ALATIKE AKO 10
Kotea ʼAe ʼe Ina Taʼofi Ai Ke Au Papitema?
“Neʼe hifo leva ia Filipo mo te enuke ki te vai, pea neʼe ina papitemaʼi ia ia.”—GAUE 8:38.
KATIKO 52 Te Foaki ʼo Kita Mo Te Papitema
TE ʼU MANATU FAKANOUNOU *
1. Kotea ʼae neʼe pulihi e Atama mo Eva? Pea kotea ʼona fua?
KIA koutou la, ko ai ʼae ʼe tonu ke ina fai te ʼu fakatuʼutuʼu ʼo ʼuhiga mo te ʼu faʼahi ʼae ʼe lelei pea mo ʼae ʼe kovi? ʼI te kai e Atama mo Eva ia te fuaʼi ʼakau ʼo te iloʼi ʼo te lelei mo te kovi, neʼe nā fakaha ai ʼe mole nā falala kia Sehova pea mo ʼana fakatuʼutuʼu. Neʼe nā fili ai ke nā puleʼi pe ia naua totonu. (Sen. 3:22) Kae neʼe nā maʼu ai tea? Neʼe puli ai tana fakakaumeʼa ʼae mo Sehova. Neʼe toe puli ai te fealagia ʼae ke nā maʼuli ʼo talu ai, pea neʼe nā tuku fakaholo ai te agahala pea mo te mate ki ʼanā fanau. (Loma 5:12) Ko te faʼahi ʼae neʼe fili e Atama mo Eva neʼe ina taki ai ki te fakaʼofaʼofa.
Hili pe tana tali ia Sesu, neʼe fia papitema atu aipe ia te tagata enuke Etiopea (Vakaʼi te palakalafe 2-3)
2-3. (1) Neʼe feafeaʼi te tali ʼa te enuke Etiopea ki te faifakamafola age ʼa Filipo? (2) Kotea te ʼu tapuakina ʼe tou maʼu anai moka tou papitema? Kotea te ʼu fehuʼi ka tou vakaʼi anai?
2 Kotou fakatatau te kehekehe ʼo te faʼahiga fai ʼa Atama mo Eva pea mo te enuke Etiopea ʼi te temi ʼae neʼe faifakamafola ki ai ia Filipo. Neʼe leleiʼia e te enuke te faʼahi ʼae neʼe fai e Sehova pea mo Sesu kia ia, koia neʼe papitema atu aipe. (Gaue 8:34-38) Ka tou foaki ʼotatou maʼuli ki te ʼAtua pea ohage ko te enuke, ʼe tou papitema ai, ʼo tou fakaha ai ʼe tou lotofakafetaʼi ki te faʼahi ʼae neʼe fai e Sehova mo Sesu maʼa tatou. ʼE tou toe fakaha ai tatatou falala kia Sehova pea tou fakamoʼoni ai ko ia tokotahi ʼae ʼe ina iloʼi te meʼa ʼae ʼe lelei pea mo ʼae ʼe kovi.
3 Fakakaukauʼi age muʼa te ʼu tapuakina ʼae ʼe tou maʼu ʼi tatatou tauhi ʼae kia Sehova. ʼE tou toe maʼu ai te faʼahi ʼae neʼe pulihi e Atama mo Eva, ʼo kau ai te fealagia ʼae ko te maʼuli Mat. 20:28; Gaue 10:43) ʼE tou kau ʼi he famili ʼo he ʼu kaugana ʼe tali leleiʼi e Sehova, pea mo tou fakatalitali ki he ka haʼu ʼe tapuakinaʼi anai. (Soa. 10:14-16; Loma 8:20, 21) Logo la te ʼu faigamalie ʼaia, ʼe ʼi ai ʼihi ʼe natou iloʼi ia Sehova, kae ʼe natou lotolotolua ʼi te muliʼi ʼo te faʼifaʼitaki ʼo te enuke Etiopea. Kotea ʼae ʼe ina taʼofi natou ke natou papitema? ʼE feafeaʼi hanatou lava tauʼi te ʼu faigataʼaʼia ʼaia?
heʼe gata. ʼAki ia tatatou tui kia Sesu Kilisito ʼe fakamolemole e Sehova ʼatatou hala pea mo ina foaki mai he leʼo ʼo loto ʼe maʼa. (TE ʼU FAIGATAʼAʼIA ʼAE ʼE INA TAʼOFI AI TE PAPITEMA
ʼE ʼi ai te ʼu faigataʼaʼia ʼe tonu ke tauʼi ʼi muʼa ʼo te toʼo ʼo te tonu ke papitema
Mole maʼu he falala (Vakaʼi te palakalafe 4-5) *
4-5. Kotea te ʼu fihifihia ʼae neʼe tauʼi e te tupulaga ko Avery pea mo te finemui ko Hannah?
4 Mole maʼu he falala. Ko te ʼu matuʼā ʼa Avery ʼe ko he ʼu Fakamoʼoni ʼa Sehova. Neʼe iloa tana matuʼa ko he tamai mo tagata ʼafeā ʼe lototokaga. Kae neʼe mole fia papitema vave ia Avery. Kotea tona tupuʼaga? Neʼe ina ui fenei: “Neʼe au manatu ʼe mole au lava fai anai ohage ko taku tamai.” Neʼe mole falala ia Avery kia ia, neʼe manatu ʼe mole feala anai ke ina fai te ʼu maʼua ʼae ʼe tuku age anai ki ai. Neʼe ina toe ui fenei: “Neʼe au tuʼania naʼa ui mai ke au faikole ʼi te kaugā malie, mo fai he ʼu akonaki, pea mo tokaga ki he kutuga faifakamafola.”
5 Neʼe taʼu 18 ia Hannah, kae neʼe mole falala kia ia. Ko ʼana matuʼā neʼe ko te ʼu fakamoʼoni ʼa Sehova. Logo la te faʼahi ʼaia, neʼe manatu ʼe mole ina lava maʼuliʼi anai te ʼu pelesepeto ʼa Sehova. Kotea tona tupuʼaga? ʼI te manatu ʼa Hannah ʼe mole hona ʼuhiga kia mata ʼo te hahaʼi. ʼI ʼihi temi, ʼi te lahi fau ʼo tona lotomamahi, neʼe ina hifihifi ai tona kakano, ʼo toe ʼasili kovi ai tona mamahi. Neʼe ina ui fenei: “Neʼe heʼeki au palalau ki he tahi, feia pe mo ʼaku matuʼā ki te faʼahi ʼae neʼe au fai.”
ʼE feafeaʼi hatatou tauʼi te ʼu faigataʼaʼia ʼaia (Vakaʼi te palakalafe 9-16) *
6. Kotea ʼae neʼe ina taʼofi ai ia Vanessa ke ʼaua naʼa papitema vave?
6 Te fua ʼo te fakakaumeʼa. Neʼe ui fenei e Vanessa ʼe taʼu 22: “Neʼe ʼi ai toku kaumeʼa lelei neʼe ma feiloʼiʼaki talu mai ia taʼu ʼe 10.” Kae ko te kaumeʼa ʼaia ʼo Vanessa neʼe mole lagolago ki tana fakatuʼutuʼu ʼae ke papitema. Neʼe mamahi ai ia Vanessa pea neʼe ina ui fenei: “ ʼE faigataʼa te maʼu ʼo hoku ʼu kaumeʼa pea neʼe au tuʼania naʼa mole kei ʼi ai hoku tahi kaumeʼa lelei mo kapau ʼe mole kei ma fakakaumeʼa.”
Mole Maʼu He Falala (Vakaʼi te palakalafe 7) *
7. Kotea ʼae neʼe tuʼania e te finemui ko Makayla? Kotea tona tupuʼaga?
7 Te tuʼania naʼa to noa te ʼu faiga. Neʼe taʼu 5 ia Makayla, ʼi te temi ʼae neʼe fakamavae ai tona tokolua ʼi te moʼoni. ʼI tana lahilahi age, neʼe mahino leva ki te fua kovi ʼo te aga ʼo tona tokolua ki ʼana matuʼā. Neʼe ui fenei e Makayla: “Neʼe au mataku naʼa au fai he hala ʼi taku ʼosi
papitema pea fakamavae ai au, ʼo toe ʼasili ai te mamahi ʼo ʼaku matuʼā.”Te Fua ʼo Te Fakakaumeʼa (Vakaʼi te palakalafe 8) *
8. Kotea ʼae neʼe mataku ki ai ia Miles?
8 Mataku ki te fakafeagai. Ko te tamai ʼa Miles pea mo te fafine ʼae neʼe toe ʼohoana mo ia, ʼe nā tauhi kia Sehova. Kae ko tana faʼe totonu neʼe mole ko he Fakamoʼoni ʼa Sehova. Neʼe ui fenei e Miles: “Neʼe taʼu 18 taku maʼuli fakatahi mo taku faʼe. Pea neʼe au mataku ʼi te ui age ki ai toku loto ʼae ke au papitema. Neʼe au iloʼi tana mole leleiʼia ʼae te liliu ʼo taku tamai ko he Fakamoʼoni ʼa Sehova. Neʼe au mataku ai naʼa hoko he fihifihia ia maua.”
ʼE TOU TAUʼI FEAFEAʼI ʼOTATOU FAIGATAʼAʼIA?
9. Kotea anai ka hoko mo kapau ʼe kotou iloʼi te lahi ʼo te ʼofa pea mo te faʼa kataki ʼa Sehova?
9 Neʼe filifili e Atama mo Eva ke ʼaua naʼa nā tauhi kia Sehova ʼuhi he neʼe mole nā maʼu he ʼofa moʼoni kia te ia. Logo la te faʼahi ʼaia, neʼe tuku age e Sehova ke nā maʼuli fualoa ke maʼu hana ʼu fanau pea mo nā fai he ʼu fakatuʼutuʼu ki te pusiaki ʼo ʼana fanau. ʼI tana fili ʼae ke nā ʼateaina mai ia Sehova, neʼe nā maʼu ai te ʼu fua ʼe fakaha ai te mole lelei ʼo tanā tonu. Neʼe matehi e tanā tama ʼuluaki tona kiʼi tehina, pea ʼaki te temi neʼe mafola ia te agamalohi pea mo te manatu pe ʼae kia kita ʼi te malamanei katoa. (Sen. 4:8; 6:11-13) Talu mai te temi ʼaia, neʼe maʼu e Sehova ia te fealagia ʼae ke ina haofaki ai te ʼu fanau fuli ʼa Atama mo Eva, ʼae ʼe fia tauhi kia te ia. (Soa. 6:38-40, 57, 58) Ka lahi takotou iloʼi te faʼa kataki pea mo te ʼofa ʼo Sehova, ʼe ʼasili ai tokotou ʼofa ʼae kia te ia. ʼE kotou fia foaki anai tokotou maʼuli kia Sehova, kae kotou liʼaki te faʼifaʼitaki kovi ʼo Atama mo Eva.
Te Tuʼania Naʼa To Noa Te ʼu Faiga
(Vakaʼi te palakalafe 9-10) *
10. He koʼe ko te metitasio ki te Pesalemo 19:8, ʼe tokoni mai ke tou tauhi kia Sehova?
10 Kotou haga ako te ʼuhiga totonu ʼo Sehova. Ka lahi takotou ako te ʼuhiga totonu ʼo Sehova, pea ʼe kotou iloʼi papau ai ʼe laka lelei anai takotou tauhi ʼae kia te ia. Neʼe ui fenei e Avery: “Neʼe au maʼu te falala ʼi taku metitasio ki te fakapapau ʼae ia Pesalemo 19:8.” (Lau.) Neʼe ʼasili te ʼofa ʼo Avery kia Sehova ʼi tana iloʼi ʼae neʼe fakahoko e Sehova tana fakapapau. Ko te ʼofa ʼae kia Sehova ʼe ina ʼekenaki tatou ke tou falala kia te ia. Kae mole gata ai, ʼe toe tokoni mai ke tou fakamuʼamuʼa tana ʼafio pea mo fai tona finegalo. Neʼe ui fenei e Hannah: “ ʼAki taku lautohi pea mo taku ako tokotahi te Tohi-Tapu, neʼe au iloʼi ai ka au fakamamahiʼi ia au ʼe toe mamahi ai mo Sehova.” (1 Pet. 5:7) Neʼe liliu ia Hannah ko he tahi ʼe ina “maʼuliʼi te folafola.” (Sakp. 1:22) Kotea tona fua? ʼE ina toe ui fenei: “ ʼI taku mahino ki te ʼu tapuakina mo te fua lelei ʼo taku talagafua kia Sehova, neʼe au ʼofa moʼoni ai kia te ia. ʼI te temi nei, ʼe au iloʼi papau ʼe takitaki tuʼumaʼu anai au e Sehova moka au loto ke tokoni mai.” Neʼe lava tauʼi e Hannah ia tana fakamamahiʼi pe ia ia. Neʼe ina foaki tona maʼuli kia Sehova pea neʼe papitema.
(Vakaʼi te palakalafe 11) *
11. Kotea ʼae neʼe fai e Vanessa ke ina maʼu ai hona ʼu kaumeʼa lelei? Kotea te ako kia tatou?
11 Kotou filifili fakalelei ʼokotou kaumeʼa. Neʼe mahino leva Vanessa ʼe fakatuatuai tana tauhi kia Sehova ʼuhi ko tona kaumeʼa. Koia neʼe ina fakagata ai tanā fakakaumeʼa. Kae neʼe mole gata ai. Neʼe toe faiga ia Vanessa ke ina maʼu hona tahi ʼu kaumeʼa foʼou ʼi te kokelekasio. Neʼe ina ui neʼe tokoni ki ai ia te faʼifaʼitaki ʼo Noe pea mo tona kiʼi famili. Neʼe ina ui fenei: “Neʼe natou nonofo ʼi te lotolotoiga ʼo te hahaʼi neʼe mole ʼoʼofa kia Sehova, kae neʼe logo tahi pe tona kiʼi famili.” ʼI te ʼosi ʼo tona papitema neʼe pionie leva ia Vanessa. ʼE ina ui fenei: “Neʼe tokoni mai kia au ke au fai hoku ʼu kaumeʼa lelei, mole gata pe ʼi toku kokelekasio totonu, kae toe kau ai mo te tahi ʼu kokelekasio.” ʼO feia pe mo koe, ʼe ke lava fai hou ʼu kaumeʼa lelei, ʼaki tau kau ki te ʼu gaue ʼae ʼe foaki atu e Sehova ke ke fai.—Mat. 24:14.
(Vakaʼi te palakalafe 12-15) *
12. Ko te manavasiʼi fea ʼae neʼe mole maʼu e Atama mo Eva? Pea kotea tona fua?
12 Ke kotou maʼu te manavasiʼi ʼae ʼe lelei. Ko ʼihi mataku ʼe lelei kia tatou. Ohage la ʼe tou matataku peʼe tou manavasiʼi naʼa tou fakamamahiʼi ia Sehova. (Pes. 111:10) Ka na neʼe maʼu la e Atama mo Eva te manavasiʼi ʼaia, neʼe mole nā talagataʼa kia Sehova. Kae neʼe nā talagataʼa pe. ʼI tanā mahino ki te faʼahi ʼaia, neʼe ava ai ʼonā mata, ʼo nā iloʼi katoa ai kua nā agahala. Ko te faʼahi pe kua nā maʼu ko te folahi ʼo te agahala pea mo te mate ki ʼanā fanau. Neʼe nā ufiufi ʼi tana telefua pea nā kumi ke nā maʼu he meʼa ke nā laofi ai, ʼuhi kua nā sisio mo mahino ki te aluʼaga ʼae kua hoko kia naua.—Sen. 3:7, 21.
13-14. (1) ʼO alu tahi mo 1 Petelo 3:21, he koʼe ʼe mole tonu ke tou mataku ki te mate? (2) Kotea te ʼu tupuʼaga ʼae ke tou ʼoʼofa ai kia Sehova?
13 ʼE tonu ke tou manavasiʼi naʼa tou fakamamahiʼi ia Sehova, kae mole ko te mataku ki te mate. Neʼe fakafealagia e Sehova ke tou maʼu ia te maʼuli heʼe gata. Kapau ʼe tou fai he agahala, pea tou fakahemala fakamalotoloto ʼe fakamolemole mai anai Sehova. ʼE fakamolemole anai kia tatou ʼo mulimuli pe ki tatatou tui ki te sakilifisio faitotonu ʼo tona ʼAlo. Ko te faʼahiga fakaha ʼo tatatou tui ko tatatou foaki totatou maʼuli ki te ʼAtua pea mo tou papitema.—Lau ia 1 Petelo 3:21.
14 ʼE lahi te ʼu tupuʼaga ke tou ʼoʼofa ai kia Sehova. Mole gata pe tana foaki mai te ʼu meʼa lelei ʼae ʼe tou fiafia ai ʼi te ʼaho fuli, kae ʼe ina toe akoʼi mai te moʼoni ʼo ʼuhiga mo ia totonu pea mo ʼana fakatuʼutuʼu. (Soa. 8:31, 32) ʼE ina foaki mai te kokelekasio Fakakilisitiano moʼo takitaki pea mo lagolago kia tatou. ʼE tokoni mai kia tatou ke tou lava tali ʼotatou faigataʼaʼia pea ʼe ina foaki mai te ʼamanaki ke tou maʼuli ʼo heʼe gata mo haohaoa ʼi te palatiso. (Pes. 68:20; Fkha. 21:3, 4) Ka tou metitasio ki te faʼahi ʼae neʼe kua fai e Sehova kia tatou, ke ina fakaha mai tona ʼofa, ʼe ina uga ai tatou ke tou ʼoʼofa kia te ia. Pea ka tou ʼoʼofa kia Sehova, ʼe tou maʼu anai te manavasiʼi moʼoni. ʼE tou manavasiʼi naʼa tou fakamamahiʼi ia Ia ʼae ʼe tou ʼofa mamahi ki ai.
15. Neʼe tauʼi feafeaʼi e Makayla tana mataku naʼa to noa ʼana faiga?
15 Neʼe lava tauʼi e Makayla tana mataku ʼae naʼa to noa ʼana faiga ʼi tana mahino ʼae ki te fakamolemole ʼa Sehova. Neʼe ina ui fenei: “Neʼe au mahino leva ki totatou ʼuhiga agahala fuli, pea ʼe tou fai pe anai te ʼu hala. Kae neʼe au toe mahino ʼe ʼofa Sehova ia tatou pea ʼe fakamolemole mai ʼaki te totogi.” Ko tona ʼofa kia Sehova neʼe ina uga ia ia ke ina foaki tona maʼuli pea mo papitema.
(Vakaʼi te palakalafe 16) *
16. Kotea te tokoni neʼe maʼu e Miles ke ina lava tauʼi ai te mataku ki te fakafeagai?
16 Ko Miles ʼae neʼe mataku naʼa fakafeagai tana faʼe ki tana loto ʼae ke papitema, neʼe kole tokoni ki te taupau ʼo te siliko. Neʼe ui fenei e Miles: “Neʼe hage te taupau fakasiliko ʼaia ko au neʼe lahilahi ake ʼi he famili ʼe mole natou lotu tahi. Koia neʼe tokoni mai ke au fakakaukau ki te faʼahi ʼae ka au ui age anai ki taku faʼe ke mahino ai neʼe ko taku tonu ʼaʼaku tokotahi kae neʼe mole uga au e taku tamai.” Neʼe mole tali leleiʼi e te faʼe ʼa Miles. Koia neʼe mavae ai ʼi tona ʼapi, kae neʼe ina taupau pe tana tonu. Neʼe ina ui fenei: “Ko te akoʼi ʼo te ʼu faʼahi ʼo ʼuhiga mo Sehova neʼe malave ki toku loto. Ko taku metitasio ki te sakilifisio faitotonu ʼo Sesu, neʼe au mahino ai ki te ʼofa ʼo Sehova. Ko te manatu ʼaia neʼe ina uga ai au ke au foaki toku maʼuli kia Sehova pea mo papitema.”
TAUPAU MA’U TAU TONU
ʼE feala ke tou fakaha ʼe tou lotofakafetaʼi ki te meʼa ʼae neʼe fai e te ʼAtua maʼa tatou (Vakaʼi te palakalafe 17)
17. Kotea te faigamalie ʼe tou maʼu?
17 ’I te kai e Eva te fua’i ʼakau ʼi te ʼoloto ʼo Eteni, neʼe ina liʼaki ai tana Tamai. ʼI te mulimuli ʼa Atama ki ai, neʼe ina fakaha ai tana mole lotofakafetaʼi ʼae ki te ʼu lelei fuli neʼe fai e Sehova maʼa ia. ʼE tou maʼu fuli te faigamalie ke tou fakaha ʼe mole tou leleiʼia te tonu ʼae neʼe fai e Atama mo Eva. ʼI tatatou papitema ʼe tou fakaha ai kia Sehova, ko ia tokotahi pe ʼae ʼe tonu ke ina fakaha mai te meʼa ʼae ʼe lelei pea mo ʼae ʼe kovi. ʼE tou fakaha ai ʼe tou ʼoʼofa pea mo falala ki tatatou Tamai.
18. ʼE lava feafeaʼi takotou haga tauhi kia Sehova?
18 Ko te fa’ahi ʼae ʼe faigataʼa ʼi te ʼosi ʼo tatatou papitema, ko te maʼuli ʼo mulimuli ki te ʼu fakatuʼutuʼu fuli ʼa Sehova kae mole tou fai pe te meʼa ʼae ʼe tou loto ki ai. ʼE feia te maʼuli ʼo te toko lauʼi miliona hahaʼi ʼi te taʼu fuli. ʼE kotou lava hage ko natou mo kapau ʼe kotou haga fakaloloto takotou mahino ki te Folafola ʼa te ʼAtua, te Tohi-Tapu. Kotou fakatahi tuʼumaʼu mo ʼokotou tehina mo tuagaʼane, pea kotou vaevae mo he faʼafai ia te ʼu faʼahi ʼae neʼe kotou ako ʼo ʼuhiga mo takotou Tamai ʼofa. (Hep. 10:24, 25) Ka kotou toʼo he ʼu tonu, fakalogo lelei te ʼu tokoni ʼae ʼe foaki atu e Sehova ʼaki tana Folafola pea mo tana kautahi. (Esa. 30:21) Pea ko te ʼu meʼa fuli ʼae ʼe kotou fai, ʼe laka lelei anai.—Taag. 16:3, 20.
19. Kotea ʼae ʼe tonu ke kotou mahino tuʼumaʼu ki ai? Pea kotea tona tupuʼaga?
19 Kapau ’e kotou manatu tuʼumaʼu ko te ʼu tokoni ʼa Sehova ʼe fua lelei kia koutou, ʼe hikihiki anai tokotou ʼofa ʼae kia te ia pea mo ʼana fakatotonu. Koia ʼe mole anai he meʼa ʼe foaki atu e Satana ʼe ina lava fakamamaʼo ai koutou mai ia Sehova pea mo tana tauhi. Fakakaukauʼi age muʼa moka tou maʼuli anai ʼi te palatiso. ʼE kotou toe manatuʼi anai takotou tonu ʼae ke kotou papitema, ʼo kotou mahino ai neʼe ko te tonu maʼuhiga pe ʼaia neʼe kotou toʼo.
KATIKO 28 Tou Kaumeʼa Mo Sehova
^ pal. 5 ʼI totatou maʼuli ko te iloʼi ʼae ʼe tou papitema anai peʼe kailoa ʼe ko he tonu maʼuhiga ʼaupito. He koʼe ʼe maʼuhiga ʼaupito te tonu ʼaia? Ko te alatike ʼaeni ʼe tali ki te fehuʼi ʼaia. ʼE tokoni anai kia natou ʼae ʼe fia papitema ke natou tauʼi te ʼu faigataʼaʼia ʼae ʼe feala ke ina taʼofi ai tanatou fia papitema.
^ pal. 56 FAKAMATALA ʼO TE ʼU PĀKI: Falala: Ko te ki’i tama ’e ina tuʼania te fai ʼo hana tali ʼi te fono.
^ pal. 58 FAKAMATALA ʼO TE ʼU PĀKI: Fakakaumeʼa: Ko he kiʼi Fakamoʼoni ʼa Sehova ʼe kaumeʼa mo he tahi ʼe mole ʼi te moʼoni pea ʼe ufiufi ʼi tana sio ki ʼona tehina.
^ pal. 60 FAKAMATALA ʼO TE ʼU PĀKI: To noa ʼo te ʼu fakatuʼutuʼu: Ko he kiʼi tehina neʼe fakamavae ʼi te moʼoni pea mavae ʼi te loto fale. Ko he taʼahine ʼe ina tuʼania naʼa to ʼi te moʼoni.
^ pal. 62 FAKAMATALA ʼO TE ʼU PĀKI: Fakafeagai: Ko he kiʼi tama ʼe mataku ʼi te faikole kae sioʼi e tana faʼe ʼae ʼe mole tauhi kia Sehova.
^ pal. 65 FAKAMATALA ʼO TE ʼU PĀKI: Falala: Ko te ki’i tama neʼe faiga leva ke lelei age tana ako tokotahi.
^ pal. 67 FAKAMATALA ʼO TE ʼU PĀKI: Fakakaumeʼa: Ko he kiʼi Fakamoʼoni kua fia meamea leva ʼi tana tauhi kia Sehova.
^ pal. 69 FAKAMATALA ʼO TE ʼU PĀKI: To noa ʼo te ʼu fakatuʼutuʼu: Ko he kiʼi taʼahine neʼe ina ako fakamalotoloto ia te moʼoni pea mo papitema leva.
^ pal. 71 FAKAMATALA ʼO TE ʼU PĀKI: Fakafeagai: Ki muli age leva, ko te kiʼi tama kua lototoʼa ʼo ina fakamahino ki tana faʼe te moʼoni ʼae kua tui ki ai.