1. Exeeni Adamu ni Eva apweteiwale aya? Yoothanla aya ekumihenrye exeeni?

TANI munimoona anyu wira onnireerela ohimya ele ekhanle yooloka ni yoohiloka? Vaavo Adamu ni Eva yaalyiiye aya muhokorokho wa mwiri waasuweliha yooreera ni yootakhala, awo yaahooniherya wira khiyaakupali malamulo a xariya a Yehova. Awo yaahithanla opaka malamulo aya voohimya sa ele eri yooloka ni yoohiloka. (Maph. 3:22) Masi nkahaya muupuwele ele apweteiwale aya. Awo aapweteiwa waataana wooloka ni Yehova. Nave aayeleela eparakha ya okhala mahiku otheene valaponi. Ohiya-tho vo, awo ahaaraviha etampi ni okhwa apinaatamu otheene. (aRom. 5:12) Tthiri yoothanla ya Adamu ni Eva yookumiherya maxakha manceene!

2-3. (a) Exeeni mulopwana a wEthiyopia aapanke awe nuumala olaleeriwa ni Filipe? (b) Mareeliho xeeni nimphwanya ahu mwaha wa obatiziwa? Makoho xeeni ninrowa ahu othokorerya?

² Enamuna oonenle awe mulopwana oohuliwa a wEthiyopia nuumala olaleeriwa ni Filipe, waahivirikana ni moonelo wa Adamu ni Eva. Mulopwana ole oohuliwa, aahisiveliwa vanceene etthu Yehova ni Yesu apanke aya, nto moohipisa aahibatiziwa. (Mit. 8:34-38) Nto vaavo nniivahererya ahu wa Muluku ni obatiziwa, ntoko mwEthiyopia ole, ninnooniherya wira ninnixukhurela ele Yehova ni Yesu anipakenle aya. Nave ninnimphenta Yehova ni wooniherya wira tonireerela ohimya ele ekhanle yooloka ni yoohiloka.

³ Nkahaya muupuwele mareeliho nimphwanya ahu mwaha woomurumeela Yehova! Mareeliho awo, anihela muhina ophwanya itthu sotheene Adamu ni Eva ayelenle aya, ohela muhina okhala mahiku otheene mparayiisu. Okhala wira  ninnaamini mukuttho wa Yesu Kristu, Yehova onoonilevelela itampi sahu ni onoonivaha yowuupuxerya ya murima yooloka. (Math. 20:28; Mit. 10:43) Nave, nlipelelaka mareeliho a muhoolo, nookhalana eparakha ya wiirela mpantta emusi ya arumeyi a Yehova. (Yoh. 10:14-16; aRom. 8:20, 21) Hata asuwelaka wira nnoophwanya mareeliho awo otheene, atthu akina animusuwela Yehova annoovelela obatiziwa. Exeeni enaakhoottiherya obatiziwa? Anrowa oxintta sai mixankiho iyo?

4-5. Muxankiho xeeni mmiravo Avery aarina awe? Ankhi mwali Hannah, aarina muxankiho xeeni?

⁴ Ohiiroromela aahiiso wiihoverya. Anamuyari awe Avery, Anamoona a Yehova. Paapa awe ookhalana mweettelo wooloka ni tiithi oophenta, nave-tho mutokweene oottittimihiwa. Masi Avery aanoovelela obatiziwa. Nthowa xeeni? Owo onihimya so: “Kuupuwela wira nkaarowa owerya okhala muKristau ooloka ntoko paapa aka”. Nave, Avery uupuwela wira khaarowa owerya omaleliha saana miritti aarowa awe ovahiwa muhoolo. Owo onincererya oriki: “Kuupuwela wira nkaarowa owerya opaka nivekelo nipuro noowaatta atthu, olavula mwaha aahiiso ohoolela muteko woolaleerya”.

⁵ Mwali mmosa oniihaniwa Hannah, orina iyaakha 18, owo khairoromela. Nnaamwi anamuyari awe yaamurumeela Yehova, owo uupuwela wira khaarowa owerya okhala moovarihana ni malamulo a xariya a Yehova. Nthowa xeeni? Etthu yaamwiiriha okhala wira aahikhalana moonelo woohiloka voohimya sa yena. Okathi mukina itthu saanitepa omuxankiha mwaha woowi aaniikumiherya mixankiho. Owo onihimya so: “Nkaatonko omuleela mutthu itthu kaapaka aka, nnakhala anamuyari aka. Nto kuupuwela wira Yehova khaaphavela wira miyo kikhale murumeyi awe mwaha wa itthu soohiloka kiixiiriha aka”.

6. Exeeni yaamukhoottiherya Vanessa obatiziwa?

⁶ Apatthani. Vanessa, orina iyaakha 22, onihimya so: “Kaahikhalana apatthani yaawo kaasuwela aka okhuma khalai”. Masi apatthani awe khiyaamukhaliherya ophwanya yoolukama awe ya obatiziwa. Nto eyo yaanimukhulumula vanceene, owo onincererya oriki: “Waanikivila waapaka apatthani, nto kaanixanka akhala wira kaahiya apatthani aka kaamwaaphwanya apatthani akina ooloka”.

7. Mwali oniihaniwa Makayla oovelela opaka exeeni ni nthowa xeeni?

⁷ Woova opaka etampi. Makayla aarina iyaakha 5 vaavo murokorawe aakumihiwe awe mmulokoni. Nto vaavo annuwa awe, aanoona moota anamuyari awe yaariipiwa aya murima mwaha wa mweettelo woohiloka wa murokorawe. Vano Makayla onihimya so:  “Kaanoova obatiziwa. Maana kuupuwela wira kapaka etampi kaamukumihiwa mmulokoni, nto eyo yaamutepa waariipiha murima anamuyari aka”.

8. Mmiravo Miles oova exeeni?

⁸ Woova olupatthiwa. Paapa awe Miles ni maama awe omphwanya annimurumeela Yehova, masi maama awe oomuyara khonimurumeela. Miles oni: “Kaahikhala ni maama aka iyaakha 18, nto kaanoova omuleleela wira kaaphavela obatiziwa. Maana kaanuupuwela moota oonenle awe vaavo paapa aka aakhanle awe Namoona. Nto kaanimoova okikumiherya maxakha”.

9. Exeeni enrowa wiiraneya vaavo muninnuuherya anyu wiixutta opixa murima ni ophenta wa Yehova?

⁹ Adamu ni Eva yaahithanla ohimurumeela Yehova mwaha woowi khiyamphenta vanceene. Hata vaari siiso, Yehova aahiweemererya okhala mahiku manceene wira yaayare anaaya ni othanla moota yaarowa aya waahuwa. Moohipisa sookhumelela soohiloka sa yoothanla ya Adamu ni Eva, yahooniherya wira yaari alolo. Maana mwanaya ompacerya aahimwiiva muhima awe ohitthenke etthu, ni muhoolo mwaya otakhala ni wiixinnuwiha woomwareela mulaponi motheene. (Maph. 4:8; 6:11-13) Hata vari siiso, Yehova ookhalana enamuna ekina ya owoopola anamwane a Adamu ni Eva, yaawo aniphavela omurumeela moororomeleya. (Yoh. 6:38-40, 57, 58) Vaavo muninnuuherya anyu wiixutta opixa murima ni ophenta wa Yehova, nave omphenta wanyu onrowa otepaka wunnuwa. Tthiri munoosyaka mweettelo wa Adamu ni Eva yaathanlale aya ni munrowa omurumeelaka Yehova.

10. Wuupuwelela Esalimo 19:8, wookhalihenryeni sai omurumeela Yehova?

¹⁰ Nvikanihe wiixutta voohimya sa Yehova. Vaavo muntepa anyu omusuwela Yehova, munootepaka okupali wira munoowerya omurumeela moomalela. Avery nimulavunle ahu wanipacerya onihimya so: “Kaahipacerya ohiihoverya nuumala osoma ni wuupuwelela yooleiherya ya Yehova eniphwanyaneya Esalimo 19:8”. (Musome.) Vaavo Avery oonale awe moota Yehova aamalihenrye awe yooleiherya awe, omphenta wawe Muluku waahilipa. Ophenta khahiyo  paahi onniphwanyiha ororomeleya, masi onninivaha ikuru wira nimurumeeleke. Hannah yoowo nimulavunle ahu, onihimya so: “Vaavo kaamusoma aka ni omwiixutta Biibiliya, kaahoona wira okathi kiniikumiherya aka mixankiho, kinnimuriipiha murima Yehova”. (1 Ped. 5:7) Vano Hannah ‘onnèttela masu’ a Muluku. (Yak. 1:22) Exeeni yaakhumelenle mwaha woopaka eyo? Owo onihimya so: “Nuumala oweha mareeliho kiniphwanya aka mwaha woomwiiwelela Yehova, kaahipacerya omphenta vanceene. Vano kinnikupali wira okathi wotheene malakiheryo a Yehova anookikhaliherya”. Hannah oowerya oxintta muxankiho awe wa wiikumiherya mixankiho. Owo ohiivahererya wa Yehova ni oobatiziwa.

11. Exeeni Vanessa aapanke awe wira okhalane apatthani ooloka? Nto onniixuttiha exeeni?

¹¹ Mwaathanleke Apatthani anyu mwa miruku. Vanessa, yoowo nimulavunle ahu wanipacerya, aahoona wira apatthani awe yaanimukhoottiherya omurumeela Yehova. Nto aahihiya weettana. Masi Vanessa khamalenle vaavo, owo aahiimananiha waapaka apatthani ooloka mmulokoni. Owo, ohimmye wira ntakiheryo nooloka na Nowe ni emusi awe noomukhaliherya vanceene. Vanessa onihimya wira: “Nowe ni emusi awe aakhala eriyari ya atthu yahamphenta Yehova, masi hata vaari siiso awo yaanisiveliwa okhala [vamosa ntoko emusi]”. Nuumala obatiziwa, Vanessa aahipacerya okhala pioneera. Vano onihimya wira: “Okhala pioneera wookikhaliherya waapaka apatthani ooloka ohiya paahi muloko aka masi-tho miloko sikina”. Nyuwo nave, munoowerya waapaka apatthani ooloka akhala wira munooluttuweliwa ovara muteko Yehova onivanhe awe.—Math. 24:14.

12. Enamuna xeeni ya woova Adamu ni Eva yahaarina aya, nto exeeni yaakhumelenle?

¹² Musuweleke enamuna yooloka ya woova. Inamuna sikina sa woova ti sooloka. Mwa ntakiheryo, nihaana okhalana woova wooloka wira nimusiveliheke Yehova. (Esal. 111:10) Vaakhanle wira Adamu ni Eva yaanimoova Muluku, awo khiyaarowa ommwareela. Masi mwaha woohimoova khiyaamwiiwelenle. Nuumala olya muhokorokho ole, maitho aya yaahitthukuwa anoona wira yaari anatampi. Nave ahaaraviha anaaya etampi ni okhwa.  Okhala wira yaahoona wira khiyaamwiiwelenle Muluku, awo yaahuuliwa muru mwaha woowi khiyaawanre etthu, nto yaahiikuttelela.—Maph. 3:7, 21.

13-14. (a) Moovarihana ni 1 Pedru 3:21, xeeni vahinreerela aya otepa woova okhwa? (b) Itthu xeeni sinniiriha omphenta Yehova?

¹³ Nnaamwi vareerelaka omoova Yehova, khivanireerela otepa woova okhwa. Yehova oopaka mareheryo wira niphwanye okumi woohimala. Nto, akhala wira noopaka etampi nittharuwa ni murima wotheene, Yehova onoonilevelela moomalela. Owo onoonilevelela mwaha woowaamini mukuttho wowoopola wa Kristu. Enamuna yuulupale nnooniherya ahu wira nookhalana waamini, ori wiivahererya wa Muluku ni obatiziwa.—Mmusome 1 Pedru 3:21.

¹⁴ Otheene ahu nookhalana mathowa ooloka a omphenta Yehova. Ohiya paahi mwaha woonivaha itthu sooloka khula nihiku, masi onniniixuttiha ikeekhai voohimya sa omutthu awe ni soolakela sawe. (Yoh. 8:31, 32) Yehova oonivaha muloko wa eKristau wira oneettiheke ni onikhaliherya. Owo onninikhaliherya ovilela mixankiho ni oonivaha nlipelelo na okhalana okumi woomalela oloka muhoolo. (Esal. 68:20; Wis. 21:3, 4) Akhala wira nnimuupuwelela itthu sotheene Yehova onivanhe awe sinooniherya oniphenta wawe, omphenta wahu onoolipa vanceene. Nto vaavo nnimphenta ahu Yehova, nnookhalana enamuna yooloka ya woova. Maana nnimoovaka omunyoonyiha Yehova yoowo nnimphenta ahu vanceene.

15. Makayla aamalinhe sai woova wawe opaka etampi?

¹⁵ Makayla nimulavunle ahu wanipacerya, aahimaliha woova wawe opaka etampi, nuumala osuwela wira Yehova toolevelela ni murima wotheene. Owo onihimya so: “Kaahoona wira otheene ahu naatthu oohimalela ni ninnivonya. Nave, kaahisuwela wira Yehova onniniphenta vanceene ni onoonilevelela moomalela orumeelaka mukuttho wowoopola”. Omphenta wawe Yehova waahimwiiriha wiivahererya ni obatiziwa.

16. Miles aaxinttale sai woova olupatthiwa?

¹⁶ Miles yoowo oova wira maama awe khaarowa osiveliwa ni yoothanla awe ya obatiziwa, aahinvekela nikhaliheryo mutokweene a esirkwiitu. Miles oni: “Mutokweene ole ohuuwale etthoko yeeyo namuyari awe mmosa ori awe Namoona. Owo ookikhaliherya woona etthu kaakhanle aka oopaka wira maama aka osuwele wira obatiziwa yaari yoothanla aka, nave paapa aka khaakikhanyerenrye opaka eyo”. Maama awe Miles khaasiveliwe ni yoothanla ele. Nuuvira okathi, maama awe aahimoomola owannyawe, masi hata vaari siiso, owo aahivarexexa yoothanla awe. Owo onihimya wira: “Wiixutta itthu sooloka Yehova okivanhe awe waahikivara murima. Nto vaavo kuupuwelela aka vanceene mukuttho wowoopola wa Yesu, kaahoona moota Yehova okiphentale awe. Muupuwelo owo wookikhaliherya wiivahererya wa Yehova ni obatiziwa”.

17. Eparakha xeeni otheene ahu nrina ahu?

¹⁷ Okathi Eva yaalyiiye aya muhokorokho wookhoottihiwa ejardim ya wEdeni, owo aahimukhootta moomalela Tiithi awe. Nave vaavo Adamu aamwiiwelenle awe Eva, aahooniherya wira khaaxukhurela itthu sotheene sooloka aavahiwe awe ni Yehova. Othene ahu nookhalana eparakha ya wooniherya wira khaninlikana ni Adamu ni Eva, nixukhurelaka itthu sotheene Yehova onnivaha awe. Nto okathi nimbatiziwa ahu, ninnooniherya wira Yehova ookhalana ehakhi ni tonireerela ohimya ele eri yooloka ni yoohiloka. Nto opaka eyo ethoonyeryo yoowi ninnimphenta ni omuroromela vanceene Tiithi ihu a wiirimu.

18. Munrowa okhumela sai saana vaavo munimurumeela anyu Yehova?

¹⁸ Nuumala obatiziwa, nihaana ovikaniha okhala moovarihana ni malamulo a Yehova ohiya weettela murima ahu. Arumeyi anceene a Muluku annipaka eyo. Nto munoowerya waatakiha, akhala wira munoovikaniha olipiha omwiiwexexa wanyu Biibiliya, waataana ni anna ni arokora oolipa momunepani, ni oluttuweliwa waaleela atthu akina itthu mwiixuntte anyu voohimya sa Tiithi inyu oophenta a wiirimu. (aHéb. 10:24, 25) Okathi munipaka anyu soothanla, etthu yoopacerya mukhanle anyu oopaka owiriyana miruku Yehova onoovahaaweni omurumeelaka Biibiliya ni mutthenkeso awe. (Yes. 30:21) Mwiira siiso, itthu sotheene munrowa anyu opaka sinookhumela saana.—Mir. 16:3, 20.

19. Etthu xeeni mukhanle anyu owuupuwelela ni nthowa xeeni?

¹⁹ Vaavo munoona anyu wira malakiheryo a Yehova anniphwanyiha mireerelo, omphenta wanyu Yehova ni malamulo awe onoolipaka vanceene. Nto khiivo etthu Satana onrowa awe opaka enrowa woohiihani omurumeela Yehova. Nkahaya muupuwele iyaakha ikonto sinceene munrowa anyu okhalaka. Tthiri okathi owo, munimoona wira yoothanla anyu ya obatiziwa yaari yootepexa oloka!