1-2. (a) Modi ki Jeová ta pâpia ku nos? (b) Kuzê ki nu sta ben odja na kel studu li?

JEOVÁ gosta txeu di pâpia ku nos. Na ténpu antigu el uza profétas, anjus i se Fidju Jizus Kristu pa dexa-nu sabe se pensamentus. (Amós 3:7; Gál. 3:19; Apo. 1:1) Oji, el ta pâpia ku nos através di Bíblia. El da-nu Bíblia pa nu pode sabe kuzê ki el ta pensa i pa nu ntende modi ki el ta aji.

² Kantu Jizus staba na Téra, Jeová pâpia três bês la di Séu. Nu sta ben odja kuzê ki Jeová fla, kuzê ki nu ta prende ku se palavras i ki bensons nu ta resebe si nu obi ku el.

3. Óras ki nu ta lé Marcos 1:9-11, kuzê ki Jeová fla kantu Jizus batiza, i ki verdadis inportanti kes palavra li ta konfirma?

³ Marcos 1:9-11 ta mostra kel primeru bês ki Jeová pâpia la di Séu. (Lé.) El fla: ‘Abo é nha Fidju, kel ki N ta ama txeu, i ki ta da-m txeu alegria.’ Di sertéza, Jizus fika txeu kontenti di obi vós di se Pai ta fla-l ma el ta ama-l i ma el ta kúnfia na el. Kes palavra di Jeová konfirma três verdadi inportanti sobri Jizus. Primeru, el é se Fidju. Sugundu, Jeová ta ama se Fidju. I tirseru, Jeová fika kontenti ku se Fidju. Nu ben analiza kada un di es ku atenson.

4. Pamodi ki Jeová fla Jizus kantu el batiza: ‘Abo é nha Fidju’?

⁴ ‘Abo é nha Fidju’. Pamodi ki Jeová fla kes palavra li? Kantu Jizus staba na Séu, el éra Fidju spritual di Deus. Má, kantu el batiza, el bira Fidju di Deus di un  otu manera. El skodjedu ku spritu santu i el dadu xansi di volta otu bês pa Séu, pa bira kel Rei i Saserdóti Prinsipal skodjedu pa Deus. (Luc. 1:31-33; Heb. 1:8, 9; 2:17) Nton, kantu Jizus batiza, se Pai tinha razon pa fla: ‘Abo é nha Fidju’. — Luc. 3:22.

5. Modi ki nu pode imita izénplu di Jeová kantu el fla se Fidju ma el ta ama-l?

⁵ ‘Kel ki N ta ama txeu’. Kel izénplu di Jeová na mostra amor pa Jizus, ta lenbra-nu ma nu debe djobe oportunidadis pa nkoraja i ilôjia otus algen. (João 5:20 ) Nu ta xinti sábi óras ki un algen ki nu gosta di el, ta mostra-nu amor i ta ilojia-nu pa kuzas ki nu ta faze. Di mésmu manera, nos irmons i irmans na kongregason i nos família meste pa nu ama-s i pa nu nkoraja-s. Óras ki nu ta ilôjia otus, ses fé ta bira más fórti i nu ta djuda-s kontinua lial pa Jeová. Ken ki é mai ku pai meste faze kel-la inda más txeu. Es meste nkoraja ses fidju. Óras ki es ta ilôjia ses fidju di korason i es ta mostra-s amor, es sta ta djuda-s ten bons rezultadu na vida.

6. Pamodi ki nu pode kúnfia na Jizus Kristu?

⁶ ‘Ki ta da-m txeu alegria.’ Kes palavra li ta mostra ma Jeová tinha tudu kunfiansa ma Jizus ta fazeba se vontadi. Jeová ta kúnfia txeu na se Fidju. Pur isu, nu pode ten sertéza ma Jizus ta ben kunpri tudu promésas di Jeová. (2 Cor. 1:20) Óras ki nu ta pensa na izénplu di Jizus, nu ta xinti más vontadi di prende sobri el i di ‘sigi se pasus’. Sima Jeová kúnfia na Jizus, tanbê el ta  kúnfia ma tudu se sérvus ta kontinua ta prende ku izénplu di se Fidju. — 1 Ped. 2:21.

7. Di akordu ku Mateus 17:1-5, kal ki é kel otu bês ki Jeová pâpia la di Séu, i kuzê ki el fla?

⁷ Lé Mateus 17:1-5. Kel sugundu bês ki Jeová pâpia la di Séu, foi kantu Jizus ‘transforma’. Jizus konvida Pedru, Tiagu i Juan pa ba ku el ti un monti altu. Timenti es staba la, es odja un vizon i es fika dimiradu. Róstu di Jizus fika ta límia i se ropa fika branku ta límia sima lus. Dôs algen ki staba ta reprizenta Muizes i Elias, kumesa ta pâpia ku Jizus sobri se mórti i se resureison ki dja staba kuazi ta kontise. Nbóra kes três apóstlu staba ku “sónu pizadu”, es odja kel grandi vizon kantu es staba kordadu. (Lúkas 9:29-32, Bíblia na Prugrésu di Traduson pa Lingua Kabuverdianu, BPK ) Dipôs, un núven xeiu di lus kubri-s i es obi un vós ta sai di núven. Kel vós éra di Deus! Sima Jeová fazeba kantu Jizus batiza, el mostra ma el staba kontenti ku se Fidju i ma el ta amaba el. El fla: “Kel-li é nha Fidju ki N ta ama, ki ta da-m txeu alegria.” Má di es bês, Jeová tanbê fla: ‘Nhos obi ku el.’

8. Kal ki foi rezultadu di kel vizon na Jizus i na se disiplus?

⁸ Kel vizon mostra kuzê ki staba ta ben kontise na futuru. Jizus ta ben tinha puder i glória kómu Rei di Reinu di Deus. Di sertéza, kel vizon nkoraja Jizus i da-l más forsa pa el aguenta sufrimentu ki el staba ta ben pasa pa el. Kel vizon tanbê bira fé di kes disiplu más fórti. Kel-li djuda-s sta priparadu pa kes provason ki es ta ben pasaba pa es i pa kel trabadju difísil ki es tinha ki fazeba. Uns 30 anu dipôs, apóstlu Pedru pâpia sobri kel vizon na un di se kartas ki el skrebe. — 2 Ped. 1:16-18.

9. Ki konsedjus inportanti Jizus da se disiplus?

⁹ ‘Nhos obi ku el.’ Jeová dexa klaru ma el krê pa nu obi ku se Fidju. Kuzê ki Jizus fla kantu el staba na Téra? El fla txeu kuza inportanti! Pur izénplu, ku amor, el inxina se sigidoris prega notísias sábi, i txeu bês el lenbra-s pa es mante sienti. (Mat. 24:42; 28:19, 20) Tanbê el nkoraja-s pa es sforsa i pa es ka dizisti. (Luc. 13:24) Jizus mostra ma é inportanti se sigidoris ama kunpanheru, mante unidu i obi ku se mandamentus. (João 15:10, 12, 13 ) Jizus da se disiplus bons konsedju. I kes konsedju inda ta sirbi pa nos ténpu.

10-11. Modi ki nu pode mostra ma nu sta ta obi ku Jizus?

¹⁰ Jizus fla: ‘Tudu kel ki sta di ladu di verdadi ta obi ku nha vós.’ (João 18:37 ) Nu ta mostra ma nu ta obi ku se vós óras ki nu ta ‘kontinua ta suporta kunpanheru i ta púrdua kunpanheru di korason’. (Col. 3:13; Luc. 17:3, 4) Tanbê, nu ta mostra ma nu ta obi ku se vós óras ki nu ta prega ku zelu kes notísia sábi ‘na ténpu sábi i na ténpu kasábi’. — 2 Tim. 4:2.

¹¹ Jizus fla: ‘Nhas ovelha ta obi ku nha vós’. (João 10:27 ) Sigidoris di Kristu ta mostra ma es ta obi ku Jizus, óras ki es ta presta atenson na se palavras i tanbê es ta aji di akordu ku se palavras. Es ka ta distrai ‘ku preokupasons di vida’. (Luc. 21:34) Má pa es, é txeu inportanti obi ku mandamentus di Jizus,  mésmu óras ki é difísil. Txeu di nos irmon sta ta aguenta txeu tipu di prublémas, sima opozison, txeu pobréza i dizastris na naturéza. Má simé, es ta kontinua fiel pa Jeová, ka ta nporta ses sufrimentu. É pa es ki Jizus faze kel promésa li: ‘Ken ki ta seta nhas mandamentu i ki ta kunpri-s, é kel ki ta ama-m. I ken ki ta ama-m, nha Pai ta ama-l tanbê’. — João 14:21.

12. Kal ki é otu manera di nu mostra ma nu sta ta obi ku Jizus?

¹² Un otu manera di nu mostra ma nu sta ta obi ku Jizus é óras ki nu ta apoia kes ki skodjedu pa toma kónta di nos. (Heb. 13:7, 17) Na kes últimu anu, organizason di Deus faze txeu mudansa. Nu ten novus feraménta i maneras di prega, nos runion di meiu di simana sta fazedu di manera diferenti i nu resebe novus orientason na manera di faze konstruson, di konpo i kuida di Salons di Reinu. Nu ta fika txeu kontenti ku kes mudansa ki organizason faze, pamodi es faze-l ku amor i es pensa ku kuidadu antis di es faze-s. Si nu sforsa pa nu sigi kes orientason ki nos organizason ta da, nu pode ten sertéza ma Jeová ta abensua-nu.

13. Ki bons rezultadu nu ta ten óras ki nu ta obi ku Jizus?

¹³ Nu ta ten bons rezultadu óras ki nu ta obi tudu kel ki Jizus inxina. Jizus promete se disiplus ma se ensinus ta nkorajaba es. El fla: ‘Nhos ta atxa konsolu pa nhos. Pamodi nha kanga é suavi i nha karga é lébi.’ (Mat. 11:28-30) Palavra di Deus ki ta inklui kes kuatu ivanjélhu ki ta pâpia sobri vida i pregason di Jizus, ta anima-nu, ta djuda-nu ten un fé más fórti i ta djuda-nu ten sabedoria. (Sal. 19:7; 23:3) Jizus fla: ‘Filís é kes ki ta obi palavra di Deus i ta faze sima el fla!’ — Luc. 11:28.

14-15. (a) Di akordu ku João 12:27, 28, kal ki é kel tirseru bês ki Jeová pâpia la di Séu? (b) Pamodi ki palavras di Jeová konsola Jizus i da-l forsa?

¹⁴ Lé João 12:27, 28. Ivanjélhu di João ta konta sobri kel tirseru bês ki Jeová pâpia la di Séu. Alguns dia antis di Jizus móre, el staba na Jiruzalen pa  komemora se últimu Páskua. El fla: ‘N sta kasábi’. Nton el ora: ‘Nha Pai, glorifika bu nómi.’ Se Pai responde la di Séu: ‘Dja N glorifika-l i N ta torna glorifika-l.’

¹⁵ Jizus staba kasábi pamodi el tinha un grandi responsabilidadi di kontinua fiel pa Jeová. Jizus sabia ma el ta sufreba di piór manera i ma el ta tinha un mórti kruel. (Mat. 26:38) Má simé, kuza más inportanti pa Jizus éra glorifikaba nómi di se Pai. Es akuza Jizus di pâpia mal di Deus i el staba preokupadu ma se mórti ta trazeba vergónha pa nómi di Deus. Di sertéza, palavras di Jeová da Jizus txeu kunfiansa! El podia tinha sertéza ma nómi di Jeová ta sérba glorifikadu. Palavras di se Pai konsola-l i da-l forsa pa kuzas ki staba ta ben kontise ku el. Talvês Jizus é kel úniku ki ntende kuzê ki se Pai fla, má Jeová poi kes palavra na Bíblia pa djuda-nu. — João 12:29, 30.

16. Ki situasons pode pô-nu preokupadu ku nómi di Jeová?

¹⁶ Nton sima Jizus, nos tanbê nu ka krê pa nada mantxa nómi di Jeová. I talvês sima Jizus, nu pode tratadu ku injustisa. Ô nu pode fika kasábi pamodi stórias falsu ki nos inimigu ta spadja sobri nos. Nu pode pensa na modi ki kes stória li ta mantxa nómi di Jeová i  se organizason. Na kes situason li, palavras di Jeová pode da-nu txeu konsolu. Nu ka meste fika preokupadu dimás. Nu pode ten sertéza ma ‘pas di Deus, ki ningen ka ta konsigi ntende, ta guarda nos korason i nos pensamentu ku ajuda di Kristu Jizus.’ (Fil. 4:6, 7) Jeová sénpri ta glorifika se nómi. El ta ben uza se Reinu, pa kaba ku tudu kuza ki Satanás i se mundu faze kóntra Se sérvus fiel. — Sal. 94:22, 23; Isa. 65:17.

17. Modi ki Jeová ta pâpia ku nos oji sima sta na Isaías 30:21 ?

¹⁷ Jeová inda sta ta pâpia ku nos oji. (Lé Isaías 30:21.) É klaru ki nu ka ta obi Deus ta pâpia ku nos la di Séu. Má, el da-nu se Palavra skrebedu, ki é Bíblia, ki ta da-nu orientason. Tanbê, spritu di Jeová ta poi ‘skravu fiel’ ta da se sérvus kumida spritual. (Luc. 12:42) Nu ta resebe txeu kumida spritual através di publikasons inprimidu ô na formatu dijital. Tanbê, nu ten txeu vídiu i publikasons gravadu pa obi, ki pode djuda-nu ten un fé más fórti.

18. Modi ki lenbra palavras di Jeová ta omenta bu fé i ta da-u más koraji?

¹⁸ Nu debe lenbra sénpri di kuzê ki Jeová pâpia ku se Fidju kantu el staba na Téra. Kel ki Jeová fla sta skrebedu na Bíblia i el ta da-nu sertéza ma Jeová sta ta kontrola tudu kuza. Pur isu, el ta ben kaba ku tudu maldadi ki Satanás i se mundu sta ta faze. Nu krê sta disididu na presta atenson na kuzê ki Jeová ta fla. Si nu faze si, nu ta konsigi aguenta kalker prubléma ki nu sta ta pasa oji ô ki nu pode ben pasa na futuru. Bíblia ta lenbra-nu: ‘Nhos meste aguenta firmi, asi, dipôs ki nhos faze vontadi di Deus, nhos ta resebe se promésa ki sta pa kunpri.’ — Heb. 10:36.