1-2. (1) Samaanay masasowal ci Yihofa to tamdaw hani? (2) Oniya lalakaw wa milengo to maanan?

MAKAHIAY ci Yihofa masasowal to tamdaw. Iti:yaho, pakayniay i pairasolay, coyoh, ato Wawa Ningra ci Yis Kristo a mifanaˈ to harateng Ningra. (Amos 3:7; Kalatiya 3:19; Paˈarawan 1:1) Anini, pakaynian ni Yihofa i Fangcalay Cudad a masasowal kitanan. Pafelien Ningra kita to Fangcalay Cudad, ho mahapinangay ita ko harateng ato pakayraan Ningra.

² Itini i sera ci Yis i, kina toloay pasowal ci Yihofa nai kakarayan. O manan ko sowal ni Yihofa? Pakayni toniya sowal, o manan ko mananamay ita, ato mamilifok to maanan a haepoc. Sanay aca nengnengen ita nohatini.

3. (1) Mikitini i Marko 1:9-11, ya micada ci Yis to inoˈ i, mansanay ko sowal ni Yihofa? (2) Pakayni to sowal ni Yihofa ci Yisan, mahapinangay ita ko maanan?

³ Marko 1:9-11 maˈoningay ko sakina cecay ni Yihofa pasowal nai kakarayan, sanay: ‘O Wawa Ako kiso, o kaolahan Ako. O kahemekan Ako kiso.’ Matengil ni Yis ko sowal no Wama paihkal to olah ato pakasoˈlinay cingranan i, maedeng matemeray ko falocoˈ! Pakayni to sowal ni Yihofa mahapinangay ita ko toloay a demak. Saka 1: Ci Yis o Wawa ni Yihofa. Saka 2: Tangongolay ko olah ni Yihofa to Wawa Ningra. Saka 3: Mihaydaay ci Yihofa to Wawa Ningra. Pacalepen ita mihapinang koniya toloay a demak.—ˈOsien ko Marko 1:9-11. *

4. Ikor no micada to inoˈ ci Yis, hano matongalay ko kalalaˈed ningra ato Kawas?

 ⁴ ‘O Wawa Ako kiso.’ Pasowal ci Yihofa toniya sowal i, paihkalay to tangongolay ko kalalaˈed aci Yisan. Ya i kakarayanho ci Yis i, o ˈadingoan a tireng ko wawa no Kawas. Kawra micada ci Yis to inoˈ i, tano fangcalay saocor no Kawas a mipasimal i cingranan, malo o mapasimalay a Wawa Ningra, wa ngaˈay tayra cingra i kakarayan a malo minilnilan no Kawas a Hongti ato sakakaay saysi. (Luka 1:31-33; Hipray 1:8, 9; 2:17) Mansa micada ci Yis to inoˈ i, pasowalay ko Wama to: “O [kaolahan] Ako a Wawa kiso.”​—Luka 3:22.

5. Samaan mitodong ci Yihofaan, paihkal to olah ato pakalalok to tao hani?

⁵ ‘O kaolahan Ako.’ Pakayni paihkal to olah ato mihayda to tamdaw, o taˈarawan ni Yihofa patalipaˈelal kitanan, pairaen ko toki pakalalok to tamdaw. (Yohani 5:20) Ano ciharatengay ato maolahay ko tao kitanan, hanaca pakahemek to kangaˈayan ita i, maedeng mamacakat kita mala tadangaˈayay a tamdaw. Mahecad i, o paro no lomaˈ ato kasakopang salikaka, misaaliay to pakalalok ato pakaolah ita. Ano pakalalok cangraanan i, wa tanoktok ko pakasoˈlinay falocoˈ nangra, halo madimadi a mihodop ci Yihofaan. O wama wina a tamdaw pakalalok to wawa, o masaka limlaan a demak koni, ano nai falocoˈ a pakahemek to wawa, wa macakat macakat i noˈadingoan cangra.

6. Hano ngaˈay kita pakasoˈlin ci Yisan hani?

⁶ ‘O kahemekan Ako kiso.’ Oniya sowal paihkal to pasoˈlinay ci Yihofa to, wa madimadi ci Yis midoedo to araaw Ningra. Pakasoˈlinay ci Yihofa to Wawa Ningra, mansa ngaˈay kita pakasoˈlin ci Yisan, pakasoˈlin cingraanan to palaˈosi to araaw ni Yihofa. (2 Korinto 1:20) Ano dotimen ita ko  taˈarawan ni Yis, wa misetek kita to falocoˈ a minanam cingraanan, mikotod tona saripaˈan ni Yis. Pakasoˈlinay ci Yihofa ci Yisan, pakasoˈlinayho to sikawdan Ningra, wa padotoc a mitodong to taˈarawan no Wawa Ningra.​—1 Pitiro 2:21.

7. Mikitini i Matay 17:1-5, itiniay i samaanay a pakayraan a pasowal ci Yihofa nai kakarayan? Mansanay Cingra?

⁷ ˈOsien ko Matay 17:1-5. Sakina tosa ni Yihofa pasowal nai kakarayan i, ‘mafalicay ko tireng’ ni Yis. Na mitahidangan ni Yis ci Pitiro, Yakop aci Yohani macokacok a tayra i ˈakawangay a lotok, maˈaraway nangra ko mapolosi. Matediay ko pising ni Yis ato rikoˈ ningra. Maˈarawayho no tarokos ci Mosi aci Iliya, malalengoay cangra aci Yis to pakayniay i patay ato piliyaw ni Yis a maˈorip. Soˈlin, ˈayaw i, ‘maeholay a mafotiˈ’ ko tatoloay a tarokos, ikor mapalalto cangra pakaˈaraw toniya kafahkaˈan a demak. (Luka 9:29-32) Dotoc, matahepoay no cecay tadengalay a ˈoˈol ko tarokos, matengilay nangra ko ngiha no Kawas nai ˈoˈol. Miliyawan ni Yihofa paihkal ko olah ato pihayda Ningra to Wawa, mahecad toya picada ni Yis to inoˈ, sanay ci Yihofa: ‘O Wawa Ako, o kakaolahan Ako, o kakahemekan Ako.’ Kawra mitongalan ni Yihofa ko sowal: ‘Ka pitengil kamo to sowal ningra.’

8. O mafalicay ko tireng a mapolosi, samaanay milingat ci Yisan ato nisawawaan?

⁸ Oniya mapolosi mitaypiyaway, ano malo Hongti no Hongti Kitakit no Kawas ci Yis i, wa ira ko fadangalan ato ˈodingar. Maedeng makowaday ci Yis a misaday misiˈayaw to noikoran a roray ato patay. Oniya mapolosi patanoktokay to pakasoˈlinay falocoˈ no tarokos, ira ko ˈicel mitafo to marocekay a madimadi, padotoc midemak to patorodan cangranan a tayal. Ikor no 30 mihecaan, malengoay no tarokos ci Pitiro to mafalicay ko tireng a mapolosi, hatiraay mafekaday a demak itiyaho, cowa ka tawal i ponoˈ ningra.​—2 Pitiro 1:16-18.

9. Pafelian ni Yis ko nisawawaan to maanan matatodongay a sapatalipaˈelal hani?

⁹ ‘Ka pitengil kamo to sowal ningra.’ Mitokelay ci Yihofa kitanan nanay tengilen ko sowal no Wawa Ningra. Ya i hekal ci Yis i, o manan ko sowal ningra hani? Adihayay ko kalimlaan a sowal ningra, sasinanoten ita. Tinakoen pairaan ni Yis ko olah a pasifanaˈ to nisawawaan to sasamaan patenak to ngaˈayay a lihaf, hanaca kinapinaay patalipaˈelal cangranan, padotoc a mikecol. (Matay 24:42; 28:19, 20) Pakalalokan ni Yis ko nisawawaan misarocod a matayal, aka a pisawad. (Luka 13:24) Misaˈicelayho ci Yis pasowal to mikotoday cingranan a tamdaw, kasasiolaolah, makakelec ato dofdofen ko limoˈot ningra. (Yohani 15:10, 12, 13) O sapatalipaˈelal ni Yis matatodongay to nisawawaan, anini oniya sapatalipaˈelal mahecad masakalimlaan.

10-11. Samaanen ita ko demak, o mitengilay to ngiha ni Yis hani?

¹⁰ Sanay ci Yis: “O maolahay to sowal no Kawas a tamdaw a maemin i, mitengil to [ngiha] ako.” (Yohani 18:37) Ano dotocen ita a “kasasisolol . . . kasasihepol,” o mitengilay to ngiha ni Yis. (Kolosay 3:13; Luka 17:3, 4) Wa ngaˈayho kita misamaan a mitengil to ngiha ni Yis hani? “Ano kangaˈayanto, ano katatiihanto a romiˈad i,” ˈifowaen patenak ko ngaˈayay a lihaf.​—2 Timoti 4:2.

¹¹ Sanay ci Yis: “Mafanaˈ ko siri ako a mitengil to ngihaˈ ako.” (Yohani 10:27) Mihaenay i, o nisawawaan ni Kristo coko pisinanot aca to sowal ni Yis, dofdofayho to limoˈot ningra a midemak. Cowa ka calemcem pakayni i “saki ˈorip.” (Luka 21:34) O limoˈot ni Yis ko sakakaay a dademaken  nangra, ano pakidemay ko pakayraan, wa misaˈicel mitengil a midofdof to sowal ni Yis. ˈAlomanay salikaka misiˈayaway to pakidemay a sapalifet, mahawpay ko pades, saˈodis no misafelitay, pakidemay ko kanikaw no kaˈorip. Ano samaanto ko pakayraan, hakowaay ko roray, madimadiay cangra ci Yihofaan. Mikiˈokay ci Yis: “O [micadaay] to limoˈot ako ato midoedoay to limoˈot ako a tamdaw i, o maolahay i takowanan. O maolahay i takowanan i, o kakaolahen no Wama ako.”​—Yohani 14:21.

12. O roma pakayraan mitengil a midofdof ci Yisan, o maanan hani?

¹² O roma pakayraan a mitengil midofdof ci Yisan i, o malacafay to mikayatay a salikaka a matayal. (Hipray 13:7, 17) O likakawa no Kawas ingata a miheca, adihayay ko mafalicay a limasmas, mahawpay ko pakayraan ato lalosidan no mitosilay, limasmas no saˈopo, patireng, misangaˈ to Hongti Kitakit kasaˈopoan a pakayraan. Tano ciolahay ko likakawa no Kawas misongilaˈ a misimsim, ikor ngaˈ pafeli to sakayat kitanan, tada miakoˈiday kita cangraanan. Ano tooren ita ko limasmas no likakawa no Kawas a midemak, wa parahekeren ni Yihofa kita.

13. Ano mitengil a midofdof ci Yisan, wa malifok ko maanan a haepoc?

¹³ Ano mitengil a midofdof to kihcod nano sowal ni Yis, wa malifok ko haepoc. Ci Yis mikiˈokay to nisawawaan, o sapasifanaˈ ningra a kimad wa miliyaw patanoktok cangraanan. Sanay ci Yis: ‘Ta mapahanhan ko ˈorip namo. O madoloay a tamorongen ko taloˈodan ako, o kahmaway ko ˈonoc ako.’ (Matay 11:28-30) O Kimad no Kawas mahawpay ko maoningay a noka ˈorip ato mitosilay ni Yis a sepatay no ratoh a cudad, wa parihaday to falocoˈ ita ato miliyaw patanoktok i noˈadingoan, hanaca paira to taneng no mita. (ˈOlic 19:7; 23:3) Sowal ni Yis: “Ora mitengilay midoedoay to sowal no Kawas ko malemeday.”​—Luka 11:28.

14-15. (1) Mikitini i Yohani 12:27, 28, itiniay i samaanay a pakayraan a sakina tolo nai kakarayan a pasowal ci Yihofa? (2) O sowal ni Yihofa hano ngaˈayay parihaday ato paˈicel to pakasoˈlinay falocoˈ ni Yis hani?

¹⁴ ˈOsien ko Yohani 12:27, 28. Maˈoningay no Yohani ko sakina tolo nai kakarayan a sowal ni Yihofa. Iˈayaw no mapatay to pina romiˈad ci Yis, salikoray cingra i Yirusalim mirienang to Pitaˈlifan a Lisin.  Masomaday ci Yis, tolonsa cingra: ‘Wamaaw, nanay paˈdilen ko ngangan Iso!’ Dotoc i, matengilay ningra ko ngiha no Wama nai kakarayan: ‘Maherekto Kako a paˈdil to ngangan Ako. O mamiliyaw Kako a paˈdil!’

¹⁵ Masomaday ci Yis pakayni i roma demak, mafanaˈay cingra to aretengay ko ˈinorong ningra, o tatahatolas a madimadi ci Yihofaan ngaˈ ngaˈay, ato mamicada to pakidemay a misemsem tahapatay. (Matay 26:38) Ciharatengay ci Yis to papaˈdil to ngangan no Wama, kawra maekoay no tao to pakaditay sanay a raraw; calemcemay cingra to kapatay no niyah, wa pakangodo to Kawas. Mansa, o nai kakarayan a sowal ni Yihofa paˈicelay to pakasoˈlinay falocoˈ ni Yis, o ngangan ni Yihofa oha mapaˈdil sanay ko pakasoˈlin ni Yis. O sowal ni Yihofa parihadayay to falocoˈ ni Yis, aira ko ˈicel mihadidi tono ikoran a pades. Alatek edengan ci Yis ko mafanaˈayto tatodong no sowal no Wama, kawra papitiliden ni Yihofa ko tamdaw toniya sowal, ngaˈ mikitini a minanam kita.​—Yohani 12:29, 30.

16. Misamaanay nolatekay wa calemcem kita mapakadit ko ngangan no Kawas?

¹⁶ Mahecaday kita ci Yisan, cowa sapakaditaw to ngangan no Kawas. Alatek mahecaday kita ci Yisan micadaay to cowa ka sadafdaf a demak, anca macadaay ko sapakotkot no misafelitay a sowal a macariraw. Nolatekay oniya sapaoraf a lihaf pakaditay to ngangan ni Yihofa ato likakawa Ningra, kawra o sowal ni Yihofa mamisayar kitanan.  Aka pakidem a calemcem, ngaˈay pakasoˈlinen ita koni sinael: ‘Papafelien no Kawas kamo to rihaday, ikakaay no niharatengan no tamdaw. Onini rihaday mamisimaw to falocoˈ ato harateng namo.’ (Filipi 4:6, 7) Papaˈdilen ni Yihofa ko ngangan Ningra. Pakaynien i Hongti Kitakit Ningra, palaˈafo ci Satanan atoya midokaˈay to sikawdan Ningra a hekal.​—ˈOlic 94:22, 23; Isaya 65:17.

17. Mikitini i Isaya 30:21, samaanay ci Yihofa pasowal kitanan anini hani?

¹⁷ Anini kamayanay ci Yihofa pasowal kitanan. (ˈOsien ko Isaya 30:21.) Soˈliˈlin cowa ka pakatengil kita to ngiha no Kawas nai kakarayan, kawra pakaynian ni Yihofa i Fangcalay Cudad a pasowal kitanan ato pafeli to sakayat Ningra. O fangcalay saocor ni Yihofa padamaay to ‘madimadiay citanengay a koli’ a paladaˈ to noˈadingoan a kakaenen to sikawdan Ningra. (Luka 12:42) Anini, cowa ko miinsacan ato nai tingnaw aca a lalakaw, iraayho ko tano ika a minengnengan a lalakaw, tada kadofahayto ko noˈadingoan no mita!

18. O sowal ni Yihofa samaanay a pafeli tisowanan to pakasoˈlinay falocoˈ ato timolo hani?

¹⁸ Haratengen ita ko nano sowal ni Yihofa pakayni ci Yisan. Nanay o Kimad no Kawas pafeli to pakasoˈlinay falocoˈ ita to, i kapalay ni Yihofa ko kihcod, pakasoˈlinho wa palahdawen ni Yihofa ko pairaan ni Satan atoya tatiihay a hekal a dokaˈ no mita. Songilaˈen ita mitengil ko ngiha ni Yihofa. Mihaen ko demak ita i, wa tanoktok a misiˈayaw to aniniay ato noikoran a sapalifet, hatoya sapatalipaˈelal no Fangcalay Cudad: ‘Ka mihadidi kamo, malaheci ko araaw no Kawas no ikor i, wa malifok ko saparaheker no Kawas.’​—Hipray 10:36.