1. Saida mak Adão no Eva lakon, no sira-nia desizaun lori rezultadu saida?

TUIR Ita-nia hanoin, sé mak iha direitu atu deside saida mak diʼak no aat? Bainhira Adão no Eva han ai-fuan husi ai-hun koñesimentu kona-ba buat diʼak no aat, sira hatudu ho klaru katak sira la fiar Jeová no ninia prinsípiu sira. Sira hili atu halo desizaun rasik kona-ba saida mak diʼak no aat. (Gén 3:22) Maibé hanoin toʼok kona-ba buat neʼebé sira lakon. Sira lakon sira-nia relasaun diʼak ho Jeová, lakon oportunidade atu moris ba nafatin, no sira hadaʼet sala no mate ba sira-nia oan. (Rom 5:12) Adão no Eva nia desizaun lori susar barak.

2-3. (a) Ema-boot husi Etiópia halo saida bainhira Filipe haklaken ba nia? (b) Bensaun saida mak ita simu se ita hetan batizmu, no ita sei koʼalia kona-ba pergunta saida deʼit?

² Kompara toʼok Adão no Eva nia hahalok ho ema-boot ida husi Etiópia bainhira Filipe haklaken ba nia. Ema-boot neʼe hafolin tebes buat neʼebé Jeová no Jesus halo ba nia toʼo nia deside kedas atu hetan batizmu. (Após 8:34-38) Bainhira ita dedika an ba Maromak no hetan batizmu hanesan ema-boot neʼe, ita hatudu ho klaru katak ita hafolin buat neʼebé Jeová no Jesus halo ona ba ita. Ita mós hatudu katak ita fiar Jeová no rekoñese katak nia mak iha direitu atu deside saida mak diʼak no aat.

³ Hanoin toʼok kona-ba bensaun neʼebé ita hetan bainhira serbí Jeová! Bensaun ida mak, ita iha esperansa katak Jeová sei fó ba ita buat hotu neʼebé Adão ho  Eva lakon, inklui oportunidade atu moris ba nafatin. Jeová perdua ita-nia sala no fó ita konxiénsia neʼebé moos tanba ita-nia fiar ba Jesus Kristu. (Mt 20:28; Após 10:43) Ita mós sai parte husi Jeová nia família. (João 10:14-16; Rom 8:20, 21) Maski iha benefísiu sira-neʼe, maibé ema balu neʼebé hatene ona Jeová taʼuk atu halo tuir ema-boot husi Etiópia nia ezemplu. Saida mak susar sira neʼebé karik hanetik sira atu hetan batizmu? Oinsá mak sira bele manán susar sira-neʼe?

4-5. Saida mak susar neʼebé mane joven ida naran Avery no feto joven ida naran Hannah hasoru?

⁴ Ladún fiar an. Avery nia inan-aman mak Testemuña ba Jeová. Ninia aman hatudu domin no katuas kongregasaun neʼebé diʼak. Maibé, Avery taʼuk atu hetan batizmu. Tanbasá? Avery dehan: “Haʼu sente katak haʼu labele sai ema diʼak hanesan haʼu-nia aman.” Avery mós sente katak nia labele kumpre ninia responsabilidade neʼebé karik nia sei simu iha futuru. Nia dehan: “Haʼu hanoin barak kona-ba knaar sira neʼebé karik haʼu sei simu, hanesan halo orasaun iha ema nia oin, hatoʼo diskursu, ka dirije grupu haklaken.”

⁵ Hannah neʼebé idade 18, la fiar an duni. Nia sai boot iha família neʼebé serbí Jeová. Maski nuneʼe, nia dúvida katak nia labele moris tuir Jeová nia prinsípiu sira. Tanbasá? Hannah iha hanoin negativu kona-ba ninia an rasik. Dala ruma, nia sente laran-kraik tebes toʼo hakanek nia an, no neʼe halo nia triste liután. Nia dehan: “Haʼu nunka konta ba ema seluk, inklui haʼu-nia inan-aman, kona-ba buat neʼebé haʼu halo. No haʼu imajina katak Jeová lakohi haʼu sai ninia atan tanba buat neʼebé haʼu halo ba haʼu-nia an.”

6. Saida mak hanetik Vanessa atu hetan batizmu?

⁶ Influénsia husi belun sira. Vanessa neʼebé idade 22 dehan: “Haʼu iha belun diʼak ida neʼebé haʼu koñese ba tinan barak ona.” Maibé, Vanessa nia belun la apoia ninia planu atu hetan batizmu. Neʼe halo Vanessa triste, no nia dehan: “La fasil ba haʼu atu halo belun, no haʼu hanoin barak se haʼu hakotu haʼu-nia relasaun ho nia, haʼu sei nunka hetan fali belun diʼak seluk.”

7. Feto joven ida naran Makayla taʼuk saida, no tanbasá?

⁷ Taʼuk halo sala sériu. Makayla tinan lima deʼit bainhira kongregasaun hasai ninia maun. Nuʼudar nia sai boot, nia haree impaktu husi ninia maun nia hahalok  ba ninia inan-aman. Nia dehan: “Haʼu taʼuk katak se haʼu hetan batizmu haʼu sei halo sala no kongregasaun sei hasai haʼu, ida-neʼe sei halo haʼu-nia inan-aman triste liután.”

8. Mane joven ida naran Miles taʼuk saida?

⁸ Taʼuk ema kontra. Miles nia aman no ninia madrasta serbí Jeová, maibé ninia inan laʼós Testemuña. Miles hatete: “Haʼu hela ho haʼu-nia inan ba tinan 18 no haʼu taʼuk atu fó-hatene nia katak haʼu hakarak hetan batizmu. Haʼu haree ona saida mak nia halo bainhira haʼu-nia aman sai Testemuña. Haʼu taʼuk nia sei halo problema ba haʼu.”

9. Se ita aprende kona-ba Jeová nia pasiénsia no domin, neʼe sei lori rezultadu saida?

⁹ Adão no Eva hili atu la serbí Jeová tanba sira la haburas domin neʼebé boot ba nia. Maski nuneʼe, Jeová husik sira moris ba tempu kleur hodi iha oan no halo desizaun rasik kona-ba oinsá haboot oan sira-neʼe. Rezultadu husi Adão no Eva nia desizaun atu livre husi Jeová hatudu ho klaru katak neʼe mak desizaun neʼebé beik. Sira-nia oan primeiru oho ninia alin neʼebé la halo sala, depois neʼe violénsia no hahalok hanoin an deʼit mak domina ema. (Gén 4:8; 6:11-13) Maibé, Jeová loke dalan atu salva Adão no Eva nia oan sira neʼebé hakarak serbí nia. (João 6:38-40, 57, 58) Bainhira Ita aprende liután kona-ba Jeová nia pasiénsia no domin, Ita-nia domin ba nia mós sei sai boot liután. Ita sei la halo tuir Adão no Eva nia desizaun, maibé Ita sei dedika an ba Jeová.

10. Oinsá mak medita kona-ba Salmo 19:7 bele ajuda Ita atu serbí Jeová?

¹⁰ Kontinua aprende kona-ba Jeová. Bainhira Ita aprende liután kona-ba Jeová, Ita sai fiar an liután katak Ita bele serbí nia ho susesu. Avery neʼebé temi ohin, dehan: “Haʼu sai fiar an liután hodi lee no medita kona-ba promesa neʼebé hakerek iha Salmo 19:7.” (Lee.) Bainhira Avery haree oinsá Jeová kumpre  promesa neʼe, ninia domin ba Maromak sai boot liután. Domin sei halo ita sai fiar an no mós ajuda ita tau fokus atu serbí Jeová no halo tuir ninia hakarak. Hannah neʼebé temi ohin, dehan: “Hodi lee no estuda Bíblia mesak, haʼu hatene katak bainhira haʼu hakanek haʼu-nia an, haʼu mós hakanek Jeová.” (1 Ped 5:7) Hannah sai “ema neʼebé halo tuir Maromak nia liafuan”. (Tgo 1:22) Neʼe lori rezultadu saida? Nia dehan: “Bainhira haʼu haree katak halo tuir Jeová lori benefísiu ba haʼu, haʼu haburas domin boot ba nia. Agora haʼu iha konfiansa katak Jeová sempre ajuda haʼu bainhira haʼu presiza.” Hannah manán hasoru ninia toman atu hakanek ninia an. Hannah dedika an ba Jeová no hetan batizmu.

11. Saida mak Vanessa halo atu iha belun diʼak, no saida mak ita aprende husi ninia ezemplu?

¹¹ Hili Ita-nia belun ho matenek. Vanessa neʼebé temi ohin, ikusmai rekoñese katak ninia belun hanetik nia atu serbí Jeová. Entaun nia hakotu ninia relasaun nuʼudar belun. Maibé Vanessa mós hakaʼas an atu halo belun foun iha kongregasaun laran. Nia hatete katak Noé no ninia família nia ezemplu ajuda duni nia. Nia dehan: “Maski ema neʼebé haleʼu sira mak la hadomi Jeová, maibé sira-nia família ajuda malu hodi ransu hamutuk.” Bainhira Vanessa hetan tiha batizmu, nia sai pioneiru ida. Nia dehan: “Neʼe ajuda haʼu atu halo belun diʼak ho ema iha haʼu-nia kongregasaun rasik no mós iha kongregasaun seluk.” Ita mós bele halo belun diʼak hodi sai okupadu iha Jeová nia serbisu.—Mt 24:14.

12. Hahalok ida-neʼebé mak Adão no Eva la haburas, no neʼe lori rezultadu saida?

¹² Manán Ita-nia sentimentu taʼuk. Dala ruma diʼak atu sente taʼuk. Porezemplu, ita presiza sente taʼuk atu halo Jeová triste. (Sal 111:10) Se Adão no Eva haburas taʼuk hanesan neʼe, sira sei la kontra Jeová. Maibé realidade mak sira kontra duni Jeová no sira-nia matan nakloke hodi hatene ho klaru katak sira sai ona ema sala-naʼin. Sira hadaʼet sala no mate ba sira-nia oan. Bainhira  sira komprende katak sira la halo tuir Maromak nia ukun-fuan, sira sai moe tanba sira molik no sira taka sira-nia isin.—Gén 3:7, 21.

13-14. (a) Tuir 1 Pedro 3:21, tanbasá mak ita la presiza taʼuk demais kona-ba mate? (b) Ita iha razaun saida atu hadomi Jeová?

¹³ Ita la presiza taʼuk demais kona-ba mate. Jeová loke ona dalan ba ita atu hetan moris rohan-laek. Se ita halo sala maibé arrepende an ho laran, Jeová sei fó perdua ba ita-nia sala. Nia perdua ita tanba ita-nia fiar ba ninia Oan-Mane nia sakrifísiu. Dalan importante atu hatudu ita-nia fiar mak hodi dedika ita-nia moris ba Maromak no hetan batizmu.—Lee 1 Pedro 3:21.

¹⁴ Ita iha razaun barak atu hadomi Jeová. Nia fó buat diʼak ba ita loroloron no mós hanorin ita lia-loos kona-ba ninia an no ninia hakarak. (João 8:31, 32) Nia fó ona kongregasaun Kristaun ba ita atu dirije no apoia ita. Nia ajuda ita atu tahan ita-nia problema sira agora, no nia fó ita esperansa atu hetan moris perfeitu ba nafatin iha futuru. (Sal 68:19; Apok 21:3, 4) Bainhira ita medita kona-ba buat barak neʼebé Jeová halo ona hodi hatudu ninia domin ba ita, ita sei hadomi nia liután. No bainhira ita hadomi Jeová, ita sei hamtaʼuk nia no lakohi halo buat neʼebé hakanek ninia laran.

15. Oinsá mak Makayla manán ninia taʼuk kona-ba halo sala sériu?

¹⁵ Makayla neʼebé temi ohin, manán ninia taʼuk kona-ba halo sala sériu bainhira nia komprende katak Jeová prontu atu fó perdua. Nia dehan: “Haʼu hatene katak ita hotu la perfeitu no sei halo sala. Maibé haʼu mós aprende katak Jeová hadomi ita no sei fó perdua ba ita tanba Jesus nia sakrifísiu.” Ninia domin ba Jeová book nia atu dedika an no hetan batizmu.

16. Miles hetan ajuda saida hodi la taʼuk bainhira ema kontra nia?

¹⁶ Miles, neʼebé taʼuk katak ninia inan sei kontra ninia desizaun atu hetan batizmu, buka ajuda husi katuas área. Miles dehan: “Katuas área neʼe mós sai boot iha família neʼebé fiar la hanesan. Nia ajuda haʼu atu hanoin kona-ba saida mak haʼu bele koʼalia hodi halo haʼu-nia inan fiar katak haʼu rasik mak halo desizaun atu hetan batizmu no haʼu-nia aman la obriga haʼu.” Miles nia inan la kontente ho ninia desizaun. Ikusmai, Miles tenke muda sai husi ninia inan nia uma, maibé nia kaer metin ba ninia desizaun rasik. Nia hatete: “Aprende kona-ba buat diʼak neʼebé Jeová halo ona ba haʼu book duni haʼu-nia laran. Bainhira haʼu hanoin kleʼan kona-ba Jesus nia sakrifísiu, haʼu komprende katak Jeová hadomi tebes haʼu. Hanoin neʼe book haʼu atu dedika an ba Jeová no hetan batizmu.”

17. Ita iha oportunidade saida?

¹⁷ Eva fila kotuk ba ninia Aman bainhira nia han ai-fuan husi ai-hun iha Eden. Adão hatudu katak nia la hafolin buat diʼak hotu neʼebé Jeová halo ona ba nia bainhira nia apoia Eva. Ita hotu iha oportunidade atu hatudu katak ita la hanesan ho Adão no Eva, no ita hafolin buat hotu neʼebé Jeová halo ona ba ita. Hodi hetan batizmu, ita hatudu katak ita fiar Jeová mak iha direitu atu deside saida mak loos no sala. Ita hatudu katak ita hadomi ita-nia Aman no tau fiar ba nia.

18. Oinsá mak Ita bele serbí Jeová ho susesu?

¹⁸ Depois Ita hetan tiha batizmu Ita presiza halo tuir Jeová nia hakarak loroloron, laʼós Ita-nia hakarak rasik. Ema rihun ba rihun halaʼo moris hanesan neʼe. Ita bele sai hanesan sira se Ita kontinua aumenta Ita-nia koñesimentu kona-ba Maromak nia Liafuan Bíblia, halibur hamutuk beibeik ho Ita-nia irmaun-irmán sira, no ho badinas haklaken kona-ba Ita-nia Aman domin nian. (Ebr 10:24, 25) Bainhira Ita presiza halo desizaun, rona ba konsellu neʼebé Jeová fó liuhusi ninia Liafuan no ninia organizasaun. (Isa 30:21) Hodi halo nuneʼe, Ita sei hetan susesu iha buat hotu neʼebé Ita halo.—Prov 16:3, 20.

19. Ita tenke kontinua hanoin kona-ba saida, no tanbasá?

¹⁹ Bainhira Ita kontinua hanoin kona-ba benefísiu neʼebé Ita hetan husi Jeová nia prinsípiu, Ita-nia domin ba nia no ninia prinsípiu sira sei sai boot liután. Ita sei la monu ba Satanás nia lasu sira hodi la serbí Jeová. Hanoin toʼok kona-ba Ita-nia moris tinan rihun ida husi agora. Ita sei hanoin fali Ita-nia desizaun atu hetan batizmu nuʼudar desizaun neʼebé diʼak liu hotu!