တၢ်မၤလိ ၁၁
ဒိကနၣ် ယဟိဝၤယွၤအကလုၢ်
“အဝဲတဂၤအံၤ မ့ၢ်ယဖိခွါ . . . ဒိကနၣ်အကလုၢ်တက့ၢ်.”—မးသဲ ၁၇:၅.
တၢ်သးဝံၣ် ၈၉ ကနၣ်, မၤထွဲ, ဘၣ်ဆိၣ်ဂ့ၤ
တၢ်မၤလိအံၤ အတၢ်တိာ်ပာ် *
၁-၂. (က) ယဟိဝၤယွၤ ဆဲးကျိးဒီး ပှၤဟီၣ်ခိၣ်ဖိတဖၣ် ဒ်လဲၣ်. (ခ) လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
ယဟိဝၤယွၤ အဲၣ်ဒိးဆဲးကျိးဒီးပှၤလီၤ. လၢအပူၤကွံာ်န့ၣ် ယဟိဝၤယွၤသူဝဲ ဝံတဖၣ်, မူခိၣ်ကလူးတဖၣ် ဒီးအဖိခွါယ့ၣ်ၡူး ဒ်သိးကဒုးသ့ၣ်ညါပှၤလၢ အတၢ်ဆိကမိၣ်တဖၣ်န့ၣ်လီၤ. (ဧၤမိၣ် ၃:၇; ကလၤတံ ၃:၁၉; လီၣ်ဖျါ ၁:၁) လၢပစိၤခဲအံၤန့ၣ် ယဟိဝၤယွၤ ဆဲးကျိးဒီးပှၤ ခီဖျိလၢ အကလုၢ်ကထါ လံာ်စီဆှံလီၤ. လၢတၢ်န့ၣ်အဃိ ပဃုသ့ၣ်ညါ အတၢ်ဆိကမိၣ်ဒီး နၢ်ပၢၢ်အကျဲတဖၣ်သ့လီၤ.
၂ ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ ယဟိဝၤယွၤ တဲတၢ်လၢ မူခိၣ်သၢဘျီလီၤ. ပကမၤလိသကိးဘၣ်ဃးဒီး ယဟိဝၤယွၤ တဲဝဲတၢ်ဂ့ၢ်မနုၤလဲၣ်, ဘၣ်ဃးဒီး ကစၢ်ယွၤ အတၢ်ကတိၤတဖၣ်အံၤန့ၣ် ပဟံးန့ၢ်တၢ်မၤလိမနုၤသ့လဲၣ် ဒီးကစၢ်ယွၤ အတၢ်ကတိၤတဖၣ်အံၤန့ၣ် ကဲဘျုးလၢပဂီၢ်ဒ်လဲၣ်.
“နဲဒၣ်အံၤနမ့ၢ်ယဖိခွါလၢယအဲၣ်, ဘၣ်ယသးလၢနၤ”
၃. မၢ်ကူး ၁:၉-၁၁ ပာ်ဖျါထီၣ်ဝဲလၢ ဖဲယ့ၣ်ၡူးဒိးဘျၢထံအခါ ယဟိဝၤယွၤ တဲဝဲတၢ်မနုၤလဲၣ် ဒီးကစၢ်ယွၤ အတၢ်ကတိၤတဖၣ်အံၤ ပာ်ဖျါထီၣ်ဝဲ တၢ်ဂ့ၢ်အရ့ဒိၣ်မနုၤတဖၣ်လဲၣ်.
၃ မၢ်ကူး ၁:၉-၁၁ ပာ်ဖျါထီၣ်ဝဲ တၢ်မၤအသးအဆိကတၢၢ်တဘျီ လၢယဟိဝၤယွၤ တဲတၢ်လၢမူခိၣ်န့ၣ်လီၤ. (ဖးတက့ၢ်.) အဝဲတဲဝဲလၢ “နဲဒၣ်အံၤနမ့ၢ်ယဖိခွါ လၢယအဲၣ်, ဘၣ်ယသးလၢနၤလီၤ.” ဖဲယ့ၣ်ၡူးနၢ်ဟူဘၣ်ဝဲလၢ အပၢ်တဲဝဲလၢ အအဲၣ်အီၤ ဒီးနာ်န့ၢ်အီၤအခါ အကသးခုဝဲဒိၣ်မးလီၤ. ယဟိဝၤယွၤ အတၢ်ကတိၤတဖၣ်အံၤန့ၣ် ပာ်ဖျါထီၣ်ဝဲ တၢ်ဂ့ၢ်သၢမံၤလၢ အဘၣ်ဃးဒီး ယ့ၣ်ၡူးလီၤ. တၢတမံၤန့ၣ် ပသ့ၣ်ညါဘၣ်လၢ ယ့ၣ်ၡူးမ့ၢ်ဝဲ ကစၢ်ယွၤအဖိခွါ, ခံမံၤတမံၤန့ၣ် ယဟိဝၤယွၤအဲၣ်ဝဲအဖိခွါ ဒီးသၢမံၤတမံၤန့ၣ် ယဟိဝၤယွၤ ဘၣ်သူၣ်ဘၣ်သးဝဲ အဖိခွါအံၤလီၤ. ပကသမံသမိးကွၢ် တၢ်ဂ့ၢ်သၢမံၤအံၤ လီၤတံၢ်လီၤဆဲးလီၤ.
၄. ဖဲယ့ၣ်ၡူးဒိးဘျၢထံအခါ အဝဲကဲထီၣ် ကစၢ်ယွၤအဖိခွါ လၢကျဲလၢအသီတဘိဒ်လဲၣ်.
၄ “နမ့ၢ်ယဖိခွါ လၢယအဲၣ်.” ယဟိဝၤယွၤအတၢ်ကတိၤအံၤန့ၣ် ပာ်ဖျါထီၣ်ဝဲလၢ အဖိခွါသးဘိ ယ့ၣ်ၡူးန့ၣ် အိၣ်ဒီးတၢ်ရ့လိာ်သးဒီးအီၤ လၢကျဲလၢအသီတဘိလီၤ. ဖဲယ့ၣ်ၡူးအိၣ်လၢ မူခိၣ်အခါ အဝဲမ့ၢ်ပာ်စၢၤ ကစၢ်ယွၤအဖိခွါလီၤ. ဘၣ်ဆၣ် ဖဲအဝဲဒိးဘျၢထံအခါ အဝဲဘၣ်တၢ်ဒိးဖှူအီၤလၢ သးစီဆှံလီၤ. ဖဲန့ၣ်အဆၢကတီၢ် ကစၢ်ယွၤပာ်ဖျါထီၣ်ဝဲလၢ ယ့ၣ်ၡူးကဲထီၣ် အဖိခွါလၢဘၣ်တၢ်ဒိးဖှူအီၤ ဒီးအိၣ်ဒီးတၢ်မုၢ်လၢ်လၢ ကက့ၤထီၣ်ဘၣ်ဆူမူခိၣ် ဒ်သိးကကဲထီၣ်ဘၣ် စီၤပၤဒီးပှၤလုၢ်တၢ် အဒိၣ်ကတၢၢ်တဂၤလီၤ. (လူၤကၣ် ၁:၃၁-၃၃; ဧ့ၤဘြံၤ ၁:၈, ၉; ၂:၁၇) ခီဖျိလၢ တၢ်ဂ့ၢ်တဖၣ်အံၤအဃိ ဖဲယ့ၣ်ၡူးဒိးဘျၢထံအခါ အပါတဲဝဲလၢ “နမ့ၢ်ယဖိခွါ လၢယအဲၣ်” န့ၣ်လီၤ.—လူၤကၣ် ၃:၂၂.
ဖဲပှၤဂၤ စံးပတြၢၤပှၤ ဒီးဟ့ၣ်ဂံၢ်ဟ့ၣ်ဘါပှၤအခါ ပသးခုဒိၣ်မး (ကွၢ်လံာ်အဆၢ ၅) *
၅. ပကွၢ်လိမၤဒိး ယဟိဝၤယွၤအတၢ်အဲၣ် ဒီးအတၢ်ဟ့ၣ်ဂံၢ်ဟ့ၣ်ဘါပှၤဂၤ ကသ့ဒ်လဲၣ်.
၅ “နမ့ၢ်ယဖိခွါ လၢယအဲၣ်.” ယဟိဝၤယွၤ အဒိအတဲာ်လၢ အပာ်ဖျါထီၣ်ဝဲ တၢ်အဲၣ်ဒီးတၢ်ဟ့ၣ်ဂံၢ်ဟ့ၣ်ဘါန့ၣ် ဒုးသ့ၣ်နီၣ်ထီၣ်ပှၤလၢ ပဝဲသ့ၣ်တဖၣ်စ့ၢ်ကီး ပကဘၣ်ဃုတၢ်ခွဲးတၢ်ယာ်လၢ ပကဟ့ၣ်ဂံၢ်ဟ့ၣ်ဘါပှၤဂၤအဂီၢ်လီၤ. (ယိၤဟၣ် ၅:၂၀) ဖဲပှၤဂၤ ပာ်ဖျါထီၣ်တၢ်အဲၣ် လၢပဖီခိၣ်ဒီး စံးပတြၢၤပှၤအခါ ပဂံၢ်ပဘါဆူၣ်ထီၣ်ဒိၣ်မးလီၤ. ဒ်န့ၣ်အသိး ပဒီပုၢ်ဝဲၢ်မုၣ်ခွါ လၢတၢ်အိၣ်ဖှိၣ်အပူၤတဖၣ် ဒီးပဟံၣ်ဖိဃီဖိတဖၣ်န့ၣ် လိၣ်ဘၣ်ပတၢ်ဟ့ၣ်ဂံၢ်ဟ့ၣ်ဘါလီၤ. အဃိ ပမ့ၢ်စံးပတြၢၤအဝဲသ့ၣ်န့ၣ် အဝဲသ့ၣ် အတၢ်နာ်ကဂၢၢ်ကျၢၤထီၣ်ဒီး ကမၤစၢၤ အဝဲသ့ၣ် ဒ်သိးကမၤယဟိဝၤယွၤ အတၢ်မၤလၢ တၢ်သးတီအပူၤလီၤ. လီၤဆီဒၣ်တၢ် မိၢ်ပၢ်တဖၣ် မ့ၢ်စံးပတြၢၤအဖိ လၢအသးဒီဖျၢၣ် ဒီးမ့ၢ်ပာ်ဖျါထီၣ် အတၢ်အဲၣ်န့ၣ် မ့ၢ်ဒၣ်အမၤစၢၤအဖိ ဒ်သိးကလဲၤထီၣ်လဲၤထီအဂီၢ်လီၤ.
၆. ဘၣ်မနုၤအဃိ ပနာ်န့ၢ်ယ့ၣ်ၡူး သ့လဲၣ်.
၆ “ဘၣ်ယသးလၢနၤလီၤ.” တၢ်ကတိၤအံၤ ပာ်ဖျါထီၣ်ဝဲလၢ ယဟိဝၤယွၤနာ်ဝဲလၢ ယ့ၣ်ၡူးကမၤဒ် အတၢ်ဘၣ်သးအသိး လၢတၢ်သးတီအပူၤလီၤ. ဒ်ယဟိဝၤယွၤ နာ်န့ၢ်အဖိခွါ လၢလၢပှဲၤပှဲၤအသိး ပဝဲသ့ၣ်တဖၣ်စ့ၢ်ကီး ပနာ်သ့လၢ ယ့ၣ်ၡူးကမၤ လၢပှဲၤထီၣ် ယဟိဝၤယွၤ အတၢ်အၢၣ်လီၤအီလီၤတဖၣ် ခဲလၢာ်လီၤ. (၂ ကရံၣ်သူး ၁:၂၀) ပမ့ၢ်ဆိကမိၣ်ထံ ယ့ၣ်ၡူးအဒိအတဲာ်န့ၣ် ပကအဲၣ်ဒိးဟံးန့ၢ် တၢ်မၤလိလၢအအိၣ် ဒီးကွၢ်လိမၤဒိးအီၤလီၤ. ဒ်ယဟိဝၤယွၤ နာ်န့ၢ်အဖိခွါအသိး အဝဲနာ်ဝဲလၢ အခ့အပှၤတဖၣ် ကဆဲးကွၢ်လိမၤဒိး အဖိခွါအဒိအတဲာ်လီၤ.—၁ ပ့းတရူး ၂:၂၁.
“ဒိကနၣ်အကလုၢ်”
၇. ဖဲ မးသဲ ၁၇:၁-၅ န့ၣ်ယဟိဝၤယွၤ တဲတၢ်လၢဆၢကတီၢ်ဖဲလဲၣ် ဒီးအဝဲတဲဝဲ တၢ်မနုၤလဲၣ်.
၇ ဖး မးသဲ ၁၇:၁-၅ တက့ၢ်. ယဟိဝၤယွၤ ကတိၤတၢ်လၢမူခိၣ် ခံဘျီတဘျီ ဖဲယ့ၣ်ၡူး “အက့ၢ်အဂီၤလဲလိာ်အသး” အခါလီၤ. ယ့ၣ်ၡူးကိးထီၣ် စီၤပ့းတရူး, စီၤယၤကိာ် ဒီးစီၤယိၤဟၣ် လၢကလဲၤပိာ်အခံဆူ ကစၢၢ်ဒီခိၣ်လီၤ. ဖဲန့ၣ်အဆၢကတီၢ် အဝဲသ့ၣ် ထံၣ်ဘၣ်ဝဲ တၢ်ထံၣ်လၢညါခီ လၢအလီၤကမၢကမၣ်တခါလီၤ. ဖဲန့ၣ်န့ၣ် ယ့ၣ်ၡူးအမဲာ် ဒီးအကူအကၤတဖၣ် ကပီၤထီၣ်ဝဲလီၤ. ဒီးပှၤခံဂၤလၢအလီၤဂာ်ဒ်သိး စီၤအ့ၤလံယၤ ဒီးစီၤမိၤၡ့န့ၣ် ကတိၤတၢ်ဒီးယ့ၣ်ၡူး ဒီးတဲသကိးဝဲဘၣ်ဃးဒီး ယ့ၣ်ၡူးကဘၣ်သံ ဒီးကဂဲၤဆၢထၢၣ်သမူထီၣ်က့ၤအဂ့ၢ်လီၤ. တၢ်မၢဖိသၢဂၤ “အမဲာ်ဖံးဃၢဒီးမံခ့ဝဲ” ဘၣ်ဆၣ် ဖဲအဝဲသ့ၣ် နီၣ်ထီၣ်အသးအခါ ထံၣ်ဘၣ်ဝဲ တၢ်ထံၣ်လၢညါခီအံၤလီၤ. (လူၤကၣ် ၉:၂၉-၃၂) ဒီးတၢ်အၢၣ်လၢ အကပြုၢ်ကပြီၤလုၢ်ဘၢအဝဲသ့ၣ် ဒီးအဝဲသ့ၣ်နၢ်ဟူဘၣ်ဝဲ ကစၢ်ယွၤအကလုၢ်လီၤ. ဖဲန့ၣ်န့ၣ် ယဟိဝၤယွၤ တဲဝဲတၢ်ကတိၤ ဒ်အတဲဝဲ ဖဲယ့ၣ်ၡူးဒိးဘျၢထံအခါန့ၣ်လီၤ. အဝဲပာ်ဖျါထီၣ်ဝဲလၢ အဘၣ်သူၣ်ဘၣ်သး ဒီးအအဲၣ်အဖိခွါ ခီဖျိတဲဝဲလၢ “အဝဲတဂၤအံၤ မ့ၢ်ယဖိခွါလၢ ယအဲၣ်, ဒီးဘၣ်ယသးလၢအီၤလီၤ.” ဘၣ်ဆၣ် တၢ်တဘျီအံၤန့ၣ် အဝဲတဲအါထီၣ်ဝဲလၢ “ဒိကနၣ်အကလုၢ်တက့ၢ်.”
၈. တၢ်ထံၣ်လၢညါခီ ကဲဘျုးလၢ ယ့ၣ်ၡူးဒီး အပျဲၢ်အဘီၣ်တဖၣ်အဂီၢ် ဒ်လဲၣ်.
၈ တၢ်ထံၣ်လၢညါခီအံၤ ပာ်ဖျါထီၣ်ဝဲလၢ ခါဆူညါန့ၣ် ယ့ၣ်ၡူးကဒိးန့ၢ်ဘၣ် တၢ်လၤကပီၤဒီး တၢ်စိတၢ်ကမီၤဒ်စီၤပၤတဂၤအသိး လၢယွၤအဘီအမုၢ်အပူၤလီၤ. ယ့ၣ်ၡူးကဘၣ် တၢ်မၤအၢမၤနးအီၤဒီး မၤသံအီၤအဃိ တၢ်ထံၣ်လၢညါခီအံၤ ကဟ့ၣ်ဆူၣ်ထီၣ် အဂံၢ်အဘါ ဒီးမၤမုာ်ထီၣ်အသး အနီၢ်ကီၢ်လီၤ. ဒီးတၢ်ထံၣ်လၢညါခီအံၤ ကမၤဆူၣ်ထီၣ်စ့ၢ်ကီး ယ့ၣ်ၡူးအပျဲၢ်အဘီၣ်တဖၣ် အတၢ်နာ်လီၤ. ဒီးကမၤစၢၤစ့ၢ်ကီး အဝဲသ့ၣ်လၢ ကအိၣ်ကတဲာ်ကတီၤအသးလၢ တၢ်မၤကွၢ်တဖၣ်အဂီၢ် ဒီးတၢ်မၤဖးဒိၣ်လၢ ကဘၣ်မၤဝဲတဖၣ်အဂီၢ်လီၤ. ကအိၣ်အနံၣ် ၃၀ ဝံၤအလီၢ်ခံ တၢ်မၢဖိပ့းတရူး တဲဖျါထီၣ်က့ၤဝဲ တၢ်ထံၣ်လၢညါခီအံၤအဂ့ၢ်လီၤ. အဃိဖျါလၢ အဝဲသ့ၣ်နီၣ်ထီၣ်က့ၤဝဲ တၢ်ထံၣ်လၢညါခီအံၤ ဂ့ၤဂ့ၤလီၤ.—၂ ပ့းတရူး ၁:၁၆-၁၈.
၉. ယ့ၣ်ၡူး ဟ့ၣ်ကူၣ်ဝဲ အပျဲၢ်အဘီၣ်တဖၣ်ဒ်လဲၣ်.
၉ “ဒိကနၣ်အကလုၢ်တက့ၢ်.” ယဟိဝၤယွၤ တဲဝဲၡဲၡဲဖိလၢ အဝဲအဲၣ်ဒိးလၢ ပကဒိကနၣ် အဖိခွါအကလုၢ် ဒီးမၤထွဲအီၤလီၤ. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အဝဲတဲဝဲတၢ်မနုၤလဲၣ်. အဝဲတဲဝဲ တၢ်ဂ့ၢ်အါမံၤလၢ အရ့ဒိၣ်လၢ ပကဘၣ်မၤထွဲအီၤန့ၣ်လီၤ. အဒိ အဝဲသိၣ်လိဝဲ အပျဲၢ်အဘီၣ်တဖၣ်လၢ ကဘၣ်စံၣ်တဲၤတဲလီၤတၢ်ဒ်လဲၣ် ဒီးဟ့ၣ်သဆၣ်ထီၣ် အဝဲသ့ၣ်လၢ ကအိၣ်ခိးဆိးသီအဂီၢ်လီၤ. (မးသဲ ၂၄:၄၂; ၂၈:၁၉, ၂၀) ဒီးအဝဲဟ့ၣ်ဂံၢ်ဟ့ၣ်ဘါ အပျဲၢ်အဘီၣ်တဖၣ်လၢ ကဂုာ်ကျဲးစၢးဆူၣ်ဆူၣ် ဒီးအသုတဟ့ၣ်အၡူတဂ့ၤအဂီၢ်လီၤ. (လူၤကၣ် ၁၃:၂၄) တကးဒံးဘၣ် အဝဲဟ့ၣ်ဂံၢ်ဟ့ၣ်ဘါစ့ၢ်ကီးဝဲလၢ အဝဲသ့ၣ် ကအဲၣ်လိာ်ကွံလိာ်အသး တဂၤဒီးတဂၤ, ကအိၣ်ဃူဃူဖိးဖိးထီဘိ ဒီးကဒိကနၣ် အတၢ်မၤလိာ်တဖၣ်အဂီၢ်လီၤ. (ယိၤဟၣ် ၁၅:၁၀, ၁၂, ၁၃) ယ့ၣ်ၡူး အတၢ်ဟ့ၣ်ကူၣ်တဖၣ်အံၤန့ၣ် ကဲဘျုးဝဲဒိၣ်မးလီၤ. ဒီးလၢပစိၤခဲအံၤစ့ၢ်ကီး တၢ်ဟ့ၣ်ကူၣ်တဖၣ်အံၤန့ၣ် မ့ၢ်တၢ်လၢအရ့ဒိၣ်ဒိၣ်မးလီၤ.
၁၀-၁၁. ပပာ်ဖျါထီၣ်လၢ ပအဲၣ်ယ့ၣ်ၡူး ကသ့ဒ်လဲၣ်.
၁၀ ယ့ၣ်ၡူးတဲဝဲလၢ “ပှၤလၢအဘၣ်ဃးဒီးတၢ်မ့ၢ်တၢ်တီန့ၣ်, ဒိကနၣ်ယကလုၢ်ယကထါလီၤ.” (ယိၤဟၣ် ၁၈:၃၇) ပမ့ၢ် ‘ဝံသးစူၤလိာ်ပသး, ဒီးပှၤအတၢ်ကမၣ်မ့ၢ်အိၣ်ဒီး, ပျၢ်လိာ်ပသး’ န့ၣ် မ့ၢ်ဒၣ်ပပာ်ဖျါထီၣ် လၢပဒိကနၣ် ယ့ၣ်ၡူးအကလုၢ်လီၤ. (ကလီးစဲ ၃:၁၃; လူၤကၣ် ၁၇:၃, ၄) တကးဒံးဘၣ် ပပာ်ဖျါထီၣ်လၢ ပဒိကနၣ်ယ့ၣ်ၡူး အကလုၢ် ခီဖျိပစံၣ်တဲၤတဲလီၤတၢ် လၢတၢ်သူၣ်ဆူၣ်သးဆူၣ်အပူၤဖဲ “တၢ်ဆၢကတီၢ်အကီမ့ၢ်ဂ့ၤ, အညီမ့ၢ်ဂ့ၤ” န့ၣ်လီၤ.—၂ တံၤမသ့း ၄:၂, NWT.
၁၁ ယ့ၣ်ၡူးတဲဝဲလၢ “ယသိတဖၣ် ဒိကနၣ်ယကလုၢ်” လီၤ. (ယိၤဟၣ် ၁၀:၂၇) ပှၤလၢအပိာ် ယ့ၣ်ၡူးအခံတဖၣ်န့ၣ် တမ့ၢ်ထဲ အဝဲသ့ၣ်ဒိကနၣ်ဝဲ ယ့ၣ်ၡူး အတၢ်ကတိၤတခါဧိၤဘၣ် အဝဲသ့ၣ်မၤထွဲဝဲစ့ၢ်ကီးလီၤ. အဝဲသ့ၣ် တသးစၢၢ်ဆၢတၢ် “လၢအအံၤတဃၣ် အတၢ်ဘၣ်ယိၣ်ဘၣ်ဘီ” ဘၣ်လီၤ. (လူၤကၣ် ၂၁:၃၄) မ့ၢ်ကီလၢအဝဲသ့ၣ် အဂီၢ်ဒၣ်လဲာ် တၢ်ဒိကနၣ် ယ့ၣ်ၡူးအတၢ်မၤလိာ်န့ၣ် မ့ၢ်တၢ်အရ့ဒိၣ်ဒိၣ်မး လၢအဝဲသ့ၣ်အဂီၢ်လီၤ. ပဒီပုၢ်ဝဲၢ်အါဂၤ ထံၣ်ဘၣ်ဒီး တၢ်မၤကွၢ်အါမး ဃုာ်ဒီးတၢ်ထီဒုၣ်ထီဒါ, တၢ်ဖှီၣ်တၢ်ယာ် ဒီးန့ဆၢၣ် အတၢ်ဘၣ်ဒိဘၣ်ထံးတဖၣ်လီၤ. အဝဲသ့ၣ် မ့ၢ်ထံၣ်ဘၣ်ဒီး တၢ်ကီတၢ်ခဲဒ်လဲၣ်ဂ့ၤဒ်လဲၣ်ဂ့ၤ အဝဲသ့ၣ်ဆဲးတီဒီးယဟိဝၤယွၤလီၤ. ယ့ၣ်ၡူးတဲဝဲလၢ “ပှၤလၢအအိၣ်ဒီး ယတၢ်မၤလိာ်ဒီးတိၢ်န့ၢ်ဝဲန့ၣ်, အဝဲဒၣ်မ့ၢ်ပှၤလၢ အအဲၣ်ယၤလီၤ. ဒီးပှၤလၢအအဲၣ်ယၤန့ၣ်, ယပၢ်ကအဲၣ်အီၤ” လီၤ.—ယိၤဟၣ် ၁၄:၂၁.
တၢ်စံၣ်တဲၤတဲလီၤတၢ်မၤန့ၣ် မၤစၢၤပှၤဒ်သိး ပကဆဲးဒိကနၣ် ယ့ၣ်ၡူးအကလုၢ် (ကွၢ်လံာ်အဆၢ ၁၂) *
၁၂. ကျဲအဂၤတဘိ လၢပပာ်ဖျါထီၣ်လၢ ပအဲၣ်ယ့ၣ်ၡူးန့ၣ် မ့ၢ်မနုၤလဲၣ်.
၁၂ ပပာ်ဖျါထီၣ်လၢ ပဒိကနၣ်ယ့ၣ်ၡူးသ့ ခီဖျိလၢ ပမၤသကိးတၢ်ဒီး ပှၤလၢအတီခိၣ်ရိၤမဲပှၤတဖၣ်န့ၣ်လီၤ. (ဧ့ၤဘြံၤ ၁၃:၇, ၁၇) လၢအပူၤကွံာ် အနံၣ်တဖၣ်န့ၣ် ကစၢ်ယွၤအတၢ်ကရၢကရိ ဆီတလဲဝဲ တၢ်ပီးတၢ်လီဒီးတၢ်စံၣ်တဲၤတဲလီၤတၢ် အကျိၤအကျဲလၢအသီတဖၣ်, နွံဖးဖီ အတၢ်အိၣ်ဖှိၣ် အတၢ်ရဲၣ်တၢ်ကျဲၤလီၤ. တကးဒံးဘၣ် ဆီတလဲဝဲ တၢ်သူၣ်ထီၣ်ဘှီထီၣ်ဒီး တၢ်ကွၢ်ထွဲ ဘှီဂ့ၤထီၣ်က့ၤ ဘီမုၢ်ဘျီၣ်ဒိၣ် အကျိၤအကျဲတဖၣ်လီၤ. ပစံးဘျုးဘၣ် ကစၢ်ယွၤခီဖျိလၢ အတၢ်ဟံးစုနဲၣ်ကျဲ လၢအပှဲၤဒီး တၢ်အဲၣ်တၢ်ကွံဒီး အတၢ်ကဟုကယာ်တဖၣ်အံၤ အဃိလီၤ. ဒီးပနာ်သ့သပှၢ်ကတၢၢ်လၢ ပမ့ၢ်ဂုာ်ကျဲးစၢးမၤထွဲ တၢ်ကရၢကရိ အတၢ်ဟံးစုနဲၣ်ကျဲထီဘိန့ၣ် ယဟိဝၤယွၤ ကဆိၣ်ဂ့ၤပှၤလီၤ.
၁၃. ပမ့ၢ်ဒိကနၣ် ယ့ၣ်ၡူးအကလုၢ်န့ၣ် ပကဒိးန့ၢ်ဘၣ်အဘျုးဒ်လဲၣ်.
၁၃ ပမ့ၢ်ဒိကနၣ် တၢ်လၢယ့ၣ်ၡူးတဲဝဲခဲလၢာ်န့ၣ် ပကဒိးန့ၢ်ဘၣ်အဘျုးလီၤ. ယ့ၣ်ၡူးအၢၣ်လီၤဝဲ အပျဲၢ်အဘီၣ်တဖၣ်လၢ အဝဲအတၢ်သိၣ်လိနဲၣ်လိတဖၣ်န့ၣ် ကမၤမုာ်ထီၣ် အဝဲသ့ၣ်အသးလီၤ. အဝဲတဲဝဲလၢ “သုကထံၣ်န့ၢ်တၢ်အိၣ်ဘှံးလၢ သုသးအဂီၢ်လီၤ. အဂ့ၢ်ဒ်အံၤ, ယနီၣ်ယိးဘိမ့ၢ်အညီ, ဒီးယတၢ်ဝံတၢ်ယိးမ့ၢ်အဖှံလီၤ.” (မးသဲ ၁၁:၂၈-၃၀) လံာ်တၢ်သးခုကစီၣ်လွံၢ်ဘ့ၣ်လၢ အမ့ၢ်ကစၢ်ယွၤ အကလုၢ်ကထါန့ၣ် ပာ်ဖျါထီၣ်ဝဲ ယ့ၣ်ၡူးအတၢ်အိၣ်မူ ဒီးတၢ်စံၣ်တဲၤတဲလီၤတၢ်အဂ့ၢ်အဃိ မၤမုာ်ထီၣ်ပသး, ဟ့ၣ်ပှၤနီၢ်သးအဂံၢ်ဘါ ဒီးဒုးကူၣ်သ့ပှၤလီၤ. (စံးထီၣ်ပတြၢၤ ၁၉:၇; ၂၃:၃) ယ့ၣ်ၡူးတဲဝဲလၢ “ပှၤလၢအနၢ်ဟူ ယွၤအကလုၢ်အကထါ, ဒီးတိၢ်န့ၢ်ဝဲတဖၣ်န့ၣ်, ဘၣ်ဆိၣ်ဂ့ၤ [“သးခု,” NWT] ဝဲလီၤ.”—လူၤကၣ် ၁၁:၂၈.
‘ယကဒုးလၤကပီၤ ယမံၤ’
၁၄-၁၅. (က) ဒ် ယိၤဟၣ် ၁၂:၂၇, ၂၈ ပာ်ဖျါထီၣ်ဝဲအသိး ဖဲယဟိဝၤယွၤကတိၤတၢ် သၢဘျီတဘျီအခါ အဝဲတဲဝဲတၢ်မနုၤလဲၣ်. (ခ) ဘၣ်မနုၤအဃိ ယဟိဝၤယွၤအတၢ်ကတိၤတဖၣ်န့ၣ် ကဲထီၣ်တၢ်သူၣ်မံသးမုာ် ဒီးတၢ်ဂံၢ်တၢ်ဘါလၢ ယ့ၣ်ၡူးအဂီၢ်လဲၣ်.
၁၄ ဖး ယိၤဟၣ် ၁၂:၂၇, ၂၈ တက့ၢ်. ပှၤကွဲးလံာ်တၢ်သးခုကစီၣ် စီၤယိၤဟၣ် ပာ်ဖျါထီၣ်ဝဲ တၢ်မၤအသးသၢဘျီတဘျီလၢ ယဟိဝၤယွၤ တဲတၢ်လၢ မူခိၣ်န့ၣ်လီၤ. တချုးလၢ ယ့ၣ်ၡူးသံဒံးဘၣ်စှၤကိာ်နံၤန့ၣ် ယ့ၣ်ၡူးလဲၤလၢ ဝ့ၢ်ယရူၤၡလ့ၣ် ဒ်သိးကလဲၤမၤဝဲ ဘူၣ်လဲၤကပာ် လၢခံကတၢၢ်တဘျီန့ၣ်လီၤ. အဝဲတဲဝဲလၢ “ယသူၣ်ကိၢ် ယသးကိၢ်လီၤ.” အဃိ အဝဲဃ့ထုကဖၣ်လၢ “ပၢ်ဧၢ, ဒုးလၤကပီၤနမံၤတက့ၢ်.” ဖဲန့ၣ်အခါ အပၢ်အိၣ်လၢမူခိၣ်န့ၣ် တဲဆၢက့ၤအီၤလၢ “ယဒုးလၤကပီၤလံ, ဒီးယကဒုးလၤကပီၤကဒီးလီၤ.”
၁၅ မ့ၢ်လၢယ့ၣ်ၡူး အိၣ်ဒီးမူဒါဖးဒိၣ်လၢ ကဘၣ်တီဒီးယဟိဝၤယွၤအဃိ အဝဲထံၣ်ဘၣ်ဒီး တၢ်ကီတၢ်ခဲလီၤ. အဝဲသ့ၣ်ညါဝဲလၢ ပှၤကဖျ့အီၤ နးနးကလဲာ် ဒီးကဘၣ်တၢ်မၤသံအီၤ အၢအၢသီသီလီၤ. (မးသဲ ၂၆:၃၈) လၢယ့ၣ်ၡူးအဂီၢ် တၢ်လၢအရ့ဒိၣ်ကတၢၢ်န့ၣ် မ့ၢ်ဝဲအပၢ်အမံၤ ကဘၣ်တၢ်မၤလၤကပီၤအီၤန့ၣ်လီၤ. အဝဲဘၣ် တၢ်စံၣ်ညီၣ်အီၤလၢ အကတိၤကမၣ်ယွၤအဃိ အဝဲဘၣ်ယိၣ်လၢ အတၢ်သံန့ၣ် ကမၤဘၣ်ဒိ ကစၢ်ယွၤအမံၤလီၤ. လၢတၢ်န့ၣ်အဃိ ယဟိဝၤယွၤ အတၢ်ကတိၤန့ၣ် ကဒုးနာ်န့ၢ်ယ့ၣ်ၡူးလၢ ယဟိဝၤယွၤအမံၤန့ၣ် ကဘၣ်တၢ်မၤလၤကပီၤအီၤ သပှၢ်ကတၢၢ်လီၤ. ဒီးအပၢ်အတၢ်ကတိၤန့ၣ် ကမၤမုာ်ထီၣ်အသး ဒီးကဟ့ၣ်အီၤတၢ်ဂံၢ်တၢ်ဘါ ဒ်သိးလဲၤခီဖျိဝဲ တၢ်ကီတၢ်ခဲလၢ ကထံၣ်ဘၣ်ဝဲတဖၣ် ကန့ၢ်အဂီၢ်လီၤ. ဖဲန့ၣ်အဆၢကတီၢ် လၢပှၤအိၣ်ဖဲန့ၣ်တဖၣ်အကျါ ထဲဒၣ်ယ့ၣ်ၡူးတဂၤန့ၣ် နၢ်ပၢၢ်အပၢ်တၢ်ကတိၤအံၤလီၤ. ဘၣ်ဆၣ် ယဟိဝၤယွၤဒုးသ့ၣ်ညါ ပဝဲခဲလၢာ်လၢ အတၢ်ကတိၤအံၤန့ၣ်လီၤ.—ယိၤဟၣ် ၁၂:၂၉, ၃၀.
ယဟိဝၤယွၤ ကမၤလၤကပီၤအမံၤ ဒီးကမၤပူၤဖျဲး အခ့အပှၤတဖၣ် (ကွၢ်လံာ်အဆၢ ၁၆) *
၁၆. တဘျီတခီၣ်န့ၣ် ဘၣ်မနုၤအဃိ ပကဘၣ်ယိၣ်တၢ်လၢ ကစၢ်ယွၤအမံၤအဂီၢ်လဲၣ်.
၁၆ ဒ်ယ့ၣ်ၡူးအသိး ပဝဲသ့ၣ်တဖၣ်စ့ၢ်ကီး ပဘၣ်ယိၣ်တၢ်လၢ ကစၢ်ယွၤအမံၤ ကဘၣ်တၢ်ဒုၣ်ဒွဲၣ်စံးအၢအီၤလီၤ. ဘၣ်သ့ၣ်သ့ၣ် ပှၤကရ့ဒီးပှၤ တတီတလိၤ ဒ်ယ့ၣ်ၡူးအသိးလီၤ. မ့တမ့ၢ် ပှၤလၢအထီဒါတၢ်တဖၣ် ကမၤတံာ်တာ်ပှၤခီဖျိ တဲဟးဂီၤပဂ့ၢ်လီၤ. ဒီးဘၣ်သ့ၣ်သ့ၣ် ပကဆိကမိၣ်ဘၣ်လၢ ပှၤဂၤအတၢ်ကတိၤတဖၣ်အံၤန့ၣ် ကမၤဘၣ်ဒိ ကစၢ်ယွၤဒီး အတၢ်ကရၢကရိအမံၤလီၤ. ဖဲန့ၣ်အဆၢကတီၢ် ယဟိဝၤယွၤအတၢ်ကတိၤဖဲ ယိၤဟၣ် ၁၂:၂၇, ၂၈ န့ၣ်ကဲထီၣ် တၢ်ဂံၢ်တၢ်ဘါလၢ ပဂီၢ်ဒိၣ်မးလီၤ. ဘၣ်ဃးဒီး ပှၤဂၤတဖၣ် ကမၤဘၣ်ဒိ ကစၢ်ယွၤဒီး အတၢ်ကရၢကရိအမံၤန့ၣ် ပတလိၣ်ဘၣ်ယိၣ်တၢ် အါတလၢဘၣ်. ပနာ်သ့သပှၢ်ကတၢၢ်လၢ ‘ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါ နၢ်ပၢၢ်တၢ်န့ၣ် ကပၢၤပသူၣ်ပသးဒီး ပဆိကမိၣ်တၢ်လၢယ့ၣ်ၡူးခရံာ်အပူၤလီၤ.’ (ဖံလံးပံၤ ၄:၆, ၇) ယဟိဝၤယွၤ ကမၤလၤကပီၤအမံၤ ထီဘိလီၤ. အဝဲကသူဝဲ အဘီအမုၢ် ဒီးကမၤဂ့ၤထီၣ်က့ၤ တၢ်ဟးဂူာ်ဟးဂီၤခဲလၢာ်လၢ မုၣ်ကီၤလံၢ်ဒီး ပှၤဟီၣ်ခိၣ်ဖိတဖၣ် ဒုးအိၣ်ထီၣ်ဝဲလၢ ကစၢ်ယွၤအခ့အပှၤတဖၣ် အဂီၢ်န့ၣ်လီၤ.—စံးထီၣ်ပတြၢၤ ၉၄:၂၂, ၂၃; ယၡါယၤ ၆၅:၁၇.
ဆၢကတီၢ်ခဲအံၤ နဒိးန့ၢ်ဘၣ်အဘျုးလၢ ကစၢ်ယွၤအတၢ်ကတိၤသ့
၁၇. ဒ် ယၡါယၤ ၃၀:၂၁ ပာ်ဖျါထီၣ်ဝဲအသိး ဆၢကတီၢ်ခဲအံၤန့ၣ် ယဟိဝၤယွၤ ကတိၤတၢ်ဒီးပှၤ လၢကျဲဒ်လဲၣ်.
၁၇ မုၢ်မဆါတနံၤအံၤစ့ၢ်ကီး ယဟိဝၤယွၤ တဲတၢ်ဒီးပှၤဒံးလီၤ. (ဖး ယၡါယၤ ၃၀:၂၁ တက့ၢ်.) ဘၣ်ဆၣ် ပတနၢ်ဟူဘၣ် ကစၢ်ယွၤအတၢ်ကတိၤ လၢမူခိၣ်န့ၣ်ဘၣ်. အဝဲဟံးစုနဲၣ်ကျဲပှၤ ခီဖျိလၢ အကလုၢ်ကထါ လံာ်စီဆှံလီၤ. တကးဒံးဘၣ် ယဟိဝၤယွၤ အသးစီဆှံ ထိၣ်ဟူးထိၣ်ဂဲၤထီၣ် “အခ့အပှၤလၢအကလုၢ်တီ” ဒ်သိးကလုၢ်အီၣ်လုၢ်အီဝဲ အခ့အပှၤတဖၣ်အဂီၢ်လီၤ. (လူၤကၣ် ၁၂:၄၂) ပဒိးန့ၢ်ဘၣ် နီၢ်သးအတၢ်အီၣ်တၢ်အီအါမး ခီဖျိလၢ လံာ်လဲၢ်လၢ ပှၤစဲကျံးထုးထီၣ်အီၤ, လၢအ့ထၢၣ်နဲး, တၢ်ဂီၤမူတဖၣ် ဒီးလံာ်လဲၢ်လၢ ပှၤသွီဃာ်တၢ်ကလုၢ်န့ၣ်လီၤ.
၁၈. ယဟိဝၤယွၤ အတၢ်ကတိၤတဖၣ်န့ၣ် မၤဂၢၢ်ကျၢၤထီၣ်နတၢ်နာ် ဒီးဟ့ၣ်ဆူၣ်ထီၣ် နဂံၢ်နဘါဒ်လဲၣ်.
၁၈ ထီဘိန့ၣ် မ်ပသ့ၣ်နီၣ်ထီၣ်က့ၤ ယဟိဝၤယွၤအတၢ်ကတိၤတဖၣ်လၢ အတဲဝဲ ဖဲအဖိခွါ အိၣ်လၢဟီၣ်ခိၣ်အခါန့ၣ်တက့ၢ်. ဒီးမ်ပနာ်န့ၢ် ကစၢ်ယွၤအတၢ်ကတိၤလၢ လံာ်စီဆှံအပူၤ လၢအတဲဝဲဘၣ်ဃးဒီး တၢ်ခဲလၢာ်န့ၣ် အိၣ်လၢယဟိဝၤယွၤအစုပူၤ ဒီးတၢ်ဟးဂူာ်ဟးဂီၤလၢ မုၣ်ကီၤလံၢ်ဒီး ပှၤဟီၣ်ခိၣ်ဖိတဖၣ် ဒုးအိၣ်ထီၣ်ဝဲန့ၣ် အဝဲကမၤဂ့ၤထီၣ်က့ၤဝဲ ခဲလၢာ်န့ၣ်တက့ၢ်. တကးဒံးဘၣ် မ်ပပာ်လီၤပသးလၢ ပကဒိကနၣ် ယဟိဝၤယွၤအကလုၢ် လီၤတံၢ်လီၤဆဲးန့ၣ်တက့ၢ်. ပမ့ၢ်မၤဒ်န့ၣ်န့ၣ် ပမ့ၢ်ထံၣ်ဘၣ်ဒီး တၢ်ကီတၢ်ခဲလၢ ဆၢကတီၢ်ခဲအံၤမ့ၢ်ဂ့ၤ လၢခါဆူညါမ့ၢ်ဂ့ၤ ပအိၣ်ဒီးတၢ်တူၢ်န့ၢ်ခီၣ်ကဲ တုၤလၢအကတၢၢ် ကသ့ဝဲလီၤ. လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ “သုဝံသးစူၤအလီၢ်အိၣ်ဝဲ, ဒ်သိးသုမၤဖဲယွၤအသးဝံၤဒီး, သုကန့ၢ်ဘၣ်တၢ်စံးပာ်တဖၣ်လီၤ.”—ဧ့ၤဘြံၤ ၁၀:၃၆.
တၢ်သးဝံၣ် ၄ ယဟိဝၤမ့ၢ် ယပှၤကွၢ်သိ
^ လံာ်အဆၢ. 5 ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ ယဟိဝၤယွၤတဲတၢ်ဒီးအီၤ လၢမူခိၣ်န့ၣ် အိၣ်ဝဲသၢဘျီလီၤ. ဖဲန့ၣ်အကျါတဘျီန့ၣ် ယဟိဝၤယွၤ ဟ့ၣ်ဂံၢ်ဟ့ၣ်ဘါဝဲ ခရံာ်အပျဲၢ်အဘီၣ်တဖၣ်လၢ ကဒိကနၣ်ဝဲ အဖိခွါအကလုၢ်လီၤ. ဆၢကတီၢ်ခဲအံၤန့ၣ် ယဟိဝၤယွၤတဲတၢ်ဒီးပှၤ ခီဖျိလၢအကလုၢ်ကထါ လံာ်စီဆှံ, ပၣ်ဃုာ်ဒီးယ့ၣ်ၡူးအတၢ်သိၣ်လိနဲၣ်လိတဖၣ် ဒီးတၢ်ကရၢကရိန့ၣ်လီၤ. လၢတၢ်မၤလိအံၤအပူၤ ပကတဲသကိးဘၣ်ဃးဒီး ခီဖျိလၢ ပဒိကနၣ်ယဟိဝၤယွၤ ဒီးယ့ၣ်ၡူးအကလုၢ်အဃိ ပဒိးန့ၢ်ဘၣ်အဘျုး ဒ်လဲၣ်န့ၣ်လီၤ.
^ လံာ်အဆၢ. 52 တၢ်တဲဖျါထီၣ် တၢ်ဂီၤအခီပညီ– တၢ်အိၣ်ဖှိၣ်သးပှၢ်တဂၤ ပာ်သူၣ်ပာ်သးဝဲလၢ တၢ်အိၣ်ဖှိၣ်အပှၤမၤစၢၤတၢ်တဂၤ မၤစၢၤတၢ်လၢ တၢ်ကွၢ်ထွဲဘှီဂ့ၤထီၣ်က့ၤ ဘီမုၢ်ဘျီၣ်ဒိၣ်ဒီး တၢ်ကွၢ်ထွဲ လံာ်လဲၢ်အလီၢ်န့ၣ်လီၤ. အဃိ အဝဲစံးပတြၢၤဝဲ ဒီပုၢ်ဝဲၢ်ခွါတဂၤအံၤလီၤ.
^ လံာ်အဆၢ. 54 တၢ်တဲဖျါထီၣ် တၢ်ဂီၤအခီပညီ– လၢကီၢ်စံၣ်အဲရၢၣ်လံၣ်အိၣ်န့ၣ် ပှၤဒီမါဝၤခံဂၤ ဟ့ၣ်ဝဲ ပှၤမၤအီၣ်ညၣ်ဖိတဂၤ လၢတၢ်အိၣ်ဖှိၣ်အလံာ်ကွဲမုာ်လီၤ.
^ လံာ်အဆၢ. 56 တၢ်တဲဖျါထီၣ် တၢ်ဂီၤအခီပညီ– လၢထံကီၢ်လၢ ပှၤတြီဃာ် ပတၢ်စံၣ်တဲၤတဲလီၤတၢ်မၤအလီၢ်န့ၣ် ယဟိဝၤပှၤအုၣ်အသးတဖၣ် မၤတၢ်အိၣ်ဖှိၣ်လၢ တၢ်ခူသူၣ်အပူၤလီၤ. အဝဲသ့ၣ် ကူသိး မုၢ်ဆ့ၣ်မုၢ်ဂီၤတၢ်ကူတၢ်ကၤ ဒ်သိးပှၤသုတပာ်သူၣ်ပာ်သး အဝဲသ့ၣ်တဂ့ၤအဂီၢ်လီၤ.
