1-2. (a) Kyebhi Jihova kyene mu zwela ni athu? (b) Ihi i twa-nda dilonga mu milongi yiyi?

JIHOVA wa wabhela kuzwela n’etu. M’ukulu mwene wa tu ijidisa o ixinganeku yê bhu kaxi ka jipolofeta, jyanju ni Mon’ê Jezú Kidistu. (Amo. 3:7; Nga. 3:19; Dij. 1:1) Lelu, mwene u zwela n’etu bhu kaxi ka Maka mê o Bibidya. Mwene wa tu bhana-u phala tu tene kudilonga o ixinganeku yê ni kutendela o jinjila jê.

² Kyoso Jezú kyexile mu ixi, Jihova wa zwela we tundé ku dyulu, mu ithangana itatu. Tu mone ya zwela Jihova, ihi i tu tena kudilonga mu izwelu yê, ni kyebhi ki tu tena kukatula mbote mu ima ya zwela.

3. Kala ki twa tange mu divulu dya Máluku 1:9-11, ihi ya zwela Jihova kyoso Jezú kya mu batizala? Milongi itatu yebhi ya zongo i londekesa o izwelu yóyo?

³ O divulu dya Máluku 1:9-11, di londekesa o kithangana kya dyanga kya zwela Jihova tundé ku dyulu. (Tanga.) Mwene wambe: ‘Eye u Mon’ami wa kazola, eme nga ku xikina.’ Kwívwa o izwelu ya henda ya Tat’ê, ni kwijiya kwila wa mu dyelele, sé phata kwa swinisa kyavulu Jezú! O izwelu ya Jihova i jimbulula milongi itatu ya zongo ya lungu ni Jezú. Kya dyanga, Jezú Mon’ê. Kayadi, Jihova wa zolo Mon’ê. Katatu, Jihova u xikina Mon’ê. Tu dilonge kyambote o milongi itatu yiyi.

4. Kyebhi Jezú kya bokona mu ukamba wa ubhe ni Nzambi, kyoso kya mu batizala?

⁴ ‘Eye u Mon’ami.’ Ni izwelu yiyi, Jihova wa londekesa kwila, o Mon’ê wa kazola Jezú wa bhangele ukamba wa ubhe ni  Mwene. Ande dya Jezú kwiza mu ixi, mwene wexile kyá mon’â Nzambi, mu nzumbi. Maji kyoso kya mu batizala, mwene wa kituka mon’â Nzambi mu ukexilu wa ubhe. Mu kithangana kyenyókyo Nzambi wa londekesa kwila Jezú mwene Mon’ê wa mu undu. Mu kithangana Kyenyókio wa tambula o kidyelelu kya kuvutuka ku dyulu phala kukala Sobha ni Mukunji wa Dikota a mu solo kwala Nzambi. (Luka 1:31-33; Jihe. 1:8, 9; 2:17) Mu kiki, tu tena kutendela mukonda dyahi kyoso kya batizala Jezú, Tat’ê wa tumbula o izwelu yiyi: “Eye mwène u Mon’ami.”—Luka 3:22.

5. Kyebhi ki tu tena kukayela o phangu ya Jihova ya kulondekesa henda ni kuswinisa?

⁵ “Eye mwène . . . nga ku zola.” O phangu ya Jihova ya kulondekesa henda ni kuxikina o athu, i tu swinisa kusota ithangana phala kuswinisa akwetu. (Nzwá 5:20) O kusanguluka kwetu ku di bandekesa dingi kyoso muthu u twa kwatekesa u tu londekesa henda hé u sakidila o mbote i twa mu bhangela. Kyene kimoxi we ni jiphange jetu mu kilunga, ni mwiji wetu a bhingi o kiswinisu kyetu. Kyoso ki tu ximana akwetu, tu kolesa o kixikanu kyâ, tu a kwatekesa kusidivila Jihova ni ufiyele woso. Benge-benge o jitata, a bhingi kuswinisa o twana twâ. Kyoso jitata kya ximana o twana twâ ni kidi kyoso, anga a a talatala ni henda, ene a a kwatekesa kubwingita mba kuswina dingi.

6. Mukonda dyahi tu tena kudyelela kwa Jezú Kidistu?

⁶ ‘Nga ku xikina.’ O izwelu yiyi ilondekesa kuma Jihova wa dyelele kwila Jezú weji kumbidila kyambote o vondadi ya Tat’ê. Mu kwijiya kwila Jihova wexile ni kidyelelu kwa mon’ê, ku tu bhangesa we kudyelela kwila Jezú wa-nda kumbidila kyambote o ikanenu yoso ya Jihova. (2 Kol. 1:20) Kyoso ki tu xinganeka o phangu ya Jezú, tu swina  dingi phala kudilonga ya lungu ni mwene ni kukayela o phangu yê. Kala Jihova kya dyelele Jezú, Mwene wa tu dyelela kala kibuka, jiselevende jê ja-nda suluka mu kudilonga dingi ni Mon’ê.—1 Phe. 2:21.

7. Kala ki londekesa Matesu 17:1-5, mu kithangana kyebhi kya zwela Jihova tundé ku dyulu? Ihi ya zwela?

⁷ Tanga Matesu 17:1-5. Jihova wa zwela mu veji ya kayadi tunde ku dyulu, kyoso Jezú kya mu ‘kitulula.’ Jezú wexana Phetele, Tiyaku ni Nzwá, phala ku mu xinjikila ku mulundu. Kwenyóko ene a mono kisunji. O pholo ya Jezú ya kexile mu sédima, o izwatu ya kexile mu bhenya. Kwa moneka mayala a yadi a lombolola Mozé ni Elija, a mateka kuzwela ni Jezú ya lungu ni ufwilu ni difukunukinu dyê. Sumbala o jipoxolo jitatu “akexile ni kilu kyavulu,” kyoso kya mono o kisumwa kiki a phaphumuka, a tono mesu. (Luka 9:29-32) Mu kusuluka, a a vungina ku dituta, ene evu dízwi dya tundu mu dituta—dyexile o dízwi dya Nzambi! Kyoso Jezú kya mu batizala, Jihova wa jimbulula kwila wa xikina, wa zolele mon’ê, mu kuzwela: “Yú mwéne o Mon’ami wa kazola, eme nga mu xikina.” Maji mu kithangana kiki Jihova wa bandekesa o izwelu: ‘Mu ividilyenu.’

8. Kyebhi kya divu Jezú ni maxibulu mê mu kumona o kisumwa?

⁸ O kisumwa kya mono Jezú kya mu londekesa o fuma ni kutena kweji tambula kala Sobha ya Utuminu wa Nzambi. Sé phata, kiki kya swinisa ni kukolokotesa Kidistu, mukonda dya hadi ya kufwa kwê kupholo. O kisumwa kya kolesa we o kixikanu kya maxibulu. Kiki kyeji kwa kwatekesa ku di pelepalala phala o ibhidi yeji polovala o ufiyele wâ, yeji di bhana na-yu kupholo. Mu kubhita 30 a mivu, poxolo Phetele wa londekesa kwila, o kisumwa kya monene kyexile hanji mu ixinganeku yê.—2 Phe. 1:16-18.

9. Kitendelesu kyebhi kyambote kya bhana Jezú ku maxibulu mê?

⁹ ‘Mu Ividilyenu.’ Jihova wa jimbulula kuma mwene wa mesena kwila, twívwa o dízwi dya Mon’ê ni ku mu belesela. Ihi ya zwela Jezú kyoso kyexile mu ixi? Mwene wa zwela ima yavulu i twa bhingi kwívwa! Mu kifika, mwene ni henda yoso wa tangela o akayedyê kyebhi kya tokalele kuboka o njimbu yambote, mu ji veji javulu wa a lembalesa phala kusuluka mu kudilanga. (Mat. 24:42; 28:19, 20) Mwene wa a swinisa phala kusuluka ni nguzu yoso sé kubhwila. (Luka 13:24) Jezú wa kolesa dingi o izwelu yê ku akayedyê phala ku di zola mudyâ, kusuluka mu kala ni muxima umoxi, ni kubelesela o itumu yê. (Nzwá 15:10, 12, 13) Sé phata o itendelesu ya bhana Jezú ku maxibulu mê, yexile itendelesu yambote! Yene yala hanji ni valolo lelu kala kyoso kya i bhanene Jezú.

10-11. Kyebhi ki tu tena kulondekesa kwila, twa mu kwívwa Jezú?

¹⁰ Jezú wambe: “Woso wa xikana o kidi, wívwa dízwi dyami.” (Nzwá 18:37) Tu londekesa kwila twa mu kwívwa o dízwi dyê kyoso ki tu ‘di lendukila ni kudikwatekesa mudyetu, mu ku di loloka.’ (Kol. 3:13; Luka 17:3, 4) Etu tu londekesa we kwila twa mu kwívwa o dízwi dyê mu kuboka o njimbu yambote ni kuswina ‘mu ithangana yambote ni mu ithangana ya bhonzo.’—2 Tim. 4:2.

¹¹ Jezú wambe: “O jimbudi jami, j’ívwa dízwi dyami.” (Nzwá 10:27) O akayedi a Kidistu k’évu ngó o dízwi dya Jezú, kana, maji a kumbidila yoso yevwa. Ene ka landuka ni “ibhindamu ya mwenyu yú.” (Luka 21:34) Mu veji dya kiki, kubelesela o itumu ya Jezú  né mwene mu ithangana ya bhonzo, kyene o kima kya beta-o-kota ku mwenyu wâ. Jiphange javulu a mu kolokota né mwene ni ibhidi yavulu, kala izukutisu ya jinguma jetu, wadyama wa ngadya-dya ni mavuwa. Sumbala ni ima yoso yiyi, ene a mu kolokota mu ufiyele kwa Jihova, mu ima yoso i moneka. Jezú wa a bhana o kidyelelu kiki: “Woso wa kwata o ijila yami, anga u i aluka, mwène muthu wa ngi zola. Woso-phe wa ngi zola, Tata yami u mu zola.”—Nzwá 14:21.

12. Mu ukexilu webhi dingi u tu tena kulondekesa kwila, twa mu kwívwa Jezú?

¹² Kwala dingi ukexilu wengi wa kulondekesa kwila twa mu kwívwa Jezú: Mu ku kalakala kumoxi ni yó a a bhana o kikalakalu kya kukala ku pholo dyetu. (Jihe. 13:7, 17) Mu mivu ya bhiti o kilunga kya Nzambi kya lungulula ima yavulu, kala o jindunge ni ukexilu wa kukalakala ni jifalamenda ja ubhe mu ukunji, o ukexilu wa kyônge kya kaxi ka semana, kutunga, kuyudika ni kulanga o Ididi yetu ya Ubhezelu. Tu sakidila kyavulu mukonda dya henda ni ukexilu wa ku tu langa! Sé phata, tu dyelela ni kidi kyoso kwila, Jihova wa-nda besowala o nguzu i tu bhanga phala kukayela o itendelesu ya kilunga kyê.

13. Mbote yebhi ijila mu kwívwa Jezú?

¹³ Tu katula mbote kyoso ki twívwa o ima yoso ya longo Jezú. Jezú wa kanena maxibulu mê kwila, o milongi yê yeji ku a tululukisa. Mwene wambe: ‘mwa-nda sanga kutululuka ku myenyu yenu.’ Wambe dingi: “Mukonda o muhamba wami wa bhebhuluka, o imbamba i ngi mi twika na-yu ki i neme.” (Mat. 11:28-30) O Mak’â Nzambi, kumoxi ni madivulu awana a zwela o izulukutu ya bhiti ku mwenyu ni ukunji wa Jezú, a tu tululukisa, a tu bhana nguzu mu nzumbi, a tu bhana kwijiya. (Jisá. 19:7; 23:3) Jezú wambe: “A zediwa yó evwa o maka ma Nzambi, anga a ma belesela!”—Luka 11:28.

14-15. (a) Kala ki londekesa o divulu dya Nzwá 12:27, 28, Jihova wa zwela tundé ku dyulu mu veji ya katatu mu kithangana kyebhi? (b) Mukonda dyahi o izwelu ya Jihova yeji ximbakatesa ni kuswinisa Jezú?

¹⁴ Tanga Nzwá 12:27, 28. O veji ya katatu ya zwela Jihova tundé ku dyulu, a isoneka mu divulu dya Nzwá. Tu izuwa ande dya kufwa kwê, Jezú wa ile ku Jeluzaleme phala kubhanga o Phasu yê ya sukina. Mwene wambe: “Muxima wa ngi kenanana.” Mu kusuluka wa sambe: “Tata, fumanesa o dijina dyé!” O Tat’ê wa mu  tambwijila tundé ku dyulu ni izwelu: ‘Nga di fumanesa kyá, nga-nda di fumanesa dingi.’

¹⁵ Jezú muxima wa mu kenanene mukonda dya kikalakalu kya dikota kyexile na-kyu, kya kukolokota mu ufiyele kwa Jihova. Jezú wejidile kwila, weji tala hadi yavulu, eji mu kwama, eji mu jibha. (Mat. 26:38) O kima kya betele kota phala Jezú kyexile kiki: kufumanesa o dijina dya Tat’ê! Jezú a mu tatela umbangi wa makutu kwila, wa xingi Nzambi. Mwene wa thandanganyele ni kixinganeku kya kwila, o ufwilu wê weji xingisa Nzambi. Sé phata, o izwelu ya Jihova ya bhana kidyelelu kwa Jezú! Mwene wa xikinine ni muxima woso kwila, o dijina dya Jihova eji di fumanesa. O izwelu ya Tat’ê ya bhana nguzu kwa Jezú phala kukolokota mu hadi yeji tala. Mu kithangana kyenyókyo, nange Jezú mwene ngó wa tendela o izwelu ya Tat’ê. Né kiki, Jihova wa bhange yoso phala o izwelu n’a isoneke phala etwenyoso.—Nzwá 12:29, 30.

16. Mukonda dyahi sayi ithangana tu tandanganya kyoso ki tu mona athu a mu xidisa o dijina dya Nzambi?

¹⁶ Kala kya bhange Jezú, etu we tu tandanganya phala o dijina dya Jihova ka dilebhule. Nange etu a tu talatala kya yibha, kala kya bhitile ni Jezú. Mba tu tandanganya kyoso ki twívwa misoso ya makutu ya lungu n’etu i mwanga o jinguma. Tu xinganeka we mu dilebhu di bhekela o misoso yiyi ku dijina ni kilunga kya Jihova. Ki twa bhingi kutandanganya kyavulu ni maka oso a tena kulebhula mba  kuxidisa o dijina ni kilunga kya Jihova. Tu tena kuxikina ni kidi kyoso kwila, “o kutululuka kwa Nzambi kwa somboka o kitongolwelu kyoso kya muthu, kwa-nda ku [tu] bateka mixima ni ilunji, mu ukamba ni Kidistu Jezú.” (Fil. 4:6, 7) Jihova wa-nda fumanesa jinga o dijina dyê mu ithangana yoso. Satanaji ni mundu wê ene mu bheka ibhidi ku jiselevende ja fiyele ja Jihova. Maji, bhu kaxi ka Utuminu, Jihova wa-nda zubha o hadi yoso yiyi.—Jisá. 94:22, 23; Iza. 65:17.

17. Kala ki londekesa Izaya 30:21, kyebhi Jihova kya zwela n’etu lelu?

¹⁷ Jihova wene mu zwela hanji n’etu lelu. (Tanga Izaya 30:21.) Mu kidi, etu ki twene mu kwívwa Nzambi kuzwela tundé ku dyulu. Maji mwene wene mu tu bhana itendelesu bhu kaxi ka Mak’â mê o Bibidya. Ku mbandu ya mukwá, o nzumbi ya Jihova i bhangesa o “kimbadi kya fiyele, kya dimuka” kusuluka ni kubhana o kudya ku jiselevende jê mu kithangana kya tokala. (Luka 12:42) Kwene kudya kwavulu mu nzumbi, kwene madivulu, jividyu javulu, madivulu mu awudyu, a tu kwatekesa kukolesa o kixikanu kyetu!

18. Kyebhi o izwelu ya Jihova ikolesa o kixikanu ni nguzu yé?

¹⁸ Ki tu jimbe o izwelu ya Jihova kyoso Mon’ê kyexile mu ixi! O izwelu ya Nzambi yo soneke mu Bibidya i tu dyelelesa kwila, Jihova u tena kulanga o ima yoso, ni kwila wa-nda zubha o kuyibha kwoso kwene mu tu bhekela Satanaji ni mundu wê wayibha. Tu bhange yoso ni yoso phala kwívwa kyambote o dízwi dya Jihova. Se tu bhanga kiki, twa-nda tena kukolokota mu maka oso-oso a moneka kindala ni mu ibhidi i tena kumoneka kupholo. O Bibidya i tu lembalesa: “Mwa bhingi mu kala ni kinyenge, kuma ki mwa kà zubha o kubhanga vondadi ya Nzambi, mwa kà tambula o polomesa yê.”—Jihe. 10:36.