1. ¿Ambe niáraspi úkuarhini imani ambe jimbo engaksï Adani ka Eba erakupka úni?

NARI exesïni, ¿né jatsiski para uandani ambe sésiski ka ambe nómbe? Engaksï Adani ka Eba apka frutani ima anhatapueri mímixekueri enga jindeka sési amberi ka no sési amberi, xarhatasptiksï eskaksï no mintsinharhisïrenga Jeobani ni imeri juramukuechani. Erakusptiksï imecha mismu exeni ambe sési jarhaski ka ambe nómbe (Gén. 3:22). Peru ¿ambe niáraspi úkuarhini? Nóteruksï úsptia sési pájperani Jeoba jingoni, níteruksï úpirinia irekani para méntkisï. Ístu kéritaasptiksï imecheri desendientichani pekadu ka uarhikua (Rom. 5:12). Ústiksï eska solu japiringa kómu nitamakua ambe imani ambe jimbo engaksï imecha erakupka úni.

2, 3. a) ¿Ambe úspi eunuku Etiopia anapu enga Felipi predikarikupka? b) ¿Náki kóntperatechanchi intsïnhaasïni engachi itsï atakuarhijka? c) ¿Náki kurhamarhikuechanchi mókuantaua?

² Méntku ménderuenisti ambe engaksï Adani ka Eba úpka ka ambe enga eunuku Etiopia anapu úpka enga Felipi predikarikupka. I kʼuiripu xáni jeiapanhintaspti ambe enga Jeoba ka Jesusi úpka imani jimbo enga jirejiresï itsï atakuarhipka (Uku. 8:34-38). Ka jucha, engachi aiakukuarhijka Tata Diosïni ka itsï atakuarhini ísï eska Etiopia anapu, xarhatasïngachi eskachi jeiapanhintasïnga ambe enga Jeoba ka Jesusi úka juchantsïni jimbo. Ístuchi xarhatasïnga eskachi mintsikasïnga Jeobani ka eskachi jiókuarhisïnga eska imajkusï újka uandani ambe sési jarhaski ka ambe nómbe.

³ Eratsia kóntperatechani engachi intsïnhaajka engachi marhuakujka Jeobani. Uénani jámani, úakachi erokuarhini eskajtsïni Jeoba íntskuaka iámindu imani ambe enga Adani ka Ebaeri kulpa jimbo no niáraka úkuarhini, enga jindeka irekani para méntkisï. Engachi jakajkujka tata Jesukristueri uarhikuani,  Tata Diosïjtsïni puáchiantasïndi juchari pekaduechani ka úsïndi eskachi ambakiti konsiensia ma jatsiaka (Mat. 20:28; Uku. 10:43). Ístuchi niárasïnga kuenta úkuarhini imani kʼéri familia jingoni engaksï Jeobani marhuakujka, enga ima jeiapanhiantajka ka engaksï ambakiti ambe erokuarhini jaka (Juanu 10:14-16; Rom. 8:20, 21). Nájkiruka i ambe meru xarharajka eska úkuarhiaka, máru engaksï mítikia Jeobani, útasïksï no seguru jarhasti sinksï ísï úa eska Etiopia anapu o nómbe. ¿Ambe ójkutaasïni paraksï no itsï atakuarhini? Ka ¿nénaksï úa orhepani uérani?

4, 5. ¿Náki problemechanksï jatsiaspi Tomasi ka Ana?

⁴ No seguru pʼikuarherani. Tomasiri táti jembechaksï Jeobaeri testiguesti. Imeri táti jemba ambakiti orhejtsïkuti máesti ka ístu ambakiti táti ma. Peru Tomasi útasï erokuarhixapti para itsï atakuarhini. Uandantasïndi: “Eratsisïrenga eskani no úpiringa ambakiti kʼuiripu máeni ísï eska juchiti táti”. Ístu, Tomasi eratsisïrendi eska no úpiringa úni imani ánchikuarhita ambe engaksï sánderu orhepani niárapiringa íntskuni. Miásïndi: “Chésïrenga engajtsïni arhipiringa parani kómarhikua úni máteruechani japarini, diskursu ma nitamatarani o grupuni orhejtsïkuni aianhpikuarhu”.

⁵ Ana enga 18 jatirika, uátsï máespti enga no sáni segura pʼikuarherenga. Nájkiruka familiarhu ma tʼarhexeka engaksï Jeobaeri testigueka, ima ísï eratsisïrendi enajki no ma ambe marhuaueni, jimbosï ísï exendi enajki no úpirini úni ambe enga Tata Diosï juramujka. Ménisï, xáni no sési pʼikuarherani jarhasïrendi enga jandiajku atakuarhenga ka inde ambe úsïrendi eska sánderu no sési pʼikuarherapiringa. Uandasïndi: “No nemani aianguspka ambe engani úenga, ni juchiti tátichani. Eratsisïrenga eskarini Jeoba no méni uékapiringa imani ambe jimbo engani ji mismuni úkuarhenga”.

6. ¿Andisï Vanesa no itsï atakuarhini japi?

⁶ Amiguecha. Vanesa enga 22 jaritika, miásïndi: “Ambakiti amigani ma jatsispka engachi sáno diesi uéxurhini sési pájperapkia”. Peru i amiga no uékasïrendi mítini ambe enga Vanesa jakajkuenga ka no jarhuatasïrendi para ima itsï atakuarhini, ka inde ambe no sési pʼikuastasïrendi. Uandantasïndi: “Kánikua úkua jukanchasïrenga sési pájperani máteruecha jingoni ka chésïrenga eska engani nóteruni pájperapiringia imani jingoni, nóteruni méni úpiringia xasï ma amigani jatsini”.

7. ¿Andisï cheeni Mariana?

⁷ Kʼéri pekadu ma úni. Mariana sinku jatirispti enga imeri ermanu jemba arhinhapka eska nóteru Jeobaeri testiguespkia. Eska na kʼépkia, kuenta íntskukuarhispti na enga xáni no sési úkuapka imeri táti jembechani ambe enga  ermanu jemba úpka. Uandasïndi: “Chésïrenga itsï atakuarhini, niárani kʼéri pekadu ma úni ka eskani ekspulsarinhapiringa ka niárani sánderuni no sési pʼikuastaani juchiti tátichani”.

8. ¿Andisï cheeni Mario?

⁸ No sési kánhani. Ju je exeni ambe enga nitamakuarhipka tumbi ma enga Mario arhinhajka. Imeri táti ka madrastra, Jeobaeri testiguestiksï, peru amamba nómbe. Mario uandantasïndi: “Diesiochu uéxurhini irekaska nándi jingoni. No tekasïrenga aianguni eskani uékasïrenga itsï atakuarhini. Jimbokani miásïrenga ambe enga úpka jiáni enga táti Testigu úkuarhipka. Chésïrenga eskarini niárapiringa no sési kámani”.

9. ¿Jamberi ambe niáraa úkuarhini engari jorhenguarhiaka na enga xáni tekantstiika Jeoba ka uékpitiini?

⁹ Adani ka Ebaksï no uékaspti Jeobani marhuakuni, jimbokaksï no niáraspka mintsita jingoni xénchani. Nájkirukaksï ísï úpka, Jeoba jurajkuspti eskaksï seguiripiringa irekani paraksï kánguarhiani sapiichani ka eskaksï imecha mismu exepiringa néna kʼuiriperaani. Ambe enga niárapka úkuarhini engaksï Adani ka Eba nóteru uékapkia eska Jeoba juramukuapiringa, no ióndaspti xarharani eska no sési jarhaspka ambe engaksï erakupka úni. Imecheri orheta uájpa, uandikuspti ermanu jembani, ka tiempu jingoni, kʼuiripu niáraspti no sési kámpini ka no pendienti páni máteruecha jimbo (Gén. 4:8; 6:11-13). Peru Jeoba úpirindi ambe ma para pʼímutantaani Adani ka Ebaeri desendientichani engaksï uékapiringa imani marhuakuni (Juanu 6:38-40, 57, 58). ¿A no eska Jeoba kánikua tekantstiska ka uékpitiini? Engari sánderu jorhenguarhiska na enga xáni tekantstiika Jeoba ka uékpitiini, jamberiri sánderu xénchaaka. Nori uékaaka májkueni no sési niátani eska Adani ka Eba, sinori uékaaka aiakukuarheni Tata Diosïni.

10. Eratsïntaparini ambe enga arhijka Salmo 19:7, ¿nénakini jarhuataa parari marhuakuni Jeobani?

¹⁰ Seguiri Jeobaeri ambe jorhenguarhini. Engari sánderu mítiska, sánderuri seguru pʼikuarheraaka eskari úaka marhuakuni. Tomasi uandasïndi eska niáraspka sánderu seguru pʼikuarherani enga sánderu informasioni arhintapka ka eratsintani ambe enga arhijka Salmo 19:7 (arhinta). Enga exepka na enga  jarhuatani japka ambe enga jimini arhijka, sánderu xénchaspti Jeobani. Xénchani Jeobani, no solu úsïndi eskachi seguru pʼikuarheraaka, sino ístujtsïni jarhuatasïndi parachi Jeobani marhuakuni ka úni ambe enga ima uéjka. Ana arini ambe uandasïndi: “Jimbokani arhintasïnga Bibliani ka jatsini estudiu personali, kurhanguska eska engani jandiajkuni no sési úkuarhijka, ístuni Jeobani no sési úkusïnga” (1 Ped. 5:7). Ana jánguarhintasti para úni ambe enga arhijka Tata Diosïri Karakata (Sant. 1:22). ¿Ambe niáraspi úkuarhini? Ima mismu uandantasïndi: “Engani kuenta íntskukuarhipka na enga xáni marhuajka kurhajchani Jeobani, sánderuni xénchaska. Iásï, segura jarhaskia eskarini ima méntkisï jarhuataaka jiáni engani uétarhinchani jauaka imeri jarhuajperata”. Ana úsïndia pʼíngukuarhini para nóteru atakuarhinia, aiakukuarhestia Jeobani ka itsï atakuarhini.

11. a) ¿Néna niáraspi Vanesa ambakiti amiguechani jatsiani? b) ¿Ambejtsïni jorhendasïni i ejemplu?

¹¹ Sési erakua chíti amiguechani. Tiempu jingoni, Vanesa kuenta íntskukuarhispti eska amiga jemba ójkutaxapka para ima marhuakuni Jeobani. Ísï jimbo, nóteru pájperasptia imani jingoni. Peru no indeni ambejkusï úpti, jánguarhintaspti amiguechani jatsiani kúnguarhikuarhu. Vanesa uandasïndi eska Noeri ka imeri familieri ejemplu jarhuataspka: “Imechaksï jiáni irekaspti enga no nema xénchenga Jeobani, jimboksïsï jánguarhintendi imecha mismu sési pájperani”. Enga itsï atakuarhipkia, prekursora úkuarhispti. Iásï uandantasïndia: “I amberini jarhuatasti ambakiti amiguechani jatsiani, no solu juchiti kúnguarhikuarhu, sino ístu máteru kúnguarhikuecharhu”. Tʼujturi úaka ambakiti amiguechani jatsiani engari jánguarhintaska úni ini ánchikuarhita engajtsïni Jeoba juramuchika para úni (Mat. 24:14).

12. ¿Ambeksï no chéspi úni Adani ka Eba ka ambe úkuarhispi?

¹² Asï ché, peru janhanharhi Tata Diosïni. No méntkisï no sési jarhasïndi chéni pʼikuarherani. Por ejemplu, sésisti eskachi chéaka imani ambe úni enga Jeoba no jeiapanhintajka (Sal. 111:10). Engaksï Adani ka Eba chépiringa imani ambe úni enga Jeoba no jeiapanhintajka, kurhajchapirindiksï. Peru engaksï no kurhajchapka, kurhangusptiksï eskaksï pekadu úspka. Iámindu imecheri desendientichanksï  kéritaapirindi pekadu ka uarhikua. Ka jimbokaksï exespkia ambe engaksï úpka, kʼuratsesptiksï engaksï patsïkʼasï japka ka órhekuarhisptiksï (Gén. 3:7, 21).

13, 14. a) Eska na arhijka 1 Pedru 3:21, ¿andichisï no jatsi para kánikua chérhini uarhikuani? b) ¿Náki rasonichanchi jatsiaski parachi xénchani Jeobani?

¹³ Sésisti eskachi chéaka para no imani ambe úni enga Jeoba no jeiapanhintajka. Peru nochi jatsiska para kánikua chérhini uarhikuani. ¿Andi nómbe? Jimbokajtsïni Tata Diosï íntskuska ambe ma engachi jimbo úaka irekani para méntkisï. Engachi pekadu ma úska ka mintsita jingonchi moantani, imajtsïni puáchentaati engachi jakajkuska imeri Uájperi uarhikuani. Ka para xarhatani eskachi jakajkusïnga, jatsiskachi para úni ambe ma enga kánikua jukaparhakueka: aiakukuarheni ka itsï atakuarhini (arhinta je 1 Pedru 3:21).

¹⁴ Uánikua rasonichanchi jatsiaska parachi xénchani Jeobani. Aparte dejtsïni pauani pauani ambakiti ambe íntskuni, jorhendasïndijtsïni imeri ambe enga jurhimbitiika ka ambe enga uéjka úni (Juanu 8:31, 32). Kúnguarhikuajtsïni ma íntskusti parajtsïni arhistacheni ka jarhuatani. Ístujtsïni jarhuatasïndi juchari problemecha jingoni ka aiachesïndijtsïni eskachi sánderu orhepani irekaaka para méntkisï ka meru sési (Sal. 68:19; Jaŋ. 21:3, 4). Engachi eratsintajka iámindu imani ambe enga xáni úkia parajtsïni xarhatachini imeri uékperakua, niárasïngachi xáni xénchani engachi chéjka no sési pʼikuastani. Indeni ambe jimbochisï jatsika para chéni.

15. ¿Néna úspi Mariana para nóteru chénia enga niárapiringa kʼéri pekadu ma úni?

¹⁵ Mariana nóteru chésptia enga niárapiringa kʼéri pekadu ma úni, jimboka kurhanguspka eska Jeoba méntkisï jingontku jarhasïnga para puátspentani. Uandasïndi: “Kuenta íntskukuarhiska eska no nema perfektueska ka eskachi iáminduecha niárasïnga no sési ambe úni. Peru ístuni kurhanguska eska pʼimutantskua jimbo, Jeobajtsïni niárasïnga xénchani ka puáchintani”. Imeri uékperakua Jeobani jimbo, úspti eska aiakukuarhipiringa ka itsï atakuarhini.

16. ¿Ambe jarhuataspi Mariuni para nóteru chénia?

¹⁶ Mario, enga chénga eska amamba no uékapiringa para ima itsï atakuarhini, sirkuitueri orhejtsïkutini kurhakuspti jarhuajperata. Uandantasïndi: “Sirkuitueri orhejtsïkuti májkueni tʼarhexespti eska ji, ístu imeri amamba no Testiguespti. Jarhuatasptirini parani eratsini néna arhipirini juchiti nándini eskani jíspka engani erakupka parani ítsï atakuarhini ka eska no juchiti tátispka enga afuersa uékenga eskani ísï úpiringa”. Mariueri amamba no jeiapanhintaspti ambe enga ima arhipka. Tátsekua, Mario nóteru amamba jingoni irekasptia para úni itsï atakuarhini. Ístu uandantasïndi: “Sési pʼikuarheraspka jorhenguarhini na enga xáni ambakiti ambe úpkia Jeoba jíndeni jimbo, eratsintani eska Jesusi íntspeska imeri tsípikuani, kurhanguspka na engarini xáni xénchajka Jeoba. Inde ambe úspti eskani aiakukuarhipiringa ka itsï atakuarhini”.

17. ¿Ambechi úa úni iáminduecha?

¹⁷ Enga Eba imani anhatapueri frutani apka enga jardini de Edenirhu japka, no kurhajchaspti imeri Táti jembani. Ka enga Adanijtu ísï úpka, xarhataspti eska méntku no sáni kʼuratsekua jukaspka, jimboka no jeiapanhintaspka ambe enga Jeoba xáni úpka imani jimbo. Iáminduechachi jatsiska ambe ma engachi jimbo úaka xarhatani na engachi no sáni jeipanhintajka ambe engaksï imecha úka. Engachi itsï atakuarhijka, xarhatakusïngachi Jeobani eskachi jakajkusïnga eska imasï jatsika para uandani ambe sésiski ka ambe nómbe. Ístuchi xarhatakusïnga eskachi xénchasïnga ka eskachi mintsikasïnga.

18. ¿Amberi jatsiski para úni parari sési marhuakuni Jeobani?

¹⁸ Engachi na itsï atakuarhijkia, jatsisïngachi para pauani pauani kumpliriuani Jeobaeri juramukuechani ka no jucharichani. Ísïsti, no fásilisti, peruksï uánikua kʼuiripuecha ísï úsïndi mándani uéxurhini. Tʼuri úaka ísï úni eska imaecha. Parari ísï úni, seguiri sánderu sési kurhanguni ambe enga Biblia arhijka, pʼinde erachicha jingoni úni ambe ma ka tsípikua jingoni aiangua máteruechani ambe engari jorhenguarhikia chíti Táti uékpitiri enga auandarhu jaka (Ebr. 10:24, 25). Ka engari erakuni jámaaka úni ambe ma, úraa imani konsejuechani engakini Jeoba íntsaajka imeri Karakata jimbo ka imeri organisasioni jimbo (Is. 30:21). Engari ísï úska, sésikini nicheati (Prov. 16:3, 20).

19. ¿Amberi jatsiski para méntkisï miáni ka andi?

¹⁹ Engari méntkisï miáska na engakini xáni marhuachijka ambe enga Jeoba jorhentpijka, sánderuri xénchaaka imani ka ístu imeri juramukuechani. Jiájkani, ambe uéjki engakini Satanasi aiachiaka, no úati úni eskari nóteru marhuakuakia Jeobani. Engari eratsiska chíti bautismu jimbo ixú mili uéxurhini jimbo, uandaakari: “Ambakiti ambe erakuska úni”.