1-2. (1) ?Olsem wanem Jehova i toktok wetem ol man? (2) ?Bambae yumi tokbaot wanem long stadi ya?

JEHOVA i glad blong toktok wetem yumi. Long taem bifo, hem i yusum ol profet, ol enjel, mo Boe blong hem, Kraes Jisas, blong oli talemaot ol tingting blong hem long yumi. (Amos 3:7; Gal. 3:19; Rev. 1:1) Tede, Jehova i yusum Baebol blong toktok wetem yumi, mo blong mekem yumi kasem save long ol tingting mo wok blong hem.

² Taem Jisas i stap long wol, Jehova i toktok tri taem long heven i kam daon. I gud yumi luk samting we Jehova i talem, mo yumi save lanem wanem from ol tok ya, mo tu olsem wanem yumi save kasem blesing from.

3. Folem Mak 1:9-11, ?Jehova i talem wanem taem Jisas i tekem baptaes? ?Tok ya i soemaot wanem?

³ Long Mak 1:9-11, hemia faswan taem we Jehova i toktok long heven i kamdaon. (Ridim.) Hem i talem se: “Yu yu Pikinini blong mi. Mi mi lavem yu tumas, mo mi glad long yu.” !I sua se Jisas i glad tumas blong harem voes blong papa blong hem we i soemaot se i lavem mo i trastem hem! Ol tok ya blong Jehova oli soem tri impoten samting long saed blong Jisas. Faswan, Jisas i Pikinini blong hem. Nambatu, Jehova i lavem tumas Pikinini blong hem. Mo namba tri, Jehova i soem se hem i glad long Pikinini blong hem. Naoia bambae yumi tokbaot wanwan long olgeta.

4. ?Olsem wanem Jisas i kam Pikinini blong God long wan niufala fasin?

⁴ “Yu yu Pikinini blong mi.” Ol tok ya oli soemaot se Jisas  i statem wan niufala fasin fren wetem papa blong hem, Jehova. Bifo taem Jisas i stap long heven, hem i wan spirit pikinini blong God. Nating se i olsem, taem hem i tekem baptaes, tabu spirit i makemaot hem. Hemia i soemaot se Jisas i pikinini God mo naoia hem i gat hop blong laef bakegen long heven, mo blong kam olsem King mo Hae Pris we God i jusumaot. (Luk 1:31-33; Hib. 1:8, 9; 2:17) Taswe taem Jisas i tekem baptaes, i stret nomo we Jehova i talem tok ya se: “Yu yu pikinini blong mi.”—Luk 3:22.

5. ?Yumi lanem wanem long eksampol blong Jehova?

⁵ “Mi mi lavem yu tumas.” Jehova i soem se hem i lavem mo i glad long Jisas. Hemia i tijim yumi blong traem faenem eni rod blong talem ol gudfala toktok long ol narafala. (Jon 5:20) Taem narafala i soem lav mo i talem ol gudfala toktok long yumi, hemia i givhan long yumi blong gat ol gudfala fasin. Long sem fasin, ol brata mo sista long kongregesen mo ol famle blong yumi tu, oli nidim we yumi soem lav mo talem ol gudfala toktok long olgeta. Taem yumi mekem olsem, bambae bilif blong olgeta i kam moa strong mo yumi givhan long olgeta blong oli gohed blong mekem wok blong Jehova. Ol papa mo mama tu oli mas talem ol gudfala toktok long ol pikinini blong olgeta. Taem oli talem ol gudfala toktok we i kamaot long hat mo oli soemaot lav long ol pikinini, oli stap halpem ol pikinini blong oli gat ol gudfala fasin.

6. ?From wanem yumi save trastem Jisas?

⁶ “Mi glad long yu.” Tok ya i soemaot se Jehova i trastem se Jisas i naf blong mekem wil blong hem i kamtru. Taswe, yumi tu yumi save trastem se Jisas i naf blong mekem olgeta promes blong Jehova oli kamtru. (2 Kor. 1:20) Taem yumi tingbaot eksampol blong Jisas, hemia i mekem yumi gat strong tingting  blong folem trak blong leg blong hem. Mo tu, Jehova i save se ol man we oli mekem wok blong hem, bambae oli gohed blong lanem moa long saed blong Jisas.—1 Pita 2:21.

7. Folem Matiu 17:1-5, ?wetaem Jehova i toktok long heven i kamdaon? ?Hem i talem wanem?

⁷ Ridim Matiu 17:1-5. Nambatu taem we Jehova i toktok long heven i kamdaon, hemia taem ‘bodi blong Jisas i jenis.’ Jisas i singaot Pita, Jemes, mo Jon blong oli go antap long wan bigfala hil. Nao long ples ya, oli luk wan narakaen vison. Fes blong Jisas i saen we i saen, mo ol klos blong hem tu oli saen. Tu man we tufala i luk olsem Moses mo Elaeja, oli stap storian wetem Jisas. Oli stap tokbaot taem ya we bambae hem i ded mo i laef bakegen. Nating se ol trifala aposol ya oli stap “slip,” oli luk nambawan vison ya nao wantaem nomo oli wekap. (Luk 9:29-32) Biaen, wan klaod we i saen we i saen i kam kavremap olgeta, mo oli harem wan voes. !Hemia voes blong God! Hem i talem se: “Hemia Pikinini blong mi. Mi mi lavem hem tumas, mo mi glad long hem.” Jehova i talem toktok ya finis taem Jisas i tekem baptaes. Be naoia hem i ademap se: “Yufala i lesin long hem.”

8. ?Olsem wanem vison ya i gat paoa long Jisas mo long ol disaepol blong hem?

⁸ Vison ya i soemaot paoa we Jisas bambae i kasem long Kingdom blong God. Hemia i leftemap tingting blong Jisas, mo i mekem hem i strong blong gotru long hadtaem ya we bambae oli kilim hem i ded. Vison ya i mekem bilif blong ol disaepol tu i strong. Hemia i halpem olgeta blong oli rere from ol hadtaem we bambae i traem bilif blong olgeta, mo from ol wok we bambae oli mekem. Samwe long 30 yia biaen, aposol Pita i tokbaot vison ya bakegen. Hemia i soemaot se hem i tingbaot yet vison ya.—2 Pita 1:16-18.

9. ?Wanem gudfala advaes we Jisas i givim long ol disaepol blong hem?

⁹ “Yufala i lesin long hem.” Jehova i soemaot klia se hem i wantem blong yumi lesin mo obei long ol tok blong Jisas. ?Jisas i talem wanem taem hem i stap long wol? !Hem i talemaot plante impoten samting! Eksampol, hem i tijim ol man blong hem blong oli talemaot gud nius, mo hem i talem bakegen mo bakegen se oli mas gohed blong lukaot gud. (Mat. 24:42; 28:19, 20) Mo tu, hem i talem se oli mas traehad blong gotru long doa ya we i smol, mo i leftemap tingting blong olgeta blong oli no lego. (Luk 13:24) Jisas i makemgud se ol man blong hem oli mas lavlavem olgeta, blong oli joen gud, mo obei long ol loa blong hem. (Jon 15:10, 12, 13) !Hemia i wan gudfala advaes we Jisas i givim long ol disaepol blong hem! Advaes ya i impoten yet tede, olsem long taem ya we Jisas i bin talem.

10-11. ?Olsem wanem blong soemaot se yumi lesin long Jisas?

¹⁰ Jisas i talem se: “Olgeta man we oli glad long trutok, oli lesin long voes blong mi.” (Jon 18:37) Yumi soemaot se yumi stap lesin long voes blong hem taem ‘yumi no hareap blong kros, mo yumi glad blong fofogivim yumi.’ (Kol. 3:13; Luk 17:3, 4) Mo tu, yumi soem se yumi lesin long voes blong hem, taem yumi wok strong blong talemaot gud nius “long gudtaem no long hadtaem.”—2 Tim. 4:2.

¹¹ Jisas i talem se: “Ol sipsip blong mi oli lesin long voes blong mi.” (Jon 10:27) Ol man blong Jisas oli no lesin nomo long ol tok blong hem be oli folem ol tok we hem i talem. Oli no “wari from ol samting blong laef.” (Luk 21:34) Be oltaem oli obei long ol tok we Jisas i talem, nating se oli fesem ol hadtaem long laef blong olgeta. Plante brata mo sista oli stanap strong long plante trabol, olsem fasin  ya we man i agensem olgeta, oli pua tumas mo oli kasem disasta. Nating se i olsem, oli gohed nomo blong holemstrong long Jehova. Oli bilif strong long promes ya blong Jisas se: “Man we i akseptem ol loa blong mi mo i obei long olgeta, hem nao i lavem mi. Mo man we i lavem mi, Papa blong mi tu i lavem hem.”—Jon 14:21.

12. ?Wanem wan narafala rod blong lesin long Jisas?

¹² Wan narafala rod blong soem se yumi lesin long Jisas, hemia taem yumi obei long olgeta we hem i putumap blong oli lidim yumi. (Hib. 13:7, 17) Long ol yia we oli jes pas, ogenaesesen blong Jehova i mekem plante jenis. Ol niufala tul mo fasin blong prij, ol jenis long miting blong wik, mo niufala fasin blong bildim, fiksimap mo lukaot gud long ol haos Kingdom blong yumi. !Yumi glad tumas from we oli lidim gud yumi wetem lav! Yumi save sua se Jehova bambae i blesem yumi from we yumi traehad blong folem ol jenis we ogenaesesen i mekem.

13. Taem yumi lesin long Jisas, ?hemia i givhan long yumi olsem wanem?

¹³ Taem yumi lesin long ol tijing blong Jisas, hemia i mekem i gud long yumi. Jisas i promes long ol disaepol blong hem se ol tijing blong hem bambae oli mekem olgeta oli harem gud. Hem i se: “Bambae yufala i save harem gud long laef blong yufala. From we yok blong mi i isi nomo blong man i karem, mo ol samting we mi askem long yufala blong yufala i karem, oli no hevi.” (Mat. 11:28-30) Ol stori blong laef blong Jisas mo minista wok blong hem, oli mekem yumi haremgud, oli givim paoa, mo oli mekem yumi waes. (Sam. 19:7; 23:3) Jisas i talem se: “!Ol man we oli harem tok blong God mo oli stap obei long hem, olgeta ya nao oli glad!”—Luk 11:28.

14-15. (1) Folem Jon 12:27, 28, ?wanem laswan taem we Jehova i toktok long heven i kamdaon? (2) ?From wanem ol tok we Jehova i talem i leftemap tingting mo i mekem Jisas i strong?

¹⁴ Ridim Jon 12:27, 28. Gospel blong Jon i tokbaot tri taem we Jehova i toktok long heven i kamdaon. Sam dei bifo we Jisas i ded, hem i stap long Jerusalem blong mekem laswan lafet blong Pasova. Hem i talem se: “Tingting blong mi i hevi tumas.” Nao hem i prea se: “Papa, yu leftemap nem blong yu.” Mo papa blong hem i toktok long heven i kam daon i se: “Mi mi leftemap finis,mo bambae mi leftemap bakegen.”

 ¹⁵ Tingting blong Jisas i trabol tumas, from we hem i gat bigfala wok blong holemstrong long Jehova. Jisas i save se bambae hem i mas safa bitim mak mo i ded long wan fasin we i nogud. (Mat. 26:38) Samting we i moa impoten se hem i wantem leftemap nem blong Papa blong hem. Ol man oli jajem Jisas se hem i tok nogud long God, mo hem i wari se ded blong hem bambae i daonem God. !Ol tok blong Jehova oli leftemap tingting blong Jisas! Hem i save se samting ya bambae i leftemap nem blong Jehova. Taswe, ol tok ya oli mekem tingting blong Jisas i strong blong hem i gotru long hadtaem ya we bambae hem i kasem. Nating se Jisas nomo i kasem save long ol tok we Papa blong hem i talem long taem ya, be Jehova i meksua se oli raetem daon ol tok ya blong givhan long yumi.—Jon 12:29, 30.

16. ?Wanem i save mekem yumi wari from nem blong God?

¹⁶ Olsem Jisas, maet yumi wari from ol samting we oli save daonem nem blong Jehova. Maet narafala i mekem i no stret long yumi. O maet tingting blong yumi i foldaon from ol giaman stori we ol man oli talem long saed blong yumi. Maet yumi ting se ol stori ya oli save sakem doti long nem blong Jehova mo ogenaesesen blong hem. Long taem olsem, ol tok blong Jehova long Baebol oli save leftemap tingting blong yumi. Yumi no nid blong wari bitim mak. Yumi save sua se “tru long Kraes Jisas, pis ya blong God we i bigwan tumas  i bitim olgeta save blong yumi, bambae i lukaot gud long hat mo tingting blong [yumi].” (Fil. 4:6, 7) Oltaem bambae Jehova i leftemap nem blong hem. Tru long Kingdom blong hem bambae hem i finisim ol nogud samting we Setan mo wol blong hem oli mekem long ol man blong Jehova.—Sam. 94:22, 23; Aes. 65:17.

17. Folem Aesea 30:21, ?olsem wanem Jehova i stap toktok long yumi tede?

¹⁷ Tede Jehova i gohed yet blong toktok wetem yumi. (Ridim Aesea 30:21.) I tru, yumi no save harem voes blong hem. Be, hem i givim tok blong hem Baebol, we i fulap wetem ol advaes. Mo tu, tabu spirit blong Jehova i givhan long “gudfala bos we i waes” blong i gohed blong givim kakae long ol man blong God. (Luk 12:42) !Yumi gat plante samting olsem ol buk, ol video mo ol rikoding we oli givhan blong mekem bilif blong yumi i strong!

18. ?Olsem wanem tok blong Jehova i mekem bilif mo tingting blong yumi i strong?

¹⁸ !I gud yumi gohed blong tingbaot tok we Jehova i talem long Jisas taem hem i stap long wol! Yes, ol tok blong God long Baebol, oli mekem yumi gat strong tingting se Jehova i gat paoa long evri samting, mo bambae hem i finisim olgeta trabol we Setan mo rabis wol ya i stap mekem. Taswe, i gud yumi gat strong tingting blong lesin gud long voes blong Jehova. Sipos yumi mekem olsem, bambae yumi save stanap strong long ol trabol mo ol hadtaem we bambae yumi fesem long fiuja. Baebol i talem se: “Yufala i mas gat fasin ya blong stanap strong, blong yufala i save kasem ol samting we God i promes blong givim. Be fastaem yufala i mas mekem samting we God i wantem.”—Hib. 10:36.