1. ¿Xi bizaaca pur decisión gucuaa Adán ne Eva?

¿TU LAA rábiluʼ naquiiñeʼ guni decidir xii nga ni jneza ne ni cadi jneza? Ora gudó Adán ne Eva cuananaxhi stiʼ yaga stiʼ guendananna ni jneza ne ni cadi jneza, bisihuínnicaʼ qué runi confiarcaʼ Jiobá nin ca norma stibe. Ne maʼ laacaʼ gudíxhecaʼ xii nga ni jneza ne ni cadi jneza (Gén. 3:22). Peru, ¿xi bizaaca pur decisión ni gucuaacabe que yaʼ? Biníticabe amistad stícabe né Jiobá ne laaca biníticabe oportunidad de nibánicabe sin qué ñuu dxi ñáticabe. Ne bitiidicabe pecadu ne guendaguti ca descendiente stícabe (Rom. 5:12). Decisión ni gucuaa Adán ne Eva que bedané ni stale yuubaʼ.

2, 3. a) ¿Xi biʼniʼ ti eunuco etíope dxi biʼniʼ predicar Felipe laa? b) ¿Xi ndaayaʼ ricaanu ora riuʼnísanu? c) ¿Guná nga ca pregunta zacábinu?

² Gadxé si ni biʼniʼ Adán ne Eva de ni biʼniʼ eunuco etíope que dxi biʼniʼ predicar Felipe laa. Cumu biʼniʼ agradecer hombre riʼ ni biʼniʼ Jiobá ne Jesús pur laa la? oraqueca guyuunisa (Hech. 8:34-38). Yanna laanu ora rudiʼnu guendanabani stinu Jiobá, ne riúʼnisanu cásica biʼniʼ etíope que la? rusihuínninu runi agradecernu Jiobá ne Jesús pur ca ni maʼ bíʼnicaʼ pur laanu. Ne laaca rusihuínninu nápanu confianza Jiobá ne nuunu seguru laasibe nápabe derechu de guni decidirbe xii nga ni jneza ne xii nga ni cadi jneza.

³ Guníʼ ique guiráʼ ndaayaʼ ni ricaanu ora runi servirnu Jiobá. Tobi de laacani nga zanda gudiibe laanu guiráʼ ni biniti Adán ne Eva, guibáninu sin qué chuʼ dxi gátinu. Ne  pur fe ni nápanu Jesucristu, runi perdonar Dios ca pecadu stinu ne rudii laanu ti conciencia nayá (Mat. 20:28; Hech. 10:43). Ne reeda gácanu parte de familia stiʼ ca xpinni Dios, ca ni riuuláʼdxibe ni rúnicaʼ ne ca ni cabeza ti futuro guizáʼ galán (Juan 10:14-16; Rom. 8:20, 21). Neca ricaa binni stale ndaayaʼ ora runi ni ná Jiobá la? stale tu laa ni maʼ runibiáʼ laabe runi dudar pa zinanda ejemplu stiʼ eunuco etíope que o coʼ. ¿Xi rucueeza laacabe para chuʼnísacabe? Ne ¿ximodo zanda gudxiilúcabe ca ni rucueeza laacabe yaʼ?

4, 5. ¿Xi problema gupa Avery ne Hannah?

⁴ Ora huaxiéʼ confianza napa tuuxa. Testigu stiʼ Jiobá bixhoze ne jñaa ti joven láʼ Avery. Guiráʼ binni nanna ti buen padre bixhózebe ne ti buen ancianu laa. Neca zacá la? caníʼ íqueruʼ Avery pa ziuunisa o pa coʼ. Sicaríʼ guniʼbe: «Guníʼ iqueʼ qué zanda gapaʼ ti reputación galán casi napa bixhozeʼ». Ne laaca guníʼ ique Avery qué zanda guni cumplir né ca responsabilidad ni gudiicabe laa despué. Laa guníʼ: «Guníʼ iqueʼ xi guneʼ pa guinábacabe naa guneʼ orar nezalú stale binni, gudieeʼ discursu o cueeʼ grupu de predicación».

⁵ Hannah nga ti baʼdudxaapaʼ de 18 iza ne guizáʼ insegura laa. Neca biniisibe ndaaniʼ ti familia de testigu stiʼ Jiobá, huaxiéʼ autoestima nápabe ne dede rucaa ni laabe guiníʼ íquebe que zanda chinándabe ca norma stiʼ Dios. Nuu biaje, dede runinabe laca laabe ne jmaruʼ si riguu ni laabe triste. Sicaríʼ guniʼbe: «Qué ñabeʼ guirutiʼ xi cayacaʼ, nin bixhozeʼ ne jñaaʼ. Guníʼ iqueʼ qué zuni aceptar Jiobá naa purtiʼ runenaʼyaʼ laca naa».

6. ¿Xiñee qué ñuunisagá Vanessa?

⁶ Ca xhamígunu ni qué racané laanu. Guzéʼtenu xi guníʼ Vanessa, ti baʼdudxaapaʼ de 22 iza: «Gupaʼ ti xhamigaʼ ni runebiaʼyaʼ maʼ raca chii iza». Peru xhamígabe riʼ qué riuulaʼdxiʼ ganna de Dios ne qué racané laabe para ugaandabe meta de chuʼnísabe, ne riguu ni laabe triste. Laabe guniʼbe: «Raca nagana para naa guidxelaʼ xcaadxi xhamiguaʼ ne bidxibeʼ nusaanaʼ de ñaca xhamigaʼ laabe purtiʼ guníʼ iqueʼ maʼ qué zadxelaʼ stobi casi laabe».

7. ¿Xi bidxibi Makayla ñuni, ne xiñee?

⁷ Ora ridxibi tuuxa guni cometer ti pecadu naroʼbaʼ. Napa Makayla gaayuʼ iza dxi guca expulsar bizaʼnaʼ. Ra zidiʼdiʼ tiempu, biiyabe pabiáʼ gucaná bixhózebe ne jñaabe pur cani biʼniʼ bizáʼnabe. Laabe guniʼbe: «Guizáʼ bidxibeʼ  chuaanisaʼ, guneʼ cometer ti pecadu, guni expulsárcabe naa ne guni sufrir bixhozeʼ ne jñaaʼ pur naa».

8. ¿Xi bidxibi Miles?

⁸ Ora ridxibi tuuxa gucaalúcabe laa. Guidúʼyanu xi bizaaca ti joven láʼ Miles. Testigu bixhózebe ne madrastra stibe, peru jñaabe coʼ. Miles ná: «Biniiseʼ ra nuu jñaaʼ dieciocho iza. Qué ninaʼyaʼ ñabeʼ laabe maʼ napaʼ gana chuaanisaʼ. Rietenalaʼdxeʼ modo biʼniʼ reaccionarbe ora gúnnabe maʼ Testigu bixhozeʼ. Bidxibeʼ ñúnibe xiixa para nucueezabe naa».

9. ¿Xi zándaca guizaaca ora guiziidiluʼ pabiáʼ nadxii Jiobá ne napa paciencia lii?

⁹ Maʼ qué niná Adán ne Eva ñuni servircaʼ Jiobá purtiʼ qué ñannaxhiicaʼ laabe de guidubi ladxidoʼcaʼ. Neca zacá, bidii Jiobá lugar guibánicabe xcaadxi tiempu para gápacabe xiiñicabe, ne gusiniisicabe laacaʼ modo nácabe. Cumu bixélecabe de Jiobá la? qué nindaa bidiicabe cuenta cadi jneza decisión gucuaacabe. Xiiñicabe ni jma huaniisi biiti biʼchiʼ, ne ra gudiʼdiʼ tiempu, nabé malu ne egoísta guca binni (Gén. 4:8; 6:11-13). Peru maca napa Jiobá ti modo para gulá ca descendiente stiʼ Adán ne Eva ni guni servir laabe (Juan 6:38-40, 57, 58). Ora jma guiziidiluʼ pabiáʼ nadxii Jiobá ne napa paciencia lii la? jma zannaxhiiluʼ laa. Qué zúniluʼ ni biʼniʼ Adán ne Eva, sínuque zudii gana lii gudiiluʼ guendanabani stiluʼ Dios.

10. Ora runi meditarnu ni ná Salmo 19:7, ¿ximodo racané ni laanu para guni servirnu Jiobá?

¹⁰ Biziidiruʼ jma de Jiobá. Ra jma gunibiaʼluʼ Jiobá, jma zápaluʼ confianza zanda guni servirluʼ laa. Avery ná gupa jma confianza ora biʼniʼ investigar ne biʼniʼ meditar ni ná Salmo 19:7 (biindaʼ ni). Ora bíʼyabe guca cumplir ca diidxaʼ riʼ lu xquendanabánibe la? gunnaxhiibe Jiobá jma. Guendarannaxhii ni runi sentirnu pur Jiobá cadi racané si ni laanu gápanu jma confianza laabe, sínuque laaca racané ni laanu gúninu ca cosa  ni riuuláʼdxibe. Hannah guníʼ: «Cumu biindaʼ Biblia ne gupaʼ estudiu personal la? bieneʼ runenaʼyaʼ ladxidóʼ Jiobá ora runenayaʼ naa» (1 Ped. 5:7). Bíʼnibe stipa para chinándabe ni ná Stiidxaʼ Dios (Sant. 1:22). ¿Xi guleendube ra bíʼnibe ni yaʼ? Laabe nabe: «Ora biiyaʼ guiráʼ ca ni guleenduáʼ pur ruzuubaʼ stiidxaʼ Jiobá, gunnaxhieeʼ laabe jma. Yanna maʼ nuaaʼ segura zacané Jiobá naa ora caquiiñeʼ tu gacané naa». Gunda bisaana Hannah de guniná laca laa, bidii xquendanabani Jiobá ne guyuunisa.

11. a) ¿Xi gucané Vanessa para gapa jma xhamigu? b) ¿Xi rusiidiʼ ni bizaaca Vanessa laanu?

¹¹ Gulí chaahuiʼ tu laa gaca xhamíguluʼ. Bidii Vanessa cuenta cucueeza xhamiga laa de guni servir Jiobá. Nga runi, maʼ qué nidxaagabe laa. Ne cadi ngasi, bíʼnibe stipa para guyúbibe xcaadxi xhamígube ndaaniʼ congregación. Ne gucané ejemplu stiʼ Noé ne familia stiʼ laabe, sicaríʼ guniʼbe: «Gulézacabe lade binni ni cadi nadxii Jiobá, ngue runi qué nidxaagacabe laacaʼ ne guyuucabe tobi si». Despué de guyuunísabe gúcabe precursora. Yanna nabe: «Cayacané ni naa para gapaʼ xcaadxi xhamiguaʼ, cadi ndaaniʼ congregación si stinneʼ, sínuque né ndaaniʼ xcaadxi congregación». Lii laaca zanda guidxélaluʼ xcaadxi xhamíguluʼ pa gúniluʼ stipa pur guni cumplirluʼ né dxiiñaʼ ni maʼ biʼniʼ mandar Jiobá lii gúniluʼ (Mat. 24:14).

12. ¿Xi qué nidxibi Adán ne Eva, ne xi bizaacacabe pur laani?

¹² Bidxiilú ca ni ruchibi lii peru bidxibi Dios. Nuu cosa ni cadi malu guidxíbinu. Guzéʼtenu ti ejemplu, normal nga guidxíbinu gúninu xiixa ne guchéʼnenu Jiobá (Sal. 111:10). Pa ñaca nidxibi Adán Dios la? qué nucheené laabe. Peru dxi maʼ qué nidxíbicabe Jiobá la? bixeleʼ lúcabe ne bidiicabe cuenta maʼ nápacabe pecadu. Ne cadi ngasi, sínuque laaca zutiidicabe pecadu ne guendaguti descendencia stícabe. Cumu bidiicabe cuenta xieeládicabe la? bituilúcabe ngue runi biyúbicabe xi guchiicabe ládicabe (Gén. 3:7, 21).

13, 14. a) Casi ná 1 Pedro 3:21, ¿xiñee cadi naquiiñeʼ guidxibi xhaatanu guendaguti? b) ¿Gunáʼ nga ca razón nápanu para gannaxhiinu Jiobá?

 ¹³ Normal nga guidxíbinu guchéʼnenu Jiobá. Peru cadi naquiiñeʼ guidxibi xhaatanu guendaguti. ¿Xiñee yaʼ? Purtiʼ maʼ bidii Dios laanu esperanza de guibáninu para siempre. Peru pa gueeda guni cometernu ti pecadu ne gaca arrepentirnu de guidubi ladxidoʼno la? zuni perdonarbe laanu pa gápanu fe sacrificiu stiʼ Xiiñibe. Ti modo zanda gusihuínninu nápanu fe Jiobá nga ra gudiʼnu xquendanabáninu laa ne chuʼnísanu (biindaʼ 1 Pedro 3:21).

¹⁴ Nápanu stale razón para gannaxhiinu Jiobá. Rudiibe laanu stale cosa galán guiráʼ dxi, ne laaca rusiidibe laanu ni dxandíʼ de laabe ne de propósitu stibe (Juan 8:31, 32). Laaca maʼ bidiibe laanu congregación cristiana para guni dirigir ne guni apoyar laanu. Racanebe laanu para guni huantarnu ca problema nápanu yanna ne cudiibe laanu ti esperanza de guibáninu para siempre ne jma galán lu futuro (Sal. 68:19; Apoc. 21:3, 4). Ora runi meditarnu guiráʼ ni maʼ bíʼnibe para gusihuínnibe pabiáʼ nadxiibe laanu, jma rannaxhiinu laabe ne ridxíbinu guninanu laabe. Ne ndiʼ nga ni caquiiñeʼ guidxíbinu gúninu.

15. ¿Xi biʼniʼ Makayla para bisaana de guidxibi guni cometer ti pecadu naroʼbaʼ?

¹⁵ Gunda bisaana Makayla de guidxibi guni cometer ti pecadu naroʼbaʼ ora biene nuu Jiobá listu para guni perdonar. Sicaríʼ guniʼbe: «Bidieeʼ cuenta guiranu imperfectu laanu ne rucheʼnu. Peru laaca bieneʼ nadxii Jiobá laanu ne runi perdonar laanu pur rescate stiʼ Jesús». Cumu nadxii Makayla Jiobá la? bidii xquendanabani laabe ne guyuunisa.

16. ¿Xi gucané Miles para cadi guidxibi gucueeza jñaa laa guni ni ná Dios?

¹⁶ Neca bidxibi Miles pa gucueeza jñaa laa para chúʼnisa la? gunábabe ti superintendente de circuito gacané laabe. Miles guníʼ: «Jñaabe laaca cadi Testigu laa. Gúdxibe naa xi zanda gabeʼ jñaaʼ para guneʼ convencer laa cadi bixhozediáʼ cayuni obligar naa chuaanisaʼ, sínuque naa nga cacaaʼ decisión que». Qué ñuulaʼdxiʼ diʼ jñaa Miles ora gúdxibe laa chichuunísabe. Despué la? gupa xidé biree Miles de ra lidxi para ganda chúʼnisa. Ne laaca guniʼbe: «Biniibi ladxiduáʼ ora biziideʼ xi guiráʼ cosa galán maʼ biʼniʼ Jiobá pur naa. Ora guníʼ iqueʼ sacrificiu ni biʼniʼ Jesús bieneʼ pabiáʼ nadxii Jiobá naa. Nga nga ni bicaa naa gudieeʼ xquendanabaneʼ laabe ne chuaanisaʼ».

17. ¿Xi zanda gusihuinni cada tobi de laanu?

¹⁷ Dxi gudó Eva cuananaxhi ni cá lu yaga ni nuu ndaaniʼ jardín de Edén  que la? bidxiideche Bixhoze. Ne ora gudó Adán ni la? laaca bisihuinni qué rusisaca guiráʼ ni biʼniʼ Jiobá pur laa. Cada tobi de laanu zanda gusihuinni cadi nuu de acuerdu né decisión ni gucuaacabe que. Ora riuʼnísanu, ruluinu Jiobá laasi napa autoridad para gabi laanu xii nga ni jneza ne ni cadi jneza. Laaca ruluinu nadxiinu ne nápanu confianza laabe.

18. ¿Xi naquiiñeʼ gúniluʼ para cueenduluʼ ni galán ora guni servirluʼ Jiobá?

¹⁸ Despué de chuʼnísanu, naquiiñeʼ chinándanu ca norma stiʼ Jiobá guiráʼ dxi ne cadi gúninu ni rábinu. Nánnanu cadi fácil diʼ ni, peru millón de binni runi ni guiráʼ iza. Lii laaca zanda gácaluʼ tobi de laacabe. Para ganda gúniluʼ ni la? biʼniʼ stipa guiéneluʼ jma ni rusiidiʼ Biblia, gupa costumbre guidxaagaluʼ ca hermanu ne guniʼné laacabe de ca ni caziidiluʼ de Bixhózeluʼ ni nuu guibáʼ ne ora gúniluʼ ni biʼniʼ ni né entusiasmo (Heb. 10:24, 25). Ne ora guicaaluʼ xiixa decisión la? bicaadiaga ca conseju stiʼ Jiobá ni zeeda lu Biblia ne ni rudiibe laanu ora riquiiñebe organización stibe (Is. 30:21). Pa gúniluʼ ni, jma galán zabániluʼ (Prov. 16:3, 20).

19. ¿Xi naquiiñeʼ guietenaláʼdxiluʼ siempre, ne xiñee?

¹⁹ Pa siempre guietenaláʼdxiluʼ guiráʼ ni ribeenduluʼ pur cayúniluʼ ni ná Jiobá, jma zannaxhiiluʼ laabe ne ca norma stibe. Ne gastiʼ qué zanda guni Binidxabaʼ para gucueeza lii de gúniluʼ ni ná Dios. Dentru de ti mil iza ora guietenaláʼdxiluʼ dxi guyuunísaluʼ, zaniʼluʼ: «Ndiʼ nga decisión jma galán ni gucuaaʼ lu xquendanabaneʼ».