1-2. (a) Ifa usun Jiowa a kan fós ngeni aramas? (b) Met sipwele pwóróus wóón lón ei lesen?

JIOWA a kan sani le pwár ngenikich minne a ekieki. Lón ekkewe fansoun lóóm, a néúnéú ekkewe soufós, ekkewe chónláng, me Jesus Kraist Néún we, ren an epwe esilei ngenikich an ekiek. (Am. 3:7; Kal. 3:19; Pwär. 1:1) Lón ei fansoun a fós ngenikich seni an we Kapas, ewe Paipel. A awora pwe sipwe tongeni silei an ekiek me weweiti féfférún kewe.

² Lupwen Jesus a nóm wóón fénúfan, Jiowa a fósetiw seni láng fán úlúngát. Sipwe pwóróusfengen wóón met a apasa, met sia tongeni káé seni, me ifa usun sipwe feiéch seni.

3. Met Jiowa a apasa lupwen Jesus a papatais, ewe a mak lón Markus 1:9-11, me ikkefa ekkewe pwóróus mi lamot ra ffatoló ren minne a apasa?

³ Markus 1:9-11 a pwóróus usun ewe áeúin atun Jiowa a fósetiw me láng. (Álleani.) A apasa: “En nei mi fokun achengicheng, üa unusen pwapwa reöm.” Epwe ifa me chúngún letipen Jesus atun a rong án Seman na pwári an tongei me alúkúlúkú! Alon Jiowa kewe a affata úlúngát pwóróus mi lamot usun Jesus. Áeúin, Jesus, i Néún we. Oruuan, Jiowa a tongei Néún na. Aúlúngátin, Jiowa a pwapwa ren Néún na. Sipwe nengenifichi eú me eú ekkena atun.

4. Ifa ewe riri minefé lefilen Jiowa me Jesus lupwen Jesus a papatais?

⁴ ‘En Nei.’ Jiowa a affata ren ekkena kapas pwe Jesus Néún we mi áchengicheng, a poputá le riri ngeni I lón eú mineféén napanap. Jesus a fen Néún Kot me mwen an feitiw fénúfan. Iwe nge, atun a papatais, a wiliti Néún Kot lón pwal  eú mineféén napanap. A kepit ren án Kot we manaman mi fel me a eáni ewe ápilúkúlúk le liwiniti láng me wiliti King me Souasor Mi Lap mi kefilitá me ren Kot. (Luk. 1:31-33; Ipru 1:8, 9; 2:17) Ina minne sia fókkun weweiti popun án Seman we ereni Jesus ‘En Nei,’ atun a papatais.​—Luk. 3:22.

5. Ifa usun sia tongeni áppirú Jiowa lón an pwári tong me awora apéchékkúl?

⁵ “En . . . mi fokun achengicheng.” Án Jiowa leenien áppirú ren an pwári an tongei me alúkúlúkú Néún we, a áchema ngenikich ach sipwe pwal kútta ekkewe atun sipwe tongeni apéchékkúla ekkewe ekkóch. (Joh. 5:20) A péchékkúletá letipach lupwen emén sia tongei a pwári an tongekich me apúngakich. Pwal ina chék usun, mi lamot ngeni pwiich kewe lón ewe mwichefel me chón ach famili ach tong me apéchékkúl. Lupwen sia apúnga aramas, sia apéchékkúlaló ar lúkú me álisiir le angang ngeni Jiowa fán tuppwél. A ákkáeúin lamot ngeni ekkewe sam me in ar repwe apéchékkúla néúr kewe. Lupwen ra enletin apúnger me pwári ar tongeer, ra álisiir ar repwe sópwéch.

6. Pwata sia tongeni lúkúlúk wóón Jesus Kraist?

⁶ “Üa unusen pwapwa reöm.” Ekkena kapas ra áiti ngenikich pwe Jiowa a lúkúlúkú pwe Jesus epwe apwénúetá letipan fán tuppwél. Jiowa a fókkun lúkúlúk wóón Néún we, iwe sia pwal tongeni unusen lúkúlúk wóón pwe epwe enletin apwénúetá meinisin án Jiowa kewe pwon. (2 Kor. 1:20) Lupwen sia ekieki án Jesus leenien áppirú, sia pwal fókkun mochen káé seni me tapweló mwirin. Jiowa a pwal lúkúlúk pwe néún mwichen aramas repwe sópweló lón ar káé seni Néún we.​—1 Pet. 2:21.

7. Ineet atun Jiowa a fósetiw me láng me ren Mateus 17:1-5, me met a apasa?

⁷ Álleani Mateus 17:1-5. Ewe oruuen atun Jiowa a fósetiw me láng, ina ewe atun Jesus “a wilila.” Jesus a etiwa Petrus, James, me Johannes ar repwe fitatá wóón ewe chuuk mi tekia. Lupwen ra nóm ikena ie, ra kúna eú lángipwi mi fókkun amwarar. A saramaram wóón mesen Jesus usun akkar, me a molupolup úfan kewe. A wor rúúemén lios mi eliosu Moses me Elias nge ra poputá le fós ngeni Jesus usun an máló epwele fis, me manawsefálin. Inaamwo ika ekkena úlúmén aposel ra “fokun möür,” nge lupwen ra neló ra kúna ena lángipwi mi amwarar. (Luk. 9:29-32) Mwirin, eú kuchu mi saramaram a énúrúúroló, me ra rongorong eú méngúngú seni lón ewe kuchu, ina méngúngúún Kot! Atun Jesus a papatais, Jiowa a pwári an pwapwa ren Néún na me an tongei ren an apasa: “Iei i nei mi achengicheng üa fokun pwapwa ren.” Nge lón ena atun Jiowa a pwal apasa: “Oupwe aüselinga!”

8. Ifa usun ewe lángipwi a kkúú manawen Jesus me néún kewe chón káé?

⁸ Ewe lángipwi a áiti ngenikich epwe ifa usun lingen me manamanen Jesus lón an Kingen án Kot we Mwú. Ese mwáál, Kraist a péchékkúletá le likiitú ngeni watteen riáfféú me áweiresin ninniilóón epwe fis ngeni. Ewe lángipwi a pwal apéchékkúlaló án ekkewe chón káé lúkú me ammólneeretá ngeni ekkewe sóssót repwe kúna me ekkewe watteen angang repwe féri. Ilik som ier mwirin, aposel Petrus a fós usun án Jesus we wililó, iwe a pwári pwe Petrus a fókkun chechchemeni ena lángipwi.​—2 Pet. 1:16-18.

9. Ikkefa ekkewe kapasen fén mi álilliséch Jesus a ngeni néún kewe chón káé?

⁹ “Oupwe aüselinga!” Jiowa a affata pwe a mochen ach sipwe aúseling ngeni Néún we me álleasochisi. Met Jesus a apasa lupwen a nóm wóón fénúfan? A apasa chómmóng mettóch mi fókkun lamot ach sipwe aúseling ngeni! Áwewe chék, a áiti ngeni néún kewe chón káé fán tong ifa usun repwe afalafala ewe kapas allim, me a áchema ngeniir fán fite ar repwe mammasa. (Mat. 24:42; 28:19, 20) A pwal peseer ar repwe achocho me resap achanú. (Luk. 13:24) Jesus a menlapei lamoten án néún kewe chón káé repwe tongefengeniir, túmúnú ar tipeeúfengen, me apwénúetá an kewe allúk. (Joh. 15:10, 12, 13) A ifa me álilliséchún án Jesus kana kapasen fén fán iten néún kana chón káé! Ekkena fén ra pwal lamot ngenikich lón ei fansoun usun lón fansoun Jesus we.

10-11. Ifa usun sia tongeni pwári pwe sia akkaúseling ngeni Jesus?

¹⁰ Jesus a apasa: “Iö a pop seni let epwe aüselingaei.” (Joh. 18:37) Sia pwári pwe sia aúselinga léúwen Jesus lupwen sia “songomangfengen o amusamusfengen.” (Kol. 3:13; Luk. 17:3, 4) Sia pwal pwáraatá pwe sia aúseling ngeni ren ach tinikken le afalafala ewe kapas allim “lon fansoun öch ika lon fansoun ese öch.”​—2 Tim. 4:2.

¹¹ Jesus a erá: “Nei kewe sip ra aüselinga mweliei.” (Joh. 10:27) Ekkewe chón tapweló mwirin Kraist ra pwári pwe ra aúseling ngeni, esap chék ren ar aúseling ngeni alon kewe nge ra pwal apwénúretá. Rese kon osukosuk ren “öürekin manauen ikenai.” (Luk. 21:34) Nge, ra akkomwa lón manawer ar álleasochisi án Jesus kewe allúk, pwal mwo nge fán sóssót mi áweires. Chómmóng me  lein pwiich kewe ra kan likiitú fán watteen sóssót kapachelong án chón oputer eriáfféwúr, osupwang watte, me feiengaw watte ren choweán taifun, chechchechin fénú me metakkan. Inaamwo ika ra kúna watteen riáfféú fán ekkena esin weires, nge ra chúen akkamwéchú ar tuppwél ngeni Jiowa. Iei án Jesus kapasen alúkúlúk ngeniir: “Iö a etiwa ai kewe allük o aleasochisiir, i ätewe mi echeniei. Nge iö a echeniei Semei epwe echeni.”​—Joh. 14:21.

12. Met sia pwal tongeni féri pwe sipwe pwáraatá pwe sia aúseling ngeni Jesus?

¹² Iei pwal eú alen ach sipwe pwári pwe sia aúseling ngeni Jesus, ina ren ach álleasochisi chókkewe mi kefilitá pwe repwe wisen emmwenikich. (Ipru 13:7, 17) Án Kot we mwicheich a fen féri chómmóng siwil lón ekkewe ier kukkuto chék, kapachelong ach áeá ekkewe mineféén minen álillis me napanap lón ach angangen afalafal, kkótun ach mwich lón weekday, me usun kaútáán, fférsefálin me túmúnún ach kewe Leenien Mwich. A ifa me kilisouch ren ekkena emmwen mi fiti tong me mirit! Sia fókkun lúkú pwe Jiowa epwe efeiéchú ach achocho le fiti emmwenien an we mwicheich mi fichiiti lón ach ei fansoun.

13. Ikkefa feiéchún ach aúseling ngeni Jesus?

¹³ Sia feiéch ren ach aúselinga meinisin met Jesus a áiti ngenikich. Jesus a pwonei ngeni néún kewe chón káé pwe áitian kewe epwe aséséér. A apasa: “Oupwe küna söön ngünümi. Pun ai we waas üpwe anomu womi a mecheres, nge wosemi we üpwe ngenikemi a pän.” (Mat. 11:28-30) Án Kot we Kapas, kapachelong ekkewe rúáánú puken Kapas Allim usun manawen Jesus me an angangen afalafal, ra asésékich, apéchékkúla ach lúkú, me etipachemakich. (Kölf. 19:7; 23:3) Jesus a erá: “Ra feiöch chokewe mi rong kapasen Kot o aleasochis ngeni.”​—Luk. 11:28.

14-15. (a) Ifa ewe aúlúngátin atun Jiowa a fósetiw me láng me ren Johannes 12:27, 28? (b) Pwata minne Jiowa a apasa ese mwáál a oururu me apéchékkúla Jesus?

¹⁴ Álleani Johannes 12:27, 28. A mak lón makkeien Johannes we puken Kapas Allim, ewe aúlúngátin atun Jiowa a fósetiw me láng. Fitu rán me mwen án Jesus we máló, Jesus a nóm Jerusalem pwe epwe féri an we  sáingoon Pasofer. A erá: “Iei letipei a weires.” Mwirin a iótek: “Semei, kopwe alinga itom!” Jiowa a pélúweni, me a fósetiw me láng me apasa: “Üa fen alinga itei, nge üpwe pwal alingasefäli.”

¹⁵ A weires letipen Jesus pokiten ewe watteen wis a nóm ren an epwe amwéchú an tuppwél ngeni Jiowa. Jesus a silei pwe epwe riáfféú ren kawetengaw me ninniiló fán kirikiringaw. (Mat. 26:38) Nge lap seni ekkena, Jesus a mochen elingaaló iten Seman we. Aramas ra tipi ngeni Jesus pwe i chón turunufasa Kot, iwe a lólilen ika málóón epwe eitengawa Kot. A ifa me péchékkúletáán letipen Jesus ren an rong minne Jiowa a apasa! A fókkun tongeni lúkúlúk pwe iten Jiowa we epwe lingeló. Ese mwáál alon Seman we a oururu Jesus me apéchékkúla i fán iten met epwele fis ngeni. Inaamwo ika neman Jesus chék me lein ekkewe aramas mi nóm lón ena atun a weweiti met Seman we a apasa, nge Jiowa a féri pwe alon kewe repwe makketiw fán itach.​—Joh. 12:29, 30.

16. Pwata fán ekkóch neman sia lólilen ika iten Kot we epwe itengaw?

¹⁶ Neman sia pwal lólilen usun chék Jesus ika iten Jiowa we epwe itengaw. Neman a fen fis ngenikich pwúngúngaw usun chék Jesus. Are neman sia meefi weires ren ach rong án chón oputakich achéúfetálei pwóróus mi chofona usuch. Neman sia ekieki ifa usun  ekkena pwóróus ra tongeni eitengawa Jiowa me an we mwicheich. Lón ekkena atun, minne Jiowa a apasa epwe fókkun oururukich. Ese pwal lamot ach sipwe kon lólilen. Sia tongeni lúkúlúk pwe ‘än Kot kinamwe mi tekia seni ach tongeni weweiti epwe tümwünü lelukach me ekiekich lon Kraist Jesus.’ (Fil. 4:6, 7) Jiowa epwe fókkun elingaaló itan we. Ren an we Mwú, epwe eniwilaato meinisin met Satan me an ei ótót mi ngaw ra fen angei seni Néún kewe chón angang mi tuppwél.​—Kölf. 94:22, 23; Ais. 65:17.

17. Ifa usun Jiowa a fós ngenikich lón ei fansoun me ren Aisea 30:21?

¹⁷ Jiowa a chúen fóffós ngenikich lón ei fansoun. (Álleani Aisea 30:21.) Pwúngún sise kan rong án Kot fósetiw rech me láng. Iwe nge, a ngenikich emmwen ren an awora an we Kapas mi makketiw, ewe Paipel. Pwal och, án Jiowa we manaman mi fel a amwékútú “ewe chon angang mi allükülük” an epwe akkawora ngeni Néún kewe chón angang mwéngé lón pekin lúkú. (Luk. 12:42) A ifa me chómmóngun ekkewe mwéngé lón pekin lúkú sia kan akkangei, áwewe chék ren ekkewe puk mi peres me pwal ekkewe pwóróus mi nóm wóón ach kewe website, ekkewe video, me ekkewe álillis seni Paipel mi record!

18. Ifa usun minne Jiowa a apasa a apéchékkúla óm lúkú me apworaók?

¹⁸ Sipwe chechchemeni minne Jiowa a apasa lupwen Néún we a nóm wóón fénúfan! Amwo pwisin alon Kot, ewe mi mak lón ewe Paipel, epwe alúkúlúkúkich pwe mettóch meinisin a nóm fán nemenien Jiowa, me epwe amóeló meinisin mi ngaw Satan me an ei ótót a atoto ngenikich. Amwo sipwe tipeppós le aúselingéch ngeni léúwen Jiowa. Ika sia féri ena, iwe sipwe sópwéch le pworacho ngeni ese lifilifil osukosuk sia kúna iei me pwal lón mwachkkan. Iei án Paipel pesepes ngenikich: “Oupwe fokun likitü, pwe oupwe föri letipen Kot o angei mine a eäni pwon.”​—Ipru 10:36.