1. Мае ыштӥзы Адам но Ева но кытчы со вуттӥз?

 КИН, тӥ малпамъя, ужпум кутыны кулэ, мар ӟечез, нош мар уродэз луэ? Куке Адам но Ева ӟечез но уродэз тодон писпуысь емышез сиизы, соос валамон возьматӥзы, Иеговалы уг оско но лыдэ уг басьто шуыса сое, мае со ӟечен, нош мае уродэн лыдъя. Соослэн асьсэлэн быръемзы потӥз, мар ӟечез, нош мар уродэз луэ (Ул.-выл. 3:22). Но ойдолэ малпаськомы, кытчы со вуттӥз. Соос Инмарен эшъяськемысь дугдӥзы но пырак улыны луонлыксэс ыштӥзы. Со сяна, Адам но Ева нылпиоссылы сьӧлык но кулон кельтӥзы (Рим. 5:12). Соослэн кутэм ужпумзы вӧсь луон но шуг-секытъёс вайиз.

2, 3. а) Мар кариз Эфиопияысь евнух, кудӥзлы Филипп тодытӥз? б) Кыӵе бакель каронъёс ми басьтӥськомы, куке пылатӥськиськомы? Кыӵе юанъёсты ми эскеромы?

² Нош табере малпаськомы Эфиопияысь евнух сярысь, кудӥзлы тодытӥз Филипп. Со туж тау кариз со понна, мар лэсьтӥзы солы Иегова но Иисус, но соку ик пылатӥськиз (Ап. уж. 8:34—38). Мае ми возьматӥськомы, куке Иеговалы улонмес сӥзиськомы но пылатӥськиськомы? Ми Иеговалы но Иисуслы тау кареммес возьматӥськомы со понна, мар соос милемлы лэсьтӥзы. Озьы ик ми возьматӥськомы: Иеговалы оскиськомы но лыдэ басьтӥськомы, солэн ӟечез но уродэз сярысь эсэпъёсты пуктыны правоез вань шуыса.

³ Ойдолэ малпаськомы со сярысь, кыӵе бакель каронъёс ми басьтӥськомы, куке Иеговалы ужаны-тыршыны кутскиськомы. Со кыл сётэ берыктыны милемлы ваньзэ, мае  ыштӥзы Адам но Ева, озьы ик пырак улыны луонлыкез но. Иисус Христослы осконмылы луыса Иегова милесьтым янгышъёсмес простить каре но чылкыт возьытлык сётэ (Матф. 20:28; Ап. уж. 10:43). Со сяна, ми Иеговалэн ужась-тыршисьёсызлэн семьязы пӧлы пыриськомы (Иоанн 10:14—16; Рим. 8:20, 21). Иеговалы ужан-тыршон пайда вае ке но, куд-огъёсыз, кинъёс Иеговаез тодӥзы, уг дӥсьто Эфиопияысь евнухлэсь адӟем карыны. Мар соослы люкетэ? Но кызьы со шуг-секытъёс пыр потоно?

4, 5. Кыӵе шуг-секытъёсын пумиськизы Эйвери но Ханна?

⁴ Аслыд ачид оскытэк улон. Эйвери нимо пияш будӥз Иеговалэн Адӟись-Ивортӥсьёсызлэн семьяязы. Солэсь яратӥсь атайзэ тодо туж умой тӧроез кадь. Озьы ке но Эйвери пылатӥськыны ӧз дырты. Малы? Тани мар со вера: «Мон малпай, атае кадь луыны уг быгаты шуыса». Со сяна, Эйвери ӧз оскы, быдэстыны быгатоз шуыса ужъёсты, кудъёссэ солы куке но сётыны быгатозы. Со вера: «Мон сюлмаськи, монэ вӧсяськыны, речь вераны яке тодытон ужлы сӥзем пумиськонэз ортчытыны курозы шуыса».

⁵ Ханна, кудӥзлы 18 арес, аслыз ачиз чик уг оскы вал. Солэн анай-атаез Иеговалэн Адӟись-Ивортӥсьёсыз ке но, со уг оскы вал, Инмарлэн куронъёсызъя улыны быгатоз шуыса. Малы? Ханна ачиз сярысь умойтэм малпа вал. Куддыръя со ассэ туж урод шӧдылӥз но валаса вылысь ассэ вӧсь карылӥз, но солы уродгес гинэ луэ вал. Со вера: «Мон со сярысь нокинлы но ӧй вералля, анай-атаелы но. Но мон малпай, Иеговалы сыӵе ужась-тыршись кулэ ӧвӧл шуыса».

6. Мар люкетӥз Ванессалы пылатӥськыны?

⁶ Эшъёсмылэн ми вылын шӧдӥськемзы. Ванесса, кудӥзлы 22 арес, вера: «Мынам вал матысь эше, кудӥныз ми 10 ар пала эшъяськимы». Ванессалэн пылатӥськемез потэ вал, нош солэн эшез кутэм ужпуменыз соглаш ӧй вал. Ванессалы соин сэрен туж вӧсь вал. Со вера: «Мыным адямиосын тодматскыны секыт, но мон сюлмаськи, соин эшъяськемысь дугдыса, ноку но сыӵе эш уг шедьты ини шуыса».

7. Малэсь кышка вал Макейла но малы?

⁷ Янгыш лэсьтыны кышкан. Макейла нимо нылашлы вить арес вал, куке солэсь агайзэ кенешысь поттӥзы. Будэмъяз со адӟиз, макем вӧсь каре анай-атаезлы агаезлэн ассэ воземез. Макейла вера: «Мон кышкай, мон пылатӥськи ке но собере янгышай ке, монэ кенешысь поттозы но анай-атаелы эшшо но вӧсь луоз шуыса».

8. Малэсь кышка вал Майлз?

 ⁸ Пумитъяськонлэсь кышкан. Майлз нимо пияшлэн атаез но сюранаез — Иеговалэн Адӟись-Ивортӥсьёсыз, нош анаез ӧвӧл. Со вера: «Мон анаеным 18 ар улӥ но кышкай солы вераны, пылатӥськеме потэ шуыса. Мон тодӥсько на, кызьы анае ассэ возиз, куке атае Адӟись-Ивортӥсь луыны ужпум кутӥз, но кышкай, со мыным пумитъяськыны кутскоз шуыса».

9. Кызьы тӥ вылын шӧдӥськоз, дыр, Иеговалэн яратонэз но чиданэз сярысь тросгес тодэмды?

⁹ Адам но Ева Иеговаез кельтӥзы, малы ке шуоно соослэн солы юн яратонзы ӧй вал. Озьы ке но Иегова соослы кӧня ке дыр ӵоже улыны лэзиз, соослэн нылпиоссы мед вордӥськозы шуыса, но соослы эрик сётӥз нылпиоссэс ас тодэмзыя будэтыны. Ӝоген тодмо луиз, макем шонертэм вал, куке Адам но Ева Инмартэк улыны ужпум кутӥзы. Соослэн бадӟым пизы вииз вынзэ, кудӥзлэн нокыӵе янгышез ӧй вал, но, дыр ортчыса, адямиос эшшо но асьсэды гинэ яратӥсесь но лекесь луизы (Ул.-выл. 4:8; 6:11—13). Нош Иегова Адамлэн но Евалэн вань нылпиоссылы, кудъёсызлэн солы ужамзы-тыршемзы потоз, утиськыны луонлык сётӥз (Иоанн 6:38—40, 57, 58). Куке тӥ тросгес тододы со сярысь, кызьы Иегова яратонзэ но чиданзэ возьматэ, соку тӥ сое эшшо но юнгес яратоды, дыр. Тӥляд мылкыдды луоз Адамен но Еваен быръем сюресэз кельтыны но улондэс Иеговалы сӥзьыны.

10. Кызьы Псалтирьысь 18:8 кылъёс вылын малпаськон юрттоз тӥледлы ужпум кутыны Иеговалы ужаны-тыршыны?

¹⁰ Азьланяз но Иегова сярысь тодон-валан басьтэ. Макем умойгес тӥ тододы Иеговаез, сокем юнгес тӥ оскоды, солы ужаны-тыршыны быгатоды шуыса. Эйвери, кудӥз сярысь гожтэмын вал ини, вера: «Мынам аслым осконэ будӥз, куке мон малпаськи Псалтирьын 18:8 гожтэм кылъёс вылын». (Лыдӟе.) Эйвери ас вылаз шӧдӥз, Иегова сётэм кылъёссэ быдэстэ шуыса, но со Инмарез эшшо но юнгес яратыны кутскиз. Иеговаез яратон аслыд осконэз  будэтэ, озьы ик со малпаны юрттэ нырысь ик Инмар сярысь но со сярысь, кызьы солэсь эриксэ быдэсъяно. Нош мар вераны луоз Ханна сярысь? Со вера: «Библиез лыдӟыса но ас поннам эскеронэз ортчытыса, мон валай, куке мон аслым вӧсь карисько, мон Иеговалы но вӧсь карисько шуыса» (1 Пётр 5:7). Ханна улоназ пыртыны кутскиз сое, мае Инмарлэн Кылысьтыз тодӥз (Иак. 1:22). Кытчы со вуттӥз? Ханна вера: «Куке мон лэсьтӥ сое, мае Иегова мынэсьтым возьма, мон адӟи, кыӵе пайда со мыным вае, но мон Инмарез юнгес яратыны кутски. Табере мон тодӥсько: мыным юрттэт кулэ луиз ке, Иегова монэ шонер сюрестӥ нуоз». Ханна ассэ вӧсь карон сямлэсь куштӥськыны быгатӥз. Со улонзэ Иеговалы сӥзиз но пылатӥськиз.

11. Кызьы Ванесса умой эшъёс шедьтӥз но малы со милемыз дышетэ?

¹¹ Эшъёсты шонер быръе. Ванесса, кудӥз сярысь вылӥынгес гожтэмын вал, дыр ортчыса, валаз, эшеныз матысь кусып возён солы улонзэ Иеговалы сӥзьыны люкетэ шуыса. Соин ик со соин эшъяськемысь дугдӥз но кенешысь эшъёс шедьтыны тыршиз. Солэн верамезъя, солы Нойлэн но солэн семьяезлэн примерзы юрттӥз. «Соос улӥзы адямиос пӧлын, кудъёсыз Иеговаез ӧз яратэ,— вера Ванесса,— озьы ке но соос ог-огенызы матысь кусыпъёс возизы». Пылатӥськем бераз Ванесса пионер луыса ужаны-тыршыны кутскиз. Но тани мар со табере вера: «Озьы мон туж умой эшъёс шедьтыны быгатӥ аслам кенешысьтым но, мукет кенешъёсысь но». Тӥляд но умой эшъёсты луозы, Иеговалэн сётэм ужаз лэсьтӥды ке ваньзэ, мае быгатӥськоды (Матф. 24:14).

12. Кыӵе кышканзы ӧй вал Адамлэн но Евалэн но кытчы со вуттӥз?

¹² Сюлмады Инмарлэсь кышкан мед луоз. Куддыръя кышкан пайда вае. Кылсярысь, милемлы Иеговаез ӝоже уськытыны кышкано (Пс. 110:10). Адам но Ева сюлмазы сыӵе кышканэз будэтысалзы ке, соос Иеговалэсь ноку но ӧз палэнскысалзы. Куке соос Инмарлы пумит султӥзы, соослэн синъёссы усьтӥськизы, но соос валазы, сьӧлыкоесь луизы шуыса. Табере соос  нылпиоссылы сьӧлык но кулон гинэ кельтыны быгатӥзы. Тае валаса, Адам но Ева гольык луэмзылэсь возьдаськыны кутскизы но кус котырзэс шобыртӥзы (Ул.-выл. 3:7, 21).

13, 14. а) Малы милемлы кулонлэсь укыр зол кышкано ӧвӧл, кызьы со адӟиське 1 Пётрлэн 3:21? б) Кыӵе милям мугъёсмы вань Иеговаез яратыны?

¹³ Одӥг ласянь милемлы Иеговаез ӝоже уськытыны кышкано, нош мукет ласянь милемлы кулонлэсь укыр зол кышкано ӧвӧл. Иегова сюлмаськиз, ми пырак улыны мед быгатомы шуыса. Ми сьӧлыкамы ке но сюлмысь ӧпкелимы ке, Иегова милемыз простить кароз Иисуслэн мозмытӥсь курбонэзлы оскеммылы луыса. Нош со оскон адӟиськоз, кылсярысь, куке ми улонмес Инмарлы сӥзиськомы но пылатӥськиськомы. (Лыдӟе 1 Пётрлэсь 3:21 b.)

¹⁴ Иеговаез яратыны милям трос мугъёсмы вань. Котькуд нунал со сётэ милемлы сое, мар милемыз шумпоттэ. Со милемлы ачиз сярысь но малпанъёсыз сярысь зэмлыкез усьтэ (Иоанн 8:31, 32). Со милемлы кивалтэт сётэ но милемыз христиан кенеш пыр дышетэ. Со юрттэ милемлы шуг-секытъёс пыр потыны, озьы ик со туж умой оскон сётэ — райын пырак улыны (Пс. 67:20; Усьт. 21:3, 4). Куке ми малпаськиськомы со сярысь, макем трос Иегова ми понна лэсьтӥз ини, милям но сое яратонмы юнма. Нош Иеговаез яратон сюлмамы кышкан будэтыны юрттэ — кышкан вӧсь карыны сое, кинэ ми юн яратӥськомы.

15. Кызьы Макейла янгыш лэсьтыны кышканзэ вормиз?

¹⁵ Макейла, кудӥз сярысь верамын вал ини, янгыш лэсьтыны кышканзэ вормиз, куке валаз, Иегова сое яратыса простить каре шуыса. Со вера: «Мон валай, ми ваньмы тырбыдэстэмесь но янгышъёс лэсьтыломы шуыса. Нош озьы ик мон валай, Иегова милемыз яратэ но дун сётонлы луыса простить каре шуыса». Иеговаез яратон Макейлалэсь мылкыдзэ ӝутӥз улонзэ Инмарлы сӥзьыны но пылатӥськыны.

16. Кызьы Майлз кышканзэ вормыны быгатӥз?

¹⁶ Майлз, кудӥз кышказ, анаез пылатӥськыны ужпум кутэмезлы пумит луоз шуыса, ёросэз чакласьлэсь юрттэт куриз. «Со но будӥз семьяын, кудаз атаез гинэ Иеговалы ужаз-тыршиз,— вера Майлз.— Со мыным малпаны юрттӥз, кызьы анайме оскытоно, пылатӥськыны мон ачим ужпум кутӥ шуыса, нош атае косэмен ӧй». Майлзлэн анаез та шоры умоен ӧз учкы. Солы анаез дорысь кошконо луиз, нош пылатӥськыны мылкыдыз солэн ӧз ышы. Со вера: «Мон валай, макем трос умойзэ мыным Иегова лэсьтӥз. Со мынам сюлмам ик пыриз. Иисуслэн мозмытӥсь курбонэз вылын малпаськыса, мон адӟи, макем юн яратэ монэ Иегова. Со мынэсьтым мылкыдме ӝутӥз улонме Иеговалы сӥзьыны но пылатӥськыны».

17. Кыӵе луонлыкмы милям ваньмылэн вань?

¹⁷ Ӟечез но уродэз тодон писпуысь емышез сиыса, Ева Атаезлэсь палэнскиз. Нош Адам, кышноез пала кариськыса, туж тау карисьтэм луэмзэ возьматӥз Иеговалы, кудӥз солы сомында ӟечсэ лэсьтӥз. Милям ваньмылэн возьматэммы потэ, соос кадесь луэммы уг поты шуыса. Пылатӥськыса, ми соглаш луиськомы, Иеговалэн эсэпъёс пуктыны правоез вань шуыса, мар ӟечез, нош мар уродэз луэ. Ми возьматӥськомы, Атаймес яратӥськомы но солы оскиськомы шуыса.

18. Ку Иеговалы ужан-тыршон туж умой емышъёс ваёз?

¹⁸ Пылатӥськеммы бере милемлы котькуд нунал Иеговалэн эсэпъёсызъя улыны тыршоно, нош асьмелэн эсэпъёсмыя ӧвӧл. Озьы лэсьто Инмарлэн трос миллион ужась-тыршисьёсыз. Тӥ но озьы улыны быгатоды, азьланяз но Библиысь тодон-валан басьтӥды ке, вын-агайёсын но сузэр-апайёсын ялан кусып возиды ке но вань сюлмысьтыды мукетъёсызлы верады ке со сярысь, мае тодӥды яратӥсь инмысь Атай сярысь (Евр. 10:24, 25). Ужпум кутыкуды, лыдэ басьтэ визь-кенешъёсты, кудъёссэ Иегова сётэ тӥледлы Библия пыр но организациез пыр (Ис. 30:21). Со туж умой емышъёс ваёз (Мад. 16:3, 20).

19. Мар сярысь милемлы котьку тодамы возёно но малы?

¹⁹ Тӥ валаськоды ке, кӧня бакель каронъёс Иеговалэн визь-кенешъёсыз тӥледлы ваё, соку тӥ Инмарез но солэсь эсэпъёссэ эшшо но юнгес яратоды. Соку Шайтан уз быгаты тӥледыз Иеговалы ужан-тыршонлэсь палэнтыны. Пуктэ асьтэдыз син азяды, сюрс ар ортчыса. Куке тӥ тодады ваёды пылатӥськыны кутэм ужпумдэс, тӥ одно ик вералоды: «Со тужгес но умой кутэм ужпум мынам улонам!»