1, 2. (a) Nawẹ Jehovah dọhodopọ hẹ gbẹtọvi lẹ gbọn to hohowhenu? (b) Etẹwẹ mí na gbadopọnna to hosọ ehe mẹ?

JEHOVAH yiwanna nado nọ dọhodopọ hẹ mí. To hohowhenu, ewọ yí yẹwhegán lẹ, angẹli lẹ podọ Visunnu etọn Klisti Jesu zan nado dọ linlẹn etọn lẹ na mí. (Amọ. 3:7; Gal. 3:19; Osọ. 1:1) To egbehe, e nọ dọhodopọ hẹ mí gbọn Ohó etọn Biblu gblamẹ. E na mí Ohó etọn, na mí nido sọgan plọn linlẹn etọn lẹ bo mọnukunnujẹ aliho etọn lẹ mẹ.

² Whenue Jesu to aigba ji, Jehovah dọho sọn olọn mẹ to nujijọ atọ̀n whenu. Mì gbọ mí ni gbadopọnna nuhe Jehovah dọ, podọ nuhe mí sọgan plọn sọn hogbe etọn lẹ mẹ, gọna lehe mí sọgan mọaleyi sọn nuhe e dọ mẹ do.

3. To Malku 1:9-11 mẹ, etẹwẹ Jehovah dọ to whenue Jesu yí baptẹm, podọ nugbo titengbe tẹlẹ wẹ hogbe enẹlẹ nọgodona?

³ Malku 1:9-11 bẹ kandai nujijọ tintan he whenu Jehovah dọho sọn olọn mẹ te tọn hẹn. (Hia.) Ewọ dọmọ: “Hiẹ wẹ Visunnu ṣie, mẹyiwanna lọ; yẹn ko kẹalọyi we.” Lehe e dona ko yinuwado Jesu ji sisosiso do sọ nado sè ogbè Otọ́ etọn tọn dile e to owanyi po jidide etọn po dohia ẹ! Hogbe Jehovah tọn lẹ nọgodona nugbo titengbe atọ̀n delẹ gando Jesu go. Tintan, Jesu yin Visunnu etọn. Awetọ, Jehovah yiwanna Visunnu etọn. Podọ atọ̀ntọ, Jehovah ko kẹalọyi Visunnu etọn. Mì gbọ mí ni gbadopọnna nugbo enẹlẹ dopodopo po sọwhiwhe po.

4. Haṣinṣan yọyọ tẹ mẹ wẹ Jesu biọ hẹ Jiwheyẹwhe to whenue e yí baptẹm?

⁴ “Hiẹ wẹ Visunnu ṣie.” Po hogbe ehelẹ po, Jehovah dohia dọ Visunnu yiwanna emitọn Jesu bẹ haṣinṣan yọyọ de jẹeji  hẹ Emi. Jesu ko yin Visunnu Jiwheyẹwhe tọn sọn whenue gbọ́n e to olọn mẹ. Ṣigba, to baptẹm Jesu tọn whenu, ewọ yin yiyiamisisadode gbọn gbigbọ wiwe dali. To ojlẹ enẹ mẹ, Jiwheyẹwhe dohia dọ Jesu he yin Visunnu yiyiamisisadode Emitọn todin, tindo todido nado lẹkọwa olọn mẹ nado lẹzun Ahọlu dide Jiwheyẹwhe tọn podọ Yẹwhenọ Daho. (Luku 1:31-33; Heb. 1:8, 9; 2:17) Enẹwutu, to baptẹm Jesu tọn whenu, owhẹ̀ Otọ́ etọn tọn whẹ́n nado dọ dọ: “Hiẹ wẹ Visunnu ṣie.”—Luku 3:22.

5. Nawẹ mí sọgan hodo apajlẹ lehe Jehovah do owanyi po nukundagbe po hia do tọn gbọn?

⁵ “Hiẹ wẹ . . . mẹyiwanna lọ.” Apajlẹ lehe Jehovah do owanyi po nukundagbe po hia do tọn nọ flinnu mí nado nọ dín dotẹnmẹ hundote lẹ nado na tuli mẹdevo lẹ. (Joh. 5:20) Mí nọ yin whinwhàn nado yinukọn to whenue mẹvivẹ mítọn de do owanyi hia mí bo pà mí na nudagbe he mí wà. Mọdopolọ, mẹmẹsunnu po mẹmẹyọnnu mítọn he to agun lọ mẹ lẹ po gọna hagbẹ whẹndo tọn mítọn lẹ do nuhudo owanyi po tulinamẹ mítọn po tọn. To whenue mí pà mẹdevo lẹ, mí nọ hẹn yise yetọn lodo bo nọ gọalọna yé nado sẹ̀n Jehovah po nugbonọ-yinyin po. Na taun tọn, mẹjitọ lẹ dona nọ na tuli ovi yetọn lẹ. Whenue mẹjitọ lẹ pà ovi yetọn lẹ po ahundopo po bo do owanyi hia yé, yé nọ gọalọna ovi yetọn lẹ nado yinukọn.

6. Naegbọn mí sọgan tindo jidide to Jesu Klisti mẹ?

⁶ “Yẹn ko kẹalọyi we.” Hogbe ehelẹ dohia dọ Jehovah deji dọ Jesu na hẹn ojlo Otọ́ etọn tọn di po nugbonọ-yinyin po. To whenuena e yindọ Jehovah tindo jidide mọnkọ to Visunnu etọn mẹ, mílọsu sọgan deji mlẹnmlẹn dọ Jesu na hẹn opagbe Jehovah tọn lẹpo di nugbonugbo. (2 Kọl. 1:20) Eyin mí lẹnnupọndo apajlẹ Jesu tọn ji, mí nọ magbe  hugan gbede pọ́n nado plọnnu sọn ewọ dè, podọ nado hodo afọdòmẹ etọn lẹ. Mọdopolọ, Jehovah sọ dejido devizọnwatọ etọn lẹ go, dọ taidi pipli de, yé na zindonukọn nado to nuplọn sọn Visunnu emitọn dè.—1 Pita 2:21.

7. To Matiu 17:1-5 mẹ, nujijọ tẹ whenu wẹ Jehovah dọho sọn olọn mẹ te, podọ etẹwẹ e dọ?

⁷ Hia Matiu 17:1-5. Whla awetọ he Jehovah dọho sọn olọn mẹ wẹ whenue Jesu ‘diọwunmẹ.’ Jesu basi oylọna Pita, Jakọbu po Johanu po nado hodo e yì osó he yiaga taun de ji. Whenue yé jẹ dọ́n, yé mọ numimọ he hẹn awujimẹ de. Nukunmẹ Jesu tọn to sisẹ́ bọ avọ̀ etọn lẹ họ́n taidi hinhọ́n. Omẹ awe delẹ, he tindo awusọhia Mose po Elija po tọn jẹ hodọ hẹ Jesu ji gando okú po fọnsọnku etọn he ja po go. Dile etlẹ yindọ ‘amlọn dotukla’ apọsteli atọ̀n lọ lẹ, yé mọ numimọ jiawu ehe to whenue amlọn lọ ko họ́n na yé pete. (Luku 9:29-32) Enẹgodo, aslọ sisẹ́ mlanmlan de ṣinyọ́n yé ji, podọ yé sè ogbè de sọn aslọ lọ mẹ, yèdọ ogbè Jiwheyẹwhe tọn! Dile e yì do to baptẹm Jesu tọn whenu, Jehovah sọ dọho nado dohia dọ emi kẹalọyi Visunnu emitọn bosọ yiwanna ẹn, e dọmọ: “Ehe wẹ Visunnu ṣie, mẹyiwanna lọ, mẹhe yẹn ko kẹalọyi.” Ṣigba, to ojlẹ ehe uwọ mẹ, Jehovah yidogọ dọ, “Mì nọ dotoaina ẹn.”

8. Nuyiwadomẹji tẹwẹ numimọ lọ tindo do Jesu po devi lẹ po ji?

⁸ Numimọ lọ yin dohia kleun gigo po huhlọn he Jesu na wá tindo po tọn taidi Ahọlu Ahọluduta Jiwheyẹwhe tọn. Matin ayihaawe, ehe na tuli Klisti bo na ẹn huhlọn nado pehẹ yajiji po okú awufiẹsa tọn he e na wá pannukọn po. Numimọ lọ sọ hẹn yise devi lẹ tọn lodo, bosọ gọalọna yé nado wleawudaina whlepọn tenọgligo-hinhẹn tọn lẹ po azọ́n sinsinyẹn he to nukọnna yé lọ po. Nudi owhe 30 godo, apọsteli Pita dlẹnalọdo numimọ wunmẹdidiọ tọn lọ, bo gbọnmọ dali dohia dọ emi gbẹ́ to numimọ enẹ flin.—2 Pita 1:16-18.

9. Ayinamẹ yọ́n-na-yizan tẹwẹ Jesu na devi etọn lẹ?

⁹ “Mì nọ dotoaina ẹn.” Jehovah hẹn ẹn họnwun dọ ojlo emitọn wẹ yindọ mí ni nọ dotoaina nuhe Visunnu emitọn dọ lẹ bo nọ zìn gbọn yé ji. Etẹwẹ Jesu dọ to whenue e to aigba ji? E dọ nususu he e jẹ dọ mí ni dotoaina! Di apajlẹ, e yí owanyi do plọn hodotọ etọn lẹ lehe yé na lá wẹndagbe lọ do, bosọ flinnu yé pludopludo nado nọ gbọṣi nukle. (Mat. 24:42; 28:19, 20) E sọ dotuhomẹna yé nado nọ vánkan vẹkuvẹku bosọ na tuli yé ma nado gbọjọ. (Luku 13:24) E sọ zinnudeji na hodotọ etọn lẹ dọ yé dona nọ yiwanna ode awetọ, hẹn pọninọ go, bo nọ yìn gbedide etọn lẹ. (Joh. 15:10, 12, 13) Lehe ayinamẹ he Jesu na devi etọn lẹ yọ́n-na-yizan do sọ! Ayinamẹ enẹ he Jesu na to whenẹnu gbẹ́ yọ́n-na-yizan to egbehe ga.

10, 11. Nawẹ mí sọgan dohia dọ mí nọ dotoaina Jesu gbọn?

¹⁰ Jesu dọmọ: “Mẹdepope he to adà nugbo lọ tọn mẹ nọ dotoaina ogbè ṣie.” (Joh. 18:37) Mí nọ dohia dọ mí nọ dotoaina ogbè etọn eyin mí “nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii.” (Kol. 3:13; Luku 17:3, 4) Humọ, mí nọ dohia dọ mí to tonusena ogbè etọn gbọn wẹndagbe lọ lilá po zohunhun po “to ojlẹ he bọawu mẹ podọ to ojlẹ awusinyẹn tọn mẹ” dali.—2 Tim. 4:2.

¹¹ Jesu dọmọ: “Lẹngbọ ṣie lẹ nọ dotoaina ogbè ṣie.” (Joh. 10:27) Hodotọ Klisti tọn lẹ nọ dohia dọ yé to tonusena Jesu, e ma yin gbọn ayipipa nuhe e dọ lẹ go kẹdẹ dali gba, amọ́ gbọn nuyiwa sọgbe hẹ yé dali ga. “Magbọjẹ gbẹ̀mẹ tọn lẹ” ma nọ fẹayihasẹna yé. (Luku 21:34) Kakatimọ, yé nọ ylọ tonusisena gbedide Jesu tọn lẹ dọ nujọnu hugan to  gbẹzan yetọn mẹ, etlẹ yin to whenue yé pannukọn ninọmẹ sinsinyẹn lẹ. Susu mẹmẹsunnu mítọn lẹ tọn wẹ to akọndona whlepọn sinsinyẹn lẹ, ehe bẹ mẹgbeyinyan nukundiọsọmẹtọ lẹ tọn, ohẹ́n klókló po nugbajẹmẹji jọwamọ tọn lẹ po hẹn. To ninọmẹ ehe lẹpo mẹ, yé gbẹ́ hẹn nugbonọ-yinyin yetọn na Jehovah go, mahopọnna nudepope he e biọ to yé si. Jesu hẹn omẹ mọnkọ lẹ deji dọmọ: “Mẹdepope he mọ gbedide ṣie lẹ yí bo nọ yìn yé wẹ mẹhe yiwanna mi. To alọ devo mẹ, mẹdepope he yiwanna mi, Otọ́ ṣie na yiwanna ẹn.”—Joh. 14:21.

12. Aliho devo tẹ mẹ wẹ mí sọgan dohia te dọ mí nọ dotoaina Jesu?

¹² Aliho devo he mẹ mí sọgan dohia te dọ mí nọ dotoaina Jesu wẹ: gbọn gbekinkọndopọ hẹ mẹhe ewọ de nado nọ deanananu to ṣẹnṣẹn mítọn lẹ dali. (Heb. 13:7, 17) Titobasinanu Jiwheyẹwhe tọn ko basi vọjlado susu to owhe agọe tọn lẹ mẹ, ehe bẹ azọ́nwanu gọna aliho yọyọ lẹ yiyizan to lizọnyizọn mítọn mẹ, aliho he mẹ opli osẹ ṣẹnṣẹn tọn mítọn nọ yin bibasi te, gọna aliho he mẹ Plitẹnhọ Ahọluduta tọn mítọn lẹ nọ yin gbigbá, nọ yin vivọjlado bosọ nọ yin nukunpedego te hẹn. Lehe mí nọ yọ́n pinpẹn anademẹ owanyinọ podọ lẹnpọn dagbe tọn enẹlẹ tọn do sọ! Mí sọgan kudeji dọ Jehovah na dona vivẹnu he do mí te nado hodo anademẹ titobasinanu lọ tọn he wá do gànmẹ lẹ.

13. Ale tẹlẹ wẹ todidoai na Jesu nọ hẹnwa?

¹³ Mí nọ mọaleyi sọn todidoai na nuhe Jesu plọnmẹ lẹpo mẹ. Jesu na jide devi etọn lẹ dọ nuplọnmẹ emitọn lẹ na fakọna yé. E dọmọ: “Mìwlẹ nasọ mọ kọfanamẹ na mìde. Na zẹgẹ ṣie bọawu bọ agbàn ṣie sọ fua.” (Mat. 11:28-30) Ohó Jiwheyẹwhe tọn he bẹ kandai Owe Wẹndagbe tọn ẹnẹ he gando gbẹzan po lizọnyizọn Jesu tọn po go lẹ hẹn, nọ miọnhomẹna mí, nọ vọ́ huhlọnna mí to gbigbọ-liho bosọ nọ hẹn mí zun nuyọnẹntọ. (Salm. 19:7; 23:3) Jesu dọmọ: “Ayajẹnọ wẹ mẹhe to ohó Jiwheyẹwhe tọn sè bo to yíyí i hẹn lẹ!”—Luku 11:28.

14, 15. (a) Sọgbe hẹ Johanu 12:27, 28, etẹwẹ yin nujijọ atọ̀ntọ he whenu Jehovah dọho sọn olọn mẹ te? (b) Naegbọn hogbe Jehovah tọn lẹ na ko miọnhomẹna Jesu bo hẹn ẹn lodo?

¹⁴ Hia Johanu 12:27, 28. Wẹndagbe Johanu tọn wẹ bẹ kandai nujijọ atọ̀ntọ he whenu Jehovah dọho sọn olọn mẹ te tọn hẹn. Azán vude jẹnukọnna okú Jesu tọn, ewọ yì Jelusalẹm nado basi hùnwhẹ Juwayi tọn godo  tọn etọn. E dọmọ: “N’yin tuklado.” Enẹgodo, e hodẹ̀ dọmọ: “Otọ́, pagigona oyín towe.” Podọ, Otọ́ etọn gblọn sọn olọn mẹ dọmọ: “Yẹn ko pagigona ẹn bo nasọ vọ́ pagigona ẹn.”

¹⁵ Jesu yin tuklado, na azọngban daho he e tindo nado to nugbonọ yin na Jehovah zọnmii wutu. E họnwun na Jesu dọ to madẹnmẹ ewọ na yin yasana sinsinyẹn bo yin hùhù to aliho kanyinylan tọn mẹ. (Mat. 26:38) Amọ́, hú popolẹpo, ojlo Jesu tọn wẹ nado pagigona oyín Otọ́ etọn tọn. Yè sawhẹdokọna Jesu dọ ewọ zánnu, podọ e to nuhà dọ okú emitọn na hẹn vlẹko wá Jiwheyẹwhe ji. Lehe hogbe Jehovah tọn lẹ dona ko vọ́ jide na Jesu do sọ! E sọgan kudeji dọ oyín Jehovah tọn na yin gigopana. Nuhe Otọ́ etọn dọ lẹ dona ko miọnhomẹna ẹn taun bo na ẹn huhlọn nado pehẹ nuhe to tepọn ẹn. Dile etlẹ yindọ to mẹhe to finẹ to ojlẹ lọ mẹ lẹpo mẹ, Jesu kẹdẹ wẹ sọgan ko mọnukunnujẹ nuhe dọ Otọ́ etọn te mẹ, Jehovah hẹn ẹn diun dọ nuhe Emi dọ lẹ yin kinkandai na mímẹpo.—Joh. 12:29, 30.

16. Naegbọn mí sọgan nọ hanú to whedelẹnu gando vlẹko he yin hinhẹnwa oyín Jiwheyẹwhe tọn ji go?

¹⁶ Taidi Jesu, mílọsu sọgan nọ hanú gando vlẹko he yin hinhẹnwa oyín Jehovah tọn ji go. Vlavo mí nọ yin nuyiwa hẹ to aliho agọ̀ mẹ dile e yin do na Jesu. Kavi linlin lalo he nukundiọsọmẹtọ lẹ nọ hẹn gbayipe gando mí go lẹ sọgan nọ dotukla mí. Mí sọgan nọ lẹnnupọndo vlẹko he linlin enẹlẹ nọ hẹnwa oyín  Jehovah tọn po titobasinanu etọn po ji. To ninọmẹ mọnkọ lẹ mẹ, nuhe Jehovah dọna Jesu lẹ nọ miọnhomẹna mí taun. Mí ma dona nọ hanú zẹjlẹgo. Mí sọgan kudeji dọ “jijọho Jiwheyẹwhe tọn he yiaga hugan nukunnumọjẹnumẹ lẹpo nasọ họ́ ahun [mítọn] po nugopipe apọ̀nmẹ tọn [mítọn] po gbọn Klisti Jesu gblamẹ.” (Flp. 4:6, 7) Jehovah ma na gọ̀n gigo ma pà na oyín etọn gbede. Gbọn Ahọluduta lọ gblamẹ, ewọ na vọ́ nudepope he Satani po aihọn etọn po ko hẹngble na devizọnwatọ nugbonọ Etọn lẹ jlado.—Salm. 94:22, 23; Isa. 65:17.

17. Sọgbe hẹ Isaia 30:21, nawẹ Jehovah nọ dọhona mí gbọn to egbehe?

¹⁷ Jehovah gbẹ́ nọ dọhona mí to egbehe. (Hia Isaia 30:21.) Na nugbo tọn, mí ma nọ sè ogbè Jiwheyẹwhe tọn tlọlọ sọn olọn mẹ. Ṣigba, e ko na mí Ohó etọn Biblu, ehe mẹ e wleawu anademẹ lẹ tọn na mí do. Humọ, gbigbọ Jehovah tọn nọ deanana “họ̀nkọnsi nugbonọ” lọ nado to núdùdù na devizọnwatọ Etọn lẹ. (Luku 12:42) Lehe núdùdù gbigbọmẹ tọn he mí nọ mọyi lẹ sù taun do sọ, ehe bẹ owe lẹ po zinjẹgbonu Intẹnẹt ji tọn lẹ po, video lẹ gọna hoyidokanji lẹ hẹn!

18. Nawẹ nuhe Jehovah dọ lẹ hẹn yise towe lodo bo na we adọgbigbo gbọn?

¹⁸ Mì gbọ mí ni nọ hẹn nuhe Jehovah dọna Visunnu etọn whenue ewọ to aigba ji lẹ do ayiha mẹ. Mì gbọ hogbe Jiwheyẹwhe lọsu titi tọn he yin kinkando Biblu mẹ lẹ ni hẹn mí deji dọ Jehovah to anadena nulẹpo, podọ ewọ na vọ́ nuhe Satani po aihọn ylankan etọn po ko hẹngblena mí lẹpo jlado. Podọ, mí ni magbe nado nọ dotoaina ogbè Jehovah tọn po sọwhiwhe po. Eyin mí wàmọ, mí na penugo nado doakọnna nuhahun depope he mí to pipehẹ todin po dehe mí na pehẹ to nukọn mẹ lẹ po. Biblu flinnu mí dọ: “Mì tindo nuhudo akọndonanu tọn nado sọgan mọ hẹndi opagbe lọ tọn yí to whenue mì ko wà ojlo Jiwheyẹwhe tọn godo.”—Heb. 10:36.