1, 2. (1) ¿Kasa naaʼinraka Jeʼwaa süpüla nikirajüin waya? (2) ¿Kaseerü wekirajaaka anain sünain ekirajaayakat tüü?

KAMALAINSÜ nümüin Jeʼwaa nikirajüin waya. Naaʼinrüin tia süpüla wayaawatüin saaʼu kasain jülüjain naaʼin otta jamüin naaʼinraka wanee kasa. Müshiijeseʼe nuluwataapuʼuin na nünüikimaajanakana, na aapieekana otta müshia Jesuu, chi Nüchonkai (Amós 3:7; Gal. 3:19; Alat. Map. 1:1). Nikirajüin waya maaʼulu sükajee tü Wiwüliakat.

² Yaaiwaʼaya Jesuu Mmapaʼa, apünüintua naashajaain Jeʼwaa nümüin chaa sirumatuʼujee. Wekirajaa sünain jamüin nünüiki, kasain watüjain sünainjee tü nümakat otta jamüin wakuwaʼipa sutuma woonooin sümaa nünüiki.

3. (1) Saashin Marcos 1:9-11, ¿jamüsü nünüiki Jeʼwaa nümüin Jesuu soʼu woutiisain nia? (2) ¿Jarat tü apünüinsükat kasa nüküjaka Jeʼwaa nümüin?

³ (Paashajeʼera Marcos 1:9-11). Süküjain tia pütchikat tü palajatkat nukua Jeʼwaa sünain aashajawaa chaa sirumatuʼujee. Anuu nünüiki: «Pia chi Tachonkai aishikai tapüla. Talatüshi maʼi taya pümaa». Talatakajasaʼa naaʼin Jesuu süka naapüin nünüiki Jeʼwaa sünain aküjaa alin nia nüpüla otta talatüin nia nümaa. Wekirajaa sünain tü apünüinsükat kasa nüküjaka Jeʼwaa nümüin Jesuu: Nüchoin nia, alin nia nüpüla otta talatüin naaʼin nümaa.

4. «Pia chi Tachonkai», ¿jamüshi nümaka Jeʼwaa nümüin Jesuu?

⁴ «Pia chi Tachonkai». ¿Jamüsü makaʼa nünüiki  Jeʼwaa? Shia süka chajachin Jesuu sirumatuʼu nümaa otta Nüchontüjüiya nia chayaa süka nukumalain nia. Shiasaʼa soʼu woutiisain Jesuu, aneekünüshi nia nutuma Jeʼwaa nükajee chi naaʼinkai. Eekalaka süpüla nüleʼejüin iipünaamüin süpüla Nuluwataainjachin otta niainjachin chi Sacerdoote Miyoʼushikai nüneekajalakai Maleiwa (Luc. 1:31-33; Heb. 1:8, 9, TNM; Heb. 2:17). Müshijeseʼe «Anii chi Tachonkai», nümüin Jeʼwaa nümüin Jesuu soʼu woutiisain nia (Luc. 3:22).

5. ¿Kasa waaʼinrajatka süpüla müin wakuwaʼipa maʼaka naaʼin Jeʼwaa?

⁵ «Pia chi [...] aishikai tapüla». Nüküjain Jeʼwaa nümüin Jesuu alin nia nüpüla otta nütütüleʼerüin naaʼin, müinjatia tü waaʼinrakat namüin na waneinnua (Juan 5:20). Talatüshii waya müleka aire waya nüpüla wanee wayuu aikai wapüla otta anale nünüiki wamüin süchiki tü waaʼinrakat. Akaʼaya na wapüshikana namaa na wawalayuukana, alinjana naya wapüla otta watütüleʼerüinjatü naaʼin. Waaʼinrüle tia, katchinjeerü nanoula otta oonoweena waneepia nümaa Jeʼwaa. Shia choʼujaaka natütüleʼen-nüinjanain aaʼin na tepichikana natuma na kachooinkana naya otta alinjana naya napüla. Suluʼujee tia, aʼyataajeena na tepichikana süka süpüshuaʼa naaʼin nümüin Jeʼwaa.

6. ¿Jamüshii wanoujainjanaka nünain Jesuu?

⁶ «Talatüshi maʼi taya pümaa». Nüküjain Jeʼwaa tia süka nütüjaain saaʼu noonoweechin Jesuu sümaa nünüiki. Müshiʼiya wayakana, wanoujainjatü anain naaʼinreerüin Jesuu süpüshuaʼa tü kasa nüküjakalü achiki Jeʼwaa (2 Cor. 1:20). Jülüjale waaʼin nukuwaʼipa Jesuu, anashiijeerü wamüin wekirajaain nüchiki otta woʼunüin süchiirua nukuwaʼipa. Nütüjaa aaʼu Jeʼwaa, nekirajaweenain na anoujashiikana süchiki nukuwaʼipa chi Nüchonkai (1 Ped. 2:21).

7. (1) Saashin Mateo 17:1-5, ¿joujachi aashajaain Jeʼwaa nüchikuaʼa nümüin Jesuu chaa sirumatuʼujee? (2) ¿Jamüsü nünüiki nümüin?

⁷ (Paashajeʼera Mateo 17:1-5). Aashajaashi Jeʼwaa nüchikuaʼa nümüin Jesuu chaa sirumatuʼujee wanaa sümaa shiiʼiranajaain nukuwaʼipa Jesuu. Soʼu tia, nümaashi Pedro, Santiago otta Juan saaʼumüin wanee uuchi miyoʼu. Neʼraka wanee kasa ponoko maʼin naaʼin. Chuwatsü maʼin nuʼupünaa Jesuu otta jorottusü maʼin nüsheʼin. Neʼrüin piamashii wayuu, wanee müshi aka naaʼin Moisés otta chi wane müshi aka naaʼin Elías, aashajaashii naya wayuukana nümaa Jesuu süchiki outajachin nia otta nüsoʼiraainjachin aaʼin. Mayaainjeʼe natunkeein maʼin na apünüinshiikana aluwataaushii, neʼrüin tia suwataleepa lapüka noulia (Luc. 9:29-32). Süchikijee tia, eekalaka wanee siruma kasuutat maʼin jee sujuʼitaka nünüiki Maleiwa sünain maa: «Anii chi Tachonkai aishikai tapüla. Talatüshi maʼi taya nümaa». Anuu sooʼomüin nünüiki: «Jüüjüü jümata sümüin nünüiki».

8. ¿Jamüsü naaʼin Jesuu namaa na nikirajüinkana sutuma tü kasa neʼrakat?

⁸ Tia kasa neʼrakat na aluwataaushiikana, shiyaawase pülashinjachin Jesuu nuluwataapa nutuma Maleiwa. Atütülaakajasaʼa naaʼin Jesuu sutuma, akatchinraasü naaʼin süpüla tü müliaa jee tü outaa niʼreetkat. Otta sutuma tia, atütülaasü naaʼin na nikirajüinkana, katchinsü naaʼin süpüla eejiraain naya sümaa tü ooʼulakünajatkalü aka naaʼin jee katchinsü naaʼin süpüla aküjaa pütchi. Aashajaashi Pedro süchiki tia kasa neʼrakat maʼaka 30 juya süchikijee, eekalaka süpüla wamüin nnojoluin motuin shia naaʼin (2 Ped. 1:16-18).

9. ¿Kasa niʼikaka anain Jesuu na nikirajüinkana?

⁹ «Jüüjüü jümata sümüin nünüiki». Nuchuntuin Jeʼwaa wamüin jüüjüüinjanain waya nümüin chi Nüchonkai otta woonooinjanain sümaa nünüiki. Watta saalii kasa nikirajaka anain Jesuu yaaiwaʼaya nia Mmapaʼa, anashii kacheʼere waya sümüin tü nümakat. Niʼiküin na nikirajüinkana sünain aküjaa pütchi süchiki tü Aluwatawaakat nutuma Maleiwa jee nüsoʼirawalin naaʼin süpüla eejüinjatüin naaʼin (Mat. 24:42; 28:19, 20). Jee nuchuntashaatain namüin naaʼinrajatüin tü nüchekakat Maleiwa otta waneepiainjanain naya sünain anoujaa (Luc. 13:24). Nüküjaleʼeinya Jesuu namüin aijiraainjanain naya, paaʼinwainjanain naya otta noonooinjanain sümaa nünüiki (Juan 15:10, 12, 13). Anakajasaʼa nakuwaʼipa na nikirajüinkana sutuma tia pütchikat jee aneeria wakuwaʼipa sutuma maaʼulu yaa.

10, 11. ¿Kasa waaʼinrajatka süpüla woonooin sümaa nünüiki Jesuu?

¹⁰ Anuu nünüiki Jesuu: «Chi eekai kachiiruain aaʼin tü shiimüinkat, nia aapaka tanüiki» (Juan 18:37). Oonooshii waya sümaa nünüiki wanaa sümaa waapaain sümaa pütchikat tüü: «Jaaʼinra tü anasükat shiʼipajee eekai shiʼrülüin wayumüin jümüin, sümaa motüin jaaʼin saainjala» (Col. 3:13; Luc. 17:3, 4). Jee oonooshii waya sümaa nünüiki wanaa sümaa talatüin waaʼin sünain aküjaa pütchi jaʼitasü kasain alatüin wamüin (2 Tim. 4:2).

¹¹ Naashin Jesuu nayaawatüin na nikirajüinkana jamüin nünüiki (Juan 10:27). Kacheʼeshii waya sümüin nünüiki müleka woonoole sümaa tü nümakat, nnojotsü neʼe jülüjainjatüin shia waaʼin. Nnojoishii waya shapaain aaʼin «saaʼujee tü kasa choʼujaakat wamüin» (Luc. 21:34, TNM). Shia waaʼinmaaka maʼin woonooin sümaa tü nuluwataakalü anain Jesuu, jaʼitasü mojuin maʼin tü alatakat wamüin. Watta naalii wawalayuu alatakana amüin kasa mojusü, eeshii napüleeruaanüle aaʼin, eesü nnojorüle kasain nantüin anain, eesü süsetüle palaa eere kepiain naya jee sukutkujaale tü mmakat. Ayatapejeʼe  oonooin naya waneepia nümüin Jeʼwaa. Anuu nünüiki Jesuu namüin: «Chi eekai noonooin sümaa tü taluwataakat anain nia, niaʼaya aika apüla taya. Je saaʼu alin taya nüpüla, aijeechi nia nüpüla chi Tashikai» (Juan 14:21).

12. ¿Kasa amaa waaʼinrajatka süpüla woonooin sümaa tü nümakat Jesuu?

¹² Oonooshii waya sümaa tü nümakat Jesuu wanaa sümaa waaʼinrüin tü namakat na laülaashiikana (Heb. 13:7, 17). Wainma kasa eeʼirataka akuwaʼipa suluʼu nupueulose Jeʼwaa. Jamüsüjaʼa maaʼulu, jeketü sukuwaʼipa waküjia pütchi otta jeketü tü kasa waküjaka aka pütchi. Eeʼiratüsü sukuwaʼipa tü outkajawaakat Wakuwaʼipa otta Waʼyataain nümüin Maleiwa, eeʼiratüsü sukumajia tü Piichi Outkajaaleekat otta müleka sunoutunüinjatüle wanee kasa mojuka sünain jee eeʼiratüsü tü aainjünakat süpüla saaʼinmajünüin tü Piichi Outkajaaleekat. Sünainjee tü naapakat Jeʼwaa wamüin sükajee tü nupueulosekat, wayaawata aaʼu alin waya nüpüla. Kojutusü tia wamüin. Eʼreena waya anaa nutuma Jeʼwaa woonoole sümaa tü nümakat wamüin sükajee tü nupueulosekat.

13. ¿Kasa weʼreetka woonoole sümaa tü nikirajakalü anain Jesuu?

¹³ Aneerü wakuwaʼipa woonoole sümaa süpüshuaʼa tü nikirajakalü anain Jesuu. Jamüshijaʼa nia, nüküjain namüin na nikirajüinkana aneerüin naaʼin sutuma tü nikirajakalü anain naya. Müshi nia: «Müleka jüüjüüle jia tamüin, taapeerü jümüin tü eemerawaakat süka anamiain maʼi taya» (Mat. 11:28-30). Akatsüinraasü wanoula jee kekiishii waya sutuma tü sümakat tü Wiwüliakat otta sutuma tü pienchisükat karaloʼuta aashajaaka süchiki nukuwaʼipa jee süchiki tü niʼyataainkat Jesuu sünain aküjaa pütchi (Sal. 19:7; 23:3). Anuu sooʼomüin tü nümakat Jesuu: «Naya müleʼoka anaa amüin na aapakana nünüiki Maleiwa sünain noonooin sümaa» (Luc. 11:28).

14, 15. (1) Saashin Juan 12:27, 28, ¿jarat tü apünüintuakat nukua Jeʼwaa sünain naashajaain chaa sirumatuʼujee? (2) ¿Jamüsü anaka naaʼin otta sükatchinraaka naaʼin Jesuu sutuma nünüiki Jeʼwaa?

¹⁴ (Paashajeʼera Juan 12:27, 28, TNM). Süküjain tü karaloʼutakat Juan tü apünüintuakat nukua Jeʼwaa sünain aashajawaa chaa sirumatuʼujee. Soʼu tia, chajachi Jesuu Jerusalén süpüla tü miʼiraa kanüliakat Pascua, alatüsü tia maʼaka jeʼra kaʼi süpülapünaa outuin nia. Shapaasü maʼin naaʼin jee achuntushi nia nümüin Jeʼwaa sünain maa: «Taataa, kojuta putuma  tü pünüliakat». Anuujeseʼe nünüiki Jeʼwaa niʼipajee: «Kojutuitpa tatuma otta kojuteerü shia tatuma süchikuaʼa».

¹⁵ Shapaasü maʼin naaʼin Jesuu süka choʼujaashaatain waneepiain nia nümaa Jeʼwaa. Nütüjaa aaʼu müliainjachin nia atumawaa otta nuʼutunajachin aaʼin (Mat. 26:38). Shiapejeʼe kapülain naaʼin kojutuinjatüin nünülia chi Nüshikai. «Aküjashi naʼalain», münüshi Jesuu otta shapaasü naaʼin süka mojeerüin pütchi nüchiki Jeʼwaa. Nüküjapejeʼe Jeʼwaa nümüin kojutuinjatüin tü nünüliakat, anakajasaʼa naaʼin sutuma tia otta akatchinraakajasaʼa naaʼin süpüla tü müliaa niʼrüinjatkat. Nüshajirüin Jeʼwaa tia pütchikat süpüla anain wakuwaʼipa sünainjee. Naaʼinrüin tia, mayaainjeʼe niain neʼe Jesuu ayaawatüin saaʼu süpüshuaʼa tü nümakat Jeʼwaa (Juan 12:29, 30).

16. ¿Jamüsü shapaajeetka waaʼin saaʼujee mojuin pütchi nüchiki Jeʼwaa?

¹⁶ Eesüjaʼa shapaajeerüle waaʼin maʼaka naaʼin Jesuu, jama nnojoluin wacheküin mojuin pütchi nüchiki Jeʼwaa. Eesü saainjünüle kasa mojusü wamüin maʼaka saainjünüin nümüin. Otta eesü shapaale waaʼin süka süküjünüin alawaa wachiki natuma na mojushiikana amüin tü wanoujakalü anain. Jee shiale mojushiin wamüin mojeerüin pütchi nüchiki Jeʼwaa otta süchiki nupueulose. Nnojotpejeʼe waapüinjatüin waaʼin sünain shapaain waaʼin sutuma tia. Shia anaka atuma waaʼin tü nümakat  Jeʼwaa nümüin Jesuu. Kojutusü tü nünüliakat Jeʼwaa. Saaʼujee niainjachin Aluwataain, nunouteerü tü kasa mojusü naainjakat Satanaa otta tü kasa mojusü saaʼinrakat wayuu namüin na anoujashiikana (Sal. 94:22, 23; Is. 65:17). Shiimain shikeraajeerüin tü pütchi makat mayaa: «Aapüneerü wane anaa jümüin nütüma [Maleiwa]. Isasü wachiki wayaawatüin saaʼu tia anaa naapakat wamüin, saaʼu wayuuin neʼe waya. Otta sükajee saʼaniraaitpain wakuaippa nümaa Cristo Jesús, jutateena waya suulia shapawaa aaʼin je suulia jülüjaa aaʼin kasa mojusü» (Filip. 4:6, 7).

17. Sünainjee tü sümakat Isaías 30:21, ¿kasa nikirajaka aka waya Jeʼwaa maaʼulu?

¹⁷ Ayatüshiʼiya nikirajüin waya Jeʼwaa maaʼulu (paashajeʼera Isaías 30:21). Mayaapejeʼe nnojoluin waapajüin nünüiki sirumatuʼujee, nikirajüin waya sükajee tü Wiwüliakat. Otta müsia, niʼitaain chi achepchiee «tütükai sünain tü aluwataanakat anain nia» süpüla naapüin wamüin tü katchinkalü atuma wanoula nükajee chi naaʼinkai Maleiwa. Eesü saapünüle karaloʼuta wamüin, eesü shia suluʼu Internet, eesü video otta eesü pütchi akürawaajuushi (Luc. 12:42). ¿Aashin wattain saalii tü kasa naapakat Jeʼwaa wamüin?

18. (1) ¿Kasa wanoujainjatka anain? (2) ¿Jamüshii kacheʼeinjanaka waya sümüin nünüiki Jeʼwaa?

¹⁸ Nnojo motuin waaʼin tü nümakat Jeʼwaa soʼu yaajachin chi Nüchonkai Mmapaʼa. Sükajee tü sümakat tü Wiwüliakat, anashii wanoujale sünain lotuin sukuwaʼipa wanee kasa nutuma Jeʼwaa otta nunouteerüin tü kasa mojusü aainjünakat wamüin nutuma Satanaa namaa na nuluwataakana aaʼu. Anashii kacheʼere waya sümüin nünüiki Jeʼwaa. Waaʼinrüle tia, eejiraweena waya sümaa wanee kasa eekai sülatüin wamüin. Anuu sünüiki tü Wiwüliakat wamüin: «Müleka jüchecherüle jaaʼin sümaʼinruʼu jaʼatapajüin tü naaʼinrüinjatkat chi Maleiwakai jümüin, juunteerü jaaʼinrüin tü nüchekakat jüpüleerua, je naapeerü jümüin tü nüküjakat achiki sümaa pansaain nünüiki» (Heb. 10:36).