1. Die yen Adam vẹ Ivi ku kufia, kẹ die yen nẹ obuko rọyen rhe?

ONO yen vwo uturhi ro vwo brorhiẹn rẹ obo ri yovwirin vẹ obo re brare? Adam vẹ Ivi vwọ re omamọ rẹ urhe rẹ erianriẹn rẹ erhuvwu vẹ umiovwo na, ayen de djephia nẹ ayen vwẹroso Jihova vẹ iwan rọye-en. Ayen da vwẹ iwan romobọ rayen vwo mu, kpahen obo ri yovwirin vẹ obo re brare. (Jẹn. 3:22) Ẹkẹvuọvo, roro kpahen obo re va ayen abọ. Ayen ku oyerinkugbe rayen vẹ Jihova kufia, kugbe uphẹn rẹ arhọ rẹ bẹdẹ. Emọ rayen da riuku rẹ umwemwu vẹ ughwu. (Rom 5:12) Orhiẹn rẹ Adam vẹ Ivi na ghwa ojaẹriọ rhe.

2-3. (a) Die yen ọshare rẹ Ẹtiopia na ruru ọke rẹ Filip vwo ghwoghwo ota kẹ? (b) Ebruphiyọ vọ yen che te avwanre obọ siẹrẹ e de bromaphiyame, kẹ enọ vọ yen avwanre cha kpahenphiyọ?

² Roro kpahen oborẹ uruemu rẹ ọshare rẹ Ẹtiopia rẹ Filip ghwoghwo ota kẹ na fẹnẹ ọ rẹ Adam vẹ Ivi. Fikirẹ ọdavwaro rẹ ọshare na vwo kpahen oborẹ Jihova vẹ Jesu ru kẹ, o de brokpakpa bromaphiyame. (Iruo 8:34-38) Kerẹ ọshare rẹ Ẹtiopia na, ọke rẹ avwanre vwọ vwomakpahotọ kẹ Jihova ji bromaphiyame, avwanre de djephia nẹ avwanre vwo ọdavwaro kpahen oborẹ Jihova vẹ Jesu ru kẹ avwanre. Avwanre ji djephia nẹ avwanre vwẹroso Jihova, je mrẹvughe nẹ ọyen fo ohwo ro brorhiẹn rẹ obo ri yovwirin vẹ obo re brare.

³ Roro kpahen ebruphiyọ ri te avwanre obọ kidie nẹ avwanre ga Jihova! Ọvo usun rayen yen iphiẹrophiyọ nẹ avwanre che vwo erọnvwọn eje rẹ Adam vẹ Ivi ku kufia, ji te arhọ rẹ bẹdẹ. Fikirẹ esegbuyota rẹ avwanre vwo kpahen  Jesu, Jihova kọ vwẹ imwemwu rẹ avwanre vwo ghovwo avwanre, je kẹ avwanre ẹwẹn obrorhiẹn rọ fonro. (Mat. 20:28; Iruo 10:43) Avwanre da je rhe dia ẹbẹre ọvo rẹ orua rẹ idibo rẹ Jihova re rhẹro rẹ omamọ rẹ akpọ vwẹ obaro na. (Jọn 10:14-16; Rom 8:20, 21) Dede nẹ avwanre vwo ebruphiyọ nana eje, ihwo evo re riẹn Jihova nure ji siomauko rẹ ayen vwo nene udje rẹ ọshare rẹ Ẹtiopia na. Die yen djẹ ayen omaebrophiyame? Mavọ yen ayen se vwo phi egbabọse yena kparobọ?

4-5. Egbabọse vọ yen eghene ọshare Avery vẹ eghene aye Hannah hirharoku?

⁴ Oshọ. Ọsẹ vẹ oni rẹ Avery Iseri rẹ Jihova. Ọsẹ rọyen uvi rẹ ọgbuyovwin rẹ orua kugbe ọkpako ukoko. Dedena, Avery siomauko vwọ kẹ omaebrophiyame. Diesorọ? Ọ da ta: “Mi niro nẹ me cha sa dia kerẹ ọsẹ mẹ-ẹ.” Oshọ ji muo nẹ o che se mu eghwa sansan ra cha vwọ kẹ vwẹ obaro obọ-ọ. “Mi ro ẹnwan rẹ oborẹ me sa vwọ nẹrhovwo vwẹ azagba, ta ota rotu, yẹrẹ sun iniọvo na kpo aghwoghwo.”

⁵ Oshọ ji mu Hannah rọhẹ ẹgbukpe 18. Dede nẹ ọsẹ vẹ oni rọyen hẹ evunrẹ ukoko na, jẹ o niro nẹ ọ cha sa yanmu iwan rẹ Jihova-a. Diesorọ? Hannah ni oma rọyen kueku. Ọke evo, ẹwẹn rọyen da yanghan, ọyen ọvo kọ so omaẹwan kẹ oma rọyen. Ọyena nẹrhẹ ẹdia na rhoma braphiyọ. Ọ da ta: “Mi vuẹ ọsẹ vẹ oni mẹ yẹrẹ ohwo ọfa kpahen obo ri mi ruẹ na-a, mi ji roro nẹ Jihova vwo ẹguọnọ mẹ-ẹ.”

6. Die yen nẹrhẹ Vanessa siomauko vwọ kẹ omaebrophiyame?

⁶ Igbeyan. Vanessa rọhẹ ẹgbukpe 22 da ta: “O vwo ọmọtẹ ọvo re me vẹ ọyen dia ugbeyan vwẹ uvwre rẹ ẹgbukpe ihwe.” Ẹkẹvuọvo, ugbeyan rọyen na sa vwẹ ukẹcha kẹ vwo bromaphiyame-e. Ọnana da Vanessa mamọ, ọ da ta: “Mi fobọ vwo ugbeya-an, ọtiọyena, oshọ ko mu vwẹ nẹ me da yanjẹ ugbeyan mẹ na vwo, mi rhe che vwo ọfa-a.”

7. Oshọ rẹ die yen mu eghene aye ọvo re se Makayla, kẹ diesorọ?

⁷ Oshọ rẹ oruchọ. Makayla hẹ ẹgbukpe iyorin ọke ra vwọ djẹ oniọvo rọyen nẹ ukoko. Rọ vwọ rhua cha na, ọ da rhe mrẹ oborẹ uruemu rẹ oniọvo rọyen na miavwe ọsẹ vẹ oni rayen oma te. Makayla da ta: “Oshọ ko mu vwe nẹ mi de bromaphiyame, mi che ru oruchọ, a me rhe djẹ vwẹ nẹ ukoko, ọyena cha nẹrhẹ omaemuophiyọ rẹ ọsẹ vẹ oni mẹ gan vrẹ obo ri jovwo.”

8. Oshọ vọ yen mu eghene ọshare ọvo re se Miles?

⁸ Oshọ rẹ ẹvwọsuọ. Ọsẹ rẹ Miles vẹ  aye rọyen ga Jihova, ẹkẹvuọvo oni rọyen hẹ evunrẹ ukoko na-a. Miles da ta: “Ẹgbukpe 18 yen mẹ vẹ oni mẹ diare, ẹkẹvuọvo oshọ jẹ uvwe sa vuẹ nẹ mi che bromaphiyame-e. Me riẹn oborẹ ivun miovwiro te, ọke rẹ ọsẹ mẹ vwọ mrẹ ukoko na vughe. Oshọ ko mu vwe nẹ ọ cha so ota kẹ vwẹ.”

9. Die yen cha phia siẹrẹ wo de yono kpahen ẹguọnọ vẹ odirin rẹ Jihova kodophiyọ?

⁹ Adam vẹ Ivi rhọnvwe ga Jihova-a, kidie ayen vwo uvi rẹ ẹguọnọ kpahọ-ọn. Dedena, Jihova kẹ ayen uphẹn rẹ ayen vwọ dia te ọke rẹ ayen vwo vwiẹ emọ, ji brorhiẹn rẹ iwan rẹ ayen che vwo yono emọ rayen. Ẹkẹvuọvọ, obo ri nẹ obuko rẹ jẹ ẹmienyo rayen rhe da nẹrhẹ a riẹn oborẹ ojẹ rayen na dia emu rẹ ẹkpa te. Ọmọkpako rayen de hwe oniọvo rọyen. Ọke vwọ yanran na, akpọ na da rhe vọn vẹ ihwo ri gbe ozighi kugbe otu ri nenesi rẹ ojevwe romobọ rayen. (Jẹn. 4:8; 6:11-13) Dedena, Jihova riẹn obo rọ cha wan sivwin emọ rẹ Adam vẹ Ivi re guọnọ vwẹ ẹga kẹ. (Jọn 6:38-40, 57, 58) Wọ da fuẹrẹn odirin vẹ ẹguọnọ rẹ Jihova kodophiyọ, ẹguọnọ ru wo vwo kpahọn kọ cha ganphiyọ. Ọyena kọ cha nẹrhẹ wọ sen oka rẹ ojẹ rẹ Adam vẹ Ivi jẹre, wọ me je vwomakpahotọ kẹ Jihova.

10. Diesorọ eroro kpahọn rẹ Une Rẹ Ejiro 19:7 sa vwọ chọn avwanre uko vwọ ga Jihova?

¹⁰ Yono kpahen Jihova kpobarophiyọ. Wọ da vwẹ ọkieje vwo yono kpahen Jihova kodophiyọ, ku wo se fiudugberi vwẹ ẹga kẹ. Avery re djunute siẹvure da ta: “Mi de rhi vwo uduefiogbere ọke mi vwo se, ji roro kpahen ive rẹ Jihova rọhẹ Une Rẹ Ejiro 19:7.” (Se.) Avery vwọ mrẹ orugba rẹ eta yena, ẹguọnọ ro vwo kpahen Jihova da rhe ganphiyọ. Ẹguọnọ nẹrhẹ e se vwo uduefiogbere, ọ je chọn avwanre uko vwọ vwẹroso Jihova ji ruẹ obo rọ guọnọre. Hannah re djunute siẹvure da ta: “Womarẹ isese rẹ Baibol kugbe uyono romobọ, me da rhe mrẹvughe nẹ ọ da Jihova mamọ siẹrẹ me  da so omaẹwan kẹ oma mẹ.” (1 Pita 5:7) Hannah da rhe dia ohwo rọ ‘vwẹ Ota rẹ Ọghẹnẹ’ vwo ruiruo. (Jems 1:22) Kẹ, erere vọ yen ọ mrẹre? Ọ da ta: “Erere rẹ ẹmienyo rẹ Jihova ghwa rhe, da rhe nẹrhẹ mi vwo ẹguọnọ okokodo kpahọn. Enẹna, mi vwo imuẹro nẹ Jihova che bicha vwẹ kọke kọke me da guọnọ ukẹcha rọyen.” Hannah de rhi phi ẹbẹnbẹn rẹ ọyen ọvo vwọ wan oma rọyen na kparobọ. Ọ da vwomakpahotọ kẹ Jihova, ji bromaphiyame.

11. Die yen Vanessa ruru rere o se vwo vwo omamọ rẹ igbeyan, kẹ die yen ọyena yono avwanre?

¹¹ Vwẹ aghwanre vwọ sane igbeyan. Vanessa re djunute siẹvure na da rhe mrẹvughe nẹ ugbeyan rọyen na yen nẹrhẹ o siomauko vwẹ ẹga rẹ Jihova. Ọ da dobọ rẹ oyerinkugbe na ji. Vwọba, ọ da je davwẹngba vwo vwo igbeyan kpokpọ vwevunrẹ ukoko na. Ọ tare nẹ udje rẹ Noa vẹ orua rọyen chọn ọyen uko mamọ. Ọ da ta: “Dede nẹ ayen dia ohri rẹ ihwo ri vwo ẹguọnọ rẹ Jihova-a, ayen nabọ sikẹre ohwohwo.” Vanessa vwo bromaphiyame nu, ọ da rhe dia ọkobaro. Enẹna, ọ da ta: “Ọnana chọn vwẹ uko vwo vwo omamọ rẹ igbeyan vwẹ ukoko re me hepha, ji te ikoko efa.” Wo ji se vwo omamọ rẹ igbeyan siẹrẹ wọ da nabọ muomaphiyọ iruo rẹ Jihova vwọ kẹ avwanre na.—Mat. 24:14.

12. Oka rẹ oshọẹdjẹ vọ yen kanre Adam vẹ Ivi, kẹ die yen ọyena ghwa rhe?

¹² Vwẹ ẹro abavo vwo ni oshọ. Oshọẹdjẹ evo yovwirin. Kerẹ udje, ofori nẹ e vwo oshọẹdjẹ re vwo ru obo ri che miovwo Jihova ivun. (Une 111:10) Mane kẹ Adam vẹ Ivi vwo oka rẹ oshọẹdjẹ tiọyena, ayen rhe gbevwọso Jihova-a. Ẹkẹvuọvo, ayen gbevwọsuọ. Ayen vwo ru ọtiọyen nu, ẹro rayen de rhie, ayen da rhe mrẹvughe nẹ ayen ru umwemwu. Ọtiọyena, umwemwu vẹ ughwu ọvo kọyen emọ rayen cha riuku rọyen. Ayen vwọ mrẹvughe nẹ ayen churhi rẹ Jihova re, oma kọ vo ayen, ayen de rhurhu ẹban rayen.—Jẹn. 3:7, 21.

13-14. (a) Vwo nene obo rehẹ 1 Pita 3:​21, diesorọ oshọ rẹ ughwu vwo jẹ avwanre emuo? (b) Die yen che mu avwanre vwo vwo ẹguọnọ rẹ Jihova?

¹³ Ofori nẹ a djoshọ re vwo ru obo ri che miovwo Jihova ivun, ẹkẹvuọvo, ofori nẹ a djoshọ rẹ ughwu-u. Jihova rhuẹrẹ idjerhe re se vwo vwo arhọ rẹ bẹdẹ phiyọ kẹ avwanre. Avwanre de kurhiẹriẹ nẹ umwemwu rẹ avwanre ruru, Jihova ko che vwo ghovwo avwanre, fikirẹ esegbuyota rẹ avwanre vwo kpahen izobo rẹ ọtanhirhe rẹ Ọmọ rọyen. Idjerhe ọghanghanre ọvo rẹ avwanre se vwo dje esegbuyota phia, ọyen a vwọ vwomakpahotọ ji bromaphiyame.—Se 1 Pita 3:21.

¹⁴ Erọnvwọn buebun herọ re cha nẹrhẹ e vwo ẹguọnọ rẹ Jihova. Ọyen kẹ avwanre kemu kemu rẹ avwanre riavwerhen rọyen kẹdẹ kẹdẹ, o ji yono avwanre uyota ro shekpahen oma rọyen vẹ ọhọre rọyen. (Jọn 8:31, 32) Ọ kẹ avwanre ukoko rọyen rọ vwọ sẹro ji biẹcha avwanre. Vwọba, ọ chọn avwanre uko vwo mu eghwa rẹ avwanre, ọ je kẹ avwanre iphiẹrophiyọ ra vwọ dia bẹdẹ vwẹ Iparadaisi rọ cha vwẹ obaro na. (Une 68:19; Ẹvwọ. 21:3, 4) Avwanre de roro kpahen erọnvwọn sansan rẹ Jihova ruru vwo djephia nẹ ọyen vwo ẹguọnọ rẹ avwanre, ọyena kọ nẹrhẹ avwanre vwo ẹguọnọ rọyen rhivwin. E de vwo ẹguọnọ rẹ Jihova, ka cha vwẹ ẹro abavo vwo ni oshọ. Oshọẹdjẹ rẹ Jihova cha chọn avwanre uko vwọ kẹnoma kẹ obo re cha nẹrhẹ ivun miovwo.

15. Mavọ yen Makayla wan phi oshọ rẹ oruchọ kparobọ?

¹⁵ Makayla re djunute siẹvure, phi oshọ rẹ oruchọ kparobọ ọke rọ rhe vwọ riẹn oborẹ evwoghovwo rẹ Jihova hẹre te. Ọ da ta: “Me da rhe mrẹvughe nẹ kohwo kohwo ruẹ chọ, kidie avwanre irumwemwu. Mi ji noso nẹ Jihova vwo ẹguọnọ rẹ avwanre, o che vwo ghovwo avwanre womarẹ izobo rẹ ọtanhirhe na.” Ẹguọnọ rẹ Makayla vwo kpahen Jihova de muo vwọ vwomakpahotọ kẹ, ji bromaphiyame.

16. Mavọ yen Miles wan phi oshọ rẹ ẹvwọsuọ kparobọ?

¹⁶ Miles rọ djoshọ nẹ oni rọyen cha vwọso orhiẹn ro vwo bromaphiyame da nokpẹn rẹ ukẹcha mie oniruo okinriariẹ rayen. Miles da ta: “Ọsẹ rẹ oniruo okinriariẹ na yen Oseri rẹ Jihova, oni rọyen hẹ evunrẹ ukoko na-a. Ọ nabọ chọn vwẹ uko vwo roro kpahen oborẹ me sa ta, rọ cha nẹrhẹ oni mẹ riẹn nẹ ọ dia ọsẹ mẹ yen guọnọ gba vwẹ vwo bromaphiyame-e.” Orhiẹn ro bruru na ghwa vwerhen oni rọyen oma-a. Ọke vwọ yanran, Miles de vrẹn nẹ uwevwin rẹ oni rọyen, ẹkẹvuọvo o wene orhiẹn ro bruru na-a. Ọ da ta: “Erhuvwu na eje rẹ Jihova ru kẹ vwẹ, te vwe ẹwẹn mamọ. Mi vwo roro kpahen izobo rẹ ọtanhirhe rẹ Jesu, me da rhe mrẹvughe nẹ Jihova vwo ẹguọnọ mẹ  mamọ. Ọyena da nẹrhẹ mi vwomakpahotọ kẹ, ji bromaphiyame.”

17. Uphẹn vọ yen avwanre vwori?

¹⁷ Ivi sen Jihova rọ dia Ọsẹ rọyen ọke rọ vwọ re omamọ rẹ urhe na vwẹ ogba rẹ Idẹn. Adam vwọ vwomaba aye rọyen, o de djephia nẹ ọyen vwo ọdavwaro kpahen erọnvwọn iyoyovwin eje rẹ Jihova ru kẹ-ẹ. Avwanre eje vwo uphẹn re vwo djephia sẹ avwanre vẹ ayen obọ. E de bromaphiyame, ọyen odjephia nẹ avwanre vwo imuẹro nẹ Jihova yen vwo ogangan ro vwo jurhi kẹ avwanre kpahen obo ri yovwirin vẹ obo re brare. Ọyena ji che djephia nẹ avwanre vwo ẹguọnọ vẹ ẹroẹvwọsuọ kpahen Ọsẹ rẹ avwanre.

18. Mavọ yen wo se vwo phikparobọ vwẹ ẹga rẹ Jihova?

¹⁸ Egbabọse rẹ avwanre che vwo siẹrẹ e de bromaphiyame nu, churobọ si obo re se vwo nene iwan rẹ Jihova kẹdẹ kẹdẹ, ukperẹ ojevwe romobọ rẹ avwanre. Iduduru rẹ ihwo ruẹ ọtiọyen kukpe kukpe. Wọ sa vwẹrokere ayen siẹrẹ wo de ru erianriẹn wẹn kpahen Baibol na kodophiyọ, kuomakugbe iniọvo rẹ avwanre ọkieje, ji vuẹ ihwo kpahen Jihova rọ dia Ọsẹ wẹn. (Hib. 10:24, 25) Wo de che brorhiẹn, wọ me kerhọ rẹ uchebro rẹ Jihova vwọ kẹ wẹ womarẹ Baibol na kugbe ukoko rọyen. (Aiz. 30:21) Ọyena cha nẹrhẹ wo phikparobọ.—Isẹ 16:3, 20.

19. Die yen ofori nẹ wo roro kpahen ọkieje, kẹ diesorọ?

¹⁹ Ẹguọnọ ru wo vwo kpahen Jihova vẹ irhi rọyen cha ganphiyọ, siẹrẹ wọ da vwẹ ọkieje vwo roro kpahen erere ru wọ mrẹ vwo nẹ odjekẹ rọyen cha. Ọke yena, Eshu rha cha sa vwẹ emu vuọvo vwọ riẹriẹ owẹ nẹ ẹga rẹ Jihova-a. Vwẹro roro oborẹ akpeyeren wẹn cha dia omarẹ ẹgbukpe uriorin rọ cha obaro na. Ku wọ cha mrẹvughe nẹ omaebrophiyame wẹn yen orhiẹn ro me yovwin kparobọ ru wo bruru!