1-2. a) Jehova kumana ni adamadenw ye cogo di? b) An bena mun lo lajɛ barokun nin na?

A KA di Jehova ye ka kuma n’an ye. Galen, a tɛmɛna kiraw, mɛlɛkɛw ani a Dencɛ Yezu Krista fɛ k’a ka miiriyaw lase an ma (Amɔsi 3:7; Gal. 3:19; Yir. 1:1). Bi, a be kuma an fɛ Bibulu lo sababu fɛ. A y’a ka Kuma lase an ma walisa an k’a ka miiriyaw n’a ka kokɛcogow faamu.

² Tuma min na Yezu tun be dugukolo kan, Jehova kumakan bɔra sankolo la siɲɛ saba. A ye mun lo fɔ o siɲɛ kelen kelen bɛɛ la? O kumaw b’an dɛmɛ ka mun lo faamu ani u b’an nafa cogo di? An bena o lo lajɛ barokun nin na.

3. Mariki 1:9-11 kɔnɔ, Jehova ye mun lo fɔ Yezu batize tuma na? O kumaw ye koo jɔnjɔn jumanw lo yira ka gwɛ?

³ Mariki 1:9-11 Kalan. Siɲɛ fɔlɔ min na Jehova kumakan bɔra sankolo la, o lo kofɔra o vɛrisew kɔnɔ. Jehova y’a fɔ ko: “I ye ne Dencɛ kanunin ye, i koo ka di ne ye haali.” O kumaw fɛ, Jehova y’a yira ko a b’a Dencɛ kanu ani ko a lanin b’a la. Miiri k’a filɛ o diyara Yezu ye cogo min na! Jehova ka kumaw ye koo jɔnjɔn saba yira ka gwɛ Yezu koo la. A fɔlɔ, Yezu ye Ala Dencɛ ye. A filanan, Jehova b’a Dencɛ kanu. A sabanan, a koo ka di Jehova ye. An k’o koo kelen kelen bɛɛ lajɛ koɲuman.

4. Cogo juman na Yezu kɛra Ala Dencɛ ye cogo kura la a batize tuma?

⁴ “I ye ne Dencɛ” ye. O kumaw fɛ, Jehova y’a yira ko jɛnɲɔgɔnya kura sigira ale n’a Dencɛ kanulen Yezu cɛ. Sanni Yezu ka na dugukolo kan, a tun ye Ala Dencɛ ye ka ban. Nka a ka batɛmu tuma na, a mɔnna hakili senu na. O wagati la, Ala y’a yira ko a Dencɛ mɔlen Yezu be ni  jigiya ye ka kɔsegi sankolo la. O yɔrɔ la, Ala tun bena a sigi masaya la ani k’a kɛ sarakalasebagaw Kuntigiba ye (Luka 1:31-33; Eburuw 1:8, 9; 2:17). O la, an b’a faamu ka ɲɛ fɛɛn min kama Yezu Faa y’a fɔ a batize tuma na ko: “I ye ne Dencɛ” ye.—Luka 3:22.

5. Jehova y’a yira Yezu la ko a b’a kanu ani ko a koo ka di ale ye. An be se k’a ladegi cogo di?

⁵ “I ye ne Dencɛ kanunin ye.” Jehova y’a yira Yezu la ko a b’a kanu ani ko a koo ka di ale ye. A ka ɲɛyirali b’an lasun ka sababuw ɲini ka tɔɔw jija (Zan 5:20). Mɔgɔ min koo ka gwɛlɛ an ma, n’o tigi y’an tando an ka kɛwale ɲumanw kosɔn ani k’a yira ko a b’an kanu, o b’an barika bonya ani o b’an ninsɔn diya. O cogo kelen na, an ka kafomɔgɔw n’an ka denbayamɔgɔw mako b’a la an k’u jija ani an k’a yira u la ko an b’u kanu. N’an be tɔɔw tando, an b’u ka limaniya sabati ani an b’u dɛmɛ u ka baara kɛ Jehova ye kantigiya la. A kɔrɔtanin lo kosɔbɛ bangebagaw k’u deenw jija. N’u b’u deenw tando ni kɔnɔgwɛ ye ani n’u b’a yira u la k’u b’u kanu, u deenw barika be bonya kosɔbɛ.

6. Mun na an be se ka la Yezu Krista la?

⁶ “I koo ka di ne ye haali.” O kumaw fɛ, Jehova y’a yira ko a lanin b’a la ko Yezu bena ale sago dafa kantigiya la. Siga t’a la, an fana be se ka la a la ko Jehova ka layiduw bɛɛ bena dafa Yezu barika la (2 Kor. 1:20). Yezu y’a Faa sago dafa kantigiya la. N’an be miiri a ka ɲɛyirali la, o b’an jija an k’a ɲini k’a lɔn kosɔbɛ ani k’a ladegi. Jehova lanin b’a la ko a sagokɛlaw jamakulu bena to k’o kɛ. A lanin b’o la i ko a lanin b’a Dencɛ la cogo min na.—1 Piyɛri 2:21.

7. Ka kɛɲɛ ni Matiyo 17:1-5 ye, tuma juman lo Jehova kumakan bɔra sankolo la ani a ye mun lo fɔ?

⁷ Matiyo 17:1-5 kalan. Siɲɛ filanan min na Jehova kumakan bɔra sankolo la, o kɛra tuma min na “Yezu cogo yɛlɛmana.” Loon dɔ, Yezu ko Piyɛri, Zaki ni Zan k’ale bila sira kulujan dɔ kan. K’u to o yɔrɔ la, o kalandenw ye yelifɛn kabakoman dɔ ye. Yezu ɲɛda manamanana i n’a fɔ tile ani a ka faniw gwɛra parapara. Mɔgɔ fila dɔw y’a daminɛ ka kuma ni Yezu ye a saya n’a sukununi nata koo la. O mɔgɔw tun bɔnin be Eli ni Musa ma. Hali k’a sɔrɔ “sinɔgɔ tun be” Piyɛri n’a tɔɲɔgɔnw na, u y’o yelifɛn kabakoman ye tuma min na sinɔgɔ bɔra u ɲɛɛ na pewu (Luka 9:29-32). O kɔ, sankaba manamananin dɔ jigira k’u datugu ani kumakan dɔ bɔra o sankaba kɔnɔ. Ala kumakan tun lo! Jehova y’a fɔ ko a b’a Dencɛ kanu ani ko a koo ka di ale ye i ko a tun y’a fɔ cogo min na Yezu ka batɛmu tuma na. A ko: “Nin ye ne Dencɛ kanunin ye. Ne sagoladen lo.” Nka nin sen fɛ, Jehova y’a fara a kan ko: “Aw ka mɛnni kɛ a fɛ.”

8. Yezu ka kalandenw ye yelifɛn min ye, o ye nɔɔ juman lo to u kan?

⁸ Yezu tun bena nɔɔrɔ ni setigiya min sɔrɔ Ala ka Masaya kun na, o lo yirala o yelifɛn na. Siga t’a la, o koo ye Yezu jija ani ka barika don a la sabu u tun bena a tɔɔrɔ kosɔbɛ ani k’a faga loon nataw la. O yelifɛn ye kalandenw ka limaniya sabati ani k’u barika bonya kɔrɔbɔli nataw kama. Yezu ye baaraba min kalifa u ma, yelifɛn y’u labɛn o baara kama fana. Saan 30 ɲɔgɔn o kɔ, ciden Piyɛri kumana o yelifɛn koo la. O y’a yira ko a bele tun ma ɲinɛ o kɔ.—2 Piyɛri 1:16-18.

9. Yezu ye ladili nafaman juman lo di a ka kalandenw ma?

⁹ “Aw ka mɛnni kɛ a fɛ.” Jehova y’a yira ka gwɛ ko a b’a fɛ an ka mɛnni kɛ ale Dencɛ fɛ ani an ka kolo a ye. Tuma min na Yezu tun be dugukolo kan, a ye mun lo fɔ do? A ye koo caaman fɔ. A ye min bɛɛ fɔ, a kɔrɔtanin lo an k’o lamɛn! Ɲɛyirali fɛ, a y’a ka kalandenw degi waajuli kɛcogo la ani a y’a fɔ u ye tuma caaman ko u ka to ɲɛɛ na. A y’o kɛ ni kanuya ye (Mat. 24:42; 28:19, 20). A y’u ladi u k’u jija kosɔbɛ Ala sago kɛli la ani u kana u fari faga (Luka 13:24). A sinsinna a kan ko a kɔrɔtanin lo a ka kalandenw ka ɲɔgɔn kanu, u kaan bɛnnin ka to ani u k’ale ka cikanw labato (Zan 15:10, 12, 13). Yezu ye ladili min di a ka kalandenw ma, o nafa tun ka bon kosɔbɛ. O nafa bele ka bon bi.

10-11. An b’a yira cogo di ko an be mɛnni kɛra Yezu fɛ?

¹⁰ Yezu y’a fɔ ko: “Mɔgɔ o mɔgɔ, min lɔnin be tiɲɛ kan, o tigi be mɛnni kɛ ne fɛ.” (Zan 18:37). An b’a yira ko an be mɛnni kɛra Yezu fɛ n’an be muɲu ɲɔgɔn kɔrɔ ani n’a be “yafa ɲɔgɔn ma” tuma bɛɛ (Kɔlɔs. 3:13; Luka 17:3, 4). An b’a yira fana ko an be mɛnni kɛra a fɛ n’an be kibaro diiman fɔ ni kisɛya ye “waati nɔgɔman ni waatigwɛlɛn na.”—2 Tim. 4:2.

¹¹ Yezu y’a fɔ ko: “N ka sagaw . . . be mɛnni kɛ n fɛ.” (Zan 10:27). Yezu Krista ka kalandenw t’a ka kumaw lamɛn dɔrɔn, nka u b’u sira tagama fana. O cogo le la u b’a yira k’u be mɛnni kɛ a fɛ. U t’a to “diɲɛ hamikow” k’u hakili ɲagami (Luka 21:34). Nka, u b’a jati ko a kɔrɔtanin lo kosɔbɛ u ka mɛnni kɛ Yezu fɛ hali wagati gwɛlɛw na. Kɔrɔbɔlibaw  b’an balima caaman kan. An juguw b’u dɔw kɛlɛla, u dɔw ka fantanya ka jugu ani dɔw be tɔɔrɔla balawokow kosɔn. O bɛɛ n’a ta, u be kantigiya kɛra Jehova ye, u ka gwɛlɛyaw mana kɛ min o min ye. Yezu b’o balimaw hakili sigi ko: “Mɔgɔ min ye ne ka kuma mɛn k’a bato, o tigi le be ne kanu. Mɔgɔ min be ne kanu, n Faa fana bena o tigi kanu.”—Zan 14:21.

12. An b’a yira cogo wɛrɛ juman na ko an be mɛnni kɛ Yezu fɛ?

¹² An b’a yira ko an be mɛnni kɛ Yezu fɛ cogo wɛrɛ la an kɛtɔ ka mɛnni kɛ an ɲɛminɛbagaw fɛ. Yezu lo ye olu sigi an kun na (Eburuw 13:7, 17). A saan damanin ye nin ye, Ala ka ɔriganisasiyɔn ye yɛlɛmani caaman kɛ. Ɲɛyirali fɛ, an be waajuli kɛ cogo kura dɔw la ani an be waajuli kɛ ni minan kura dɔw ye. Yɛlɛmani caaman donna an ka lajɛn na minw tɛ kɛ wikɛniw na. An be Masaya Boonw lɔ, k’u lakuraya ani k’u ladon cogo min na, o fana yɛlɛmana. A ka di an ye kosɔbɛ k’a ye ko Yezu ye minw sigi an kun na, olu b’an ɲɛminɛ ni kanuya ni hakilitigiya ye. Jehova ka ɔriganisasiyɔn be cikan minw di an ma wagati bɛnnin na, n’an b’an jija k’u sira tagama, an ka la a la ko Jehova bena an duga.

13. Nafa jumanw b’a la ka mɛnni kɛ Yezu fɛ?

¹³ Yezu ye kuma minw bɛɛ fɔ, n’an b’u lamɛn, o b’an nafa. A ye layidu ta a ka kalandenw ye ko a ka kalanw bena u lafiya. A y’a fɔ ko: “Aw bena lafiya sɔrɔ, bari ne tena jɔnya ni sigɛn gwiliman la aw kan.” (Mat. 11:28-30). Yezu ka ɲɛnamaya n’a ka cidenya baara lakalila Evanzili naani kɔnɔ, o minw ye Ala ka Kuma faan dɔ ye. N’an be Ala ka Kuma kalan, o b’an barika lakuraya Alako ta fan fɛ, k’an ka limaniya sabati ani k’an kɛ hakilitigiw ye (Zab. 19:8; 23:3). Yezu y’a fɔ ko: “Mɔgɔ min be Ala ka kuma lamɛn, k’a bato, o le dagamunin lo.”—Luka 11:28.

14-15. a) Ka kɛɲɛ ni Zan 12:27, 28 ye, tuma juman lo la Jehova kumakan bɔra sankolo la siɲɛ sabanan na? b) Mun na Jehova ka kumaw ye Yezu hakili sigi ani k’a barika bonya?

¹⁴ Zan 12:27, 28 kalan. Siɲɛ sabanan min na Jehova kumakan bɔra sankolo la, o lakalila Zan ka Evanzili kɔnɔ. Tile damanin ka kɔn Yezu saya ɲɛ, a tun be  Zeruzalɛmu walisa k’a ka tɛmɛnkan seli laban kɛ. A ko: “Ne nii tɔɔrɔnin lo.” O kɔ, a ye delili kɛ ko: “N Faa, i k’i yɛrɛ tɔgɔ boɲa!” A Faa y’a jaabi ko: “Ne y’a boɲa, ne bena tila k’a boɲa tugu.”

¹⁵ Yezu hakili tun ɲagaminin lo sabu kunkanbaaraba tun lo a fɛ ka to kantigiya la Jehova ye. Yezu tun b’a kala ma ko u tun bena fariya a ma k’a bugɔ ani o kɔ, a tun bena tɔɔrɔ kosɔbɛ ka sɔrɔ ka sa (Mat. 26:38). O bɛɛ n’a ta, min tun kɔrɔtanin lo Yezu fɛ, o tun ye ka nɔɔrɔ la a Faa tɔgɔ kan. U ye Yezu jalaki ko a ye Ala nɛni. O kama, a tun be hamina ko n’u y’a faga, o bena Ala tɔgɔ tiɲɛ. Siga t’a la, Jehova ka kumaw ye Yezu hakili sigi yɛrɛ le! A tun be se ka la a la ko nɔɔrɔ tun bena la Jehova tɔgɔ kan. A Faa ye kuma minw fɔ a ye, u y’a hakili sigi ani k’a barika bonya walisa a ka se ka tɔɔrɔ nataw muɲu. Jama cɛma, n’a sɔrɔ Yezu kelen dɔrɔn lo y’a Faa ka kumaw mɛn. Nka, Jehova y’a to u y’o kumaw sɛbɛ walisa an bɛɛ ka se ka nafa sɔrɔ u la.—Zan 12:29, 30.

16. Mun na tuma dɔw la an be hami ko Ala tɔgɔ bena tiɲɛ?

¹⁶ N’a sɔrɔ u be tilenbaliyakow kɛra an na i ko u y’a kɛ Yezu la cogo min na ani an be hamina fana Jehova tɔgɔ kana tiɲɛ. A be se ka kɛ ko an hakili ɲagaminin lo sabu an juguw be ngalon jɛnsɛnna an koo la. N’a sɔrɔ an be hamina o ngalon kumaw kana Jehova  n’a ka ɔriganisasiyɔn tɔgɔ tiɲɛ. O koow ɲɔgɔn na, Jehova ye min fɔ Yezu ye Zan 12:27, 28 kɔnɔ, o b’an hakili sigi. Kuun t’a la an ka hami kojugu. An ka la a la ko “Ala ka hɛrɛ min tɛmɛna mɔgɔw ka faamuyali ma, o le bena [an] tanga hamikojugu ma, Yezu Krista barika la.” (Filip. 4:6, 7). Jehova bena nɔɔrɔ la a tɔgɔ kan tuma bɛɛ. Sutana n’a ka duniɲa juguman ye koo jugu minw bɛɛ kɛ Jehova sagokɛla kantigiw la, Jehova bena tɛmɛ a ka Masaya sababu fɛ, k’o nɔfɛkow bɛɛ ban.—Zab. 94:22, 23; Ezayi 65:17.

17. Ka kɛɲɛ ni Ezayi 30:21 ye, Jehova be kuma an fɛ bi cogo di?

¹⁷ Jehova bele be kuma n’an ye bi (Ezayi 30:21 kalan). Tiɲɛn lo ko an t’a kumakan mɛn ka bɔ sankolo la. Nka a y’a ka Kuma di an ma, o min ye Bibulu ye. A be cikanw di an ma Bibulu kɔnɔ. Ka fara o kan, Jehova ka hakili senu be “baaraden tilennin” wala soo kunnasigibaga kantigiman lasun a ka to ka dumuni di an ma Alako ta fan fɛ (Luka 12:42). An be fɛɛn caaman sɔrɔ an ka sɛbɛw kɔnɔ ani ɛntɛrɛnɛti kan. An be videwow ani fɛɛn lamɛnta caaman fana sɔrɔ!

18. Jehova ka kumaw b’an ka limaniya sabati ani k’an jaa gwɛlɛya cogo di?

¹⁸ Tuma min na Yezu tun be dugukolo kan, a Faa Jehova ye kuma minw fɔ, an k’u to an hakili la! Jehova ka kuma minw bɛɛ be sɔrɔ Bibulu kɔnɔ, an k’a to u k’an hakili sigi ko koo bɛɛ be ale lo bolo. O kumaw bena a to an be la a la fana ko Sutana n’a ka duniɲa juguman ye koo jugu minw bɛɛ kɛ an na, Jehova bena o koo juguw n’u nɔfɛkow bɛɛ ban. An k’an jija ka mɛnni kɛ Jehova fɛ koɲuman. N’an y’o kɛ, gwɛlɛya o gwɛlɛya b’an kan bi ani koo o koo bena an sɔrɔ sinima, an bena se k’u bɛɛ muɲu. Bibulu b’an hakili jigi ko: “Fɔɔ aw ka jija janko n’aw ye Ala sago kɛ ka ban tuma min na, a y’a daa di min na, aw k’o sɔrɔ.”—Eburuw 10:36.