1-2. (a) Kunnasi nga makikomunika si Jehova ta totolay? (b) Anni i ammuattam taw nga artikulo?

KAKAYÀ ni Jehova nga makikomunika nittam. Ta nappasa, inusana i profetana, angheles, anna i Anana nga si Cristo Jesus tapenu mammuattam i appana-panonona. (Amos 3:7; Gal. 3:19; Nep. 1:1) Ta maddaggun, makikomunika yayya nittam gukaban na Uvovugna, i Biblia. Niyawana yatun nittam tapenu magigiammu tam i appanonona anna matindiattam i pangngua na ta ganna-gannug.

² Tagga ta egga ta davvun si Jesus, naguvovug gapa si Jehova maggafu ta langi ta namittallu nga situasion. Ammuattam nu anni i kinagi ni Jehova, nu anni i magigiammu tam ta kinagina ira, anna nu kunnasi ittam mabbenefisio ta kinagina.

3. Segun ta Marcos 1:9-11, anni i kinagi ni Jehova tagga ta nabawtisowan si Jesus, anna anni ira nga kinakurug i kinumfirma na kinagina ira?

³ Mabibbig ta Marcos 1:9-11 i ollu nga situasion nga naguvovug si Jehova maggafu ta langi. (Bibbigan.) Kunna: “Sikaw i iddeddukak-ku nga Ana ku nga kuruga makapagayaya niakan.” Talaga natukkal i futu ni Jesus turi ta naginnana i ngaral na Yamana nga mangikagi tu aya anna pamasiguraduna nisa! Kinumfirma na kinagi ira ni Jehova i tallu nga importante nga kinakurug meyannung kani Jesus. Ollu, si Jesus ay Anana. Mekadua, ayatan ni Jehova i Anana. Anna mekatallu, makapagayayya kani Jehova i Anana. Innattam tu mapia i kada tadday tatun.

4. Anni i napabagu nga relasion ni Jesus ta Dios ta kabawtisona?

⁴ ‘Sikaw i Ana ku.’ Taw nga kinagi ni Jehova, nipasinganna nga napeggan i iddedduna nga Ana nga si Jesus tu napabagu nga relasion Nisa. Tagga ta egga si Jesus ta langi, tadday yayya  nga espiritu nga ana na Dios. Ngem ta kabawtisona, nazelugan yayya gukaban na masanto nga espiritu. Tatun nga tiempo, nipasingan na Dios nga si Jesus bilang i nazelugan nga Anana ay egga ngana i iddanamana nga manoli ta langi anna mabbalin tu i pinili na Dios nga Patul anna Atannang nga Pari. (Luc. 1:31-33; Heb. 1:8, 9; 2:17) Yayya nga manawag nga ta kabawtiso ni Jesus, kinagi na Yamana: ‘Sikaw i Ana ku.’​—Luc. 3:22.

5. Kunnasi tam maparigan i ehemplo ni Jehova ta pangikagi tu aya anna pangappresia?

⁵ “Sikaw i iddeddukak-ku.” Iperaddam nittam na ehemplo ni Jehova ta pangikagi tu aya anna pangappresia nga mawag tu alegattam i tiansa ira nga pasikannan i tanakuan. (Juan 5:20) Mapprogreso ittam nu i tolay nga iddeddukattam ay ipasinganna i ayana nittam anna komendanna ittam ta makasta nga nakua tam. Kunnari gapa, mawag na wawwaragi ta kongregasion anna na kafamilia tam i aya anna pamagaram tam. Nu komendattam i tanakuan, mapatuyag tam i pangurugda anna moffunattam ira nga sigga-matalo nga masserbi kani Jehova. Mas kawagan na ána i pamagaram na mappaganada. Nu sinsero nga komendan anna iddukan na magana ira i ánada, moffunadda ira nga mapprogreso.

6. Ngatta makapakkomfiansa ittam kani Jesu-Cristo?

⁶ ‘Makapagayayya ka niakan.’ Ipasingan danaw nga uvovug nga makkomfiansa si Jehova nga sigga-makatalo nga metuppal ni Jesus i uray na Yamana. Gafu ta kunnatun kadakal i komfiansa ni Jehova ta Anana, buu gapa i komfiansa tam nga ituppal ni Jesus i ngamin nga promesa ni Jehova. (2 Cor. 1:20) Nu nononopattam i ehemplo ni Jesus, mas determinadu ittam nga parigan yayya anna tuttulan i dakkuana ira. Nu kunnasi nga makkomfiansa si Jehova kani Jesus, makkomfiansa gapa yayya nga itulu-tuloy na aripanna ira nga parigadda i Anana.​—1 Ped. 2:21.

7. Segun ta Mateo 17:1-5, ta anni nga situasion nga naginna i ngaral ni Jehova maggafu ta langi, anna anni i kinagina?

⁷ Bibbigan i Mateo 17:1-5. I mekadua nga tiempo nga naginna i ngaral ni Jehova maggafu ta langi ay turi ta ‘nanguli i kasissinnan’ ni Jesus. Nivulu ni Jesus da Pedro anni Santiago tuange kani Juan ta atannang nga vukig. Ta keggada tari, nakasingan ira tu kappabbaw nga sirmata. Nannawag i muka ni Jesus anna makatulang i sinnunna. Egga i gittana dua nga lalaki nga mangirepresenta kada Moises anni Elias nga namegafu nga makiyuvovug kani Jesus meyannung ta mappange nga kapatay anna kapaginnolena. Maski nu “mapia i katurug” na tallu nga apostol, nasingadda i kappabbaw nga sirmata turi ta nalukag ira. (Luc. 9:29-32) Tumunug, niliruman ira na manawag nga kunam, tapus nakaginna ira tu ngaral ta kunam​—ngaral na Dios! Gitta na kingngua ni Jehova turi ta kabawtiso ni Jesus, nekagina i pagayayya anna i ayana ta Anana: “Yaw i iddeddukak-ku nga Ana ku nga kuruga makapagayaya niakan.” Ngem taw nga situasion, niyammung ni Jehova: “Ginnan nu yaya!”

8. Anni i efekto na sirmata kani Jesus anna ta disipulosna?

⁸ Nipasingan na sirmata i mappange nga kedayaw anna i pakapangngua ni Jesus bilang Patul na Pappatulan na Dios. Siguradu nga napagaram anna napasikan si Cristo ta kaziga-riga anna mataka-taki nga kapatay nga mawag tu attammanna. Napatuyag gapa na sirmata i pangurug na disipulos. Nakoffun yaw tapenu meprepara ira ta kapurueba nga meparubang nira anna ta madammo nga trabahu nga kuadda. Kabalin na ma-30 dagun, tinukoy ni apostol Pedro i sirmata na panguli na kasissinnan ni Jesus, nga mangipasingan nga mananawag paga ta nonona yatun.​—2 Ped. 1:16-18.

9. Anni i makoffun nga nitabarang ni Jesus ta disipulosna?

⁹ “Ginnan nu yaya!” Manawag nga nipasingan ni Jehova nga kayàna nga magginna ittam ta uvovug ira na Anana anna tuttulan danatun. Anni i kinagi ni Jesus ta keggana ta davvun? Aru i kinaga-kagina nga talaga importante nga ginnan! Angngariganna, meddu nga sinudduanna i disipulosna nu kunnasi ilayyagayya i mapia nga dumug, anna namippiga nga niperaddamna nira nga mappara-paran ira. (Mat. 24:42; 28:19, 20) Pinagaramna ira nga kuadda i uray na Dios adde ta mawayyada, anna pinasikanna ira nga magattattam. (Luc. 13:24) Nipasigo ni Jesus ta disipulosna nga makka-aya-aya ira, mappakatadday, anna tuppalan i bili-bilinna. (Juan 15:10, 12, 13) Kuruga makoffun i tabarang ni Jesus ta disipulosna! Yatun nga tabarang ni Jesus tagga ay importante maski paga ta maddaggun.

10-11. Kunnasi tam mepasingan nga maggigginna ittam kani Jesus?

¹⁰ Kinagi ni Jesus: “I sinni laman nga makannammu [“pumanig,” NW] ta kurug ay magginna niakan.” (Juan 18:37) Mepasingattam nga maggigginna ittam ta ngaralna nu kanayun nga ‘makkapasa-pasensia anna makkapaka-pakoma’ ittam. (Col. 3:13; Luc. 17:3, 4) Mepasingattam paga nga maggigginna ittam ta ngaralna nu matalikarag nga ilayyagayya tam i mapia nga dumug maski ta “mapia onu ari mapia nga tiempo.”​—2 Tim. 4:2.

¹¹ Kinagi ni Jesus: “Ginnan na karnerù ira i ngaral ku.” (Juan 10:27) Mepasingan na disipulos ni Cristo nga maggigginna ira kani Jesus ari laman ta pagginna ta uvovugna, nu ari, gukaban na pangiyaplika tatun. Ari mawawan i fokusda megafu ta ‘avvuru-vurung ta pattolay.’ (Luc. 21:34) Lallagu, ipoppolluda ta pattoleda i pattuttul ta bili-bilin ni Jesus, maski nu kitezziga yatun. Aru nga wawwaragi  tam i magatta-attam ta grabe nga kapurueba, nelagum tatun i pangatake na kumokkontra, grabe nga ziga na pattolay, anna kalamidad ira. Anni laman i mesimmu, nattalupaddian ira nga matalo kani Jehova, maski mazziga-riga ira. Nipasiguradu ni Jesus nira: “I sinni laman nga mangalawa anna mamarulo ta bili-bilik-ku ay yaya i mangaya niakan. Ayatan na Yamà i sinni laman nga mangaya niakan.”​—Juan 14:21.

12. Anni paga i makua tam tapenu mepasingan nga maggigginna ittam kani Jesus?

¹² Yaw paga i tadday nga makua tapenu mepasingan nga maggigginna ittam kani Jesus: gukaban na pakikoopera turi ira ta sinunnona nga mangirollu nittam. (Heb. 13:7, 17) Aru nga panguloli i nakua ta organisasion na Dios ta nappasa nga daga-ragun, kasali tatun i pangusa tu bagu ira nga rimienta anna metodo ta ministerio, i format na study ta midweek, anna i metodo na pappataddag, pappakasta, anna pammentena ta Kingdom Hall ira. Talaga mappabalo ittam ta meddu anna napannonopan tu mapia nga pangigiya! Makasiguradu ittam nga bendisionan ni Jehova i appursigi tam nga tuttulan i instruksion ira nga niyawa na organisasion.

13. Anni ira i benefisio ta pagginna kani Jesus?

¹³ Mabenefisiowan ittam ta pagginna ta ngamin nga nituddu ni Jesus. Nipasiguradu ni Jesus ta disipulosna nga i tuttudduna i marrefresko nira. “Maleran nu i hustu nga pagibannag,” kunna. “Ta alappaw laman i takkilù anna malogon laman i ipakattú.” (Mat. 11:28-30) I Biblia nga nelagum tatun i appa nga Evanghelio ira ta pattolay anna ministerio ni Jesus ay makarefresko nittam, mangitoli tu espiritual nga siki-sikan, anna mamassirib ta nittam. (Sal. 19:7; 23:3) Kinagi ni Jesus: “Danuri i magginna anna mamarulo ta uvovug na Dios, ay ira i mapalag [onu, magayayya]!”​—Luc. 11:28.

14-15. (a) Anni i mekatallu nga situasion nga mabibbig ta Juan 12:27, 28, nu sitaw naguvovug si Jehova naggafu ta langi? (b) Ngatta namattuyag anna namasikan kani Jesus i uvovug ni Jehova?

¹⁴ Bibbigan i Juan 12:27, 28. Netura ta Evanghelio ni Juan i mekatallu nga situasion nga naguvovug si Jehova maggafu ta langi. Piga aggaw nige na patay ni Jesus, egga yayya ta Jerusalem tapenu iselebra i ultimuna nga Paskua. “Mavvuru-vurung sangawe i nono ku,” kunna. Yatutta nakimallo yayya: “Ama,  ipasingam-mu ngana i dayaw na ngagam-mu!” Sinabbag yayya na Yamana naggafu ta langi: “Nipasingak-ku ngana, ay ek-ku mangana nga ipasingan noka!”

¹⁵ Mavurung si Jesus gafu ta dakal nga responsibilidadna nga mattalupaddian nga matalo kani Jehova. Ammu ni Jesus i mappange nga kaziga-rigana gukaban na brutal nga kalatigo anna mataki nga kapatena. (Mat. 26:38) I pinaka-importante kani Jesus ay i kedayaw na ngagan na Yamana. Naakusa si Jesus ta panara-daral ta Dios, yari tu mavurung yayya nga mepasiranan i ngagan na Dios gafu ta kapatena. Siguradu nga nangiyawa tu matuyag nga komfiansa kani Jesus i uvovug ni Jehova! Masiguraduna nga i ngagan ni Jehova ay medayaw. I uvovug na Yamana i namattuyag kani Jesus tapenu maattammanna i kaziga-riga nga meparubang sa. Maski nu si Jesus laman ta ngamin nga presente i nakalippawa ta kinagi na Yamana tatun nga tiempo, siniguradu ni Jehova nga i Uvovugna ay merekord para ta nittam ngamin.​—Juan 12:29, 30.

16. Ngatta nu mittan mavurung ittam nga mepasiranan i ngagan na Dios?

¹⁶ Kagitta ni Jesus, mavurung ittam gapa nu mepasiranan i ngagan ni Jehova. Baka gitta ni Jesus, tadday ittam nga biktima na kawan tu hustisia. Onu mavurung ittam gafu ta pamara-parake na kumokkontra nittam. Awayyana nga manono tam nga danaw nga istoria i makepasiran ta ngagan ni Jehova anna ta organisasionna. Tatun ira nga tiempo, kuruga mabanna-bannayan ittam ta uvovug  ni Jehova. Ariattam mawag nga kuruga mavvuru-vurung meyannung ta kepasiranan na ngagan ni Jehova anna na organisasionna. Makasiguradu ittam nga ‘iyawa na Dios nittam i imammo na nga ari malippawa na tolay.’ Kabalinna, ‘yaw i manangngal ta nono anna giffutuattam ta ketadday tam kani Cristo Jesus.’ (Fil. 4:6, 7) Kanayun nga idayaw ni Jehova i ngaganna. Pakappian na Pappatulan na Dios i ngamin nga perwisiu ni Satanas tuange ta sistemana ta matalo ira nga aripanna.​—Sal. 94:22, 23; Isa. 65:17.

17. Mekunnay ta Isaias 30:21, kunnasi nga makiyuvovug nittam si Jehova ta maddaggun?

¹⁷ Adde ta maddaggun makiyuvovug nittam si Jehova. (Bibbigan i Isaias 30:21.) Fustu, ariattam maginna i Dios nga makiyuvovug nittam maggafu ta langi. Ngem, niyawana i netura nga Uvovugna, i Biblia, nu sitaw malegan ira i instruksionna. Kunne na paga, paguyuan na espiritu ni Jehova i ‘mekatalo nga doroban’ tapenu tulu-tuloy nga meyawa ta aripanna ira i kawagan nga makan. (Luc. 12:42) Anni mabba i karu na espiritual nga makan nga malawà tam ta neyimprenta anna ta online, video ira, anna audio ira nga publikasion!

18. Kunnasi ka naggutu anna napatuyag i pangurug mu ta uvovug ni Jehova?

¹⁸ Ipatalatto tam nakuan ta nono tam i uvovug ira ni Jehova turi ta nakiyuvovug yayya ta Anana ta davvun! Paray nakuan nga i uvovug na Dios, nga nakarekord ta Biblia i mangiyawa ta nittam tu komfiansa nga kontroladu ni Jehova ngamin anna pakappianna i anni laman nga zinaral ni Satanas tuange ta marake nga mundona. Anna determinadu ittam nakuan nga magginna tu mapia ta ngaral ni Jehova. Nu kuattam yatun, mavviktoria ittam ta pagattam ta anni laman nga meparubang nittam tu problema ta maddaggun anna kapurueba ta mappange. Iperaddam nittam na Biblia: “Mawag tu mappasensia kamu tapenu makua nu i uray na Dios anna malawa nu i nitabba na.”​—Heb. 10:36.