ГОТАРА БОНА ҺИНБУНЕ 11
Гӧһ Бьдьнә Дәнге Йаһоԝа
«Әв ә Кӧрʹе мьни дәлал . . . Гӧһдарийа ԝи бькьн» (МӘТ. 17:5).
КʹЬЛАМА 89 Гӧһ Бьдә у Гӧһдар бә
ВЕ ГОТАРЕДА *
1-2. а) Чаԝа Йаһоԝа тʹәви мәрьва хәбәр дьдә? б) Әме ве готареда дәрһәԛа чь шеԝьр кьн?
ЙАҺОԜА һʹьз дькә мәрʹа хәбәр дә. Бәре әԝи бь сайа пʹехәмбәра, мьлйакʹәта у Кӧрʹе хԝә Иса Мәсиһ, фькьред хԝә мәрьварʹа әʹйан дькьр (Амс. 3:7; Галт. 3:19; Әʹйан. 1:1). Ле иро әԝ бь сайа Хәбәра хԝә, демәк бь Кʹьтеба Пироз тʹәви мә хәбәр дьдә. Әԝи Хәбәра хԝә да мә, сәва әм дәрһәԛа фькьр у ньһерʹандьна ԝи пебьһʹәсьн, у ӧса жи ԛьрара ԝи фәʹм кьн.
2 Ле чахе Иса сәр әʹрде бу, Йаһоԝа се щара жь әʹзмана хәбәр да. Ԝәрә әм шеԝьр кьн, кӧ һьнге Йаһоԝа чь гот, әм жь гьлийед ԝи чь һин дьбьн у чь кʹаре дьстиньн.
«ТӦ ЙИ КӦРʹЕ МЬНИ ДӘЛАЛ»
3. Ль гора Марԛос 1:9-11, Йаһоԝа чь гот чахе Иса һатә ньхӧмандьне, у әԝ гьли кʹижан тьштед фәрз дьдьнә кʹьфше?
3 Щара пешьн чахе Йаһоԝа жь әʹзмана хәбәр да, кʹьтеба Марԛос 1:9-11-да ньвисар ә. (Бьхунә.) Әԝи гот: «Тӧ йи Кӧрʹе мьни дәлал, әз жь тә рʹази мә». Бьдьнә һʹәсабе хԝә, дьле Иса ча ша бу чахе дәнге Баве хԝә бьһист, кӧ һʹьзкьрьн у итʹбари һьндава ԝида да кʹьфше. Гьлийед Йаһоԝа се тьштед фәрз дәрһәԛа Иса әʹйан дькьн. Йа пешьн, Иса Кӧрʹе ԝи йә. Йа дӧда, Йаһоԝа Кӧрʹе хԝә һʹьз дькә. У йа сьсийа, Әԝ Кӧрʹе хԝә ԛәбул дькә. Ԝәрә әм ԝан се тьштед фәрз һур бь һур шеԝьр кьн.
4. Паши ньхӧмандьне Иса чь щурʹәйи бу Кӧрʹе Хԝәде?
4 «Тӧ йи Кӧрʹе мьн». Бь ԝан гьлийа, Йаһоԝа да кʹьфше, ԝәки Кӧрʹе ԝийи дәлал Иса, кʹәтә һәләԛәтийа тʹәзә тʹәви Ԝи. Чахе Иса сәр әʹзмана бу, әԝ Кӧрʹе Хԝәдейи рʹӧһʹани бу. Ле паши ньхӧмандьне, әԝ пе рʹӧһʹе пироз һатә кʹьфшкьрьне. Һьнге Хԝәде да кʹьфше, ԝәки Иса чаԝа Кӧрʹе ԝийи бьжарти, ԝе вәгәрʹә ль әʹзмана, сәва бьбә Пʹадша у Сәрәккʹаһин, кʹижан кӧ Хԝәде кʹьфшкьрьбу (Луԛа 1:31-33; Ибрн. 1:8, 9; 2:17). Бәле, фәʹмдари йә кӧ чьрʹа Баве ԝи паши ньхӧмандьна ԝи жерʹа гот: «Тӧ йи Кӧрʹе мьн» (Луԛа 3:22).
Әм гәш дьбьн чахе пʹайе мә дьдьн у дьл дьдьнә мә (Бьньһерʹә абзаса 5) *
5. Әм ча дькарьн һʹьзкьрьн у дьлдайинеда чʹәʹв бьдьнә Йаһоԝа?
5 «Тӧ йи Кӧрʹе мьни дәлал». Йаһоԝа бь ԝан гьлийа һʹьзкьрьн у ԛәбулкьрьна хԝә да кʹьфше, у ве йәкеда мәрʹа мәсәлә һишт. Әм жи гәрәке тʹьме дьл бьдьнә мәрьва (Йуһʹн. 5:20). Әм әшԛ у ша дьбьн чахе кәсәк жь ԝан, бона кʹижана әм хәм дькьн, мәрʹа һʹьзкьрьне дьдә кʹьфше у бона кьред мәйи ԛәнщ пʹайе мә дьдә. Ӧса жи хушк-бьред мәйи щьвате, у нәфәред мә һʹәԝще һʹьзкьрьн у дьлдайине нә. Чахе әм пʹайе ԝан дьдьн, әм баԝәрийа ԝан ԛәԝи дькьн у али ԝан дькьн бь амьни Йаһоԝарʹа хьзмәт кьн. Де-бав илаһи гәрәке дьл бьдьнә зарʹед хԝә. Чахе де-бав пʹайе зарʹед хԝә дьдьн у һʹьзкьрьна хԝә дьдьнә кʹьфше, әԝана али зарʹед хԝә дькьн, ԝәки гәш бьн у ԛәԝи бьн.
6. Чьрʹа әм гәрәке Иса Мәсиһда дӧдьли нәбьн?
6 «Әз жь тә рʹази мә». Әԝ гьли дьдьнә кʹьфше, ԝәки Йаһоԝа Исада дӧдьли нибу, кӧ әԝ ԝе бь амьни ԛьрара Баве хԝә бинә сери. Һәрге Йаһоԝа Кӧрʹе хԝәда дӧдьли нинә, әм жи гәрәке итʹбарийа хԝә Иса биньн, кӧ ԝе һʹәму созед Йаһоԝа бинә сери (2 Корн. 1:20). Чахе әм дәрһәԛа мәсәла Иса дьфькьрьн, әм һе зедә дьхԝазьн жь ԝи һин бьн у чʹәʹв бьдьнә ԝи. Йаһоԝа хьзмәткʹаред хԝәда жи баԝәр ә, кӧ әԝана ԝе бәрдәԝам кьн жь Кӧрʹе ԝи һин бьн (1 Пәт. 2:21).
«ГӦҺДАРИЙА ԜИ БЬКЬН»
7. Ль гора Мәтта 17:1-5, кʹижан дәрәщеда Йаһоԝа диса жь әʹзмана хәбәр да, у әԝи чь гот?
7 Бьхунә Мәтта 17:1-5. Щара дӧда Йаһоԝа жь әʹзмана хәбәр да, чахе Иса ль бәр чʹәʹве шагьрта һатә «гӧһастьне». Иса Пәтрус, Аԛуб у Йуһʹәнна тʹәви хԝә бьрә сәр чʹийаки бьльнд. Чахе әԝана ԝедәре бун, шагьрта хәԝн-хәйаләкә әʹщеб дитьн. Рʹуйе Иса бьрьԛи у кʹьнще ԝи чил-ԛәрԛаш бун. Дӧ кәс кӧ мина Муса у Елйас бун, дәстпекьрьн тʹәви Иса хәбәр дьн дәрһәԛа мьрьн у рʹабуна ԝи жь мьрийа. Рʹаст ә чʹәʹвед ԝан се шандийа кӧ ԝедәре бун «жь хәԝе гьран бьбун», йәкә гава әԝана һʹьшйар бун, ԝана әԝ хәԝн-хәйала мәхсус дитьн (Луԛа 9:29-32). Паше, әʹԝрәки сәр ԝан кьрә си, у ԝана дәнгәк жь әʹԝр бьһист, әԝ дәнге Хԝәде бу! Чаԝа кӧ Йаһоԝа паши ньхӧмандьна Иса, һʹьзкьрьн у ԛәбулкьрьна хԝә Кӧрʹе хԝәрʹа да кʹьфше, әԝи ве дәме жи әԝ йәк да кʹьфше кӧ гот: «Әв ә Кӧрʹе мьни дәлал, кӧ әз же рʹази мә». Ле паше Йаһоԝа ӧса жи гот: «Гӧһдарийа ԝи бькьн».
8. Хәԝн-хәйал ча сәр Иса у шагьртед ԝи һʹӧкӧм бу?
8 Әԝе хәԝн-хәйале әʹйан кьр рʹумәт у ԛәԝата Исайә ахьрийе, ча Пʹадша Пʹадшатийа Хԝәдеда. Бешьк, әԝе йәке дьл да ԝи у шьданд, чьмки щәфе гьран у мьрьна бь чәрчьрандьне пешийа ԝи бу. Әԝе хәԝн-хәйале ӧса жи баԝәрийа шагьрта һе ԛәԝи кьр у әԝана шьдандьн бона щерʹьбандьн у шьхӧлед ахьрийе, кӧ пешийа ԝан бу. Ԝәкә 30 сал шунда, Пәтрусе шанди диса бәʹса ве хәԝн-хәйале кьр у да кʹьфше, ԝәки әԝ һәла һе рʹьнд бира ԝида йә (2 Пәт. 1:16-18).
9. Иса кʹижан ширәта фәрз да шагьртед хԝә?
9 «Гӧһдарийа ԝи бькьн». Йаһоԝа әшкәрә да кʹьфше, ԝәки әԝ дьхԝазә кӧ әм гӧһ бьдьнә гьлийед Кӧрʹе ԝи у гӧрʹа ԝи бькьн. Ле Иса чь дьгот чахе сәр әʹрде бу? Әԝи гәләк тьштед фәрз дьгот, кӧ рʹасти жи һежа бун гӧһ бьдьне. Мәсәлә, әԝи бь һʹьзкьрьн шагьртед хԝә һин кьр, ԝәки чаԝа мьзгинийе бәла кьн, у гәләк щар дьани бира ԝан, ԝәки һʹьшйар бьминьн (Мәт. 24:42; 28:19, 20). Әԝи ӧса жи әԝана ширәт кьрьн, ԝәки бьщәʹдиньн кӧ дәре тәнгрʹа бькʹәвьнә һьндӧрʹ, у дьл да ԝан ԝәки сьст нәбьн (Луԛа 13:24). Иса да кʹьфше кӧ гәләк фәрз ә шагьртед ԝи һәв һʹьз бькьн, йәктийеда бьминьн, у тʹәмийед ԝи биньн сери (Йуһʹн. 15:10, 12, 13). Әԝ ширәт бона шагьртед Иса рʹасти жи керһати бу, у һʹәта иро гәләк фәрз ә.
10-11. Әм ча дькарьн нишан кьн, ԝәки гӧһ дьдьнә Иса?
10 Иса гот: «Һәр кәсе кӧ жь алийе рʹастийе йә, гӧһ дьдә дәнге мьн» (Йуһʹн. 18:37). Әме нишан кьн, ԝәки гӧһ дьдьнә дәнге ԝи, һәрге бәрдәԝам кьн «ль һәв сәбьр кьн у ль һәв бьбахшиньн» (Колс. 3:13; Луԛа 17:3, 4). Хенщи ве йәке, әм гӧһ дьдьнә дәнге ԝи, чахе бь хирәт мьзгинийе бәла дькьн ԝәхте баш у ԝәхте чәтьнда жи (2 Тимтʹ. 4:2).
11 Иса гот: «Пәзед мьн дәнге мьн дьбьһен» (Йуһʹн. 10:27). Шагьртед Иса нә тʹәне гӧһ дьдьнә Иса, ле ӧса жи гьлийед ԝи тиньн сери. Әԝана «хәмед ве дьнйайева» гьредайи ниньн (Луԛа 21:34). Дәԝсе, әʹмьре ԝанда тʹәмийед Иса щийе гәләк фәрз дьгьрьн, һәла һе жи гава ԝанрʹа зәʹф чәтьн ә. Гәләк хушк-бьред мә тәнгасийед гьран дькʹьшиньн, бәʹса хәбәре зерʹандьна дьжмьна, кʹәсибийе, у тʹәшԛәлед тʹәбийәте. Әԝана Йаһоԝарʹа амьн дьминьн, фьрԛи тʹӧнә бькʹәвьнә чь чәтьнайа жи. Бона ԝан Иса созед ӧса дьдә: «Әԝе кӧ тʹәмийед мьн ԛәбул дькә у ԝан хԝәй дькә, әԝ ә йе кӧ мьн һʹьз дькә. У әԝе кӧ мьн һʹьз дькә, әԝе жь алийе Баве мьнда бе һʹьзкьрьне» (Йуһʹн. 14:21).
Хьзмәтийа мә али мә дькә гӧһ бьдьнә Иса (Бьньһерʹә абзаса 12) *
12. Диса чь щурʹәйи әм дькарьн нишан кьн, ԝәки гӧһ дьдьнә Иса?
12 Чахе әм һәвкʹарийе тʹәви бьред щабдар дькьн, һьнге жи әм нишан дькьн, ԝәки гӧһ дьдьнә Иса (Ибрн. 13:7, 17). Тʹәшкиләта Хԝәде ԝан салед пашԝәхтийеда гәләк гӧһастьна дькә. Мәсәлә, һащәтед у методед тʹәзә хьзмәтийеда тенә хәбьтандьне, щьвата хьзмәтийе ида бь щурʹе тʹәзә те дәрбазкьрьне, у авакьрьн, тʹәзәкьрьн у хԝәйкьрьна Одед Щьвата, һатьнә гӧһастьне. Әм гәләк рʹази нә бона ԝан рʹебәрийед кӧ әм ԝәʹдәда дьстиньн. Әм гәрәке дӧдьли нәбьн кӧ Йаһоԝа ԝе мә кʹәрәм кә, һәрге әм пәй рʹебәрийа тʹәшкиләта ԝи дьчьн.
13. Әм чь кʹаре дьстиньн гава гӧһ дьдьнә Иса?
13 Әм кʹаре дьстиньн чахе гӧһ дьдьн һʹәму тьштед кӧ Иса мә һин дькә. Иса соз да шагьртед хԝә, ԝәки һинкьрьнед ԝи ԝе дьле ԝан рʹьһʹәт кьн у гәш кьн. Әԝи гот: «Һуне хԝәрʹа рʹьһʹәтийе бьбиньн. Чьмки нире мьн рʹьһʹәт ә у баре мьн сьвьк ә» (Мәт. 11:28-30). Хәбәра Хԝәде, кʹидәреда ӧса жи дәрһәԛа әʹмьре Иса у хьзмәтийа ԝи те гьликьрьне, мә дьлгәш дькә, рʹӧһʹанида ԛәԝи дькә у билан дькә (Зәб. 19:7; 23:3). Иса гот: «Хԝәзи ль ԝан, йед кӧ хәбәра Хԝәде дьбьһен у пек тиньн» (Луԛа 11:28).
ӘЗЕ НАВЕ ХԜӘ БЬЛЬНД КЬМ
14-15. а) Ль гора Йуһʹәнна 12:27, 28, кʹәнге щара сьсийа Йаһоԝа жь әʹзмана хәбәр да? б) Чьрʹа гьлийед Йаһоԝа дьл данә Иса у ԝи ԛәԝи кьрьн?
14 Бьхунә Йуһʹәнна 12:27, 28. Щара сьсийа чахе Йаһоԝа жь әʹзмана хәбәр да, кʹьтеба Йуһʹәннада ньвисар ә. Иса чәнд рʹож пешийа мьрьна хԝә, Оршәлимеда бу сәва Щәжьна Дәрбазбуне дәрбаз кә. Әԝи гот: «Агьр дьле мьн кʹәтийә». Паше әԝи дӧа кьр у гот: «Баво, наве хԝә бьльнд кә». Һьнге Иса бьһист ча Баве ԝи жь әʹзмана щаба дӧайе ԝи да, гот: «Мьн бьльнд кьр у әзе диса бьльнд кьм».
15 Иса гәләк бәрхԝә дькʹәт, чьмки щабдарийа мәзьн сәр стуйе ԝи бу, әԝ гәрәке Йаһоԝарʹа амьн бьма. Иса заньбу, ԝәки әԝ гәрәке щәфе гьран бькʹьшинә у берʹәʹмти бе кӧштьне (Мәт. 26:38). Ле йа лапә фәрз бона Иса әԝ бу, кӧ наве Баве ԝи бе рʹумәткьрьне. Иса кʹьфьрийеда нәһәԛ дькьрьн у әԝ зәʹф бәрхԝә дькʹәт, чьмки нәдьхԝәст ԝәки мьрьна ԝи наве Хԝәде беһӧрмәт кә. Ле бьдьнә һʹәсабе хԝә, гьлийед Йаһоԝа чьԛас дьле Иса рʹьһʹәт кьрьн! Иса ида дькарьбу дӧдьли нибуйа, ԝәки наве Йаһоԝа ԝе бе бьльндкьрьне. Гьлийед Баве ԝи гәләк дьл данә ԝи у әԝ ԛәԝи кьрьн бона ԝан тәнгасийа кӧ пешийа ԝи бун. Рʹаст ә дьбәкә тʹәне Иса һьнге гьлийе Баве хԝә фәʹм кьр, ле Йаһоԝа ӧса кьр, ԝәки гьлийе Ԝи бона мә һʹәмуйа бенә ньвисаре у хԝәйкьрьне (Йуһʹн. 12:29, 30).
Йаһоԝа ԝе наве хԝә бьльнд кә у щьмәʹта хԝә хьлаз кә (Бьньһерʹә абзаса 16) *
16. Чьрʹа щара әм бәрхԝә дькʹәвьн бона наве Хԝәде?
16 Әм жи мина Иса дьбәкә бәрхԝә дькʹәвьн, ԝәки наве Йаһоԝа нәйе беһӧрмәткьрьне. Дьԛәԝьмә мә нәһәԛ дькьн у бӧхдана давежьнә мә. Йан жи дьбәкә дьле мә нәрʹьһʹәт ә, чьмки әм дәрһәԛа хԝә тьштед ԛәлп дьбьһен, кӧ дьжмьнед мә бәла дькьн. Һьнге дькарә фькьред ӧса бенә һʹьше мә, ԝәки әԝ дәрәԝи наве Йаһоԝа у тʹәшкиләта ԝи хьраб дькьн. Ле дәрәщед ӧсада гьлийед Йаһоԝа рʹасти жи бәрдьликә мәзьн дьдьнә мә. Әм гәрәке зәʹф бәрхԝә нәкʹәвьн бона ве йәке. Ӧса жи әм гәрәке дӧдьли нәбьн, кӧ «әʹдьлайийа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред ԝә йәктийа Мәсиһ Исада хԝәй кә» (Фили. 4:6, 7). Наве Йаһоԝа ԝе тʹьме һӧрмәт-рʹумәт бә. Йаһоԝа бь сайа Пʹадшатийа хԝә, ԝе һʹәму зийана кӧ Шәйтʹан у дьнйа ԝи хьзмәткʹаред Ԝирʹа тиньн, кʹӧта кә (Зәб. 94:22, 23; Иша. 65:17).
ГӦҺ БЬДЬНӘ ДӘНГЕ ЙАҺОԜА У КʹӘРӘМА БЬСТИНЬН
17. Анәгори Ишайа 30:21, ча Йаһоԝа иро тʹәви мә хәбәр дьдә?
17 Йаһоԝа һʹәта иро тʹәви мә хәбәр дьдә. (Бьхунә Ишайа 30:21.) Рʹаст ә әԝ жь әʹзмана мәрʹа хәбәр надә, ле әԝи Хәбәра хԝә, демәк Кʹьтеба Пироз дайә мә, бь сайа кʹижани әԝ рʹебәрийе дьдә мә. Хенщи ве йәке, рʹӧһʹе Йаһоԝа рʹебәрийе «ԝәкʹилхәрще амьн» дькә, сәва хԝарьна рʹӧһʹани бьдә хьзмәткʹаред Ԝи (Луԛа 12:42). Иро әм беһʹәсаб хԝарьна рʹӧһʹани дьстиньн, демәк әʹдәбйәтед нәшьркьри у йед онлайн, ӧса жи видео у аудийо!
18. Чаԝа гьлийед Йаһоԝа баԝәрийа ԝә ԛәԝи дькьн у мерхасийе дьдьнә ԝә?
18 Ԝәрә әм тʹӧ щар бир нәкьн гьлийед Йаһоԝа, кӧ әԝи Кӧрʹе хԝәрʹа гот! Бьра әԝ гьлийед Хԝәде кӧ Кʹьтеба Пирозда һатьнә ньвисаре, баԝәрийа мә ԛәԝи кьн ве йәкеда, кӧ һʹәму тьшт бьн контрола ԝида нә, у әԝ ԝе һʹәму зийан кӧ Шәйтʹан у дьнйа ԝийә хьраб анин, кʹокева бьдә һьлдане. Ԝәрә әм хԝәрʹа ԛьрар кьн, кӧ тʹьме рʹьнд гӧһ бьдьнә дәнге Йаһоԝа. Һәрге әм ӧса бькьн, әме ԛәԝи бьминьн ԝан чәтьнайада кӧ иро һәнә у йед кӧ ԝе рʹасти мә бен. Кʹьтеба Пироз мәрʹа дьбежә: «Ԝәрʹа сәбьр лазьм ә кӧ һун әʹмьре Хԝәде биньнә сери у бьгьһижьнә созе ԝи» (Ибрн. 10:36).
КʹЬЛАМА 4 «Йаһоԝа Шьване Мьн ә»
^ абз. 5 Чахе Иса сәр әʹрде бу, Йаһоԝа жь әʹзмана се щара хәбәр да. Щарәке әԝи тʹәми да шагьртед Мәсиһ, кӧ гӧһ бьдьнә Кӧрʹе ԝи. Иро Йаһоԝа мәрʹа хәбәр дьдә бь сайа Хәбәра хԝә, кʹижанида һинкьрьнед Иса һәнә, у ӧса жи бь сайа тʹәшкиләта хԝә. Ԝе готареда ԝе бе шеԝьркьрьне, кӧ әм чь кʹаре дьстиньн чахе гӧһдарийа Йаһоԝа у Иса дькьн.
^ абз. 52 ШЬРОВӘКЬРЬНА ШЬКЛА: Рʹуспи дина хԝә дьдә бәрдәстийе щьвате, йе кӧ аликʹарийе дьдә тʹәмьзкьрьна Ода Щьвата у щабдарийа хԝә бона әʹдәбйәта тинә сери. Рʹуспи бь дьл у щан пʹайе ԝи дьдә.
^ абз. 54 ШЬРОВӘКЬРЬНА ШЬКЬЛ: Жьн-мер Сиерра-Леонеда тʹәглифкьрьна сәр щьвате дьдьнә нечʹирванәки.
^ абз. 56 ШЬРОВӘКЬРЬНА ШЬКЬЛ: Ԝәлатәкида кʹидәре шьхӧле мә ԛәдәхәкьри йә, Шәʹдед Йаһоԝа дьзикава малда тʹоп бунә. Ԝана кʹьнще һәррʹожи хԝә кьрийә, сәва нәкʹәвьнә чʹәʹва.
