1, 2. a) ¿Mbaʼéichapa Jehová oñekomunika vaʼekue yvyporakuérandi? b) ¿Mbaʼépa jahecháta ko artíkulope?

YMAITE guive Jehová oñekomunika vaʼekue yvyporakuérandi, ha ojaposeterei voi upéva. Upévare ojevale kuri umi profétare, umi ánhel ha Itaʼýra Jesucrístore oikuaauka hag̃ua umi mbaʼe haʼe opensáva (Amós 3:7; Gál. 3:19; Apoc. 1:1). Ñane tiémpope katu, Jehová oñeʼẽ ñandéve la Biblia rupive. Haʼe omeʼẽ vaʼekue Iñeʼẽ ikatu hag̃uáicha jaikuaa umi mbaʼe opensáva ha ñantende hag̃ua la ojapóva.

² Jesús oĩrõ guare ko yvy ape ári, Jehová 3 vése oñeʼẽ vaʼekue yvága guive. Jahechamína umi mbaʼe heʼi vaʼekue, mbaʼépa ikatu ñaaprende umívagui ha mbaʼéichapa ikatu ñanepytyvõ umi mbaʼe heʼíva.

3. Ohechaukaháicha Marcos 1:9-11, ¿mbaʼépa Jehová heʼi ojevautisárõ guare Jesús, ha mbaʼépa ohechauka upéva?

³ (Elee Marcos 1:9-11). Ko okasión haʼe vaʼekue pe primera ves Jehová oñeʼẽ hague yvága guive. Upérõ haʼe heʼi: “Nde hína che Raʼy ahayhuetéva ha aguerohorýva”. Eñeimahinamína mbaʼeichaitépa ovyʼáne raʼe Jesús ohendúvo Itúa voi heʼiha ohayhuha chupe ha ohechauka ojeroviaha hese. Umi mbaʼe Jehová heʼi vaʼekue ohechauka mbohapy mbaʼe iñimportantetereíva. Primero, Jesús haʼeha Itaʼýra. Segundo, Jehová ohayhuha chupe. Ha tercero, Ñandejára oguerohoryha Itaʼýrape. Ñaanalisa porãmína koʼã mbohapy mbaʼe.

4. ¿Mbaʼérepa ikatu jaʼe Jesús ojevautisárõ guare oñemoag̃uive hague Itúare?

⁴ “Nde hína che Raʼy”. Péicha ningo heʼi vaʼekue Jehová ohechauka  hag̃ua Itaʼýra ohayhuetéva hiʼag̃uivemaha hese. Jesús oĩ tiémpope yvágape, haʼéma vaʼekue voi Ñandejára raʼy ha peteĩ espíritu. Péro haʼe ojevautisárõ guare Jehová ounhi chupe ijespíritu sánto rupive. Upéicha Ñandejára ohechauka Jesúsgui oikoha Itaʼýra unhído ha orekoha esperánsa oho jeývo yvágape oiko hag̃ua chugui pe Rréi ha pe Saserdóte Guasu Ñandejára onombra vaʼekue (Luc. 1:31-33; Heb. 1:8, 9; 2:17). Jahechaháicha, Jesús ojevautisárõ guare ndareíri kuri Itúa heʼi: “Nde hína che raʼy” (Luc. 3:22).

5. ¿Mbaʼéichapa ikatu jasegi Jehová ehémplo?

⁵ “Che Raʼy ahayhuetéva”. Jesús ohechakuaa vaʼekue Jehová ohayhuha chupe ha oguerohoryha umi mbaʼe haʼe ojapóva. Ñandejára ehémplo ohechauka ñandéve ñañehaʼã vaʼerãha jahecha mbaʼéichapa ikatu ñamokyreʼỹ ñande rapichápe (Juan 5:20). Ajépa javyʼa peteĩ persóna jahayhúva ohechauka jave ñanderayhuha ha ñandefelisita umi mbaʼe porã jajapóvare. Upéicha avei, ñane ermáno ha ermanakuéra kongregasiónpe ha ñande rogayguakuéra ohechakuaa vaʼerã jahayhuha chupekuéra, ha avei tekotevẽ ñamokyreʼỹ chupekuéra. Jafelisita jave ótrope umi mbaʼe porã ojapóvare ñaipytyvõ hína ojeroviave hag̃ua hikuái ha osegi hag̃ua oservi fiélmente Jehovápe. Umi sy ha túa koʼýte tekotevẽ omokyreʼỹ ifamíliape. Tuakuéra ohechaukárõ umi mitãme añetehápe omombaʼeha la ojapóva hikuái ha ohayhuha chupekuéra, umi mitã osegíta oñehaʼãmbaite ojapo hag̃ua la iporãva.

6. ¿Mbaʼérepa ikatu ñakonfia Jesús rehe?

⁶ “Che Raʼy [...] aguerohorýva”. Péicha Jehová ohechauka ojeroviaha Jesús ikatutaha kuri ojapo hembipota. Jehová peichaite peve ojeroviárõ Itaʼýrare, koʼýte ñande avei ikatu ñakonfia Jesús okumplipaitetaha la Jehová oprometéva ñandéve (2 Cor. 1:20). Amáske  jajepyʼamongeta Jesús rembiasakuére, jaikuaasevéta chupe ha ñanekyreʼỹvéta jasegi hag̃ua iñehémplo. Jehová ojerovia avei isiervokuérare ha oikuaa haʼekuéra osegitaha oaprendeve Itaʼýragui (1 Ped. 2:21).

7. Ohechaukaháicha Mateo 17:1-5, ¿mbaʼe okasiónpepa Jehová oñeʼẽ jey kuri yvága guive, ha mbaʼépa heʼi upérõ?

⁷ (Elee Mateo 17:1-5). Jehová oñeʼẽ jey vaʼekue yvága guive 2 veseha oikórõ guare pe transfigurasión. Upérõ, Jesús ojerure kuri Pedro, Santiago ha Juánpe oho hag̃ua hendive peteĩ montáña ijyvatévape, ha oĩ aja upépe, ohecha hikuái peteĩ visión ndaijojaháiva. Jesús rova oñepyrũ kuarahýicha omimbi ha ijao avei omimbipa. Upéi ohecha hikuái mokõi persóna joguaha, orrepresentáva Moisés ha Elíaspe, ha koʼãva oñepyrũ oñemongeta Jesúsndi umi mbaʼe haʼe ohasátavare, mbaʼéichapa omanóta ha oñemoingove jeýta chupe. Upérõ ningo umi mbohapy apóstol oke joa hína kuri, péro opáy porãvo hikuái, ohecha ko visión ndaijojaháiva (Luc. 9:29-32). Upéi peteĩ arai omimbipáva ojahoʼi chupekuéra ha ohendu hikuái Ñandejára voi oñeʼẽha yvága guive. Ojapo haguéicha Jesús ojevautisárõ guare, Jehová heʼi jey ohayhu ha omombaʼeha Itaʼýrape, heʼívo: “Kóva hína che Raʼy ahayhuetéva ha aguerohorýva”. Péro ko vuéltape Jehová heʼive ótra kósa. Haʼe heʼi: “Pehendúke chupe”.

8. ¿Mbaʼéichapa pe visión oipytyvõ raʼe Jesús ha idisipulokuérape?

⁸ Pe visión ningo ohechauka mbaʼeichaitépa Jesús ipuésto yvatéta ha ipoderósota ogovernávo Ñandejára Rréinope. Katuete oiméne Cristo ikyreʼỹ ha imbareteve ogueropuʼaka hag̃ua umi sufrimiénto ohasa vaʼekue ha oaguanta hag̃ua ojejuka vaietérõ guare chupe. Pe visión oipytyvõ avei umi disípulope ojeroviave hag̃ua ha omombarete chupekuéra ikatu hag̃uáicha ipuʼaka umi mbaʼe ijetuʼúva ohasátavare. Avei okumpli porã hag̃ua hikuái pe traváho tuichaite tekotevẽva kuri ojapo. Ohasa rire 30 áñorupi, apóstol Pedro oñeʼẽ jey kuri pe transfigurasión rehe, péicha jahechakuaa imanduʼa porãiterei hague la oiko vaʼekuére (2 Ped. 1:16-18).

9. ¿Mbaʼe konsého ideprovechoitévapa Jesús omeʼẽ vaʼekue idisipulokuérape?

⁹ “Pehendúke chupe”. Jehová ohechauka porã ñandéve oipotaha ñaneñeʼẽrendu Itaʼýrape. ¿Mbaʼépa omboʼe Jesús oĩrõ guare ko yvy ape ári? Haʼe heʼi vaʼekue heta mbaʼe ideprovechoitereíva ñandéve. Por ehémplo, mborayhúpe omboʼe idisipulokuérape mbaʼéichapa opredika vaʼerã, ha heʼi jey jey vaʼekue chupekuéra oĩ hag̃ua alérta (Mat. 24:42; 28:19, 20). Jesús omokyreʼỹ avei umi hemimboʼekuérape oñehaʼãmbaite hag̃ua Jehová servísiope ha ani hag̃ua oñentrega (Luc. 13:24). Haʼe omboʼe kuri avei chupekuéra iñimportanteha ojoayhu, iñunído ha iñeʼẽrendu chupe (Juan 15:10, 12, 13). ¡Ajépa ideprovechoite koʼã konsého Jesús omeʼẽ vaʼekue! Heta oipytyvõ kuri umi disípulope ha koʼag̃aite peve osegi ñanepytyvõ.

10, 11. ¿Mbaʼéichapa ikatu jahechauka ñaneñeʼẽrenduha Jesúspe?

¹⁰ Jesús heʼi vaʼekue: “Opavave oĩva pe añetegua ykére ohendu che ñeʼẽ” (Juan 18:37). Jahechauka hína ñaneñeʼẽrenduha ‘jasegíramo ñañoaguanta ha ñañoperdona ñande pyʼaite guive’ (Col. 3:13; Luc. 17:3, 4). Jahechauka avei ñaneñeʼẽrenduha, kyreʼỹme japredikáramo umi notísia porã “tahaʼe iporã térã ivai jave” (2 Tim. 4:2).

¹¹ Jesús heʼi vaʼekue: “Che ovechakuéra ohendu che ñeʼẽ” (Juan 10:27). Ñande jahechauka ñaneñeʼẽrenduha Jesúspe ndahaʼéi ñahendúnte rupi la heʼíva, síno jajapógui umi mbaʼe  haʼe omandáva. Avei ndajaikói ‘jajepyʼapyeterei ñane remikotevẽre’, péicha rupi ndajahejái umi mbaʼe ñandedistrae (Luc. 21:34). Upéva rangue ñamotenonde umi mbaʼe Jesús ojeruréva ñandéve, jahasáramo jepe umi situasión ijetuʼúva. Opárupi oĩ umi ermáno oaguantáva heta mbaʼe, por ehémplo oĩ oñemoĩva hesekuéra, imboriahuetereíva térã ohasa asýva umi desástre naturál káusare. Upéicharõ jepe, osegi hikuái ifiél Jehovápe toiko la oikóva. Jesús ningo oasegura voi chupekuéra: “Pe oguerovia ha ojapóva che mandamiénto, upéva cherayhu hína. Che Ru ohayhúta upe cherayhúvape ha che avei ahayhúta chupe” (Juan 14:21).

12. ¿Mbaʼépa ikatu avei jajapo jahechauka hag̃ua ñaneñeʼẽrenduha Jesúspe?

¹² Oĩ avei ótra kósa ikatúva jajapo jahechauka hag̃ua ñaneñeʼẽrenduha Jesúspe. Jajapóta hína upéva ñaipytyvõramo umi haʼe oasignávape ñanemoakã hag̃ua (Heb. 13:7, 17). Ñandejára organisasión ningo ojapo heta kámbio koʼág̃arupi. Por ehémplo, omeʼẽ ñandéve umi erramiénta ha método pyahu japredika hag̃ua. Avei koʼág̃a ojejapo ótro hendáicha umi rreunión éntre semanagua ha okambia mbaʼéichapa oñemopuʼã, oñemyatyrõ ha oñemantene umi Salón del Reino. Ajépa ñamombaʼete oñepensa porã haguére la ñaikotevẽvare, ha mborayhúpe oñemeʼẽ haguére ñandéve umi konsého ideprovechoitéva. Ani jaduda katuete Jehová ñanevendesitaha ñañehaʼã haguére jasegi pe gía haʼe omeʼẽva itiempoitépe iñorganisasión rupive.

13. ¿Mbaʼéichapa ideprovécho ñandéve ñaneñeʼẽrendúrõ Jesúspe?

¹³ Entéro mbaʼe Jesús omboʼéva ideprovechoiterei ñandéve. Haʼe oasegura voi vaʼekue idisipulokuérape umi iñenseñánsa ombopiroʼytaha chupekuéra. Haʼe heʼi: “Katuete pombopiroʼýta. Che júgo napendeforsamoʼãi ha che kárga ivevýi” (Mat. 11:28-30). Ñanepytyvõiterei ningo Ñandejára Ñeʼẽ, por ehémplo umi 4 lívro oñeʼẽva Jesús rembiasakue rehe ha haʼe opredikárõ guare. Añetehápe, opa mbaʼe oĩva la Bíbliape ñanembopiroʼy, omombarete ñande jerovia ha ñanemoarandu (Sal. 19:7; 23:3). Jesús heʼi voi: “Ovyʼa guei umi ohendúva Ñandejára Ñeʼẽ ha ojapóva” (Luc. 11:28).

14, 15. a) Jahechaháicha Juan 12:27, 28-pe, ¿mbaʼe okasiónpepa Jehová oñeʼẽ kuri 3 veseha? b) ¿Mbaʼérepa ikatu jaʼe Jehová heʼíva okonsola ha omombareténe hague Jesúspe?

¹⁴ (Elee Juan 12:27, 28). Lívro de Juan ohechauka mbaʼe okasiónpepa Jehová oñeʼẽ  3 veseha yvága guive. Unos kuánto día Jesús omano mboyve, haʼe oho Jerusalénpe ogueromanduʼa hag̃ua última ves pe Páskua. Upérõ Jesús heʼi kuri: “Che álma ruguaite guive ajepyʼapy”. Upéi oñemboʼe Itúape ha heʼi: “Che Ru, embotuicha nde réra”. Upévo, Itúa oñeʼẽ yvága guive ha heʼi: “Ambotuicháma ha ambotuicha jeýta”.

¹⁵ Jesús ningo ojepyʼapyeterei vaʼekue pórke tuicha pe rresponsavilida orekóva osegi hag̃ua ifiél Jehovápe. Haʼe oikuaa porã heta osufritaha ha ojejuka vaietereitaha chupe (Mat. 26:38). Péro hiʼãiterei Jesúspe ombotuicha Itúa réra, upéva la iñimportantevéva kuri chupe g̃uarã. Upévare oipyʼapy chupe haʼe omano lája omongyʼárõ g̃uarã Itúa réra, koʼýte ojeʼérõ guare hese otakyha Ñandejárare. Jahechakuaa upéicharõ mbaʼeichaite pevépa ombopyʼaguapýne raʼe Jesúspe la Jehová heʼíva chupe. Haʼe ikatúma kuri oĩ segúro Jehová réra oñembotuichataha. Ñandejára heʼíva otrankilisáne raʼe Jesúspe ha omombareténe chupe oaguanta hag̃ua umi situasión ijetuʼuetéva ohasátava. Oiméne ningo Jesús añoite oikuaa la Itúa ontendekaséva kuri upérõ, upéicharõ jepe Jehová oheja Iñeʼẽme koʼã mbaʼe ikatu hag̃uáicha ideprovécho ñandéve (Juan 12:29, 30).

16. ¿Mbaʼérepa sapyʼánte ikatu jajepyʼapy oñemongyʼárõ g̃uarã Ñandejára réra?

¹⁶ Oiko haguéicha Jesús rehe, ñande avei ikatu jajepyʼapy oñemongyʼárõ g̃uarã Jehová réra. Ikatu voi ñande avei jahasa umi inhustísia, térã ñanemolestaiterei oñemosarambi  jave umi japu omombeʼúva umi persóna oñemoĩva ñane kóntrape. Péicha jave, jajepyʼapy pórke ñapensa umi mbaʼe ikatuha omongyʼa Jehová réra ha herakuã vai iñorganisasión. Jahasa jave koʼãichagua situasión, ñanetrankilisa la Jehová heʼi vaʼekue Jesúspe. Añetehápe ningo natekotevẽi jajepyʼapyeterei. Upéva rangue, jaikuaa porã ‘Ñandejára pyʼaguapy tuichavéva opa mbaʼe ikatúvagui ñantende, oñangarekotaha ñane korasõre ha umi mbaʼe ñapensávare, Cristo Jesús rupive’ (Filip. 4:6, 7). Jehová katuete ombotuicháta héra. Haʼe ojevaléta Irréinore omyatyrõ hag̃ua entéro mbaʼe vai Satanás ha imúndo ojapo vaʼekue operhudika hag̃ua isiervokuérape (Sal. 94:22, 23; Is. 65:17).

17. Jarekóramo enkuénta la heʼíva Isaías 30:21, ¿mbaʼéichapa Jehová oñeʼẽ ñandéve koʼág̃arupi?

¹⁷ Jehová koʼag̃aite peve oñeʼẽ ñandéve (elee Isaías 30:21). Péro jaikuaaháicha ndojapomoʼãi upéva yvága guive. Upéicharõ jepe, haʼe omeʼẽ ñandéve umi instruksión Iñeʼẽ la Biblia rupive. Jehová espíritu avei ogia ‘pe tembiguái jeroviaha ha iñarandúvape’ omeʼẽ hag̃ua isiervokuérape pe aliménto espirituál (Luc. 12:42). Por ehémplo, jarresivi hetaiterei puvlikasión imprésa ha ojehupíva Internétpe, avei jareko umi vidéo ha áudio iporãitéva.

18. ¿Mbaʼéichapa Jehová heʼíva omombarete ñande jerovia ha ñanembopyʼaguasu?

¹⁸ Aníkena ñanderesarái la Jehová heʼi vaʼekuégui Itaʼýra oĩrõ guare ko yvy ape ári. Umi mbaʼe heʼíva ha oĩva la Bíbliape ñanepytyvõ jahechakuaa hag̃ua haʼe ipuʼakaha opaite mbaʼére, ha upévare ikatutaha omyatyrõ entéro mbaʼe vai Satanás ha imúndo ojapo vaʼekue. Ñaneñeʼẽrendúkena Jehovápe, pórke péicha ikatúta ñaaguanta tahaʼe haʼéva provléma oñepresentáva ha umi mbaʼe ijetuʼúva ikatúva gueteri jahasa. La Biblia heʼi: “Tekotevẽ ningo peaguanta, ikatu hag̃uáicha perresivi Ñandejára opromete vaʼekue. Péro upe mboyve pejapo vaʼerã Ñandejára rembipota” (Heb. 10:36).