1-2. (a) Uga cara Jahwe ngerana man manusia? (b) Kai nge si man bahasenta bas artikel enda?

MERIAH akap Jahwe ngerana man banta. Mbarenda ipeseh Jahwe perukurenNa arah nabi-nabi, malekat, bage pe AnakNa Kristus Jesus. (Amos 3:7; Gal. 3:19; Ket. 1:1) Gundari, Jahwe ngerana man banta arah KataNa eme Pustaka si Badia. IberekenNa e gelah banci siteh caraNa rukur ras perbahanenNa.

² Sanga Jesus i doni, lit telu kali Jahwe ngerana surga nari. Bas artikel enda, sibahas kari (1) kai si ikataken Jahwe, (2) kai pelajarenna banta, janah (3) kai gunana kata-kata Jahwe e man banta.

3. Menurut Markus 1:9-11, kai si ikataken Jahwe sanga Jesus iperidiken, janah kebenaren penting kai si banci siteh arah kata-kata Jahwe e?

³ Tangtangna Jahwe ngerana surga nari lit itulisken bas Markus 1:9-11. (Baca.) Nina, “Kam me AnakKu, si Kukelengi. Kam me si ngena ateKu.” Kata-kata Jahwe e mbuktiken maka keleng ateNa janah tek ia man Jesus. Pasti kena kel ku pusuh Jesus sanga ibegina kata-kata Bapakna e! Arah kata-kata Jahwe banci siteh telu kebenaren penting kerna Jesus. Si pertama, Jesus e Anak Jahwe. Si peduaken, keleng ate Jahwe man AnakNa. Janah si peteluken, ngena ate Jahwe man AnakNa e. Mari sibahas telu kebenaren e.

4. Uga hubungen Jesus ras Dibata kenca ia iperidiken?

⁴ “Kam me AnakKu.” Alu ngataken e, icidahken Jahwe maka nggo lit hubungenNa si mbaru ras Jesus, Anak si ikelengiNa. Sanga Jesus i surga denga, igelari ia anak Dibata perban ia salah sada mahluk roh  si iciptaken Dibata. Tapi, sanga Jesus iperidiken, ia jadi Anak Dibata si ilantik, ntah pe ipilih alu kesah si badia. Alu bage, banci Jesus mulihken ku surga janah jadi Raja ras Imam si Mbelin si ilantik Dibata. (Luk. 1:31-33; Heb. 1:8, 9; 2:17) Eme sebapna sanga Jesus iperidiken, ikataken Bapakna, “Kam me AnakKu.”​—Luk. 3:22.

5. Uga kita banci ngusih Jahwe?

⁵ “Kam me . . . si Kukelengi.” Keleng ate Jahwe Jesus janah iergaiNa ia. Contoh Jahwe e ngiahken kita ndarami kesempaten guna mpegegehi kalak si deban. (Joh. 5:20) Terpegegehi kel kita adi kalak si keleng ateta ncidahken keleng atena man banta janah ipujikenna perbahanenta si mehuli. Bage ka pe, perlu sikelengi ras sipegegehi turang seninata bas runggun bage pe keluargata. Adi sipuji kalak, reh paguhna me kinitekenna janah reh semangatna ia ngelayani Jahwe alu setia. Khususna orang tua, perlu ipegegehina anak-anakna. Adi ipuji orang tua anak-anakna arah pusuhna nari janah keleng atena kalak e, dungna anak e banci jadi kalak si mehuli.

6. Engkai maka kita tek Jesus Kristus e terteki?

⁶ “Kam me si ngena ateKu.” Kata-kata e mbuktiken maka tek Jahwe pasti idalanken Jesus sura-sura Bapakna. Perban tek kel Jahwe man Jesus, kita pe banci tuhu-tuhu tek maka kerina janji Jahwe pasti terjadi arah Jesus. (2 Kor. 1:20) Adi mbages siukuri contoh Jesus, reh belinna me sura-surata erlajar arah ia janah ngusih ia. Bali bagi Jahwe tek man Jesus,  tek ka Jahwe maka umatNa pasti terus erusaha ngusih Jesus.​—1 Pet. 2:21.

7. Menurut Matius 17:1-5, ndigan Jahwe ngerana surga nari, janah kai si ikatakenNa?

⁷ Baca Matius 17:1-5. Si peduakaliken Jahwe ngerana surga nari eme sanga “salih rupa Jesus.” Sanga si e, ipindo Jesus Petrus, Jakup, ras Johanes nemani ia ku deleng si meganjang. Telu rasul e sempat terpedem, tapi sanga medak kalak e, lit idahna si luar biasa. Idahna ayo Jesus ras uisna jadi mbentar ersinar. Idah kalak e ka dua kalak bagi Musa ras Elia ercakap-cakap ras Jesus kerna kematen ras kekekenna si nandangi terjadi. (Luk. 9:29-32) Kenca si e, reh me awan si terang nutupi kalak e, janah ibegi kalak e sora arah awan e nari. Sora Dibata kap e! Bali bagi sanga Jesus iperidiken, ikataken Jahwe ka maka keleng ateNa Jesus janah ngena ateNa man bana. Tapi sekalenda itambahi Jahwe kata-kataNa, nina, “Begikenlah ia.”

8. Kai pengaruh pengenehenen e man Jesus ras murid-muridna?

⁸ Arah pengenehenen e teridah kemulian ras kuasa Jesus selaku Raja bas Kerajan Dibata pagi. Pasti terpegegehi kel Jesus guna ngadapi kiniseran janah mate alu cara si seh kel suina si nandangi terjadi. Kai si nggo idah murid-murid e pe erban kiniteken kalak e reh paguhna. Terpegegehi ka kalak e guna ngadapi masalah si nguji kesetianna janah ndungi dahin si mbelin si arus ilakokenna. Kira-kira 30 tahun kenca si e, itulis Rasul Petrus kerna pengenehenen e. Enda mbuktiken ingetna denga kel kejadin e.​—2 Pet. 1:16-18.

9. Kai saja nasehat Jesus man pengikutna?

⁹ “Begikenlah ia.” Arah kata-kata e nggo jelas maka ate Jahwe sibegiken janah sipatuhi min kai si ikataken AnakNa. Kai saja kin si ikataken Jesus sanga i doni? Melala, janah si e kerina perlu sibegiken! Misalna, alu perkeleng iajarina pengikutna cara erberita si meriah, janah piga-piga kali ingetkenna kalak e gelah terus erjaga-jaga. (Mat. 24:42; 28:19, 20) Iahkenna ka kalak e gelah terus erjuang janah la nyerah. (Luk. 13:24) Selain si e, iahken Jesus pengikutna gelah terus sikeleng-kelengen, ersada, janah patuh man perentah-perentahna. (Joh. 15:10, 12, 13) Erguna kel nasehat Jesus e man murid-muridna! Seh asa gundari pe, perlu denga siikuti nasehat e.

10-11. Kai buktina sibegiken Jesus?

¹⁰ Nina Jesus, “Tiap kalak si ngikutken kebenaren, ibegikenna nge soraku.” (Joh. 18:37) Bukti sibegiken sora Jesus eme adi ‘tetap kita sabar janah alu bulat ukur ngampuni sada ras si debanna.’ (Kol. 3:13; Luk. 17:3, 4) Selain si e, terus kita semangat erberita si meriah “i bas waktu si senang bage pe i bas waktu si susah.”​—2 Tim. 4:2.

¹¹ Nina Jesus, “Biri-biriku megiken soraku.” (Joh. 10:27) Bukti pengikut Kristus megiken sorana eme adi idalanken kalak e kai si nggo ikataken Jesus. La kalak e nggit ndauh arah Dibata perban “perasan kuatir kerna kegeluhen enda.” (Luk. 21:34) Tapi, si pentingna iakap kalak e eme patuh man Jesus  aminna pe e mesera. Enterem turang seninata ngadapi masalah si mberat, misalna lit si ndatken serangen arah kalak si nentang, lit si mesera kel pergeluhna, janah lit ka si kena bencana alam. Amin gia bage, tetap kalak e setia man Jahwe. Erjanji Jesus man kalak e, “Ise pe si ngaloken janah ndalanken perentah-perentahku, eme kalak si ngkelengi aku. Kalak si ngkelengi aku, ikelengi Bapakku ka nge.”​—Joh. 14:21.

12. Kai ka cara si deban si mbuktiken maka sibegiken Jesus?

¹² Lit ka cara si deban si mbuktiken maka sibegiken Jesus. Arus sidukung kalak si ilantikna guna minpin kita. (Heb. 13:7, 17) Enggo melala perubahen si iban organisasi Dibata piga-piga tahun enda. Misalna, gundari sipake piga-piga alat ras cara si mbaru i bas erberita. Acara perpulungen tengah pekan pe nggo iperbarui. Selain si e, carata i bas mbangun, ngerehap, ras ngurus Bale Kerajan pe nggo isesuaiken. Kerina petunjuk si mbaru e ibereken guna banta, janah kerina e bukti organisasi Dibata tuhu-tuhu ngkelengi kita. Pasti ngata bujur kel kita! Tek kita ipasu-pasu Jahwe usahata guna ngikuti petunjuk arah organisasiNa.

13. Kai saja gunana adi sibegiken Jesus?

¹³ Adi sibegiken kerina si iajarken Jesus, melala sidat gunana. Erjanji Jesus man murid-muridna maka ajarenna pasti erban kalak e terpegegehi. Nina, “Alu bage kena terpegegehi mulihi. Pasangenku ntabeh mabasa, janah babanku menahang kap.” (Mat. 11:28-30) Kata Dibata, termasuk empat Injil si nceritaken kerna kegeluhen ras pelayanen Jesus, banci erban kita terpegegehi mulihi, reh paguhna secara rohani, janah pentar. (Msm. 19:8; 23:3) Nina Jesus, “Ermeriah ukur me kalak si megiken kata Dibata ras ndalankenca!”​—Luk. 11:28.

14-15. (a) Menurut Johanes 12:27, 28, ndigan ka Jahwe ngerana surga nari? (b) Engkai maka kata-kata Jahwe ngapuli ras mpegegehi Jesus?

¹⁴ Baca Johanes 12:27, 28. Si petelukaliken Jahwe ngerana surga nari lit itulis bas Injil Johanes. Piga-piga  wari sope Jesus mate, sangana ia i Jerusalem guna ngerayaken Paskah terakhirna. Nina, “Latih kel ukurku.” Kenca si e ertoto ia, “O Bapak, muliakenlah gelarNdu.” Ngaloi Bapakna surga nari, nina, “Nggom Kumuliaken janah terus denga ka Kumuliaken.”

¹⁵ Latih kel ukur Jesus perban mbelin tanggung jawapna guna tetap setia man Jahwe. Iteh Jesus maka kentisik nari isiksa me ia alu kejam janah mate alu cara si seh kel suina. (Mat. 26:38) Si pentingna kel iakap Jesus eme gelah imuliaken gelar Bapakna. Mbiar Jesus kematenna erban gelar Dibata la iergai perban ituduh ia nghina Dibata. Emaka, kata-kata Jahwe ndai pasti tuhu-tuhu mpegegehi ia! Tek ia gelar Jahwe pasti imuliaken. Kenca ibegi Jesus kai si ikataken Bapakna, pasti terapuli janah terpegegehi kel ia guna ngadapi kai si nandangi terjadi. Banci saja Jesus ngenca si ngangkai kata-kata Jahwe paksa si e. Tapi, ipastiken Jahwe gelah kata-kataNa e itulis guna banta.​—Joh. 12:29, 30.

16. Engkai maka mon-mon mbiar kita gelar Jahwe ihina?

¹⁶ Bagi Jesus, banci saja mbiar kita gelar Jahwe la iergai ntah pe ihina. Janah bagi Jesus, banci saja lit si la adil man banta. Entah banci saja terganggu  siakap sanga isebarken penentang cerita si la tuhu kerna kita. Banci saja mbiar kita gelar Jahwe ras organisasiNa ihina perban cerita-cerita si la tuhu e. Adi si e terjadi, kata-kata Jahwe man Jesus banci erban kita tenang. La perlu kita mbiarsa. Tek kita maka “kedamen i bas Dibata nari si banci naluken perukuren kai pe, ngarak-ngarak pusuh ras perukuren[ta] erkelangken Kristus Jesus.” (Pil. 4:6, 7) Pasti lalap imuliaken Jahwe gelarNa. Arah KerajanNa, isasapkenNa me kerina si la mehuli si iadapi umatNa akibat perbahanen Setan ras doni enda.​—Msm. 94:22, 23; Jes. 65:17.

17. Menurut Jesaya 30:21, uga carana Jahwe ngerana man banta gundari?

¹⁷ Gundari, Jahwe ngerana denga man banta. (Baca Jesaya 30:21.) Memang labo lit sibegi sora Jahwe surga nari. Tapi, iberekenNa banta KataNa si nggo tertulis eme Pustaka si Badia. I bas Pustaka, ikataken Jahwe perentah-perentahNa. Selain si e, kesah si badia Jahwe ngiahken “pengurus si setia” guna terus mereken pangan rohani man umatNa. (Luk. 12:42) Gundari melala kel sidat pangan rohani, lit si tercetak, lit bas jw.org, lit ka video bage pe audio!

18. Engkai maka kata-kata Jahwe banci erban kinitekenndu reh paguhna janah erban kam la mbiar?

¹⁸ Teruslah siinget kata-kata Jahwe sanga AnakNa nggeluh i doni. Mbera kata-kata Dibata e, si itulis bas Pustaka, erbanca kita tek maka Jahwe nge si ngendaliken kerinana janah isasapkenNa me pagi kerina kesusahenta si iban Setan ras doni si jahat enda. Janah, mbera terus siusahaken tuhu-tuhu megiken sora Jahwe. Adi silakoken e, ngasup kita ngadapi masalah kai pe si iadapi kita gundari ras pagi. Nina Pustaka banta, “Perlu kena setia, sebap kenca ilakoken kena peraten Dibata, ialoken kena me kai si ijanjiken e.”​—Heb. 10:36.