1-2. (a) Sa unsang paagi nakigkomunikar si Jehova sa mga tawo? (b) Unsay atong hisgotan niining artikuloha?

SI Jehova ganahang makigkomunikar kanato. Kaniadto, gigamit niya ang mga propeta, anghel, ug iyang Anak, si Jesu-Kristo aron mahibaloan nato ang iyang hunahuna. (Amos 3:7; Gal. 3:19; Pin. 1:1) Karon, siya nakigkomunikar pinaagi sa iyang Pulong, ang Bibliya. Gihatag nâ niya kanato aron mahibaloan nato ang iyang hunahuna ug masabtan ang iyang mga paagi.

² Sa dinhi pa si Jesus sa yuta, si Jehova misulti gikan sa langit sa tulo ka higayon. Atong konsiderahon kon unsay gisulti ni Jehova, kon unsay atong makat-onan sa iyang gisulti, ug kon unsay kaayohan sa iyang gisulti.

3. Sumala sa Marcos 1:9-11, unsay gisulti ni Jehova dihang gibawtismohan si Jesus, ug unsang tulo ka kamatuoran ang napamatud-an tungod nianang mga pulonga?

³ Sa Marcos 1:9-11, atong mabasa ang unang higayon nga misulti si Jehova gikan sa langit. (Basaha.) Siya miingon: “Ikaw mao ang akong Anak, ang hinigugma; giuyonan ko ikaw.” Seguradong natandog si Jesus nga madunggan ang iyang Amahan nga nagpahayag sa Iyang gugma ug pagsalig kaniya! Ang gisulti ni Jehova nagpamatuod sa tulo ka importanteng kamatuoran bahin kang Jesus. Una, si Jesus iyang Anak. Ikaduha, si Jehova nahigugma sa iyang Anak. Ug ikatulo, giuyonan ni Jehova ang iyang Anak. Atong hisgotan pag-ayo ang matag usa niini.

4. Human sa bawtismo ni Jesus, unsa ang iyang bag-ong relasyon sa Diyos?

 ⁴ “Ikaw mao ang akong Anak.” Sa pagsulti niana, gipakita ni Jehova nga ang iyang pinalanggang Anak, si Jesus, duna nay bag-ong relasyon kaniya. Sa didto pa si Jesus sa langit, siya usa ka espirituhanong anak sa Diyos. Pero sa iyang bawtismo, siya gidihogan sa balaang espiritu. Nianang panahona, gipakita sa Diyos nga si Jesus ingong iyang dinihogang Anak may paglaom nang mobalik sa langit aron mahimong iyang tinudlong Hari ug Hataas nga Saserdote. (Luc. 1:31-33; Heb. 1:8, 9; 2:17) Busa, dihang gibawtismohan si Jesus, ang iyang Amahan makaingon: “Ikaw mao ang akong Anak.”​—Luc. 3:22.

5. Unsaon nato pagsundog ang ehemplo ni Jehova kon bahin sa pagpahayag sa gugma ug pag-uyon?

⁵ “Ikaw mao . . . ang hinigugma.” Ang ehemplo ni Jehova sa pagsulti sa iyang gugma ug pag-uyon magpahinumdom nato sa pagpangitag mga kahigayonan sa pagdasig sa uban. (Juan 5:20) Mouswag ta dihang ang atong minahal nagpakitag gugma ug naghatag ug komendasyon sa atong maayong nahimo. Sa susama, ang atong mga igsoon sa pagtuo ug membro sa pamilya nagkinahanglan sa atong gugma ug pagdasig. Dihang komendahan nato ang uban, atong gipalig-on ang ilang pagtuo ug gitabangan sila nga magmaunongon kang Jehova. Ilabinang kinahanglang dasigon sa mga ginikanan ang ilang mga anak. Dihang ang mga ginikanan maghatag ug komendasyon ug magpakitag pagmahal, gitabangan nila ang ilang mga anak nga mouswag.

6. Nganong makasalig ta kang Jesu-Kristo?

⁶ “Giuyonan ko ikaw.” Kini nagpakita nga masaligon si Jehova nga matinumanong buhaton ni Jesus ang kabubut-on sa iyang Amahan. Masaligon kaayo si Jehova sa iyang Anak, busa makasalig pod ta nga tumanon  ni Jesus ang tanang saad ni Jehova. (2 Cor. 1:20) Dihang atong konsiderahon ang ehemplo ni Jesus, mas determinado tang makakat-on niya ug sundogon siya. Masaligon pod si Jehova nga ang iyang mga alagad, ingong grupo, magpadayon sa pagkat-on gikan sa iyang Anak.​—1 Ped. 2:21.

7. Sumala sa Mateo 17:1-5, sa unsang panahon nga si Jehova misulti gikan sa langit, ug unsay iyang giingon?

⁷ Basaha ang Mateo 17:1-5. Sa ikaduhang higayon, si Jehova misulti gikan sa langit panahon sa transpigurasyon, diin “nausab ang . . . dagway” ni Jesus. Gipauban ni Jesus si Pedro, Santiago, ug Juan sa pag-adto sa tumoy sa bukid. Didto, ilang nakita ang usa ka talagsaong panan-awon. Ang nawong ni Jesus misidlak ug ang iyang sinina migilak. Dihay duha ka persona, nga nagrepresentar kang Moises ug Elias, nga nakig-estorya kang Jesus bahin sa iyang umaabot nga kamatayon ug pagkabanhaw. Bisag nakatulog ang tulo ka apostoles, nakita nila ang maong panan-awon dihang nagmata na sila. (Luc. 9:29-32) Dayon, usa ka hayag nga panganod ang mitabon nila, ug nakadungog silag tingog gikan sa panganod​—tingog sa Diyos! Sama sa gibuhat ni Jehova panahon sa bawtismo ni Jesus, gipahayag niya ang iyang pag-uyon ug gugma sa iyang Anak: “Kini mao ang akong Anak, ang hinigugma, kinsa akong giuyonan.” Pero niining higayona, si Jehova midugang: “Patalinghogi ninyo siya.”

8. Unsay epekto sa panan-awon diha kang Jesus ug sa mga tinun-an?

⁸ Ang panan-awon nagpakita sa umaabot nga himaya ug gahom ni Jesus ingong Hari sa Gingharian sa Diyos. Seguradong ang Kristo nadasig ug nalig-on sa pag-atubang sa umaabot nga pag-antos ug sakit nga kamatayon. Kana nakapalig-on pod sa pagtuo sa mga tinun-an sa pag-atubang sa mga pagsulay ug dakong buluhaton sa umaabot. Mga 30 ka tuig sa ulahi, gihisgotan ni Pedro ang transpigurasyon, nga nagpakitang klaro pa gihapon kana sa iyang hunahuna.​—2 Ped. 1:16-18.

9. Unsang mapuslanong tambag ang gihatag ni Jesus sa iyang mga tinun-an?

⁹ “Patalinghogi ninyo siya.” Giklaro ni Jehova nga gusto niya nga kita maminaw ug mosunod sa gisulti sa iyang Anak. Unsay gisulti ni Jesus sa dinhi pa siya sa yuta? Daghan siyag gisulti nga angay gyong paminawon! Pananglitan, mahigugmaon niyang gitudloan ang iyang mga sumusunod kon unsaon pagsangyaw sa maayong balita, ug balikbalik niyang gipahinumdoman sila nga magpadayon sa pagbantay. (Mat. 24:42; 28:19, 20) Iyang gidasig sila sa pagpaningkamot pag-ayo ug paglahutay. (Luc. 13:24) Gipasiugda ni Jesus sa iyang mga sumusunod nga kinahanglan silang maghigugmaay, magkahiusa, ug mosunod sa iyang mga sugo. (Juan 15:10, 12, 13) Mapuslanon gyod ang mga tambag ni Jesus sa iyang mga tinun-an! Kana mapuslanon karon, sama sa panahon ni Jesus.

10-11. Unsaon nato pagpakita nga namati ta kang Jesus?

¹⁰ Si Jesus miingon: “Ang matag usa nga dapig sa kamatuoran mamati sa akong tingog.” (Juan 18:37) Atong gipakita nga namati ta niya dihang kita “magpadayon sa pag-antos sa usag usa ug kinabubut-on nga magpasaylo sa usag usa.” (Col. 3:13; Luc. 17:3, 4) Gipakita pod nato nga namati ta niya pinaagi sa madasigong pagsangyaw sa maayong balita “sa paborableng panahon [ug] sa masamok nga panahon.”​—2 Tim. 4:2.

¹¹ Si Jesus miingon: “Ang akong mga karnero magapatalinghog sa akong tingog.” (Juan 10:27) Gipakita sa mga sumusunod ni Jesus  nga namati sila niya dili lang pinaagi sa pagpaminaw sa iyang mga pulong kondili pinaagi sab sa pagpadapat niana. Wala makababag nila ang “mga kabalaka sa kinabuhi.” (Luc. 21:34) Hinunoa, giuna nila ang mga sugo ni Jesus, bisan sa kalisdanan. Daghan sa atong mga igsoon ang nag-antos ug grabeng kalisdanan, apil na ang pag-atake sa mga magsusupak, grabeng kapobre, ug katalagman. Bisan pa niana, nagmatinumanon sila kang Jehova bisag unsa pay mahitabo. Gipasaligan sila ni Jesus: “Siya nga nakabaton sa akong mga sugo ug nagsunod niini, siya mao ang nahigugma kanako. Sa ingon usab siya nga nahigugma kanako higugmaon sa akong Amahan.”​—Juan 14:21.

12. Unsay laing paagi nga ikapakita nato nga namati ta kang Jesus?

¹² Niay laing paagi nga ikapakita nato nga namati ta kang Jesus: pinaagi sa pagpakigkooperar niadtong gitudlo niya nga manguna kanato. (Heb. 13:7, 17) Dili pa dugay, ang organisasyon sa Diyos naghimog daghang kausaban, apil ana ang paggamit sa bag-ong mga tool ug paagi sa pagsangyaw, bag-ong format sa midweek nga tigom, ug bag-ong paagi sa pagtukod, pag-renovate, ug pagmentinar sa mga Kingdom Hall. Mapasalamaton kaayo ta nianang mahigugmaon ug gihunahuna pag-ayong giya! Makaseguro tang panalanginan ni Jehova ang atong paningkamot sa pagsunod sa tukma sa panahong instruksiyon.

13. Unsa ang mga benepisyo sa pagpaminaw kang Jesus?

¹³ Makabenepisyo ta sa pagpaminaw sa tanang gitudlo ni Jesus. Gipasaligan niya ang iyang mga tinun-an nga makaparepresko nila ang iyang pagtulon-an. “Kamo makakaplag ug kahayahay,” siya miingon. “Kay ang akong yugo masayon ug ang akong luwan magaan.” (Mat. 11:28-30) Ang Pulong sa Diyos, nga nag-apil sa upat ka Ebanghelyo nga naghisgot sa kinabuhi ug ministeryo ni Jesus, makaparepresko, makapalig-on sa atong espirituwalidad, ug makapahimo natong maalamon. (Sal. 19:7; 23:3) Si Jesus miingon: “Malipayon kadtong nagapatalinghog sa pulong sa Diyos ug nagasunod niini!”​—Luc. 11:28.

14-15. (a) Sumala sa Juan 12:27, 28, unsa ang ikatulong higayon nga misulti si Jehova gikan sa langit? (b) Nganong ang gisulti ni Jehova nakapahupay ug nakapalig-on kang Jesus?

¹⁴ Basaha ang Juan 12:27, 28. Narekord sa Ebanghelyo ni Juan ang ikatulong higayon nga misulti si Jehova gikan sa langit. Pipila ka  adlaw una sa iyang kamatayon, si Jesus didto sa Jerusalem para iselebrar ang iyang kataposang Paskuwa. Siya miingon: “Ang akong kalag nabalisa.” Dayon siya miampo: “Amahan, himayaa ang imong ngalan.” Ingong tubag, ang iyang Amahan misulti gikan sa langit: “Gihimaya ko na kini ug pagahimayaon ko kini pag-usab.”

¹⁵ Naguol pag-ayo si Jesus tungod sa iyang dakong responsibilidad nga magmatinumanon kang Jehova. Si Jesus nahibalo nga antoson niya ang grabeng paglatigo ug sakit nga kamatayon. (Mat. 26:38) Labaw sa tanan, gusto niyang himayaon ang ngalan sa iyang Amahan. Giakusahan si Jesus ug pasipala, ug naguol siya nga ang iyang kamatayon magpakaulaw sa Diyos. Nagmasaligon gyod si Jesus tungod sa gisulti ni Jehova! Makaseguro siya nga mahimaya ang ngalan ni Jehova. Ang gisulti sa iyang Amahan nakapahupay kang Jesus ug nakapalig-on niya sa pag-atubang sa hapit nang mahitabo kaniya. Bisag si Jesus ra niadto ang nakasabot sa gisulti sa iyang Amahan, giseguro ni Jehova nga marekord ang Iyang gisulti para natong tanan.​—Juan 12:29, 30.

16. Nganong usahay mabalaka ta nga basig mapakaulawan ang ngalan sa Diyos?

¹⁶ Pareho ni Jesus, mabalaka tingali ta nga basig mapakaulawan ang ngalan ni Jehova. Tingali sama ni Jesus, biktima ta sa dili patas nga pagtratar. O natugaw tingali ta sa bakak nga mga estorya bahin kanato nga gipakaylap sa mga magsusupak. Ato tingaling gihunahuna  ang pagpakaulaw niini sa ngalan ug organisasyon ni Jehova. Nianang mga panahona, makapahupay nato ang gisulti ni Jehova. Dili ta angayng mabalaka pag-ayo. Makaseguro ta nga “ang kalinaw sa Diyos nga labaw sa tanang panghunahuna magbantay sa [atong] mga kasingkasing ug sa [atong] mga gahom sa pangisip pinaagi kang Kristo Jesus.” (Filip. 4:6, 7) Kanunay gyong himayaon ni Jehova ang iyang ngalan. Pinaagi sa Gingharian, wad-on niya ang tanang kadaot nga gihimo ni Satanas ug sa kalibotan ngadto sa Iyang matinumanong mga alagad.​—Sal. 94:22, 23; Isa. 65:17.

17. Sumala sa Isaias 30:21, sa unsang paagi nakig-estorya si Jehova kanato karon?

¹⁷ Si Jehova nakig-estorya gihapon kanato karon. (Basaha ang Isaias 30:21.) Tinuod, dili nato madunggan nga mosulti ang Diyos gikan sa langit. Pero gitagana niya ang iyang Pulong, ang Bibliya, diin pinaagi niana siya naghatag ug instruksiyon. Dugang pa, ang espiritu ni Jehova nagpalihok sa “matinumanong piniyalan” aron padayong magtaganag espirituwal nga pagkaon sa Iyang mga alagad. (Luc. 12:42) Daghan kaayo tag nadawat nga naimprenta ug online nga materyal, video, ug audio nga mga publikasyon!

18. Sa unsang paagi ang gisulti ni Jehova makapalig-on sa imong pagtuo ug makahatag nimog kaisog?

¹⁸ Hinumdoman nato pirme ang gisulti ni Jehova sa dinhi pa ang iyang Anak sa yuta! Hinaot ang iyang gisulti, nga narekord sa Bibliya, magpasalig nato nga kontrolado ni Jehova ang tanan ug wad-on niya ang tanang kadaot nga gihimo kanato ni Satanas ug sa iyang daotang kalibotan. Ug hinaot magmadeterminado ta nga mamati pag-ayo kang Jehova. Kon buhaton nato kana, makalahutay ta sa bisan unsang problema karon ug sa kalisdanan sa umaabot. Ang Bibliya nagpahinumdom kanato: “Gikinahanglan nga kamo molahutay, aron nga, human kamo makabuhat sa kabubut-on sa Diyos, kamo makadawat sa katumanan sa saad.”​—Heb. 10:36.