1-2. (a) Jehova aa hungire vi ku novandu? (b) Matu kahungirira ku tjike morupa ndwi?

JEHOVA wa suvera okuhungira kuna eṱe. Morukapitaveze, eye aa ungurisa ovaprofete, ovaengeli, nOmuna we, Jesus Kristus, okututjivisa omeripura we. (Amos 3:7; Gal. 3:19; Omavan. 1:1) Ndino, Jehova u hungira kuna eṱe okupitira mEmbo re Ombeibela. Eye we tu pa Embo re kokutja tu rihonge omeripura we nokutjiwa ozondjira ze.

² Jesus tja ri kombanda yehi, Jehova wina wa hungira kuna ye okuza keyuru povikando 3 pekepeke. Ngatu katare kutja ovikeṋa Jehova mbya hungira, nokutja matu rihongere kotjike komambo we, nu matu munu vi ouwa momambo we ngo.

3. Otja tjitwa lese mu Markus 1:9-11, ovikeṋa Jehova mbya hungira indu Jesus tja papitisiwa, nu omambo we ngo ya raisa ovikwaye ovinanḓengu?

³ Markus 1:9-11 ri raisa otjikando otjitenga Jehova tja hungira okuza keyuru. (Lesa.) Indu tja tja: “Ove oOve Omuna wandje omusuverwa. Ami mbi nonyuṋe mOve.” Jesus wa ṱunwa tjinene okuzuva Ihe ame mu raere kutja we mu suvera nu u nongamburiro mu ye! Omambo wa Jehova ngo ya raisa ouatjiri 3 ounanḓengu ohunga na Jesus. Otjitenga, Jesus Omuna we. Otjitjavari, Jehova wa suvera Omuna we. Otjitatatu, Jehova u nonyuṋe mOmuna we. Indjo tu tare koviṋa mbi oukoto.

4. Oupanga uṋe oupe Jesus mbwa tjita kuna Mukuru pombapitisimo ye?

⁴ “Ove oOve Omuna wandje.” Nomambo nga Jehova wa raisa kutja Omuna we omusuverwa Jesus, wa kara noupanga oupe kuna Ye. Indu Jesus tja ri meyuru, eye wa ri otjiutwa tja  Mukuru tjombepo. Posi yokutja, pombapitsimo ye, eye wa twirisiwa nombepo ondjapuke. Kunao Mukuru wa raisa kutja Jesus ngu ri Omuna we omutwirisiwa, nambano u nomaundjiro wokuyaruka keyuru okukazikwa otjOmbara nOmupristeri Otjiuru. (Luk. 1:31-33; Hebr. 1:8, 9; 2:17) Kunao pombapitisimo ya Jesus, Ihe wa ri nepu esemba rokuhungira omambo nga: “OOve Omuna wandje.”​—Luk. 3:22.

5. Eṱe matu horere vi kotjihorera tja Jehova tjomuano ma raisa orusuvero nomayanḓiparisiro?

⁵ “Ove oOve . . . omusuverwa.” Omuano Jehova ma raisa orusuvero nokuyanḓiparisa Omuna we, u tu zemburukisa kutja matu sokupaha oruveze rokuyanḓiparisa varwe. (Joh. 5:20) Tu kara nondjoroka indu omundu ngu twa suvera tji me tu raisire orusuvero nokututanga koviṋa oviwa mbi twa tjiti. Momuano otjingewo, ovakambure ovakwetu mombongo na imba veṱunḓu retu ve hepa orusuvero nomayanḓiparisiro wetu. Indu tji matu tanga varwe, tu yanḓiparisa ongamburiro yawo nokuvevatera kutja ve karere Jehova nouṱakame. Tjinenenene ovanene ve hepa okuyanḓiparisa ovanatje vawo. Indu ovanene tji mave tanga ovanatje vawo okuza komutima tjiri nokuveraisira orusuvero, owo ve vatera ovanatje vawo okukura mongamburiro.

6. Ongwaye tji tu nongamburiro mu Jesus Kristus?

⁶ “Ami mbi nonyuṋe mOve.” Omambo nga ye raisa kutja Jehova wa ri nongamburiro kutja Jesus ma yenenisa ombango ya Ihe nouṱakame. Mena rokutja Jehova u nongamburiro yomasa mOmuna we, momuano tjingewo eṱe tu sokukara nongamburiro okuura kutja Jesus ma yenenisa omakwizikiro aehe wa Jehova nouṱakame. (2 Kor. 1:20) Indu tji twe ripurire kotjihorera tja Jesus, onḓero yetu yokuvanga okurihongera ku  ye nokuyata mozondambo ze mai kurire ko. Tjimuna Jehova tja ri nongamburiro mu Jesus, eye wina u nongamburiro yokutja ovakarere ve mave kayenda komurungu okurihongera kOmuna we.​—1 Petr. 2:21.

7. Otja ku Mateus 17:1-5, oruṋe Jehova tja hungira okuza keyuru, nu wa tja tjike?

⁷ Lesa Mateus 17:1-5. Otjikando otjitjavari Jehova tja hungira okuza keyuru eendu Jesus tja ‘tjituka.’ Jesus wa ṋanga Petrus, Jakobus na Johanes okuyenda puna ye okukaronda ondundu onde. Ngunda ve ri mbo, owo va muna otjirimunikise otjihimise. Omurungu wa Jesus aau keṋakeṋa nu ozombanda ze za rira ozombapa twee. Motjirimunikise hi mwa ri ovarumendu 2 mbaave kuramene po ooMoses na Elia, nu va uta okuhungira kuna Jesus ohunga nonḓiro nombendukiro ye. Nandarire kutja ovaapostele 3 mba “va rarere ozomboṱu ozonḓeu,” owo va muna otjihimise hi indu tji va penduka. (Luk. 9:29-32) Okuzambo, otjikamba otjiyere arire tji tje ve pe omuzire, nu ave zuu eraka ra Mukuru okuza motjikamba! Tjimuna Jehova tja tjita pombapitisimo ya Jesus, eye wina wa yanḓiparisa Omuna we nokumuraisira orusuvero rwe, na tja: “Ingwi Eye Omuna wandje omusuverwa Ami mu mbi nonyuṋe.” Posi yokutja otjikando hi Jehova wa weza na tja: “Purateneye ku Ye!”

8. Otjirimunikise hi tja ṱuna vi ku Jesus novahongewa ve?

⁸ Otjirimunikise hi tja raisa ondjozikiro nomasa wa Jesus otjOmbara yOuhona wa Mukuru yomoruyaveze. Otjingaperi, kutja Kristus wa yanḓiparisiwa nokupewa omasa komauzeu nonḓiro ohihamise ndji ma sokukatuurunga. Otjirimunikise hi wina tje kurisa ongamburiro yovahongewa ve. Ihi tje ve vatera okurirongerisira omarorero ngu mave kamuna noviungura ovizeu mbyaave sokutjita. Ozombura ape 30 kombunda yanao, omuapostele Petrus wa hungirira kotjirimunikise hi, nu otjiṋa hi tja raisa kutja ngundee ee tji zemburuka nawa.​—2 Petr. 1:16-18.

9. Omaronga yeṋe Jesus nga yandja kovahongewa ve?

⁹ “Purateneye ku Ye!” Jehova wa raisa oukahu kutja u vanga kutja tu puratene komambo wOmuna we nokuyeṱakamisa. Jesus wa tja tjike indu tja ri kombanda yehi? Eye wa hungira oviṋa ovingi ovinanḓengu mbi matu sokupuratena ko! Otjotjihorera, norusuvero eye wa honga ovemukongorere omuano wokuzuvarisa ombuze ombwa, nu povikando ovingi we ve rakiza okukara katumba. (Mat. 24:42; 28:19, 20) Eye wina we ve rakiza kutja ve kondje nomasa, nu we ve yanḓiparisa kutja ave he ri hahiza. (Luk. 13:24) Jesus wa ṋunisa kutja ovemukongorere mave sokusuverasana, okukara mombwaneno, nokuṱakamisa omatwako we. (Joh. 15:10, 12, 13) Omaronga Jesus nga yandja kovahongewa ve aave yenene okuungurisa! Omaronga wa Jesus ngo omanaḓengu ndino wina.

10-11. Matu raisa vi kutja tu puratena ku Jesus?

¹⁰ Jesus wa tja: “Auhe ngwa za mouatjiri [poo ngu ri munda wouatjiri, NW] ma puratene komambo wandje.” (Joh. 18:37) Eṱe tu raisa kutja matu puratene keraka re indu tji matu ‘tjindasana nokuisirasana.’ (Kol. 3:13; Luk. 17:3, 4) Omuano warwe mu tu raisa kutja tu puratena keraka re omokuzuvarisa ombuze ombwa noupyuke nandarire “kutja oruveze ndu ri rwo poo ndu he ri rwo.”​—2 Tim. 4:2.

¹¹ Jesus wa tja: “Ozonḓu zandje ze puratena keraka randje.” (Joh. 10:27) Ovahongewa va Kristus kave raisa momambo uriri kutja ve puratena keraka ra Jesus nungwari ve raisa movitjitwa vyawo wina. Owo kave pukisiwa i ‘ozongendo zouye mbwi.’ (Luk. 21:34) Posi  yokutja, owo ve vara okupuratena komarakiza wa Jesus otjotjiṋa otjinanḓengu tjinene mehupo rawo, nandarire tje ri ouzeu okutjita nao. Ovakambure ovakwetu ovengi ve muna omauzeu omengi, nge kamburira mo okuwirwa i ovapirukire, ousyona noviwonga. Momauzeu aehe nga, owo ve panḓera pouṱakame wawo ku Jehova, kainatja kutja mave munu omauzeu nge ṱa pi. Jesus we ve pa omakwizikiro nga: “Ingwi ngu ma yakura omatwako wandje ne ye ṱakamisa, eye we Ndji suvera. Tate ma suvere ngamwa auhe ngwe Ndji suvera.”​—Joh. 14:21.

12. Omomuano uṋe warwe mu matu raisa kutja tu puratena ku Jesus?

¹² Omuano warwe mu matu raisa kutja tu puratena ku Jesus, omokuungura kumwe kuna imba eye mba zika okutuhongorera po. (Hebr. 13:7, 17) Ozombura nḓa kapita otjira tja Jehova tja tjita omarundurukiro omengi, ngu maye kamburire mo oviungurisiwa ovipe nomiano vyarwe vyokuzuvarisa, omuano omupe mu tu kayendisa ozombongarero zomokati kotjivike, nomuano mu tu tunga, okutungurura, nokuṱuna Omatuwo wetu wOmerikotameneno. Tjiri eṱe tu nondangi komirari vyorusuvero mbi! Matu tjiwa nawa kutja tji twa kongorere omirari vyotjira tja Jehova, Eye ma sere ozongondjero zetu nḓo ondaya.

13. Tu muna ouwa waye tji matu puratene ku Jesus?

¹³ Eṱe tu muna ouwa okupuratena koviṋa avihe Jesus mbya honga. Jesus wa kwizikira ovahongewa ve kutja omahongero we maye ve pe orusuvo. Eye wa tja: ‘Eṋe mamu mwine omiinyo vyeṋu orusuvo. Orondu omutenge wandje otjiṋa uriri otjitutu nomutwaro wandje omupupu.’ (Mat. 11:28-30) Embo ra Mukuru, ndi kamburira mo Omaevangeli 4 ohunga nehupo ra Jesus notjiungura tje tjokuzuvarisa, ye tu pa orusuvo nu ye kurisa ongamburiro yetu nokutupa ounongo. (Eps. 19:7; 23:3) Jesus wa tja: “Ovaṋingandu komeho imba mbe zuva embo ra Ndjambi nave ṱakamisa ro!”​—Luk. 11:28.

14-15. (a) Otjitjitwa tjiṋe otjitjatatu tji tja tjangwa mu Johanes 12:27, 28, indu Jehova tja hungira okuza keyuru? (b) Ongwaye omambo wa Jehova tji mape ya ya huhumiṋa nokuyandja omasa ku Jesus?

¹⁴ Lesa Johanes 12:27, 28. Evangeli ra Johanes ri raisa otjikando otjitjatatu Jehova tja hungira okuza keyuru. Omayuva omaṱiṱi komurungu wonḓiro ye, Jesus wa ya koJerusalem okukazemburuka oPaska ye osenina. Eye  wa tja: “Omutima wandje wa kurunga.” Okuzambo wa kumba na tja: “Tate, yandja ondjozikiro kena roye!” Ihe wa zira okuza keyuru na tja: “Ami mba yandja ondjozikiro kena randje, nu me ri pe ondjozikiro rukwao.”

¹⁵ Jesus wa kurungire momuinyo mena rokutja aa sokurira omuṱakame ku Jehova. Jesus aa tjiwa kutja ma kamuna ondatumisire onene nokutja ma kaṱa onḓiro ombi. (Mat. 26:38) Kombanda yoviṋa avihe mbi, otjiṋa otjinanḓengu tjinene ku Jesus ya ri okuyandja ondjozikiro kena ra Ihe. Jesus wa kumininwa kutja wa yamburura Mukuru, nu eye ee rikende kutja onḓiro ye mai eta ondjambu ku Mukuru. Tjiri omambo wa Jehova ngo ya yanḓiparisa Jesus tjinene! Eye mape ya wa ri nongamburiro yokutja ena ra Jehova ma ri pewa ondjozikiro. Omambo wa Ihe ngo ya huhumiṋa Jesus tjinene, nokumupa omasa wokutuurunga omauzeu ngu ma yeya ku ye. Nandarire kutja Jesus ongwa ri erike ngwa zuva omaheero womambo wa Ihe ngo, Jehova wa tjita kutja omambo ngo ye tjangwe mEmbo re mena retu.​—Joh. 12:29, 30.

16. Ongwaye povikando tjiva tji mape ya atu rikende ohunga nondjambu ndja etwa kena ra Mukuru?

¹⁶ Tjimuna Jesus, eṱe mape ya atu rikende ohunga nondjambu ndja etwa kena ra Jehova. Tjimuna Jesus eṱe mape ya tu tjindwa navi. Poo mape ya tu rikenda ohunga nomahungi woposyo ovetupirukire ngu ve hungira ohunga na eṱe. Mena romahungi woposyo  nga, eṱe mape ya atu utu okuripurira kondjambu ndji mai etwa kena ra Jehova na kotjira tje. Mozongaro otja inḓo, omambo wa Jehova nge ri mu Johanes 12:27, 28 ye tu huhumiṋa tjinene. Eṱe katu nokuhepa okurikenda tjinene ohunga noviṋa mbyo. Tu nongamburiro yokutja, ‘ohange ya Ndjambi ndja kapita ozondunge azehe zovandu mai ṱakamisa omitima vyetu nouripura wetu mu Kristus Jesus.’ (Fil. 4:6, 7) Jehova aruhe ma yandja ondjozikiro kena re. Okupitira mOuhona we, Eye ma ṱunu onyoneno aihe ndja etwa i Satan noviṋa ouye mbwi mbwa eta kovakarere Ve ovaṱakame.​—Eps. 94:22, 23; Jes. 65:17.

17. Otja kembo ra Jesaja 30:21, Jehova u hungira vi kuna eṱe ndino?

¹⁷ Jehova ngamba u hungira kuna eṱe ndino. (Lesa Jesaja 30:21.) Ouatjiri kutja eṱe katu zuu eraka ra Mukuru ama hungire okuza keyuru. Posi yokutja Eye we tupa Embo re, Ombeibela, me tupa omirari. Kombanda yanao, ombepo ya Jehova i hinga “omukarere omuṱakame” okukayenda komurungu okuyandja ovikurya kovakarere Ve. (Luk. 12:42) Tjiri pe noviṋa ovingi mbya prindwa noviṋa mbi ri morungovi, na wina ouvidio ouingi novipuratenwa, oviṋa avihe mbi vi tu vatera okukara nongamburiro yomasa!

18. Omambo wa Jehova ye kurisa vi ongamburiro yoye, nu ye kupa vi ouvanḓe?

¹⁸ Aruhe ngatu zemburuke omambo wa Jehova nga hungira indu Omuna we tja ri kombanda yehi! Omambo wa Mukuru nge ri mOmbeibela, nga ye tu pe ongamburiro yokutja oviṋa avihe vi ri kehi Ye, nu ma ṱunu onyoneno aihe ndja etwa i Satan nouye we ourunde mbwi. Eṱe ngatu rimanene okupuratena keraka ra Jehova nouṱakame. Tji twa tjiti nao, matu yenene okutuurunga omauzeu ngamwa aehe ngu tu muna nai, na yarwe ngu maye ya. Ombeibla i tu zemburukisa kutja: “Eṋe mamu sokukara nomuretima, kokutja mu tjite ombango ya Ndjambi, nu mu pewe imbi Eye mbye kwizika.”​—Hebr. 10:36.