1-2. (a) Sonaha Jahowa marsahap bani manisia? (b) Bani artikel on, aha do na laho iulas hita?

MAROSUH do Jahowa marsahap bani manisia. Na basaia, igunahon Ia do nabi, malekat, ampa Jesus Kristus, Anak-Ni laho patugahkon pasal harosuh ni uhur-Ni. (Ams. 3:7; Gal. 3:19; Pangk. 1:1) Sonari igunahon Ia do Bibel laho marsahap hubanta. Marhitei Bibel, iarusi hita ma sonaha pingkiran ampa dalan-Ni.

² Sanggah Jesus i tanoh on, dong tolu hali Jahowa marsahap hun surga hu bani. Bani artikel on, iulas hita ma aha do na boi iparlajari hita hunjai janah sonaha hita boi mandapot guna.

3. Songon na ipatugah bani Markus 1:9-11, aha do na ihatahon Jahowa sanggah Jesus ididi, janah hatorangan na ponting aha ma na dapot hita hunjai?

³ Parlobei sahali Jahowa marsahap bani Jesus isurat bani Markus 1:9-11. (Basa.) Ia mangkatahon, “Ho do Anak na hinaholongan ni uhur-Hu, rosuh do uhur-Hu bam.” Tontu malas do uhur ni Jesus sanggah manangar Bapani mangkatahon anggo Ia mangkaholongisi janah porsaya hu bani. Hunjai dong tolu hatorangan na ponting na ibotoh hita pasal Jesus. Na parlobei, Anak ni Naibata do ia. Na paduahon, Jahowa mangkaholongisi. Janah na patoluhon, iharosuhkon Jahowa do ia. Sonari ulas hita ma pasal ai.

4. Aha do artini sanggah Jesus iminaki marhitei tonduy na pansing?

⁴ “Ho do Anak na hinaholongan ni uhur-Hu.” Tongon, domma gabe Anak ni Naibata Jesus sanggah i surga. Tapi sanggah ididi, iminaki do ia marhitei tonduy na pansing. On patuduhkon lang pitah Anak ni Naibata ia.  Jadi sanggah Jesus iminaki, Naibata sihol patuduhkon mulak do holi Jesus hu surga janah ipilih gabe Raja ampa Sintua ni Malim. (Luk. 1:31-33; Heb. 1:8, 9; 2:17) Halani ai, sanggah Jesus ididi, sosok ma ihatahon Jahowa hu bani, “Ho do Anak haholongan-Ku.”​—Luk. 3:22.

5. Sonaha hita mangusihi Jahowa laho patoguhkon halak na legan?

⁵ “Ho do Anak na hinaholongan ni uhur-Hu.” Sanggah ihatahon Jahowa sonai, tangkas ma taridah holong janah marosuh do Jahowa bani Jesus. Sada siusihan na madear do on. Hita pe marusaha ma mangojur na legan. (Joh. 5:20) Sanggah dong sanina botou na patuduhkon holongni janah mamuji hita, tontu malas do uhurta. Sonai ma homa pangahap ni sanina botou ampa kaluarganta anggo hita mamuji sidea. Gabe toguh ma haporsayaon ni sidea janah boi ma sidea totap mangidangi Jahowa. Namatoras pe porlu do homa patuduhkon holong ampa mamuji niombahni. Anggo ra namatoras mamuji niombahni, gabe tarojur ma sidea mambahen hamajuon.

6. Mase hita porsaya bani Jesus?

⁶ “Rosuh do uhur-Hu bam.” Hunjon taridah ma porsaya do Jahowa anggo Jesus tongtong mandalankon parentah-Ni. Jadi hita pe maningon porsaya ma ipasaud Jesus do holi ganup janji ni Naibata. (2 Kor. 1:20) Anggo irimangi hita siusihan na ibere Jesus, lambin tarojur ma hita marlajar hun bani janah mangusihisi. Songon Jahowa na porsaya bani Jesus, sonai do homa Ia porsaya bani juakjuak-Ni. Pos do uhur-Ni anggo juakjuak-Ni tongtong mangusihi Anak-Ni.​—1 Ptr. 2:21.

7. Songon na ipatugah bani Mateus 17:1-5, sadihari do na paduahalihon Jahowa marsahap hun surga, janah aha ma na ihatahon Ia?

⁷ Basa Mateus 17:1-5. Iarahkon Jesus ma si Petrus, si Jakobus, pakon si Johannes hu sada dolog na ginjang. Sanggah ijai “tarpodom” ma susianni ai. Dob puho, ididah sidea ma sada panonggoran. Taridah ma domma ‘mubah rupa’ ni Jesus. Marsinalsal songon mata ni ari do bohini, anjaha pakeianni pe lopak marhilong. Ididah sidea homa si Musa pakon si Elias marsahapi pakon Jesus pasal hamatean ampa parpuhoonni. (Luk. 9:29-32) Dob ai, roh ma hombun manlinggomi sidea janah itangar sidea ma sora ni Naibata hun bagas hombun ai. Nini do, “On do Anak haholongan-Ku, marosuh do uhur-Hu bani.” Sonai do homa na ihatahon Jahowa sanggah Jesus ididi. Tapi ambahni ai ihatahon do use, “Tangihon hanima ma ia!” On ma na paduahalihon Jahowa marsahap hun surga bani Jesus.

8. Aha do gunani panonggoran ai bani Jesus pakon susianni?

⁸ Panonggoran ai patuduhkon na laho ipasangap ma Jesus sanggah ia gabe Raja bani Harajaon ni Naibata. Tontu gabe toguh ma uhur ni Jesus halani ai. On ma na mangurupi ia ase totap martahan ibagas sitarononni na laho roh. Marhitei panonggoran ai pe, ipatoguh do homa susianni ibagas parlajouan ase boi mandalankon tugas na ibere bani sidea. Hira-hira 30 tahun dobkonsi ai, itarsingati si Petrus do pasal panonggoran ai. On patuduhkon tangkas ope idingat ia pasal ai.​—2 Ptr. 1:16-18.

9. Sipasingat aha ma na ibere Jesus bani susianni?

⁹ “Tangihon hanima ma ia!” Hunjon taridah ma sihol do Jahowa ase hita manangihon ampa mandalankon parentah ni Anak-Ni. Aha do na ihatahon Jesus sanggah ia i tanoh on? Bahat tumang do na iajarhon ia. Umpamani, iajari do susianni sonaha cara na dear marbarita, anjaha ipasingat do ase sidea totap marjaga-jaga. (Mat. 24:42; 28:19, 20) Iojur Jesus do homa sidea ase ulang marnaloja mangkorjahon ai. (Luk. 13:24) Dob ai iparentahkon Jesus do ase susianni marsihaholongan, totap marsada, anjaha mandalankon parentahni. (Joh. 15:10, 12, 13) Dear tumang do ganup sipasingat na ibere Jesus bani susianni ai. Ronsi sonari pe maningon do homa idalankon hita ai.

10-11. Sonaha hita patuduhkon anggo hita manangihon Jesus?

¹⁰ Jesus mangkatahon, “Barang ise na humbani hasintongan, tangihononni in do sorangku.” (Joh. 18:37) Anggo hita “marsianju-anjuan anjaha marsisasapan dousa”, dos do ai hita manangihon sora ni Jesus. (Kol. 3:13; Luk. 17:3, 4) Cara na legan hita manangihon Jesus marhitei ringgas marbarita “bani panorang na dear atap na lang dear”.​—2 Tim. 4:2.

¹¹ Jesus mangkatahon, “Itangihon biribiringku do sorangku.” (Joh. 10:27) Tapi lang sungkup pitah manangihon, maningon do homa idalankon susianni parentahni. Halani ai lang mandolei sidea ibahen ‘holsoh-holsoh i dunia on’. (Luk. 21:34) Tapi mandalankon parentah ni Jesus do na sipontingan bani sidea hassi pe bahat tantanganni. Bahat do sanina botou na martahan ibagas  sitarononni, ra halani iparburu, halani miskin, atap pe halani bencana alam. Anjaha totap do sidea setia bani Jahowa. Marjanji do Jesus bani sidea, “Barang ise na manjolom titahku anjaha idalankon, ai do na marholong ni uhur bangku. Ihaholongi Bapa do na marholong ni uhur bangku.”​—Joh. 14:21.

12. Aha ope cara na legan laho patuduhkon anggo hita manangihon Jesus?

¹² Cara na legan hita patuduhkon anggo hita manangihon Jesus marhitei unduk bani sidea na mambobahon i organisasi ni Jahowa. (Heb. 13:7, 17) Piga-piga tahun na parpudi on, bahat do parubahan na ibahen organisasi ni Jahowa. Umpamani, manggunahon alat na baru, cara na baru laho marbarita, acara na baru bani partumpuan tengah pekan, cara pajongjongkon, padearhon, ampa mangurus Balei Harajaon. Marguna tumang do ganup tugah-tugah ai. Hunjai taridah ma holong ni Naibata hubanta. Tontu ihargai hita do ganup tugah-tugah ai. Pos ma uhurta ipasu-pasu Jahowa do hita anggo ra mandalankon ai.

13. Aha do gunani anggo hita manangihon pangajaran ni Jesus?

¹³ Bahat do gunani anggo ra hita manangihon pangajaran ni Jesus. Marjanji do Jesus bani susianni pamalaskon uhur do pangajaranni ai. Ihatahon ia do bani sidea, ‘Dapot nasiam ma hasonangan. Ai lamlam do pasanganku, anjaha hampung do na hupaporsankon.’ (Mat. 11:28-30) Bani ompat Injil na dong bani Bibel, isurat do pasal hagoluhan pakon pangidangion ni Jesus. Anggo ibasa hita ai, gabe malas ma uhurta, toguh haporsayaonta, janah mambahen hita gabe halak na maruhur. (Ps. 19:8; 23:3) Jesus mangkatahon, “Martuah ma na mambogei hata ni Naibata anjaha na marimbagaskon ai!”​—Luk. 11:28.

14-15. (a) Domu bani Johannes 12:27, 28, aha do na masa bani Jesus sanggah Jahowa marsahap na patoluhalihon hun surga? (b) Mase hata ni Jahowa boi mangapoh janah patoguhkon uhur ni Jesus?

¹⁴ Basa Johannes 12:27, 28. Bani Injil Johannes isuratkon do sanggah Jahowa marsahap na patoluhalihon hun surga. Piga-piga ari paima matei Jesus, laho ma  ia hu pesta Paskah i Jerusalem. Bulinsah do pangahapni sanggah ai. Anjaha martonggo ma ia, “Ham Bapa, pasangap Ham ma goran-Mu!” Ibalosi Jahowa ma hun surga, “Domma Hupasangap, lanjar pasangapon-Ku do use!”

¹⁵ Sanggah ai bulinsah do Jesus, halani banggal do tanggung jawabni ase totap setia bani Naibata. Domma ibotoh ia sonaha do holi marsik ni sitaronon ampa hamateanni. (Mat. 26:38) Hassi pe sonai na sipontingan bani Jesus sonaha goran ni Jahowa ase ipasangap. Mabiar do ia goran ni Naibata irisai halani ituduh do ia halak na mangapasi Naibata. Dob ai iuhum matei do ia songon parjahat. Tapi, ra do gabe toguh uhur ni Jesus dobkonsi manangar hata ni Naibata nongkan ai. Pos do uhurni gabe sangap do holi goran ni Jahowa. On ma na mangurupi Jesus ase totap martahan ibagas sitarononni na laho roh. Ra do pitah Jesus dassa na manangar hata ni Jahowa nongkan ai. Hassi pe sonai, ipastihon Jahowa do ase hata-Ni ai tarsurat i Bibel.​—Joh. 12:29, 30.

16. Situasi aha do na masa na mambahen haru hita goran ni Naibata irisai?

¹⁶ Hita pe mabiar goran ni Naibata irisai. Songon Jesus, ra do adong halak na mambahen na lang adil hubanta. Ra do homa bulinsah hita halani ladung na ipararat halak pasal Saksi Jahowa. Pangahapta, sarita sisonai boi mambahen  sambor goran ni Jahowa ampa organisasi-Ni. Anggo sonai, ulang pala haru hita. Dingat ma aha na ihatahon Jahowa bani Jesus nongkan ai. Pos ma uhurta “damei ni Naibata, na mangatasi haganup paruhuron, in ma manramotkon uhur ampa [pingkiranta] ibagas Kristus Jesus!” (Pil. 4:6, 7) Sai ipasangap Jahowa do tongtong goran-Ni. Marhitei Harajaon-Ni, masabkonon-Ni do holi ganup hasunsahan na iahapkon juakjuak-Ni halani pambahenan ni Sibolis ampa dunia na jahat on.​—Ps. 94:22, 23; Jes. 65:17.

17. Bani Jesaya 30:21 ihatahon totap do Jahowa marsahap hubanta. Sonaha carani?

¹⁷ Ronsi sonari pe marsahap do Jahowa hubanta, tapi lang hun surga Ia marsahap. Marhitei Bibel do Ia mambere tugah-tugah hubanta. (Basa Jesaya 30:21.) Leganni ai, iurupi tonduy na pansing do “juakjuak-Ni” na bujur anjaha na maruhur laho pasirsirhon publikasi na iporluhon hita. (Luk. 12:42) Bahat tumang do publikasi na domma ipasirsir sidea sonari on. Umpamani, publikasi tarsetak ampa elektronik, video, pakon rokaman publikasi. Ganupan ai boi patoguhkon haporsayaonta.

18. Sonaha hata ni Jahowa boi patoguhkon haporsayaonta?

¹⁸ Jadi, tongtong ma dingat hita na ihatahon Jahowa bani Jesus sanggah ia i tanoh on. Andohar ma ai boi mambahen hita porsaya Jahowa do siparkuasa. Anjaha masabkonon-Ni do holi ganup hasunsahan na iahapkon hita halani pambahenan ni Sibolis pakon dunia on. Andohar ma tongtong itangihon hita sora ni Jahowa. Anggo sonai ibahen hita, iurupi do hita ase totap martahan ibagas hasunsahan na masa bani panorang on ampa bani ari simagira. Bibel mangkatahon, “Hasabaron do na porlu bani nasiam, laho mandalankon rosuh ni uhur ni Naibata, ase dapot nasiam bagah-bagah in.”​—Heb. 10:36.