1-2. (a) Nemene la aqane ithanata i Iehova ekö memine la itre atr? (b) Nemene la hne së hna troa ce wang ngöne la tane mekun celë?

IEHOVA a madrine troa ithanata me easë. Hnei Nyidrëti ekö hna upe la itre perofeta me itre angela me Iesu Keriso, Nekö i Nyidrë, matre troa qaja la mekuna i Nyidrë. (Amosa 3:7; Gal. 3:19; Hna ama. 1:1) Ame enehila, Nyidrëti a ithanata jëne la Tusi Hmitrötr. Ej a aijijë së troa atre la itre mekuna i Iehova, me aqane waiewekë i Nyidrë.

² Ame ekö lo Iesu e celë fen ke, hnei Iehova hna akönia ithanata qa hnengödrai. Tro sa ce wang la itre hnei Nyidrëti hna qaja ngöne la itre ijine cili, me xomi ini qa ngön. Tro fe sa ce wang la eloine koi së.

3. Thenge la tusi Mareko 1:9-11, nemene la hna qaja hnei Iehova ngöne la kola bapataiso Iesu, nge nemene la hna anyipicin?

³ Ame ngöne Mareko 1:9-11, tre, kolo ijine Iehova a xötrei ithanata qa hnengödrai. (E jë.) Öni Nyidrë: “Nyipëti la Nekönge hniminang, ini a madri nyipë.” Drei jë kö la madrine i Iesu, la Iehova a qaja la ihnim me mejiune i Nyidrë koi Iesu! Iehova a anyipicin e celë la köni ewekë göi Iesu. Ame la hnapan, Iesu hi la Nekö i Nyidrë. Ame la hnaaluen, tru la ihnimi Iehova kowe la Nekö i Nyidrë. Nge ame la hnaakönin, Iehova a kapa la Nekö i Nyidrë. Tro sa ce wang la köni ewekë celë.

4. Pine nemene matre ketrepengöne hë la aqane imelekeu i Iehova me Iesu, thupene la bapataiso i nyidrë?

⁴ “Nyipëti la Neköng.” Iehova hi lai a amamane laka, ketrepengöne hë la aqane imelekeu i Nyidrëti me Iesu.  Ame lo Iesu petre kö e koho hnengödrai ke, Hupuna i Akötresieti hë nyidrë. Ngo, ame lo nyidrëti a xomi bapataiso, hna sië nyidrë hnei uati hmitrötr. Haawe, ijiji nyidrëti troa bëeke hnengödrai eë, troa Joxu me Atre Huuje Ka Tru. (Luka 1:31-33; Heb. 1:8, 9; 2:17) Celë hi kepin matre Iehova a qaja ngöne lo ijine bapataiso Iesu, ka hape: “Nyipëti la Neköng.”—Luka 3:22.

5. Nemene la aqane tro sa hamë ithuecatre tui Iehova?

⁵ “Nyipëti . . . la hniminang.” Iehova a amamai tulu ngöne la Nyidrëti a qaja la ihnim me madrine i Nyidrë. Loi e tro fe sa thele troa ithuecatre koi itre xan. (Ioane 5:20) Easa madrin la kola qaja aloine la itre hne së hna kuca, hnene la ketre atr hne së hna hnim. Ketre tune fe, loi e tro sa ihnim me ithuecatre kowe la itre trejin maine itre atrene la hnepe lapa së. Ame la easa qaja aloinyi angatr, kola acatrene la lapaune i angatr, me xatua angatr troa catre mele nyipici koi Iehova. Nyipiewekë tro la itre kem me thin a ithuecatre kowe la itre nekönatr. Ame la angatr a hnim me qaja aloinyi nyudren, kola xatua nyudren troa mele ka loi, tune la feja ka cia lolo.

6. Pine nemene matre loi e tro sa mejiune koi Iesu?

⁶ “Ini a madri nyipë.” Kola amamane laka, Iehova a mejiune koi Iesu. Xecie hnyawa koi Nyidrë laka, Iesu a troa kuca la aja i Nyidrë. Haawe, loi e tro fe a xecie koi së laka, tro kö Iesu a eatrëne la itre hna thingehnaeane hnei Iehova. (2 Kor. 1:20) Ame la easa lapa mekun la tulu i Iesu, kola acatrene la aja së troa atrepengöi nyidrëti hnyawa, me xötrethenge la tulu i nyidrë. Tune la aqane  mejiune Iehova koi Iesu, Nyidrëti fe a mejiune laka, tro la itre hlue i Nyidrëti a catre thele troa atrepengöne hnyawa la Nekö i Nyidrë.—1 Pet. 2:21.

7. Thenge la hna qaja ngöne Mataio 17:1-5, eu la ijine Iehova a ithanata qa hnengödrai, nge nemene la hnei Nyidrëti hna qaja?

⁷ E jë la Mataio 17:1-5. Ame la hnaaluene ijine Iehova a ithanata qa hnengödrai, tre, hmekune lo Iesu a “ketrepengön.” Hnei Iesu hna könë Peteru me Iakobo me Ioane, troa ce elë me nyidrë hune la wetr. E cili, hnei angatr hna öhn la ketre iamamanyikeu ka tru. Kola ketrepengöne la iqëmeke i Iesu, me wiëwië me hadrehadreu la iheetre i nyidrë. Nge kösë Iesu a ithanata me Mose me Elia, göne la mec me melehmaca i nyidrë. Eje hi laka, hnene la köni aposetolo hna “meköle zië.” Ngo ame pe, ka hlë hi angatre ngöne la angatr a öhne la iamamanyikeu. (Luka 9:29-32) Thupene lai, hna heetrë angatr hnene la iaw ka melemel. Drenge jë hi angatr la nine ithanata i Iehova ngöne la iaw! Tune lo ijine kola bapataiso Iesu, Iehova a qaja la ihnimi Nyidrëti koi Iesu, me hape: “Dei la Nekönge hniminang; ini a madi nyidë.” Öni Nyidrëti hmaca: “Dei nyidëti ju.”

8. Nemene la thangane la iamamanyikeu koi Iesu me kowe la itretre dreng?

⁸ Kola mama jëne la iamamanyikeu celë, la ecatrene la musi Iesu me mene i nyidrë, ngöne la nyidrëti a troa joxu ne la Baselaia i Akötresie. Maine jë, celë hi la ka ithuecatr me aegöcatrenyi Iesu, qëmekene troa humuthi nyidrë. Ketre, hna acatrene fe la lapaune ne la itretre dreng. Hna hnëkë angatr kowe la itre jol ka troa traqa, me kowe la huliwa hna ahnithe koi angatr. Ngacama 30 hë lao macatre thupen, ngo tha thëthëhmine kö Peteru aposetolo la iamamanyikeu cili. Hnei nyidrëti hna amexeje hmaca la ijine cili.—2 Pet. 1:16-18.

9. Nemene la itre eamo hnei Iesu hna hamën kowe la itretre dreng?

⁹ “Dei nyidëti ju nyipunie.” Kola amamane laka, aja i Iehova tro sa drengethenge Iesu. Nemene la hnei Iesu hna qaja ngöne lo nyidrëti e celë fen? Nyimutre la itre ewekë hnei Iesu hna ahnith, nge ka nyipiewekë catr! Hnei nyidrëti hna inine la itretre dreng la aqane troa cainöjëne la maca ka loi, me aqane troa catre hmek. (Mat. 24:42; 28:19, 20) Hnei nyidrëti fe hna ithuecatre koi angatr tro palahi a catr. (Luka 13:24) Hnei Iesu hna amamane kowe la itretre dreng, la enyipiewekëne troa ihnimikeu me caas, me trongëne la itre hna amekötin. (Ioane 15:10, 12, 13) Drei la itre eamo ka lolo catr! Nge nyine thatraqai së mina fe enehila.

10-11. Nemene la aqane tro sa amamane laka, easa drengethenge Iesu?

¹⁰ Öni Iesu: “Ame la nöjei ate ne la nyipici asë, te, angat’ a denge la aqane ewekëng.” (Ioane 18:37) Easa drengethenge Iesu la easa “ixomi hninekeune me inuekeun.” (Kol. 3:13; Luka 17:3, 4) Easë fe a drengethenge nyidrë la easa catre cainöjëne la itre maca ka lolo “ngöne la ijine ka ijij, me ijine ka tha ijije kö.”—2 Tim. 4:2.

¹¹ Öni Iesu: “Dengë hë la ite mamoenge la aqane ewekëng.” (Ioane 10:27) Itretre drei Iesu a drengethenge nyidrë, me trongëne la itre hna qaja. Tha angatre kö a hnengazo me “kuke hnine kowe la mele celë.” (Luka 21:34) Ngacama nyimutre la itre jol, ngo ka nyipiewekë koi angatr  troa drengethenge Iesu. Nyimutre la itre trejin ka akötr. Ame itre xan, pëkö ewekë i angatr, maine pena kola icilekeu me angatr me lepi angatr hnene la itre hulö. Ngo pëkö ewekë ka troa sewe angatr troa catre mele nyipici koi Iehova. Öni Iesu: “Ame la ate hetenyi la ite wathebong, me trongën’ it’ ej, angeice hi la ate hni ni; nge ame la ate hni ni, tro ha hni angeice hnei Tetetro.”—Ioane 14:21.

12. Nemene la ketre aqane tro sa drengethenge Iesu?

¹² Ame la ketre aqane tro sa drengethenge Iesu, tre, ene la troa ce huliwa memine la itre ka elemekene la ekalesia. (Heb. 13:7, 17) Ame ngöne la itre macatre, nyimutre la itre ewekë ka saze ngöne la organizasio i Iehova. Ame enehila, hetrenyi hë së la itre jiane huliwa me aqane cainöj ka hnyipixe. Hna saze la pepa thatraqane la icasikeu e nyipine la wiik, nge hna saze fe la aqane troa xup me nyihnyawane la itre Uma Ne Baselaia. Easa kapa madrin la itre ewekë ka saze! Maine tro sa catre trongëne la itre hna amekötin e hnine la organizasio, tro kö Iehova a amanathithi së.

13. Nemene la eloine la troa drengethenge Iesu?

¹³ Nyimutre la itre manathith hne së hna troa kapa, e tro sa drengethenge Iesu. Öni Iesu kowe la itretre dreng ka hape, troa xatua angatr hnene la itre ini qaathei nyidrë. Öni Iesu: “Tro nyipunieti a öhne la hna mano thatraqane la ite u i nyipunie. Ke uqa la nyine isilikeung, nge [hmaloi] la ehnefeng.” (Mat. 11:28-30) Tru la ixatua hna hamën e hnine la Tusi Hmitrötr. Drei la ketre ceitun. Kola ithuecatre koi së la easa e la foa lao Evangelia ke, kola qejepengöne la mele i Iesu memine la huliwa ne cainöje i nyidrë. (Sal. 19:7; 23:3) Öni Iesu: “Sisitia pe la manathithi ne la angete denge la wesi ula i Akötesie, me trongën’ ej!”—Luka 11:28.

14-15. (a) Tune la hna qaja ngöne Ioane 12:27, 28, eu la hnaakönine ijine Iehova a ithanata qa hnengödrai? (b) Nemene la thangane koi Iesu la itre hnei Iehova hna qaja?

¹⁴ E jë la Ioane 12:27, 28. Kola qaja ngöne la Evangelia i Ioane la hnaakönine ijine Iehova a ithanata qa hnengödrai. Itre drai qëmekene tro Iesu a mec, hnei nyidrëti hna atrune la Paseka e Ierusalema. Öni  Iesu: “Hlohlo hë la hning.” Hnei nyidrëti hna thith me hape: “Angakaka, atrunejë la atesiwa i cilie.” Nge hnei Iehova, Tretretro i nyidrë, hna sa ka hape: “Ase hë ni atrun, nge tro hmaca ni a atrun.”

¹⁵ Iesu a hnehengazo ke, atre hnyawa hi nyidrëti la enyipiewekëne la troa mele nyipici koi Iehova. Ketre, atre hi nyidrëti laka, kola troa lepi nyidrë me humuthi nyidrë. (Mat. 26:38) Ngo nyipiewekë catre koi Iesu troa atrune la ëjene la Tretretro i nyidrë. Hna upe zö Iesu, matre nyidrëti a xou e traqa ju qaja angazone la ëje i Akötresie. Ngo xecie hnyawa koi Iesu laka, tro kö a eatr lo hnei Iehova hna qaja. Ngacama kola troa akötrë nyidrë, ngo hna aegöcatrenyi nyidrë hnene la itre trengewekë i Iehova. Iesu hmekuje hi la ka trotrohnine la hnei Iehova hna qaja. Ngo hnei Iehova hna cinyihane itre ej thatraqai së, ngöne la Wesi Ula i Nyidrë.—Ioane 12:29, 30.

16. Pine nemene matre easa hnehengazo e itre xaa ijin göne la ëje i Iehova?

¹⁶ Ceitu së hi me Iesu. Tha aja së kö tro la itre atr a qaja angazo Iehova. Ketre, tro la itre ka icilekeu a sili ithanata së me qanangazo së nge pëkö kepin. Tro fe hë sa hnehengazo e traqa ju qaja angazo Iehova memine la organizasio i Nyidrë. E cili, tha tro kö sa thëthëhmine lo trengewekë i Iehova ngöne Ioane 12:27, 28. Tha tro kö  sa hnehengazo menu göne la ëje i Iehova me organizasio i Nyidrë. Tro pe sa mejiune laka, ‘troa thupëne la itre hni së me itre mekune së göi Keriso Iesu, hnene la tingeting ka sisitria qaathei Akötresie hune la nöjei mekun’ asë.’ (Fil. 4:6, 7) Tro kö Iehova a atrune la ëje i Nyidrë. Satana memine la fene la qaane la nöjei akötre ne la itre hlue i Iehova. Celë hi matre, jëne la Baselaia, tro Nyidrëti a apatrene itre ej.—Sal. 94:22, 23; Is. 65:17.

17. Thenge la hna qaja ngöne Isaia 30:21, tune kaa la aqane ithanata koi së hnei Iehova?

¹⁷ Iehova palahi a ithanata koi së. (E jë la Isaia 30:21.) Nyipici laka, tha Nyidrëti kö a ithanata meköti koi së qa hnengödrai. Ngo ame pe, hnei Nyidrëti hna hamë së la itre trepene meköti e hnine la Tusi Hmitrötr. Ketre, hnene la uati hmitrötre i Iehova hna upe la “ate thupe nyipici,” troa hamëne o drai la göxeni ne la u, thatraqane la itre hlue i Nyidrë. (Luka 12:42) Nyimutre la itre itusi hna fejan, me itre video me itre nyine dreng hna hnëkën. Itre ej a xatua së troa acatrene la lapaune së!

18. Nemene la aqane acatrene la mejiune së me aegöcatrenyi së hnene la itre trengewekë i Iehova?

¹⁸ Eje hi, tha tro pi kö sa thëthëhmine la itre hnei Iehova hna qaja koi Iesu, ngöne lo nyidrëti e celë fen! Epi tro la itre trengewekë i Iehova a acatrene la mejiune së laka, tro kö Nyidrëti a iujine la huliwa i Nyidrë. Ketre, Iehova a troa apatrene la nöjei akötr laka, Satana me fene la qaane itre ej. Epi tro palahi sa drengethenge la itre hnei Iehova hna qaja! Eje hi, maine tro sa kuca la aja i Iehova, tro hë sa atreine cile kowe la itre jol. Öni Tusi Hmitrötr: “Nyipi koi nyipunie la xomi hnin, mate thupene la hnei nyipunie hna kuca la aja i Akötesie, ame hnei nyipunieti hna troa hetenyi la hna thinge hnaean.”—Heb. 10:36.