1-2. (a) Kuchi te Yehova akuhanjika ni atu? (b) Yika mutuhengwola ha mutwe uno?

YEHOVA kakuzanga chinji kuhanjika ni yetu. Ku shakulu, iye kapwile ni kuzachisa aprofeta, angelo ni Mwanenyi, Kristu Yesu, hanga atulweze manyonga jenyi. (Amo. 3:7; Ngala. 3:19; Uso. 1:1) Musono, iye kakuhanjika ni yetu kupalikila mu Liji lienyi, Mbimbiliya. Iye hanatwehe Mbimbiliya hanga tuhase kunyingika manyonga ni majila jenyi.

² Muze Yesu apwile hano hashi, Yehova mwene kahanjikile ha yisuho yitatu, kukatuka mu malilu. Tuhengwolenu yize Yehova ahanjikile, ni yize mutuhasa kulilongesa ha maliji jenyi, ni chize mutuyuka ha yize iye ahanjikile.

3. Ngwe chize twatanga ha Marku 1:9-11, yika Yehova ambile muze apapachishile Yesu, nawa yikuma yika yilemu yize yinashindakenya maliji jacho?

³ Marku 1:9-11 mukanda uno unasolola chisuho chitangu muze Yehova ahanjikile kukatuka mu malilu. (Tanga.) Iye kambile ngwenyi: “Yena uli Mwanami ngunakuzange chikolo, muli yena ngunawahilila.” Yesu kota kevwile chiseke chinji ha kwivwa chize Tato asolwele zango ni ujikijilo wenyi hali iye! Maliji a Yehova kashindakenyene yikuma yitatu yilemu hakutwala kuli Yesu. Chitangu, Yesu kali Mwanenyi. Chamuchiali, Yehova kakuzanga Mwanenyi. Chamuchitatu, Yehova kanakawahilila ni Mwanenyi. Tuhengwolenu kanawa hita chikuma.

4. Usendo uka waha uze Zambi alingile ni Yesu ha upapachiso wenyi?

 ⁴ “Yena uli Mwanami.” Ni maliji wano, Yehova yasolola ngwenyi, kalinga usendo waha ni Mwanenyi wa zango, Yesu. Muze Yesu apwile mu malilu, iye te mwana wa spiritu wa Zambi. Alioze, muze amupapachishile yamuwayisa ni spiritu yisandu. Ha shimbu lizeliene, Zambi yasolola ngwenyi, Yesu Mwanenyi wa kuwayisa, haliapwila kapwa ni kutalatala chakuhiluka mu malilu ni kupwa Mwanangana wa kuwayisa wa Zambi, nawa Sasendote wa Lutwe. (Luka 1:31-33; Hepre. 1:8, 9; 2:17) Kashika ha upapachiso wa Yesu, Tato ahashile kwamba ngwenyi: “Yena uli Mwanami.”—Luka 3:22.

5. Kuchi mutuhasa kwimbulula chilweza cha Yehova ha kusolwela akwetu zango ni utakamiso?

⁵ “Ngunakuzange chikolo.” Chilweza cha Yehova ha kusolola zango ni utayizo chakutukwasa tufupe uhashi wa kutakamishinamo akwetu. (Yoa. 5:20) Twakuwana utakamiso muze akwetu matusolwela zango ni kutuchichimieka ha yuma yipema yize twakulinga. Chizechene nawa, mandumbu jetu mu chikungulwila ni asoko jetu kakufupiwa zango ni utakamiso wetu. Muze mutuchichimieka akwetu, ufulielo wo mukola ni kwakwasa alingile Yehova ni ushishiko weswe. Chipi-chipi yisemi katamba kukolweza ana jo. Muze yisemi machichimieka ana jo ni mbunge yeswe ni kwasolwela zango, chino muchaakwasa akole ku ufulielo.

6. Mumu liaka twakujikijila hali Yesu Kristu?

⁶ “Muli yena ngunawahilila.” Maliji wano kanasolola ngwo Yehova kapwile ni kujikijila hali Yesu ngwenyi te malinga upale wenyi ni ushishiko weswe. Yehova kapwile ni ujikijilo wacho hali Mwanenyi, kashika ni yetu mutuhasa kufuliela ni mbunge yeswe ngwetu, Yesu  makamanununa yilakenyo yeswe ya Yehova. (2 Kori. 1:20) Muze twakunyonga ha chilweza cha Yesu, chakutukolweza kumwimbulula ni kukaula ngano jenyi. Ujikijilo uzewene Yehova apwile nawo hali Yesu, we ali nawo hali tuvumbi twenyi eswe ngwenyi manunga ni kulilongesa ku chilweza cha Mwanenyi.—1 Petu. 2:21.

7. Kulita ni Mateu 17:1-5 ha chisuho chika Yehova ahanjikile kukatuka mu malilu, nawa yika ambile?

⁷ Tanga Mateu 17:1-5. Chisuho chamuchiali chize Yehova ahanjikile kukatuka mu malilu, chili muze Yesu ‘alumukine.’ Yesu kasanyikine Petulu, Tiangu ni Yoano hanga aye ha umwe mulundu usuku. Koko, ayo yamona umwe usolwelo wa kukomwesa. Kumeso ja Yesu yikupanguka ngwe tangwa, nawa mahina jenyi yatoma too. Ayo yamona atu aali, umwe Mose mukwo Eliya, kanahanjika ni Yesu hakutwala ku kufwa ni uhindukilo wenyi. Chipwe ngwe, apostolo wano atatu kapwile ni “tulo” anji, nihindu o yanunga ni kulawola muze amwene usolwelo uno wa kukomwesa. (Luka 9:29-32) Kusulaho, lelwa litoma too yiliafuka, chocho ayo yevwa limwe liji kukatuka mu lelwa—liji liacho lia Zambi. Ngwe chize alingile ha upapachiso wa Yesu, hano Yehova yasolola nawa utayizo ni zango lienyi hali Mwanenyi hakwamba ngwenyi: “Yono mwe Mwanami, ngunamuzange chikolo muli iye ngunawahilila.” Alioze ha shimbu lino Yehova yawezela nawa ngwenyi: “Mwivwenu iye.”

8. Kuchi usolwelo uno wakwachile kuli Yesu ni kuli tumbaji twenyi?

⁸ Usolwelo wacho wasolwele uhenya ni ndundo ja Yesu kulutwe lia matangwa ngwe Mwanangana mu Wanangana wa Zambi. Kwamba pundu, Kristu kamutakamishine ni kumukolweza ha lamba ni kufwa chize te mapalika. Usolwelo wacho watakamishine nawa ufulielo wa tumbaji twenyi, ni kwakolweza hanga alilulieke ha yeseko yize te mapalika ni mulimo unene uze te malinga kulutwe. Hakupalika cha miaka 30, postolo Petulu yatongola usolwelo wa kwalumuka cha Yesu hanga asolole ngwo usolwelo wacho te uchili mu manyonga jenyi.—2 Petu. 1:16-18.

9. Yiyulo yika yilemu yize Yesu ahanyine kuli tumbaji twenyi?

⁹ “Mwivwenu iye.” Yehova kasolwele zwalala ngwenyi, kanazange hanga tupanjike maliji a Mwanenyi ni kwakaula. Yika Yesu ambile muze apwile hano hashi? Iye kambile yuma yinji yilemu yize twatela kupanjika! Chakutalilaho, ni zango lieswe yalongesa tumbaji twenyi chize mambujola sango lipema, ni kwatoweza ha yisuho yinji hanga anunge ni kulawola. (Mateu 24:42; 28:19, 20) Iye nawa yaakolweza ni kwatakamisa hanga anyongonone. (Luka 13:24) Yesu yalweza nawa tumbaji twenyi hanga alizange umwe ni mukwo, alivwashane ni kufunga shimbi jenyi. (Yoa. 15:10, 12, 13) Yiyulo yino Yesu ahanyine kuli tumbaji twenyi te yipema chinji. Yiyulo yacho yikwete ulemu musono, ngwe chizechene ha mashimbu waze Yesu ayihanyine.

10-11. Kuchi mutuhasa kusolola ngwetu, tunevu liji lia Yesu?

¹⁰ Yesu kambile ngwenyi: “Mweswe wa ku umwenemwene mevwa liji liami.” (Yoa. 18:37) Twakusolola ngwetu, tunevu liji lienyi muze ‘mutulihumikiza umwe ni mukwo, nikulikonekena umwe ni mukwo.’ (Kolo. 3:13; Luka 17:3, 4) Twakusolola nawa ngwetu, tunevu liji lienyi ha kwambujola sango lipema ha “mwaka upema, ni uze hi mwaka upema ko.”—2 Timo. 4:2.

¹¹ Yesu yamba ngwenyi: “Mapanga jami kakwivwavwa liji liami.” (Yoa. 10:27) Tumbaji twa Kristu kakusolola ngwo, kakupanjika  Yesu, hi wika ko kwivwa maliji jenyi, alioze ni kwakaula nawa. Ayo keshi kuzakalala ni “yipikalo ya mwono uno.” (Luka 21:34) Alioze, o kakwononokena shimbi ja Yesu ku mwono wo, chipwe ngwe kali mu kapinda. Mandumbu anji kanakumbu lamba linji, kuchingako yipikalo ya akwa-kulimika no, uswale ni luyinda wa chisemewa. Ha yino yeswe, ayo kakununga ni kushishika kuli Yehova, chipwe ngwe mukulingiwa chuma cheswacho. Kuli ayo, Yesu kanalakenya ngwenyi: “Yoze uli ni shimbi jami, wakujifunga, mwenawo wakunguzanga. Yoze wakunguzanga, kumakamuzanga kuli Tata.”—Yoa. 14:21.

12. Jila yika yikwo yize mutuhasa kusolwelamo ngwetu tunapanjika Yesu?

¹² Jila yikwo yize mutuhasa kusolwelamo ngwetu, tunapanjika Yesu yili: kukwasa waze iye hanaasakula apwe tusongo hakachi ketu. (Hepre. 13:7, 17) Ululikiso wa Zambi walumuna yuma yinji ha miaka yino, kuchingako yikwata ni milali yaha ya kwambulwilamo sango lipema, mutapu uze twakulikungulula hakachi ka poso ni chize mutuhasa kutunga, kululieka ni kupemesa Mazuwo jetu a Wanangana. Twakusakwilila chinji ha usongwelo upema, nawa wa zango uze twakutambula! Mutuhasa kupwa ni shindakenyo ngwetu, Yehova mawahisa tachi jetu hanga tununge ni kukaula usongwelo uze anatwehe mu ululikiso wenyi.

13. Yika mutuyuka hakwivwa liji lia Yesu?

¹³ Twakuyuka chinji ha kwivwa yuma yeswe yize Yesu alongesele. Yesu kalakenyene tumbaji twenyi ngwenyi, malongeso jenyi maahwimisa mbunge. Yamba ngwenyi: “Kumunuwana uhwimino ku mbunge jenu. Mumu kanga yami yashi, ni chiteli chami chilelu.” (Mateu 11:28-30) Liji lia Zambi, kuchingako mikanda yiwana ya Evanjelu, yize yakuhanjika ha mwono wa Yesu ni mulimo wenyi wa kwambujola, yakutuhuzulula mbunge, kutukolweza ku ufulielo ni kutwaha mana. (Samu 19:7; 23:3) Yesu yamba ngwenyi: “Kawaha waze akwivwa liji lia Zambi nikulifunga.”—Luka 11:28.

14-15. (a) Chisuho chika chamuchitatu chize anasolola ha Yoano 12:27, 28, chize Yehova ahanjikile kukatuka mu malilu? (b) Mumu liaka maliji a Yehova akolwezele Yesu ni kumutakamisa?

¹⁴ Tanga Yoano 12:27, 28. Evanjelu wa Yoano kanasolola chisuho chamuchitatu chize Yehova ahanjikile kukatuka mu malilu. Ha amwe matangwa muze Yesu te kanda afwa,  iye yaya mu Yerusaleme hanga alinge Chizomboka chenyi chakasula. Yamba ngwenyi: “Mbunge yami yinalipikala.” Chocho yalemba ngwenyi: Tata chichimieka jina lie.” Ha kumukumbulula, Tato yahanjika kukatuka mu malilu ngwenyi: “Hingunalichichimieka, kumungukalichimieka cheka nawa.”

¹⁵ Yesu kalipikalile, mumu kapwile ni chiteli chinene cha kununga ni kushishika kuli Yehova. Yesu kanyingikine ngwenyi, te mamona lamba ni kumushiha chitaka. (Mateu 26:38) Chahiana ulemu, Yesu te kanazange kuchichimieka jina lia Tato. Yesu kamuliongelele yuma ya saki, kashika alipikalile hanga kufwa chenyi chihone kupihisa lufuma wa Zambi. Pundu lume, maliji a utakamiso a Yehova kakolwezele Yesu! Kamukwashile kupwa ni shindakenyo ngwenyi, jina lia Yehova te mulipwa kuchichimieka. Maliji a Tato yamukolweza chinji ni kumutakamisa ha lamba lize te mamona. Chipwe ngwe haze apwile, iye wika mwe wevwile yize Yehova ambile ha shimbu liacho, nihindu Yehova yasa shindakenyo hanga maliji Jenyi aasoneke mumu lia yetweswe.—Yoa. 12:29, 30.

16. Mumu liaka ha mashimbu amwe, twakulipikala ha yize atu akwamba hakutwala ha jina lia Zambi?

¹⁶ Ngwe Yesu, ni yetu mutuhasa kulipikala ha yuma yize muyihasa kupihisa jina lia Yehova. Chizechene ngwe Yesu, ni yetu kakutumwesa lamba chakuhona chitela. Mutuhasa nawa kulipikala mumu lia sango ja mahuza  jize akwa-kole akumwanga hali yetu. Mutuhasa kunyonga ha upi uze sango jacho jakuneha ha jina lia Yehova ni ululikiso wenyi. Ha mashimbu jacho, maliji a Yehova kakututakamisa chinji. Kutwatambile kulipikala chinji ha yize mamba hakutwala ku jina lia Yehova ni ululikiso wenyi. Mutuhasa kupwa ni shindakenyo ngwetu, ‘sambukila ya Zambi, yize yakuhiana kunyonga cheswe, muyikafunga mbunge jetu ni kunyonga chetu muli Kristu Yesu.’ (Fwili. 4:6, 7) Yehova kechi kahona kuchichimieka jina lienyi ni limwe tangwa. Kupalikila mu Wanangana wenyi, Yehova makachiza upi weswe uze Satana ni atu jenyi akuneha hali tuvumbi Twenyi ashishika.—Samu 94:22, 23; Iza. 65:17.

17. Kulita ni Izaia 30:21, kuchi Yehova akuhanjika ni yetu musono?

¹⁷ Nihindu Yehova kakuhanjika ni yetu musono. (Tanga Izaia 30:21.) Kwamba pundu, yetu kutushi kwivwa liji lia Zambi kukatuka mu malilu. Alioze, iye hanatwehe Liji lienyi, Mbimbiliya, yize akuzachisa hanga atulongese. Chikwo nawa, spiritu ya Yehova yakukwasa “kaselo wamwenemwene” hanga anunge ni kuhana kulia kuli tuvumbi Twenyi. (Luka 12:42) Kulia chacho chakwiza ha mikanda, internet, yinema ni mikanda ya maliji a kukopa yize yakutukwasa kukola ku ufulielo!

18. Kuchi maliji a Yehova akukolesa ufulielo wetu ni kutwaha hamu?

¹⁸ Tunungenu ni kwiwuluka maliji waze Yehova ahanjikile muze Mwanenyi te uchili hano hashi! Maliji wano a Zambi, ngwe chize anasonewa mu Mbimbiliya, kakutwaha shindakenyo ngwo, Yehova kananyingika yuma yeswe nawa makachiza yuma yeswe yipi yize Satana ni atu jenyi akulinga hano hashi. Ni yetu, mutuhasa kusa tachi hanga tupanjike kanawa liji lia Yehova. Nyi twachilinga, mutuhasa kukumba kapinda mweswawo tunapalika haliapwila ni yoze mezako. Mbimbiliya yakutulweza ngwo: “Chanutamba kunyongonona, nulinge upale wa Zambi, nukatambule che chilakenyo.”—Hepre. 10:36.