiniti Makeela, Yihowa maaro lowota ikkitinota huwatase cubbo looseemma yite waajjate hedose qeeltanno gede kaaˈlitinose. Ise togo yitino: “Ninke baalunkura guuntete xeˈne noonketanna soˈnammora dandiineemmota huwatoomma. Ikkollana Yihowa baxannonketanna wodote kakkalo widoonni maarannonketano wodanchoomma.” Ise Yihowa baxxanno daafira heeshshose isira sayisse uyitino; hattono cuuantino.

16. Miilzi fonqolo ikkannore qeelanno gede kaaˈlinosiri maati?

¹⁶ Amaˈya gibbannoe yee cuuama waajjinohu Miilzi, woradu aliidi laˈˈaancho amaale xaˈmiˈrino. Isi togo yiino: “Isino babbaxxitino ammaˈno harunsitanno maate giddo lophino. Isi ani cuuamate kaoommohu anniˈya xixxiiweennae ikkikkinni, umiˈya doorshinni ikkinota amaˈya huwattanno gede mayyaa dandeemmoro kulinoe.” Miilzi ama isi tenne assasinni dihagiidhitino. Yannate gedensaanni isi minisenni fulinoha ikkirono, cuuamate fushshirino mixo diagurino. Isi togo yiino: “Yihowa assinoeha dancha coye afaˈya wodanaˈya kakkayissino. Yesuusite wodote kakkalo daafira hiincaˈya, Yihowa mageeshshi geeshsha baxannoero huwateemmo gede assitinoe. Tenne hedaˈya heeshshoˈya Yihowara sayise oye cuuameemmo gede kakkayissinoe.”

17. Ninkera mayi tunceenyi noonke?

¹⁷ Heewani Edenete noo haqqicho guma ittu woyite, Annisera finqiltino. Addaamino ise ledo halame Yihowa assinosiha dancha coye baala naadannokkita leellishino. Ninke baalunku Addaaminna Heewani doodhitino doorshira sumuu yineemmokkita leellisha dandiineemmo. Danchanna busha ikkinore bade kulate silxaane noosihu Yihowaati; cuuamanke tenne ammanneemmota leellishshanno. Hatto assineemmoha ikkiro, Annanke Yihowa banxeemmotanna addaxxineemmota leellinsheemmo.

18. Yihowara soqqamatto soqqanshonni hagiirraamo ikka dandaattohu hiittoonniiti?

¹⁸ Cuuammummo gedensaanni barru baala ninke hasiˈnoommo garinni ikkikkinni Yihowa hasiˈranno garinni heeˈra hasiissannonke. Lowo miliyoone ikkanno manni konni garinni heeˈranno. Atino Maganu Qaale seekkite huwatittoro, roduuwikki ledo ganyite gamba yiittoronna baxillaanchu Annikki Yihowa daafira rosoottore wolootaho diinaggaabbe kulittoro Yihowa hasiˈranno garinni heeˈra dandaatto. (Ibi. 10:24, 25) Mitto doorsha doodhattora albaanni, Yihowa Qaalisinna dirijjitesi widoonni aannohe amaale macciishshi. (Isa. 30:21) Hatto ikkiro assattori baalu qinaannohe.—Law. 16:3, 20.

19. Woˈmante yannara maa qaaga hasiissannohe? Mayira?

¹⁹ Yihowa biddishshi kaaˈlannohe gara huwattanni haˈratto woyite, Yihowaranna isi fushshino biddishshira noohe baxilli lexxanno. Hatto ikkiro, Sheexaanu shiqishannohu ayi geeshshi fonqolino Yihowara soqqamattota hoolahera didandaanno. Hanni kumu diri gedensaanni mayi macciishshamannohero hedi. Hatte yannara heeshshokki giddo assootto coyi baalunkunni roorinohu cuuamate doodhootto doorsha ikkinota huwatatto.