1-2. (a) Aw Jiova dɔn de tɔk to mɔtalman? (b) Wetin wi go tɔk bɔt insay dis atikul?

JIOVA lɛk fɔ tɔk to wi. Trade trade, i bin de yuz prɔfɛt dɛn, enjɛl dɛn, ɛn in Pikin, Jizɔs Krays, fɔ mek wi no wetin i de tink. (Emɔs 3:​7; Gal. 3:​19; Rɛv. 1:​1) Tide, i de yuz in Wɔd, di Baybul, fɔ tɔk to wi. I gi wi in Wɔd, di Baybul, fɔ lɛ wi lan bɔt di we aw i de tink ɛn fɔ ɔndastand aw i de du tin.

² We Jizɔs bin de na dis wɔl, Jiova bin tɔk to am frɔm ɛvin tri tɛm. Lɛ wi tɔk bɔt wetin Jiova bin tɔk, wetin wi go lan frɔm di wɔd dɛn we i bin tɔk, ɛn aw wi go bɛnifit frɔm wetin i bin tɔk.

3. As wi dɔn rid na Mak 1:​9-11, wetin Jiova bin tɔk di tɛm we Jizɔs bin baptayz? Wetin na di impɔtant tin dɛn we dɛn wɔd dɛn de sho klia wan?

³ Mak 1:​9-11 tɔk bɔt di fɔstɛm we Jiova bin tɔk frɔm ɛvin. (Rid.) I bin tɔk se: “Yu na mi yon Pikin we a lɛk ɛn a gladi fɔ yu!” Dɛn wɔd dɛn ya go dɔn rili tɔch Jizɔs in at we i yɛri in Papa in vɔys de tɛl am aw i lɛk am ɛn aw i gɛt kɔnfidɛns pan am! Jiova in wɔd dɛn bin mek wi no tri impɔtant tin dɛn bɔt Jizɔs. Fɔs, Jiova mek wi no se Jizɔs na in Pikin. Sɛkɔn, Jiova lɛk in Pikin. Ɛn tɔd, Jiova gladi fɔ in Pikin. Lɛ wi tek tɛm tɔk bɔt dɛn wan bay wan.

4. We Jizɔs bin de baptayz, wetin mek Jiova tɔk se: “Yu na mi yon Pikin”?

⁴ “Yu na mi yon Pikin.” Wetin mek Jiova bin tɔk dɛn wɔd dɛn de? We Jizɔs bin de na ɛvin, in na bin Gɔd in  Pikin. Bɔt we i bin de baptayz, i bin bi Gɔd in pikin wan nyu we. Da tɛm de, Gɔd bin sho se Jizɔs we na in Pikin we i bin anɔynt dɔn gɛt di op fɔ go bak na ɛvin fɔ bi di Kiŋ we Gɔd dɔn pik ɛn Ay Prist. (Lyuk 1:​31-33; Ibru 1:​8, 9; 2:​17) So we Jizɔs bin de baptayz, in Papa bin gɛt gud rizin fɔ tɔk se: “Yu na mi yon Pikin.”—Lyuk 3:​22.

5. Aw wi go falamakata Jiova in ɛgzampul fɔ sho lɔv ɛn ɛnkɔrej ɔda pipul dɛn?

⁵ ‘Yu na di wan we a lɛk.’ Di ɛgzampul we Jiova bin sɛt fɔ sho lɔv ɛn fɔ gladi fɔ pɔsin, mek wi no se wi fɔ de luk fɔ we dɛn fɔ ɛnkɔrej ɔda pipul dɛn. (Jɔn 5:​20) Wi kin du wɛl we pɔsin we wi bisin bɔt sho se i lɛk wi ɛn prez wi fɔ di gud tin dɛn we wi de du. Semweso, wi fambul dɛn ɛn wi brɔda ɛn sista dɛn na di kɔngrigeshɔn nid wi lɔv ɛn ɛnkɔrejmɛnt. We wi prez ɔda pipul dɛn, dat de mek dɛn gɛt mɔ fet ɛn i de ɛp dɛn fɔ kɔntinyu fɔ sav Jiova fetful wan. Mama ɛn papa dɛn rili nid fɔ de ɛnkɔrej dɛn pikin dɛn. We mama ɛn papa dɛn de prez dɛn pikin dɛn frɔm dɛn at ɛn sho se dɛn rili lɛk dɛn, dat de ɛp dɛn fɔ kɔntinyu fɔ du wɛl.

6. Wetin mek wi fɔ gɛt kɔnfidɛns pan Jizɔs Krays?

⁶ “A gladi fɔ yu.” Dɛn wɔd dɛn ya sho se Jiova bin gɛt kɔnfidɛns fɔ se Jizɔs go du ɔl wetin in Papa want. Bikɔs Jiova bin gɛt da kayn kɔnfidɛns de pan in Pikin, wi bak fɔ biliv tranga wan fɔ se Jizɔs go du ɔl wetin Jiova dɔn prɔmis. (2 Kɔr. 1:​20) We wi tink bɔt Jizɔs in ɛgzampul, dat de mek wi mekɔp wi maynd mɔ fɔ lan frɔm am ɛn falamakata in ɛgzampul gud gud wan. Jɔs lɛk aw Jiova gɛt kɔnfidɛns pan Jizɔs, na so bak i gɛt kɔnfidɛns fɔ se ɔl in  savant dɛn go kɔntinyu fɔ lan frɔm in Pikin.—1 Pit. 2:​21, NW.

7. Frɔm wetin de na Matyu 17:​1-5, ustɛm Jiova bin tɔk frɔm ɛvin? Wetin i bin tɔk?

⁷ Rid Matyu 17:​1-5. Di sɛkɔn tɛm we Jiova bin tɔk frɔm ɛvin na di tɛm we Jizɔs bin “chenj.” Jizɔs bin tɛl Pita, Jems, ɛn Jɔn fɔ go wit am ɔp wan ay mawnten. We dɛn bin de ɔp di mawnten, dɛn bin si wan wɔndaful vishɔn. Jizɔs in fes bin de shayn brayt brayt wan ɛn in klos bin wayt lɛk brayt brayt layt. To di apɔsul dɛn, i bin tan lɛk se tu man dɛn we tinap fɔ Mozis ɛn Ilayja, bin bigin fɔ tɔk to Jizɔs bɔt di day we i de kam day ɛn we i go gɛt layf bak. Pan ɔl we “slip bin dɔn kech” di tri apɔsul dɛn, dɛn bin dɔn wek fayn fayn wan we dɛn si dis wɔndaful vishɔn. (Lyuk 9:​29-32) Dɔn afta dat, brayt klawd bin kɔba dɛn, ɛn dɛn yɛri Gɔd in vɔys frɔm di klawd! We Jizɔs bin de baptayz, Jiova bin sho se i gladi fɔ in Pikin ɛn i lɛk am bay we i se: “Dis na mi Pikin we a lɛk bad, a gladi fɔ am.” Bɔt dis tɛm Jiova bin kɔntinyu fɔ tɔk se: “Una lisin wetin i de tɛl una.”

8. Aw di vishɔn bin afɛkt Jizɔs ɛn in disaypul dɛn?

⁸ Di vishɔn bin sho di ɔnɔ ɛn pawa we Jizɔs go gɛt tumara bambay as Kiŋ na Gɔd in Kiŋdɔm. Fɔ tru, Jiova bin ɛnkɔrej Krays fɔ bia di tin dɛn we i go sɔfa te i day. Di vishɔn bin mek di disaypul dɛn gɛt mɔ fet, ɛn dat ɛp dɛn fɔ rɛdi fɔ di prɔblɛm dɛn we dɛn go gɛt ɛn di tranga wok we dɛn go gɛt fɔ du. Fɔ lɛk 30 ia afta dat, di apɔsul Pita bin tɔk bɔt di vishɔn we dɛn bin si we Jizɔs bin chenj, we sho se Pita bin rili mɛmba ɔl wetin bin apin.—2 Pit. 1:​16-18.

9. Us fayn advays Jizɔs bin gi in disaypul dɛn?

⁹ “Una lisin wetin i de tɛl una.” Jiova bin sho klia wan se i want wi fɔ lisin to wetin in Pikin de tɔk ɛn fɔ obe wetin i de tɛl wi. Wetin Jizɔs bin tɔk we i bin de na dis wɔl? I bin tɔk bɔku tin dɛn we rili impɔtant fɔ lɛ wi lisin! Fɔ ɛgzampul, i bin tek tɛm tich in disaypul dɛn aw fɔ prich di gud nyuz, ɛn i bin tɛl dɛn bɔku tɛm se dɛn fɔ de wach. (Mat. 24:​42; 28:​19, 20) I bin tɛl dɛn bak se dɛn fɔ tray tranga tranga wan, ɛn i ɛnkɔrej dɛn nɔ fɔ givɔp. (Lyuk 13:​24) Jizɔs bin tɔk mɔ se di wan dɛn we de fala am nid fɔ lɛk dɛnsɛf, kɔntinyu fɔ gɛt wanwɔd, ɛn fɔ du ɔl wetin i tɛl dɛn. (Jɔn 15:​10, 12, 13) Na fayn advays Jizɔs bin gi in disaypul dɛn! Da advays de rili impɔtant tide jɔs lɛk aw i bin bi di tɛm we Jizɔs tɔk am.

10-11. Aw wi go sho se wi de lisin to Jizɔs?

¹⁰ Jizɔs bin tɔk se: “Ɛnibɔdi we lɛk wetin tru de yɛri mi wɔd.” (Jɔn 18:​37) Wi go sho se wi de lisin to Jizɔs in vɔys we wi ‘kɔntinyu fɔ de bia wit wisɛf ɛn fɔgiv wisɛf ɔltɛm.’ (Kɔl. 3:​13, NW; Lyuk 17:​3, 4) Wi go sho bak se wi de lisin to Jizɔs in vɔys bay we wi de prich di gud nyuz wit zil “di tɛm we tin fayn ɛn di tɛm we tin nɔ fayn.”—2 Tim. 4:​2, NW.

¹¹ Jizɔs bin tɔk se: “Mi ship dɛn de lisin wetin a se.” (Jɔn 10:​27) Di wan dɛn we de fala Krays de sho se dɛn de lisin to am bay we dɛn de du wetin i tɛl dɛn fɔ du. Dɛn nɔ de “wɔri” bɔt di tin dɛn na layf te dɛn fɔgɛt bɔt wetin Jizɔs tɛl dɛn fɔ du. (Lyuk 21:​34, NW) Bifo dat, dɛn de sho se di tin we impɔtant na dɛn layf na fɔ obe ɔl wetin Jizɔs dɔn tɛl dɛn, ivin if dɛn gɛt prɔblɛm we nɔ rili izi fɔ dɛn. Bɔku pan wi brɔda ɛn sista dɛn de bia wit plɛnti  prɔblɛm dɛn. Prɔblɛm dɛn lɛk, we di wan dɛn we nɔ lɛk di prichin wok de atak dɛn, pasmak po, ɛn we bad bad tin dɛn lɛk atkwek, ebi ebi ren ɛn briz de ambɔg dɛn. Pan ɔl we dis kayn tin go dɔn apin to dɛn, dɛn stil de sav Jiova fetful wan ilɛk wetin apin. Jizɔs bin ɛnkɔrej dɛn ɛn tɛl dɛn se: “Ɛnibɔdi we du wetin a tɛl am fɔ du, na pɔsin we lɛk mi bad. Mi Papa go lɛk am.”—Jɔn 14:​21.

12. Us ɔda we wi go sho se wi de lisin to Jizɔs?

¹² Wan ɔda we we wi go sho se wi de lisin to Jizɔs na bay we wi de wok togɛda wit di wan dɛn we i dɔn put oba wi. (Ibru 13:​7, 17, NW) Gɔd in ɔganayzeshɔn dɔn mek bɔku chenj dɛn biɛn tɛm ya, lɛk di nyu tul dɛn we wi de yuz fɔ prich ɛn di kayn we aw wi de du di prichin wok, di we aw wi de du wi mitin dɛn we wi kin gɛt insay di wik, di we aw wi de bil Kiŋdɔm Ɔl dɛn, di we aw wi de mek di say dɛn we dɔn pwɛl, ɛn di we aw wi de kia fɔ dɛn. Wi rili gladi fɔ di fayn we aw dɛn de dayrɛkt di wok. Wi shɔ se Jiova go blɛs wi fɔ we wi de du wetin in ɔganayzeshɔn de tɛl wi fɔ du.

13. Us bɛnifit dɛn wi go gɛt if wi lisin to Jizɔs?

¹³ Wi de bɛnifit we wi lisin to ɔl di tin dɛn we Jizɔs bin tich. Jizɔs bin prɔmis in disaypul dɛn se di tin dɛn we i de tich dɛn go mek dɛn fil fayn. I bin tɔk se: “Una go fil fayn.” Ɛn i kɔntinyu fɔ tɔk bak se: “I nɔ at fɔ bi mi disaypul ɛn mi lod layt.” (Mat. 11:​28-30, NW) Insay Gɔd in Wɔd, di Baybul, di stori dɛn na Matyu, Mak, Lyuk, ɛn Jɔn bɔt Jizɔs in layf ɛn in prichin wok de rili mek wi fil fayn, mek wi gɛt fet mɔ ɛn mɔ, ɛn mek wi gɛt sɛns. (Sam 19:​7; 23:​3) Jizɔs bin tɔk se: “Di wan dɛn we de yɛri Gɔd in wɔd ɛn du am na dɛn gɛt gladi-at!”—Lyuk 11:​28, NW.

14-15. (a) Frɔm wetin de na Jɔn 12:​27, 28 (NW), ustɛm na bin di tɔd tɛm we Jiova bin tɔk frɔm ɛvin? (b) Wetin mek di wɔd dɛn we Jiova bin tɔk bin ɛnkɔrej ɛn gi mɔ trɛnk to Jizɔs?

¹⁴ Rid Jɔn 12:​27, 28 (NW). Di Baybul buk we nem Jɔn tɔk bɔt di tɔd tɛm we Jiova bin tɔk frɔm ɛvin. Sɔm dez bifo Jizɔs day, i bin de na Jerusɛlɛm fɔ sɛlibret in las Pasova. I bin tɔk se “mi at pwɛl,” dɔn i bin pre se: “Papa, mek lɛ yu  nem gɛt glori.” In Papa ansa am frɔm ɛvin se: “A dɔn mek i gɛt glori ɛn a go mek i gɛt glori bak.”

¹⁵ Jizɔs in at bin pwɛl bikɔs i gɛt big wok, we na fɔ kɔntinyu fɔ de fetful wan to Jiova. Jizɔs bin no se i gɛt fɔ sɔfa bad bad wan te i day. (Mat. 26:​38) Di tin we bin impɔtant pas ɔl to Jizɔs na fɔ mek in Papa in nem gɛt glori. Dɛn bin se Jizɔs tɔk bad tin bɔt Gɔd so i bin de wɔri se in day wan go briŋ badnem pan Gɔd. Fɔ tru, di wɔd dɛn we Jiova bin tɔk bin gi mɔ kɔnfidɛns to Jizɔs! Dɛn wɔd dɛn de go mɔs dɔn mek i biliv tranga wan se Jiova in nem go gɛt glori. Di wɔd dɛn we in Papa bin tɔk bin ɛnkɔrej am ɛn gi am di trɛnk fɔ bia di sɔfa we i gɛt fɔ sɔfa. Pan ɔl we na Jizɔs nɔmɔ bin ɔndastand wetin in Papa bin tɔk da tɛm de, Jiova bin mek shɔ se dɛn rayt dɛn wɔd dɛn de we i bin tɔk insay di Baybul fɔ wi ɔl.—Jɔn 12:​29, 30.

16. Wetin mek sɔntɛnde wi kin wɔri bɔt di badnem we Gɔd in nem kin gɛt?

¹⁶ Jɔs lɛk Jizɔs, wisɛf kin wɔri bɔt di badnem we dɛn kin put pan Jiova in nem. Sɔntɛm jɔs lɛk Jizɔs, dɛn nɔ de trit wi bak fayn wan. Ɔ wi nɔ kin gladi wit di lay lay stori dɛn we di wan dɛn we nɔ lɛk wi de prɛd bɔt wi. I go bi se wi go de tink bɔt di badnem we dɛn lay lay stori ya go briŋ pan Jiova in nem ɛn in  ɔganayzeshɔn. Dɛn tɛm dɛn de, di wɔd dɛn we Jiova tɔk kin rili ɛnkɔrej wi. Wi nɔ rili nid fɔ wɔri pasmak bɔt ɛni badnem we Jiova ɛn in ɔganayzeshɔn go gɛt. Wi fɔ biliv tranga wan se ‘Gɔd go gi wi kol at, we mɔtalman nɔ ebul ɔndastand, we nɔ go mek ɛnitin wɔri wi, bikɔs wi gɛt wanwɔd wit Jizɔs Krays.’ (Fil. 4:​6, 7) Jiova go mek in nem gɛt glori ɔltɛm. I go yuz in Kiŋdɔm fɔ sɔlv ɔl di prɔblɛm dɛn we Setan ɛn in wɔl dɔn briŋ pan In fetful savant dɛn.—Sam 94:​22, 23; Ayz. 65:​17.

17. Frɔm wetin de na Ayzaya 30:​21, aw Jiova de tɔk to wi tide?

¹⁷ Jiova de stil tɔk to wi tide. (Rid Ayzaya 30:​21.) Na tru se wi nɔ de yɛri Gɔd de tɔk to wi frɔm ɛvin. Bɔt i dɔn gi wi in Wɔd, di Baybul, we de tɛl wi wetin i want wi fɔ du. Dɔn, Jiova in oli spirit de ɛp “di savant we fetful ɛn we gɛt sɛns” fɔ kɔntinyu fɔ gi In savant dɛn di it we dɛn fɔ gɛt. (Lyuk 12:​42, NW) Wi de gɛt bɔku bɔku tin dɛn we de ɛp wi fɔ lan bɔt Gɔd we dɛn kin print ɛn we kin de na di Intanɛt, fim dɛn, ɛn odio rɛkɔdin dɛn we de ɛp wi fɔ kɔntinyu fɔ gɛt fet mɔ ɛn mɔ!

18. Aw di wɔd dɛn we Jiova tɔk ɛp yu fɔ gɛt mɔ fet ɛn kɔrej?

¹⁸ Lɛ wi kɔntinyu fɔ de mɛmba di wɔd dɛn we Jiova bin tɔk to in Pikin di tɛm we i bin de na dis wɔl! Ɛn lɛ Gɔd in wɔd dɛn we de na di Baybul ɛp wi fɔ biliv tranga wan se Jiova de kɔntrol ɔltin, ɛn i go sɔlv ɛni prɔblɛm we Setan ɛn in wikɛd wɔl dɔn put pan wi. Dɔn, lɛ wi mekɔp wi maynd fɔ lisin gud gud wan to Jiova in vɔys. If wi du dat, wi go ebul fɔ bia ɛni prɔblɛm we wi gɛt naw ɛn ɛni ɔda prɔblɛm dɛn we go mit wi tumara bambay. Di Baybul tɛl wi se: “Una gɛt fɔ bia, so dat una go du wetin Gɔd want, ɛn una go gɛt wetin i dɔn prɔmis una.”—Ibru 10:​36.