1-2. (a) Yehova abirikania athi n’abandu? (b) Thukendi kania okuki omo mwatsi ono?

YEHOVA anzire erikania nethu. Kera, mwakolesya abaminyereri, abamalaika, na Mughalha wiwe, Kristo Yesu, erithubwira amalengekania wiwe. (Amo. 3:7; Gal. 3:19; Erib. 1:1) Munabwire, akakanaya nethu erilhabira omwa Kinywe kiwe, e Biblia. Mwathuhakyo nuku thwangaminya amalengekania wiwe n’eriyitheghererya esyonzira siwe.

² Yesu iniane okwa kihugho, Yehova mwabughira elhubulha ngendu isathu. Thulebaye ebya Yehova abugha, ebya thwangigha omwa binywe biwe, kandi ngoku thukaghasirawa omwa by’abugha.

3. Ngoku kiri omwa Mariko 1:9-11, ni byahi ebya Yehova abugha Yesu akabatizibwa, kandi ebinywe ebi bikaghumaya ekwenene yahi?

³ Mariko 1:9-11 hakathubwira oko ngendo y’erimbere Yehova akakania erilhua elhubulha. (Soma.) Mwabugha athi: “Wuli mughalha waghe mwanze; namakutsemera ndeke.” Kyangabya imukyatsemesya kutsibu Yesu eriowa omulenge wa Thatha wiwe ow’akakanganaya olhwanzo n’erimukakasya! Ebinywe bya Yehova mubyakangania ebindu bikulhu bisathu ebihambire oku Yesu. Eky’erimbere, Yesu ni Mughalha wiwe. Ekyakabiri, Yehova anzire Mughalha wiwe. N’ekyakasathu, Yehova akatsemera Mughalha wiwe. Thulebaye ndeke kighuma okwa kighuma.

4. Ni bughuma bwahi buhyaka obwa Yesu ingiramu na Nyamuhanga akabatizibwa?

⁴ “Wuli Mughalha waghe.” Omwa binywe ebi, Yehova mwakangania  ngoku Mughalha wiwe mwanze, Yesu, abiringira omwa bughuma buhyaka Nayu. Yesu iniane elhubulha, abya inina mughalha wa Nyamuhanga. Aliwe, mwabya akabatizibwa, mwabya Mughalha wa Nyamuhanga omwa nzira y’embaghane akahakabibwa omwa mulimu abuyirire. Okwa ndambi eyo, Nyamuhanga mwakangania athi lino Yesu nga Mughalha Wiwe omuhakabibwa awithe amaha w’erithasyasuba elhubulha eriyabya Mwami musombolhwa wa Nyamuhanga kandi Muhereri Mukulhu. (Lk. 1:31-33; Ebr. 2:17) Neryo Yesu akabatizibwa, Thatha wiwe abya awithe enzumwa mbuya y’eribugha athi: “Wuli Mughalha waghe.”​—Lk. 3:22.

5. Thwanga gherererya thuthi eky’erileberyako kya Yehova omw’ikangania olhwanzo n’erisima?

⁵ “Wuli . . . mwanze.” Eky’erileberyako kya Yehova eky’erikangania olhwanzo n’erisima kikathw’ibukaya erisondekania ehighisa hy’erihimba abandi. (Yn. 5:20) Thukayowa ndeke omundu oyuthutsomene amathukangania olhwanzo n’erithusima thukakolha ebyuwene. Kuthya, abalikyethu n’ab’omw’eka yethu bakayithagha olhwanzo lhwethu n’eribahira mw’amani. Thukabya thukasima abandi, thukaghumaya erikirirya lyabu n’eribawathikya erikolera Yehova buthaleghulha. Kutsibu-tsibu ababuthi batholere ibahira omwa baana babu mw’omuhwa. Omughulhu ababuthi bakasima abaana babu erilhua okwa muthima n’eribakangania olhwanzo, bakabya ibamabawathikya erikulha-kulhana.

6. Busana naki ithwayikethera Yesu Kristo?

⁶ “Namakutsemera ndeke.” Ebinywe ebi bikakanganaya ngoku Yehova abya ayikethere ngoku Yesu akendi kolha buthaleghulha erisonda lya Thatha wiwe. Kundi Yehova awithe eriyikethera ng’eri omu Mughalha wiwe, nethu kuthya thwangana yikethera ndeke-ndeke  ngoku Yesu akendi berererya buthaleghulha emilhaghe yosi ya Yehova. (2 Kor. 1:20) Thukabya thukalengekania okwa ky’erileberyako kya Yesu, kikathasyaghumaya erithwamu lyethu ly’erimugherererya n’erikwama olhughobe lhwiwe. Kuthya Yehova ayikethere ngoku abaghombe biwe, ng’egurupu, bakendi lholha embere erighira oku Mughalha wiwe.​—1 Pet. 2:21.

7. Ngoku kiri omu Matayo 17:1-5, Yehova abughira elhubulha mughulhu wahi, kandi mwabugha athiki?

⁷ Soma Matayo 17:1-5. Engendo yakabiri Yehova akabughira elhubulha mw’omughulhu Yesu ‘ahindukibawa.’ Yesu abya iniabirighenda na Petero, Yakobo, na Yoane okwa kithwa kiri-kiri. Ibane eyo, omwa siri nga nzoli mubakanganibwa ekikathikaya. Obusu bwa Yesu mubwakangabasania ng’eryuba n’esyongyimba siwe musyahenia n’erikangabasania. Abandu babiri, abak’imanira Musa na Eliya, mubatsuka erikania na Yesu okwa lhuholho lhwiwe n’erilhubuka liwe. Nomwakine indi abakwenda basathu “mubayitsingirako n’othughotseri,” babere babuka ndeke, mubalhangira esyonzoli esikathikaya esi. (Lk. 9:29-32) Ekyakwamako, ekithu ekikangabasenie mukyaswikabo, neryo bam’owa omulenge akalhua omwa bithu​—omulenge wa Nyamuhanga! Ngoku byanabya okw’ibatizibwa lya Yesu, Yehova kandi mwakangania kw’akaligha Mughalha wiwe n’erimwanza, omw’ibugha athi: “Oyu ni Mughalha waghe mwanze, namamutsemera ndeke.” Aliwe engendo eyi Yehova mw’ongerako athi: “Mumwowe!”

8. Esyonzoli musyahamba sithi oku Yesu n’abigha?

⁸ Esyonzoli esyo musyakangania olhukengerwa n’obuthoki bwa Yesu eby’obuthuku bw’embere ng’Omwami w’Obwami bwa Nyamuhanga. Ahathe erithika-thika, Kristo mwasikibwa omuthima n’erighumibwa busana n’olhuholho lhw’obulhumi olhwabya embere siwe. Kandi esyonzoli musyaghumya erikirirya ly’abigha n’eribawathikya eriyitheghekera ebitsibu ebyo bangabwene n’omubiiri owakalire owabya embere. Ihamabirilhaba myaka nga 30, omukwenda Petero mwakania okwa syonzoli sy’erihindukibwa, erikangania ngoku abya iniakinasyibukire ndeke-ndeke.​—2 Pet. 1:16-18.

9. Ni habulha lyahi ly’omughaso erya Yesu aha abigha biwe?

⁹ “Mumwowe.” Yehova mwakangania ndeke-ndeke ngoku anzire ithwahulikirira ebinywe bya Mughalha wiwe n’eribighenderako. Ni byahi ebya Yesu abugha omughulhu abya okwa kihugho? Mwabugha ebinywe bingyi ebyuwene! Ng’eky’erileberyako, omo lhwanzo mwakangirirya abamukwamire ngoku banga thulha engulha yuwene, kandi mwabibukya ngendo nyingyi eribya ibanatheghirye. (Mt. 24:42; 28:19, 20) Kandi mwababwira athi bayikase kutsibu, n’eribabwira athi isibalhuha. (Lk. 13:24) Yesu mwahira omuwatho w’okwa kiyithawa ky’abigha biwe erianzana, eribya bughuma, n’erikenga ebihano biwe. (Yn. 15:10, 12, 13) Eryo ka lyabya ihabulha eryuwene erya Yesu aha abigha biwe! Erihabulha eryo likine ly’omughaso munabwire ngoku lyanabya omughulhu Yesu aliha.

10-11. Thwanga kangania thuthi ku thunemuhulikirira Yesu?

¹⁰ Yesu mwabugha athi: “Obuli mundu w’omwatsi w’ekwenene akowa omulenge waghe.” (Yn. 18:37) Thukakanganaya ku thunemuhulikirira omulenge wiwe thwamalholha embere ‘erighanyirana, n’eribuyirana.’ (Kol. 3:13; Lk. 17:3, 4) Thukathasyakanganaya ku thunemuhulikirira omulenge wiwe omw’ithulha n’omuhwa engulhu yuwene “oko mughulhu mubi, kutse oko mughulhu owene.”​—2 Tim. 4:2.

¹¹ Yesu mwabugha athi: “Esyombuli syaghe  sik’owa omulenge waghe.” (Yn. 10:27) Abakwamire Kristo bakakanganaya ku bakowa Yesu butsira omw’ihulikirira ebinywe biwe lisa aliwe n’erikolhabyo. Sibali lengemeribawa “n’amalengekania w’engebe.” (Lk. 21:34) Omwakanya k’ekyo, erikenga ebihano bya Yesu kya bakahira embere, n’omwa mibere eyikalire. Balikyethu bangyi banemughumira ebitsibu ebikalire, ng’erithahirirwa n’abahakani, obunakwa obukalire, n’ebitsinduli. Omwa byosi ebi, bakasighalha bathaleghulha oku Yehova, nomubanga ghalhwa bathi. Yesu akabakakasaya athya: “Oyuwithe ebihano byaghe n’erikengabyo, yo yukanyanza; kandi Thatha waghe asyanza oyukanyanza.”​—Yn. 14:21.

12. Ni yindi nzira yahi y’erikanganiryamu ku thunemuhulikirira Yesu?

¹² Eyindi nzira y’erikanganiryamu ku thunemuhulikirira Yesu y’eno: omw’ikolongana ndeke n’abo abirisombolha erithusondolha. (Ebr. 13:7, 17) Omwa myaka ya lino-lino ekithunga kya Yehova kyabirikolha esyombinduka nyingyi, imwamuli erikolesya ebindu bihya-bihya n’emibere mihya y’erithulira, embinduka omwa mihindano y’omwa kathi-kathi k’eyenga, n’emibere y’erihimba, erisuba-subania, n’erisugha Ebisenge byethu by’Obwami. Ka thukasima erihebwa obusondoli obukahebawa omo lhwanzo n’obuyitheghererya! Thwangana yikethera ngoku Yehova akendi tsumulha akaghalha kethu k’erikwama obusondoli bw’ekithunga.

13. Emighaso y’erihulikirira Yesu ni yahi?

¹³ Thukaghasirawa thwamahulikirira ebyosi ebya Yesu akangiriraya. Yesu mwakakasya abigha biwe ngoku erikangirirya liwe likendi balhuhukya. Mwabugha athi: “Mwasyabana erilhuhuka omwa mithima yenyu. Kusangwa engomo yaghe ni nyibuya, n’omuheke waghe anguhire.” (Mt. 11:28-30) Ekinywe kya Nyamuhanga, imwamuli n’ebitabu bbini by’Enjiri ebikakanaya okwa ngebe ya Yesu n’omubiiri wiwe, bikathulhuhukaya, ithwathasyathunga amaaka bunyakirimu, n’erileka ithwabya n’amenge. (Esy. 19:7; 23:3) Yesu mwabugha athi: “Obutseme buli okwa bakowa ekinywe kya Nyamuhanga n’erikolhakyo.”​—Lk. 11:28.

14-15. (a) Engendo yakasathu, ngoku kiri omu Yoane 12:27, 28, eya Yehova abughiramu elhubulha ni yahi? (b) Busana naki ebinywe bya Yehova byangabya imubyahumulikania n’erighumya Yesu?

¹⁴ Soma Yoane 12:27, 28. Enjiri ya Yoane mune engendo yakasathu Yehova akabughira elhubulha. Biro bike isyali aholha, Yesu abya e Yerusalemu okwa kiro kikulhu kiwe  eky’Erikyuruka eky’erighunzerera. Mwabugha athi: “Omuthima waghe amahuka-huka.” Neryo mwasaba athi: “Thatha, wulethe olhukengerwa okwa lina lyawu.” Thatha wiwe mwamusubirya erilhua elhubulha athi: “Nabirihamyalyo, kandi nasyaswahamyalyo.”

¹⁵ Omuthima wa Yesu ahuka-huka busana n’olhukwamirwa olhulithohire olhw’eribya iniatholere erisighalha muthaleghulha oku Yehova. Yesu abya inianasi ngoku akayaswiribawa kutsibu n’erithibwa. (Mt. 26:38) Oku Yesu, ekindu kikulhu kutsibu lyabya iry’erihamya erina lya Thatha wiwe. Yesu mwahulhwa mwa mutsumi, kandi iniayilhalikirire athi olhuholho lhwiwe lhwangana kinia erina lya Nyamuhanga. Ahathe erithika-thika ebinywe bya Yehova mubyaleka Yesu iniasika! Mwakakasibwa ngoku erina lya Yehova likendi hamibwa. Ebinywe bya Thatha wiwe byangabya imubyamuhumulikania kutsibu n’erileka iniasikira ebiri embere. Nomwakine indi Yesu musa angabya iyuwayitheghereraya ebya Thatha wiwe abugha okwa ndambi eyo, Yehova mwalhangira athi ebinywe biwe bikahandikawa erighasira ithwe bosi.​—Yn. 12:29, 30.

16. Busana naki hanganayira ithwayilhalikirira thuthi erina lya Nyamuhanga likendi kinibwa?

¹⁶ Nethu nga Yesu, thwangana yilhalikirira thuthi erina lya Nyamuhanga likendi kinibwa. Obundi nga Yesu, nethu thwabirikanganibwa obuthe bulingirirania. Kutse obundi ithwataburwa n’amabehi agho abahakani bakathulhalhanayako.  Ithwangana lengekania okwa lina lya Yehova n’ekithunga kiwe ngoku bikendi kinibwa omwa mabehi aya. Obuthuku ng’obo, ebinywe bya Yehova ibikendi thuhumulikania kutsibu. Sithutholere thukayilhalikirira kutsibu. Thwangana kakasya ngoku “obuholho bwa Nyamuhanga obulhabire amenge wosi bwasyatheya emithima [yethu] n’amaghanirya [wethu] omwisi wa Kristo Yesu.” (Fil. 4:6, 7) Mughulhu wosi Yehova akendisyabya inianemuhamya erina liwe. Omw’ikolesya Obwami bwiwe, akendisya ghunzaho eritsandya lyosi erya Sitani n’ekihugho kiwe bakaletha okwa baghombe Biwe abathaleghulha.​—Esy. 94:22, 23; Isa. 65:17.

17. Ngoku kiri omu Isaya 30:21, Yehova akakanaya athi nethu munabwire?

¹⁷ Yehova akinakanaya nethu namunabwire. (Soma Isaya 30:21.) Kwenene, sithuliowa omulenge wa Nyamuhanga akalhua elhubulha. Aliwe, abirithuha Ekinywe kiwe, e Biblia, omwa thukabana eby’erighenderako. Kandi, omulimu wa Yehova akasondolha “omwimaniri oyuthereghulha” erihererya abaghombe Biwe akalyo kabu. (Lk. 12:42) Ni mwatsi mungyi okwa syombapura n’okwa intaneti, esyovidiyo, haghuma n’ow’erihulikirira owakaghumaya erikirirya lyethu!

18. Ebinywe bya Yehova bikaghumaya bithi erikirirya lyawu n’erikuha obuthubaha?

¹⁸ Sithwibirirawe ebinywe ebya Yehova akanaya na Mughalha wiwe omughulhu abya okwa kihugho! Ambi ebinywe bya Nyamuhanga, ebiri omwa Biblia, bithuhe erisika ngoku Yehova anemusondolha emyatsi kandi ngoku akendi syaghunzaho akabi kosi-kosi aka Sitani n’ekihugho kiwe kibi banga thukolha. Kandi thuthwemu erihulikirira ndeke omulenge wa Yehova. Thwamakolha ekyo, ithukendi thoka erighumira ebitsibu byosi-byosi ebya thune mubana n’ebiri embere. E Biblia yikathw’ibukaya kino: “Litholere imwayiyinia, neryo imwakolha erisonda lya Nyamuhanga, imwathoka eribana ebyo Nyamuhanga alhagha.”​—Ebr. 10:36.