1. San Adam nanga Eva du èn san ben de a bakapisi?

SUMA yu denki musu bosroiti gi wi san bun èn san no bun? Di Adam nanga Eva nyan a froktu fu a bon di nen „sabi san bun èn san ogri” den sori krin taki den no ben e frutrow tapu Yehovah èn tapu den wet fu en. Den ben wani bosroiti gi densrefi san bun èn san no bun (Gen. 3:22). Ma luku san den lasi. Den no ben de mati fu Yehovah moro. Den lasi na okasi fu libi fu têgo èn den tyari sondu nanga dede kon gi den pikin fu den (Rom. 5:12). A bosroiti fu Adam nanga Eva tyari soso pina kon.

2-3. (a) San a heihei man fu Etiopia du di Filipus preiki gi en? (b) Sortu blesi wi e kisi te wi dopu èn sortu aksi wi o luku?

² A heihei man fu Etiopia ben de heri tra fasi leki Adam nanga Eva. Di Filipus preiki gi en a ben abi so furu warderi gi san Yehovah nanga Yesus ben du gi en taki a ben wani teki dopu wantewante (Tori 8:34-38). Te wi e gi wisrefi abra na Gado èn e teki dopu neleki a heihei man dati, dan wi e sori krin taki wi de nanga tangi gi san Yehovah nanga Yesus du gi wi. Wi e sori tu taki wi e frutrow tapu Yehovah èn taki wi e si en leki a sma di abi a reti fu bosroiti gi wi san bun èn san no bun.

³ Prakseri sortu moi blesi wi e kisi te wi e dini Yehovah! Fu eksempre, wi abi a howpu fu kisi ala den sani di Adam nanga Eva lasi èn wi abi na okasi tu fu libi fu têgo. Fu di wi e bribi na ini Yesus Krestes, meki Yehovah e gi wi pardon fu den sondu fu wi èn wi abi wan krin konsensi (Mat. 20:28; Tori 10:43). Boiti dati, Yehovah o feni wi bun fu  tron wan memre fu en osofamiri (Yoh. 10:14-16; Rom. 8:20, 21). Aladi wi kan kisi so furu moi blesi, toku son sma di kon sabi Yehovah e tweifri fu teki na eksempre fu a heihei man fu Etiopia. San ben kan tapu den fu dopu? Èn san kan yepi den fu no meki den sani dati tapu den?

4-5. San ben tapu wan yonguman di nen Anthony nanga wan yongu uma di nen Hannah fu teki dopu?

⁴ Den e firi leki den no bun nofo. Anthony * en papa nanga mama na Yehovah Kotoigi. En papa e sorgu bun gi en osofamiri èn a de wan bun owruman. Toku Anthony no ben wani dopu ete. Fu san ede? A taki: „Mi no ben denki taki mi ben o man du san mi papa e du.” Anthony no ben e denki tu taki a ben o man tyari den frantwortu di a ben kan kisi, baka te a ben dopu. A taki: „Mi ben frede taki den ben o aksi mi fu begi na den konmakandra, fu hori lezing noso fu teki fesi na den preikiwroko konmakandra.”

⁵ Hannah di abi 18 yari no ben e denki srefisrefi taki a ben o man du san Yehovah e aksi fu en. En papa nanga mama e dini Yehovah. Toku a ben denki taki a no ben o man hori ensrefi na den wet fu Yehovah. Fu san ede? Hannah ben firi leki a no warti noti. Son leisi a ben brokosaka so te, taki a ben e gi ensrefi skin-ati. Ma a sani disi ben meki a firi moro ogri. A e taki: „Noiti mi taigi wan sma taki mi ben e du disi. Mi no taigi mi papa nanga mama srefi. Mi ben feni taki noiti Yehovah ben o wani mi leki en futuboi fu di mi ben e du a sani dati nanga misrefi.”

6. San ben tapu Vanessa fu dopu?

⁶ Mati. Vanessa di abi 22 yari e taki: „Mi nanga wan meisje ben de bun mati bijna tin yari langa.” Ma a mati fu Vanessa no ben de wan Kotoigi èn dati meki a no ben e gi en deki-ati fu dopu. Vanessa ben sari fu di a ben sabi taki a no ben o man de mati nanga en moro efu a ben wani dopu. A taki: „A muilek gi mi fu meki mati èn mi ben frede taki te mi nanga en no ben o de mati moro, dan mi no ben o feni wan tra bun mati.”

7. Gi san wan yongu uma di nen Makaila ben frede èn fu san ede?

⁷ Den frede taki den o du wan seryusu sondu. Makaila ben abi feifi yari di den puru en brada fu a gemeente. Bakaten a si fa den sani di en brada ben e du ben e meki en papa nanga mama sari. Makaila e taki: „Mi ben frede taki efu mi  ben o dopu, mi ben o du wan seryusu sondu, dan den ben o puru mi fu a gemeente èn mi papa nanga mama ben o sari moro.”

8. Gi san wan yonguman di nen Milton ben frede?

⁸ Den e frede taki sma o gens den. Milton en papa nanga mama ben broko trow. En papa e dini Yehovah, ma en mama no de wan Kotoigi. Milton e taki: „Mi tan 18 yari nanga mi mama èn mi ben frede fu taigi en taki mi ben wani dopu. Mi ben sabi taki mi mama no ben lobi en di mi papa tron wan Kotoigi. Mi ben frede taki a ben o gens mi.”

9. San o pasa te yu kon frustan moro bun o furu lobi nanga pasensi Yehovah abi?

⁹ Adam nanga Eva bosroiti fu no dini Yehovah fu di den no meki muiti fu kisi moro lobi gi en. Toku Yehovah gi den pasi fu tan libi go doro, fu meki pikin èn fu bosroiti srefi fa den ben o kweki den pikin dati. Heri esi a kon na krin taki a bosroiti di Adam nanga Eva teki fu libi sondro Yehovah ben de wan donwan. A moro bigi boi fu den kiri en brada èn bakaten bun furu sma na grontapu bigin du ogri èn den ben e denki densrefi nomo (Gen. 4:8; 6:11-13). Ma Yehovah ben seti sani fu frulusu den pikin fu Adam nanga Eva di wani dini en (Yoh. 6:38-40, 57, 58). Te yu kon frustan moro bun o furu pasensi nanga lobi Yehovah abi, dan yu o lobi en moro. Yu no o teki a pasi di Adam nanga Eva teki èn yu o gi yusrefi abra na Yehovah.

10. Te wi e denki dipi fu san skrifi na Psalm 19:7, dan fa dati kan yepi wi fu dini Yehovah?

¹⁰ Tan leri moro fu Yehovah. O moro yu e leri fu Yehovah, o moro yu o bribi taki yu man dini en. Anthony di wi kari na a bigin, e taki: „Mi kisi deki-ati di mi leisi san skrifi na Psalm 19:7 èn di mi denki dipi fu en.” (Leisi en.) Di Anthony si fa Yehovah du san a pramisi na ini a tekst disi, a kisi moro lobi gi en. Te wi abi lobi gi Yehovah, dan dati no e gi wi deki-ati wawan, ma a e yepi wi tu fu  no du sani di Yehovah no feni bun èn a e gi wi krakti fu dini en. Hannah di wi kari na a bigin, e taki: „Di mi ben e leisi èn studeri Bijbel mi kon si taki te mi ben e gi misrefi skin-ati, dan dati ben hati Yehovah tu” (1 Petr. 5:7). Hannah bigin du san Gado Wortu e taki (Yak. 1:22). San ben de a bakapisi? A taki: „Di mi si sortu bun bakapisi a ben e tyari kon gi mi te mi e gi yesi na Yehovah, mi kon kisi moro lobi gi en. Now mi de seiker taki ala ten Yehovah o yepi mi te dati de fanowdu.” Hannah ben man tapu nanga a gwenti fu gi ensrefi skin-ati. A gi ensrefi abra na Yehovah èn a dopu.

11. San Vanessa du fu man meki bun mati èn san wi e leri fu disi?

¹¹ Luku bun suma yu e teki leki mati. Vanessa ben kon frustan te fu kaba taki en mati ben e hori en na baka fu dini Yehovah. Dati meki Vanessa bosroiti fu no de mati nanga en moro. Ma a no dati wawan Vanessa du. A du furu muiti tu fu meki nyun mati na ini a gemeente. A taki dati na eksempre fu Noa nanga en osofamiri yepi en. Vanessa taki: „Den sma fu a ten fu Noa no ben lobi Yehovah, ma Noa nanga en osofamiri ben de bun mati fu makandra.” Baka di Vanessa dopu a bigin pionier. A e taki: „A sani disi yepi mi fu meki bun mati na ini mi gemeente èn na ini tra gemeente.” Yu kan meki bun mati tu te yu e du so furu leki yu man na ini a wroko di Yehovah gi wi fu du.​—Mat. 24:14.

12. San Adam nanga Eva no ben abi gi Yehovah èn san ben de a bakapisi?

¹² No frede fu du san bun. Son leisi a no fowtu fu frede. Fu eksempre, efu wi e lespeki Yehovah, dan wi o frede fu du wan sani di a no feni bun (Ps. 111:10). Efu Adam nanga Eva ben e lespeki Yehovah, den no ben o opo densrefi teige en. Ma den opo densrefi teige en. Baka di den du dati, den ai kon opo. Dati wani taki dati den kon frustan taki den sondu. Na so den tyari sondu nanga dede kon gi den pikin fu den. Fu di den ben kon frustan san den du, meki den ben e firi syen taki den de nanga sososkin. Dati  meki den ben tapu den syenpresi.​—Gen. 3:7, 21.

13-14. (a) Te wi e luku san skrifi na 1 Petrus 3:21, dan fu san ede wi no abi fu frede dede? (b) Sortu reide wi abi fu lobi Yehovah?

¹³ Soleki fa wi si, dan a bun taki wi e frede fu du wan sani di Yehovah no feni bun. Ma wi no abi fu frede dede. Yehovah seti sani so taki wi kan kisi têgo libi. Efu wi du wan sondu, ma wi sori trutru berow, dan Yehovah o gi wi pardon. A o gi wi pardon fu di wi abi bribi na ini a frulusu-ofrandi fu en Manpikin. Wan prenspari fasi fa wi kan sori taki wi abi bribi na fu gi wisrefi abra na Gado èn fu dopu.​—Leisi 1 Petrus 3:21.

¹⁴ Wi abi furu reide fu lobi Yehovah. Boiti taki a e gi wi san wi abi fanowdu ala dei, a e yepi wi fu kon sabi en moro bun èn a e sori wi san a o du gi libisma na ini a ten di e kon (Yoh. 8:31, 32). A seti a Kresten gemeente pe wi kan feni bun rai nanga yepi. A e yepi wi nanga den problema fu wi èn a gi wi a howpu taki wi o libi fu têgo na ini wan grontapu pe nowan problema de (Ps. 68:19; Openb. 21:3, 4). Te wi e prakseri o furu Yehovah du gi wi kaba fu di a lobi wi, dan wi o kon lobi en moro. Èn te wi lobi Yehovah, dan wi no o wani du sani di a no feni bun. Wi o frede fu du iniwan sani di o hati en.

15. San yepi Makaila fu no frede moro taki a o du wan sani di Yehovah no feni bun?

¹⁵ Makaila di wi kari na ini na artikel disi no ben frede moro taki a ben o du wan sani di Yehovah no feni bun, fu di a kon frustan taki Yehovah de klariklari fu gi pardon. A taki: „Mi e frustan taki wi alamala na sondusma èn taki wi o meki fowtu. Ma mi kon frustan tu taki Yehovah lobi wi èn taki a o gi wi pardon efu wi e sori bribi na ini a lusu-paiman.” A lobi di a kon abi gi Yehovah meki taki a gi ensrefi abra na en èn a dopu.

16. San yepi Milton fu no frede moro taki en mama ben o gens en?

¹⁶ Milton di ben frede fu taigi en mama taki a wani dopu, suku yepi na a kring-opziener. Milton taki: „A kring-opziener ben de na ini a srefi situwâsi di a ben yongu. En papa ben de wan Kotoigi, ma en mama no ben de wan Kotoigi. A yepi mi fu prakseri fa mi o taigi mi mama taki na mi srefi bosroiti fu dopu èn taki a no mi papa ben e dwengi mi.” Milton en mama no ben breiti nanga a bosroiti fu en. Te fu kaba Milton ben musu froisi gowe, toku a no kenki prakseri. A taki: „Di mi leri fu den moi sani di Yehovah du gi mi, dan dati naki mi ati. Di mi denki dipi fu a frulusu-ofrandi fu Yesus, mi kon frustan o furu Yehovah lobi mi. Disi gi mi deki-ati fu gi misrefi abra na Yehovah èn fu dopu.”

17. Sortu okasi wi abi?

¹⁷ Di Eva nyan fu a bon na ini a dyari fu Eden, a opo ensrefi teige en Papa. Di Adam horibaka gi en a sori taki a no ben abi warderi srefisrefi gi ala den bun sani di Yehovah ben du gi en. Wi alamala abi na okasi fu sori taki wi no de leki Adam nanga Eva. Te wi dopu, dan wi e sori Yehovah taki wi e bribi taki en abi a reti fu bosroiti gi wi san bun èn san no bun. Wi e sori tu taki wi lobi wi Papa èn taki wi e frutrow na en tapu.

18. San o yepi yu fu tan gi yesi na Yehovah?

¹⁸ Baka te wi teki dopu wi no musu du moro san wi wani, ma wi musu hori wisrefi ibri dei na den wet fu Yehovah. Dati no makelek. Toku milyunmilyun futuboi fu Yehovah e gi yesi na en ibri dei. Yu kan du dati tu te yu e kon frustan Gado Wortu moro bun, te yu e kon makandra doronomo nanga yu brada nanga sisa èn te yu lobi fu fruteri tra sma san yu leri fu yu lobi-ati Papa (Hebr. 10:24, 25). Te yu musu teki bosroiti, arki a rai di Yehovah e gi yu nanga yepi fu en Wortu nanga en organisâsi (Yes. 30:21). Te yu e du dati, dan den sani di yu o du o waka bun.​—Odo 16:3, 20.

19. San yu musu tan hori na prakseri èn fu san ede?

¹⁹ Te yu e tan hori na prakseri o furu wini a e tyari kon gi yu te yu e du a wani fu Yehovah, dan yu o kisi moro lobi gi en nanga den wet fu en. Satan no o man kori yu fu tapu fu dini Yehovah. Pruberi fu si yusrefi, baka wán dusun yari. Na a ten dati yu o si taki a bosroiti di yu teki fu dopu, ben de a moro bun bosroiti!