1. Ino raha nafoeny Adama ndreky Eva, ndreky ino vokany?

 ARAKA hevitrinao? Azovy tokony hamaritry ny tsara ndreky ratsy? Koa fa nihina tamy voany kakazo fahaizan̈a ny tsara ndreky ratsy Adama ndreky Eva, nira nivolan̈a karaha ty iro: Iro tsy mahatoky Jehovah ndreky toro lalan̈anany. Iro fo nifidy hamaritry ny tsara ndreky ratsy. (Gen. 3:22) Ten̈a naro raha nafoendro, karaha ataonyfifandraisan̈a tsara tamy Jehovah. Tsy afaka hiain̈y mandrakizay eky iro sady namindra fahotan̈a ndreky fahafatesan̈a tamy taranakandro. (Rom. 5:12) Tsisy raha tsara vokatrany safidiny Adama ndreky Eva.

2-3. a) Ino raha nataony tandapa etiopianin̈y io, Filipo koa fa nitory taminany? b)Ino hatsaran̈a ho azonolo atao batisa, avio ino aby fan̈ontanian̈a hivalian̈a ato?

² Ampiràn̈a baka raha nataony Adama ndreky Eva avio raha nataony lelahy etopianin̈y lera Filipo nitory taminany. Nankasitraka mare raha nataony Jehovah ndreky Jesosy taminany tandapa io ke tsy nijijy tamban̈a izy natao batisa. (Asa. 8:34-38) Mazava koran̈a fa izikoa atsika manokanten̈a amy Zan̈ahary ndreky atao batisa karaha tandapa io, mankasitraka raha nataony Jehovah ndreky Jesosy nintsika atsika dikanizen̈y. Aboakantsika amy zen̈y koa fa matoky Jehovah atsika salakady man̈eky fa izy fo afaka mamaritry ny tsara ndreky ratsy.

³ Aleva onon̈o baka fitahian̈a amiany Jehovah atsika panomponany! An̈isany zioty, atsika afaka ny hahazo raha jiaby nafoeny Adama ndreky Eva, mboany fahafahan̈a hiain̈a mandrakizay. Finoantsika Jesosymahavy Jehovah man̈ambela hadisovan̈antsika ndreky man̈amia atsika eritreritry madio. (Mat. 20:28; Asa. 10:43) Loso fianakavian̈any Jehovah koa atsika, avio ho afaka hanompo izy ndreky hahazo fitahian̈a isankarazany aminy hoavy. (Jaona 10:14-16; Rom. 8:20, 21) Ndray iô iro hatsaran̈a aby io, mbala misimisy fo olo loso nahay raha momba Jehovah misalasala han̈ano karaha tandapa etopianin̈y io. Ino ma mety manamban̈a iro tsy han̈ano batisa? Akory aby mety handrisiandro sakan̈a aby io?

4-5. Ino aby ma raha sarotro niain̈any tanora aroe, Avery ndreky Hannah?

⁴ Tsy Matoky ten̈a. Vavolombelon̈o Jehovah ry olobeny Avery. Antipan̈ahy malaza be fitiavan̈a ndreky mahakarakara papany. Fa ndray zen̈y, mbala tsy von̈ono hatao batisa fo Avery. Ino tamban̈anany? Ho izy:“Zaho baka tsy hahavita raha vitany papako zen̈y foeky.” Mavozo Avery tsao tsy ho vitany han̈ano andraikitry takin̈y aminazy aminy afara an̈y. Karaha ty koa ho izy: “Raha ho vitako edy hivavaka an̈ivonolo, han̈ano kabaro na hitariky olo amy fanompoan̈a zen̈y?”

⁵ Hannah, 18 taon̈o ndraiky tsy matoky ten̈a mare ndray izy nitarimianiry olobeny tan̈aty fandaminan̈a. Midaon̈o izy tsao tafandika fitsipikiny Jehovah. Ino antony? Nahatsapa ten̈a tsisy dikany foeky Hannah. Ndraikindraiky izy nalahelo mare, avio kinia niratraviny ain̈inany, ke nahaikivy fo izy. Ho izy: “Tsiary nivolan̈iko taminolo foeky raha nataoko, ndray taminiry olobeko. Fahitako izy, tsy hikeny Jehovah ho loso panomponany foeky zaho baka tamy raha nataoko.”

6. Ino raha nisakana Vanessa tsy hatao batisa?

⁶ Naman̈a. Karaha ty nivolan̈iny Vanessa, 22 taon̈o: “Kamarady mare efa ho 10 taon̈o zaho ndreky namako araiky zay.” Fa tsy tiany kamaradiny io foeky Vanessa hatao batisa zen̈y. Nahakivy Vanessa raha zen̈y, ke karaha ty nivolan̈iny: “Tsy mora aminaka foeky minaman̈a aminolo, ke mavozo zaho hiala izy tsao zaho tsy hahita kamarady karaha izy eky.”

7. Ino raha nampavozo Makayla, baka io ino antony?

⁷ Mavozo tsao tafan̈ano fahotan̈a maventy. Tamy Makayla dimy taon̈o, voaroaka zokiny lelahy. Koa fa nahaibe izy, hitany fa ten̈a nampalahelo iry olobeny mare raha nataony anadihiny io. Ke hoy Makayla: “Avozoako tsao zaho vita batisa in̈y, tafan̈ano hadisovan̈a, avio voaroaka ke hampandombolombo alaheloniry olobeko.”

8. Ino raha navozoany Miles?

⁸ Mavozo fanoheran̈a. Papany Miles ndreky mamaheliny samy panompony Jehovah, fa mamany ndraiky tsy Vavolombelon̈o Jehovah. Ho izy: “Mamako fo nitarimy zaho tan̈atiny 18 taon̈o, ke tsy sakiko hivolan̈a aminany fa zaho tihan̈ano batisa. Hitako loatra baka raha nataony, papako koa fa loso Vavolombelon̈o Jehovah. Ke karaha efa hitako fo koa raha handeha hataony zaho.”

9. Ino ma raha efa azo antoko fa ho hisy izikoa tsapanao fa Jehovah io maharidraha ndreky be fitiavan̈a?

⁹ Adama ndreky Eva nifidy tsy hanompo Jehovah, fotony iro tsy ten̈a tia izy. Fa ndray zen̈y, mbala nambelany Jehovah nandeha fo fotoan̈a, ke iro afaka niteraka avio nitarimy zanakandro amy fomba nitiavandro izy. Nazava fa tsy nandiniky tsarabe iro alohany nanapakevitry, ke ratsy vokany. Zanakandro talan̈olo namono zandriny. Ke izikoa fa nandeha fotoan̈a, nahainaro fo olo kafiry ndreky tia ten̈a. (Gen. 4:8; 6:11-13) Fa ndray zen̈y, Jehovah nan̈ano raha han̈avotan̈a lan̈iany taranaka Adama ndreky Eva von̈ono hanompo izy. (Jaona 6:38-40, 57, 58) Arakarakany hahitanao fa Jehovah maharidraha ndreky tsara fan̈ahy, anao hahaiho tia izy fo, ndreky handrisiky anao hanokanten̈a aminany, fa tsy han̈ano karaha nataony Adama ndreky Eva in̈y.

10. Nan̈ino ma fisaintsain̈ana raha koran̈iny Salamo 19:7 io han̈ampy anao hanompo Jehovah?

¹⁰ Tohiza fianaranao raha momba Jehovah. Izikoa anao tsy voly mianatra raha momba Jehovah, anao hahaiho tapakevitry fo hanompo izy ndreky tsy hivadiky aminany. Avery araiky nikoran̈intsika tio in̈y nivolan̈a: “Loso natoky ten̈a zaho koa fa namaky ndreky nisaintsain̈y fampan̈antinan̈a amy Salamo 19:7.” (Vakia.) Nahainitombo fo fitiavany Avery i Jehovah, arakarakany nahaizany fa Jehovah man̈atanteraka fampan̈antinan̈anany fo. Olo araiky koa fa tia Jehovah, izy loso matoky ten̈a. Zen̈y koa han̈ampy izy han̈ano raha tiany Jehovah. Karaha ty koa ho Hannah, araiky taloha tarỳ in̈y: “Baka tamy famakiako Baiboly ndreky fianaran̈a manokan̈a nataoko nahaizako fa izikoa zaho mampijaly ten̈a, malahelo Jehovah.” (1 Pet. 5:7) Ke ‘nan̈araka volan̈a Zan̈ahary’ i Hannah. (Jak. 1:22) Ino amy zay vokany? Ho izy: “Zaho koa fa nahita fa mahazo hatsaran̈a zaho lera mampihatra volan̈a Jehovah, loso nahaitiako fo izy. Azoko antoko tsarabe zioty fa hitaridalan̈a zaho fo Jehovah isaka zaho mila fan̈ampian̈a baka aminany.” Tsy nampijaly ten̈a eky Hannah tafara tatỳ ke nanokanten̈a ndreky natao batisa.

11. Ino raha nataony Vanessa baka hazahoany naman̈a tsara? Ino raha ianarantsika baka amy zen̈y?

¹¹ Fidiana tsara olo ataonao kamarady. Tontohitry Vanessa nikoran̈intsika tio in̈y fa namany io nisakana izy tsy hanompo Jehovah, ke tsy nikamarady taminany eky izy. Fa tsy zen̈y fo raha nataony. Nifen̈y mare koa izy nizaha naman̈a tan̈atiny fiangonan̈a. Modely nambelany Noa ndreky fianakavian̈anazy nan̈ampy izy. Ho izy: “Olo man̈odidin̈y iro tsy nanompo Jehovah, fa Noa ndreky fianakavian̈anany nifandray tsarabe fo.” Loso pisava lalan̈a i Vanessa tafarany batisanazy. Ho izy: “Raha aby zen̈y nan̈ampy zaho hahazo naman̈a tsara amy fiangonan̈a misy zaho ndreky amy fiangonan̈a hafa.” Ndray anao koa afaka hahazo naman̈a tsara, izikoa anao tia Jehovah ndreky mazoto manompo izy erakany vitanao.​—Mat. 24:14.

12. Tahotro karakory ma tsy nanan̈any Adama ndreky Eva, baka io ino vokany?

¹² Jehovah fo atahora. Tsy tahotro jiaby ratsy. Tokony havozo atsika tsao han̈ano raha mampalahelo Jehovah. (Sal. 111:10) Koa mba nanan̈a tahotro zen̈y Adama ndreky Eva, otrizay iro tsy nivadiky tamy Jehovah. Tsy zen̈y ndraiky fa iro tsy nitandren̈y Jehovah. Nibian̈a masondro iro koa fa tsy nan̈araka volan̈any Jehovah, ke tontohitry iro fa iro panota. Zanakandro nanjary nandova fahotan̈a ndreky fahafatesan̈a. Loso haindro fa tsy nety raha nataondro, avio iro nen̈atra, ke nizaha raha nisikinin̈y.​—Gen. 3:7, 21.

13-14. a) Koa zahan̈a 1 Petera 3:21, nan̈ino atsika tsy tokony mavozo maty? b) Ino aby antony tokony hitiavantsika Jehovah?

¹³ Atsika koa mavozo tsao han̈ano raha mampalahelo Jehovah, atsika tsy havozo maty fotony Jehovah efa nan̈ano raha hahavy atsika ho velon̈o tsisy farany. Izikoa san̈atria atsika man̈ano fahotan̈a maventy kanefa ten̈a mibebaka amy fô, tsy mety ho Jehovah eky tsy han̈ambela hadisovan̈antsika. Hamindra fô amintsika izy, baka amy finoantsika soron̈o nataony Zanany. An̈isany fomba ten̈a maventy an̈aboahantsika finoan̈antsika, fan̈anaovantsika fanokananten̈a ndreky batisa.​—Vakia 1 Petera 3:21.

¹⁴ Maro antony tokony hitiavantsika Jehovah. Iô raha maro tsara amezany atsika isanandra, avio mbala ampianariny atsika koa fahamarin̈ana ndreky raha handeha hataony. (Jaona 8:31, 32) Namezany atsika koa fiangonan̈a hitaridalan̈a atsika ndreky hanohan̈a atsika. Man̈ampy atsika amy problemo mahazo atsika izy salakady mampan̈anten̈a atsika fiain̈ana milamin̈y ndreky tsisy farany aminy hoavy. (Sal. 68:19; Apok. 21:3, 4) Koa alaintsika onon̈o fitiavany Jehovah atsika ndreky raha efa namezany atsika, hitombo fitiavantsika izy. Sady atsika koa tia Jehovah, atsika loso mavozo tsao han̈ano raha mampalahelo izy.

15. Ino nahavy Makayla tsy navozo eky?

¹⁵ Tsy nazovo tsao han̈ano hadisovan̈a eky Makayla, araiky taloha tarỳ in̈y, koa fa loso takany fa Jehovah io ten̈a tia mamindra fô. Ho izy: “Loso nazava tsara taminaka fa atsika jiaby io tsisy lavorary, ke samy mety han̈ano hadisovan̈a aby. Nanjary haiko koa fa tia atsika Jehovah ke han̈ambela hadisovan̈antsika baka amy soron̈o nataony Zanany.” Fitiavany Makayla Jehovah nahavy izy nanokanten̈a taminany ndreky natao batisa.

16. Ino raha nan̈ampy Miles tsy havozo mamany eky?

¹⁶ Miles, araiky navozo mamany in̈y, nangataka fan̈ampian̈a tamy piandraikitry faritry. Ho izy: “Araiky taminiry olobeny fo koa kaiky panompony Jehovah. Nampiany zaho hahita fomba han̈azavan̈a amy mamako fa fanapahankevitrinaka tompony hatao batisa io fa tsy raha narosorosokony papako foeky.” Neloko mare mamany Miles ke tsy maintsy niala nipetraka tamy mamany izy. Fa ndray zen̈y izy tsy nimpody afara. Karaha ty ho Miles: “Iro raha maro tsara namezany Jehovah zaho aby io ten̈a niditry lalin̈y tamy fonaka. Zaho koa fa mieritreritry mare momba vidipan̈avotan̈a nataony Jesosy, hitako fa tia zaho aminy ankitiny Jehovah. Firitriretan̈a raha zen̈y nahavy zaho nanokanten̈a tamy Jehovah ndreky natao batisa.”

17. Ino raha mety porofoentsika tsiaraikiaraiky?

¹⁷ Nihoaniny Eva voany kakazo tsy nimboany Jehovah nihoanin̈y in̈y. Zen̈y man̈ambara fa izy tsy nan̈araka volan̈any Jehovah. Adama koa fa namezany Eva, izy nihina koa. Hita baka amy zen̈y fa tsy nankasitrahindro foeky raha nataony Jehovah tamindro. Fa atsika tsiariakiaraiky afaka man̈aboaka fa atsika tsy mankasitraka raha nataoniry Adama ndreky Eva! Atsika koa man̈ano batisa, aboakantsika amy Jehovah fa atsika man̈eky ndreky mino fa izy fo tokony hamaritry ny tsara ndreky ratsy amy fiain̈anantsika. Zen̈y koa ahitan̈a fa tiantsika ndreky atokisantsika Babantsika io.

18. Ino raha tokony hataonao izikoa anao tihanompo Jehovah fo?

¹⁸ Afarany batisa, tsy sitrapontsika eky ataontsika fa niny Jehovah fo. Mandeha antapitrisany panompony Jehovah man̈ano karaha zen̈y isaka taon̈o. Ho vitanao koa han̈ano karaha zen̈y izikoa anao mifen̈y mianatra Volan̈a Zan̈ahary, mifanerasera amindro rahalahy ndreky ranabavy, mazoto mikoran̈a raha nianaranao momba Jehovah. (Heb. 10:24, 25) Koa fa hanapakevitry anao, zahava raha koran̈iny Jehovah amy Volan̈anazy ao ndreky torohevitriny fandaminan̈anazy. (Isaia 30:21) Hahomby edy anao amy raha jiaby hataonao.​—Ohab. 16:3, 20.

19. Ino raha tokony halainao onon̈o fo? Ino antony?

¹⁹ Izikoa alainao onon̈o fo hatsaran̈a azonao isaka anao man̈araka volan̈a Jehovah, hitombo koa fitiavanao toro lalan̈anazy. Ke tsy ho vitany Satana foeky hampivadiky anao amy Jehovah. Miniminia hely baka anao miain̈y arivo taon̈o teteky iô. Amy leranizen̈y, ho ravoravo anao fotony nety tsarabe fanapahankevitrinao nan̈ano batisa in̈y!