1. Ino ba Adamu a Eva bakasweekelwa nzi, alimwi ino ncinzi cakacitika?

NGUNI ngomuyeeya kuti ngoweelede kubikka zyeelelo kujatikizya zintu ziluzi alimwi azitaluzi? Ciindi ba Adamu a Eva nobakalya mucelo kuzwa kucisamu cakuzyiba bubotu abubi, bakatondezya caantangalala kwiinda mumicito yabo mbobakali kulimvwa kujatikizya Jehova alimwi azyeelelo zyakwe. Bakasala kulibikkila zyeelelo zyabo beni kujatikizya zintu ziluzi alimwi azitaluzi. (Matl. 3:22) Pele amuyeeye buyo zintu nzyobakasweekelwa. Bakasweekelwa cilongwe cabo a Jehova. Alimwi bakasweekelwa coolwe cakupona mane kukabe kutamani alimwi akuyambukizya bana babo cibi alufwu. (Rom. 5:12) Kusala kwaba Adamu a Eva kwakaleta mapenzi.

2-3. (a) Ino muna Etiopiya ooyo uulemekwa wakacita buti ciindi Filipo naakamukambaukila? (b) Nzilongezyo nzi nzyotujana kwiinda mukubbapatizyigwa, alimwi ino mibuzyo nzi njotutiilange-lange?

² Amweezyanisye kujatikizya ncobakacita ba Adamu a Eva aceeco ncaakacita muna Etiopiya uulemekwa ciindi Filipo naakamukambaukila. Muntu ooyo uulemekwa wakalumba kapati kuzintu nzyaakamucitila Jehova alimwi a Jesu cakuti wakabbapatizyigwa mpoonya-mpoonya. (Mil. 8:34-38) Ciindi notulyaaba kuli Leza, akubbapatizyigwa mbubwenya mbuli mbwaakacita muntu ooyo uulemekwa, tulatondezya caantangalala mbotulimvwa kujatikizya Jehova alimwi azyeelelo zyakwe. Tulatondezya kuti tulalumba kapati kuzintu nzyaakatucitila Jehova alimwi a Jesu. Alimwi tulatondezya kuti tulamusyoma Jehova alimwi tulizyi kuti ngonguwe weelede kubikka zyeelelo kujatikizya zintu ziluzi alimwi azitaluzi.

³ Amuyeeye buyo zilongezyo nzyotujana ciindi notubelekela  Jehova! Cilongezyo cimwi ncakuti Jehova uyootupa zintu zyoonse ba Adamu a Eva nzyobakasowa, kubikkilizya acoolwe cakuyoopona kukabe kutamani. Akaambo kalusyomo ndotujisi muli Jesu Kristo, Jehova ulatulekelela zibi zyesu alimwi akutupa kuba amanjezyeezya aasalala. (Mt. 20:28; Mil. 10:43) Alimwi tuba cibeela camukwasyi wa Jehova wababelesi mbakkomanina katujisi bulangizi bwakumbele bubotu kapati. (Joh. 10:14-16; Rom. 8:20, 21) Aboobo, nokuba kuti kuli zilongezyo eezyi izitazumbauzyigwi, bamwi ibamuzyi Jehova balawaya-waya kutobela cikozyanyo camuna Etiopiya ooyo uulemekwa. Ino ncinzi cikonzya kubapa kuwaya-waya kubbapatizyigwa? Alimwi ino inga babuzunda buti buyumuyumu oobo?

4-5. Ino mbuyumuyumu nzi Avery alimwi a Hannah mbobakajana?

⁴ Kulitenga. Bazyali ba Avery Mbaakamboni ba Jehova. Bausyi bajisi mpuwo mbotu yakuba muzyali uubikkila maano alimwi mwaalu musungu. Nokuba boobo, Avery wakali kuwaya-waya kubbapatizyigwa. Nkaambo nzi? Wakaamba kuti: “Ndakali kuyeeya kuti tandikacikonzyi kuba ampuwo mbotu mbuli njobajisi bataata.” Alimwi Avery wakali kulitenga kayeeya kuti tanaakali kuyoocikonzya kwiilanganya mikuli njaakali kuyoopegwa kumbele. Wakayungizya kuti, “Ndakali kulibilika kupegwa mupailo wakubuleya, kupa makani naa kusololela kabunga mumulimo wamumuunda.”

⁵ Hannah, uujisi myaka yakuzyalwa iili 18, awalo wakali kulitenga kapati. Wakakomezyegwa abazyali ibabelekela Jehova. Nokuba boobo, wakali kudooneka ikuti naa wakali kuyoocikonzya kupona kweelana azyeelelo zya Jehova. Nkaambo nzi? Hannah wakali kulibona kubula mpindu. Zimwi ziindi, wakali kulimvwa bubi kapati cakuti wakali kulinengaula mwini acaali, calo icakali kupa kuti zintu ziindile buya kubija. Hannah wakati: “Kunyina nondakaambila muntu uuli woonse makani aaya, nobaba bazyali bangu. Alimwi ndakali kuyeeya kuti Jehova tanaakali kuyoondikkomanina kuti ndibe mubelesi wakwe akaambo kazintu nzyondakali kucita.”

6. Ncinzi cakali kupa kuti Vanessa kawaya-waya kubbapatizyigwa?

⁶ Kuyungwa abalongwe. Vanessa, uujisi myaka yakuzyalwa iili 22, wakaamba kuti, “Ndakalijisi mulongwe uuli kabotu kapati ngotwakazyibene kwamyaka iitandila ku 10.” Nokuba boobo, mulongwe wa Vanessa tanaakali kumugwasyilizya Vanessa kuzuzikizya mbaakani yakwe yakubbapatizyigwa. Eeci cakamucisa kapati Vanessa, wakaamba kuti, “Cilandiyumina kujana balongwe, alimwi ndakali kuyoowa kuti, ikuti cilongwe cesu cimane, kunyina nondakali kuyoojana mulongwe uumbi.”

7. Ino Makayla wakali kuyoowa nzi, alimwi nkaambo nzi?

⁷ Kuyoowa kucita cibi cipati. Makayla wakajisi myaka yakuzyalwa yosanwe ciindi mupati  wakwe naakagusyigwa mumbungano. Naakakomena, wakabona mbobakauside bazyali bakwe akaambo kamicito yamwanookwabo. Makayla wakaamba kuti, “Ndakali kuyoowa kubbapatizyigwa akaambo kakulibilika kuti ambweni inga ndalubizya akugusyigwa mumbungano, akubapa kuusila limwi bazyali bangu.”

8. Ncinzi Miles ncaakayoowede?

⁸ Kuyoowa kukazyigwa. Bazyali ba Miles bakalekana. Bausyi babelekela Jehova pele banyina ibamuzyala tabali Bakamboni. Miles wakaamba kuti: “Ndakakkala abamaama myaka iili 18, pele ndakali kuyoowa kubaambila kuti ndiyanda kubbapatizyigwa. Ndakabona mbobatakakkomana ciindi bataata nobakaba Bakamboni. Ndakali kuyoowede kuti bakali kuyoondipenzya andime.”

9. Mbomuyaabwiiya zinji kujatikizya mbwakkazika moyo alimwi ambwatondezya luyando Jehova, ino ncinzi ciyoocitika?

⁹ Ba Adamu a Eva bakasala kutamubelekela Jehova akaambo kakuti tiibakali kumuyanda kapati. Nokuba boobo, Jehova wakabazumizya kuti bapone kwaciindi cilamfwu kutegwa bazyale bana alimwi akulibikkila zyeelelo zyabo beni zyakukomezya bana aabo. Izyakacitika akaambo kakusala kwaba Adamu a Eva kwakutayanda kusololelwa a Jehova, kakutanainda ciindi cilamfwu zyakatondezya caantangalala mbobakali bafwubafwuba. Mwanaabo wakusaanguna wakajaya munyina iwatakajisi mulandu, mpoonya mukuya kwaciindi bubi akuliyanda zyakaba mbobuumi bwabantu. (Matl. 4:8; 6:11-13) Nokuba boobo, Jehova wakajana nzila yakufwutula bana ba Adamu a Eva aabo boonse ibayanda kumubelekela. (Joh. 6:38-40, 57, 58) Mbomuyaabwiiya zinji kujatikizya mbwakkazika moyo alimwi ambwatondezya luyando Jehova, cakutadooneka luyando lwanu kulinguwe luyookomena. Muyookaka kupona buumi mbobakasala ba Adamu a Eva alimwi muyoolyaaba kuli Jehova.

10. Nkaambo nzi kuzinzibala kuyeeya lugwalo lwa Intembauzyo 19:7 ncokukonzya kumugwasya kubelekela Jehova?

¹⁰ Amuzumanane kwiiya kujatikizya Jehova. Mbomunooyaabwiiya zinji kujatikizya Jehova, muyooba alusyomo lwakuti muyoozwidilila kumubelekela. Avery, iwaambwa kumatalikilo, wakaamba kuti: “Ndakaba abusicamba kwiinda  mukubala alimwi akuzinzibala kuyeeya cisyomezyo icili kulugwalo lwa Intembauzyo 19:7.” (Amubale.) Ciindi Avery naakabona mbwaakacizuzikizya cisyomezyo eeci Jehova, luyando lwakwe kuli Leza lwakakomena. Luyando talutupi buyo kuba basicamba, pele alimwi lulatugwasya kubikkila maano kuli Jehova alimwi akuzintu nzyayanda. Hannah, iwaambwa kumatalikilo, wakaamba kuti: “Kwiinda mukubala Bbaibbele alimwi akwiiya, ndakabona kuti ciindi nondilinengaula, ndimupa kulimvwa bubi awalo Jehova.” (1Pet. 5:7) Hannah wakaba ‘sikucita caamba jwi lya Leza.’ (Jak. 1:22) Ino ncinzi cakacitika? Wakazumanana kwaamba kuti: “Nondakabona mbondakagwasyigwa akaambo kakumvwida Jehova, luyando lwangu kulinguwe lwakakomena kapati. Lino ndilijisi lusyomo lwakuti Jehova unoondigwasya lyoonse ciindi nondiyanda lugwasyo lwakwe.” Hannah wakacikonzya kulizunda penzi lyakulinengaula mwini. Wakalyaaba kuli Jehova alimwi akubbapatizyigwa.

11. Ncinzi Vanessa ncaakacita kutegwa ajane balongwe bali kabotu, alimwi ino ncinzi ncotukonzya kwiiya kuli ceeci?

¹¹ Amusale balongwe bali kabotu. Vanessa, iwaambwa kumatalikilo, mukuya kwaciindi wakabona kuti mulongwe wakwe ngowakali kumupa kuwaya-waya kubelekela Jehova. Aboobo wakacimana cilongwe. Pele Vanessa wakacita azimbi zinji. Wakabeleka canguzu kujana balongwe bapya mumbungano. Wakaamba kuti cikozyanyo ca Nowa amukwasyi wakwe cakamugwasya. Wakati, “Mbwaanga bakazingulukidwe abantu ibatakali kumuyanda Jehova, bakeelede kumvwana mumukwasyi.” Naakabbapatizyigwa, Vanessa wakaba painiya. Lino waamba kuti, “Eeci cakandigwasya kujana balongwe bali kabotu ikutali buyo mumbungano mondizulilwa pele alimwi amumbungano zimbi.” Mbubwenya buyo, andinywe mulakonzya kujana balongwe bali kabotu kwiinda mukujata bubi mumulimo ngwaakatupa Jehova.—Mt. 24:14.

12. Ino mbuyoofwu nzi mbobatakajisi ba Adamu a Eva, alimwi ino ncinzi cakabacitikila?

¹² Amwiiye kuba abuyoofwu bweelede. Buyoofwu bumwi mbubotu kulindiswe. Mucikozyanyo, tweelede kuyoowa kucita zintu zitamukkomanisyi Jehova. (Int. 111:10) Ikuti ba Adamu a Eva nobakalijisi buyoofwu buli boobu, nobatakamuzangila Jehova. Pele bakamuzangila. Mpoonya meso aabo akajaluka mukuti  bakazyiba kuti bakali basizibi. Bakali kukonzya kubayambukizya cibi alufwu bana babo. Akaambo kakuti bakazyiba kuti basotoka mulawo wa Leza, bakafwa nsoni nkaambo bakali mantanda, aboobo bakalipangila zyakusama.—Matl. 3:7, 21.

13-14. (a) Kweelana alugwalo lwa 1 Petro 3:21, nkaambo nzi ncotuteelede kuciindizya kuyoowa lufwu? (b) Ntwaambo nzi itutupa kumuyanda Jehova?

¹³ Nokuba kuti tweelede kuyoowa kubisizya Jehova, pele tatweelede kuciindizya kuyoowa lufwu. Jehova wakapanga nzila yakuti tukabe abuumi butamani. Kuti naa twacita cibi mpoonya tweempwa kuzwa ansi amoyo, Jehova uyootulekelela. Uyootulekelela akaambo kalusyomo ndotujisi mucituuzyo cacinunuzyo ca Mwanaakwe. Inzila imwi iiyandika kapati motutondezya lusyomo nkwiinda mukwaaba buumi bwesu kuli Leza alimwi akubbapatizyigwa.—Amubale 1 Petro 3:21.

¹⁴ Tulijisi twaambo tunji itweelede kutupa kumuyanda Jehova. Ulatupa zintu zibotu nzyotukkomanina buzuba abuzuba alimwi ulatuyiisya akasimpe kajatikizya nguwe alimwi amakanze aakwe. (Joh. 8:31, 32) Wakatupa mbungano ya Bunakristo kutegwa kaitusololela alimwi akutukwabilila. Ulatugwasya kuliyumya mumapenzi lino, alimwi ulatupa bulangizi bwakumbele ibwakuyoopona kukabe kutamani mubukkale bubotu kapati. (Int. 68:19; Ciy. 21:3, 4) Ciindi notuzinzibala kuyeeya zintu nzyacitide kale Jehova kutondezya kuti ulatuyanda, tulakulwaizyigwa kumuyanda. Alimwi ciindi notumuyanda Jehova, tulaiya kuba abuyoofwu bweelede. Tulayoowa kumunyemya Jehova akaambo kakuti tulamuyanda kapati.

15. Mbuti Makayla mbwaakazunda buyoofwu bwakwe?

¹⁵ Makayla, iwaambwa kumatalikilo, wakabuzunda buyoofwu bwakwe ciindi naakazyiba mbwalekelela Jehova. Wakaamba kuti: “Ndakazyiba kuti toonse tatulondokede alimwi tulalubizya. Pele alimwi ndakazyiba kuti Jehova ulatuyanda alimwi uyootulekelela akaambo kacinunuzyo.” Luyando lwakwe kuli Jehova lwakamukulwaizya kulyaaba kulinguwe alimwi akubbapatizyigwa.

16. Mbuti Miles mbwaakagwasyigwa kuzunda buyoofwu bwakukazyigwa?

¹⁶ Miles, iwakali kuyoowa kuti banyina bakali kuyoomukazya akaambo kakusala kuti abbapatizyigwe, wakalomba lugwasyo kumulangizi wabbazu. Miles wakaamba kuti: “Awalo mulangizi wabbazu wakakomenena mumukwasyi oomo imwakali muzyali omwe buyo Kamboni. Wakandigwasya kuyeeya ncondakali kukonzya kwaamba kutegwa ndibagwasye bamaama kumvwisya kuti kwakali kusala kwangu kwakuti ndibbapatizyigwe alimwi akuti tabali bataata ibakali kundisungilizya.” Banyina Miles tiibakakkomana akusala kwakwe. Mpoonya wakazwa aŋanda, pele wakakakatila kucintu ncaakasala. Miles wakaamba kuti, “Kwiiya zintu zibotu nzyaakandicitila Jehova kwakandinjila mumoyo. Ciindi nondakayeeyesya kujatikizya cituuzyo cacinunuzyo ca Jesu, ndakabona mbwandiyanda kapati Jehova. Eeci cakandikulwaizya kulyaaba kuli Jehova alimwi akubbapatizyigwa.”

17. Ino ncoolwe nzi ncotujisi?

¹⁷ Ciindi Eva naakalya mucelo kucisamu icakali mu Edeni, wakabazangila Bausyi. Adamu naakamusangana, wakatondezya kuti tanaakalumba kuzintu zyoonse zibotu Jehova nzyaakamucitila. Toonse tulijisi coolwe cakutondezya kuti tatukuzumini naaceya kusala kwaba Adamu a Eva. Kwiinda mukubbapatizyigwa, tutondezya Jehova kuti tulamusyoma kuti ulijisi nguzu zyakutubikkila zyeelelo kujatikizya zintu ziluzi alimwi azitaluzi. Tutondezya kuti tulamuyanda alimwi akumusyoma Taateesu.

18. Mbuti mbomukonzya kuzwidilila mukubelekela Jehova?

¹⁸ Mukuli ngotujisi lwainda lubbapatizyo ngwakupona kweelana azyeelelo zya Jehova buzuba abuzuba, ikutali zyesu. Mamiliyoni aababelesi ba Leza mbobapona oobo mwaka amwaka. Mulakonzya kuba mbuli mbabo ikuti naa mwazumanana kuyungizya luzyibo lwanu kujatikizya Jwi lya Leza, Ibbaibbele; kuyanzana lyoonse a Banakristonyoko; alimwi akusungwaala kwaambila bamwi nzyomwakaiya kujatikizya Uso siluyando. (Heb. 10:24, 25) Ciindi nomusala zyakucita, amuswiilile kululayo ndwamupa Jehova kwiinda mu Jwi lyakwe alimwi ambunga yakwe. (Is. 30:21) Mpoonya zyoonse nzyomunoocita ziyoozwidilila.—Tus. 16:3, 20.

19. Ncinzi ncomweelede kuzumanana kuyeeya, alimwi nkaambo nzi?

¹⁹ Ciindi nomuzumanana kuzyiba mbomugwasyigwa abusolozi bwa Jehova, luyando ndomujisi kulinguwe alimwi azyeelelo zyakwe luyookomena. Mpoonya kunyina cintu cili coonse ncapa Saatani iciyoopa kuti muleke kubelekela Jehova. Amweezyeezye mbobunoobede bukkale bwanu myaka iili cuulu kuzwa lino. Muyooyeeya akubona kuti kusala kwanu kwakubbapatizyigwa kwakali kusala ikwiinda kubota!