1. Gini ahe aAdamu na Eva azangaha, na sangbanaha angia gine?

DA MO aberãha nga ni si aida ni moi andiko tipa gupai du ni wenehe na gu du ni gbegberẽhe? Ho aAdamu na Eva ari zuzungua ino wenepai na gbegberẽpai ni, pai kinaho i ayuguhe ziazia: I ayugu gupai nga i aadunga na kido kuti Yekova gbiati gako andiko te. I asia ka maa gayo andiko nitiyo nibipa gupai du ni wenehe gbiati gu du ni gbegberẽhe. (Bam. P. 3:22) Ono oni berẽnga pa agu ahe i azangaha. I azanga gayo pabakure na Yekova. I aima zanga gu momu nga ga raka nyeanye kindi, na i afu ingapai gbiati kpio fu awiriyo. (Rom. 5:12) Ga aAdamu na Eva siapai aye na kina gberãngo.

2-3. (a) Ginipai gu banyaki nangia boro Etiopia amangihe ho Firipo atungusipai ni fuko? (b) Gini amaku ani agbiaha ho ani azio bapatiza ni, na gini asanahe ani nika wisigoho?

² Oni bingo gu kparakparapai du dagba gu gene aAdamu na Eva amangipai ngbaha na gu gene gu banyaki nangia boro Etiopia amangipai ngbaha ho Firipo atungusipai ni fuko. Gu banyaki re aima du na bakere tambuahe tipa gupai aYekova na Yesu amangihe fuko si ki sa gupai nga ko zi bapatiza nibasa. (Amo. 8:34-38) Ho ani akpara tirani ni fu Mbori na ki zi bapatiza wa gu banyaki re, pai kinaho ani ayugoho ziazia. Ani nayugo gupai nga ani na tambuahe tipa gupai aYekova na Yesu namangihe furani. Ani nayugo gupai a nga ani ima du na kido kuti Yekova na ani ima rugatirani na gupai nga ko du si aida ko moi andiko tipa gupai du ni wenehe na gu du ni gbegberẽhe.

³ Oni berẽnga pa agu amaku ani agbiaha ho ani airiso Yekova ni! Maku sa dagba agu akuraha nga, ani nika gbia agu ahe dunduko aAdamu na Eva azangaha, kodihe na gu momu nga ga raka nyeanye kindi. Mbiko du ani na idapase kuti Yesu Kristo,  Yekova nambupai furani ti gaani aingahe na kini fu gigiri sangbakpotoseyo furani. (Mt. 20:28; Amo. 10:43) Ani nada a ni papara ga Yekova aborokporo nga aguyo ko naidi na yo na ani kidu na maabangirise tipa wene apai furani kumbatayo. (Yo. 10:14-16; Rom. 8:20, 21) Ono tie, wa vura du agi amaku re ziazia, kura aboro kinaho naima ino Yekova, ono kini dindiko adindiko ka pekafuo gu kpiapai nga ga gu banyaki nangia boro Etiopia. Gini akpakarapai rengbe kaa dingiso yo ti zio bapatiza? Na wai du rengbe yo ka diabe agu akpakarapai re?

4-5. Gini akpakarapai gu paranga nga Avery gbiati gu degude nga Hannah agbiatiyo na ni?

⁴ Zanga du na kido. Avungu Avery nga aDezire Yekova. Bako nga wene Baagude na kingia wene bakumba rogo dungurati. Ono wa vura duhe wo, Avery aaidanga ka zio bapatiza te. Tipagine? Ko aya, “Mi aabihe nga mi arengbanga kadu ni wene boro wa buba te.” Avery aabihe a nga ko adunga na rengba ka manga agu asunge ka i fuhe fuko kumbatayo te. “Mi anaabaka bangire nga i nika ya fere mi mangi kparakpee dagba aboro, mi mangi gumbapai, watadu mi ngbembatayo fu badona gene sunge tungusapai yo.”

⁵ Hannah, du garãri 18, aadunga na kido kuti tiri kandara tooni te. Avunguri nasonosi ri angia airisi Yekova. Ono wa si avura duwo, ri anaakapa akapa nga singia ri rengbe ka raka ringbisihe kuti ga Yekova arugute. Tipagine gipai re adu ti ni wo? Hannah anaabi tiri nga sunge tiri te. Ti kura aregbo, ri anidu rogo bakere gberãrago na si ki sa gupai nga ri naaigirãsi kpotori nitiri, na gipai re anaagbarasa apai kina kumbatayo. Ri aya, “Mi anaapenga gupai mi anaamangaha fu ai boro te, zavura fu avungure a, na mi anaabihe nga Yekova arengbanga ka ida na mi te bambiko gupai mi anaamanga tire na ni.”

6. Ginipai naadingiso Vanessa ti zio bapatiza?

⁶ Gu maapai kurii nga ga abakure. Vanessa du garãri nga 22, aya: “Wene nakureami aduho ti ni mi aima ino ri tipa agarã naaima mbeda kuti bawe.” Ono tie, nakurea Vanessa aundongo ri tipa ri da ti gu gari sásá nga ga zio bapatiza te. Gupai re anaafu kina gberãrago fu Vanessa, na ri ape gupai nga, “Si nidu ni mbumbuhe fere ka zio abakure, na mi anaabaka bangire nga ka mi mbu bakure na ri, mi gbianga kura boro berewe ni bawene nakureami te.”

7. Gu degude nga Makayla anaagunde be gine, na tipagine?

⁷ Gunde be manga kere ingahe. Makayla adu na garãri bisue ho i akusi kawiiri ni kusayo rogo dungurati. Ho ri aasona ni, ri anaabi wai abi avunguri anidu na gberãrago mbiko gupai kawiiri amangihe. Makayla aya, “Mi anaagunde nga ka mi zi bapatiza, mi ima rengba ka  manga ingahe, i ki kusi re kusayo rogo dungurati, na mi ki ye na bakere gberãrago berewe kisusi kuti avungure.”

8. Ginipai gu paranga nga Miles anaagunde behe?

⁸ Gunde be sogote. Ba gu paranga nga Miles gbiati diabako nga airisi Yekova, ono nako nga Dezire Yekova te. Miles aya, “Mi araki na nina tipa agarã 18, na mi anaagunde agunde ka pe gupai furi nga mi naida ka zio bapatiza. Mi aima bi wai ri adu ho buba ada ni ni Dezire Yekova. Mi anaagunde agunde nga ri nika manga re gbegberẽ.”

9. Ginipai si awira gupai nga si nika manga amanga ho mo nika ino wai ni du Yekova ni boro nyemuse gbiati hipai?

⁹ AAdamu na Eva asia ka zanga iriso Yekova bambiko gupai nga i aasonosanga bakere nyemuse tipa ko te. Ono wa si avura du wo, Yekova aima mbuyo i raki ni gbangaha tipa ka vunga agude na ki moi gayo andiko nitiyo kaa sonosa agu agude re kutini. Si aaimanga te, asangbana ga aAdam na Eva diaberã ka zanga ra fu Yekova ki yugu wai gbaiga i adu ni airamungo. Bambata wiriyo aimi wirinako naamanganga gbegberẽpai ya, na kusa, zuu gbiati gbangbati kidu ni bakerehe dagba aboro. (Bam. P. 4:8; 6:11-13) Ono tie, gene adu kinaho Yekova aandu ka batasa agu awiri Adamu na Eva dunduko ngbaha naida ka irisiko. (Yo. 6:38-40, 57, 58) A wa mo nikaa wirika badungu kura apai nibipa wai du Yekova ni boro hipai gbiati nyemuse, si nawira gupai nga gamo nyemuse tipa ko nika kio akio. Mo nika ida ka zanga manga gu ngbatunga diaberã aAdamu na Eva amangihe, na mo ki kpara tiro fu Yekova.

10. Waigu rengbe berãkurii Atambuahe 19:7 ka undo ro mo irisi Yekova?

¹⁰ Mo naandu kindi kumbatayo kaa wirikapai tipa Yekova. Ka mo aawirika badungu apai tipa Yekova, mo nika du na bakere kido nga mo ima rengba kadu na diabese rogo irisoko yo. Avery, i nipepa ko mbata kusayo aya: “Mi aye kadu na kido ni geda mi na kini berẽkurii gu kidohe du rogo Atambuahe 19:7.” (Oni gedihe.) Ho Avery abi wai ni Yekova adigisi gu kidohe re, gako nyemuse tipa Mbori aye ki da ni bakerehe. Nyemuse asanga kina sa sarani sa ani du na kido te, ono si naundo rani a ani moiberãrani gbe kuti Yekova gbiati gupai  ko aidaha. Hannah, i nipepa ri mbata kusayo aya: “Vurube gimi geda Ziazia Kekeapai nisase gbiati wisigoho, mi aye ka ino gupai nga ho mi aimisa kpotore ni, mi naimisa Yekova aimisa a.” (1 Pet. 5:7) Hannah ada ni ‘namangi’ gupai du rogo Fugo Mbori yo. (Yak. 1:22) Sangbana gipai re angia gine? Ri aya: “Ho mi aabi wai ni pa gia mi sangba Yekova aundo re, mi asonosi bakere nyemuse tipa ko. Mi ima du awere na gu kido nga Yekova nikaa ngbe angbe fere kumbatayo ti aregbo dũ ho mi aida ko undo re ni.” Hannah aima ye ki mbu gupai nga kaa igirãsi kpotori. Ri ki kpara tiri fu Yekova na ki zi bapatiza.

11. Ginipai Vanessa amangihe tipa ka zio wene abakure, na ginipai rengbe ani ka wirikaha ti gipai re?

¹¹ Mo sia gamo abakure ni tatamana. Vanessa, i nifura tipa ri mbata kusayo, aye ki ini gupai nga nakureari du naadingiso ri ti iriso Yekova. Sidu, ri aye ki mbu pabakure na gu degude re. Ono pai kinaho Vanessa amangihe susi gure. Ri amangi bakere ome tipa ka manga vovo abakure rogo dungurati. Ri ape gupai nga gu kpiapai Noa na gako aborokporo amoihe naundo ri. Ri aya, “Agu aboro naakpingo nyemu Yekova ya ake yo ake kirikiri, ono i anidu na wene kodatise kina dagba tiyo.” Fuo Vanessa zi bapatiza, ri ada ni nazakigene. Ri aya: “Gipai re ima undo re mi zi wene abakure angianga kina rogo gimi dungurati sa ya, ono rogo kura adungurati a.” Mo ima rengba ka manga wene abakure a ni fu mo tiro sa gu sunge Yekova nafuhe furani ani mangihe wa rengbe omero na ni.—Mt. 24:14.

12. Gini ngbatunga gunde aAdamu na Eva aadunga na ni ya, na gini sangbanapai gipai re aye na ni?

¹² Mo du na gu ngbatunga gunde rẽarẽ. Kura ngbatunga agunde kinaho du ni wenehe tipa rani. Ni kpiapai, si naida ani naagunde be gupai nga ga ba gberãrago ti Yekova. (Tam. 111:10) Ka aAdamu na Eva adu na ngbatunga gu gunde re, ka i asanga mungu kuti Yekova te. Ono i aima samungu kutiko. Fuo mangayo gupai re, bangiriyo azaki rogo gu gene yo nga i aye ka rugatiyo wenengai na gupai nga i angia aboro ingapai. I aaye ka fu kina ingapai gbiati kpio fu awiriyo. Bambiko gupai nga i aima rugatiyo na gupai nga i aima kuo ga Mbori ndiko, zee aziyo mbiko du yo ni kundiri yo na i ki dadi kpotoyo na he.—Bam. P. 3:7, 21.

13-14. (a) Ringbisihe kuti 1 Petero 3:21, tipagine si aidanga ani naagunde ti ni ni kerehe be kpio ya? (b) Gini nduapai du berani tipa ka kpinyemu Yekova?

 ¹³ Wa duhe nga si naida ani naagunde be gupai nga ga ba gberãrago ti Yekova, si aidanga ani naagunde ni kerehe be kpio te. Yekova ima mbakada gene furani tipa ani gbia nyenye unga. Ka ani mangi ingapai ono ki mangi ndikidi saberã, Yekova nambupai ambu furani ti gaani ingapai. Ko nambupai furani mbikopa du ani na idapase kuti gu motumo tumorii nga ga Wiriko. Gene sa dagba gu nyanyakipa agene yo kisusi ani ayugo idapase ngbaha nga ni kpara ani gaani raka fu Mbori na ki zi bapatiza.—Oni gedi 1 Petero 3:21.

¹⁴ Ani na badungu nduapai berani tipa ka kpinyemu Yekova. Anga kina gupai sa ko amangaha nga kaa fu wene ahe furani na aˈuru dũ te, ono ko nayugo gu rengo furani a du tipa ko gbiati gako aringbisapai. (Yo. 8:31, 32) Ko ima fu gu dungurati nga ga aKristano furani tipa si naangbembatayo furani na kini undo rani. Ko naundo rani ani naahi gaani akpakarapai awere, na ko ima fu gu maabangirise furani nga ga raka nyeanye kindi kumbatayo ni rengberengbe rani. (Tam. 68:19; Yugo. 21:3, 4) Ho ani aberã ni kuriipa gu badungu apai Yekova naima mangaha tipa ka yugo gupai nga ko ima kpinyemu rani, ani nambeda na ko. Na ho ani akpinyemu Yekova ni, ani nadu na gu gunde rẽarẽ. Ani nagunde be gupai nga ga ba gberãrago ti gu Boro ani naima ye ki kpinyemu ni ni kerehe, nga Yekova.

15. Waigu Makayla adibe gunde gupai nga ga manga ingahe?

¹⁵ Makayla, i nifura tipa ri mbata kusayo, adibe gunde be gupai nga ga manga ingahe ho ri aini pa wai ni du Yekova ni boro mbupai. “Mi aye ka rugatire na gupai nga ani dunduko nga kpakpa aboro na ani nikaa manga aingahe amanga. Ono mi aye a ka rugatire na gupai nga Yekova ima kpinyemu rani na ko nika mbupai ambu furani riimburu motumo tumorii.” Gari nyemuse tipa Yekova afõngbaduriyo ri ki kpara tiri fu Yekova na ki zi bapatiza.

16. Waigu Miles agbia undo tipa ka diabe gunde be sogote?

¹⁶ Miles, nga guko nanaagunde agunde nga nako nika soga gako diaberã ka zio bapatiza asana kura babi adungurati sa tipa undo. Miles aya tipa gu babi adungurati re wẽ, “Ko asono rogo gu kporo naadu na aboro rogoho na gayo apambori ni bakiakia. Ko aundo re tipa mi berẽpa gupai rengbe mi ka gumbaha tipa ka sa nina ri rugutiri na gupai nga mi du diberã tipa ka zio bapatiza na anga buba du naasosoda re tipa mi mangihe te.” Rago aangbanga ti na Miles na gako diaberã te. Ni yangaraha, ko aguari kusayo kpuri ono ko ki ka kindi kuti gako diaberã. Ko aya, “Inopa gu weneapai Yekova namangihe fere aima zio ngbadureyo. Ho mi aberẽ ni bakere gbe kuriipa ga Yesu motumo tumorii, mi aye ka rugatire na pa wai Yekova nakpinyemu re ni bakerehe gbe. Gu berãpai re afõngbadureyo mi ki kpara tire fu Yekova na ki zi bapatiza.”

17. Gini momu du ani na ni berani?

¹⁷ Ho Eva ari gu zuzungua ni ati Edene yo i aima ya ka i ringa ha ya, gure nga ri aima gindigo Bari. Ho Adamu arihe ni a tigako, ko ayugu gupai nga ko aadunga na tambuahe tipa gu weneapai dunduko Yekova amangihe fuko te. Ani dunduko ni basasa du na momu berani ka yugo gupai nga gu diaberã aAdamu na Eva amangihe re aarunga te. Ho ani azio bapatiza ni, ani nayugo gupai fu Yekova nga ani ima ida kuti gupai nga ko du du na pagbia beko ka maa andiko nibipa gupai duni ruruhe na gu duni irairaha tipa rani. Ani nayugo gupai nga ani ima kpinyemu Barani na kidu na kido kutiko.

18. Waigu rengbe mo kadu na diabese rogo iriso Yekova yo?

¹⁸ Tingbafuo zio ani bapatiza, si naida ani naandu kindi kumbatayo kaa manga gupai Yekova akpinyemuhe, angianga gu ani akpinyemuhe ya. Amirioni ga Yekova aboro naraka wa gure na agarã dunduko. Mo ima rengba kadu wa yo ka mo aandu kindi kumbatayo kaa kiiso gamo giarogopaiyo nga ga Fugo Mbori, nga Ziazia Kekeapai; kini kodi tiro dedede na awirina; na kini gumba gupai fu aboro zaaza mo nawirikihe tipa gu Bamo nga boro nyemuse. (Eb. 10:24, 25) Ho mo amanga adiaberã ni, mo di agu arugute kugume Yekova afuhe foro vurube Fugoko gbiati gako riigbu. (Yes. 30:21) Ka mo mangihe wo, mo nika du na diabese rogo agu apai yo dunduko mo amangaha.—Snz. 16:3, 20.

19. Ginipai si aida mo naandu kindi kumbatayo kaa berãkuriihe, na tipagine?

¹⁹ Ka mo aandu kindi kumbatayo kaa berãkurii pa wai mo agbia undo ti ga Yekova arugute, gamo nyemuse tipa ko gbiati gako arugute nika du ni bakerehe. Na fuo gure, he adunga ho ka Satana fuhe foro si ki saro mo mbu iriso Yekova te. Mo berẽnga pa wai mo nika du fuo agarã kutu kumbatayo. Mo nika bi gu diaberã mo amangihe ka zio bapatiza ni bawene diaberã kisusi agu adiaberã dunduko mo amangihe!