1-2. (a) Aval avé Yéhôva a nga kobô bôte melu mvus? (b) Jé bia zu yen ayé’é di?

YÉHÔVA a wô’ô mvaé ya kobô bia. Melu mvus, a nga kalane bone be bôt asimesane dé a zene ya bekulu mejô, beange, a Yésus. (Amos 3:7; Beg. 3:19; Nli. 1:1) Den a belane Bible na a kobô bia. A nga dasé bia Bible na bi yé’é asimesane dé, a na, bi wô’ô mezene mé.

² Éyoñ Yésus a mbe si va, Yéhôva a nga kobô nye a too yôp biyoñ biyoñ bilal. Bi tame zu yene mame Yéhôva a nga jô nye, ñye’elane bi ne nyoñ, a mfi ya mejô me Yéhôva mete asu dangan.

3. E kalate Marc 1:9-11, mejô mevé Yéhôva a nga jô Yésus éyoñ a nga duban, a mejô mete ma bo’olô jé?

³ Kalate Marc 1:9-11 nnye a kate bia éyoñ ôsu Yéhôva a nga kobô Mone wé a too yôp. (Lañek.) A nga jô na: “Ô ne Mone wom ma nye’e, me lôô wo mvaé.” Mejô mete me nga yiane nambe Yésus angôndô, a ve nye ngule nyul. Mejô me Yéhôva mete ma bo’olô beta be mam bela. Jam ôsu, Yésus a ne Mone Yéhôva. Jame baa, Yéhôva a nye’e Mone wé. Jame lale, Yéhôva a wô’ô Mone wé mvaé. Bi tame ñhe kôme zu la’ase mam mete melal.

4. Élat évé Yésus a nga bi a Ésaa môs a nga duban?

⁴ “Ô ne Mone wom.” Mejô ma ma liti na, Yéhôva ba édiñe Mone jé be nga beta bi aval élat be mbe be bili yôp fo’o ve môs Yésus a nga duban. E ne été na, ôsusua na Yésus a zu si va, a mbe Mone Zambe ane ba bese be  ne yôp. Ve éyoñ a nga duban, Yéhôva a nga ve nye mbamba nsisime Wé na a bo ñwo’ane. Éyoñ éte ébien, Yéhôva a nga liti na Yésus a ntoo Mone wé a ne ñwo’an, a ataté éyoñ éte, Yésus a nga bi ndi nleme ya beta bulane yôp, na a ke bo Njôô a Beta prêtre. (Luc 1:31-33; Beh. 1:8, 9; 2:17) Ajô te, éyoñ Yésus a nga duban, ésaa a nga jô nye na: “Ô ne Mone wom.”​—Luc 3:22.

5. Aval avé bi ne vu Yéhôva mfa’a ya liti bôte bevo’o nye’an a se’e be?

⁵ “Ô ne Mone wom ma nye’e.” Mejô me Yéhôva mete ma ye’ele bia na bia fe bia yiane jeñe mezene ya ve bôte bevo’o ngule nyul. (Jean 5:20) Bia bi ngule nyul éyoñ môte bia semé a liti bia na a nye’e bia, nge ke éyoñ a se’e bia amu mbamba jam bia bo. Bobejañ a bibu’a ya menda me bôte mangane fe, ba yi na bi nye’e be a ve be ngule nyul. Éyoñ bia se’e bôte bevok, mbunane wobe wo yem, a nalé a volô be na be tebe ne bip nsisim. Bebiaé mbe ba yiane dañe ve bone babe ngule nyul. Éyoñ bebiaé ba se’e bon a nlem ôse, teke bo njoñ, a éyoñ ba liti be na ba nye’e be, nalé a tômôlô be, a volô be na be yaé nsisim.

6. Amu jé bi ne tabe Yésus ndi?

⁶ “Me lôô wo mvaé.” Mejô mete ma liti na, Yéhôva a mbe a too ndi na Yésus a ye ke ôsu a bo nkômbane wé teke feñelan. Ndi Yéhôva a too Yésus ja bo na bia fe bi tabe ndi na, Yésus a ye mane jalé bengaka’a be Yéhôva bese. (2 Bec. 1:20) Nge bia kôme fas éve’ela Yésus, bia ye tu’a jeñe na bi yé’é yeme nye, a  na bi tôñe bibô’a mebo bié. Yéhôva a too fe ndi nleme na, bebo bisaé bé ba ye ke ôsu a vu éve’ela Mone wé.​—1 P. 2:21.

7. Kalate Matthieu 17:1-5 a liti na Yéhôva a nga beta kobô Mone wé éyoñ évé, a a nga jô jé?

⁷ Lañe’e Matthieu 17:1-5. Yéhôva a nga kobô Yésus éyoñ baa alu a mbe nkôle ba beyé’é bé belal: Pierre, Jacques a Jean. Môs ôte, be nga bi étua ñyenan. Asu Yésus é nga faé ane jôp, ngômesan jé ki é nga bo éfumulu ane éfufup. Ane be nga yene fe bôte bebaé, éfuna’ane Moïse ba Élie, be kobô’ô Yésus ajô ya awu dé a ñwômane wé miñwuan. Beyé’é be mbe fo’o be nga ndeñ ôyo, ve éyoñ ôyo ô nga kôlô be mis, be nga yene jam ése é nga boban alu ete. (Luc 9:29-32) Mvuse ya valé, nkut ô nga zu buti be, ane be nga wô’ô tyiñ é so’o nkut été, tyiñ éte é mbe tyiñe Zambe! Fo’o ve ane éyoñ ôsu, Yéhôva a nga beta liti na a nye’e Mon a na a wô’ô nye mvaé éyoñ a nga jô na: “Nyina a ne Mone wom ma nye’e, ma yene nye mvaé.” Ve a nga kô’ôlane fe na: “Vô’ôla’ane nye.”

8. Aval avé ñyenane Yésus ba beyé’é bé be nga bi ô nga volô be?

⁸ Ñyenan ôte ô mbe ô liti’i étôto’o a ngule Yésus a ye bi melu ma zu, éyoñ a ye bo Njôô ya Éjôé Zambe. Teke bisô na, ñyenan ôte ô nga ve Yésus ngule nyul, a tômôlô nye asu minju’u mi mbe mi yange’e nye ôsu, a awu mintaé a mbe na a jibi. Ñyenan ôte ô nga yemete fe mbunane beyé’é, ô kômesane fe be asu ésaé a meve’ele bi mbe be ôsu. Mvuse mimbu 30, Pierre a nga beta kobô ajô ñyenan ôte, nalé a liti’i na, ñyenan ôte ô mbe ô ngena’ane nye vevee ôsimesan.​—2 P. 1:16-18.

9. Mbamba melebe mevé Yésus a nga ve beyé’é bé?

⁹ “Vô’ôla’ane nye.” Mejô mete ma kôme liti na Yéhôva a yi na bi vô’ôlô Yésus a bo nye mewôk. Mam mevé Yésus a nga ye’ele bôt éyoñ a mbe si va? Yésus a nga ye’ele angôndô ya abui mam. A nga ye’ele beyé’é bé avale ba yiane kañete mbamba foé ya Éjôé Zambe, a nga jaé fe liti be mfi ya mombô. (Mt. 24:42; 28:19, 20) A nga ve be abendé ya bo ésaé éte a ayôñ ése, a na be bo te bili atek. (Luc 13:24) A nga liti fe beyé’é bé mfi ya nye’esan a bo jôme jia, a na be tôñe memvinda mé. (Jean 15:10, 12, 13) Angôndô ya mbamba melebe fo’o! Melebe mete me ngenane bia nya mfii den.

10-11. Aval avé bi ne liti na bia vô’ôlô Yésus?

¹⁰ Yésus a nga jô na: “Môt ase a ne môt ya bebela nye a ye wô’ô tyiñe jam.” (Jean 18:37, Mfefé nkôñelan) Bia liti na bia vô’ôlô tyiñe Yésus éyoñ môt ase ya be bia a ke ‘ôsu a jibi nyô mbok, a jamé nye.’ (Beco. 3:13; Luc 17:3, 4) Bia liti fe na bia vô’ôlô tyiñe Yésus éyoñ bia ke ôsu a kañete a ayôñ ése, ‘ja’ana éyoñ j’ ayian, ja’ana éyoñ é nji yian.’​—2 Tim. 4:2.

¹¹ Yésus a nga jô na: “Mintômba miam mia wô’ô tyiñe jam.” (Jean 10:27, Mfefé Nkôñelan.) Beyé’é be Yésus be nji yiane su’u ve na ba vô’ôlô nye, ba yiane fe bo  mam a kate be. Ba jô’é ki na mame ya émo ji me bo na be “tyelé minleme yôbe” zezé. (Luc 21:34) Ve ba telé mejô me Yésus ôsu ényiñe jap, to’o éyoñe nalé a nji bo tyi’ibi. Bobejañ ba tôbane minju’u mevale meval: abui da tôban étibela’a si be too, bevo’o ba wu azoé, ba bevo’o ki ba bi beta bibubua. Ve to’o nalé, ba ke ôsu a kañe Yéhôva to’o éyoñ nsoñ ô nga ye bembe be si. Ajô te Yésus a nga bo be ngaka’a nyi: “Môt a bili metiñe mam, a ba’ale me, nnye ate a nye’e ma: môt a nye’e ma, Ésaa wom a ye nye’e nye.”​—Jean 14:21.

12. Bi ne beta liti na bia vô’ôlô Yésus a zene fé?

¹² Bi ne liti na bia vô’ôlô Yésus a zene fe: éyoñ bia bo bôt a nga tele bia ôsu mewôk. (Beh. 13:7, 17) Mimbu mi ndôme mane mi, ékôane Yéhôva é boya abui mintyéndan: Bi mbili mimfefé bikpwelé asu ésaé nkañete, be tyendéya abui mam bisulane ya zañe sondô, be tyendéya fe fatane nlôñane Meba m’Éjôé a avale ba ba’ale me. Bia ve Yéhôva akiba asu mimfefé mi mam mite mise. Bi too ndi na Yéhôva a ye botane mengule mese bia ve na bi tôñe zen ékôane jé ja liti bia den.

13. Mfi ôvé bia bi éyoñ bia vô’ôlô Yésus?

¹³ Nge bia vô’ôlô mam mese Yésus a nga jô bia, bia ye bi abui bibotan. Yésus a nga kate beyé’é bé na miñye’elane mié mia ye volô be minlem. A nga jô be na: “Minlem mienan mia ye wo’an. Amu ésaé jam é ne tyi’ibi, a mbe’e wom ô ne éveves.” (Mt. 11:28-30) Mejô me Zambe, a mejô me Yésus bia koone me bekalate Matthieu, Marc, Luc a Jean be nga tili, ma volô bia minlem, ma yemete bia mfa’a ya nsisim, a bo na bi bo fek. (Bs. 19:7; 23:3) Jôm ete nje Yésus a nga jô na: “Ébotan a bôt ba wô’ô mejô me Zambe a ba’ale me.”​—Luc 11:28.

14-15. (a) Kalate Jean 12:27, 28 a liti na Yéhôva a nga beta kobô Yésus éyoñ évé? (b) Amu jé mejô me Yéhôva me nga ve Yésus ngule nyul a tômôlô nye?

¹⁴ Lañe’e Jean 12:27, 28. Kalate Jean nnye a kobô ajô ya éyoñe lale Yéhôva a nga kobô a Mone wé. Valé a mbeme wu, Yésus a nga kandane ke Jérusalem na a ke di Paska. A nga jô Ésaa  na: “Ma wô’ abé nleme wom.” Ane a nga ye’elane nye na: “A Tat, wumu’u jôé dôé.” Nde tyiñ Ésaa é nga so yôp a jô na: “Me maneya wumu de, ma ye beta wumu de.”

¹⁵ Nlem ô mbe Yésus abé amu beta mbe’e a mbe a bete nye bitul, a mbe a yiane ba’ale élate jé a Yéhôva teke feñelan. A mbe a yeme’ na a zu kôme wô’ôtan, amu minju’u mi mbe mi yange’e nye mi mbe ngul, a na a ye wu awu mintaé. (Mt. 26:38) Ve jam é mbe é dañe mfi asu dé é mbe na a wumu jôé Ésaa. Be nga bôte Yésus ajô na a biasé Zambe, a a mbe a ko woñ na, aval awu ete e ne ve éyôlé Ésaa mvit. Nde tame simesan avale nlem ô nga bômbô nye si éyoñ Yéhôva a nga yalane nye na a wumuya jôé dé, a na, a ngenan a za’a wumu de! Woñ ôte ôse ô nga kôlô nye nlem. Ve mejô me Ésaa mete me nji su’u ve na ma bôé nye nleme si, me nga tômôlô fe nye asu meve’ele a mbe na a tôbane me. Akusa bo na Yésus étame nnye a nga yiane wô’ô jôme Yéhôva a nga jô môs ôte, Yéhôva a nga bo na be ba’ale mejô mete Bible asu mfi bebo bisaé bé bese.​—Jean 12:29, 30.

16. Amu jé bi ne ko woñe na éyôlé Yéhôva é vebane mvit?

¹⁶ Ane Yésus, bia fe bi nji yi na jôé Yéhôva é vebane mvit. Éko éziñe bia  fe bia tôban ékotekot, nge ke na besiñe bangan ba bôte bia mejô mevale mese. Bi ne ko woñ na bibôta’a bite bi ne wo’o Yéhôva ba ékôane jé mvit. Ve avale biyoñ ete, Mejô Yéhôva a nga jô Yésus me ne ve bia ngule nyul. Bi nji yiane tyelé minleme yôbe zezé. Bia yiane tabe ndi na ‘mvo’é Zambe ja dañe fé’ése, ja ye ba’ale minlem miangan a minsisim miangan be Krist Yésus.’ (Beép. 4:6, 7) Teke na Yéhôva a ne bo te wumu jôé dé. A ye belan Éjôé jé na a mane kôm mbia be mam bese Satan ba mbia émo wé be nga bo na bebo bisaé bé be tôbane me.​—Bs. 94:22, 23; És. 65:17.

17. Kalate Ésaïe 30:21 a liti na Yéhôva a kobô bia a zene fé den?

¹⁷ Yéhôva a ngenan a kobô’ bebo bisaé bé den. (Lañe’ Ésaïe 30:21.) E ne été na tyiñe Yéhôva é vo’o beta kobô bia é so’o yôp. Ve Yéhôva a kobô bia a zene ya Bible. A belane fe “mba’ale nda jé” na a ve bebo bisaé bé bidi ya nsisim éyoñ ja yian. (Luc 12:42) Bi vo’o lañe bidi ya nsisim bise bia bi a zene ya bekalate tin ékôan ja kuli, a ba bese ya nkol, bevidéo a beaudio fufulu.

18. Aval avé Mejô me Zambe ma wônô mbunane wôé a ve wo ngule nyul?

¹⁸ Te bia ve’ele vuane mame Yéhôva a nga jô Mon éyoñ a mbe si va. Ngo’o nge mejô me Zambe me ne Bible ma ke ôsu a ve bia ndi nleme na Yéhôva a ne yôp, a na a ye mane zu vaa minju’u mise bia tôbane mie mbia émo Satan. Ye bi ne ñhe fo’o nyoñe ntyi’ane ya ke ôsu a vô’ôlô tyiñe Yéhôva? Nge bi bo de, wônaa bia ye bi ngule ya jibi minju’u mise bia tôbane mie den, a mi mise bia ye tôbane mie melu ma zu. Bible a kôme yemete na: “Mia yiane bo mbane ya jibi, nde éyoñ mi maneya bo nkômbane ya Zambe, mia ye nyoñe jôm é ne ntiñetan.”​—Beh. 10:36.