1. Eaha ta Adamu e Eva i ere no te faaotiraa ta raua i rave, e eaha te faahopearaa?

 I TO Adamu e Eva amuraa i to te raau e ite ai i te maitai e te ino, aita raua i tiaturi ia Iehova e i ta ˈna mau ture aveia. Faaoti aˈera raua eaha te mea maitai e te mea ino no raua. (Gen. 3:22) Eaha ta Adamu e Eva i ere no te faaotiraa ta raua i rave? To raua auhoaraa e o Iehova e te fanaˈoraa e ora e a muri noa ˈtu. E te faahopearaa, ua raea ta raua huaai i te hara e te pohe. (Roma 5:12) E mauiui rahi tei itehia i muri aˈe. I to oe manaˈo, o vai te tano ia haamau i te ture aveia no nia i te mea maitai e te mea ino?

2-3. (a) Eaha ta te tahi taata tiaraa teitei Etiopia i rave a poro ai Philipa ia ˈna? (b) Eaha te mau haamaitairaa e fanaˈohia ia bapetizo tatou, e eaha te mau uiraa e pahonohia?

² Aita te tahi taata tiaraa teitei Etiopia i faaoti mai ia Adamu e Eva, ua farii hoi oia i te poroi a Philipa. No to ˈna mauruuru i ta Iehova raua Iesu i rave, aita o ˈna i haamarirau i te bapetizo ia ˈna. (Ohi. 8:34-38) Mai tera taata Etiopia, e nehenehe atoa tatou e faaite i te mauruuru ia Iehova e ia Iesu ma te pûpû e te bapetizo ia tatou. E faaite te reira e te tiaturi ra tatou ia Iehova e o ˈNa anaˈe te tano ia haamau i te ture aveia no nia i te mea maitai e te mea ino.

³ A feruri na i te mau haamaitairaa ta tatou e fanaˈo ei tavini no Iehova. Maoti te faaroo ia Iesu Mesia, te faaore  ra Iehova i ta tatou mau hara a horoa atoa mai ai i te hoê manaˈo haava maitai. (Mat. 20:28; Ohi. 10:43) E riro atoa tatou ei tavini fariihia i roto i te utuafare o te Atua o te fanaˈo i te haamaitairaa a muri aˈe. (Ioa. 10:14-16; Roma 8:20, 21) E fanaˈo tatou i te mau maitai atoa ta Adamu raua Eva i ere e te ora mure ore. Noa ˈtu râ tera mau haamaitairaa rahi, te taiâ nei vetahi i te pee i te hiˈoraa o te taata Etiopia. Eaha te tapea ra ia ratou ia bapetizohia? Eaha te tauturu atu ia faaea i te mǎtaˈu?

4-5. Eaha te tupuraa ta Avery e Hannah i farerei?

⁴ Te taiâ. Ua paari Avery i roto i te hoê utuafare Ite no Iehova. E matahiapo to ˈna papa e mea aupuru maitai atoa i to ˈna utuafare. Tera râ, hoê mea te tapea ra ia Avery ia bapetizo. Te na ô ra oia: “I manaˈo na vau eita e maraa ia ˈu ia rave mai ia papa.” Ua taiâ atoa Avery i te amo i te mau hopoia e horoahia ˈtu mai te pureraa i mua i te taata, te horoaraa i te hoê oreroraa parau e te faatereraa i te putuputuraa no te pororaa.

⁵ Ua paari atoa Hannah, 18 matahiti, i roto i te hoê utuafare Ite no Iehova. No to ˈna taiâ rahi, i manaˈo na Hannah eita e maraa ia ˈna ia ora ia au i te mau ture aveia a Iehova. Eaha te tumu? I matau na oia i te haafaufaa ore ia ˈna iho. No te hepohepo, ua haamauiui roa Hannah ia ˈna. Te na ô ra oia: “Aita roa ˈtu vau i faaite aˈe to ˈu fifi i te taata e i to ˈu na metua. No ˈu eita o Iehova e farii ia ˈu ei tavini na ˈna.”

6. Eaha tei tapea ia Vanessa ia bapetizo ia ˈna?

⁶ Te amuimuiraa i te feia iino. Ua parau Vanessa, 22 matahiti: “Ua faahoa vau i te tahi tamahine e fatata ahuru matahiti mâua i te hoaraa.” Aita râ to Vanessa hoa i turu i ta ˈna faaotiraa e bapetizo ia ˈna. Ua peapea roa Vanessa, te na ô ra oia: “Aita ˈtu to ˈu e hoa, e ere atoa i te mea ohie ia imi i te hoa apî.”

7. Eaha ta Makayla i mǎtaˈu na, e eaha te tumu?

⁷ Te mǎtaˈu ia rave i te hara. I te paeraa o to Makayla matahiti, ua tiavaruhia to ˈna tuaane. A paari ai, ua taa ia ˈna ua mauiui to ˈna na metua i te hararaa to ˈna tuaane. Te na ô ra Makayla: “I mǎtaˈu na vau i te bapetizo, aˈunei au e hara atoa ˈi e e tiavaruhia ˈi. Rahi atu â ïa to ˈu na metua i te mauiui.”

8. Eaha ta Miles i mǎtaˈu na?

 ⁸ Te patoiraa a te fetii. E ere to Miles mama fanau i te Ite no Iehova, area te papa e ta ˈna vahine apî oia ïa. Te na ô ra Miles: “Ua ora vau 18 matahiti i to ˈu mama ra, ua mǎtaˈu roa vau i te faaite i to ˈu hinaaro e bapetizo ia ˈu. Ua ite hoi au i to ˈna huru i te taime a riro ai papa ei Ite no Iehova. E haafifi atoa paha ïa oia ia ˈu.”

9. Eaha te tupu ia haapii oe no nia i te faaoromai e te here o Iehova?

⁹ Aita Adamu e Eva i maiti i te tavini ia Iehova no te iti o to raua here ia ˈna. Ua vaiiho râ Iehova i te taime ia fanau raua i te tamarii e ia haapapu e metua maitai raua. Ua ite-oioi-hia ua hape raua i te faarueraa ia Iehova. Ua taparahi pohe ta raua tamaiti matahiapo i to ˈna teina, e ua rahi roa te ino e te mauiui tae roa mai i teie mahana. (Gen. 4:8; 6:11-13) Auaa râ, ua horoa mai Iehova te hoê ravea no te faaora i te feia atoa e tavini ia ˈna. (Ioa. 6:38-40, 57, 58) Rahi atu â oe i te haapii no nia i te faaoromai e te here o Iehova, rahi atu â to oe here ia ˈna i te puai mai. Eita ïa oe e pee i te hiˈoraa o Adamu raua Eva, e pûpû râ oe ia oe ia Iehova.

10. E nafea te Salamo 19:7 e tauturu ai ia oe ia tavini ia Iehova?

¹⁰ A tamau i te haapii no nia ia Iehova. E tauturu hoi te reira ia faaea i te taiâ i te tavini ia ˈNa. Ta Avery ïa tei faahitihia i te omuaraa i rave. Te na ô ra oia: “Ua iti roa mai to ˈu taiâ a taio e a feruri maite ai i te Salamo 19:7.” (A taio.) I to Avery iteraa mea nafea Iehova i te haaraa mai tei parauhia i roto i tera irava, ua rahi roa mai to ˈna here i te Atua. Te na ô atoa ra Hannah: “Maoti ta ˈu iho taioraa e haapiiraa Bibilia, ua taa ia ˈu e mauiui Iehova ia haamauiui au ia ˈu.” (Pet. 1, 5:7) I muri iho, ua faaohipa Hannah i ta ˈna i haapii. (Iak. 1:22) Eaha te faahopearaa? Te na ô ra oia: “Ua ite au i te maitai ia faaroo ia Iehova  e ua here roa ˈtu â vau ia ˈna. I teie nei ua papu ia ˈu ia hinaaro vau i te tauturu, e horoa mai iho â Iehova te aratairaa.” Ua faaea roa Hannah i te haamauiui ia ˈna, ua pûpû i to ˈna ora ia Iehova e bapetizohia ˈtura. Eita ïa te here e tauturu noa mai ia faaea i te taiâ, e faaitoito atoa mai râ ia tiatonu i nia ia Iehova e i to ˈna hinaaro.

11. Eaha ta Vanessa i rave no te imi i te hoa papu e eaha te haapii mai i to ˈna hiˈoraa?

¹¹ A maiti i te hoa ma te paari. Ua taa ia Vanessa tei faahiti-atoa-hia i te omuaraa te tapea ra to ˈna hoa ia ˈna ia tavini ia Iehova. Faaea ˈtura Vanessa i te faahoa i tera tamahine e ua tutava i te imi i te hoa apî i roto i te amuiraa. Ua feruri oia i te hiˈoraa o te utuafare o Noa. Te na ô ra Vanessa: “Ua haaatihia ratou e te feia o tei ore i here ia Iehova, mea piri râ ratou te tahi i te tahi.” Ua riro Vanessa ei pionie i muri aˈe i to ˈna bapetizoraa. Te na ô ra oia: “Ua tauturu mai tera taviniraa ia ite mai i te hoa papu i roto i ta ˈu amuiraa e i te tahi atu mau amuiraa.” E nehenehe atoa oe e ite i te hoa papu ia rahi ta oe ohipa i roto i te taviniraa a Iehova.—Mat. 24:14.

12. Eaha te mǎtaˈu ta Adamu raua Eva i ore i faatupu e eaha te faahopearaa?

¹² A faatupu i te mǎtaˈu o te tuati i te manaˈo o Iehova. E titauhia ia faatupu i te mǎtaˈu o te tapea ia tatou ia rave i ta Iehova e ore e au. (Sal. 111:10) Ahani Adamu raua Eva i faatupu i tera huru mǎtaˈu, eita ïa raua e orure hau ia Iehova. Aita râ, ua faaroo ore raua e “araara aˈera to raua mata,” taa ˈtura hoi ia Adamu e Eva ua hara raua. Ta raua noa e nehenehe e horoa i ta raua tamarii, o te hara e te pohe ïa. Ua taa atoa ia Adamu e Eva ua ofati raua i te ture a te Atua, haamâ aˈera i to raua vai tahaa-noa-raa e tapoi atura i to raua tino.—Gen. 3:7, 21.

13-14. (a) Ia au i te Petero 1, 3:21, no te aha eiaha tatou ia mǎtaˈu i te pohe? (b) Eaha te tumu tatou e here ai ia Iehova?

¹³ O Iehova te titauhia ia mǎtaˈu,  eiaha râ te pohe. Ua horoa mai Iehova i te hoê ravea no te fanaˈo faahou i te ora mure ore. Ua tatarahapa mau anaˈe tatou, e faaore mai Iehova i ta tatou hara maoti to tatou faaroo i te hoo. E nafea ia faaite i to tatou faaroo? Hoê ravea maitai roa, o te pûpûraa ïa i to tatou ora i te Atua e te bapetizoraa ia tatou.—A taio i te Petero 1, 3:21.

¹⁴ I te mau mahana atoa, te haamaitai rahi ra Iehova ia tatou e te haapii atoa mai ra i te parau mau no nia ia ˈna e ta ˈna opuaraa. (Ioa. 8:31, 32) Ua horoa atoa mai i te amuiraa Kerisetiano no te aratai e no te turu ia tatou. Te tauturu ra Iehova ia tatou ia faaoromai tamau e te horoa mai ra i te tiaturiraa e ora e a muri noa ˈtu i roto i te paradaiso. (Sal. 68:19; Apo. 21:3, 4) E rave rahi ïa tumu e here ai tatou ia Iehova. A feruri maite ai i te mau mea atoa ta ˈna i rave, eita anei tatou e here ia ˈna? Mai te peu ua here tatou ia Iehova, e faatupu tatou i te mǎtaˈu o te tuati ra i to ˈna manaˈo, oia hoi te oreraa e faaoto i to ˈna aau.

15. Mea nafea Makayla i te faaearaa i te mǎtaˈu ia rave i te hara?

¹⁵ Ua faaea Makayla i te mǎtaˈu ia rave i te hara. Eaha te tumu? Te na ô ra oia: “Ua taa ia ˈu e taata tia ore e te hara atoa tatou. Ua taa atoa ia ˈu mea here na Iehova ia tatou e ua ineine oia i te faaore i ta tatou hara maoti te hoo.” Na to ˈna here ia Iehova i turai ia Makayla ia pûpû ia ˈna e ia bapetizo atoa.

16. Eaha tei tauturu ia Miles ia faaea i te mǎtaˈu i te patoiraa a to ˈna mama?

¹⁶ I mǎtaˈu na Miles ia patoi to ˈna mama i ta ˈna faaotiraa ia bapetizo. Imi atura oia i te tauturu a te tahi tiaau haaati tei farerei i te hoê â tupuraa. Te na ô ra Miles: “Ua paari atoa taeae i roto i te hoê utuafare mai to ˈu, ua tauturu mai oia ia maiti maitai i ta ˈu mau parau no te faataa ia mama na ˈu iho i faaoti e bapetizo ia ˈu, e ere râ na papa.” Aita roa ˈtu te mama i mauruuru i te faaotiraa a Miles. Ua titauhia ia faarue oia i te fare o to ˈna mama, aita râ te reira i tapea ia Miles ia bapetizo. Te na ô ra oia: “Ua putapû roa vau i te mau mea atoa ta Iehova i rave no ˈu. Ua feruri maite au i te tusia taraehara o Iesu e ua taa ˈtura i to Iehova here rahi ia ˈu. Faaoti aˈera vau i te pûpû ia ˈu ia Iehova e bapetizo atura.”

17. Eaha te faaotiraa ta tatou tataitahi e nehenehe e rave?

¹⁷ I to Eva ofatiraa i te faaueraa a te Atua i roto i te ô i Edene, ua faarue oia i to ˈna ra Metua. A pee ai Adamu ia Eva, ua faaite papu oia i to ˈna mauruuru ore i te mau maitai atoa ta Iehova i  horoa ˈtu. E nehenehe tatou tataitahi e faaite ua hape ta raua faaotiraa. E nafea? Ma te bapetizo ia tatou. E faaite hoi te reira ua papu ia tatou tei ia Iehova anaˈe te tiaraa ia haamau i te ture aveia no nia i te mea maitai e te mea ino. E haapapu atoa tatou te here e te tiaturi mau ra tatou i to tatou Metua ra o Iehova.

18. E nafea ia tapea i ta oe euhe ia tavini ia Iehova?

¹⁸ I muri aˈe i te bapetizoraa, e titauhia ia tatou ia tamau i te rave i to Iehova hinaaro, eiaha râ i to tatou. I te mau matahiti atoa, e mirioni tavini o Iehova te na reira nei. E nafea atoa ia tapea i ta oe euhe ia tavini ia Iehova? A tamau i te haapii atu â i te Bibilia, i te amuimui i te mau taeae e tuahine e i te faaite ma te itoito i ta oe i haapii no nia i to oe Metua î i te here o Iehova. (Heb. 10:24, 25) I mua i te hoê faaotiraa, a haapao i te mau aratairaa ta Iehova e horoa mai ra maoti ta ˈna Parau e ta ˈna faanahonahoraa. (Isa. 30:21) I reira ïa e tupu ai ta oe i opua ra!—Mas. 16:3, 20.

19. Eaha te titauhia ia oe ia tamau i te rave e no te aha?

¹⁹ A tamau noa ˈi i te mauruuru i ta Iehova aratairaa, e rahi atu â to oe here ia ˈna e to oe hinaaro i ta ˈna mau ture aveia. Noa ˈtu eaha ta Satani e pûpû atu, eita roa oe e faaea i te tavini ia Iehova! A feruri na ia oe tausani matahiti i muri aˈe, eita roa oe e tatarahapa i te faaotiraa maitai roa ˈˈe ta oe i rave, maori râ te bapetizoraa!