1. Ana Adamu ni Hawa ŵajasile cici, soni ana yakuyicisya yakwe yaliji yamtuli?

ANA akuganisya kuti ŵani ŵakusosekwa kuŵika malamusi gakwamba cambone soni cakusakala? Adamu ni Hawa paŵalile cisogosi ca m’citela cakumanyisya yambone ni yakusakala, ŵalosisye kuti nganamkulupililaga Yehofa soni malamusi gakwe. Jemanjaji ŵasagwile kuliŵicila jika malamusi gakwamba cambone soni cakusakala. (Gen. 3:22) Nambo aganicisye yaŵajasile jemanjaji. Ŵajasile upile wakuŵa paunasi ni Yehofa. Ŵajasilesoni upile wakutama ni umi mpaka kalakala, soni ŵapelele ŵanace ŵawo ulemwa ni ciwa. (Alo. 5:12) Yaŵasagwile Adamu ni Hawa yayikasisye yipwetesi.

2-3. (a) Ana nduna ja ku Ifiyopiya jatesile cici pandaŵi jiŵamlalicile Filipi? (b) Ana ni majali gapi gatukusapocela, soni ana citujanje yiwusyo yapi?

² Alole kulekangana kwakupali pasikati pa yiŵatesile Adamu ni Hawa ni nduna ja ku Ifiyopiya jili jipikene utenga wa Mlungu kutyocela kwa Filipi. Ndunaji jayamicile mnope yaŵatesile Yehofa soni Yesu, mwamti ndaŵi jijojo jabatiswe. (Mase. 8:34-38) Patulipelece kwa Mlungu mpela mujatendele ndunaji mpaka kwikana pakubatiswa, tukusalosya kuti tukusayamicila yindu yatutendele Yehofa soni Yesu. Tukusalosyasoni kuti tukusamkulupilila Yehofa soni kumanyilila kuti jwalakwe jika ni jwakusosekwa kuŵika lilamusi lyakwamba cambone ni cakusakala.

³ Aganicisye ya majali gatukusapocela patukumtumicila Yehofa. Gane mwa majaliga gali cembeceyo cakuti Yehofa cacitupa yindu yosope yiŵajasile Adamu ni Hawa, kupwatikapo upile wakutama ni umi mpaka kalakala. Ligongo lya cikulupi cetu mwa Yesu Klistu, Yehofa akusatukululucila yakulemwa yetu soni akusatupa cikumbumtima cambone. (Mat. 20:28; Mase. 10:43) Tukusaŵasoni m’liŵasa lya ŵakutumicila ŵa Yehofa ŵakwembeceya yindu yambone msogolo. (Yoh. 10:14-16; Alo. 8:20, 21) Nambope, atamose kuti pana majaliga, ŵandu ŵane ŵakusammanyilila  Yehofa ngakusakuya cisyasyo ca nduna ja ku Ifiyopiya jila. Ana cici cacikusicalepelekasya jemanjaji kubatiswa? Soni ana mpaka atende wuli kuti amalane ni yakusawusyayi?

4-5. Ana ni yakusawusya yapi yaŵasimene nayo Avery soni Hannah?

⁴ Kulikayicila. Acinangolo ŵa Avery ali Ŵamboni sya Yehofa. Babagwe akwete mbili jambone mnope ligongo lyakuti akusasamalila cenene liŵasa. Nambosoni ali jwamkulungwa jwa mumpingo jwakwiganya mwakamula mtima. Nambope, Avery jwajogopaga kubatiswa. Ligongo cici? Jwalakwe jwatite, “Naganisyaga kuti ngangombola kola ndamo syambone mpela syakwete baba.” Jwalakwe jwaganisyaga kuti ngasakombola kusamalila maukumu gacacipocela msogolo. Jwasasilesoni kuti, “Najogopaga kuti naga ngubatiswa, cacisalila kuti mbopeleje pekuga lya ŵandu, kuŵeceta ngani, kapena kwalongolela abale ni alongo mu undumetume wa mumgunda.”

⁵ Hannah, jwakwete yaka 18 jwalikayicilaga. Jwalakwe jwakulile m’liŵasa lya Mboni sya Yehofa. Atamose yaliji m’yoyo, jwakayicilaga kuti nganaŵa atemi mwakamulana ni malamusi ga Yehofa. Ligongo cici? Jwalakwe jwakwete ndamo jakulikayicila. Ndaŵi sine, Hannah jwalipikanaga kuŵa jwangali mate mwamti jwaliwulasyaga, yayatendekasyaga kuti yindu yisakale mnope. Jwalakwe jwatite, “Pangali jwanamsalile yanatendagayi atamose acinangolo ŵangu. Naganisyaga kuti Yehofa nganaŵa asacile kuti mbe jwakutumicila jwakwe ligongo lya yindu yanatendaga.”

6. Ana cici cacamlepelekasyaga Vanessa kubatiswa?

⁶ Kujigalila yitendo ya acimjetu. Vanessa, jwakwete yaka 22 jwatite, “Nakwete mjangu jusyesyene junamanyigene najo kalakala.” Nambope, mjakweju nganamlimbikasyaga Vanessa kuti abatiswe. Yeleyi nganiyimnonyelaga Vanessa. Nambo jwalakwe jwatite, “Yaliji yakusawusya kupata acimjangu, soni nadandawulaga kuti naga nguleka kunguluka ni njanguju nikuti ngasimbatasoni mjangu jwine jwa pamtima.”

7. Ana Makayla, jwajogopaga cici, soni ligongo cici?

⁷ Kogopa kulemwa. Msikana jwine lina lyakwe Makayla, pajwaliji ni yaka 5, mcimwenegwe ŵamtyosisye mumpingo. Msikanaju pajwakusile, jwayiweni muyakwayile acinangolo ŵakwe ligongo lya yitendo ya mcimwenegwe. Makayla jwatite, “Najogopaga kuti naga ngubatiswa, pacinjitenda cakulemwa, cacindyosya mumpingo soni cinjakuŵasya mnope acinangolo ŵangu.”

8. Ana Miles jwajogopaga cici?

 ⁸ Kogopa kutusisya. Babagwe Miles ni mamagwe ŵakumsimana akusatumicila Yehofa, nambo mamagwe ŵakumŵeleka nganaŵa Ŵamboni. Miles jwatite, “Natemi ni mama kwa yaka 18, nambo najogopaga kwasalila kuti ngusaka kubatiswa. Nawonaga muŵatendelaga yindu pandaŵi jaŵatandaga baba ŵangu usyesyene. Najogopaga kuti cangalipile.”

9. Ana cici campaka citendekwe naga tukulijiganya mwaciŵelele cinonyelo soni kulitimalika kwa Yehofa?

⁹ Adamu ni Hawa ŵasagwile ngatumicila Yehofa ligongo ŵalepele kulimbisya cinonyelo cawo pa jwalakwe. Nambope atamose kuti yaliji m’yoyo, Yehofa jwakundile kuti atame ni umi kwa ndaŵi jelewu pakusaka kuti akole ŵanace nambosoni kuti asagule malamusi gawo gakwalelela ŵanacewo. Pacangakaŵapa ciyimanyice kuti yaŵatesile Adamu ni Hawa yaliji yakuloŵela mwakusagula kuti alisagulileje jika yakutenda pali pangali Yehofa. Mwanace jwawo jwamkulungwa jwam’wuleje mpwakwe jwangalemwa, kaneko yindu yaciwawa soni yakulinonyela yatamilicice mwa ŵandu. (Gen. 4:8; 6:11-13) Nambope, Yehofa jwakwete litala lyakwakulupucisya ŵanace ŵa Adamu ni Hawa ŵakasacile kumtumicila jwalakwe. (Yoh. 6:38-40, 57, 58) Patukulijiganya yejinji pakwamba yatite Yehofa pakulitimalika soni mwaciŵelele cinonyelo cakwe, cinonyelo cetu pa jwalakwe cicikula mnope. Tuciŵambala kutenda mpela yaŵatesile Adamu ni Hawa soni tucilipeleka kwa Yehofa.

10. Ligongo cici kuganicisya mwakusokoka lilemba lya Salimo 19:7 mpaka kutukamucisye kumtumicila Yehofa?

¹⁰ Tujendelecele kulijiganya yakwamba Yehofa. Patukulijiganya yejinji yakwamba Yehofa, cikulupi cetu ciciŵa cakulimba yayicitendekasya kuti tumtumicileje jwalakwe mwakusangalala. Avery, jwatumsasile jula jwatite, “Nalesile kulikayicila ligongo lyakuŵalanga soni kuganicisya mwakusokoka cilanga cacili pa Salimo 19:7.” (Aŵalanje.) Avery pajwamanyilile yakusatenda Yehofa pakwanilisya cilangaci, cinonyelo cakwe pa jwalakwe cakusile mnope. Cinonyelo ngacikusagamba kulimbisya  cikulupi cetu nambo cikusatukamucisya kuganicisya mnope yakwamba Yehofa ni kutendaga yakusasaka jwalakwe. Hannah, jwatumsasile jula jwatite, “Kupitila mkuŵalanga Baibulo soni kulijiganya, namanyilile kuti pandaŵi janaliwulasyaga jila, nganiyimsangalasyaga Yehofa.” (1 Pet. 5:7) Hannah ‘jwatendaga yagakusaŵeceta maloŵe ga Mlungu.’ (Yak. 1:22) Ana yakuyicisya yakwe yaliji yamtuli? Jwalakwe jwatite, “Panayiweni kuti kumpikanila Yehofa kuli kwakamucisya, nakusisye cinonyelo cangu pa jwalakwe. Sambano ndili jwakusimicisya kuti ndaŵi syosope Yehofa calongoleleje pangusosecela cikamucisyo.” Hannah jwakombwele kumalana ni cisyoŵe cakuliwulasya cila. Jwalakwe jwalipelece kwa Yehofa mwamti jwabatiswe.

11. Ana Vanessa jwatesile cici kuti akole acimjakwe ŵambone, soni ana mpaka tulijiganye cici?

¹¹ Tusaguleje acimjetu mwalunda. Vanessa, jwatumsasile jula, kaneko jwamanyilile kuti mjakwe jula ni juŵam’wucisyaga munyuma pakumtumicila Yehofa. M’yoyo, jwalesile kunguluka ni mjakwejo. Nambope Vanessa jwatesile yejinji. Jwalakwe jwatesile yakomboleka kupata acimjakwe ŵasambano mumpingo wakwe. Jwasasile kuti cisyasyo ca Nowa ni liŵasa lyakwe ni cacamkamucisye. Jwalakwe jwatite, “Jemanjaji ŵasyungulilidwe ni ŵandu ŵanganamnonyelaga Yehofa. Nambo jemanjaji ŵakwete acimjawo ŵambone.” Panyuma pakubatiswa, Vanessa jwaŵele mpayiniya. Kaneko jwatite, “Yeleyi yangamucisye kola acimjangu ŵambone mumpingo mwangu soni ku mipingo jine.” M’wejisoni mpaka tukole acimjetu ŵambone mwakutenda yampaka tukombole pakukamula masengo gatupele Yehofa.—Mat. 24:14.

12. Ana Adamu ni Hawa nganakola woga wamtuli, soni ana yakuyicisya yakwe yaliji yamtuli?

¹² Tukoleje woga wakuŵajilwa. Ndaŵi sine woga ukusakamucisya. Mwacisyasyo, tukusosekwa kogopa kumkuŵasya Yehofa. (Sal. 111:10) Yikaŵe kuti Adamu ni Hawa ŵajogopaga kumkuŵasya Yehofa, nikuti ngamkanamjimucila. Nambo ŵamjimucile. Panyuma pakutenda yeleyi, meso gawo gawugwice m’litala lyakuti ŵamanyilile kuti ali ŵakulemwa. Jemanjaji ŵapelele ŵanace ŵawo ulemwa ni ciwa. Ligongo lyakuti jemanjaji ŵamanyilile kuti  nganapikanila lilamusi lya Mlungu, ŵatesile sooni ligongo lyakuti ŵaliji makonope mwamti ŵaliwecice masamba.—Gen. 3:7, 21.

13-14. (a) Mwakamulana ni 1 Petulo 3:21, ligongo cici ngatukusosekwa kogopa ciwa? (b) Ana tukwete magongo gapi gakututendekasya kumnonyela Yehofa?

¹³ Yili yisyene kuti tukusosekwa kogopa kumkuŵasya Yehofa. Nambope, ngatukusosekwa kogopa ciwa ligongo Yehofa alinganyisye litala lyakutukamucisya kuti citukapate umi wangamala. Naga tutesile ulemwa nambo ni kupitikuka mtima yisyesyene, Yehofa cacitukululucila yakulemwa yetu. Jwalakwe cacitukululucila naga tukulupilila mbopesi ja ciwombolo ja Mwanace jwakwe. Litala limo lyatukusalosya kuti tukwete cikulupi lili kupeleka umi wetu kwa Mlungu soni kubatiswa.—Aŵalanje 1 Petulo 3:21.

¹⁴ Tukwete magongo gejinji gakututendekasya kumnonyela Yehofa. Jwalakwe ngakusagamba kutupape yindu yambone yatukusasangalalaga nayo lisiku lililyose, nambo akusatujiganyasoni usyesyene wakwamba jwalakwe soni yakulinga yakwe. (Yoh. 8:31, 32) Jwalakwe atupele mpingo wa Ciklistu kuti utulongoleleje soni kutukamucisya. Akusatukamucisyasoni kupilila yakusawusya yetu, soni akusatupa cembeceyo cakuti tucitama ni umi wamlama msogolo. (Sal. 68:19; Ciw. 21:3, 4) Patukuganicisya mwakusokoka yindu yatutendele kala Yehofa, pakutulosya kuti akusatunonyela, yikusatutendekasya kuti tumnonyeleje jwalakwe. Soni patukumnonyela Yehofa, tukusakola woga wakuŵajilwa. Tukusajogopa kumkuŵasya Yehofa jwatukusamnonyela mnope.

15. Ana Makayla jwamalene camtuli ni ndamo jakogopa kulemwa?

¹⁵ Makayla, jwatumsasile kundanda jula, jwamalene ni ndamo jakogopa kulemwa pajwapikanicisye kuti Yehofa ali jwakululuka. Jwalakwe jwatite, “Namanyilile kuti wosopewe tuli ŵangali umlama soni tukusalemwaga. Nambo napikanicisyesoni kuti Yehofa akusatunonyela soni akusatukululucila kupitila mu mbopesi ja ciwombolo.” Cinonyelo cakwe pa Yehofa camtendekasisye kuti alipelece kwa jwalakwe soni kubatiswa.

16. Ana cici cacamkamucisye Miles kumalana ni woga?

¹⁶ Miles, juŵajogopaga mamagwe kuti camkanye kubatiswa, jwaŵendile cikamucisyo kwa jwakulolela mkuli. Miles jwatite, “Jwakulolela mkuliju jwasalile kuti nombenajo jwakulile m’liŵasa lyelekangane dini. Jwangamucisye kuganicisya yampaka ndende pakwakamucisya mama ŵangu kupikanicisya kuti ngaŵa baba ni ŵaŵanganganicisyaga kuti mbatiswe, nambo caliji cisagula cangu.” Miles ali ŵasalile mamagwe yeleyi nganasangalala nayo. Pa ligongo lyeleli, jwasosekwaga kutyoka panyumbapo, nambo nganawujila panyuma pa cisagula cakwe cila. Jwalakwe jwatite, “Kulijiganya yindu yambone yandendele Yehofa kwangwayiye mnope mumtima. Panaganicisyaga mwakusokoka ya mbopesi ja ciwombolo ja Yesu, namanyilile kuti Yehofa akusanonyela. Nganisyo syelesi syandendekasisye kuti nalipelece kwa Yehofa soni kubatiswa.”

17. Ana m’weji tukwete ukumu wapi?

¹⁷ Adamu ni Hawa paŵalile cisogosi ca m’citela ca mumgunda wa Edeni, ŵalosisye kuti ŵamkanile Yehofa. Adamu paŵapikanile ŵamkwakwe, jwalosisye mtima wangayamicila pa yindu yambone yaŵamtendele Yehofa. Wosopewe mpaka tukombole kutenda yindu yakulosya kuti nganituŵa mpela Adamu ni Hawa. Tukusayamicila cilicose catutendele Yehofa. Patukubatiswa, tukusalosya kuti tukusakulupilila kuti Yehofa akwete ukumu wakuŵika malamusi gakwamba cindu cambone ni cakusakala kwa m’weji. Tukusalosyasoni kuti tukusitwanonyela soni kwakulupilila Atati ŵetu.

18. Ana mpaka tutende wuli kuti yindu yitujendeleje cenene patukumtumicila Yehofa?

¹⁸ Panyuma pakubatiswa, tukusosekwa kwendelecela kutenda yakusasaka Yehofa, ngaŵaga yetu. Ŵakutumicila ŵajinji ŵa Yehofa akusatama mwakamulana ni malamusi ga Yehofa. Mpaka tuŵe mpela jemanjaji mwakwendelecela kupikanicisya mwakusokoka Maloŵe ga Mlungu, kungulukaga ni abale ni alongo soni kulimbicila kwasalila ŵandu ŵane yatwalijiganyisye yakwamba Atati ŵetu ŵacinonyelo. (Aheb. 10:24, 25) Patukutenda yisagula, tupikanileje yakusatusalila Yehofa kupitila m’Maloŵe gakwe soni m’likuga lyakwe. (Yes. 30:21) Naga tukutenda yeleyi, yindu yicitujendela cenene paumi wetu.—Mis. 16:3, 20.

19. Ana tukusosekwa kwendelecela kuganicisya ya cici, soni ligongo cici?

¹⁹ Patukwendelecela ganicisya ya majali gatukusapata ligongo lyakamulicisya masengo malamusi ga Yehofa, tucijendelecela kumnonyela jwalakwe soni malamusi gakwe. Kaneko Satana ngasakombola kutunyenjelela kuti tulece kumtumicila Yehofa. Agambe ganicisya mucacipikanilaga panyuma pa yaka 1,000. Pacaciganicisyaga ya cisagula caŵatesile munyuma pakusagula kubatiswa, caciyiwona kuti ŵatesile cisagula cambone mnope.