1. Adamu na Hawa bakaferwa ki, kandi kiki ekyarugiremu?

NOTEKEREZA noha asemeriire kutaho endengo ezitusemeriire kuhondera ezirukukwata ha kirungi n’ekibi? Adamu na Hawa obubaliire ha kijuma ky’omuti ogw’okumanya ekirungi n’ekibi, bakolekera kimu ngu: Batesige Yahwe n’endengo ez’akaba abateriireho. Bakecweramu kweteraho endengo ezabo habwabo ezirukukwata ha kirungi n’ekibi. (Kub. 3:22) Baitu banza otekerezeeho ebirungi ebibaferiirwe. Bakaferwa enkoragana enungi na Yahwe. Kandi bakaferwa omugisa gw’okwomeera ebiro n’ebiro, kandi bagwetera abaana babo ekibi n’okufa. (Bar. 5:12) Encwamu ya Adamu na Hawa ekarugamu okubonabona kwingi.

2-3. (a) Omukonwa Omunyesiyopya akakora ki Firipo obuyamutebiize? (b) Tutunga migisa ki obutubatizibwa, kandi bikaguzo ki ebiturukwija kugarukamu?

² Lengesaniza encwamu ya Adamu na Hawa hamu n’encwamu y’omukonwa Omunyesiyopya Firipo ou yatebiize. Omukonwa onu akasiima muno habw’eki Yahwe na Yesu bamukoliire, kyamuletera kukora encwamu y’okubatizibwa aho n’aho. (Eng. 8:34-38) Obutwehayo hali Ruhanga, kandi tukacwamu kubatizibwa nk’oku omukonwa yakozere, tuba nitwoleka ekiri omu mutima gwaitu. Tuba nitwoleka ngu nitusiima eki Yahwe na Yesu baatukoliire. Ekintu ekindi, twoleka nk’oku turukwesiga Yahwe, kandi twoleka nk’oku turukumanya ngu nuwe asemeriire kututeraho endengo z’okuhondera ezirukukwata ha kirungi n’ekibi.

³ Tekerezaaho emigisa ei tutunga obutuheereza Yahwe! Ogumu ha migisa nugwo ngu, twine okunihira kw’okutunga buli kimu kyona Adamu na Hawa ekibatuferiize, otwaliremu n’obwomeezi  obutahwaho. Habw’okwikiririza omuli Yesu Kristo, Yahwe atuganyira ensobi zaitu kandi atuha omuntu ow’omunda omurungi. (Mat. 20:28; Eng. 10:43) Ekintu ekindi, tweteraniza ha ka ya Yahwe ey’abaheereza be abaarukusiima kandi abanyakulindiriire kutunga emigisa omu busumi obw’omu maiso. (Yoh. 10:14-16; Bar. 8:20, 21) N’obuharaaba haroho emigisa enu, abamu begesiibwe biingi ebirukukwata hali Yahwe baitu kikyabagumiire kuhondera ekyokurorraho ky’omukonwa Omunyesiyopya. Bintu ki ebisobora kuba nibibalemesa kubatizibwa? Kandi nibasobora bata kubisingura?

4-5. Omusigazi arukweta Avery hamu n’omwisiki arukwetwa Hannah, bakaba baine bulemeezi ki?

⁴ Okuteyikiririzaamu. Abazaire b’omusigazi w’emyaka 19 arukumanywa nka Avery bali Bakaiso ba Yahwe. Ise amanyirwe nka taata arukufaayo kandi omugurusi w’ekitebe omwekambi. Baitu ekirukuhuniiriza, Avery yatiinaga kubatizibwa. Habwaki? Avery nagamba ati: “Obunayeroraga, naroraga ntarukusobora kuba murungi nka ise nyowe.” Ekintu ekindi, omusigazi onu akaba nayegurukyagurukya narora ngu kakuba atunga obujunanizibwa omu busumi bw’omu maiso, nasobora kulemwa kubuhikiriza. “Natiinaga muno obunatekerezaaga ha kusabira omu maiso g’ekitebe, kuha embazo za boona, rundi kwebembera gurupu kugitwara omu buheereza.”

⁵ Hannah, anyakwine emyaka 18, akaba atarukweikiririzaamu nakake. Akakuzibwa abazaire abarukuheereza Yahwe. Baitu uwe yagurukyagurukyaga narora atarukusobora kugendera ha ndengo za Yahwe. Habwaki? Hannah yayeroraga ali nk’omuntu owa hansi muno. Obwire obumu yayehurraga kubi muno nahika n’okwehutaaza akigenderiire kandi kinu kyayongeraga kusiisa busiisa ebintu. Hannah nagamba ati: “Ntagambireho omuntu wena ha kikorwa kinu n’obubakuba abazaire bange kandi naikaraga nintekereza ngu Yahwe tasobora kunyikiriza kuba muheereza we habw’ekintu ekinkaba ninyekora.”

6. Kiki ekyalemeseze Vanessa kubatizibwa?

⁶ Kusindikirizibwa abanywani. Vanessa, ow’emyaka 22, nagamba ati, “Nkaba nyine omunywani kandi tukaba tumazire emyaka nka ikumi tuli banywani.” Baitu Vanessa obuyayolekere ngu nagonza kubatizibwa, kitasemeze munywani we. Ekintu kinu kikatalibaniza muno Vanessa, kandi nagamba ati: “Tikinyanguhira kunywana abantu kandi nkaba nyeralikiriire muno nintekereza ngu kakuba nyita obunywani obu, nkaba ntarukugenda kutunga omunywani ondi nfe na nfe.”

7. Omwisiki arukwetwa Makayla akaba natiina ki, kandi habwaki?

⁷ Kutiina kukora ensobi y’amaani. Makayla, hati anyakwine emyaka 21 akaba aine emyaka etaano yonka nambere mugenzi we omwojo  yabingiirwe omu kitebe. Obuyayeyongiire kukura, akarora omulingo ebikorwa bya mugenzi we byakwasireho abazaire be. Makayla nagamba ngu: “Natinaga ngu kakuba mbatizibwa, nkaba ninsobora kukora ensobi nibambinga omu kitebe kandi nanyowe ninyongereza ha bujune bw’abazaire bange.”

8. Omusigazi arukwetwa Miles akaba natiina ki?

⁸ Kutiina okuhakanizibwa. Ise w’omusigazi arukwetwa Miles na mukaise bali Bakaiso ba Yahwe, baitu nyina wonyini tali omu Kaiso wa Yahwe. Miles nagamba ati: “Nkaikara na nyina nyowe kumara emyaka 18 baitu natinaga kumugambira ngu ningonza kubatizibwa. Nkaba ndozere omulingo yayetwaize ise nyowe obuyafokere omu ha Bakaiso ba Yahwe. Natinaga ngu akaba nagenda kumpakaniza muno.”

9. Kiki ekisobora kubaho kakuba oyeyongera kwega oketegereza omulingo Yahwe ali Ruhanga w’okugonza kandi ow’okugumisiriza?

⁹ Adamu na Hawa bakacwamu kutaheereza Yahwe habwokuba batakurakuranize okugonza kwabo hali Yahwe. Baitu n’obukiraaba nukwo kyali, Yahwe akabaleka bayomeera kumara akasumi kaingi nukwo bazaale abaana kandi betereho endengo ezabo habwabo ez’okukuza abaana abo. Ebyarugire omu ncwamu yabo ey’okwecwaho obulemi bwa Yahwe bikooleka ngu bakakora encwamu etali y’amagezi. Mutabani wabo omukuru akaita mugenzi we owakaba ataine omusango, kandi obwire bukahika ebikorwa by’okurwana n’okwegondeza byakanya omu bantu. (Kub. 4:8; 6:11-13) Baitu Yahwe akaba aine entekaniza y’okujuna abaana boona aba Adamu na Hawa abakaba nibagonza kumuheereza. (Yoh. 6:38-40, 57, 58) Okugonza kwawe nikusobora kweyongera kakuba oyeyongera kwega nukwo okarora omulingo Yahwe ali Ruhanga w’okugumisiriza kandi ow’okugonza. Nikiija kukuletera kwanga kukora encwamu embi nk’eya Adamu na Hawa nukwo oyeheyo hali Yahwe.

10. Habwaki kwecumitiriza ha Zabuli 19:7 kisobora kukukonyera kuheereza Yahwe?

¹⁰ Weyongere kwega hali Yahwe. Obworayeyongera kwega hali Yahwe, noija kweyongera kutunga obumanzi bw’okumuheereza otalekeriire. Avery ou tubalizehoga nagamba ati: “Obunasomere omurago ogurukusangwa omu Zabuli 19:7  (Soma.), kandi nagwecumitirizaaho, nkeyongera kutunga obumanzi bw’okugonza kuheereza Yahwe.” Avery obuyarozere omulingo Yahwe yahikirizemu omurago ogw’omu kyahandiikirwe eki, okugonza kwe hali Ruhanga kukeyongera. Okugonza tikutuletera kuba bamanzi kwonka baitu kutukonyera n’okuta ebitekerezo byaitu hali Yahwe na hali eby’arukugonza. Hannah ou tubalizehoga nagamba ati: “Habw’okwesomesa n’okwega Baibuli, nkakyetegereza ngu obunayehutaazaga, tikyasemezaaga Yahwe.” (1 Pet. 5:7) Hannah akata omu nkora ebiyayegere yafooka ‘mukozi w’ekigambo.’ (Yak. 1:22) Kiki ekyarugiremu? Nagamba ati: “Obunarozere omulingo kworobera Yahwe kyangasiire, okugonza kwange haluwe kukeyongera kuguma. Hati ninkigumiza kimu ngu Yahwe naija kwikara nanyebembera buli murundi ndaba ninyetaaga obukonyezi bwe.” Hannah akasobora kusingura engeso y’okwehutaaza. Akehayo hali Yahwe kandi yabatizibwa.

11. Vanessa akakora ki kusobora kutunga abanywani abarungi, kandi kinu nikitwegesa ki?

¹¹ Tunga abanywani abarakukonyera. Akasumi kakahika Vanessa ou tubalizehoga yarora ngu munywani we akaba namulemesa kuheereza Yahwe. Nahabweki akecwaho omunywani we onu. Baitu Vanessa atagarukire ha kwecwaho kwonka omunywani we. Akekamba muno kutunga abanywani abahyaka omu kitebe. Nagamba ngu ekyokurorraho kya Nuha n’eka ye kikamukonyera muno. Nagamba ngu “bakaba betoroirwe abantu abataherezaaga Yahwe, baitu bakaba baine enkoragana enungi hagati yabo.” Obuyamazire kubatizibwa, akafooka payoniya. Hati nagamba ati, “Ekintu kinu kinkonyire kutunga abanywani abahyaka hatali omu kitebe kyaitu honka baitu n’omu bitebe ebindi.” Naiwe nosobora kutunga abanywani abarungi kakuba oyekamba muno kukora omulimo ogu Yahwe atuhaire.​—Mat. 24:14.

12. Adamu na Hawa bakaba bataine kutiina kwa mulingo ki, kandi kiki ekyarugiremu?

¹² Yega kuba n’okutiina okuhikire. Haroho okutiina okuhikire. Nk’ekyokurorraho, tusemeriire kutiina kukora ebintu ebirukubiihiza Yahwe. (Zab. 111:10) Kakuba Adamu na Hawa baali baine okutiina kwa mulingo ogu, bakubaire batajemiire Yahwe. Baitu bakamujemera. Obubamazire kumujemera, amaiso gabo gakaiguka,  ekirukumanyisa ngu bakarorra kimu ngu bakaba bafokere basiisi. Kimu kyonka ekibakaba nibasobora kukora nukwo kugwetera abaana babo ekibi n’okufa. Hanyuma y’okurora ngu bakaba bacwire ekiragiro kya Yahwe, bakakwatwa ensoni habw’okwetegereza ngu bakaba batajwaire batandika kweswekerra.​—Kub. 3:7, 21.

13-14. (a) Kusigikirra ha abwaki 1 Petero 3:21, habwaki tutasemeriire kutiina okufa ekihinguraine? (b) Habwaki tugonza Yahwe?

¹³ N’obukiraaba ngu haroho okutiina okutusemeriire kuba nakwo, titusemeriire kutiina okufa ekihinguraine. Yahwe atuteriireho omulingo gw’okutungamu obwomeezi obutahwaho. Kakuba tukora ekibi baitu tukegarukamu kuruga ha mutima, naija kutuganyira ekibi eki. Naija kutuganyira habwokuba nitwikiririza omu kicunguro ky’Omwana we. Kwehayo hali Ruhanga tukabatizibwa guli gumu ha miringo enkuru ei tusobora kwolekamu okwikiriza kwaitu.​—Soma 1 Petero 3:21.

¹⁴ Haroho ensonga nyingi habwaki tugonza Yahwe. Tagarukira ha kutuha ebintu ebirungi byonka buli kiro, baitu atwegesa n’amananu agarukumukwataho n’agarukukwata ha bigendererwa bye. (Yoh. 8:31, 32) Atuhaire n’ekitebe kye Ekikristaayo kutuha oburagirizi n’obusagiki. Atukonyera kugumisiriza ebizibu omu kasumi kanu kandi atunihiize ngu nitwija kutunga obwomeezi obutahwaho kandi obuhikiriire omu busumi obw’omu maiso. (Zab. 68:19; Kus. 21:3, 4) Obutwecumitiriza ha bintu byona Yahwe atukoliire kwoleka ngu natugonza, okugonza kwaitu haluwe kweyongera. Kandi obutugonza Yahwe, tuleka kutiina ekihinguraine. Tutiina kubiihiza Yahwe habwokuba tumugonza muno.

15. Kiki ekyakonyire Makayla kuleka kutiina ngu nasobora kulemwa kuheereza Yahwe?

¹⁵ Makayla, ou tubalizehoga obuyayetegeriize omulingo Yahwe ali Ruhanga arukuganyira, akaleka kutiina ngu nasobora kulemwa. “Nkakyetegereza ngu itwena tituhikiriire kandi tukora ensobi. Nkongera nayetegereza ngu Yahwe atugonza kandi atuganyira kusigikirra ha kicunguro ky’Omwana we.” Okugonza kwe hali Yahwe obukwayeyongiire, akehayo hali Yahwe kandi yabatizibwa.

16. Miles akakonyerwa ata kusingura obutini bwe?

¹⁶ Miles ayatekerezaaga ngu nyina nasobora kuhakaniza encwamu ye ey’okubatizibwa akasaba omuroleerezi w’ekicweka amukonyere. Miles nagamba ati: “Omuroleerezi w’ekicweka nauwe akaba akuliire omu ka nambere omuzaire we omu wenka nuwe akaba ali Kaiso wa Yahwe. Akankonyera kutekereza ha mulingo nkaba ninsobora kusoborra nyina nyowe nkamwikirizisa ngu egi ekaba eri ncwamu yange hatali ngu habwokuba ise nyowe akaba nansindikiriza.” Nyina Miles atasemererwe habw’encwamu ya mutabani we. Obwire bukahika yaruga omu nju ya nyina baitu yagumira ha ncwamu ye. Miles nagamba ati: “Kwega ha bintu ebirungi Yahwe ebyankoliire kikankwataho muno. Obunayecumitiriizeho muno ekicunguro kya Yesu, nkarora omulingo Yahwe angonza muno. Ekintu eki kikandetera kwehayo hali Yahwe kandi nabatizibwa.”

17. Buli omu haliitwe aine mugisa ki?

¹⁷ Hawa obuyaliire ha kijuma eki Yahwe akaba abatangire, akooleka ngu akaba ayangire Ise. Adamu obuyamweteranizeho, akoolekera kimu ngu akaba atarukusiima habw’ebirungi byona Yahwe akaba amukoliire. Itwena twine omugisa gw’okwoleka ngu tituli nka Adamu na Hawa, n’okwoleka ngu nitusiima Yahwe habw’ebirungi byona ebyatukoliire. Obutubatizibwa twoleka Yahwe ngu nitwikiririza omu busobozi bwe obw’okututeraho endengo ezirukwoleka ekihikire n’ekitahikire. Tukigumya ngu nitugonza Isiitwe kandi nitumwesiga.

18. Kiki ekisobora kukukonyera kwikara noheereza Yahwe?

¹⁸ Obulemu obutwine kwikara niturwana hanyuma y’okubatizibwa nubwo obw’okwikara nituhondera endengo za Yahwe buli kiro hatali ezaitu. Buli mwaka, obukaikuru n’obukaikuru bw’abantu nibahondera endengo za Yahwe. Naiwe nosobora kuba omu halubo kakuba oikara noyeyongera kwetegereza Ekigambo kya Ruhanga; oikara nosorrokana hamu n’ab’oruganda n’abanyaanya itwe; kandi kakuba oyekamba kutebeza amakuru agarukukwata hali Isiitwe ow’okugonza. (Baheb. 10:24, 25) Obworaaba nogonza kukora encwamu, hondera obuhabuzi Yahwe arukukuha kuraba omu Kigambo kye n’ekitebe kye. (Is. 30:21) Obuturakora eki, nitwija kuhika ha businguzi.​—Nfu. 16:3, 20.

19. Kintu ki eky’osemeriire kwikara noijuka, kandi habwaki?

¹⁹ Obworaikara noijuka omulingo obuhabuzi bwa Yahwe burukukugasira, noija kweyongera kumugonza kandi noija n’okweyongera kugonza endengo ze. Kandi busaho kintu kyona Setani eky’arakozesa kukusonasoona kuleka kuheereza Yahwe. Teramu akasisani harabireho emyaka rukumi kuruga obatizibwa. Obwolirora emyaka enyakurabireho olirora ngu okakora encwamu erukukirayo kuba y’amagezi ey’okubatizibwa!