1. Mang e ke mul u pa’ Adam nge Efa, ma mang wenegan ni ke yib riy?

GA BE lemnag ma mini’ e susun ni nge dugliy ko mang e ba fel’ nge mang e ba kireb? Nap’an ni kay Adam nge Efa wom’engin fare ke gek’iy ni ma tamilangnag an’uy ko tin nib fel’ nge tin nib kireb, ma bod ni ka rognew nder pagan’row ngak Jehovah nge pi motochiyel rok. Kar mel’egew ni ngar dugliyew ko mang e ba fel’ ma mang e ba kireb. (Gen. 3:22) Machane, mu lemnag e n’en ni ke mul u pa’row. Ke kireb e tha’ u thilrad Jehovah, miki mul e athap ko yafos ni manemus u pa’row, ma kur afuwegew e denen nge yam’ ngak pi fakrow. (Rom. 5:12) N’en ni ke mel’eg Adam nge Efa e ke yibnag e gafgow.

2-3. (a) Mang e rin’ fare moon nu Ethiopia u nap’an ni yib Filip i machibnag? (b) Mang boch e tow’ath nra yag ngodad u nap’an ni gad ra un ko taufe, ma mang boch e deer ni gad ra weliy?

² Am taarebrogonnag e n’en ni rin’ Adam nge Efa ko n’en ni rin’ fare moon nu Ethiopia u nap’an ni yib Filip i machibnag. Re moon nu Ethiopia nem e ri felfelan’ u nap’an ni tamilang u wan’ e n’en ni ke rin’ Jehovah nge Jesus ni fan ngak, ma ka chingiyal’ nem ma aram me un ko taufe. (Acts 8:34-38) Nap’an ni gad ra ognag e yafos rodad ngak Got ma gad un ko taufe, ni bod rogon e n’en ni rin’ fare moon nu Ethiopia, ma aram e gad be dag ni gad be pining e magar ngak Jehovah nge Jesus ko n’en ni kar rin’ew ni fan ngodad. Ku gad be dag riy nib pagan’dad ngak Jehovah ma gad manang ni ir e en nsusun e nge dugliy ko mang e ba fel’ nge mang e ba kireb.

³ Am lemnag e pi tow’ath nra yag ngodad u nap’an ni gad ra pigpig ngak Jehovah! Reb riy e aram e ra yag ngodad e tin ni ke mul u pa’ Adam nge Efa nib muun ngay e athap ko yafos ndariy n’umngin nap’an. Ma bochan ni ke mich Jesus Kristus u wan’dad,  ma aram e ke n’ag Jehovah fan e kireb rodad ma ke beechnag e nangan’ rodad. (Matt. 20:28; Acts 10:43) Ku gad ra mang bang ko tabinaw rok Jehovah ni piin bay riy e yad ba fel’ u wan’, ma kub fel’ e athap rodad boch nga m’on. (John 10:14-16; Rom. 8:20, 21) Yugu aram rogon nrib tamilang e pi tow’ath ney ni kan micheg, machane ka bay boch e girdi’ ni kar nanged Jehovah nder yag rorad ni ngar folwokgad rok fare moon nu Ethiopia. Ere mang e rayog ni be talegrad ndab ra uned ko taufe? Ma uw rogon ni ngar gelgad ko pi n’ey?

4-5. Mang boch e magawon ni i mada’nag l’agruw e fel’ yangaren ni ka nog Avery nge Hannah ngorow?

⁴ Der pagan’rad ngorad. Gallabthir rok Avery e yow l’agruw e Pi Mich rok Jehovah. Chitamangin e goo yimanang ni ir reb e matam nri ma ayuweg e tabinaw rok, maku ir reb e piilal u lan e ulung ni ma rin’ e maruwel rok nib fel’ rogon. Yugu aram rogon ma ka be maruwaran’ Avery ni nge un ko taufe. Mang fan? I yog ni gaar: “Da ug lemnag nrayog rog ni nggu rin’ e tin be rin’ e chitamag.” Maku reb e, i lemnag Avery ndabiyog rok ni nge rin’ boch e maruwel u lan e ulung ni yira pi’ ngak boch nga m’on. I gaar: “Be magafan’ug ni nga nog ngog ni nggu fek e meybil u fithik’ e girdi’, ara nggu pi’ e welthin, ara nggu yarmiy e muulung ni fan ko machib.”

⁵ Hannah ni 18 e duw rok e ku ir be’ nder ma pagan’ ngak. Gallabthir rok e yow l’agruw e tapigpig rok Jehovah. Yugu aram rogon, ma ka be lemnag ndabiyog rok ni nge fol ko pi motochiyel rok Jehovah. Mang fan? Ya ma lemnag ni ir be’ ndariy fan. Yu ngiyal’ e ma rin’ boch ban’en ni nge amith dow riy, machane fin aram e be mun daken e magawon rok. I yog ni gaar: “Da ug weliy salpeg ko gallabthir rog, ma kug ma lemnag ndabiyog ni nggu fel’ u wan’ Jehovah ni bochan e n’en ni gu be rin’.”

6. Mang e i taleg Vanessa nde un ko taufe?

⁶ Be magawonnagrad e pi fager rorad. Vanessa ni 22 e duw rok e yog ni gaar, “Immoy be’ ni fager rog ni ke chugur i gaman ragag e duw ni gamow manangew gamow.” Machane, re fager rok Vanessa nem e da i ayuweg ni nge rin’ e n’en ni be nameg, ni aram e nge un ko taufe. Re n’em e ri kirebnag laniyan’ Vanessa, me yog ni gaar, “Ba mo’maw’ ngog ni nggu m’ag fager ko girdi’. Ere gu lemnag ni faan gu ra digey e re fager rog nem, ma aram e dabkiyog ni nggu pirieg be’ ni ngari pach e thin romow.”

7. Mang e i magar reb e fel’ yangaren ngay ni ka nog Makayla ngak, ma mang fan?

⁷ Yad be magar nri chey mar rin’ed ban’en nib kireb. Lal e duw rok Makayla u nap’an nni tharbog walagen ni pumoon ko ulung. Nap’an ni be ilal i yan, ma i guy gelngin e kireban’ ni be  tay e gallabthir rok ni bochan e n’en ni ke buch rok walagen. I yog ni gaar, “Ug magar nrug un ko taufe mug rin’ ban’en nib kireb, min tharbogeg ko ulung, miki gel boch e kireban’ ko gallabthir rog.”

8. Mang e i k’aring e marus ngak reb e pagel ni ka nog Miles ngak?

⁸ Yad be rus ko togopuluw. Chitamangin Miles nge bin ni ka fini leay e ppin e yow ma pigpig ngak Jehovah, machane chitiningin Miles e danga’. I yog Miles ni gaar: “Ragag nge meruk e duw ni ug par ko chitinag, ma ug rus ni nggog ngak ni gu baadag ni nggu un ko taufe. Kug guy e n’en ni rin’ u nap’an ni mang chitamag reb e Pi Mich Rok Jehovah. Ere ug magar nri chey miki togopuluw ngog.”

9. Mang e ra buch u nap’an ni ga ra nang gelngin e t’ufeg nge gum’an’ rok Jehovah?

⁹ Adam nge Efa e ra dugliyew ndab kur pigpiggow ngak Jehovah ni bochan e dar gelnagew e t’ufeg rorow ngak. Yugu aram rogon, me pagrow Jehovah ni ngar parew nib n’uw nap’an mar fakayew boch e bitir. Ki pagrow ni ngar dugliyew rogon ni ngar chuguliyew pi fakrow. Wenegan ni yib ni bochan e de fol Adam nge Efa rok Jehovah e munmun me m’ug riy nri yow balyang ko n’en nrin’ew. I chel e bin th’abi ilal e pumoon ni fakrow nge thang e fan rok walagen, me tomur riy ma aram me yoor e girdi’ ni ta cham ma goo yad e yad be lemnagrad. (Gen. 4:8; 6:11-13) Yugu aram rogon, me maruwel Jehovah u yugu reb e kanawo’ ya nge yag ni nge ayuweg urngin pi fak Adam nge Efa ni yad baadag ni ngar pigpiggad ngak. (John 6:38-40, 57, 58) Ra yoor ban’en nim nang u murung’agen gelngin e gum’an’ nge t’ufeg rok Jehovah ngodad, ma aram e ra gel e t’ufeg rom ngak. Re n’ey e ra k’aringem ni ngam siyeg e bin ni mel’eg Adam nge Efa e kanawo’, me yag nim ognag e yafos rom ngak Jehovah.

10. Mang fan ni faan ga ra fal’eg i lemnag e thin ni bay ko Psalm 19:7, ma ra ayuwegem ni ngam pigpig ngak Jehovah?

¹⁰ Mu ulul i fil murung’agen Jehovah. Ra yoor ban’en nim nang u murung’agen Jehovah, ma aram e rayog ni ngari pagan’um nrayog ni ngam pigpig ngak nib fel’ rogon. Avery ni ka fin nni weliy murung’agen e yog ni gaar: “I yag ni nge pagan’ug u nap’an nug beeg mug fal’eg i  lemnag fapi thin ni kan micheg ko Psalm 19:7.” (Mu beeg.) Nap’an ni guy Avery rogon ni ke lebguy Jehovah e re thin ney, ma aram mi ri gel feni t’ufeg Got rok. T’ufeg e gathi kemus ni ma gelnag e pagan’ rodad, ya ku ma ayuwegdad ni nge m’on Jehovah u wan’dad nge tin nib m’agan’ ngay. Hannah ni ka fin nni weliy murung’agen e yog ni gaar: “U daken e beeg Bible nge fol Bible ni ug tay, ma aram me tamilang u wan’ug ni faan gu ra amithnag dowag, ma aram e gu be amithnag laniyan’ Jehovah.” (1 Pet. 5:7) Munmun ma aram me yag ni nge ‘maruwel’ Hannah ko thin rok Got ni be beeg. (Jas. 1:22) Mang angin ni yib riy? I yog ni gaar: “Nap’an nug guy angin ni be yib ngog ni bochan e gu be fol ko thin rok Jehovah, ma aram mi ri gel feni t’uf rog. Ka fini mudugil lanin’ug ni gubin ngiyal’ nra pow’iyeg Jehovah u nap’an nra t’uf e ayuw rok rog.” Yan i tomur riy me yag rok Hannah ni nge tal i amithnag downgin, ma aram me ognag e yafas rok ngak Jehovah me un ko taufe.

11. Uw rogon ni pirieg Vanessa boch e fager nib fel’, ma mang e rakyog ni ngad filed riy?

¹¹ Mu fal’eg i mel’eg e pi fager rom. Vanessa ni faan kad weliyed murung’agen e munmun me tamilang u wan’ ni fager rok e aram e en ni be taleg nder yag ni nge pigpig ngak Jehovah. Ere tal ndaki chag ngak. Machane, gathi kemus e n’en ni rin’, ya ki athamgil ni nge gay boch e fager nib beech u lan e ulung. Ke yog ni n’en ni rin’ Noah nge chon e tabinaw rok e ayuweg. I yog ni gaar: “Ur pared rorad ngaur rin’ed boch ban’en u taabang ni yugu aram rogon ni girdi’ u toobrad e de t’uf Jehovah rorad.” Tomuren ni un Vanessa ko taufe, ma aram me un ko pioneer. I yog ni gaar: “Re n’ey e ke ayuwegeg ni nggu pirieg boch e fager nib manigil u lan e ulung rog nge yugu boch e ulung.” Ku arrogom nrayog ni ngam pirieg boch e fager ni faan ga ra yoornag e tayim rom ni fan ko fare maruwel ni ke pi’ Jehovah ngodad.​—Matt. 24:14.

12. Mang e de maruweliy Adam nge Efa, ma mang wenegan ni yib ngorow?

¹² Nge yib madgun Got u wan’um. Faanra ri gad be tayfan Jehovah, ma aram e dab da rin’ed ban’en nde m’agan’ ngay. (Ps. 111:10) Faan gomanga maruweliy Adam nge Efa ni nge yag e re lem ney ngorow, ma aram e dab ra togopuluwgow ngak Jehovah. Machane bin riyul’ riy e kar togopuluwgow ngak. Tomuren ni  kar togopuluwgow ma aram me tamilangan’row ni kar denengow. Ere denen rorow e rayog ni nge af ngak pi fakrow. Bochan ni ke tamilangan’row u rarogorow, ma aram mar tamra’gow ya kar nangew ni yow bay u tamilang ma aram mi yow yuy’ yuwan e fig ngar m’agew nga lukngurow.​—Gen. 3:7, 21.

13-14. (a) Mang fan ndariy rogon ni ngad rusgad ni ngad m’ad nrogon nib puluw ko thin ni bay ko 1 Peter 3:21? (b) Mang boch i fan ni nge t’uf Jehovah rodad?

¹³ Dariy rogon ni ngad rusgad ni ngad m’ad. Ya ke bing Jehovah e kanawo’ ni nge yag e yafos ni manemus ngodad. Faanra kad denengad, mad kalgadngan’dad, ma ra n’ag Jehovah fan e denen rodad u daken fare biyul ni maligach ni ke pi’ Fak. Reb e kanawo’ nrib manigil nrayog ni ngad daged e michan’ rodad riy e aram e ngad ognaged e yafos rodad ngak Got ma gad un ko taufe.​—Mu beeg 1 Peter 3:21.

¹⁴ Boor fan ni nge t’uf Jehovah rodad. Gathi kemus ni ma pi’ e tin nib t’uf rodad u reb e rran ngu reb, ya ku ma fil ngodad e tin riyul’ u murung’agen nge tin nib m’agan’ ngay. (John 8:31, 32) Ke pi’ e ulung rok ni nge pow’iydad me ayuwegdad. Ku ma ayuwegdad u rogon ni ngad pithiged e magawon rodad e ngiyal’ ney, ma kki pi’ e athap ko yafos ni manemus ngodad boch nga m’on ndakuriy e magawon. (Ps. 68:19; Rev. 21:3, 4) Faan gad ra fal’eg i lemnag urngin ban’en ni ke rin’ Jehovah ni nge dag ni gad ba t’uf rok, ma ra k’aringdad ni ngad chugurgad ngak. Faanra ba t’uf Jehovah rodad, ma aram e ra yib madgun u wan’dad. Ku gad ra dabuy ni ngad kirebnaged laniyan’.

15. Uw rogon ni chuw e marus rok Makayla?

¹⁵ Makayla ni kan weliy murung’agen e nap’an ni nang rogon ni ma n’ag Jehovah fan e kireb, ma aram e daki rus. I yog ni gaar: “Ke tamilang u wan’ug ni gad gubin ndawor da flontgad ma gad ma oloboch. Machane kug nang ni gad ba t’uf rok Jehovah, ma ra n’ag fan e kireb rodad u daken fare biyul ni pi’ Jesus.” T’ufeg rok ngak Jehovah e ir e k’aring ni nge ognag ir me un ko taufe.

16. Uw rogon ni gel Miles ko marus ni i tay nri chey min togopuluw ngak?

¹⁶ Miles ni kan weliy murung’agen e i rus nri togopuluw e chitiningin ngak ni bochan e be lemnag ni nge un ko taufe. Ere ning e ayuw ngak reb e walag ni ma lekag e ulung. I yog ni gaar: “Ku arrogon ir ni ilal u reb e tabinaw nde taareb e michan’ ko girdi’ riy. I ayuwegeg ni nggu lemnag e n’en nrayog ni nggog ngak e chitinag ya nge yag ni nang ni gag rog e kug dugliy ni nggu un ko taufe, ma gathi chitamag e be towasariyeg.” De felfelan’ e chitiningin Miles ko n’en ni yog ngak. Munmun ma aram e thingari chuw u tafen e chitiningin, machane ke t’ar u wan’ ni nge un ko taufe. I yog ni gaar: “Ri taw nga gum’irchaeg urngin ban’en nib manigil nug fil u murung’agen e tin nib fel’ ni ke rin’ Jehovah ni fan ngog. Nap’an nug fal’eg i lemnag murung’agen fare maligach ni pi’ Jesus ma aram mi ri tamilang u wan’ug nri gub t’uf rok Jehovah. Re n’ey e k’aringeg ni nggu ognag e yafos rog ngak un ko taufe.”

17. Mang e thingar da rin’ed?

¹⁷ Nap’an ni kay Efa wom’engin fare ke gek’iy u Eden, ma aram me togopuluw ngak e Chitamangin. Nap’an ni un Adam ko n’en ni rin’ Efa, me m’ug riy ndariy fan u wan’ urngin ban’en nib fel’ ni ke rin’ Jehovah ni fan ngak. Gad gubin nthingar daged ni gad ba thil ngak Adam nge Efa, mab ga’ fan u wan’dad urngin ban’en ni ke rin’ Jehovah ni fan ngodad. Faan gad ra un ko taufe, ma aram e gad be dag ngak Jehovah nib mich u wan’dad ni bay mat’awun ni ir e nge yog ngodad ko mang e ba fel’ ma mang e ba kireb. Ku be m’ug riy nib t’uf e Chitamangidad rodad mab pagan’dad ngak.

18. Uw rogon ni nge yib angin e pigpig ni ga be tay ngak Jehovah?

¹⁸ Tomuren ni gad ra un ko taufe, mab t’uf ni ngad ululgad i rin’ e tin nib m’agan’ Jehovah ngay ma gathi tin ni gad baadag. Bokum milyon e girdi’ e yad be rin’ e re n’ey u gubin e duw. Rayog ni ngam bod e pi cha’ney ni faan ga ra guy rogon ni ngari tamilang e Thin rok Got u wan’um, ni aram e Bible; mu um chaggad e pi walag u taabang ni gubin ngiyal’, ma ga be machibnag ko girdi’ e tin ni kam fil u murung’agen e Chitamangidad ni bay u tharmiy. (Heb. 10:24, 25) Mu fol ko fonow ni be pi’ Jehovah ngom u daken e Thin rok nge ulung rok u nap’an ni ga be dugliy boch ban’en. (Isa. 30:21) Faan ga ra rin’ ni aray rogon, ma urngin ban’en ni ga ra rin’ e ra yib angin.​—Prov. 16:3, 20.

19. Mang e n’en nsusun ni ngam lemnag ni gubin ngiyal’, ma mang fan?

¹⁹ Faanra um guy angin ni be yib ngom ni bochan e be pow’iyem Jehovah, ma aram e ra gel feni t’uf Jehovah rom nge pi motochiyel rok. Faanra aray rogon ma aram e dariy ban’en nra ognag Satan nra talegnem ko pigpig ni ga be tay ngak Jehovah. Am susunnag rarogom u tomuren bbiyu’ e duw. Ra taw ko ngiyal’ nem ma ga ra sul ngam lemnag e taufe ni kam un ngay, ma ga ra guy ni aram e n’en th’abi fel’ ni kam dugliy!