1-2. (a) Shinggyim masha ni hte Yehowa gara hku matut mahkai ai kun? (b) Ndai sumhpa hta hpa lam hpe hkaja mat na kun?

YEHOWA gaw anhte hte matut mahkai mayu ai. Lai wa sai aten hta, myihtoi ni, lamu kasa ni hte shi a Kasha Yesu Hkristu hpe akyu jashawn nna, shi a myit mang ai lam ni hpe anhte chye lu hkra tsun dan wa ai. (Amo 3:7; Gal 3:19; Shr 1:1) Dai ni aten hta gaw, shi a Mungga re ai Chyum Laika hku nna anhte hte matut mahkai nga ai. Anhte a matu Chyum Laika jaw da ai majaw, shi a myit mang ai lam ni hpe hkaja lu nna shi a lam ni hpe chye na lu ai.

² Yesu mungkan ntsa nga ai aten, masa lam masum hta Yehowa gaw sumsing lamu kaw nna ga shaga wa ai. Yehowa hpa tsun wa ai lam, shi tsun ai ga kaw nna anhte hpa sharin la lu ai lam hte gara hku akyu lu la mai na lam hpe hkaja yu ga.

3. Marku 1:9-11 hta hti lu ai hte maren, Yesu hkalup hkam ai shaloi Yehowa hpa tsun wa ai kun? Dai ga ni gaw gara ahkyak ai lam ni hpe chye shangun ai kun?

³ Marku 1:9-11 hta, sumsing lamu kaw nna Yehowa ga shaga wa ai shawng nnan lang na mabyin hpe mu lu ai. (Hti u.) Shi ndai hku tsun ai: “Nang gaw nye tsaw ra ai Kasha rai nga ndai; nang hta ngai sharawng awng nngai.” Yesu gaw, shi Kawa madun ai tsawra myit hte shi hpe kam ai lam na la lu ai shaloi myit hta grai kabu mat na re. Yehowa tsun wa ai ga gaw, Yesu hte seng nna ahkyak ai lam masum hpe chye shangun ai. Langai, Yesu gaw shi a Kasha re. Lahkawng, Kasha hpe Yehowa tsawra ai. Masum, Kasha hpe Yehowa sharawng awng ai. Dai lam masum hpe ahkri ahkrai hkaja yu ga.

4. Yesu hkalup hkam ai shaloi gara lam hku nna Karai hte hku hkau lam nnan nga wa ai hku?

⁴ “Nang Gaw Nye Tsaw Ra Ai Kasha Rai Nga Ndai.” Tsawra ai Kasha Yesu ngu Yehowa tsun wa ai ga ni gaw, shi hte hku  hkau lam nnan hpang wa ai hpe madun dan ai re. Mungkan ga de Yesu garai n sa shi yang, Karai a Kasha rai ngut chyalu re. Raitim, shi hkalup hkam la ai shaloi lam nnan hku nna Karai a Kasha byin wa ai. Dai aten hta, Karai Kasang gaw Yesu hpe namman chya hkrum ai Kasha re ai lam madun wa ai. Dai majaw, Yesu gaw Karai aya tang da ai Hkawhkam hte Hkinjawng Agyi hku nna sumsing lamu de bai wa na matu myit mada lam lu wa ai. (Luk 1:31-33; Heb 1:8, 9; 2:17) Dai majaw, Yesu hkalup hkam ai shaloi, ‘nang gaw nye Kasha rai nga ndai’ ngu hpa majaw shi Kawa tsun ai hpe asan sha chye lu ai.​—⁠Luk 3:22.

5. Yehowa madun wa ai tsawra myit hte myi man jaw ai lam hpe anhte gara hku kasi la mai na kun?

⁵ “Nang Gaw Nye Tsaw Ra Ai Kasha Rai Nga Ndai.” Tsawra myit hte myi man jaw ai lam hpe madun dan ai Yehowa a kasi ningli gaw, kaga ni hpe n-gun jaw lu ai ahkaw ahkang ni tam na matu anhte hpe mung shadum ya ai. (Yhn 5:20) Anhte tsawra ai marai langai gaw, anhte hpe tsawra ai lam madun ai, anhte hta nga ai kaja ai lam ni hpe shakawn ya ai shaloi, anhte rawt jat galu kaba wa ai. Dai hte maren, nawku hpung kaw nna hpunau nauna ni hte dum nta masha ni gaw, anhte a tsawra myit hte n-gun jaw ai lam hpe ra ai. Kaga ni hpe anhte shakawn ya yang, shanhte a makam masham ngang kang wa nna, Yehowa hpe matut sadi dung let nawku dawjau lu hkra karum ya nga ai re. Laksan hku nna, kanu kawa ni gaw tinang a ma ni hpe shakawn ya ging ai. Kanu kawa ni gaw myit madung hte ma ni hpe shakawn ya ai nga yang, ma ni rawt jat galu kaba wa hkra galaw nga ai re.

6. Yesu Hkristu hpe kam ai myit anhte hta hpa majaw nga ai kun?

⁶ “Nang Hta Ngai Sharawng Awng Nngai.” Yehowa gaw shi myit ra ai hku sadi dung let Yesu galaw lu na hpe kam ai lam dai ga ni gaw madun dan ai. Yehowa gaw shi Kasha hpe kam wa ai. Dai hte maren, Yehowa a ga sadi yawng hpring tsup wa hkra Yesu galaw  ya na hpe anhte mung kam mai ai. (2 Ko 1:20) Yesu a kasi ningli hpe anhte myit ai nga yang, shi hpe kasi la na matu hte shi kaw na sharin la na matu dawdan da lu na re. Yehowa gaw Yesu hpe kam ai zawn, shi a mayam ni mung uhpung nawng shi Kasha kaw na sharin hkam la na hpe kam ai.​—⁠1 Pe 2:21.

7. Mahte 17:1-5 hta tsun da ai hte maren gara masa hta Yehowa gaw sumsing lamu kaw nna ga shaga wa ai kun? Shi hpa tsun wa ai kun?

⁷ Mahte 17:1-5 hpe hti u. Yesu “ahpraw asam galai wa” ai aten hta lahkawng lang hku nna sumsing lamu kaw nna Yehowa ga shaga wa ai. Yesu gaw, Petru, Yaku hte Yawhan hpe tsaw ai bum de arau lung na matu saw shaga ai. Dai kaw du ai shaloi, laklai ai shingran hpe shanhte mu wa ai. Yesu a myi man gaw htoi kabrim nna, hpun palawng mung htoi tu nga ai. Mawshe yan Elia hpe malai madun ai hkrang nsam lahkawng gaw, Yesu si ra na lam hte hkrung rawt na lam hpe Yesu hte tsun jahta nga ai. Kasa masum gaw “yup shamawi nga ma ai.” Dum hprang ai shaloi laklai ai dai shingran hpe mu ma ai. (Luk 9:29-32) Sumwi gaw shanhte hpe ka-up mat nna, sumwi kaw nna Karai Kasang a nsen hpe na dat ai. Yesu hkalup hkam ai aten na zawn, Yehowa gaw shi Kasha hpe tsawra nna myi man jaw ai lam ndai hku tsun wa ai: “Ndai wa gaw, ngai Sha, ngai lata la ai wa rai nga ai.” Raitim, ndai kalang hta gaw, Yehowa ndai hku mung tsun ai: “Shi a ga madat mara mu.”

8. Shingran gaw Yesu hte sape ni hpe gara hku akyu shabyin ya ai kun?

⁸ Yesu gaw htawm hpang hta Karai Mungdan a Hkawhkam hku nna hpung atsam kaba lu la na hpe dai shingran gaw tau hkrau madun dan ai. Dai shingran a majaw, Yesu gaw nni nkri hkrum let si ra na hpe hkam jan lu ai n-gun atsam lu la wa ai. Dai shingran gaw, sape ni a makam masham hpe mung shangang shakang ya ai. Shanhte galaw ra na yak ai bungli ni hte hkrum wa na mayak mahkak ni a matu tau hkrau nna hkyen lajang lu hkra karum ya wa ai. Shaning 30 daram na ai hpang, kasa Petru gaw ahpraw asam galai wa ai shingran hpe matut nna tsun wa ai. Dai shingran hpe pra pra naw mu nga ai re.​—⁠2 Pe 1:16-18.

9. Sape ni hpe tatut re ai gara matsun ga Yesu jaw wa ai kun?

⁹ “Shi a ga madat mara mu.” Yehowa gaw, anhte hpe shi Kasha a ga madat nna hkan sa shangun mayu ai lam hpe dai ga kaw nna asan sha chye lu ai. Mungkan ntsa hta Yesu nga wa ai shaloi hpa ni tsun wa ai kun? Madat ai ni hpe grai ahkyak ai lam ni tsun wa ai. Ga shadawn, kabu gara shiga hpe gara hku hkaw tsun ra na lam sape ni hpe tsawra myit hte sharin ya wa nna, maja nga na matu mung chyahkring hkring sadi jaw wa ai. (Mat 24:42; 28:19, 20) N-gun lagaw ja let shakut shaja nga na matu n-gun jaw wa ai. Asum n jaw na matu mung n-gun jaw wa ai. (Luk 13:24) Shi hpang hkan ai ni shada da tsawra nga na matu, kahkyin gumdin nga na matu hte shi a ga hpe hkan sa na matu ahkyak shatai nna Yesu tsun wa ai. (Yhn 15:10, 12, 13) Sape ni a matu tatut re ai matsun ga hpe Yesu jaw wa ai re. Dai matsun ga gaw, Yesu jaw wa ai shaloi na zawn sha, dai ni aten hta mung grai ahkyak nga ai.

10-11. Yesu hpe madat mara ai lam gara hku nna anhte madun mai na kun?

¹⁰ Yesu ndai hku tsun ai: “Teng man ai hte seng ai ni nlang hte gaw, nye a ga nsen madat ma ai.” (Yhn 18:37) ‘Shada da hkam mana ai hte, mara langai ngai nga yang, shada da raw dat kau’ ai gaw, shi a ga madat nga ai re. (Kol 3:13; Luk 17:3, 4) “Du hkra ladaw ang ai rai ti mung, n ang ai rai ti mung” kabu gara shiga hpe myit rawt let hkaw tsun ai gaw, shi a nsen hpe madat ai lam kahtap nna madun nga ai re.​—⁠2 Tm 4:2.

¹¹ Yesu ndai hku tsun ai: “Nye a sagu ni gaw, nye a nsen madat ma ai.” (Yhn 10:27) Hkristu  hpang hkan ai ni gaw, Yesu a ga hpe myit maju jung let madat ai sha n-ga, tatut amu bungli hte hkan galaw ai hku nna madat mara ai lam madun ai. Shanhte gaw, “dinghta ga myit ru myit tsang ai” lam ni a majaw myit n bra ma ai. (Luk 21:34) De a malai, grai yakhkak tim pyi, Yesu a matsun ga hpe ahkyak shatai nna hkan sa ma ai. Hpunau nauna law law gaw, ninghkap ai ni a gasat ai lam, manu mana matsan ai lam hte shingra tara a majaw byin ai tsin-yam tsindam ni hte hpawn, ladu lai hkra yakhkak ai lam ni hpe hkamjan nga ma ai. Kade daram yakhkak hkrum tim, hpa mi byin nga tim, matut nna Yehowa hpe sadi dung nga ma ai. Shanhte hpe Yesu ndai hku n-gun jaw da ai: “Nye a ga matsun lu la nna hkan shatup ai wa gaw, ngai hpe tsaw ra ai wa rai nga ai: ngai e tsaw ra ai wa hpe, nye Wa mung tsaw ra na wu ai.”​—⁠Yhn 14:21.

12. Yesu a ga hpe madat ai lam madun lu ai kaga lam langai gaw hpa rai kun?

¹² Yesu a ga hpe madat mara ai lam madun lu ai kaga lam langai nga ai. Dai gaw, anhte hpe woi awn ai ni hte arau jawm galaw ai hku nna re. (Heb 13:7, 17) Kade n na shi ai shaning ni hta, Karai a uhpung gaw galai shai ai lam ni grai law hkra galaw wa ai. Dai hta, hkaw tsun magam hta lang ai hkingrai hte ladat nnan ni, bat lapran zuphpawng ni a hkrang, gawgap ai ladat, bai shatsawm gram lajang ai hte Nawku Htingnu ni hpe gram lajang ai lam ni lawm ai. Tsawra myit hte atsawm myit nna lam matsun ya ai majaw, anhte grai chyeju dum ga ai. Uhpung hku nna anhte hpe jaw ai lam matsun ni hpe shakut shaja let hkan sa yang, Yehowa teng sha shaman chyeju jaw na re.

13. Yesu a ga madat mara na nga yang hpa akyu lu la na kun?

¹³ Yesu sharin achyin ya ai lam ni hpe hkan sa ai majaw anhte akyu lu la ga ai. Shi a sharin achyin ai lam gaw sape ni hpe shalan shabran ya na lam ndai hku ga sadi jaw ai: “Nanhte a myit masin ban sa ai hkrum na ma lit dai.” “Nye a kandang hpai loi ai hte, nye a lit mung tsang nga li ai.” (Mat 11:28-30) Yesu a prat labau hte hkaw tsun magam a lam tsun da ai Kabu Gara Shiga Mali hta lawm ai Karai a mungga gaw, anhte hpe wenyi lam hta ngang kang hkra karum ya nna hpaji rawng wa shangun ai. (Shk 19:7; 23:3) Yesu ndai hku tsun ai: “Karai Kasang a mungga madat la nna, hkan nang ai ni gaw a lu ma ai.”​—⁠Luk 11:28.

14-15. (a) Lamu kaw nna Yehowa ga shaga wa ai masum ngu na mabyin hpe Yawhan 12:27,28 hta gara hku tsun da ai kun? (b) Yehowa a ga ni gaw Yesu hpe shangang shakang nna shalan shabran lam hpa majaw lu shangun ai kun?

¹⁴ Yawhan 12:27, 28 hpe hti u. Sumsing lamu kaw nna Yehowa ga shaga ai masum ngu  na masa lam hpe Yawhan a Kabu Gara Shiga hta mu lu ai. Yesu garai n si shi ai nhtoi loi mi hta, hpang jahtum Shalai Wa Ai Poi hpe galaw na matu Yerusalem hta Yesu nga nga ai. “Ngai myit ru nga nngai” ngu nna Yesu tsun ai. Ngut nna shi ndai hku akyu hpyi ai: “Wa e, na a mying ningsang hpe sha shagrau u law.” Lamu kaw nna shi a Kawa ndai hku bai htan wa ai: “Ngai shagrau se ai, bai naw shagrau na we ai.”

¹⁵ Yehowa hpe matut nna sadi dung ra na lit kaba shi hta nga ai majaw, Yesu myit ru myit tsang nga ai. Lasik hte kayat hkrum nna nni nkri hkrum let si ra sana hpe Yesu chye ai. (Mat 26:38) Yawng mayawng hta grau nna shi a Kawa a amying hpe shi shagrau mayu ai. Yesu gaw Karai Kasang a amying hpe jahpoi asawng ai wa ngu nna n tara ai hku tsun hkrum wa ai. Dai majaw, shi si hkam ai lam gaw Karai Kasang hpe jahpoi ai baw byin mat na hpe grai tsang ai. Yehowa tsun wa ai ga ni a majaw, Yesu hta kam ai myit grau nna nga wa na re. Yehowa a amying shagrau sha-a hkrum na hpe shi chye mat ai. Shi Kawa tsun ai ga gaw, shi hpe shalan shabran ya wa nna, hpa mi hkrum wa tim hkamjan lu na matu atsam jaw wa ai. Yehowa tsun ai ga hpe dai aten hta Yesu langai sha chye na ai raitim, anhte yawng a matu dai ga ni hpe ka matsing da ya ai.​—⁠Yhn 12:29, 30.

16. Karai Kasang a amying jahpoi asawng hkrum na ngu hpa majaw kalang lang myit tsang ai kun?

¹⁶ Yesu zawn sha anhte mung, Yehowa a amying jahpoi asawng hkrum na hpe myit tsang ga ai. Yesu zawn sha n tara ai hku kanawn mazum hkrum ai. Shing n rai, anhte hte  seng nna ninghkap ai ni gaw n teng n man ai hku tsun ai majaw myit shanut chye ai. Dai zawn tsun ai ga ni a majaw, Yehowa a amying hte shi a uhpung hpe jahpoi asawng ai lam byin mat na ngu anhte myit chye ai. Dai zawn aten ni hta, Yehowa a ga ni gaw anhte hpe shalan shabran lam lu shangun ai. Ladu lai hkra anhte myit tsang n ra ai. “Chye chyang ai nyan yawng hta grau lai ai Karai Kasang a ngwi pyaw ai gaw, nanhte a myit masin hte nanhte a myit mang ai hpe, Hkristu Yesu hta e bau sin na ra ai” ngu nna tsun da ai hpe anhte kam ga ai. (Hpl 4:6, 7) Yehowa gaw shi a amying hpe galoi mung shagrau na re. Satan hte shi a mungkan a majaw hten za mat ai yawng hpe, sadi dung ai mayam ni a matu bai kaja wa hkra, Karai a Mungdan hku nna Yehowa galaw ya na re.​—⁠Shk 94:22, 23; Esa 65:17.

17. Esaia 30:21 hta tsun da ai hte maren, Yehowa gaw gara hku nna dai ni aten hta ga shaga nga ai kun?

¹⁷ Dai ni aten hta mung, Yehowa gaw anhte hpe matut nna ga shaga nga ai. (Esaia 30:21 hpe hti u.) Sumsing lamu kaw nna Karai Kasang ga shaga ai hpe gaw anhte n na lu sai. Raitim, anhte hpe lam matsun ni jaw na matu shi a Mungga Chyum Laika hpe jaw da ai. Dai hta n-ga, shi a mayam ni hpe wenyi lu sha lajang ya na matu, Yehowa a chyoi pra ai wenyi gaw “kangka re ai hte myit su ai kunhting wa” hpe shadut ya na re. (Luk 12:42) Laili laika ni, online hkingrai ni, video ni, laili laika ni hpe nsen rim da ai audio ni gaw, matut nna makam masham ngang kang nga hkra anhte hpe karum ya ai.

18. Yehowa a ga ni gaw na a makam masham hpe gara hku gawgap ya nna nden marai jaw ai kun?

¹⁸ Shi a Kasha mungkan ntsa nga ai shaloi Yehowa tsun wa ai ga ni hpe anhte a myit hta matsing da ga. Yehowa gaw yawng mayawng hpe hkang lu nna, Satan hte shi a nhkru ai mungkan a majaw hten za mat ai lam yawng hpe bai kaja hkra galaw ya na re. Chyum Laika hta lawm ai Karai Kasang a dai ga ni a majaw, dai hku galaw ya na hpe anhte kam mai ai. Yehowa a ga hpe prat tup madat mara na ngu dawdan lu u ga. Rai yang, ya hkrum nga ai manghkang ni hte htawm hpang hta hkrum wa na mayak mahkak ni hpe hkamjan lu na re. Chyum Laika hta anhte hpe ndai hku shadum jahprang da ai: “Karai Kasang a myit ra ai hku hkan shachyen ngut jang, ga ndat a akyu hkam la lu hkra, shakut sharang ai myit nanhte naw ra nga myit dai.”​—⁠Heb 10:36.