1. Se a te mea ne galo atu i a Atamu mo Eva, kae se a te mea ne iku mai i ei?

KO OI e mafaufau koe me e ‵tau o fakatoka ne ia a tulaga e uiga ki te mea ‵lei mo te mea masei? I te taimi ne ‵kai ei a Atamu mo Eva ki te fuaga mai te lakau o te iloa e uiga ki te ‵lei mo te masei, ne fakaasi manino mai i lā faifaiga me ne seki tali‵tonu lāua ki tulaga o Ieova. Ne filifili eiloa ne lāua a lā tulaga e uiga ki te ‵lei mo te masei. (Kene. 3:22) Kae mafaufau la ki mea ne ‵galo mai i a lāua. Ne ‵galo atu te lā vā fakataugasoa mo Ieova. Ne galo atu foki i a lāua te avanoaga ke ola ki te se-gata-mai, kae ne togi atu fua ne lāua te agasala mo te mate ki lā tama‵liki. (Loma 5:12) Ne iku atu te filifiliga a Atamu mo Eva ki te malaia.

2-3. (a) Se a te mea ne fai ne te eunuka Aitiope i te taimi ne talai atu a Filipo ki a ia? (e) Ne a fakamanuiaga e maua ne tatou māfai ko papatiso, kae ne a fesili ka sau‵tala tatou ki ei?

² Ke fakatusatusa aka a faifaiga a Atamu mo Eva ki te auala ne saga tonu atu ei a te eunuka Aitiope ki te talaiga a Filipo. Ne loto fakafetai eiloa te eunuka ki mea ne fai ne Ieova mo Iesu mō ia, telā ne gasue fakavave ei a ia o papatiso. (Galu. 8:34-38) I te taimi e fai ei ‵tou tukuatuga ki te Atua kae papatiso e pelā mo te eunuka, ko fakasalalau atu eiloa i ei ne tatou se fekau manino. E fakaasi atu i ei te ‵tou loto fakafetai ki mea ne fai ne Ieova mo Iesu mō tatou. E fakaasi atu foki ne tatou me e tali‵tonu tatou ki a Ieova kae malamalama me ko ia tokotasi fua e ‵tau o fakatoka ne ia a tulaga e uiga ki te ‵lei mo te masei.

³ Mafau‵fau ki fakamanuiaga e maua ne tatou māfai e tavini atu ki a Ieova! Kae masaua, e maua ne tatou fakamuli a mea kolā ne ‵galo atu i a Atamu mo Eva, e aofia i ei te avanoaga ke ola ki te se-gata-mai. Ona ko ‵tou fakatuanaki ki a Iesu Keliso, e fakamagalo ne Ieova ‵tou mea ‵se kae tuku mai ki a tatou se  loto lagona ‵ma. (Mata. 20:28; Galu. 10:43) E fai foki tatou e pelā me se vaega o te kaukāiga o Ieova kolā ko oti ne talia ne ia kae olioli ki te olaga telā e moe mai ‵tou mua. (Ioa. 10:14-16; Loma 8:20, 21) Kae faitalia loa a fakamanuia mautinoa konei, e isi ne tino kolā e iloa ne latou a Ieova koi fakatalave loa o tau‵tali i te fakaakoakoga a te eunuka Aitiope. Ne a mea e mafai o taofi ei latou mai te papatiso? Kae e mafai pefea o manumalo latou i fakalavelave konā?

4-5. Ne a fakalavelave ne fe‵paki mo te tamataene ko Avery mo te tamafine ko Hannah?

⁴ Se lava o te loto talitonu. A mātua o Avery ne Molimau a Ieova. A tena tamana ko ia loa ko atafai kae se toeaina atamai. Kae ui i ei, ne taofi aka ne Avery a ia mai te papatiso. Kaia? Ne fai mai tou tagata: “Ne seki mafaufau au me e mafai o fai au mo fai se tino ‵lei e pelā mo toku tamana.” Ne seki lava foki te loto talitonu o Avery ki a ia eiloa me e mafai o fai ne ia a tiute kolā ka tuku atu ki a ia i aso mai mua. “Ne manavase au māfai e fakamolemole mai ke ‵talo i mua o tino e tokouke, ke fai a lāuga, io me ke takitaki se potukau talai.”

⁵ A Hannah telā ko 18 ana tausaga, ne logo‵mae malosi ona ko te sē lava o te loto talitonu. Ne puti aka a ia ne mātua kolā e tavini ki a Ieova. Kae tiga te feitu tenā, ne fakalotolotolua a ia ki te mafai ne ia o ola e ‵tusa mo tulaga o Ieova. Kaia? Ne mafaufau a Hannah me e seai sena aoga. I nisi taimi, ne ma‵sei valevale ana lagonaga ko ala ei o fakapakia ne ia a ia eiloa, telā ko fai ei ne ia ke lasi te fakalavelave. “Ne seki fai aka loa ne au ki se tino a mea ne fai ne au, ke oko foki ki oku mātua,” ne fai mai tou fafine, “kae ne mafaufau au me ka se talia lele au ne Ieova ona ko mea e fai ne au ki a au eiloa.”

6. Se a te mea ne taofi ne ia a Vanessa mai te papatiso?

⁶ Fakamalosiga mai taugasoa. Ne fai mai a Vanessa, telā ko 22 ana tausaga penei, “E isi loa soku taugasoa pele ko leva ne iloa ne au i tausaga toeitiiti ko kātoa te 10.” Kae ne seki ‵lago atu loa te taugasoa o Vanessa ki tena fakamoemoega ke papatiso. Ne logo‵mae a Vanessa i te mea tenā, kae fai mai, “Ne faigata ke maua ne au ne taugasoa, kae ne manavase au me kafai ko ‵kati ne au te fesokotakiga tenā, ka se toe maua ne au se taugasoa pele penā.”

7. Se a te mea ne mataku ki ei te talavou tenei ko Makayla, kae kaia?

⁷ Mataku i te mea ma fai se mea ‵se. A Makayla ko lima fua ana tausaga i te taimi ne fakatea ei tena tuagane. I tena tupuakaga, ne lavea ne ia te pokotia o ana mātua i mea ne fai ne tena tuagane. “Au ne mataku me kafai au ko papatiso,” ko pati a Makayla, “ka fai ne au se mea ‵se, fakatea, kae  toe fakaopoopo atu foki te fanoa‵noa o oku mātua.”

8. Se a te mea ne mataku i ei te tamataene tenei ko Miles?

⁸ Mataku i ‵tekemaiga. A te tamana mo te mātua fai o Miles e tavini atu ki a Ieova, kae ko tena mātua tonu e sē se Molimau. “Au ne ‵nofo tasi mo toku mātua mō se 18 tausaga,” ne fai mai a Miles, “kae ko au ne mataku o fai ki tou fafine me i a au ko fia papatiso. Ne lavea ne au ana faifaiga i te taimi ne fai ei toku tamana pelā me se Molimau. Ne mataku eiloa au me e mafai o fakatupu ne ia se fakalavelave ki a au.”

9. Se a te mea e mafai o tupu māfai e tauloto koe ki te alofa mo te kufaki o Ieova?

⁹ Ne filifili ne Atamu mo Eva ke sē tavini atu lāua ki a Ieova ona ko te se mafai o ati aka ne lāua te alofa malosi ki a Ieova. E ui i ei, ne talia ne Ieova ke ola lāua mo se taimi toetoe ke fai lā tama‵liki kae ke fakaiku aka ne lāua te auala ke puti aka ei lā tama‵liki. Ne fakaasi manino mai i te fakaikuga a Atamu mo Eva ke fia tu tokotasi mai i a Ieova a te lā va‵lea. Ne tamate ne te lā tama tagata matua a tena taina telā e seai sena mea ‵se ne fai, kae fakamuli ifo, ne pule atu a amioga fakasaua mo te kaimanako ki te kaukāiga o tino. (Kene. 4:8; 6:11-13) Kae tiga te feitu tenā, ne fakatoka ne Ieova a te auala ke faka‵sao ei a tama‵liki katoa a Atamu mo Eva kolā e ma‵nako o tavini atu ki a ia. (Ioa. 6:38-40, 57, 58) I te taimi e tauloto ei koe ki mea e uke atu e uiga ki te lasi o te kufaki mo te alofa o Ieova, ka gasolo aka foki ki luga tou alofa mō ia. Ka manako eiloa koe o ‵teke atu te auala telā ne filifili ne Atamu mo Eva kae fai tau tukuatuga totino ki a Ieova.

10. Kaia e mafai o fesoasoani atu a te mafaufau ‵loto ki te Salamo 19:7 ke tavini atu koe ki a Ieova?

¹⁰ Tumau i te tauloto e uiga ki a Ieova. Ko te uke au mea e tauloto e uiga ki a Ieova, ko te lasi o tou loto talitonu me e mafai o tavini atu koe ki a ia mo te manuia. A Avery telā ne taku atu muamua, ne fai mai, penei: “Ne maua ne au te loto talitonu mai te faitau kae mafaufau ‵loto ki te tautoga telā e fakamau i te Salamo 19:7.” (Faitau.) I te taimi ne lavea ei ne Avery te auala ne fakataunu ne Ieova te tautoga tenā, ne gasolo aka ei o malosi  tena alofa ki te Atua. A te alofa e se fakamalosi fua ne ia te loto talitonu kae e fesoasoani mai foki ke ‵saga tonu tatou ki a Ieova mo mea e manako a ia ki ei. Ne fai mai a Hannah telā ne taku atu muamua, penei: “E auala i aku faitauga mo sukesukega totino ki te Tusi Tapu, ne fatoā iloa aka ne au me kafai e fakalogo‵mae ne au a au eiloa, ko fakalogo‵mae foki ne au a Ieova.” (1 Pe. 5:7) Ne fai eiloa a Hannah e pelā me se ‘tino e fakagalue ne ia te muna a te Atua.’ (Iako. 1:22) Se a te ikuga? E fai mai tou fafine: “I te iloaga ne au te aoga o te fakalogo ki a Ieova, ne gasolo ei o malosi toku alofa ki a ia. Nei la ko talitonu au me ka takitaki faeloa au ne Ieova māfai ko manako au ki tena fesoasoani.” Ne mafai o manumalo a Hannah mai te faifaiga fakalogo‵mae ne ia a ia eiloa. Ne tuku atu tena ola ki a Ieova kae papatiso.

11. Ne a mea ne fai ne Vanessa ke ‵sala atu ki taugasoa ‵lei, kae se a te mea e mafai o tauloto ne tatou mai i ei?

¹¹ Filifili faka‵lei ou taugasoa. A Vanessa, telā ne taku atu muamua, ne fatoā iloa aka ne ia me ne taofi aka ne tena taugasoa a ia mai te tavini atu ki a Ieova. Tela la, ne fakagata ne ia te lā va fakataugasoa. Kae ne uke atu ana mea ne fai. Ne galue malosi a ia o ‵sala a taugasoa ‵fou, i loto i te fakapotopotoga. Ne fai mai tou fafine me ne fesoasoani atu te fakaakoakoga a Noa mo tena kāiga. “Ne sikomia latou ne tino kolā e se a‵lofa ki a Ieova,” ne fai mai a ia, “kae ne maua eiloa ne latou a fesokotakiga ‵lei mai te suā tino ki te suā tino.” I tena otiga ne papatiso, ne paenia a Vanessa. Ne fai mai tou fafine: “Ne fesoasoani mai te mea tenei ke filifili ne au oku taugasoa i taku fakapotopotoga kae penā foki i nisi fakapotopotoga aka.” E mafai foki o maua ne koe ne taugasoa ‵lei māfai e aofia malosi koe i te galuega telā ne fakatonu atu a Ieova ke fai ne tatou.—Mata. 24:14.

12. Se a te vaegā mataku telā ne seki maua ne Atamu mo Eva kae se a te mea ne iku mai i ei?

¹² Ke maua se kilokiloga paleni ki te mataku. E isi se vaegā mataku telā e ‵lei mō tatou. E pelā me se fakaakoakoga, e ‵tau o maua ne tatou te mataku tonu telā ke sē fakafanoanoa ne tatou a Ieova. (Sala. 111:10) Moi ne ati aka ne Atamu mo Eva te vaegā mataku tenā, penei e se ‵teke lāua ki a Ieova. Kae ne ‵teke eiloa lāua. I te otiga ne ‵teke atu lāua, ne ‵pula lā mata kae ne iloa aka ei ne lāua me  i a lāua ko agasala. Ne togi atu fua ne lāua te agasala mo te mate ki lā tama‵liki. Ona ko te mea ko malamalama me ne seki faka‵logo lāua ki te fakatonuga a te Atua, ne ‵mā lāua ona ko te mea e ‵nofo fuafua, tenā ne ‵sala ei ki lau mo ‵pulu lāua.—Kene. 3:7, 21.

13-14. (a) E ‵tusa mo pati i te 1 Petelu 3:21, kaia e se ‵tau i ei o ma‵taku tatou i te mate? (e) Ne a pogai e ‵tau ei o a‵lofa tatou ki a Ieova?

¹³ Ona ko te mea e ‵tau o maua ne tatou te mataku tonu ki a Ieova, e se ‵tau o ma‵taku tatou i te mate. Ne fakatoka ne Ieova se auala ke toe maua ei ne tatou te ola se-gata-mai. Kafai e fai ne tatou se agasala kae sala‵mo tonu, ka fakamagalo ne Ieova ‵tou mea ‵se. Ka fakamagalo ne ia tatou ona ko ‵tou fakatuanaki ki te taulaga togiola a tena Tama. A te auala tāua ke fakaasi atu te fakatuanaki ko te tuku atu o ‵tou ola ki te Atua kae papatiso.—Faitau te 1 Petelu 3:21.

¹⁴ E uke a pogai e a‵lofa ei tatou ki a Ieova. E se gata fua i te tuku mai ne ia a mea ‵lei e maua ne tatou i aso takitasi kae e akoako foki ne ia tatou ki te munatonu e uiga ki a ia mo ana fuafuaga. (Ioa. 8:31, 32) Ne tuku mai ne ia te fakapotopotoga Kelisiano ke takitaki kae fesoasoani mai ki a tatou. E fesoasoani mai a ia o amo ‵tou amoga, kae tuku mai ne ia te fakamoemoega ke ola ki te se-gata-mai i tulaga ‵lei katoatoa i aso mai mua. (Sala. 68:19; Faka. 21:3, 4) Kafai e mafaufau ‵loto tatou ki te uke o mea ne fai ne Ieova ke fakaasi mai tena alofa mō tatou, ka a‵lofa foki tatou ki a ia. Kae kafai e a‵lofa tatou ki a Ieova, ko maua ne tatou se kilokiloga paleni e uiga ki te mataku. Ka ma‵taku tatou ma fakalogo‵mae a te Tino telā ne alofa malosi mai ki a tatou.

15. Ne manumalo pefea a Makayla i te mataku māfai e fai ne ia se mea ‵se?

¹⁵ A Makayla, telā ne taku atu muamua, ne manumalo i te mataku māfai e fai ne ia se mea ‵se i te taimi ne malamalama ei i te alofa fakamagalo o Ieova. “Ne iloa aka ne au me i a tatou katoa e se ‵lei katoatoa kae ka fai ne tatou a mea ‵se. Kae ne malamalama foki au me i a Ieova e alofa mai kae ka fakamagalo ne ia tatou e auala i te togiola.” Ne fai ne tena alofa ki a Ieova ke gasue a ia o tuku atu tena ola ki a ia kae papatiso.

16. Se a te fesoasoani ne maua ne Miles ke manumalo i te mataku i ‵tekemaiga?

¹⁶ A Miles telā ne mataku i te mea ma ‵teke atu tena mātua ki tena fakaikuga ke papatiso, ne ‵sala atu ki se fesoasoani mai te ovasia o te fenua. “Ne tupu aka foki a ia i se kāiga telā ne mavae‵vae i mea tau lotu,” ko pati a Miles. “Ne fesoasoani mai a ia ke mafaufau au ki aku pati ka fai ke fakatalitonu atu ki toku mātua me i a aku eiloa te fakaikuga ke papatiso kae e se ko toku tamana e faimalo ne ia au ke fai penā.” Ne seki fiafia te mātua o Miles i tena fakaikuga ne fai. Fakamuli ifo, ne ‵tau o fano kea‵tea a ia mai te fale o tena mātua, kae ne seki ‵fuli loa tena fakaikuga. “A te tauloto e uiga ki mea ‵lei ne fai ne Ieova ne otia i ei toku loto,” ne fai mai a ia. “I te taimi ne mafaufau ‵loto au ki te taulaga togiola a Iesu, ne iloa aka ne au te lasi o te alofa o Ieova ki a au. Ne fesoasoani mai te mafaufauga tenā  ke tuku atu toku ola ki a Ieova kae papatiso.”

17. Se a te avanoaga e maua ne tatou katoa?

¹⁷ I te taimi ne kai ei a Eva ki te fuaga mai te lakau i Etena, ne ‵teke atu a ia ki tena Tamana. I te taimi ne ‵lago atu a Atamu ki tou fafine, ne fakaasi atu ne ia te sē lava o te loto fakafetai mō mea ‵lei katoa ne fai ne Ieova mō ia. E maua ne tatou katoa te avanoaga ke fakaasi atu te sē ‵lago o tatou ki te fakaikuga ne fai ne Atamu mo Eva. Mai te papatiso, ko fakaasi atu ne tatou ki a Ieova me e tali‵tonu tatou me e maua ne ia te pule ke fakatoka ne ia a tulaga e uiga ki te mea ‵lei mo te mea ‵se. E fakamaoni atu ei ne tatou me e a‵lofa tatou ki te ‵tou Tamana kae tali‵tonu ki a ia.

18. E mafai pefea o manuia koe i te tavini atu ki a Ieova?

¹⁸ Mai tua o te papatisoga, e ‵tau o tumau tatou i te fai o te mea e manako ki ei a Ieova, kae sē ko ‵tou manakoga. E lau i miliona o tavini a te Atua e ola i te auala tenā. E mafai o fai koe pelā mo latou mai te tumau i te faka‵poko tou malamalama i te Muna a te Atua ko te Tusi Tapu: ‵kau fakatasi faeloa mo ou taina mo tuagane; kae ke loto finafinau o fakailoa atu ki tino a mea ne tauloto ne koe e uiga ki tou Tamana alofa. (Epe. 10:24, 25) Kafai e fai au fakaikuga, fakalogo ki pati fakatonutonu a Ieova kolā e tuku atu ne ia ki a koe e auala i tena Muna mo tena fakapotopotoga. (Isa. 30:21) Kae ka manuia eiloa au mea katoa e fai.—Faata. 16:3, 20.

19. Se a te mea e ‵tau o masaua faeloa ne koe kae kaia?

¹⁹ Kafai e tumau i te masaua ne koe a te lasi o te aoga o te takitakiga a Ieova, ka gasolo aka eiloa o lasi tou alofa ki a ia mo ana tulaga. Kae ka seai eiloa se mea e ofo mai ne Satani ka taofi ne ia koe mai te tavini atu ki a Ieova. Fakaataata aka ne koe a koe eiloa i se afe tausaga mai te taimi nei. Ka masaua faeloa ne koe a tau fakaikuga ne fai ke papatiso e pelā me ko te ‵toe fakaikuga ‵lei ne fai ne koe!