1-2. (a) Lé Yehowa xo nuxu koɖo agbetɔwo doɔ? (b) Nyi nu mìaxo nuxu so le nyɔta cɛ mɛɔ?

EJƆNƆ ji nɔ Yehowa mɔ yeaxo nuxu koɖo mì. Le blemaɔ, éto enyɔnuɖɛtɔwo, mawudɔlawo koɖo Eviɛ Kristo Yesu ji yí nu yi susuwo nɔ mì. (Amo. 3:7; Gal. 3:19; Enyɔ. 1:1) Egbɛɔ, éxonɔ nuxu nɔ mì to yi Nyɔ, Bibla ji. Ésɔ na mì nɔ mìakpla nu so yi susuwo nu yí agbemɔŋje yi mɔwo mɛ.

² Hwenu Yesu le nyigban jiɔ, Yehowa xo nuxu so jeŋkwimɛ zetɔn. Na mìakpɔ enyɔ ciwo Yehowa nu; mìagbekpɔ enu ci mìatɛnŋ akpla so wo mɛ koɖo nyɔna ci mìakpɔ so yi nyɔ lɔwo mɛ.

3. Shigbe lé mìhlin le Maki 1:​9-11 mɛ ɖe, enyɔ ciwo yí Yehowa nu hwecinu Yesu wa ʒinʒindoshimɛɔ, yí nyɔnɔnwi vevi amɛtɔn ciwo ji yi nyɔ lɔwo ɖo kpeɔ?

³ Maki 1:​9-11 nu hwecinu Yehowa xo nuxu so jeŋkwimɛ ŋkɔtɔ. (Hliin.) Énu mɔ: “Anyi vi lɔnlɔntɔ E nyi. Anyi jijɔ pleŋ le Eo mɛ.” Eji ajɔ Yesu taŋ hwecinu ese Dalɔ gbe yí enu mɔ yeluin yí gbekando ji! Yehowa nyɔ lɔwo ɖo kpe nyɔnɔnwi amɛtɔn ji kudo Yesu nu. Ŋkɔtɔ, Yesu nyi Eviɛ. Amɛvetɔ, Yehowa lɔn Eviɛ. Amɛtɔntɔ, Yehowa kpɔ jijɔ so Eviɛ nu. Na mìasɔ nyɔnɔnwi cɛwo ɖekaɖeka keŋ agbeje wo mɛ kitokito.

4. Ekacaca yoyu ci mɛ yí Yesu ɖo koɖo Mawu hwecinu ewa ʒinʒindoshimɛɔ?

⁴ “Anyi vi . . . E nyi.” Yehowa to enyɔ cɛwo ji yí dasɛ mɔ ye Vi lɔnlɔntɔ, Yesu ɖo ekacaca yoyu ɖeka mɛ  koɖo ye. Hwecinu Yesu le jeŋkwimɛɔ, ényi gbɔngbɔnmɛ vi ɖeka nɔ Mawu. Vɔ hwecinu ewa ʒinʒindoshimɛɔ, wosɔ gbɔngbɔn kɔkɔɛ shi ami ni. Mawu dasɛ hwenɔnuɔ mɔ Yesu nyi ye Vi amɛshiaminɔ yí mɔkpɔkpɔ sun shi mɔ yɛatrɔ yi jeŋkwimɛ, nɔ Mawu asɔ ɖo Efyɔ koɖo Avɔnsatɔ Gangantɔ. (Luiki 1:​31-33; Ebre. 1:​8, 9; 2:17) Eyi taɖo hwecinu Yesu wa ʒinʒindoshimɛɔ, esɔgbe ci Dalɔ nu mɔ: ‘Anyi Vi ènyi.’​—Luiki 3:22.

5. Lé mìatɛnŋ asran Yehowa do le lɔnlɔn dadasɛ koɖo ŋsɛndoamunyɔwo nunu nɔ amɛwo mɛɔ?

⁵ “Anyi . . . lɔnlɔntɔ E nyi.” Ci Yehowa nunɔ lɔnlɔn koɖo jijɔ ci ekpɔ do amɛ nuɔ, éɖo kpɔwɛ nɔ mì nɔ mìajinɔ mɔnuwo yí akanɔfu amɛwo. (Ʒan 5:20) Nɔ mɛ ci nu mìdonɔ bubu dasɛ mɔ yelɔn mì yí gbekanfu mì do enunywi ɖe ci mìwa nuɔ, edonɔ ŋsɛn mì yí mìgbejenɔ agbla doji. Ahanke mìwo nɔviŋsu koɖo nɔvinyɔnu ciwo yí le hamɛ lɔ mɛ koɖo mìwo xomumɛtɔwo ʒan lɔnlɔn koɖo ŋsɛndoamunyɔ mìwo tɔ nɛ. Nɔ mìkanfu mɛbuwoɔ, ado ŋsɛn wowo xɔse yí akpedo wo nu woasɛn Yehowa le egbejinɔnɔ mɛ. Eʒan veviɖe mɔ jilawo anunɔ ŋsɛndoamunyɔwo nɔ wowo viwo. Nɔ jilawo kanfu wowo viwo so ji mɛ yí gbedasɛ mɔ yewolɔn woɔ, akpedo wo nu woayi ŋkɔ yí agbewa sugbɔ doji.

6. Nyi yí taɖo mìatɛnŋ akando Yesu Kristo jiɔ?

⁶ “Anyi jijɔ pleŋ le Eo mɛ.” Enyɔ cɛwo dasɛ mɔ Yehowa kando Yesu ji mɔ yɛawa Dalɔ dro le egbejinɔnɔ mɛ. Ci Yehowa kando Eviɛ ji ahan ɔ, mìwo can mìatɛnŋ akando ji pleŋpleŋ mɔ Yesu ana Yehowa gbeɖuwo pleŋ avamɛ. (2 Kor. 1:20) Nɔ mìbu tamɛ kpɔ so kpɔwɛ ci Yesu ɖo ɖɛ nuɔ, ado ŋsɛn mìwo gbetasɔsɔ mɔ  mìakpla nu so nu keŋ ado afɔ yi fɔwo mɛ. Shigbe lé Yehowa kando Yesu ji nɛɔ, égbekando yi sɛntɔwo gbɛbɔbɔ ji mɔ, yɛayi ji akpla nu so Yeviye nu.​—1 Piɛ 2:21.

7. Sɔ koɖo Matie 17:​1-5 ɖe, hwenu yí Yehowa xo nuxu so jeŋkwimɛɔ, yí nyɔ ci enuɔ?

⁷ Hlɛn Matie 17:​1-5. Zevetɔ ci Yehowa xo nuxu so jeŋkwimɛ yí nyi hwenu Yesu “trɔ nɔnɔmɛ Yitɔ.” Yesu nu nɔ Piɛ, Ʒaki koɖo Ʒan mɔ wo le kplɔ ye yi eto gangan ɖeka ji. Le nɔɔ, wokpɔ ŋtegannukpɔkpɔ jiŋ ɖeka. Yesu ŋmɛ klɛn yí yi wuwo dada zo ŋlɛŋlɛŋlɛ. Wokpɔ amɛ amɛve zezemɛ ciwo le dumɛ nɔ Moizi koɖo Eli yí wole nuxu xokɔ koɖo Yesu kudo eku koɖo fɔnfɔnsoku ci yí le te kpɔɛ nu. Ci “alɔn sugbɔ” le ŋkuvi mɛ nɔ apostolo amɛtɔn lɔwo can ɔ, wonyɔ gleŋ yí kpɔ ŋtegannukpɔkpɔ wadɔdoamɛji cɛ. (Luiki 9:​29-32) Le yi goduɔ, azɔ ɖeka ci yí klɛnklɛn va cɔn wo yí wose gbe ɖeka ɖyi so mɛ: Mawu gbe yɔ! Shigbe lé Yehowa wɛ le ʒinʒindoshimɛ Yesu tɔ hwenu nɛɔ, énu lé Eviɛ nu jeŋ ni do koɖo lɔnlɔn ci eɖo ni. Énu mɔ: “Amɛ cɛ nyi Evinyɛ lɔnlɔntɔ ci yí jɔnɔji nɔ Ŋ sugbɔ.” Vɔ ecɛyɛɔ, Yehowa nu kpi mɔ: “Mí setonu ni.”

8. Ŋsɛn ci yí ŋtegannukpɔkpɔ lɔ kpɔ do Yesu koɖo nukplavi lɔwo jiɔ?

⁸ Ŋtegannukpɔkpɔ lɔ dasɛ kanfukanfu koɖo ŋsɛn Yesu tɔ hwecinu avanyi Efyɔ nɔ Mawu Fyɔɖuxu lɔ le esɔmɛ. Kankandoji li mɔ ecɛ do ŋsɛn Yesu nɔ atɛnŋ ado ji le vevisese koɖo eku ci yí le te kpɔɛ mɛ. Ŋtegannukpɔkpɔ lɔ gbedo ŋsɛn nukplavi lɔwo xɔse. Ékpedo wo nu nɔ woadra do ɖɛ do cukaɖa ciwo mɛ woavato koɖo edɔ sɛnŋ ci le te kpɔ wo le sɔmɛ nu. Exwe 30 han goduɔ, apstolo Piɛ dɔn susu yi nɔnɔmɛ trɔtrɔ ŋtegannukpɔkpɔ cɛ ji. Edasɛ mɔ égbekpɔtɔ ɖoɖoɔ ŋwii nywiɖe.​—2 Piɛ 1:​16-18.

9. Aɖaŋ nywi ci yí Yesu ɖo nɔ yi nukplaviwoɔ?

⁹ “Mí setonu ni.” Yehowa dasɛ petii mɔ yejikɔ mɔ mìwo le se Yeviye nyɔwo keŋ awa do wo ji. Enyɔ ciwo Yesu nu hwecinu ele nyigban jiɔ? Énu enyɔ vevi sugbɔ ciwo yí ele mɔ mìaɖo to! Le kpɔwɛ mɛ, ésɔ lɔnlɔn kpla yi dokplɔtɔwo lé woadra eŋɛnywi lɔ do, égbenu nɔ wo zenɛniɖe mɔ wo le kpɔtɔ anɔ zanŋte. (Mt. 24:42; 28:​19, 20) Égbedo zo lanmɛ nɔ wo mɔ wo le je agbla sugbɔ; édo ŋsɛn wo hɛnnɛ mɔ woŋgbena ta o. (Luiki 13:24) Yesu tɛ gbe do ji nɔ yi dokplɔtɔwo mɔ woɖo alɔn wowonɔnɔwo, akpɔtɔ awa ɖeka yí awa do ye sewo ji. (Ʒan 15:​10, 12, 13) Aɖaŋ nywi teŋ yí Yesu ɖo nɔ nukplavi lɔwo! Aɖaŋɖoɖo ŋtɔ́ gbele veviɖe egbɛ shigbe hwecinu Yesu ni nɛ.

10-11. Lé mìatɛnŋ adasɛ do mɔ mìsekɔ tonu nɔ Yesuɔ?

¹⁰ Yesu nu mɔ: “Amɛ ɖekpokpwi ci yí nyi nyɔnɔnwi lɔ tɔ senɔ Anyi gbe.” (Ʒan 18:37) Mìadasɛ mɔ mìsekɔ yi gbe nɔ ‘mìdedonɔ dɔmɛzi do mìwonɔnɔwo o, vɔ yí sɔ agɔjeje kenɔ mìwonɔnɔwo faa.’ (Kol. 3:13; Luiki 17:​3, 4) Sɔwu cɛɔ, mìadasɛ mɔ mìsekɔ yi gbe nɔ mìdrakɔ nyɔnɔnwi lɔ koɖo zolelanmɛ le “hwenu doamɛjiwo koɖo hwenu madoamɛjiwo mɛ.”​—2 Tim. 4:​2, nwt.

¹¹ Yesu nu mɔ: “Anyi lɛngbɔwo ɖonɔto Anyi gbemɛ.” (Ʒan 10:27) Denyi Kristo nyɔwo sese ɖekɛ mɛ yí yi dokplɔtɔwo danasɛ le mɔ yewoɖokɔ to yi le o, vɔ  wogbewanɔ do wo ji. Wodenanɔ “tamɛ sugbɔ bukpɔwo so xexe mɛ nuwo nu” dɔnnɔ wowo susuwo o. (Luiki 21:34) Le yi dumɛɔ, wawa do Yesu sewo ji yí nyi enu ŋkɔtɔ nɔ wo le agbemɛ, nɔ wodo go nɔnɔmɛ sɛnŋsɛnŋwo can. Mìwo nɔvi sugbɔtɔ tokɔ tetekpɔ sɛnŋsɛnŋ ciwo mɛ yumɛcici, abɔjeje koɖo jɔjɔmɛfɔkuwo le mɛ. Le tetekpɔ cɛwo pleŋ mɛɔ, wokpɔtɔ le gbeji nɔ Yehowa, nɔ ecɛ ana woakpe fun sugbɔ can. Yesu na wo kankandojinyɔ cɛwo: “Amɛ ci yí ɖo Anyi sewo yí nyìnyì wo, é lɔn Ŋ. Amɛ ci yí lɔn Ŋ, Edanyɛ a lwin.”​—Ʒan 14:21.

12. Emɔ bu ci ji mìatɛnŋ ato adasɛ mɔ mìsekɔ tonu nɔ Yesuɔ?

¹² Emɔ bu ci ji mìatɛnŋ ato adasɛ mɔ mìsekɔ tonu nɔ Yesu ke: mìawanɔ dɔ alɔlealɔmɛ koɖo mɛ ciwo eɖo mɔ wo le danasɛ mɔ nɔ mì. (Ebre. 13:​7, 17) Mawu habɔbɔ lɔ wa ashitrɔtrɔ sugbɔ le exwe ɖewo ciwo yí vayi mɛ. Ðewo yí nyi dɔwanu koɖo kunuɖeɖe mɔnu yoyuwo zanzan, kwɛshila dodomɛ bɔbɔ wawa le emɔ yoyu bu nu; habɔbɔ lɔ gbewa ashitrɔtrɔ so Fyɔɖuxuxɔwo cucu, wowo dradrado koɖo ebulele nɔ wo nu. Mìkpɔ jijɔ sugbɔ so emɔdasɛnamɛ ciwo mɛ nunya koɖo lɔnlɔn le cɛwo nu! Mìkando ji mɔ nɔ mìje agbla yí wa do emɔdasɛnamɛ ciwo habɔbɔ lɔ nakɔ do gamɛ jiɔ, Yehowa ayra do ji.

13. Nɔ mìse tonu nɔ Yesu ɖe, nyɔna ciwo yí mìakpɔɔ?

¹³ Nɔ mìwa do enu ciwo pleŋ Yesu kpla mì jiɔ, mìakpɔ nyɔna so mɛ. Yesu ɖo gbe nɔ yi nukplaviwo mɔ ye nukplamuwo afa kɔn nɔ wo. Énu mɔ: “Na na mí gbɔndomɛ . . . Acikplakɔ Anyitɔ le fafɛɖe, yi agban Anyitɔ foɖa.” (Mt. 11:​28-30) Mawu Nyɔ ci mɛ Eŋɛnywiwema amɛnɛ ciwo yí xo nuxu so Yesu gbenɔnɔ koɖo yi sumɔsumɔdɔ nu le, fa kɔn nɔ mì, do ŋsɛn mì le gbɔngbɔnmɛ yí gbena mìnya ŋɖɛ doji. (Eha. 19:7; 23:3) Yesu nu daɖɛ mɔ: “Shicu nɔ amɛ ciwo yí senɔ Mawu Enyɔ lɔ, yí wanɔ do ji!”​—Luiki 11:28.

14-15. (a) Sɔ koɖo enyɔ ciwo yí le Ʒan 12:​27, 28 mɛ ɖe, hwenu yí Yehowa xo nuxu so jeŋkwimɛ zetɔntɔ lɔɔ? (b) Nyi yí taɖo Yehowa nyɔ lɔwo afa kɔn nɔ Yesu yí agbedo ŋsɛn yiɔ?

¹⁴ Hlɛn Ʒan 12:​27, 28. Eŋɛnywiwema Ʒan tɔ nu hwecinu Yehowa xo nuxu so  jeŋkwimɛ zetɔntɔ lɔ. Ŋkeke ɖewo gbɔxwe Yesu akuɔ, éyi Ʒeruzalɛmu nɔ Paki xwe kpɛtɛ ci aɖu. Énu le nɔ mɔ: “Anyi ji mɛ xa.” Le yi goduɔ, édo gbe ɖaɖa mɔ: “Eda kanfu Ao ŋkɔ.” Dalɔ ɖo ŋci so jeŋkwimɛ mɔ: “Ŋ kanfu Yi yi Na gbe kanfu Yi.”

¹⁵ Yesu xa le yiɖeki mɛ ɖo agbannɔamɛji gangan ɖeka enyi mɔ akpɔtɔ ale egbeji nɔ Yehowa. Yesu nya nywiɖe mɔ woaxo ye xomɛvevetɔ yí awu ye koɖo tamɛsɛnsɛn. (Mt. 26:38) Ci wu wo pleŋ ɔ, Yesu ji mɔ yeakanfu Yedaye ŋkɔ. Vɔ wodo hwɛ yi mɔ yɛnu enyɔ kpotu. Egbevekɔ nu mɔ ye ku axo ɖyi Mawu ŋkɔ. Kankandoji li mɔ Yehowa nyɔwo do ŋsɛn Yesu! Átɛnŋ akando ji mɔ Yehowa akanfu yi ŋkɔ lɔ. Dalɔ nyɔ lɔwo afa kɔn ni yí agbedo ŋsɛn yi sugbɔ nɔ ado ji le funkpekpe ciwo yí le te kpɔɛ mɛ. Nyɔnɔnwi enyi mɔ Yesu ɖekɛ yí atɛnŋ amɔŋje nyɔ ciwo Edalɔ nu mɛ le hwenɔnu, vɔ Yehowa na yí woŋwlɛn Yi nyɔ lɔwo ɖɛ nɔ mìwo domɛtɔ ɖeshiaɖe.​—Ʒan 12:​29, 30.

16. Nyi yí taɖo eɖyixoxo Mawu ŋkɔ venɔ mì nu hweɖewonuɔ?

¹⁶ Shigbe Yesu hannɛɔ, atɛnŋ ave mìwo can nu ci amɛwo xokɔ ɖyi Yehowa ŋkɔ. Taŋfuin wowakɔ enumajɔmajɔwo do mì nu shigbe Yesu hannɛ. Alo ketɔnɔwo tɛnŋ kaka ŋsukankannyɔwo so mì nu yí avekɔ mì nu. Mìatɛnŋ abunɔ eɖyixoxo  ci yí ŋsukankannyɔ cɛwo ahɛn va Mawu koɖo yi habɔbɔ lɔ ji kpɔ. Yehowa nyɔwo atɛnŋ ana akɔnfafa sugbɔ mì le hwenɔnu. Deʒan mɔ mìaxa ɖoɖu o. Mìatɛnŋ akando ji mɔ “fafa Mawu tɔ, ci mɛ agbetɔ da tɛnŋ mɔŋje o, a lé [mìwo] jiwo koɖo [mìwo] susuwo dote, le Yesu Kristo mɛ.” (Fili. 4:​6, 7) Yehowa akpɔtɔ akannɔfu yi ŋkɔ gashiagamɛ. Áto Fyɔɖuxu lɔ ji yí adra enu ciwo pleŋ Satana koɖo xexe cɛ dahɛn do le Yi sɛntɔ egbejinɔtɔwo nu.​—Eha. 94:​22, 23; Ezai 65:17.

17. Sɔ koɖo Ezai 30:21 ɖe, lé Yehowa xonɔ nuxu do nɔ mì gbɛɔ?

¹⁷ Yehowa kpɔtɔ xokɔ nuxu nɔ mì gbɛ. (Hlɛn Ezai 30:21.) Nyɔnɔnwi enyi mɔ mìdesekɔ Mawu gbe so jeŋkwimɛ o. Gan éna woŋwlɛn yi Nyɔ, Bibla ci yí nakɔ emɔdasɛnamɛwo mì ɖɛ. Gbesɔ kpe niɔ, Yehowa gbɔngbɔn kpekɔdo “amɛjikpɔtɔ ci yí le egbeji” nu nɔ akpɔtɔ anakɔ ŋɖuɖu ci yí ʒan Yi sɛntɔwo. (Luiki 12:42) Gbɔngbɔnmɛ ŋɖuɖu ciwo mìxɔkɔ to wematatawo, siti, videowo koɖo enyɔledokajiwo ji sugbɔ taŋ!

18. Lé Yehowa nyɔwo do ŋsɛn ao xɔse yí gbena edɔngbegbe eo doɔ?

¹⁸ Mína nɔ mìakpɔtɔ alé enyɔ ciwo Yehowa nu hwecinu Eviɛ le nyigban ji do tamɛ! Lé vamɛ mɔ Mawu ŋtɔ nyɔ ciwo woŋwlɛn do Bibla mɛ, ana kankandoji mì mɔ Yehowa ɖo ŋsɛn do nushianu ji; lé gbena kankandoji mì mɔ yɛadra ŋɖekpokpui ci Satana koɖo yi xexe vwin cɛ dahɛn do le mì nu! Mína mìaɖui gligaan akpɔtɔ aɖo to Yehowa gbe nywiɖe. Nɔ mìwɛ ahan ɔ, mìatɛnŋ ado ji le cukaɖa ɖekpokpui ciwo mìdodoɔ go egbɛ koɖo ciwo yí ava mì ji le esɔmɛ mɛ. Bibla ɖo ŋwi nɔ mì mɔ: “Mí ɖo [ado ji]. Nɔ́ mí wa enu ci yí Mawu dro ɔ, mí a xɔ enu ciwo yí É sɔ ɖogbe nɔ mí.”​—Ebre. 10:36.