1-2. (a) Lelaa Yéhôva a bé kwel ni bôt ba binam ngéda kôba? (b) Kii di ga nigil munu yigil ini?

YÉHÔVA a ngwés a nkwel ni bés. Ngéda kôba, a bi gwélél bapôdôl, biañgel, ni Man wé, Kristô Yésu, inyu yis bés mahoñol mé. (Amôs 3:7; Galatia 3:19; Masoola 1:1) I len ini a nkwel ni bés ni njel Bañga yé, le Bibel. A bi tine bés yo inyu boñ le di laa nigil mahoñol mé, ni yi manjel mé.

² Ngéda Yésu a bé hana isi, kiñ Yéhôva i bi nôga, i lôlak ngii. Di béñge jam Yéhôva a kal mu ngélé i yo aa, bimbe biniigana di nla ôt mu mam a kal, lelaa bi nla bane bés nseñ.

3. Kiki di ñañ i kaat Markô 1:9-11, kii Yéhôva a bi kal ngeñ Yésu a bi sôblana, mambe mam ma mahee bibuk bi bi nyigye?

³ Markô 1:9-11 a gwé bibuk bi Yéhôva ngéda a pot inyu ngélé bisu, kiñ i lôlak i ngii. (Añ.) A kal le: “U yé Man wem nu gwéha, u nlémél me.” Hala a bi lama tihba Yésu i nok Isañ a mpahlene nye gwéha yé, ni bôdôl a gwééne nye! Bibuk bi Yéhôva bi, bi bé yigye mam maa inyu Yésu. Pog, Yésu a yé Man wé. Iba, Yéhôva a ngwés Man wé. Ni aa, Yéhôva a bi unda le Man wé a nlémél nye. Di tibil wan hiki litode mu.

4. Lelaa Yésu a bi yila Man Djob i nya i tôbôtôbô i kel sôble yé?

⁴ “U yé Man wem.” Ni bini bibuk, Yéhôva a bé unda le Yésu a yé Man wé nu gwéha, ni le a bé lama bana maada mape ni Nye. Ilole Yésu a nlo hana isi, a bé  man Djob nu mbuu. Ndi, mbus sôble yé, a bi ba nhook ni njel mbuu mpubi. Ha ngéda i, Djob a bi unda le Yésu, nhook Wé Man, u bé lama bana botñem i ba Kiñe ni Prisi Keñi Djob a ntéé ngéda a’ témb i ngii. (Lukas 1:31-33; Lôk Héber 1:8, 9; 2:17) Jon i kel sôble i Yésu, Isañ a bééna loñge njom i kal le: “U yé Man wem.”​—Lukas 3:22.

5. Lelaa di nla kôna gwéha i Yéhôva ni lem yé i ti bôt bape makénd?

⁵ “U yé . . . nu gwéha.” Ndémbél i Yéhôva mu kiki a ñunda gwéha ni le di nlémél nye i nhôñlaha bés le di nlama yéñ manjel i ti bape makénd. (Yôhanes 5:20) Hala a nlôôha lémél bés ngéda mut a ndiihe bés a ñunda bés gwéha, a béghak ki bés inyu loñge di mboñ. Yak lôk kéé yés i bôda ni i bôlôm i pes mbuu ni i minsôn, i gwé ngôñ le di gwés bo ni le di ti bo makénd. Ngéda di mbégés bôt bape, di nlédés hémle yap, di hôlga ki bo i téñbe i gwés Yéhôva. Bagwal ba nlama ti bon bap makénd. Ngéda bagwal ba nti bon bibégés bi nlôl i ñem inyu mam ba mboñ, ni gwéha, ba nhôla bon bap i tibil hol.

6. Inyuki di nla bôdôl Yésu Kristô ñem?

⁶ “U nlémél me.” Bipôdôl bini bi ñunda le Yéhôva a bé nkwoog nkaa le Yésu a ga téñbe i boñ sômbôl Isañ. Kiki Yéhôva a bééna i nya bôdôl i inyu Man wé, yak bés di nlama ba nkwoog nkaa le Yésu a’ yônôs mimbônga mi Yéhôva nwominsôna. (2 Korintô 1:20) Ngéda di nsoñda ndémbél i Yésu, hala a nkônde lédés makidik més  i odop mu mabal mé. Nlélém bôdôl Yéhôva a bééna inyu Yésu, yon a gwé inyu ntôñ u bagwélél bé, le b’a ke ni bisu i emble Man wé.​—1 Pétrô 2:21.

7. Inoñnaga ni kaat Matéô 17:1-5, imbe ngéda Yéhôva a bi pot kiñ i lôlak i ngii, kii a kal?

⁷ Añ Matéô 17:1-5. Ngélé yônôs iba le kiñ Yéhôva i nôga, i lôlak i ngii, i yé ngeñ Yésu ‘a héñhana’ banigil bé. Yésu a bi naña Pétrô, Yakôbô ni Yôhanes i yéga nye i ngii hikôa. Nyoo nyen ba bi tehe hélha yiinda. Su u Yésu u bi bai kiki hiañgaa, mambot mé ma pôp le puum kiki mapubi. Ba tehe bôt iba, wada a bé pôôna Môsi, nunu numpe a pôônaga Élia, ni bo ba bôdôl kwel ni Yésu inyu nyemb yé i i bé i gwé ni moo, yak ni bitugne gwé. Tolakii baôma bana bo baa ba bé ba ma “wo yaga ’ilo,” ba bé ntôdge ngéda ba bi tehe i hélha yiinda i. (Lukas 9:29-32) Mbus, ond i mapubi i bi hô bo, ba nok kiñ i nlôl mu ond​—kiñ Djob! Nlélém kiki Yéhôva a boñ i kel sôble i Yésu, a bi unda le Man wé a bé lémél nye, ni le a bé gwés nye, ni bini bibuk le: “Nunu a yé Man wem nu gwéha, a nlémél me.” Ndi lini lisañ, a kônde le: “Bé emblana nye.”

8. Lelaa yiinda i i bi tihba Yésu ni banigil bé?

⁸ Yiinda i i bi unda dinyo malép di lipémba li Yésu ni lipém jé ngéda a bé lama ba Kiñe Ane Djob. Ibabé pééna, Kristô a bi lama kôhna makénd inyu mandutu ni béba nyemb a bé lama hônba. I yiinda i, i bi hôlôs hémle i banigil, i lédés bo inyu manoodana ma bé bem bo i dilo di nlo, ni inyu nson nkeñi ba bé lama boñ. Jam kiki bo 30 nwii mbus ngéda, ñôma Pétrô a bi gwélél yiinda i mu biniigana gwé, hala a unda le a bi hôya bé yo.​—2 Pétrô 1:16-18.

9. Mambe maéba ma mahee Yésu a bi ti banigil bé?

⁹ “Bé emblana nye.” Yéhôva a bi tibil unda le a bé gwés le di emble bipôdôl bi Man wé, ni le di nôgôl gwo. Kii Yésu a bi kal ngéda a bé hana isi? A bi kal ngandak mam i mahee! Kiki hihéga, a bi yoñ ngéda i niiga banigil bé lelaa ba añal ñañ nlam, a hôñlaha yak bo ngandak ngélé nseñ i yén péé. (Matéô 24:42; 28:19, 20) A bi yigye ki le ba nyamnda ni ngui, a ti ki bo makénd i téñbe. (Lukas 13:24) Yésu a bi unda banigil bé nseñ i gwéhna, i tééda adna yap, ni i nôgôl mambén mé. (Yôhanes 15:10, 12, 13) Kinje maéba malam Yésu a bi ti banigil bé! Maéba ma, ma ngi yii mahee i len ini kiki ngéda Yésu a tine mo.

10-11. Lelaa di nla unda le di ñemble Yésu?

¹⁰ Yésu a kal le: “Hi mut a yé nu maliga a ñemble kiñ yem.” (Yôhanes 18:37) Di ñunda le di ñemble kiñ yé ngeñ di ‘nke ni bisu i hônbana bés ni bés, di nwéhlaga ki bés ni bés.’ (Kôlôsé 3:13; Lukas 17:3, 4) U héya hala, di ñunda ki le di ñemble nye ngéda di nyoñ ngaba ni makénd i añal ñañ nlam i “ngéda i kôli to ngéda i kôli bé.”​—2 Timôtéô 4:2.

¹¹ Yésu a kal le: “Mintômba nwem mi nok kiñ yem.” (Yôhanes 10:27) Banigil ba Kristô ba bé emble ndik bé Yésu, ndi ba bé bii yak bibañga  gwé bisélél. Ba bé nwas bé le “nduña nom ini” i yoña bo. (Lukas 21:34) Maselna ni hala, i nôgôl mambén ma Yésu i bé jam li bisu i niñ yap, to bisu bi mandutu. Nlélém kiki bo, ngandak bilôk bikéé i nhônba mandutu ma ngui i len ini, mu mandutu ma di nla sima ngolba i baoo bés, liyep li nlôôha, ni bikuu. Ndi mu mangéda ma momasôna, ba ntéñbe ni Yéhôva. Bon Yésu a nti mbônga unu u u nset bé: “Nu a gwé matiñ mem, a téédaga ki mo, nyen a ngwés me. Nu ki a ngwés me Tata a’ gwés nye.”​—Yôhanes 14:21.

12. Lelaa di nla ki unda le di ñemble Yésu?

¹² Njel ipe ini di nla gwélél inyu unda le di emble Yésu: Ngéda di nsal ikété adna ni i bôt a bi téé inyu éga bés. (Lôk Héber 13:7, 17) Masañ mana, ntôñ u Djob u nlona ngandak mahéñha, u ngwélél yak bisélél ni makeñge ma mondo inyu téé likalô, u nlona yak mahéñha likoda jés li ñem sonde, i makeñge ma maoñ, libôñglak ni tiimba lémés mandap ma Ane. Di nlôôha ti mayéga inyu bitelbene bi gwéha bi! Di nla ba nkwoog nkaa le Yéhôva a’ sayap biliya di mboñ inyu noñ biniigana ntôñ wé u nti bés.

13. Umbe nseñ di ñôt i emble Yésu?

¹³ Di ñôt nseñ i nôgôl mam momasôna Yésu a bi niiga. Yésu a bôn banigil bé le, mam a bi niiga bo m’a hôgbaha bo. A kal le: “Miñem minan nw’a noi. Inyule kop yem nson i yé tomba, mbegee yem ki i nhoi.” (Matéô 11:28-30) Bañga i Djob, i het di nléba bikaat bi-na bi mpôdôl niñ ni nson u Yésu, i nhôgbaha bés, i nlédés ki hémle yés, i tinak bés pék. (Tjémbi 19:8; 23:3) Yésu a kal le: “Ba ba nok bañga i Nyambe, ba téédaga ki yo, ba yé nsaibak!”​—Lukas 11:28.

14-15. (a) Inoñnaga ni kaat Yôhanes 12:27, 28, imbe ngéda Yéhôva a bi pot kiñ i lôlak i ngii inyu ngélé i nyônôs aa? (b) Inyuki bibuk bi Yéhôva bi bi lédés Yésu, bi hôgbaha ki nye?

¹⁴ Añ Yôhanes 12:27, 28. Kaat Yôhanes yon i gwé bibuk bi Yéhôva ngéda a pot inyu ngélé nyônôs aa, kiñ i lôlak i ngii. Ndék ngéda ilole a  nwo, Yésu a bé Yérusalem inyu tégbaha Pasa. A kal le: ‘Nduña i yé me ñem.’ Mbus a soohe le: “A Ta, ti jôl joñ lipém.” Ha nyen Isañ a timbhe nye, kiñ i lôlak i ngii le: “Me bi ti jo lipém, m’a ti ki jo lipém.”

¹⁵ Ngéda Yésu a bé hoñol mbegee ikeñi a bééna i téñbe ni Yéhôva, hala a bé lôôha tééñga nye. Yésu a bé yi loñge loñge le, ba bé lama bép nye ndôm tôlô, ba sônôs nye njonok letee ni nyemb. (Matéô 26:38) Ikété mam momasôna ma bé kon Yésu ngôñ, li bisu li bé le, a ti jôl li Isañ lipém. Ba bi kal le Yésu a ñôbôs jôl li Djob, hala a bé tééñga nye i yi le nyemb yé i ga hoo jôl li Djob mahindi. Hégda lelaa bibuk bi Yéhôva bi bi lama hôyôs Yésu! A bé nkwoog nkaa le jôl li Yéhôva li ga kôs lipém. Bibuk bi Isañ bi bi lama hôgbaha Yésu, ni ti nye ngui i hônba mandutu a bé lama boma. Tolakii Yésu nyetama nyen a bi nok kiñ Isañ, Yéhôva a bi yoñ bitelbene le bibuk Gwé bi téédana inyu yés.​—Yôhanes 12:29, 30.

16. Inyuki hala a nla tééñga bés ngéda ba nhoo jôl li Djob mahindi?

¹⁶ Kiki Yésu, hala a nla tééñga yak bés i tehe le ba nhoo jôl li Yéhôva mahindi. Bebek kiki Yésu, bôt  ba mbôñôl bés mam ma téé bé sép. Tole miñañ mimbe baoo bés ba ntjam ikolba bés mi nla tééñga bés. Téntén ngéda di nhoñol lelaa miñañ mi, mi nhoo jôl li Yéhôva ni ntôñ wé mahindi. Ha nya ngéda i, bibuk bi Yéhôva bi nla ti bés hogbe ikeñi. Di nlama bé bana nduña i nlôôha. Di nla ba nkwoog nkaa le ‘nsañ Nyambe u u nloo mahoñol momasôna w’a tat miñem nwés ni mahoñol més i Kristô Yésu.’ (Filipi 4:6, 7) Yéhôva a ga waa bé ti jôl jé lipém. A’ mélés mam mabe momasôna Satan ni nkoñ isi wé ba mboñ bagwélél Bé, ni njel Ane.​—Tjémbi 94:22, 23; Yésaya 65:17.

17. Inoñnaga ni Yésaya 30:21, lelaa Yéhôva a mpôdôs bés i len ini?

¹⁷ Yéhôva a ngi pôdhak bés i len ini. (Añ Yésaya 30:21.) I yé maliga le, di nok bé nye a mpôdôs bés, kiñ i lôlak i ngii. Ndi, a bi ti bés Bañga yé, le Bibel, i het a nti bés biniigana. Ni ki le, mbuu u Yéhôva u ntinde “kindak nu maliga” i ke ni bisu i ti bagwélél Bé bijek bi mbuu. (Lukas 12:42) Kinje ndiba i pes mbuu di gwé, ni njel internet, bividéô, ni bikaat ba ñemble!

18. Lelaa bipôdôl bi Yéhôva bi nlédés hémle yoñ, bi tinak we makénd?

¹⁸ Hôiga bañ bipôdôl Yéhôva a kal Man wé ngéda a bé munu isi! Bipôdôl bi Djob, bi di nléba i Bibel, bi nkwés bés nkaa le Yéhôva a gwé mam momasôna i moo ni le a ga mélés mam mabe momasôna Satan ni béba nkoñ isi wé ba bi lona bés. Di yoñ makidik i tibil emble kiñ Yéhôva. Ibale di mboñ hala di ga pam i yémbél mandutu di mboma nano ni ma momasôna ma nke lo. Bibel i nhôñlaha bés le: “I mbéda le ni bana hônba kayéle ngéda ni mal boñ sômbôl Nyambe, ni kôhna biyônôl bi mimbônga.”​—Lôk Héber 10:36, MN.