NKHANI YAKUSAMBIRA YA NAMBALA 10
Ntchinthu Wuli Cho Chitinditondekesa Kubatizika?
“Filipu limoza ndi nduna yo, anguluta mumaji ndipu wangumubatiza.”—MACHI. 8:38.
SUMU 52 Kujipereka nge Mkhristu
VO TISAMBIRENGI MU NKHANI IYI *
1. Kumbi Adamu ndi Heva angutayanji, ndipu ivi vikuyambisanji?
KUMBI muŵanaŵana kuti ndiyani yo we ndi mazaza ngakuŵika marangu nga cho ntchamampha ndi cho ntchiheni? Adamu ndi Heva ŵati ŵarya chipasu cha mu chimiti chakuziŵisa chamampha ndi chiheni, angulongo pakweru mo awoniyanga Yehova ndipuso marangu ngaki. Angulongo kuti amugomezganga cha pamoza ndi marangu ngaki. Angusankha kuŵika marangu ngawu nga cho ntchamampha ndi cho ntchiheni. (Chiya. 3:22) Kweni ŵanaŵaniyani vo angutaya. Angutaya mwaŵi wakuja pa ubwezi ndi Yehova. Yiwu angutaya so umoyu wamuyaya ndipu anguyambuziyaku ŵana ŵawu ubudi ndi nyifwa. (Aro. 5:12) Vo Adamu ndi Heva angusankha vikuyambisa masuzgu nganandi.
Nduna ya ku Ifiyopiya yati yavwana ndi vo Filipu wanguyipharazgiya, yinguswera cha kubatizika (Wonani ndimi 2-3)
2-3. (a) Kumbi nduna ya ku Ifiyopiya yinguchita wuli Filipu wati wayipharazgiya? (b) Kumbi tisaniya vitumbiku wuli asani titeŵete Yehova, ndipu tikambiskanengi mafumbu nanga?
2 Vo Adamu ndi Heva anguchita, vipambana ukongwa ndi vo nduna ya ku Ifiyopiya yinguchita Filipu wati wayipharazgiya. Nduna iyi yinguwonga ukongwa vo Yehova ndi Yesu anguyichitiya mwakuti yingubatizika nyengu yeniyo. (Machi. 8:34-38) Asani tajipereka kwaku Chiuta ndi kubatizika nge mo nduna ya ku Ifiyopiya yinguchitiya, tilongo kuti tiwonga vo Yehova ndi Yesu akutichitiya. Tilongo so kuti tigomezga Yehova kweniso tiziŵa kuti iyu ndiyu we ndi mazaza ngakuŵika marangu nga cho ntchamampha ndi chiheni.
3 Titumbikika ukongwa asani titeŵete Yehova! Mwakuyeruzgiyapu, Yehova wazakutipaska vinthu vo Adamu ndi Heva angutaya, kusazgapu umoyu wamuyaya. Chifukwa chakuti te ndi chivwanu mwaku Yesu Khristu, Yehova watitigowoke maubudi ngidu ndipu ivi vititiwovya kuti tije ndi njuŵi yamampha. (Mate. 20:28; Machi. 10:43) Tija so mubanja laku Yehova la ateŵeti ŵaki wo wazakuŵatumbika kunthazi. (Yoha. 10:14-16; Aro. 8:20, 21) Chinanga kuti tisaniya vitumbiku ivi, anyaki wo asambira vaku Yehova atondeka kuchita vo nduna ya ku Ifiyopiya yinguchita. Kumbi ndi vinthu wuli vo vitiŵatondekesa kubatizika? Nanga angamalana navu wuli vinthu venivi?
VO VITONDEKESA ANYAKI KUBATIZIKA
Vo vitondekesa anyaki kubatizika
Kujikayikiya (Wonani ndimi 4-5) *
4-5. Kumbi Avare ndi Hannah ŵenga ndi suzgu wuli?
4 Kujikayikiya. Apapi aku Avare Mbakaboni aku Yehova. Awisi ŵe ndi mbiri yakuti aphwere umampha banja lawu kweniso mbara mu mpingu. Kweni Avare wakhumbanga cha kubatizika. Chifukwa wuli? Avare wangukamba kuti: “Ndaŵanaŵananga kuti ndingafiska cha kuchita vo ada achitanga.” Iyu wajikayikiyanga so kuti wangazifiska cha asani azimupaska udindu kunthazi. Avare wangukamba so kuti: “Ndafipanga mtima kuti ndazamupemphera wuli pa gulu la ŵanthu, kukamba nkhani pamwenga kulongozga kagulu ka uteŵeti.”
5 Hannah, yo we ndi vyaka 18 wajikayikiyanga ukongwa. Chinanga kuti apapi ŵaki ateŵete Yehova, kweni iyu wakayikiyanga asani wangasunga marangu ngaku Yehova. Chifukwa wuli? Hannah wawonanga kuti wangafiska cha. Nyengu zinyaki wajipwetekiyanga dala ndipu venivi vasazgiyangaku ŵaka masuzgu. Hannah wangukamba kuti: “Ndingukambiyapu weyosi cha vo ndachitanga, ndi apapi ŵangu viyo. Ndipu ndaŵanaŵananga kuti Yehova wangayanja cha kuti ndije mteŵeti waki chifukwa cha vo ndachitanga.”
Fuzi yakutuwa kwa abwezi ŵidu (Wonani ndimi 6) *
6. Ntchifukwa wuli Vanessa watondekanga kubatizika?
6 Fuzi yakutuwa kwa abwezi ŵidu. Vanessa yo we ndi vyaka 22, wangukamba kuti: “Ndenga ndi mubwezi wangu wamampha yo tinguziŵana kwa vyaka pafufupi 10.” Kweni mubwezi waki wakoliyananga navu cha kuti Vanessa wabatiziki. Ivi vingumuŵaŵa ukongwa Vanessa ndipu wangukamba kuti, “Venga vakusuzga kusaniya mabwezi ndipu ndafipanga mtima kuti asani ndingaleka kucheza nayu ndisaniyengi so cha munyangu munyaki.”
Kopa kubuda (Wonani ndimi 7) *
7. Kumbi Makayla wawopanganji, ndipu ntchifukwa wuli?
7 Kopa kubuda. Mzichi waku Makayla wangusezgeka pa nyengu yo Makayla wenga ndi vyaka 5. Wachikuwa wawonanga mo apapi ŵaki adandawuliyanga chifukwa cha vo mzichi waki wanguchita. Makayla wangukamba kuti: “Ndawopanga kuti asani ndazibatizika ndazamubuda, kusezgeka ndi kusazgiyaku chitima cho apapi ŵangu ŵenga nachu.”
Kopa ŵanthu (Wonani ndimi 8) *
8. Kumbi Miles wawopanganji?
8 Kopa ŵanthu. Awisi aku Miles ndi anyina amsaniyapu Mbakaboni. Kweni anyina wo akumubala Mbakaboni cha. Miles wangukamba kuti: “Ndinguja ndi ama kwa vyaka 18 kweni ndawopanga kuŵakambiya kuti ndikhumba kubatizika. Ndinguwona mo ama anguchitiya ada ŵati aja Kaboni. Ndawopanga kuti andisuzgengi.”
KUMBI MUNGACHITA WULI KUTI MUMALANI NDI VO VITIKUTONDEKESANI KUBATIZIKA?
9. Kumbi ndi vinthu wuli vo vingachitika asani mwaziŵa kuti Yehova ngwakuzizipizga kweniso ngwachanju?
9 Adamu ndi Heva angusankha kuleka kuteŵete Yehova chifukwa amuyanjanga ukongwa cha. Chinanga kuti venga viyo, Yehova wanguŵazomereza kubala ŵana ndi kuŵika marangu ngawu pakulera ŵana yaŵa. Pati pajumpha nyengu yimanavi, vo Adamu ndi Heva anguchita vingulongore limu kuti angusankha umampha cha. Mwana wawu wakwamba wangubaya mvurwa waki. Pati pajumpha nyengu, chiwawa chenga peposi ndipu ŵanthu anandi ŵenga ambunu. (Chiya. 4:8; 6:11-13) Kweni Yehova ndipu wasaniya kali nthowa yakutaskiya ŵana aku Adamu ndi Heva wo akhumba kumuteŵete. (Yoha. 6:38-40, 57, 58) Asani mwaziŵa kuti Yehova ngwakuzizipizga kweniso ngwachanju, mumuyanjengi ukongwa. Muchitengi cha vo Adamu ndi Heva anguchita ndipu mujiperekengi kwaku Yehova.
Kumbi mungamalana navu wuli vo vitikutondekesani kubatizika?
(Wonani ndimi 9-10) *
10. Kumbi kuŵanaŵaniya lemba la Sumu 19:7, kungakuwovyani wuli?
10 Lutirizgani kusambira vaku Yehova. Asani musambira vinandi vaku Yehova mujikayikiyengi cha ndipu muwonengi kuti mungafiska kumuteŵete. Avare yo tamukambapu kali wangukamba kuti: “Ndinguleka kujikayikiya ndati ndaŵerenga ndi kuŵanaŵaniya layizgu la pa Sumu 19:7.” (Ŵerengani.) Avare wati wawona mo Yehova wangufiskiya layizgu ili, wangwamba kumuyanja ukongwa Chiuta. Chanju chititiwovya kuti tileki kujikayikiya kweniso kuti timukondwesengi ukongwa Yehova ndi kuchita vo wakhumba. Hannah yo tamukambapu kali wangukamba kuti: “Kusambira Bayibolu pakundija kwandiwovya kuziŵa kuti asani nditijipweteka, ndipweteka so Yehova.” (1 Petu. 5:7) Hannah wangwamba ‘kuchita vo mazu ngaku Chiuta ngakamba.’ (Yako. 1:22) Kumbi venivi vingumuwovya wuli? Iyu wangukamba kuti: “Ndati ndawona vitumbiku vo ndasaniyanga chifukwa cha kuvwiya Yehova, ndingwamba kumuyanja ukongwa. Sonu, ndikayika cha kuti Yehova wandilunguchizgengi nyengu zosi asani ndikhumba chovyu.” Hannah wakuleka kujipweteka. Iyu wakujipereka kwaku Yehova ndi kubatizika.
(Wonani ndimi 11) *
11. Kumbi Vanessa wanguchita wuli kuti wasaniyi mabwezi ngamampha, ndipu isi tingasambiranji kwaku iyu?
11 Musankhengi umampha mabwezi. Vanessa yo tamuzumbuwapu kali, wanguziŵa kuti mubwezi waki watimutondekesa kuteŵete Yehova. Mwaviyo, wanguleka kucheza nayu. Kweni Vanessa wanguchita so vinthu vinyaki. Iyu wanguyesesa kusaniya mabwezi nganyaki mu mpingu. Vanessa wangukamba kuti vo Nowa ndi banja laki anguchita vingumuwovya. Iyu wanguti: “Ŵanthu wo ŵengaku mu nyengu yawu amuyanjanga cha Yehova. Kweni yiwu akoliyananga ukongwa pa ubali wawu.” Vanessa wati wabatizika, wangwamba kuchita upayiniya. Sonu iyu wakamba kuti: “Kuchita upayiniya kwandiwovya kuti ndisaniyi mabwezi ngamampha mu mpingu wangu ndi mu mipingu yinyaki.” Namwi mungasaniya mabwezi ngamampha asani mutangwanika ndi ntchitu yo Yehova wakutipaska.—Mate. 24:14.
(Wonani ndimi 12-15) *
12. Kumbi ndi vinthu wuli vo Adamu ndi Heva ŵengavi, ndipu ndi vinthu wuli vo vinguchitika?
12 Muwopengi vinthu vakwenere. Mantha nganyaki ngamampha. Mwakuyeruzgiyapu, titenere kopa kukwiyiska Yehova. (Sumu 111:10) Asani Adamu ndi Heva ŵenga ndi mantha yanga, atingi amugarukiyengi cha Yehova. Kweni yiwu angugaruka. Ŵati achita viyo, masu ngawu ngangujulika, kung’anamuwa kuti anguziŵa kuti mbakubuda. Yiwu anguyambuziya ubudi ndi nyifwa ku ŵana ŵawu. Chifukwa chakuti masu ngawu ngangujulika, pamwenga kuti anguziŵa mo ŵenge, anguchita soni ŵati awona kuti ŵe nkhuli ndipu anguvwala mani muchiwunu.—Chiya. 3:7, 21.
13-14. (a) Mwakukoliyana ndi 1 Peturo 3:21, ntchifukwa wuli tikhumbika cha kopa ukongwa nyifwa? (b) Kumbi te ndi vifukwa wuli vakwanjiya Yehova?
13 Mbuneneska kuti tikhumbika kopa Yehova kweni tikhumbika cha kopa ukongwa nyifwa. Yehova wakupereka nthowa yakutitaskiya kuti tizisaniyi umoyu wamuyaya. Asani tabuda, Yehova watigowokiyengi asani talapa. Iyu watigowokiyengi asani te ndi chivwanu mu sembi ya Mwana waki. Nthowa yikulu yo tilongore kuti te ndi chivwanu, nkhupereka umoyu widu kwaku Chiuta ndi kubatizika.—Ŵerengani 1 Peturo 3:21.
14 Te ndi vifukwa vinandi vakwanjiya Yehova. Iyu watitipaska vinthu vamampha vo tikondwa navu. Watitisambiza so uneneska wakukwaskana ndi iyu ndi vo wakhumba kuchita. (Yoha. 8:31, 32) Iyu wakutipaska mpingu kuti utiwovyengi ndi kutilunguchizga. Watitiwovya asani takumana ndi masuzgu ndipu wakutilayizga kuti kunthazi tazamuja ndi umoyu wamampha kwamuyaya. (Sumu 68:19; Chivu. 21:3, 4) Asani tiŵanaŵaniya vo Yehova watichitiyapu kali kulongo kuti watitiyanja, nasi titamba kumuyanja ukongwa. Ndipu asani titanja Yehova tituŵa ndi mantha ngakwenere. Titopa kumukwiyiska chifukwa watitiyanja ukongwa.
15. Kumbi ndi vinthu wuli vo vinguwovya Makayla kuti waleki kopa kuti wabudengi?
15 Makayla yo tamuzumbuwapu kali, wanguleka kuchita mantha kuti wabudengi wati waziŵa kuti Yehova wagowoka. Iyu wangukamba kuti: “Ndinguziŵa kuti tosi te ambula kufikapu ndipu tinganangisa. Kweni ndinguziŵa so kuti Yehova watitiyanja ndipu watigowokiyengi chifukwa cha sembi yaku Yesu.” Chifukwa cha kwanja Yehova, Makayla wangujipereka kwaku iyu ndi kubatizika.
(Wonani ndimi 16) *
16. Kumbi ntchinthu wuli cho chinguwovya Miles kuti waleki kopa ŵanthu?
16 Miles yo wawopanga kuti anyina amukanizengi kubatizika, wangupempha wakuwonere dera kuti wamuwovyi. Miles wangukamba kuti: “Wakuwonere dera nayu awisi ŵenga Akaboni kweni anyina ŵenga Akaboni cha. Iyu wangundiwovya kuŵanaŵaniya vo ndingachikamba kuti ama akavwisi kuti ndakhumba ndija kubatizika, ndachichizgika ndi ada cha.” Anyina angukondwa cha wati waŵakambiya kuti wakhumba kubatizika. Iyu wangusama pa nyumba ya anyina kweni wangusintha cha. Miles wangukamba kuti: “Ndingukwaskika ukongwa ndati ndasambira vinthu vamampha vo Yehova wandichitiya. Ndati ndaŵanaŵaniya sembi yaku Yesu, ndinguwamu kuti Yehova watindiyanja ukongwa. Ivi vingundiwovya kuti ndijipereki kwaku Yehova ndi kubatizika.”
MUNGASINTHANGA CHA VO MWASANKHA
Tingalongo kuti tiwonga vo Chiuta wakutichitiya (Wonani ndimi 17)
17. Kumbi te ndi mwaŵi wuli?
17 Heva wangukana Awisi wati warya chipasu cho anguŵakaniza. Adamu wati wakoliyana nayu wangulongo kuti wanguwonga cha vinthu vamampha vosi vo Yehova wangumuchitiya. Tosi te ndi mwaŵi wakulongo kuti tikoliyana navu cha vo Adamu ndi Heva anguchita. Asani tabatizika, tilongo Yehova kuti tigomezga kuti iyu ndiyu we ndi mazaza ngakuŵika marangu nga cho ntchamampha ndi chiheni. Tilongo kuti titanja Ada ŵidu ndipuso titiŵagomezga.
18. Kumbi mungachita wuli kuti vinthu vikuyendiyeningi umampha pakuteŵete Yehova?
18 Asani tabatizika, chija chipusu cha kuleka kwende fundu zidu ndi kwamba kwende fundu zaku Yehova. Kweni ŵanthu mamiliyoni nganandi atende fundu zaku Yehova chaka chechosi. Namwi mungachita viyo asani mulutirizgengi kusambira Mazu Ngaku Chiuta, kuwungana ndi abali ndi azichi nyengu zosi ndipuso kuchita phamphu kukambiyaku anyinu vo muziŵa vakukwaskana ndi Awusemwi achanju. (Ahe. 10:24, 25) Asani mukhumba kusankha vakuchita, muvwiyengi ulongozgi wo Yehova watikupaskani kuziya mu Mazu ngaki ndi gulu laki. (Yesa. 30:21) Asani muchitengi viyo, vosi vo muchita vikuyendiyeningi umampha.—Nthanthi 16:3, 20.
19. Kumbi mutenere kukumbukanji nyengu zosi, ndipu ntchifukwa wuli mutenere kuchita viyo?
19 Asani nyengu zosi mukumbuka kuti muyanduwa ukongwa ndi vo Yehova watikusambizani, mutimuyanja ukongwa kweniso mutanja marangu ngaki. Asani muchitengi viyo, Satana wangakunyengani cha kuti muleki kuteŵete Yehova. Yeruzgiyani kuti pajumpha vyaka 1000 kutuliya sonu. Pa nyengu iyi, mwazamuwona kuti munguchita umampha ukongwa kusankha kubatizika kuphara chechosi!
SUMU 28 Tije pa Ubwezi ndi Yehova
^ ndimi 5 Kusankha kubatizika ndi nkhani yakukhumbika ukongwa kuphara chechosi. Ntchifukwa wuli nkhani yeniyi njakukhumbika? Nkhani iyi yimukengi fumbu lenili. Yiwovyengi so wo akhumba kubatizika kuti amalani ndi vinthu vo vitiŵatondekesa kuchita viyo.
^ ndimi 56 CHITHUZI: Kujikayikiya: Mnyamata watopa kumuka pa maunganu.
^ ndimi 58 CHITHUZI: Fuzi yakutuwa kwa abwezi ŵidu: Msungwana we ndi munyaki yo we ndi mijalidu yiheni, ndipu wachita soni wati wakumana ndi Akaboni anyaki.
^ ndimi 60 CHITHUZI: Kopa kubuda: Msungwana wachita mantha kuti nayu wangabuda wati wawona kuti mzichi waki wasezgeka ndi kusama panyumba.
^ ndimi 62 CHITHUZI: Kopa ŵanthu: Mnyamata watopa kupemphera chifukwa pe anyina wo Mbakaboni cha.
^ ndimi 65 CHITHUZI: Kujikayikiya: Mwaviyo, watamba kusambira ukongwa pakuyija.
^ ndimi 67 CHITHUZI: Fuzi yakutuwa kwa abwezi ŵidu: Pavuli paki wamalika kuti ndi Kaboni.
^ ndimi 69 CHITHUZI: Kopa kubuda: Kweni wasankha kuteŵete Yehova ndi kubatizika.
^ ndimi 71 CHITHUZI: Kopa ŵanthu: Pavuli paki, watiŵakonkhoske mwachiganga vo wagomezga.
